Kuli A-Fwilipu

4 Kashika, mandumbu jami waze nazanga ni waze nakuvwila usona, enu nuli uwahililo wami ni chipangula chami, kashika manenu nguu muli Mwene, akwetu a zango.

2 Ngunatoweza Evotia, ngunatoweza nawa Sentiki, akapwe ni kunyonga chimuwika muli Mwene. 3 Ngunaliumbu nawa kuli yena, mukwa-milimo-ni-mukwetu wamwenemwene,* hanga ununge ni kukwasa mapwo wano waze akalakalile* hamwe ni yami ha kwambujola sango jipema, ni Kelemente hamwe ni akwa-milimo-ni-akwetu akwo, waze majina jo ali mu mukanda wa mwono.

4 Wahililenu muli Mwene matangwa eswe. Cheka nawa mungwamba ngwami, Wahililenu! 5 Atu eswe akamone ngwo, yenu kunushi kulikwachilila ha manyonga jenu. Mwene hakamwihi ali. 6 Kanda nulipikala ha chuma nichimwe, alioze ha yuma yeswe yize munuhona, nyingikisenu kwita chenu kuli Zambi kupalikila mu kulemba ni kuliumba hamwe ni kusakwilila; 7 mba sambukila ya Zambi yize yahiana kunyonga cheswe, muyikafunga mbunge jenu ni kunyonga chenu kupalikila muli Kristu Yesu.

8 Kashika, mandumbu, yeswayo yamwenemwene, yeswayo kuyishi lwelia, yeswayo ya ululi, yeswayo yitoma,* yeswayo yatela zango, yeswayo ya lufuma mupema, yeswayo yipema, ni yeswayo yatela uhaliso, nungenu ni kupukuna* ha yuma yino. 9 Lingenu yuma yize nwalilongesele ni yami ni kuyitayiza, yize nwevwile kuli yami, ni yize nwangumwene ngunalingi, mba Zambi ya sambukila makapwa hamwe ni yenu.

10 Haliapwila nakuwahilila chinji muli Mwene, mumu yenu hinwaputuka nawa kulihulumba hali yami. Chipwe ngwe nwapwile ni kulihulumba hali yami, nihindu te kunushi ni uhashi wa kusolola kulihulumba chacho. 11 Chambile chino mumu ngunahono, mumu hingunalilongesa kuwahilila ni yuma yeswayo nguli nayo. 12 Ngunanyingika kutwama ni yuma yikepe, ngunanyingika nawa kutwama ni yuma yinji. Mu yuma yeswe ni ha mashimbu eswe nalilongesa kuwahilila muze ngunakuta, chipwe muze nguli ni zala, muze nguli ni yuma yinji, chipwe muze ngunahono. 13 Mu yuma yeswe nguli ni tachi mumu lia yoze wakungwaha ndundo.

14 Kashika, nwalingile kanawa ha kungukwasa mu lamba liami. 15 Kwamba pundu, yenu A-Fwilipu nunanyingika nawa ngwenu, muze nwevwile sango jipema ha chisuho chitangu, muze nakatukile ku Masendoniya, nichimwe chikungulwila changukwashile mu mulimo wa kuhana ni kutambula chakuhi, shina wika yenu; 16 mumu chipwe muze napwile mu Tesalonika, yenu nwangutuminyine yimwe hanga ngulikwase nayo, hi ha chisuho chimuwika ko, alioze kaali keswe. 17 Chapwile ngwe ngunafupu kutambula yawana, alioze ngunazange hanga nulinge yuma yipema yize muyinunehena mihuko yakulumbama. 18 Haliapwila, chahonene nichimwe, nguli ni yuma yeswe kuhiana yize ngunafupu, mumu natambula yawana yize nwangutuminyine kupalikila muli Epafwonditu. Yawana yacho yili ngwe chitapo chipema, cha lupembo mupema, chize chinapemena kuli Zambi. 19 Kashika, Zambi yami kumakanwaha yize yeswe munuhona kulita ni upite wenyi wa uhenya kupalikila muli Kristu Yesu. 20 Haliapwila, uhenya ukapwe kuli Zambi yetu kanda Tata yetu ndo ku miaka ya mutolo. Amene.

21 Menekenu asandu eswe waze analinungu ni Kristu Yesu. Mandumbu waze ali hamwe ni yami kananumeneka. 22 Asandu eswe, chipi-chipi a ku zuwo lia Sesare, kananumeneka.

23 Chawana cha keke cha Mwene Yesu Kristu chikapwe hamwe ni yenu mumu lia yitanga yize nwakusolola.