Asonekene Mateu

26 Kashika, muze Yesu ahwishile kwamba yino yuma yeswe, yalweza tumbaji twenyi ngwenyi: 2 “Nunanyingika ngwenu, kwasala matangwa aali hanga tulinge chiwanyino cha Chizomboka, mwe Mwana-mutu makamukunjika hanga amushihile ha mutondo.”

3 Hohene, asasendote a lutwe ni makulwana ja atu yakungulukila mu chihela cha mwata wa asasendote a lutwe, yoze te avuluka ngwo Kayafwa, 4 yatwama punga hanga aliongele Yesu yuma ya mahuza amukwate ni kumushiha. 5 Alioze ayo yamba ngwo: “Kanda tumukwata ha mashimbu a chiwanyino, kuchina hanji mukukapwa chizungo-zungo hakachi ka atu.”

6 Muze te Yesu uchili ku Mbetaniya mu zuwo lia Semone mukwa-mbumba, 7 umwe pwo yakundama kuli iye, te kali ni mulangi wa maji a vumba lipema a ndando yinji, yaputuka kwazujila ha mutwe wa Yesu, muze te anali. 8 Muze tumbaji hachimona, yevwa kupiha, yamba ngwo: “Mumu liaka anakisa maji chize? 9 Kachi kaalanjisa mbongo jinji, hanga ajihane kuli yiswale.” 10 Muze Yesu hachinyingika, yaamba ngwenyi: “Mumu liaka nunapinjisa pwo yono? Chuma chize alinga hali yami chili chipema chinji. 11 Mumu yiswale kali hamwe ni yenu matangwa eswe, alioze yenu kunuchi kupwa ni yami matangwa eswe. 12 Pwo yono hazujila maji a vumba lipema ha mujimba wami, kachilinga hanga angululieke ha kungufunda. 13 Pundu ngunanulweze ngwami: Kweswako atu makambujola sango jipema hashi heswe, chuma chino pwo yono alinga, makachambujola hanga akamwiwuluke.”

14 Henaho, umwe wa kuli e Kumi ni Aali yoze avuluka ngwo, Yundase Ka-Keriote, yaya kuli asasendote a lutwe, 15 yamba ngwenyi: “Yika munungwaha hanga ngumukunjike kuli yenu?” Yalitesa hanga amwehe 30 a mbongo ja prata. 16 Kukatuka ha tangwa lize, yaputuka kufupa uhashi upema hanga amukunjike.

17 Ha tangwa litangu lia Chiwanyino cha Mbolo kuyishi Futunwiso, tumbaji yakundama kuli Yesu, yamuhula ngwo: “Kulihi unazange hanga tululiekeleko yuma ya Chizomboka?” 18 Iye yamba ngwenyi: “Yeenu mu mbonge kuli umwe lunga, numulweze ngwenu: ‘Longeshi kamba ngwenyi: “Mwaka wami anguselele hiwakundama; ngunazange kwiwuluka Chizomboka ni tumbaji twami mu zuwo lie.”’” 19 Chocho tumbaji yalinga ngwe chize Yesu aalwezele, yalulieka Chizomboka.

20 Ha chingoloshi, Yesu te kanatwama ku mesa ni tumbaji twenyi 12. 21 Muze te anali, iye yamba ngwenyi: “Pundu ngunambe kuli yenu ngwami, umwe wa kuli yenu mangukunjika.” 22 Ayo yevwa chinyengo chinji, chocho mutu ni mutu yaputuka kumuhula ngwenyi: “Mwene, shina yami?” 23 Yesu yakumbulula ngwenyi: “Yoze unase kwoko ha longa hamwe ni yami mwenawo mangukunjika. 24 Pundu, mwe Mwana-mutu maya kwenyi, ngwe chize chinasonewa hakutwala kuli iye. Alioze lamba kuli mutu yoze makunjika mwe Mwana-mutu! Hapwa kama nyi mutu wacho te kasemukine kwenyi.” 25 Yundase yoze te unafupu kumukunjika, yahula ngwenyi: “Longeshi, shina yami nyi?” Yesu yamukumbulula ngwenyi: “Yena mwene unachambe.”

26 Shimbu te machilia, Yesu yanda mbolo, muze halemba, yayipalula ni kuyihana kuli tumbaji twenyi, yamba ngwenyi: “Wenu, lienu. Mbolo yino yinalumbunuka mujimba wami.” 27 Mba yanda musenge, yalemba, yauhana kuli tumbaji twenyi, yamba ngwenyi: “Nwenumo, yenu eswe, 28 mumu vinyu yino yinalumbunuka ‘manyinga jami a usendo,’ waze mamwangana mumu hali anji, hanga akonekene shili yo. 29 Alioze ngunanulweze ngwami: Chichi kanwa nawa vinyu nilimwe tangwa, ndo ha tangwa lize mungunwa ni yenu vinyu yaha, mu Wanangana wa Tata.” 30 Mba muze hemba miaso ya uhaliso,* yaya ku Mulundu wa Olevwe.

31 Mba Yesu yamba kuli ayo ngwenyi: “Ufuku uno, yenu eswe munutalinga mumu lia yami, mumu chinasonewa ngwo: ‘Mungukalamba kafunga mba mapanga eswe mu tanga kumakamwangana.’ 32 Alioze, muze makanguhindwisa, mungutetekela kulutwe lienu ku Ngalileya. 33 Alioze Petulu yamukumbulula ngwenyi: “Chipwe ngwe akwetu eswe matalinga hali yena, yami chichi kutalinga nilimwe tangwa!” 34 Yesu yamba kuli iye ngwenyi: “Pundu ngunambe kuli yena ngwami, ufuku unowene, shimbu ndemba kanda achisanyika, mukalikala yami katatu keswe.” 35 Petulu yamulweza ngwenyi: “Chipwe ngwe mungufwa hamwe ni yena, nihindu chichi kalikala yena nilimwe tangwa.” Tumbaji eswe no yamba chochene.

36 Yesu yaheta no ku chimwe chihela avuluka ngwo Ngetesemane, mba yalweza tumbaji twenyi ngwenyi: “Twamenu hano, shimbu yami ngunayi akuze ni kulemba.” 37 Yaya hamwe ni Petulu ni ana aali a Zebedeu, mba yaputuka kwivwa chinyengo ni kulema mu mbunge. 38 Yaalweza ngwenyi: “Ngunevu chinyengo chinji ngwe mungufwa. Salenu hano, nungenu ni kulawola hamwe ni yami.” 39 Mba muze hasenya ndambu kulutwe, yafulamana, yalemba ngwenyi: “Tata, nyi muchilita, lisesa, echa kama musenge uno ukatuke kuli yami. Chilingiwe, hi ngwe chize yami ngunazange ko, alioze ngwe chize yenu nunazange.”

40 Yesu yahiluka kuli tumbaji, yaawana te kanapombo, mba yalweza Petulu ngwenyi: “Kunwahashile kununga ni kulawola hamwe ni yami chipwe ola yimuwika nyi? 41 Nungenu ni kulawola, nungenu ni kulemba hanga nuhone kunjila mu cheseko. Mumu spiritu yinazange, alioze mujimba* ulelu.” 42 Cheka nawa, ha chisuho chamuchiali yasosoloka, yalemba ngwenyi: “Tata, nyi chalitele kuchiza musenge uno kuli yami, alioze ndo nguunwe, upale wenu ulingiwe.” 43 Yesu yahiluka cheka nawa, yaawana kanapombo, mumu meso jo te kanalemenena ni tulo. 44 Alioze, yaahichika, yasosoloka cheka nawa, mba yalemba chisuho chamuchitatu ni kuhilukila maliji waze ene. 45 Yafuna kuli tumbaji twenyi, yaalweza ngwenyi: “Wano hi mashimbu ko a kupomba ni kuhwima! Talenu! Ola ya kukunjika Mwana-mutu ku moko ja yivulumunyi hiyaheta. 46 Katukenu, tuyenu. Talenu! Mukwa-kungukunjika kanakundama.” 47 Shimbu iye te machihanjika, Yundase, umwe wa kuli Kumi ni Aali yaheta, hamwe ni mbunga yinene ya atu kanambata tutana ni mitondo. Asasendote a lutwe, ni makulwana ja atu e atumine mbunga yacho.

48 Mukwa-kumukunjika kaehele chilayi ngwenyi: “Mutu yoze yami mungwaha mbeju mwenawo, mukwatenu.” 49 Hazehene Yundase yakundama kuli Yesu, yamba ngwenyi: “Longeshi, ngunakumeneka!” mba yamwaha mbeju. 50 Alioze Yesu yamwamba ngwenyi: “Mukwetu, yika weza ni kulinga kuno?” Hohene, ayo yeza, yakwata Yesu ni kumukasa. 51 Hazehene, umwe wa kuli waze apwile ni Yesu, yolola kwoko, yatomona katana* kenyi, yateta twitwi lia ndungo wa mwata wa asasendote a lutwe. 52 Yesu yamulweza ngwenyi: “Funyisa katana ke mu chindalo, mumu waze eswe manda katana, makafwa ku katana. 53 Nyi unamono ngwe chichi kuhasa kwita kuli Tata, hanga angutumine haliapwila mbunga* ya angelo kuhiana 12? 54 Nyi chocho, mba kuchi kevwe Yisoneko muyimanunuka, yambile ngwo chenacho yuma yatamba kulingiwa?” 55 Ha ola yacho, Yesu yalweza mbunga ngwenyi: “Nweza ni kungukwata ni tutana ni mitondo ngwe nguli chingalwe* nyi? Tangwa ha tangwa napwile ni kutwama mu tembele ni kulongesa, alioze kunwangukwachile. 56 Alioze, yeswe yino yalingiwa hanga yisoneko ya aprofeta yimanunuke.” Mba tumbaji eswe yamuhichika, yachina.

57 Waze akwachile Yesu, yamutwala kuli Kayafwa, mwata wa asasendote a lutwe, kuze alongeshi a shimbi ni makulwana ja atu te anakungulukila. 58 Alioze Petulu yamukaula kanonajila, kachipinji kasuku, ndo ku yiize ya mwata wa asasendote a lutwe, muze anjililemo yatwama hamuwika ni ndungo, hanga amone yize te muyilingiwako.

59 Asasendote a lutwe ni Akwa-Kuyula eswe, yafupa uchela wa mahuza alamikize Yesu hanga amushihe. 60 Alioze kauwanyine, chipwe ngwe kwejile yela anji a mahuza. Ha kupalika cha amwe mashimbu, yikwiza yela aali, 61 yamba ngwo: “Lunga yono, hanambe ngwenyi: ‘Munguhasa kupuzula tembele ya Zambi ni kuyitungulula ha matangwa atatu.’” 62 Muze mwata wa asasendote a lutwe hachivwa, yakatuka, yamba kuli Yesu ngwenyi: “Kushi kukumbulula nichimwe nyi? Shina uli ni yimwe yakwamba hakutwala ku uchela wa atu wano hali yena?” 63 Alioze, Yesu yanunga ni kuhola kuluu. Kashika mwata wa asasendote a lutwe yamwamba ngwenyi: “Ngunakushingisa mu jina lia Zambi ya mwono, hanga utulweze nyi yena uli Kristu, Mwana wa Zambi!” 64 Yesu yamulweza ngwenyi: “Yena mwene unachambe. Alioze, ngunambe kuli yenu ngwami: Kukatuka musono, munukamona mwe Mwana-mutu kanatwama ku chindume cha Mukwa-Ndundo-Jeswe, kaneza ha malelwa a kwilu.” 65 Hohene, mwata wa asasendote a lutwe yasuwa mazalo jenyi ni kwamba ngwenyi: “Iye hashililika Zambi! Yela aka nawa tunafupu? Talenu! Ngwami haliapwila hinweva chize anashililika Zambi. 66 Kuchi nwanyonga?” Ayo yakumbulula ngwo: “Kanatela kufwa.” 67 Yamufwila mate ku meso, yamumbufula. Akwo yamulamba mahushi ku meso, 68 ni kwamba ngwo: “Tuprofeteze kama, yena Kristu. Iya wakulamba?”

69 Petulu te kanatwama haze lia yiize, umwe ndungo wa pwo yakundama kuli iye ni kwamba ngwenyi: “Ni yena wapwanga hamwe ni Yesu, Ka-Ngalileya!” 70 Alioze, iye yalikala kumeso ja atu eswe ngwenyi: “Yuma yize unambe chayinyingikine.” 71 Muze iye hatuhuka ku chikolo, mwana-pwo yamumona, yamba kuli atu waze te aliho ngwenyi: “Lunga yono, kapwanga ni Yesu, Ka-Nazare.” 72 Yalikala cheka, ni kulishinga ngwenyi: “Lunga yono chamunyingikine!” 73 Ha kupalika cha mashimbu akehe, atu waze apwileho yakundama kuli Petulu yamwamba ngwo: “Pundu lume, ni yena uli umwe wa kuli ayo, mumu kuhanjika che chinakusolola.” 74 Mba, Petulu yaputuka kulikala ni kulishinga ngwenyi: “Mutu yono, yami chamunyingikine!” Hazehene ndemba yasanyika. 75 Mba Petulu yewuluka maliji waze Yesu ambile kuli iye ngwenyi: “Shimbu ndemba kanda achisanyika, mukalikala yami katatu keswe.” Chocho yatuhuka, yalila chinji.