Mukanda Wamuchiali wa Samuele
7 Muze mwanangana Ndawichi te hatwama mu zuwo lienyi, Yehova hamwaha sambukila ha kumulamwina kuli akwa-kole jenyi eswe waze te amujingilika, 2 mwanangana yamba kuli profeta Natane ngwenyi: “Talenu, yami natwama mu zuwo lia kutunga ni mitondo ya sedru, alioze Mushete wa Zambi wamwenemwene uli mu mbalaka.” 3 Chocho, Natane yamba kuli mwanangana ngwenyi: “Lingenu yeswayo mbunge yenu muyizanga, mumu Yehova kali hamwe ni yenu.”
4 Ha ufuku uzewene, Yehova yalweza Natane ngwenyi: 5 “Yako ulweze kavumbi kami Ndawichi ngwe, ‘Yehova kanambe ngwenyi: “Shina yena mwe mungutungila zuwo hanga ngutwamemo nyi? 6 Yami kanda nguchitwama kama mu zuwo nilimwe chize ha tangwa lize nachijile A-Izalele mu Engitu ndo musono. Alioze nakututulwoka chihela ni chihela, nakutwama mu mbalaka ni mu tabernakulu. 7 Ha mashimbu wano eswe nenda ni A-Izalele, shina hingunahula kuli umwe wa kuli tusongo twa minyachi ya A-Izalele yoze natongwele hanga afunge atu jami A-Izalele ngwami: ‘Mumu liaka yenu kunwangutungilile zuwo lia mitondo ya sedru?’”’ 8 Haliapwila, lweza kavumbi kami Ndawichi ngwe: ‘Yehova wa tujita kanambe ngwenyi: “Yami nakuchijile ku kelo kuze te unalisa mapanga hanga upwe kasongo ka atu jami A-Izalele. 9 Mungupwa ni yena kweswako muoya, mungunongesa akwa-kole je eswe. Mungufumanyisa jina lie, mulipwa ngwe lia atu alemu a hashi. 10 Mungukasakula chimwe chihela hanga atu jami A-Izalele akatwamemo. Ayo makatwamamo, niumwe makaapinjisa nawa wakuhi. Yingulungulu kechi kamwesa nawa atu jami lamba ngwe chize alingile ku mashimbu a kunyima 11 chize ha tangwa lize natongwele akwa-kuyula hanga ayule atu jami A-Izalele. Mungukuhwimisa ha kukulamwina kuli akwa-kole je eswe.
“‘“Chikwo nawa, Yehova kanambe ngwenyi, mianangana eswe waze masulaho Yehova makaasakula mu munyachi* we. 12 Muze mwono we himuusula, himuoya hanga ukahwime hamwe ni tulamba twe, mungukatongola munyachi we, mwane, mungukakolesa wanangana wenyi. 13 Iye mwe makatunga zuwo mumu lia jina liami, yami mungukakolesa ngunja ya wanangana wenyi ku miaka ya mutolo. 14 Yami mungupwa tato, iye makapwa mwanami. Nyi mahengesa, mungumulamba ni kumufumba ngwe chize atu akulinga. 15 Chichi kalitwamina kumukwasa* ngwe chize nalingile kuli Saulu yoze nachijile ha wanangana kumeso je. 16 Hakutwala kuli yena, usoko we ni wanangana we, muyikakola kumeso je ku miaka ya mutolo. Ngunja ye muyikakola ku miaka ya mutolo.”’”
17 Natane yalweza Ndawichi maliji wano eswe ni usolwelo uze amwene.
18 Chocho, Mwanangana Ndawichi yanjila, yatwama kumeso ja Yehova, yamba ngwenyi: “Yami iya, Mwene Yehova? Asoko* jami aya, mba te unguhetese ndo hano? 19 Mwene wami Yehova, wangulingila yuma yinji, chipwe chocho unambe nawa ngwe asoko ja yami kavumbi ke matwama matangwa anji ha miaka muyizako. Mwene wami Yehova, niumwe mahasa kwalumuna shimbi yino wakuhi. 20 Mba yika nawa mungwamba yami kavumbi ke Ndawichi? Mumu unangunyingika kanawa, Mwene wami Yehova. 21 Mumu lia liji lie, kulita ni mbunge ye, walinga yuma yeswe yino yinene ni kuyisolola kuli yami kavumbi ke. 22 Kashika uli munene, Mwene Yehova. Kukushi niumwe walifwa ni yena, kukushi Zambi mukwo shina wika yena. Yuma yeswe yize hitwevwa, yinatwehe shindakenyo ha chikuma chino. 23 Vungu lika hashi liapwa ngwe atu je A-Izalele? Zambi, waakuulile hanga apwe atu je, wafumanyishine jina lie ha kwalingila yuma yinene-yinene kole ni woma. Wahumine mavungu eka ni tuzambi two hanga uyukise atu je waze wachijile mu Engitu. 24 A-Izalele hiwaapwisa atu je ku miaka yeswe. Yena Yehova hiwapwa Zambi yo.
25 “Haliapwila Yehova Zambi, manununa ku miaka yeswe chilakenyo chize wangulakenya yami kavumbi ke ni akwa-zuwo liami. Linga ngwe chize hiwalakenya. 26 Jina lie lifumane ku miaka yeswe hanga atu ambe ngwo, ‘Yehova wa tujita iye Zambi wa A-Izalele.’ Jikijisa kama usoko wa yami kavumbi ke Ndawichi kumeso je. 27 Mumu yena Yehova wa tujita, Zambi wa A-Izalele, hiwangusolwela chimwe yami kavumbi ke ha kwamba ngwe: ‘Mungukolesa wanangana we.’ Kashika yami kavumbi ke napwa ni hamu lia kulemba kuli yena. 28 Mwene Yehova, yena uli Zambi wamwenemwene, ni maliji je kali amwenemwene. Yena walakenya yuma yino yipema kuli yami kavumbi ke. 29 Kashika, nyi muchilita kama ni upale we, wahisa kama usoko wa yami kavumbi ke hanga ununge kumeso je ku miaka yeswe. Mumu yena, Mwene Yehova walakenya yuma yino. Wahisa kama asoko ja yami kavumbi ke ku miaka yeswe.”