Kuli A-Fwilipu
3 Kusulaho mandumbu, nungenu ni kuwahilila muli Mwene. Kuli yami hi chikalu ko kunusonekena yuma yimuwika, mumu lia ufunge wenu.
2 Kanyamenu ni waze apwa ngwe tuwa; kanyamenu ni akwa-milimo waze akulinga yuma yipi; kanyamenu ni waze akulilemeka ku mijimba. 3 Mumu yetu tuli ngalami amwenemwene waze akulinga mulimo usandu kupalikila mu spiritu ya Zambi ni kulisamba muli Kristu Yesu, tuli nawa waze keshi kufuliela ha musunya. 4 Nyi umwe mazanga kulisamba mumu lia kufuliela ha musunya,
yami munguhasa kulisamba chinji kuhiana iye. 5 Angupwishile ngalami ha tangwa liamuchinake, nguli wa ku vungu lia Izalele, wa ku munyachi wa Mbenjamine, Ka-Hepreu wa ku chisemewa cha A-Hepreu; hakutwala ku shimbi, Ka-Fwariseu; 6 nalihanyine chinji mukuhungumiona chikungulwila, nakawile kanawa yuma yeswe yize shimbi te yakwamba ngwo yalita. 7 Alioze, yuma yize yapwile kuli yami ngwe kufumbuka, haliapwila ngunayimono ngwe yuma yamokomoko* mumu lia Kristu. 8 Kuhiana yino yeswe, nakumona yuma yeswe ngwe yamokomoko mumu lia ulemu wahiana wa chinyingi cha Kristu Yesu, Mwene wami. Mumu lia iye, natayijile kutokesa yuma yeswe ni kuyimona wika ngwe yiswaswa, hanga nguzuke Kristu 9 ni kunguwana wakulinunga nenyi, hakupwa ni ululi uze wakwiza kuli Zambi kupalikila mu ufulielo muli Kristu, hi mumu lia ufulielo wami ko uze wakwiza ha kukaula Shimbi. 10 Chuma chize ngunazange chili kunyingika iye ni ndundo ja uhindukilo wenyi, ni kumona lamba lize iye amwene, ni kufwa ngwe chize iye afwile, 11 hanga ngumone nyi kuli umwe mulali wa kuzukilamo uhindukilo wa afu uze muukalianga kulingiwa.
12 Kuchapwile ngwe hingunauzuku kulu, hanji ngwami hingunapu mutu mungunu, alioze nakulikolweza hanga ngumone nyi munguhasa kuzuka yize Kristu Yesu angutongwelele. 13 Mandumbu, chishi kunyonga ngwami hinayizuka kulu, alioze chuma chimuwika nakulinga chili: Kuvulama yuma ya kunyima ni kusa tachi jinji hanga nguzuke yuma ya kulutwe. 14 Kashika, nakulikolweza chinji hanga ngukatambule chawana. Chawana chacho chili mwono mu malilu uze Zambi akuhana kuli waze iye akusanyika kupalikila muli Kristu Yesu. 15 Kashika, yetu eswe waze hitwakola, tupwenu ni kunyonga chacho. Nyi kachi ha chuma chimwe munupwa ni kunyonga cheka, Zambi makanusolwela nyonga lialita. 16 Alioze, chipwe ngwe hitwasenya kulutwe, nihindu tunungenu ni kwenda mu jila yacho.
17 Mandumbu, pwenu akwa-kungwimbulula, nungenu ni kulihulikila hali waze akwenda kulita ni chilweza chize twanuhichikilile. 18 Mumu anji kakulelesa kufwa cha Kristu ha mutondo* wa lamba—yami napwile ni kunwambulwila-o ha yisuho yinji, alioze haliapwila ngunanwambulwila-o nawa ni kulila. 19 Songo lio kwonwona, zambi yo usolo wa mujimba wo, kakulisamba ni yuma yize te atamba kuvwila sonyi ni kuhulikila manyonga jo ha yuma ya hashi. 20 Alioze, yetu tuli akwa-mwilu, twakushimbwila umwe chilamwina, Mwene Yesu Kristu, yoze uli mu malilu. 21 Mwenawo makalumuna mijimba yetu yilelu ni kuyipwisa ngwe* mujimba wenyi wa uhenya kupalikila mu ndundo jenyi jinene, jize akuhasa kuzeyesa najo yuma yeswe muli iye mwene.