Mukanda Utangu wa Mianangana
10 Mwazovu wa ku chifuchi cha Shipa yevwa lufuma yoze Solomone apwile nenyi mumu lia jina lia Yehova, chocho yayako hanga amweseke ni yihula yikalu chinji. 2 Yaheta mu Yerusaleme ni atu anji ni tumelu waze te anambata maji a vumba lipema, oru yinji ni mawe a ndando. Iye yasoloka kuli Solomone, yamulweza yuma yeswe yize apwile nayo mu mbunge. 3 Solomone yakumbulula yihula yeswe ya mwazovu. Kukwakapwile chihula nichimwe chize te kechi kuhasa kukumbulula.
4 Muze mwazovu wa ku Shipa evwile maliji a mana a Solomone, ni kumona zuwo lize atungile, 5 kulia chize apwile ni kusa ku mesa yenyi, chize tupitau apwile ni kutwama, milimo ya akwa-kusa kulia ku mesa ni mazalo jo, akwa-kuhana misenge ni milambu ya kwocha yize te akulambula ku zuwo lia Yehova, iye yakomoka chinji. 6 Yamba ngwenyi: “Yuma yeswe yize nevwile muze te nguli ku chifuchi chami, milimo ye ni mana je, kumana te yili yamwenemwene. 7 Alioze, natayiza wika yize angulwezele muze hinayimona ni meso jami, kwamba pundu, kakangulwezele yuma yeswe. Yuma yize namona, mana ni upite, yinahiana chinji yize nevwile. 8 Kawaha atu je ni tuvumbi twe waze akumana matangwa eswe kumeso je hanga apanjike maliji je a mana. 9 Yehova Zambi ye afumane, yoze wawahilila hali yena ni kukusa ha ngunja ya A-Izalele. Mumu lia zango lia mutolo lia Yehova hali A-Izalele, iye kakutongola upwe mwanangana hanga uyule ni ululi ni ungunu.”
10 Chocho mwazovu yahana kuli mwanangana 120 talentu ja oru, maji anji a vumba lipema ni mawe a ndando. Niumwe te kanda achineha kama maji anji a vumba lipema ngwe waze mwazovu wa ku Shipa ahanyine kuli Mwanangana Solomone.
11 Maulungu a Hirame waze te akututa oru yize te yakukatuka ku Ofiri, yatuta nawa mapaya anji a mitundo ya mialumuke ni mawe a ndando. 12 Mapaya a mitondo ya mialumuke e mwanangana alingile no manguji a zuwo lia Yehova ni a zuwo lienyi. Yalinga no nawa tulialia ni yisaji ya kusa ya akwa-kwimba. Ndo musono kanda kuchipwa mapaya anji a mitondo ya mialumuke ngwe waze anehene ha shimbu liacho.
13 Mwanangana Solomone yahana kuli mwazovu wa ku Shipa yuma yeswe yize echile, kuwezaho nawa yuma yize Solomone mwene amuhele. Mba yahiluka ni tuvumbi twenyi ku chifuchi chenyi.
14 Kulema cha oru yize Solomone apwile ni kutambula ha mwaka, yapwile ya 666 talentu, 15 kuwezaho nawa oru yize apwile ni kumunehena kuli akwa-mingoso, kuli mianangana eswe a mu chifuchi cha Arabia ni kuli manguvulu a mu chifuchi.
16 Mwanangana Solomone yalinga kepwe jinene-jinene ja oru 200 (lukepwe umuwika kapwile ni 600 a shekele ja oru) 17 yalinga nawa 300 a kepwe jikehe-jikehe ja oru ya kutatula (lukepwe umuwika mukehe kapwile ni mina jitatu ja oru). Chocho, mwanangana yasa yuma yacho mu Zuwo lia ku Usaki wa Lebano.
18 Mwanangana yalinga nawa ngunja yinene ya mazo a njamba, yayifuka ni oru yipema. 19 Ngunja yacho yapwile ni ndalo jisambano, helu lia ngunja hapwile ha kufuka. Ngunja yapwile ni ushachilo wa moko. Sali ni sali lia ushachilo wacho kwapwile chizulie cha ndumba. 20 Ha ndalo jisambano hapwile yizulie ya ndumba 12, sali ni sali. Kukwakapwile nawa mwanangana mukwo wapwile ni ngunja ngwe yize.
21 Misenge yeswe ya Mwanangana Solomone yapwile ya oru, yikashi yeswe ya ku Zuwo lia mu Usaki wa Lebano yapwile ya oru yipema, kukwakapwile chuma nichimwe cha prata. Mumu ha matangwa ja mwanangana Solomone, atu te keshi kulemesa prata. 22 Mwanangana kapwile ni maulungu a ku Tashi waze te akuzauka ni maulungu a Hirame. Kamuwika ha miaka yitatu, maulungu jacho te kakuneha oru, prata, mazo a njamba, mandavu ni tujila avuluka ngwo, pavao.
23 Mwanangana Solomone kapwile pichi, kapwile ni mana anji kuhiana mianangana eswe a hashi. 24 Atu a hashi heswe te kakuzanga kuya kuli Solomone hanga evwe maliji a mana waze Zambi amusele mu mbunge. 25 Yino ye yawana yize atu jacho apwile ni kumunehena: Yikwachilo ya prata, yikwachilo ya oru, mazalo, mata, maji a vumba lipema, tuvwalu ni yimbulu. Yuma yino ye te akumunehena ha mwaka ni mwaka.
26 Solomone yanunga ni kwokesa matemba a jita ni tuvwalu; kapwile ni matemba a jita 1,400 ni tuvwalu 12,000. Yuma yino te kakuyitulikila mu mbonge ya matemba a jita, mu Yerusaleme, hakamwihi ni mwanangana.
27 Ha matangwa ja mwanangana Solomone, mu Yerusaleme prata yapwile yinji chinji ngwe mawe; mapaya a mutondo wa sedru kapwile anji chinji ngwe misuwa ya mu Sefela.
28 Tuvwalu a Solomone te kakwalanjila ku Engitu. Akwa-kulanda tuvwalu a mwanangana te kakulanda yendo ya tuvwalu ha ndando yize hanatese kulu. 29 Hakutwala ku matemba a jita waze te akulanda ku Engitu, temba limuwika te liakufwika 600 a mbongo ja prata, kavwalu umuwika te kakufwika 150 a mbongo ja prata. Iye te kakwalanjisa kuli mianangana eswe A-Hete ni kuli mianangana A-Seria.