Mukanda Utangu wa A-Korindu
2 Kashika mandumbu, muze napwile hamwe ni yenu chakanwambulwilile chijimbikilo chisandu cha Zambi ni maliji hanji mana ahiana. 2 Mumu chakazangile kunyingika nichimwe mukachi kenu, shina wika hakutwala kuli Yesu Kristu yoze wafwile ha mutondo wa lamba. 3 Kashika muze nejile kuli yenu, napwile mulelu, nachikimine ni kwivwa woma unji; 4 ha kuhanjika ni kulongesa ami chakapwile ni kuhanjika maliji apema kulita ni mana ja atu, alioze maliji jami kasolwele ndundo ja spiritu yisandu, 5 hanga ufulielo wenu uhone kukatuka ha mana ja atu, alioze ku ndundo ja Zambi.
6 Mumu twakuhanjika hakutwala ku mana kuli atu waze ajama ku ufulielo, alioze hi hakutwala ko ku mana ja mwakono* chipwe mana ja manguvulu a mwakono waze chiyulo cho muchikahwa. 7 Yetu twakuhanjika mana a Zambi waze ahengamine mu chijimbikilo chisandu. Zambi katesele mana jacho shimbu te atu kanda aputuka kulinga yuma hanga tupwe ni chihela cha uhaliso. 8 Wano kali mana waze manguvulu a mwakono* kanyingikine, mumu nyi te kanaanyingika, kachi kakahachilile Mwene wetu wa uhenya ha mutondo wa lamba. 9 Ngwe chize chinasonewa ngwo: “Yuma yize meso kechi kuhasa kumona ni yize matwi kechi kuhasa kwivwa, yili yuma yize chipwe atu kechi kuhasa kuyinyonga mu mbunge jo, mumu Zambi hanayiluliekela waze akumuzanga.” 10 Alioze, Zambi hanayisolola kuli yetu kupalikila mu spiritu yenyi, mumu spiritu yakuhengwola yuma yeswe, chipwe yuma yikalu ya mana a Zambi.
11 Hakutwala kuli atu, iya yoze mahasa kunyingika yize mutu mukwo ananyongo? Mutu mwene mwe mahasa kunyingika yize ananyongo. Chizechene nawa, niumwe yoze mahasa kunyingika manyonga a Zambi wakuhi, shina wika spiritu yenyi yisandu. 12 Yetu kutwatambwile spiritu ya hano hashi, alioze spiritu yize yakukatuka kuli Zambi, hanga tukanyingike yuma yize Zambi hanatwehe ha zango lienyi. 13 Ni yetu nawa, twakuhanjika hakutwala ku yuma yacho, hi ni maliji ko a mana waze atu akulongesa, alioze ni aze spiritu yakulongesa muze twakulumbununa* yikuma ya spiritu ni maliji a spiritu.
14 Alioze mutu wa musunya kechi kutayiza* yuma ya ku spiritu ya Zambi, mumu kuli iye yapwa uhepuke. Kashika kechi kuhasa kuyinyingika mumu yuma yacho kakuyihengwola kulita ni spiritu. 15 Alioze mutu wa spiritu kakuhengwola yuma yeswe, mba iye mwene keshi kumuhengwola kuli mutu niumwe. 16 Mumu “iya mahasa kunyingika manyonga a Yehova* mba amulongese?” Yetu tukwete kunyonga cha Kristu.