Akwa-Kuyula
7 Njerubale, mwenawo Ngideone, hamwe ni atu eswe waze apwile nenyi, yahinduka chimene yasa chilombo cho hakamwihi ni shima lia meya ku Harode. Alioze, chilombo cha A-Mindiane chapwile ku sango ya Ngideone hakamwihi ni mulundu wa More, mu chikulo. 2 Chocho, Yehova yamba kuli Ngideone ngwenyi: “Atu anji uli no, kashika chichi kukunjika A-Mindiane mu moko je. Mumu nyi ka, A-Izalele mamba ngwo: ‘Yetwene e twalilamwina.’ 3 Kashika, lweza atu ngwe: ‘Mutu yoze unachikima ni woma ahiluke ku zuwo lienyi.’” Chocho, Ngideone yaasa mu cheseko. Mba malunga 22,000 yafuna ku mazuwo jo. Alioze, malunga 10,000 yasala ni Ngideone.
4 Chipwe chocho, Yehova yalweza Ngideone ngwenyi: “Nihindu atu achili anji. Apalumwise ku lwiji hanga ngweseke. Muze mungwamba ngwami: ‘Au maya ni yena,’ iye maya ni yena. Alioze muze mungwamba ngwami: ‘Au kechi kuya ni yena,’ iye kechi kuya ni yena.” 5 Chocho, iye yapalumwisa e atu ku lwiji.
Mba Yehova yalweza Ngideone ngwenyi: “Handununa eswe waze manwa meya ngwe chize akunwa kawa hanga wase sali lieka. Waze mazondama hanga anwe meya ni moko, ase sali likwo.” 6 Malunga waze anwine meya ni moko kapwile 300. Akwo eswe yanwa meya ngwe chize akunwa kawa.
7 Yehova yalweza Ngideone ngwenyi: “Mungunulamwina ni malunga wano 300, anwa meya ni moko, mungukunjika A-Mindiane mu moko jenu. Alioze, malunga akwo mahasa kufuna ku mazuwo jo.” 8 Muze malunga 300 atambwile kulia ni yitavwi kuli maswalale akwo waze ahandunwine, Ngideone yahilwisa maswalale jacho ku mazuwo jo, yasala wika ni malunga 300. Chilombo cha A-Mindiane chapwile ku mwanda mu chikulo.
9 Ha ufuku uzewene, Yehova yamulweza ngwenyi: “Katuka, yako upupe chilombo mumu hinachikunjika mu moko jenu. 10 Alioze, nyi woma unevu wa kuchipupa, palumuka mu chilombo cha akwa-kole je, yena ni Pura, chikwashi che. 11 Panjika yize ayo anambe mba upwe ni hamu lia kupupa chilombo.” Chocho, Ngideone ni chikwashi chenyi, Pura, yaapalumuka mu chilombo cha maswalale.
12 A-Mindiane, A-Amaleke ni atu eswe a ku Chivumbuko, yazala too mu chikulo ngwe mapasu; chipwe tumelu jo kapwile anji chinji ngwe masekeseke a ku sesa lia kalunga-lwiji. 13 Muze Ngideone ahetele mu chilombo, yevwa umwe lunga kanalumbununa chilota kuli sepa lienyi, yamba ngwenyi: “Yino ye nalotanga. Namonanga lumbolo wa sevada wa kuumba. Lumbolo wacho yalangumukina mu chilombo cha A-Mindiane, yalamba ni tachi jeswe ku yimwe mbalaka, chocho mbalaka yacho yiyiwuzuka. Ewa, lumbolo yachilumuna mbalaka, mba yiyipuzuka.” 14 Sepa lienyi yamulweza ngwenyi: “Lumbolo wacho kanalumbunuka katana wa Ngideone, mwana wa Njoashe, Ka-Izalele. Zambi hakunjika A-Mindiane ni chilombo cheswe mu moko jenyi.”
15 Muze Ngideone evwile ulumbunwiso wa chilota, yafulamana, yawayila Zambi. Mba yahiluka mu chilombo cha A-Izalele, yamba ngwenyi: “Katukenu, mumu Yehova hakunjika chilombo cha A-Mindiane mu moko jenu.” 16 Yahandununa malunga 300 mu yizavu yitatu, yaaha yitavwi ni milondo yinene-yinene yili ni masoka a kahia muchima. 17 Ngideone yaalweza ngwenyi: “Nwatamba kutala ni kwimbulula yeswe yize mungulinga. Muze munguheta ku songo lia chilombo, yenu nwatamba kulinga yeswe yize yami mungulinga. 18 Muze yami ni waze eswe nguli no mutwimba yitavwi, ni yenu nwatamba kwimba yitavwi hakamwihi ni chilombo ni kukololoka ngwenu: ‘Jita yili ya Yehova ni Ngideone!’”
19 Chocho Ngideone ni 100 a malunga waze apwile hamwe nenyi, yaheta ku songo lia chilombo hakachi ka ufuku muze te hasalakanyisa tulayi. Ayo yemba yitavwi, yapula milondo yize apwile nayo ku moko. 20 Chocho, yizavu yeswe yitatu yiyimba yitavwi ni kupula milondo. Yakwata masoka a kahia ku kwoko lia umama, yemba yitavwi yize te anakwata ku kwoko lia utata. Yakololoka ngwo: “Katana wa Yehova ni wa Ngideone!” 21 Mutu ni mutu yamana mu chihela chize amusele, maswalale eswe akwa-kole yaputuka kuchina ni kutetwoka. 22 Muze malunga 300 te anembi yitavwi, Yehova yalumbanganyisa maswalale akwa-kole, chocho yaaputuka kulimika umwe ni mukwo. Mba maswalale eswe yachinyina ku Mbete-Shita, yaya ku Zelela, yaheta ndo mu njiza ya Abelemehola ku Tabata.
23 Ngideone yasanyika malunga A-Izalele a ku munyachi wa Napatali, Ashe ni A-Manase eswe, ayo yahanga A-Mindiane. 24 Ngideone yatuma tunganda mu chifuchi cheswe cha Eframe ku milundu, yaalweza ngwenyi: “Palumukenu hanga nwase jita ni A-Mindiane, jikinyinenu ku uzaukilo weswe ndo ku Mbete-Bara ni ku Yordau.” Chocho, yakunga malunga eswe a Eframe, yajikinyina ku uzaukilo weswe ndo ku Mbete-Bara ni ku Lwiji Yordau. 25 Ayo yakwata mianangana aali a A-Mindiane, Orepe ni Zepe; Orepe yamushihila ku liwe lia Orepe, Zepe yamushihila ku ukamino wa uva wa Zepe. Ayo yanunga ni kuhanga A-Mindiane, mutwe wa Orepe ni Zepe yautwala kuli Ngideone, mu sali lia Yordau.