Mukanda Utangu Kuli Timoteu
6 Waze eswe ali mushi lia kanga ya undungo anunge ni kuvumbika miata jo, hanga atu ahone kuhanjika upi ha jina lia Zambi ni ha malongeso jenyi. 2 Chikwo nawa, waze ali ni miata jo Akwa-Kristu kanda aahona vumbi mumu lia kupwa mandumbu. Alioze katamba kwakalakalila ni mbunge yeswe, mumu waze akuyuka ha mulimo wo upema kali akwa-kufuliela, kali nawa mandumbu a zango.
Nunga ni kulongesa yuma yino ni kuhana utakamiso. 3 Nyi mutu malongesa longeso lia mahuza ni kulituna longeso lipema lize liakukatuka kuli Mwene wetu Yesu Kristu, hanji kuhona kutayiza longeso lize linalite ni uwayilo wa Zambi, 4 kali mukwa-kulizata chinji, kanyingikine nichimwe. Kakuzanga kuzwela ni kulihangujola hakutwala ku maliji. Yuma yino yakuneha chipululu, mbwanja, kuyenga-yenga ni manyonga api, 5 ni yikokojola hakutwala ku yuma yize kuyishi ulemu hakachi ka atu waze hanapianguka, keshi umwenemwene, akunyonga ngwo kuwayila Zambi yili jila ya kuzukilamo yuma. 6 Kwamba pundu, kuwayila Zambi ni kuwahilila ni yuma yize tuli nayo, chakuyukisa chinji. 7 Mumu kutwanehene nichimwe hano hashi, kutuchi kuhasa nawa kumbata chuma nichimwe. 8 Kashika, nyi tuli ni yize mutulia ni yize mutuzala,* tuwahililenu nayo.
9 Alioze waze anazange kupwa pichi kakunjila mu cheseko ni kufwa mu muheto ni mu usolo weka ni weka wamokomoko, upi, uze wakutwala atu ku unongeso ni ku kufwa. 10 Mumu kuzanga mbongo chili chikota cha yuma yeswe yipi, amwe ha kukolesa zango liacho, yapianguka mu ufulielo, yalinehena ene lamba linji.
11 Kashika, yena mutu wa Zambi, china yuma yino. Alioze fupa ululi, uwayilo wa Zambi, ufulielo, zango, kunyongonona ni uhomboloji. 12 Asa jita yipema ya ufulielo; likwachilile ku mwono wa mutolo uze akusanyikinyine, uze wahanyine uchela upema ha mbunga kumeso ja yela anji.
13 Kumeso ja Zambi, yoze wakuhana mwono ku yuma yeswe, ni kumeso ja Kristu Yesu yoze wahanyine uchela upema kulutwe lia Ponshu Pilatu, ngunakwehe shimbi 14 ngwami, ononokena shimbi yino chakuhona kapalia ni chitela cha kukusumina mulonga ndo ha kusoloka cha Mwene wetu Yesu Kristu, 15 chize Mwene Mukwa-Ndundo umuwika wa kuwahilila makasolola ha shimbu lize atesele. Iye kali Mwanangana wa mianangana waze akuyula, Mwene wa ene waze akuyula, 16 iye wika keshi kufwa, yoze watwama mu pangu lize chikalu kukundama, yoze niumwe mutu kanda achimumona, chikwo nawa keshi kuhasa kumumona. Ulemu ni ndundo yikapwe kuli iye ku miaka ya mutolo. Amene.
17 Hana shimbi kuli waze ali pichi ha mashimbu wano, hanga ahone kulizata chipwe kufuliela ha upite uze muuhasa kuhwa, alioze afuliele muli Zambi yoze wakutwaha yuma yalumbama, yize yakutwaha uwahililo. 18 Alweze hanga alinge yuma yipema, apwe pichi mu yitanga yipema, apwe yihanyi, apwe ni zango lia kulianyina yuma ni akwo, 19 nyi machilinga, malitulikila upite, ye fundamentu yipema ya kulutwe lia matangwa, mba akahase kukakaminya ku mwono wamwenemwene.
20 Timoteu, funga chuma chize akuhele, kanda upanjika pande jamokomoko jize jakuvulumuna yuma yisandu, ehuka yuma yize akuvuluka ngwo “chinyingi,” alioze hi chinyingi ko chamwenemwene. 21 Amwe ha kusolola ngwo kali ni chinyingi chacho, yapianguka ku ufulielo.
Chawana cha keke ya Zambi chikapwe ni yenu.