Akwa-Kuyula
6 Alioze A-Izalele yanunga ni kulinga nawa yuma yipi kumeso ja Yehova, kashika, Yehova yaakunjika mu moko ja A-Mindiane ha miaka shimbiali. 2 A-Mindiane kapwile ni kuyula A-Izalele. Mumu lia woma wa A-Mindiane, A-Izalele yafula mena ku milundu, mu yivwenge ni ku yihela yikwo hanga aswaminemo. 3 Muze A-Izalele te akutumba mbuto, A-Mindiane, A-Amaleke ni Akwa-Chivumbuko te kakwalukukila. 4 Ayo kapwile ni kusa yilombo yo hakamwihi hanga anongese mbuto jeswe mu minda yo ndo ku Ngaza, te keshi kuhichikamo chuma nichimwe hanga A-Izalele alie, chipwe mapanga, ngombe, hanji yimbulu. 5 Ayo te kakwiza ni yimuna ni mbalaka jo, kapwile anji ngwe mapasu. Niumwe te wakuhasa kwalula ayo ni tumelu jo wakuhi, te kakunjila mu chifuchi hanga achinongese. 6 Kashika, A-Izalele yapwa ni uswale unji mumu lia A-Mindiane. Ayo yeta ukwaso kuli Yehova.
7 Muze A-Izalele etele ukwaso kuli Yehova mumu lia woma wa A-Mindiane, 8 Yehova yatuma umwe profeta kuli A-Izalele, yoze walwezele ngwenyi: “Yino ye Yehova Zambi ya A-Izalele anambe: ‘Nanuchijile mu Engitu mu chifuchi cha undungo. 9 Nanutuswile ku moko ja A-Engitu ni ku moko ja akwa-kole jenu eswe, naahumine kumeso jenu ni kunwaha chifuchi cho. 10 Yingwalweza ngwami: “Nguli Yehova Zambi yenu. Kunwatambile kuvwila woma tuzambi ja A-Amore waze atwama mu chifuchi chize nuli.” Alioze yenu kunwangupanjikile.’”
11 Kulutwe, mungelo wa Yehova yeza, yatwama mushi lia mutondo unene uze wapwile mu Ofra, mutondo wa Njoashe, Ka-Abieza. Mwanenyi Ngideone te kanazungula tiliku mu ukamino wa uva hanga achine kuyimona kuli A-Mindiane. 12 Mungelo wa Yehova yasoloka kuli iye, yamulweza ngwenyi: “Yehova kali hamuwika ni yena, yena kajita wa tachi.” 13 Ngideone yakumbulula ngwenyi: “Lisesa mwene wami, nyi Yehova kali hamuwika ni yetu mba mumu liaka yuma yino yeswe yalingiwa? Yitanga yenyi ya kukomwesa yize yisemi jetu atulwezele ngwo, ‘Hi Yehova ko watuchijile ku Engitu, kulihi yili?’ Haliapwila Yehova hatumba nyima, hatukunjika mu moko ja A-Mindiane.” 14 Yehova yatala kuli iye, mba yamulweza ngwenyi: “Yako ni tachi jize uli najo, mukalamwina A-Izalele ku moko ja A-Mindiane. Ngwami yami mwe ngunakutumako?” 15 Ngideone yakumbulula ngwenyi: “Lisesa Yehova. Kuchi munguhasa kulamwina A-Izalele? Usoko wami uli ukehe chinji mu munyachi wa Manase, ni yami chishi ni ulemu unji ku zuwo lia tata.” 16 Yehova yamukumbulula ngwenyi: “Yami mungupwa hamwe ni yena; kashika mukanongesa A-Mindiane, ayo makasoloka kuli yena ngwe lunga umuwika.”
17 Chocho Ngideone yakumbulula Zambi ngwenyi: “Nyi hinapwa ni utayizo we, ngwehe kama chilayi chize muchisolola ngwo yena lume unahanjika ni yami. 18 Lisesa kanda uya, ngunayi ni kusaka chawana hanga ngukwehe.” Iye yamukumbulula ngwenyi: “Mungukushimbwila ndo muze muhiluka.” 19 Ngideone yanjila mu zuwo yalulieka yifwo ya pembe ni mbolo kujishi futunwiso ni efa yimuwika ya tiliku. Yifwo yayisa mu mutonga, mutato yausa mu ndoho, kulia chacho yachitwala haze mushi lia mutondo unene, yachizambula, yamwaha.
20 Mungelo wa Zambi wamwenemwene yamba ngwenyi: “Anda yifwo ni mbolo kujishi futunwiso yise ha liwe linene, mwanginaho we mutato.” Mba Ngideone yachilinga. 21 Chocho mungelo wa Yehova, yamika ni songo lia lukanda ha yifwo ni ha mbolo yize kuyishi futunwiso, mba ha liwe yihatuhuka kahia, yikocha yifwo ni mbolo kuyishi futunwiso. Chocho mungelo wa Yehova yaya kwenyi, kamumwene nawa. 22 Ngideone yanyingika ngwenyi auze kumana kapwile mungelo wa Yehova.
Hazehene yamba ngwenyi: “Lwangu mama yami, Mwene wami Yehova! Mumu namona mungelo wa Yehova meso ni meso!” 23 Alioze Yehova yamba kuli iye ngwenyi: “Sambukila yipwe kuli yena. Kanda wivwa woma, uchi kufwa.” 24 Kashika homa hacho Ngideone yatungaho chilumbilo cha Yehova, chize ndo musono akusanyika ngwo, Yehova-Shalome, chilumbilo chacho chichili ku Ofra ya A-Abieza.
25 Ha ufuku wacho Yehova yamulweza ngwenyi: “Anda kuji a ngombe wa tatenu, kuji a ngombe wamuchiali wa miaka shimbiali. Puzula chilumbilo cha Mbale chize tatenu atunga, patula nguji lisandu lize lili hakamwihi ni chilumbilo. 26 Muze mutunga chilumbilo cha Yehova Zambi ye helu lia homa hano hakolo ni mawe akulonga, anda kuji wa ngombe wamuchiali umuhane ngwe mulambu wa kwocha ha mapaya a nguji lisandu lize wapatula.” 27 Chocho Ngideone yasanyika amwe tuvumbi jenyi kumi, yalinga ngwe chize Yehova amutumine. Alioze a mu evwile woma wa akwa-zuwo lia tato ni wa malunga a mu mbonge, iye yalinga yuma yacho ha ufuku, kayilingile mwalwa.
28 Ha chimene muze malunga a mu mbonge ahindukile, yamona chilumbilo cha Mbale hachipuzula, nguji lisandu lize liapwile hakamwihi ni chilumbilo halipatula, kuji wa ngombe wamuchiali hamuhana ngwe mulambu ha chilumbilo chize atungile. 29 Ayo yalihula umwe ni mukwo ngwo: “Iya walinga chuma chino?” Muze hahengwola, ayo yanyingika ngwo: “Ngideone mwana wa Njoashe, mwe walinga chuma chacho.” 30 Chocho malunga a mu mbonge yalweza Njoashe ngwo: “Fambwisa mwane hanga tumushihe, mumu kapuzula chilumbilo cha Mbale ni kupatula nguji lisandu lize liapwanga hakamwihi ni chilumbilo.” 31 Njoashe yahula eswe waze te analimika nenyi ngwo: “Mumu liaka nunakalila Mbale? Mumu liaka nunazange kumulamwina? Mweswawo yoze mamukalila katamba kufwa. Iye kali zambi, kashika nyi umwe kapuzula chilumbilo chenyi, katamba kulikalila mwene.” 32 Ha tangwa liacho iye yaluka Ngideone jina lia Njerubale ha kwamba ngwenyi: “Mbale alikalile mwene, mumu hapuzula chilumbilo chenyi.”
33 Chocho, A-Mindiane eswe, A-Amaleke ni Akwa-Chivumbuko yalichinga, yazauka lwiji, yasa chilombo cho mu Chikulo cha Yezerele. 34 Chocho spiritu ya Yehova yiyiza hali Ngideone, iye yemba chitavwi mba A-Abieza yamukaula. 35 Iye yatuma tunganda kuli A-Manase eswe, ayo yalikunga hanga amukaule. Yatuma nawa tunganda kuli A-Ashe, A-Zapulone ni A-Napatali, ni ayo yaya ni kulitakana nenyi.
36 Ngideone yamba kuli Zambi wamwenemwene ngwenyi: “Nyi mulamwina A-Izalele kupalikila muli yami ngwe chize walakenya, 37 mungusa wona wa panga hashi. Nyi wona wika we muupwa ni mume, alioze hashi heswe muhoma chau, mungunyingika ngwo mulamwina A-Izalele kupalikila muli yami ngwe chize walakenya.” 38 Yino ye yalingiwile. Muze ahindukile chimene, iye yakama wona, mba yikutuhuka meya waze te mahasa kuzalisa musenge unene. 39 Chocho Ngideone yamba kuli Zambi wamwenemwene ngwenyi: “Utenu we kanda wiza kama hali yami, kanda unguvwila uli. Lisesa, ngunazange nawa kukwita chuma chikwo hakutwala ku wona. Lisesa, ngunazange kama hanga wona wome alioze hashi haule ni mume.” 40 Yino ye Zambi alingile ha ufuku wacho, wona yiuma alioze hashi heswe yihaula ni mume.