Akwa-Kuyula
13 A-Izalele yalinga nawa cheka yuma yipi kumeso ja Yehova, kashika Yehova yaakunjika mu moko ja A-Filistea ha miaka 40.
2 Ha mashimbu jacho, kwapwile umwe lunga wa ku Zora, wa ku munyachi wa A-Ndane, jina lienyi Manoa. Mukwo-pwo kapwile mumba. 3 Tangwa limwe, mungelo wa Yehova yasoloka kuli mukwo-pwo, yamba kuli iye ngwenyi: “Ngunanyingika ngwami uli mumba, alioze mukapwa ni ufumba, mukasema mwana wa lunga. 4 Kashika, kanda unwa vinyu chipwe walwa ukwo usasu. Kanda ulia chuma nichimwe cha luchisa. 5 Mukapwa kafumba, mukasema mwana wa lunga. Kanda ukamuteula kambu, mumu iye makapwa Ka-Nazireu wa Zambi chize ku kusemuka chenyi. Iye mwe makalamwina A-Izalele ku moko ja A-Filistea.”
6 Chocho, pwo yalweza mukwo-lunga ngwenyi: “Umwe mutu wa Zambi wamwenemwene wahanjika ni yami, chifwa chenyi chapwanga ngwe chifwa cha mungelo wa Zambi wamwenemwene. Chamuhulile kuze akatukanga, neye kangulwezele jina lienyi. 7 Alioze yamba kuli yami ngwenyi: ‘Mukapwa kafumba. Mukasema mwana wa lunga. Kashika kanda unwa vinyu chipwe walwa ukwo usasu, kanda ulia chuma cha luchisa, mumu mwana wacho makapwa Ka-Nazireu wa Zambi chize ku kusemuka chenyi ndo muze makafwa.’”
8 Mba Manoa yalemba kuli Yehova, ngwenyi: “Lisesa Yehova, tuma kama cheka mutu wa Zambi wamwenemwene hanga atulweze yize twatamba kulinga muze mwana wacho masemuka.” 9 Zambi wamwenemwene yapanjika kulemba cha Manoa. Mba mungelo wa Zambi wamwenemwene yeza cheka nawa kuli pwo muze te ali mu munda. Alioze, mukwo-lunga Manoa te keshiho. 10 Pwo yazomboka ndo kuze te ali mukwo-lunga, yamulweza ngwenyi: “Lunga yoze unakahanjika ni yami heza nawa.”
11 Chocho, Manoa yaya hamwe ni mukwo-pwo ndo kuli lunga wacho, yamuhula ngwenyi: “Yena mwe unakahanjika ni mukwetu-pwo?” Iye yakumbulula ngwenyi: “Ewa, yami lume.” 12 Manoa yamba ngwenyi: “Maliji je amanunuke! Mba mwana wacho kuchi twatamba kumulela? Chikwo nawa, yika makalinga?” 13 Mungelo wa Yehova yamba kuli Manoa ngwenyi: “Mukwenu-pwo katambile kulinga yuma yeswe yize namukanjisa. 14 Iye katambile kulia chuma nichimwe cha ku mutondo wa uva, chipwe kunwa vinyu hanji walwa ukwo usasu. Katambile kulia chuma nichimwe cha luchisa. Iye katamba kulinga yuma yeswe yize namulweza.”
15 Manoa yamba kuli mungelo wa Yehova ngwenyi: “Lisesa, kanda uchiya, mana tukushihile kama umwe mwana-pembe.” 16 Alioze, mungelo wa Yehova yamba kuli Manoa ngwenyi: “Munguhasa kushimbwila, alioze chichi kulia. Nyi muzanga muhasa kumuhana ngwe mulambu wa kwocha kuli Yehova.” Manoa te kanda achinyingika ngwenyi lunga wacho kali mungelo wa Yehova. 17 Manoa yahula mungelo wa Yehova ngwenyi: “Tulweze kama jina lie hanga tukakuhalise muze maliji je makamanunuka.” 18 Alioze, mungelo wa Yehova yamuhula ngwenyi: “Mumu liaka unazange kunyingika jina liami, se liapwa chikomokeso?”
19 Chocho, Manoa yanda mwana-pembe ni mulambu wa mbuto, yayilambula kuli Yehova ha liwe. Mba mungelo yalinga chikomokeso kumeso ja Manoa ni mukwo-pwo. 20 Muze mulengi wa kahia te unalekwoka ha chilumbilo, Manoa ni mukwo-pwo yamona mungelo wa Yehova kanazezuka mwilu mukachi ka mulengi wa kahia. Hazehene, ayo yafulamana hashi. 21 Mungelo wa Yehova kakasolokele nawa kuli Manoa ni mukwo-pwo. Manoa yanyingika ngwenyi, lunga wacho kumana kapwile mungelo wa Yehova. 22 Chocho Manoa yalweza mukwo-pwo ngwenyi: “Mutufwa mumu twamona Zambi.” 23 Alioze mukwo-pwo yamba kuli iye ngwenyi: “Nyi Yehova te kanazange kutushiha, kachi katayijile mulambu wa kwocha ni mulambu wa mbuto uze twamwaha, chipwe kutusolwela yuma yino yeswe hanji kutulweza yuma yacho.”
24 Kulutwe, pwo yasema mwana wa lunga, yamuluka jina lia Samasone. Mwana wacho yatatuka, Yehova yanunga ni kumuwahisa. 25 Hakupalika cha mashimbu, spiritu ya Yehova yiyiputuka kumutakamisa muze apwile mu Mahane-Ndane hakachi ka Zora ni Esheteole.