Mukanda Wamuchiali wa Samuele

21 Ha matangwa ja Ndawichi kwapwile zala ha miaka yitatu, chocho Ndawichi yahula Yehova, Yehova yamukumbulula ngwenyi: “Saulu ni akwa-zuwo lienyi, kali ni mulonga wa manyinga, mumu iye kashihile A-Ngibeone.” 2 Kashika, mwanangana yasanyika A-Ngibeone, yahanjika no. (A-Ngibeone kakapwile A-Izalele, kapwile A-Amone waze asalile. A-Izalele kalishingile ngwo kechi kwanongesa, alioze Saulu yazanga kwashiha, mumu kazangile chinji kufunga A-Izalele ni A-Yunda.) 3 Ndawichi yahula A-Ngibeone ngwenyi: “Yika natamba kunulingila? Kuchi munguhasa kuchiza shili yino mu Izalele, hanga nuwahise atu ja Yehova?” 4 A-Ngibeone yamukumbulula ngwo: “Mulonga tulinawo ni Saulu ni akwa-zuwo lienyi kuwatalile ha prata chipwe ha oru, chikwo nawa, chichi kulita tushihe mutu niumwe mu Izalele.” Chocho Ndawichi yamba ngwenyi: “Mungulinga yeswayo munungwita.” 5 Ayo yamba kuli mwanangana ngwo: “Hakutwala kuli mutu yoze watunongesene, yoze wazangile kutukuwisa mu Izalele mweswe, 6 twehe ana jenyi a malunga shimbiali, yetu mutwasukika kumeso ja Yehova mu Ngibia ya Saulu, mutu yoze Yehova atongwele.” Mwanangana yamba ngwenyi: “Mungunwaha-o.”

7 Alioze mwanangana yevwila keke Mefiposhete, mwana wa Jonata, mujikulu wa Saulu, mumu lia shingo lize Ndawichi ni Jonata, mwana wa Saulu alishingile kumeso ja Yehova. 8 Chocho, mwanangana yanda Armoni ni Mefiposhete, ana a malunga aali, waze Rizipa, mwana wa Aya asemene ni Saulu ni ana atano a Mikale, mwana wa pwo wa Saulu, waze asemene ni Adriele, mwana wa Bazilai, Ka-Meholate. 9 Iye yaahana kuli A-Ngibeone, ayo yaasukika ha mulundu kumeso ja Yehova, eswe shimbiali yafwa. Kaashihile ha matangwa atangu a kucha, ku uputukilo wa kucha cha sevada. 10 Chocho Rizipa mwana wa Aya, yanda chikeleyi, yala helu lia liwe, yatwamaho chize ku uputukilo wa kucha mbuto ndo muze vula anokene hali afu waze asukikile. Mwalwa, iye te keshi kwecha hanga tujila apwile hali ayo, chipwe ufuku te keshi kwecha hanga tushitu a mu yambu akundame kuli afu.

11 Yalweza Ndawichi yize Rizipa mwana wa Aya, pwo mukwo wa Saulu alingile. 12 Chocho Ndawichi yaya ni kusaka yifwaha ya Saulu ni ya mwanenyi Jonata yize te yili kuli miata ja Njabeshe-Ngiliate. Ayo keyile mijimba ha chitanda cha Mbete-Shane, kuze A-Filistea aasukikile, tangwa lize A-Filistea ashihile Saulu ku Ngilboa. 13 Iye yaneha yifwaha ya Saulu ni yifwaha ya mwanenyi Jonata, yachingaho nawa yifwaha ya atu waze asukikile. 14 Yafunda yifwaha ya Saulu ni ya mwanenyi Jonata mu Zela, mu chifuchi cha Mbenjamine, mu fuka lia tato Kishi. Muze alingile yino yuma yeswe yize mwanangana aatumine, Zambi yevwa kuliumba cho hakutwala ku chifuchi.

15 Yikupwa nawa jita hakachi ka A-Filistea ni A-Izalele. Chocho Ndawichi ni maswalale jenyi yaya ni kwasa jita ni A-Filistea, alioze Ndawichi yahonga chinji. 16 Umwe lunga avuluka ngwo Ishebi-Mbenobe wa ku munyachi wa Refane, kapwile ni kunga lize liapwile ni kulema shekele 300, kapwile nawa ni katana mwaha. Te kwasala hakehe hanga ashihe Ndawichi. 17 Hazehene, Abishai mwana wa Zeluia, yalamwina Ndawichi, yalamba Ka-Filistea wacho, yamushiha. Chocho maswalale ja Ndawichi yalishinga ngwo: “Mwene, kunuchi kwiza keza nawa ni yetu ku jita nilimwe tangwa, hanga nuchine kujima ndeya ya Izalele!”

18 Kulutwe, A-Izalele yasa nawa jita ni A-Filistea ku Ngobe. Ku jita yacho, Sibekai Ka-Husha, yashiha Safa wa ku munyachi wa Refane.

19 A-Izalele yasa nawa jita ni A-Filistea ku Ngobe, Elehana mwana wa Jare-Origime Ka-Mbeteleme, yashiha Ngoliate Ka-Ngata, yoze wapwile ni kunga lize liapwile ni chikundo ngwe mutondo uze akwa-kunuka akuvunga wanda.

20 A-Izalele yasa nawa jita ni A-Filistea, ha chisuho chino ku Ngata. Kwapwile umwe lunga munene, musuku chinji, kwoko limwe liapwile ni minwe yisambano, likwo ni minwe yisambano. Kulu limwe liapwile ni minwe yisambano, likwo ni minwe yisambano. Minwe yeswe yapwile 24. Iye neye kapwile wa ku munyachi wa Refane. 21 Iye kapwile ni kuhamwisa A-Izalele. Kashika Jonata mwana wa Shimei yayo ya Ndawichi, yamushiha.

22 Atu wano awana, kapwile a ku munyachi wa Refane mu Ngata, ayo yaashiha kuli Ndawichi ni kuli maswalale jenyi.