Mukanda Utangu wa Samuele
16 Chocho Yehova yamba kuli Samuele ngwenyi: “Ndo tangwa lika mununga ni kwivwa chinyengo mumu lia Saulu, ngwami hinalitunaye kechi kupwa nawa mwanangana wa Izalele? Zalisa lumbinga ni maji, yako, ngunakutumu kuli Yese wa ku Mbeteleme, mumu natongola umwe wa kuli ana jenyi hanga apwe mwanangana.” 2 Alioze, Samuele yamba ngwenyi: “Nyi nayako, muze Saulu machinyingika mangushiha.” Yehova yamukumbulula ngwenyi: “Mbata mwana-ngombe wa chihwo, ukambe ngwe: ‘Neza ni kuhana mulambu kuli Yehova.’ 3 Sanyika Yese eze kuze mukahanyina chitapo, yami mungukulweza yize mukalinga. Ukanguwayishile mutu yoze mungukatongola.”
4 Samuele yalinga yize Yehova amulwezele. Muze ahetele mu Mbeteleme, makulwana a mu mbonge yeza ni kulitakana nenyi ni kuchikima ni woma, yamba ngwo: “Uneza ni sambukila nyi?” 5 Iye yakumbulula ngwenyi: “Ewa, nguneza ni sambukila. Neza ni kuhana chitapo kuli Yehova. Liselenu ku usandu hanga nwize ni yami kuze munguhanyina chitapo.” Chocho yasela Yese ni ana jenyi ku usandu, mba yaasanyika kuze te mahanyina chitapo. 6 Muze anjilile, Samuele yamona Eliape, yamba ngwenyi: “Pundu lume, au mwe yoze Yehova atongola.” 7 Alioze Yehova yamba kuli Samuele ngwenyi: “Kanda utala ku meso jenyi, chipwe ku chizundamo chenyi, mumu hinalitunaye. Mumu Zambi keshi kumona ngwe chize atu akumona. Atu kakumona chize mutu akusoloka ku meso, alioze Yehova kakumona mu mbunge.” 8 Chocho, Yese yasanyika Abinadambe yamupalikisa kumeso ja Samuele, alioze Samuele yamba ngwenyi: “Ni yono nawa Yehova kamutongwele.” 9 Mba Yese yapalikisa nawa Shama, alioze Samuele yamba ngwenyi: “Chipwe yono neye Yehova kamutongwele.” 10 Chocho Yese yapalikisa ana jenyi a malunga shimbiali kumeso ja Samuele, alioze Samuele yamba kuli Yese ngwenyi: “Yehova katongwele niumwe wa kuli wano.”
11 Mba Samuele yahula Yese ngwenyi: “Shina ana wano ene ukwete?” Yese yakumbulula ngwenyi: “Kwasala mukwo wa kanuke, kanafungu mapanga.” Samuele yamba kuli Yese ngwenyi: “Tuma umwe hanga amusake, mumu kutuchi kutwama hanga tulie shimbu iye kanda achiheta.” 12 Chocho yatuma mutu hanga asake Ndawichi. Kapwile muchila, meso jenyi te apema, ni mujimba wenyi wapwile upema. Yehova yamba ngwenyi: “Mwenau! Muwayise.” 13 Chocho Samuele yanda lumbinga muze te muli maji, yawayisa Ndawichi kumeso ja ayayo. Kukatuka ha tangwa lize, spiritu ya Yehova yiyihana ndundo kuli Ndawichi. Kulutwe, Samuele yahiluka ku Rama.
14 Spiritu ya Yehova te hiyakatuka hali Saulu, chocho spiritu yipi ya kuli Yehova yiyiputuka kumupinjisa. 15 Tuvumbi twa Saulu yamba kuli iye ngwo: “Spiritu yipi ya kuli Zambi yinanupinjisa. 16 Lisesa tumenu tuvumbi twenu waze ali hano aye ni kufupa mutu yoze unanyingika kwimba kanawa kalialia. Muze spiritu yipi ya kuli Zambi muyiza hali yenu, iye memba, mba yenu munulivwa kanawa.” 17 Kashika, Saulu yamba kuli tuvumbi twenyi ngwenyi: “Lisesa, fupenu umwe lunga yoze wakwimba kanawa nunguneheneye.”
18 Umwe wa kuli yikwashi yamba ngwenyi: “Ngunanyingika umwe wa kuli ana ja Yese wa ku Mbeteleme, kakwimba kanawa kalialia, kali kajita wa hamu, chitakame. Kakuhanjika kanawa, kakwete chifwa chipema, ni Yehova kali hamwe nenyi.” 19 Saulu yatuma mikeji kuli Yese ngwenyi: “Ngutumine mwane Ndawichi yoze unafungu mapanga.” 20 Chocho Yese yanda mbolo, mulondo wa vinyu ni pembe, yayisa helu lia chimbulu, yayihana kuli Ndawichi hanga akayihetese kuli Saulu. 21 Kashika, Ndawichi yaya kuli Saulu, yaputuka kumulingila. Saulu yazanga chinji Ndawichi, iye yapwa mukwa-kumumbachila lukepwe. 22 Saulu yatuma maliji wano kuli Yese ngwenyi: “Lisesa, tayiza kama hanga Ndawichi apwe ni kungukalakalila, mumu ngunamuzange chinji.” 23 Muze spiritu yipi ya kuli Zambi yapwile ni kwiza hali Saulu, Ndawichi te kakwanda kalialia maputuka kwimba, chocho Saulu mahuzuluka ni kulivwa kanawa, mba spiritu yipi muyikatuka hali iye.