Akwa-Kuyula
9 Hakupalika cha mashimbu, Apimeleke mwana wa Njerubale yaya ku Shekeme kuli anatu, yamba kuli ayo ni kuli asoko eswe a kako ngwenyi: 2 “Lisesa, achihulenu kama kuli miata eswe a mu Shekeme ngwenu: ‘Yika nunazange, shina anuyule kuli ana eswe 70 ja Njerubale, nyi anuyule kuli mutu umuwika? Ewulukenu ngwenu, tuli a mu jimo limuwika.’”
3 Chocho mandumbu ja naye, yalumbununa maliji jenyi kuli miata a mu Shekeme, mba ayo yatayiza kukaula Apimeleke, yamba ngwo: “Iye kali mwana-kwetu.” 4 Yamwaha 70 a mbongo ja prata ja mu tembele ya Mbale-Mberete, Apimeleke yafweta najo malunga amokomoko hanga amukaule. 5 Iye yaya ku zuwo lia tato ku Ofra, yashiha mandumbu jenyi 70, ana ja Njerubale, yaashihila ha liwe. Kwasalile wika Yotame, kasula-songo wa Njerubale, mumu kaswamine.
6 Mba akwa-lutwe a Shekeme ni A-Mbete-Milo eswe yalikungulula, yapwisa Apimeleke mwanangana, hakamwihi ni mutondo unene ni mulundu uze wapwile ku Shekeme.
7 Muze alwezele Yotame chikuma chacho, iye kawashi-washi yaya ku Mulundu wa Ngerizime, yamana, yakololoka ni liji mwilu ngwenyi: “Ngupanjikenu, yenu miata a Shekeme, Zambi manupanjika:
8 “Tangwa limwe, mitondo yiyilikungulula hanga yisakule mwanangana. Chocho, yiyamba kuli mutondo wa olevwe ngwo: ‘Pwako mwanangana wetu.’ 9 Alioze mutondo wa olevwe yiukumbulula ngwo: ‘Shina natamba kuhichika maji jami a olevwe waze akufumanyisa no Zambi ni atu hanga nguyule mitondo yikwo?’ 10 Mba mitondo yiyamba kuli mutondo wa mukuyu ngwo: ‘Tweya yena hanga upwe mwanangana wetu.’ 11 Alioze mutondo wa mukuyu yiwakumbulula ngwo: ‘Shina natamba kuhichika mihuko yami yipema, yayekemena hanga nguye ni kuyula mitondo yikwo?’ 12 Mba mitondo yiyamba kuli mutondo wa uva ngwo: ‘Tweya yena hanga upwe mwanangana wetu.’ 13 Mutondo wa uva yiwakumbulula ngwo: ‘Shina natamba kuhichika vinyu yami yaha yize yakuvwisa chiseke Zambi ni atu hanga nguye ni kuyula mitondo yikwo?’ 14 Kusulaho, mitondo yeswe yiyamba kuli mungonga ngwo: ‘Tweya yena hanga utuyule.’ 15 Mutondo wa mungonga yiukumbulula ngwo: ‘Nyi chamwenemwene lume nunazange hanga ngupwe mwanangana wenu, tweyenu nuchinyine mushi lia chizulie chami. Alioze, nyi ka, kahia katuhuke ku mungonga koche mitondo yeswe ya mu Lebano.’
16 “Shina chuma nwalinga chili chipema? Chinalite lume kusakula Apimeleke hanga apwe mwanangana? Shina nwasolola zango kuli Njerubale ni kuli akwa-zuwo lienyi ngwe chize te nwatamba kulinga hali iye? 17 Muze tata anwashilile jita, iye kasele mwono wenyi mu utoji hanga anulamwine ku moko ja A-Mindiane. 18 Alioze, musono hinwakatukila akwa-jiko lia tata, hinwashiha ana jenyi 70 ha liwe. Hinwapwisa Apimeleke mwana wa ndungo ya tata mwanangana hali miata A-Shekeme mumu kali ndumbwenu. 19 Ewa, nyi musono nunalinga yuma yipema, yuma yalita kuli Njerubale ni akwa-zuwo lienyi, wahililenu ni Apimeleke, neye awahilile ni yenu. 20 Alioze, nyi ka, kahia katuhuke kuli Apimeleke koche A-Shekeme ni A-Mbete-Milo, kutuhuke kahia kuli miata A-Shekeme ni A-Mbete-Milo hanga koche Apimeleke.
21 Chocho, Yotame yachinyina ku Mbia mumu lia woma wa yayo Apimeleke.
22 Apimeleke kayulile A-Izalele ha miaka yitatu. 23 Mba Zambi yasa kole hakachi ka Apimeleke ni miata a ku Shekeme, ayo yalimika ni Apimeleke. 24 Yuma yino yalingiwile hanga afwetese upi uze Apimeleke alingile kuli ana 70 ja Njerubale hanga mulonga wa manyinga ushate hali iye ni hali miata a ku Shekeme ha kumukwasa kushiha mandumbu jenyi. 25 Chocho miata a ku Shekeme yasa malunga ku milundu hanga amujikinyine. Malunga jacho te kakwiya yuma ya atu eswe waze apwile ni kupalika mu tapalo liacho. Hakupalika cha mashimbu, chikuma chacho yachilweza Apimeleke.
26 Ngaale mwana wa Ebede, yaya ku Shekeme hamwe ni mandumbu jenyi. Miata a ku Shekeme yaputuka kumujikijila. 27 Ayo yaya mu minda yahela uva, yayikama, yaalinga chiwanyino. Mba yaanjila mu zuwo lia zambi yo, yalia, yanwa, yaashinga Apimeleke. 28 Mba Ngaale mwana wa Ebede yamba ngwenyi: “Apimeleke ni Shekeme aya mba twalingile? Iye kali mwana wa Njerubale, Zebule mwe unamumanyinako. Lingilenu malunga ja Hamore, tato ya Shekeme. Mumu liaka twatamba kulingila Apimeleke? 29 Nyi te atu wano kali mu chiyulo chami, kachi munguchiza Apimeleke ha wanangana.” Chocho, iye yalweza Apimeleke ngwenyi: “Lulieka maswalale je hanga tuye ni kwasa jita.”
30 Muze Zebule mukwa-kuyula mbonge evwile maliji a Ngaale, mwana wa Ebede, yevwa uli unji. 31 Kashika, yatuma tunganda kuli Apimeleke mu usweke hanga amulweze ngwenyi: “Ngaale mwana wa Ebede ni mandumbu jenyi haliapwila kali mu Shekeme, kanasupwila atu hanga alimike ni yena. 32 Kashika, yena ni malunga je tweyenu ha ufuku hanga nwajikinyine mu minda. 33 Ha chimene nwatamba kutuhuka nuye ni kupupa mbonge. Muze Ngaale ni malunga jenyi meza hanga alimike ni yenu, nwatamba kulinga yeswayo munuhasa hanga numukumbe.”
34 Chocho, Apimeleke ni malunga jenyi eswe yakatuka ufuku, yalihandununa mu yizavu yiwana, yaya ni kujikinyina A-Shekeme. 35 Muze Ngaale mwana wa Ebede amanyine ku chikolo cha mbonge, Apimeleke ni malunga jenyi yakatuka kuze te anamujikinyina. 36 Muze Ngaale amwene atu, yamba kuli Zebule ngwenyi: “Malunga anapalumuka ha milundu.” Alioze Zebule yamukumbulula ngwenyi: “Yena unamona yizulie ya milundu ngwe atu.”
37 Ngaale yamba nawa ngwenyi: “Ngunamono malunga anapalumuka ha mulundu, chizavu chimwe chinejila mu jila ya mutondo unene wa Menonime.” 38 Zebule yamukumbulula ngwenyi: “Yena wapwile ni kulisamba ha kwamba ngwe: ‘Apimeleke iya mba tumulingile?’ Wano kali atu waze walelesele. Haliapwila tuhuka hanga wase no jita.”
39 Chocho, Ngaale ni miata a ku Shekeme yaya ni kwasa jita ni Apimeleke. 40 Apimeleke yahanga Ngaale, alioze Ngaale yachina. Atu anji afwile mu jila, afu yalitanda ndo ku chikolo cha mbonge.
41 Apimeleke yanunga mu mbonge ya Aruma, alioze Zebule yahuma Ngaale ni mandumbu jenyi ku Shekeme. 42 Muze hikwacha, atu a mu Shekeme yakatuka mu mbonge yaya ku minda, alioze Apimeleke yanyingika chuma chacho. 43 Chocho, Apimeleke yahandununa malunga jenyi mu yizavu yitatu hanga ajikinyine atu ku minda. Muze amwene atu kanatuhuka mu mbonge, iye yaputuka kwahanga ni kwashiha. 44 Apimeleke ni yizavu yize apwile nayo, yaya ni kwajikinyina ku chikolo cha mbonge. Alioze yizavu yaali yiyiputuka kuhanga atu ku minda ni kwashiha. 45 Apimeleke yasa jita ni atu waze apwile mu mbonge tangwa lieswe. Yakumba mbonge yacho, yashiha atu jamo. Mba yapuzula mbonge ni kuhinjilamo mungwa.
46 Muze miata a ku kaposhi wa Shekeme achinyingikine, kawashi-washi yaya ni kuswama mu tembele ya Ele-Berete. 47 Muze alwezele Apimeleke ngwo, miata eswe a ku kaposhi wa Shekeme mwe ali, 48 Apimeleke ni malunga jenyi eswe yaakanduka Mulundu wa Zalmone. Apimeleke yanda njimbu, yateta chichita cha tete yachisa ha chipaya, yalweza malunga jenyi ngwenyi: “Lingenu ni kawashi yize yami nalinga!” 49 Hohene, malunga jenyi eswe yachaha yichita ya tete, yakaula Apimeleke. Ayo yasa tete jacho kuze miata jacho te anaswamina, yajikwachisa kahia. Chocho atu eswe a ku kaposhi wa Shekeme no yafwa. Atu waze afwile kapwile 1,000, malunga ni mapwo.
50 Mba Apimeleke yaya ku Tebeze, yajingilika mbonge ya Tebeze ni kuyikumba. 51 Mukachi ka mbonge mwapwile kaposhi mukolo, mba malunga eswe, mapwo ni miata eswe a mu mbonge yachinyinamo. Ayo yaliyikilamo, yanyina ndo helu lia kaposhi. 52 Apimeleke yaya ndo ku kaposhi hanga ase jita, yakundama ku chikolo cha kaposhi hanga amwoche. 53 Chocho umwe pwo yaholola liwe lia kutwa nalio ha mutwe wa Apimeleke, yamupula kola. 54 Iye kawashi-washi yasanyika chikwashi chenyi yoze te unambata mata, yamba kuli iye ngwenyi: “Tomona katana we ungushihe hanga atu achine kwamba ngwo: ‘Kamushihanga kuli pwo.’” Chocho, chikwashi chenyi yamutuwa ndusu, yafwa.
55 Muze A-Izalele amwene ngwo, Apimeleke hafwa, ayo eswe yafuna ku mazuwo jo. 56 Chocho Zambi yafwetesa Apimeleke upi weswe uze alingile kuli tato ha kushiha mandumbu jenyi 70. 57 Chikwo nawa, Zambi yamwesa lamba malunga a ku Shekeme mumu lia ungulungulu wo. Chocho, shingo lia Yotame mwana wa Njerubale yiliza hali ayo.