Shimbi Yamuchiali
32 “Yenu malilu, panjikenu, munguhanjika,
hashi hapanjike maliji a mu kanwa liami.
2 Malongeso jami, makanoka ngwe vula;
maliji jami makasulumuka ngwe mume,
ngwe vula mupema ha mwambu
ngwe vula munji yoze wakunoka ha yiputa.
3 Mumu mungwambujola jina lia Yehova.
Hanjikenu ha unene wa Zambi yetu!
4 Iye kali Liwe, yuma yeswe yize akulinga yapwa yingunu.
Mumu majila jenyi kali a ululi.
Iye kali Zambi ya ushishiko, keshi uhenge;
Zambi ya ululi, kalulama.
5 A-Izalele e apiangukile.
Ayo hi ana je ko, uhenge ni wo.
Ayo kali chisemuko chipi, cha uhenge!
6 Yenu atu yihepuke, yimbinda.
Shina chenacho nwatamba kutwama ni Yehova?
Ngwami iye kali Tatenu yoze wanuhele mwono,
yoze wanutangile ni kunukolesa?
7 Ewulukenu mashimbu a kunyima;
Nyongenu ha miaka ya yisemuko yitangu.
Hulenu yisemi jenu, ayo makanulweza;
hulenu makulwana ali mukachi kenu, ayo makanwambulwila.
8 Muze Chitunda ahanyine chihinga ku munyachi ni munyachi,
muze ahandunwine ana ja Alama* umwe ni mukwo,
muze asele njiza hakachi ka atu
kulita ni unji wa ana ja Izalele.
9 Mumu chihanda cha Yehova, chapwa atu jenyi;
Yakomba mwe chihinga chenyi.
10 Iye kamuwanyine mu puya,
mu puya ya hululu, mwa too ni zungo lia tushitu a mu yambu.
Yamujingilika, yamulela,
yamufunga ngwe katumba ka liso lienyi.
11 Ngwe chize tela akusanda chaswa chenyi,
ni kuhumuka helu lia ana jenyi
ni kuzazulula mapulwa jenyi hanga akwate,
ni kwambachila ha malumbi jenyi,
12 Yehova wika mwe te unamusongwela;
niumwe kazambi wa yilambala kakapwile hamwe nenyi.
13 Iye yamwendesa mu yihela ya milundu;
mba yamulisa kulia cha mu minda.
Yamwaha uchi wa ku liwe
ni maji a olevwe a ku liwe.
14 Maji a ngombe ni yamwa ya panga,
hamwe ni chihanda chilemu cha mapanga,
hamwe ni kuji a mapanga a ku Mbashane ni pembe,
hamwe ni tiliku yipema.
Ku manyinga a uva yiunwa vinyu.
15 Muze Yeshurene atohwele, yapwa chihulia.
Yatwa mushindo, ewa, yena yiutohwa, yiutakama, yiukuta.
Chocho yiwehuka Zambi yoze wakutangile,
yiulengulula Liwe lia ulamwino we.
16 Yamuvwisa uli mumu lia tuzambi a yilambala;
yamutuka ni yuma yauzelwokeso.
17 Kahanyine yitapo kuli andemoniu hi kuli Zambi ko,
tuzambi waze te kunwanyingikine,
aha, waze asolokele.
Tuzambi waze yilambala jenu te kanyingikine.
18 Yinuvulama Liwe lize lianutangile,
kunweulukile Zambi yoze wanuhele mwono.
19 Muze Yehova achimwene, yeehuka
mumu ana jo a malunga ni a mapwo kamutukile.
20 Chocho iye yamba ngwenyi: ‘Chichi kusoloka nawa kuli ayo;
mungumona yize ayo malinga.
Mumu kali chisemuko chipi,
ana waze keshi kushishika.
21 Ayo kavundula uli wami ha kuwayila tuzambi a mahuza;
kangutuka ni tuponya jo amokomoko.
Mungwasosomba hanga evwe ukwa wa waze hi mavungu ko;
mungwatuka ni vungu lia yihepuke.
22 Mumu utenu wami hiwawika kahia
kaze mukalengenya ndo muchima lia Fuka.
Kahia kaze mukocha hashi ni mbuto yaho
ni kwocha fundamentu ya milundu.
23 Mungwokesa lamba lio;
mungwasa mivi yami yeswe hali ayo.
24 Kumakahonga ni zala,
kumakanonga ni kachiki, kumakakuwa upu.
Mungukaatumina mazo a ngongo
ni ulembe wa tushitu waze akukalala hashi.
25 Ana jo a malunga maakashiha ni katana haze lia mazuwo jo;
mukachi ka mazuwo jo, mwongo muukapinjisa
mukweze wa lunga ni wa pwo,
kanuke ni kashinakaji.
26 Kachi nambile ngwami: “Mungwamwanga;
kumakaavulama kuli atu.”
27 Nevwile woma wa yize akwa-kole te mamba,
mumu chikuma chacho te kuchishi kulumbunuka kanawa kuli akwa-kole.
Te mahasa kwamba ngwo: “Twakumba ni ndundo jetu;
hi Yehova ko walinga yuma yino yeswe.”
28 Mumu Izalele, lili limwe vungu lize kulishi mana,
mukachi ko kumushi chinyingi.
29 Te muchipema nyi mapwa ni mana! Ayo te mahasa kupukuna ha chikuma chino.
Te manyonga ha yize muyilingiwa kuli ayo.
30 Kuchi mutu umuwika mahasa kuhanga 1,000,
atu aali mahuma 10,000?
Chino muchilingiwa wika, nyi Liwe lio mulialanjisa,
nyi Yehova maakunjika ku moko ja akwa-kole jo.
31 Mumu liwe lio kulishi ngwe Liwe lietu,
Chipwe akwa-kole jetu kanachinyingika.
32 Mumu mutondo wo wa uva uli mutondo wa Sondome,
wa mu minda ya Ngomora.
Uva wo wapwa uva wa ulembe,
yichakata yawo yasasa.
33 Vinyu yenyi yapwa ngwe ulembe wa manoka,
Utende usasu wa yihili.
34 Yuma yino yeswe yili yakutulika mu mbunge yami,
yakufunga hamwe ni upite wami.
35 Kukala mulonga ni kufwetesa nichami,
ha shimbu lize hingunatese, kulu lie mulikasenana,
mumu luyinda we kanakundama.
Yuma yize muyinuwana muyiza kawashi-washi.’
36 Yehova makasopesa atu jenyi,
makevwila keke tuvumbi jenyi
muze mamona ngwenyi tachi jo hijatepuluka,
hikwasala wika waze anahongo ni kulela.
37 Chocho iye makamba ngwenyi: ‘Kulihi ali tuzambi jo,
Liwe kuze achinyinanga,
38 waze alile maji a yitapo yenu,
waze te akunwa vinyu ya milambu yenu ya walwa?
Ayo eze ni kunukwasa.
Ayo apwe uchinyino wenu.
39 Haliapwila nyingikenu ngwenu, yami, ewa yami nguli Zambi,
kukushi zambi mukwo kuhiana yami.
Yami nakushiha, ni kuhana mwono.
Yami nakulemeka ni kuuka,
kukushi niumwe yoze mahasa kulamwina mutu ku moko jami.
40 Mumu ngunazundula kwoko liami mwilu,
ngunalishinga ngwami: “Ni mwono wami wa mutolo.”
41 Muze munguhela katana wami wa peyima
ni kululieka moko jami hanga ngusopese,
yami mungukala mulonga wa akwa-kole jami,
mungufwetesa waze akunguvwila kole.
42 Munguchupika mivi yami mu manyinga.
Katana wami kumakalia yifwo,
manyinga ja waze ashiha ni ja funge
ni mitwe ya tusongo ja akwa-kole.’
43 Wahililenu, yenu mavungu ni atu jenyi,
mumu iye makakala manyinga ja tuvumbi jenyi,
makakala akwa-kole jenyi,
makafuka shili ya chifuchi cha atu jenyi.”
44 Chocho Mose yeza, yatongola maliji eswe a mwaso uno kumeso ja atu, iye ni Hozeia* mwana wa Nune. 45 Muze Mose ahwishile kuhanjika maliji wano kuli A-Izalele eswe, 46 mba yaalweza ngwenyi: “Nyongenu ha maliji eswe a utowezo waze nanulweza musono hanga nuhase kukwasa ana jenu kwononokena maliji eswe a Shimbi yino. 47 Mumu maliji wano hi amokomoko ko, alioze kanalumbunuka mwono kuli yenu, kupalikila mu maliji jacho munukatwama miaka yinji mu chifuchi chize munukahinga ha kuzauka Yordau.”
48 Ha tangwa lizeliene Yehova yalweza Mose ngwenyi: 49 “Kanduka ha mulundu uno wa Aparime, Mulundu wa Nebo uli mu chifuchi cha Moape hakamwihi ni Yeriku hanga utale chifuchi cha Kanana chize munguhana ngwe chihinga kuli A-Izalele. 50 Mukafwila ku mulundu uze mukanduka ngwe chize afwile yayenu Arone ku Mulundu wa Hore, 51 mumu yenu kunwakashishikile kuli yami hakachi ka A-Izalele, muze nwapwile hakamwihi ni meya a Meripa ku Kandeshe mu puya ya Zini, yenu kunwakafumanyishine jina liami kumeso ja A-Izalele. 52 Yena mukamwena chifuchi chacho kusuku, alioze kuuchi kanjila mu chifuchi chize nguhana kuli A-Izalele.”