Asonekene Luka
5 Tangwa limwe Yesu te kali ku sesa lia chitende cha Ngenezare, mba yamujingilika kuli mbunga hanga apanjike liji lia Zambi. 2 Iye yamona mato aali kali ku sesa lia chitende, alioze akwa-kuta yishi te hatuhukamo kulu kanakoso manda jo. 3 Yanjila mu umwe wato uze wapwile wa Semone, yamwita hanga ausosolole hakehe ku sesa. Yanjila mu wato yatwama, yaputuka kulongesa mbunga. 4 Muze hahwisa kuhanjika, yamba kuli Semone ngwenyi: “Senya haze hali hasuku ukonge manda hanga woze yishi.” 5 Semone yamukumbulula ngwenyi: “Longeshi, twakilikitanga ufuku weswe, kutwakwachile niumwe yishi, alioze ngwe chize wamba mungukonga manda.” 6 Mba muze achilingile, yakwata yishi anji, manda jo yaputuka kupulika. 7 Ayo yalahula kwoko kuli masepa jo waze apwile mu wato ukwo hanga eze aakwase, o yeza, yazalisa mato eswe aali, alioze mato jacho yaputuka kushimbama. 8 Ha kuchimona, Semone Petulu yafulamana kumeso ja Yesu ni kwamba ngwenyi: “Mwene kanda ukundama kuli yami, mumu nguli chivulumunyi.” 9 Mumu iye ni waze eswe apwile no kakomokene chinji ha yishi anji waze ozele, 10 Tiangu ni Yoano ana ja Zebedeu, waze apwile ni kuta yishi hamuwika ni Semone no nawa yakomoka. Alioze Yesu yamba kuli Semone ngwenyi: “Kanda wivwa woma. Chize musono ndo kulutwe muopwa mukwa-kuta atu.” 11 Hachino, ayo yaneha mato ha tunda, yahichika yuma yeswe, yamukaula.
12 Ha shimbu limwe, iye te kali mu yimwe mbonge, yikusoloka umwe lunga wa too ni mbumba, muze hamona Yesu, yafulamana hashi ni kuliumba kuli iye ngwenyi: “Mwene, nyi muzanga, nguuke kama.” 13 Chocho Yesu yolola kwoko lienyi yamukwata, yamba ngwenyi: “Ngunazange! Hinduka ku musongo we.” Hazehene, mbumba yenyi yiyimuhwa. 14 Mba Yesu yamba kuli lunga wacho hanga ahone kulweza mutu niumwe, yamulweza nawa ngwenyi: “Alioze, yako ulisolole kuli sasendote ni kuhana mulambu uze Mose ambile mumu ha kuhinduka che, hanga ukapwe uchela kuli ayo.” 15 Chocho, sango hakutwala kuli iye yijinunga ni kulimwanga; mbunga yinene yiyilikungulula hanga amupanjike, nawa hanga aauke ku misongo yo. 16 Alioze, iye kapwile ni kuyaya mu puya hanga alembe.
17 Ha tangwa limwe, muze te analongesa, A-Fwariseu ni alongeshi a shimbi, waze akatukile ku yihunda yeswe ya Ngalileya ni Yundeya ni a ku Yerusaleme, te kali hazehene kanatwama; ndundo ja Yehova* japwile hali iye hanga auke atu. 18 Hazehene, yikuheta amwe malunga waze te anazundula umwe mutu mukwa-kalepa ha muhela, ayo yesejeka kumunjisa mu zuwo hanga amutumbike kumeso ja Yesu. 19 Muze ayo amwene ngwo, kechi kuhasa kumunjisa mu zuwo mumu lia mbunga, yanyina ha fulumba lia zuwo, yafukula fulumba, yamusunwisa ni chipoya ndo mukachi ka mbunga waze apwile kulutwe lia Yesu. 20 Muze iye amwene ufulielo wo, yamba ngwenyi: “Lunga, shili ye hakukonekenayo.” 21 Chocho, alongeshi a shimbi ni A-Fwariseu yaputuka kunyonga ni kwamba ngwo: “Au mwene iya unatukana? Iya mahasa kukonekena shili, shina wika Zambi?” 22 Alioze, Yesu ha kunyingika manyonga jo, yaamba ngwenyi: “Yika nunanyongo mu mbunge jenu? 23 Chuma chika chashi kwamba, shina kwamba ngwo: ‘Shili ye hakukonekenayo,’ nyi kwamba ngwo: ‘Katuka hanga wende’? 24 Alioze, mba nunyingike ngwenu Mwana-mutu kali ni ndundo hano hashi ja kukonekena shili—” iye yamba kuli mukwa-kalepa ngwenyi: “Ngunambe kuli yena ngwami: Katuka, anda chipoya che, yako ku zuwo lie.” 25 Hazehene, iye yakatuka kulutwe lio, yanda chipoya chenyi yaya ku zuwo lienyi, ni kuhalisa Zambi. 26 Atu eswe yakomoka chinji, yaputuka kuhalisa Zambi, ni woma weswe yamba ngwo: “Musono twamona yikomokeso!”
27 Kulutwe lia yino yuma, Yesu yatuhuka yamona umwe lunga mukwa-kufwetesa lijimu, jina lienyi Levi, kanatwama ku zuwo lia kufwetela lijimu, yamwamba ngwenyi: “Pwako kambaji kami.” 28 Chocho, Levi yahichika yuma yeswe, yakatuka yaputuka kumukaula. 29 Mba Levi yamululiekela chiteleka chinene hanga amuzumbule ku zuwo lienyi, kwapwile mbunga yinene ya akwa-kufwetesa lijimu ni atu akwo waze apwile ni kulia no hamuwika. 30 Muze A-Fwariseu ni alongeshi a shimbi jo achimwene, yahula tumbaji twenyi ngwo: “Mumu liaka yenu nunali ni kunwa hamuwika ni akwa-kufwetesa lijimu ni yivulumunyi?” 31 Yesu yaakumbulula ngwenyi: “Waze ahinduka keshi kufupa ndotolo,* alioze waze ayiza e akumufupa. 32 Yami chejile ni kufupa akwa-ululi hanga alikonyeke, alioze yivulumunyi.”
33 Ayo yamba kuli iye ngwo: “Tumbaji twa Yoano kanji-kanji kakulitwamina kulia, nawa kakulemba, ni tumbaji twa A-Fwariseu che akulinga, alioze a yena kakulia ni kakunwa.” 34 Yesu yamba kuli ayo ngwenyi: “Shina yenu munuhasa kushinjila masepa ja sandungi alitwamine kulia shimbu sandungi uchili hamwe no? 35 Alioze, mukwiza matangwa waze sandungi kechi kapwa hamwe no, hohene mba o makalitwamina kulia ha matangwa jacho.”
36 Yesu yaatela nawa chishima ngwenyi: “Niumwe mutu wakupula chihanda cha hina liaha hanga achinukine ha hina likulu wakuhi. Mumu nyi machilinga, chihanda cha hina liaha muchipula hina likulu. Chikwo nawa, chihanda cha hina liaha kuchichi kulita ni hina likulu. 37 Chizechene nawa, niumwe mutu wakulonga vinyu yaha mu tuku jikulu wakuhi. Mumu nyi machilinga, vinyu yaha muyipula tuku jikulu, ye vinyu muyimwangana, mba ni je tuku mujipiha. 38 Alioze, vinyu yaha katamba kuyilonga mu tuku jaha. 39 Kukushi mutu niumwe muze manwa vinyu yikulu mazanga vinyu yaha, mumu mamba ngwenyi: ‘Yikulu ye yipema.’”