Mukanda Utangu wa Mianangana
9 Chocho Solomone yahwisa kutunga zuwo lia Yehova, zuwo lia mwanangana ni yuma yeswe yize azangile kulinga. 2 Yehova yasoloka kamuchiali kuli Solomone ngwe chize asolokele ku Ngibeone. 3 Yehova yamba ngwenyi: “Nevwa kulemba ni kuliumba che. Hinapemesa zuwo lize watunga ha kusako jina liami ku miaka yeswe, mungulitala ni kulifunga ku miaka ya mutolo. 4 Nyi muwenda mu jila yami ni mbunge yingunu ni ululi ngwe chize endele tatenu Ndawichi, ha kulinga yize nakutuma ni kwononokena yiyulo ni upatwilo wami, 5 mungukolesa wanangana we ku miaka yeswe ngwe chize nalakenyene kuli tatenu Ndawichi ngwami: ‘Munyachi we muutwama ha ngunja ya A-Izalele ku miaka yeswe.’ 6 Alioze, nyi yenu ni ana jenu nwecha kungukaula ni kuhona kufunga shimbi jami ni yiyulo yize nanwaha, nyi nwawayila tuzambi akwo ni kufulamana kumeso jo, 7 mungukuwisa A-Izalele mu chifuchi chize naahele, mungumba nyima zuwo lize napemesa hanga ngusemo jina liami, A-Izalele makaaseha ni kwalelesa kuli akwa-mavungu. 8 Zuwo lino mulikapwa mulumba wa yiswaswa. Mutu mweswe yoze makalimona makakomoka, makemba muluzu ni kulihula ngwenyi: ‘Mumu liaka Yehova alinga chuma cha mutapu au mu chifuchi chino ni zuwo lino?’ 9 Kumbululo mulikapwa ngwo: ‘Chino chalingiwa mumu kaavulama Yehova Zambi yo, yoze wachijile tulamba two ku chifuchi cha Engitu, kawayila tuzambi akwo ni kufulamana kumeso jo. Kashika Yehova aanehena luyinda yono.’”
10 Ku songo lia miaka 20 yize Solomone alingile hanga atunge mazuwo aali, zuwo lia Yehova ni zuwo lia wanangana, 11 Hirame mwanangana wa Teru, kahanyine kuli Solomone mapaya a mutondo wa sedru ni mukesha ni oru yeswe yize azangile. Mba Solomone yahana mambonge 20 a mu chifuchi cha Ngalileya kuli Hirame. 12 Muze Hirame ayile ni kutala mambonge waze mwanangana Solomone amuhele, iye yapihilila, kakaazangile. 13 Yamuhula ngwenyi: “Mukwetu, mambonge aka enawa wangwaha?” Mambonge jacho ndo musono kakwavuluka ngwo, Chifuchi cha Kabule.* 14 Hirame yatuma kuli mwanangana Solomone 120 talentu ya oru.
15 Yono mwe lusango wa atu waze mwanangana Solomone asanyikine alinge mulimo wa undungo hanga atunge zuwo lia Yehova, zuwo lienyi, Mulundu wa Milo,* yipanga ya Yerusaleme, mbonge ya Hazore, Megidu ni Ngezere. 16 (Falau, mwanangana wa Engitu kakumbile mbonge ya Ngezere, kayochele ni kushiha A-Kanana eswe waze te atwamamo. Mba yahana mbonge yacho ngwe chawana kuli mwanenyi, pwo lia Solomone.) 17 Solomone yatunga Ngezere, Mbete-Horone ya ku mwanda, 18 Mbalata, Tadmore, mu puya ya chifuchi, 19 mambonge a kutulikila yuma, mambonge a matemba a jita, mambonge a tuvwalu ni yuma yeswe yize Solomone azangile kutunga mu Yerusaleme, ku Lebano ni mu mambonge eswe waze apwile mushi lia chiyulo chenyi. 20 Hakutwala kuli A-Amore, A-Hete, A-Perize, A-Hevwe ni A-Yepushe waze asalile, waze kakapwile A-Izalele, 21 chekwamba, ana ja atu jacho waze asalile mu chifuchi, waze A-Izalele kakahashile kunongesa, kaakwachile kuli Solomone hanga alinge mulimo wa undungo, ayo achili ndungo ndo musono. 22 Alioze, Solomone kakatengele A-Izalele tupinji mumu ayo kapwile tujita, tuvumbi, alemu, tupitau ni miata ja akwa-kwendesa matemba a jita ni tuvwalu. 23 Kwapwile nawa 550 a miata ja tusongo waze te akusongwela milimo ya Solomone. Ayo e apwile ni kusongwela akwa-milimo.
24 Mwana wa pwo wa Falau yakatuka mu Mbonge ya Ndawichi, yaya ku zuwo lize Solomone amutungilile, mba Solomone yatunga Mulundu wa Milo.
25 Solomone te kakuhana milambu ya kwocha ni milambu ya sambukila ha chilumbilo chize atungilile Yehova, te kakuchilinga katatu keswe ha mwaka. Iye te kakwocha nawa insensu ya vumba lipema ha chilumbilo chize chapwile kumeso ja Yehova. Chocho, iye yahwisa kutunga zuwo.
26 Mwanangana Solomone yalinga nawa maulungu anji ku Ezione-Ngebere, hakamwihi ni Elote, ku sesa lia Kalunga-Lwiji Muchila mu chifuchi cha Endome. 27 Hirame yatuma tuvumbi twenyi, akwa-kwendesa ulungu hanga akalakale hamwe ni tuvumbi twa Solomone. 28 Ayo yaya ku Ofiri, yanehena Mwanangana Solomone 420 a talentu ja oru.