Akwa-Kuyula
14 Samasone yapalumuka ku Timna, kuzekwene yanyingika umwe pwo Ka-Filistea. 2 Chocho iye yahiluka, yalweza tato ni naye ngwenyi: “Mu Timna nawanamo umwe pwo Ka-Filistea yoze nazanga chinji. Ngunazange hanga nungwichileye apwe pwo liami.” 3 Alioze, tato ni naye yamuhula ngwo: “Shina mukachi ka asoko je ni mukachi ka atu je kumushi pwo yoze muhasa kumbata? Watamba lume kuya ni kumbata pwo mukachi ka A-Filistea wano yilima?” Alioze Samasone yamba kuli tato ngwenyi: “Ngumbachileye, mumu mwe ngunazange.” 4 Tato ni naye te kanyingikine ngwo, Yehova mwe unasongwela yuma, iye te kanafupa chize mashiha A-Filistea, mumu ha shimbu liacho A-Filistea e te anayula A-Izalele.
5 Chocho, Samasone yapalumuka ku Timna hamwe ni tato ni naye. Muze ahetele mu minda ya uva ku Timna, Samasone yamona ndumba kaneza kuli iye ni kuhuza. 6 Mba spiritu ya Yehova yiyimwaha tachi, yapapulula ndumba wacho hakachi ni moko jenyi ngwe chize akupapulula mwana-pembe. Alioze, iye kakalwezele chuma chacho kuli tato ni naye. 7 Chocho Samasone yapalumuka ku Timna, yahanjika ni pwo wacho, ha shimbu liacho iye te unachimuzanga chinji.
8 Kulutwe, muze Samasone te anayi ni kuzundula pwo hanga amutwale ku zuwo, yakondoloka hanga atale ndumba yoze ashihile, mba yawana chizaji cha puka ni uchi mu mujimba wa ndumba. 9 Chocho, yanda uchi yaputuka kuulia muze te anende. Muze ahetele kuli naye ni tato, yaha ndambu hanga alie. Alioze kakaalwezele ngwo, uchi wacho kawanda mu mujimba wa ndumba.
10 Tato yaheta kuze pwo apwile, Samasone yalingako chiteleka. Akweze a malunga che apwile ni kulinga ha mashimbu jacho. 11 Muze atu amumwene, yamunehena akweze a malunga 30 hanga atwame nenyi. 12 Samasone yamba kuli ayo ngwenyi: “Mungunulweza chimwe chijimbikilo. Nyi munuchilumbununa ha matangwa shimbiali a chiteleka chino, mungunwaha 30 a mazalo a linyu ni 30 a mahina. 13 Alioze, nyi kunwahashile kuchilumbununa, yenu nwatamba kungwaha 30 a mazalo a linyu ni 30 a mahina.” Ayo yamba kuli iye ngwo: “Tulweze chijimbikilo chacho, tunazange kuchivwa.” 14 Chocho iye yamba kuli ayo ngwenyi:
“Muli mukwa-kulia, yimutuhuka chuma cha kulia.
Muli mukwa-tachi, yimutuhuka chuma chayekemena.”
Ha matangwa atatu, ayo kakahashile kulumbununa chijimbikilo chacho. 15 Ha tangwa liamuchiwana, ayo yamba kuli pwo lia Samasone ngwo: “Onga mukwenu-lunga hanga atulumbunwine chijimbikilo chacho. Nyi kuwachilingile mutukwocha hamwe ni akwa-zuwo lia tatenu. Shina nwamunehene kuno hanga eye upite wetu nyi?” 16 Chocho pwo lia Samasone yaya ni kulilila kuli iye, yamba ngwenyi: “Yena wakunguvwila kole, ushi kunguzanga! Hiwalweza atu jami chijimbikilo, alioze kuwangulwezele ulumbunwiso wa chijimbikilo chacho.” Samasone yamukumbulula ngwenyi: “Kama tata ni mama chaalwezele ulumbunwiso wacho, mumu liaka te natamba kukulweza yena?” 17 Alioze, pwo yalila kumeso jenyi ha matangwa eswe shimbiali a chiteleka. Chocho, ha tangwa liamuchishimbiali iye yamulumbunwina chijimbikilo. Mba pwo yalweza ulumbunwiso wa chijimbikilo chacho kuli atu jenyi. 18 Ha tangwa liamuchishimbiali, muze tangwa te kanda lichinjila, malunga a mu mbonge yamulweza ngwo:
“Yika yize yayekemena kuhiana uchi?
Iya yoze ukwete tachi jinji kuhiana ndumba?”
Mba iye yaakumbulula ngwenyi:
“Nyi te kunwalimine ni ngombe wami,
kachi kunwawanyine ulumbunwiso wa chijimbikilo.”
19 Chocho spiritu ya Yehova yiyimwaha tachi, yapalumuka ku Asekalone, yashiha malunga 30, yanda mazalo jo, yaahana kuli waze alumbunwine chijimbikilo. Iye yafuna ku zuwo lia tato ni uli unji.
20 Pwo lia Samasone yamuhangisa kuli umwe wa kuli akweze waze atwamine ni Samasone ha chiteleka.