Usolwelo wa Yesu Kristu Alwezele Kuli Yoano

14 Mba namwene Mwana-panga kanamana ha Mulundu wa Zaione, ni hamwe nenyi 144,000 waze ali ni jina lienyi ni jina lia Tato lia kusoneka ha mahuma jo. 2 Nevwile liji lize liakatukile mwilu, lialifwa ngwe zungo lia meya anji ni zungo lia kukulunguza chinene. Liji lize nevwile liapwile ngwe lia ngimba waze te anembi tulialia two. 3 O te kanembi yimwe yize yapwile ngwe mwaso waha, kulutwe lia ngunja ni lia yitangiwa yiwana ya mwono ni lia makulwana. Niumwe yoze te mahasa kulilongesa mwaso wacho wakuhi, shina wika 144,000 waze alanjile hashi. 4 Wano kali waze kalichishile ni mapwo. Kwamba pundu, kali virgem. Kali waze akukaula Mwana-panga kweswako kuze maya. Aalanjile hakachi ka atu ngwe mihuko yitangu ya kuli Zambi ni ya kuli Mwana-panga, 5 mba mu makanwa jo kawanyinemo mahuza niamwe. O keshi kapalia.

6 Namwene mungelo mukwo kanahumuka mukachi ka lilu, kali ni sango jipema ja mutolo hanga ambujole kuli waze atwama hashi, ku minyachi yeswe, ni mavungu eswe, ni malimi eswe ni yifuchi yeswe. 7 Iye yamba ni liji linene ngwenyi: “Vwilenu Zambi woma, muhalisenu, mumu ola ya upatwilo wenyi hiyaheta. Kashika, wayilenu Yoze watangile malilu, ni hashi, ni kalunga-lwiji, ni mafuji a meya.”

8 Mungelo mukwo wamuchiali wakawile ngwenyi: “Hiyapuzuka! Hiyapuzuka Babilonia Yinene yize te yakunwisa mavungu eswe vinyu ya ufwatulo wa utanji* wenyi.”

9 Mungelo mukwo wamuchitatu, waakawile ni kwamba ni liji linene ngwenyi: “Nyi umwe mawayila ngongo ni kaponya kenyi, ni kutayiza mufunda wa chinyingi ha huma hanji ha kwoko, 10 neye kumakanwa nawa vinyu ya ufwatulo wa Zambi yize amwangine chakuhona kuyiweza meya mu musenge wa utenu wenyi. Kumakamumwesa lamba mu kahia ni fundanga kumeso ja angelo asandu ni kumeso ja Mwana-panga. 11 Mba mwishi wa kupinda cho muufwindangana ndo ku miaka ya mutolo. Waze akuwayila ngongo ni kaponya kenyi, chipwe waze atayijile mufunda wa chinyingi wa jina lienyi, kechi kapwa ni uhwimino mwalwa ni ufuku. 12 Ha chikuma chino he hakufupiwa kunyongonona cha asandu, waze akwononokena shimbi ja Zambi ni kulikwachilila ha ufulielo muli* Yesu.”

13 Mba nevwile liji lia kukatuka mwilu ngwo: “Soneka ngwe: Kawaha afu waze, chize haliapwila ndo kulutwe, akufwa mukulinunga ni Mwene. Ewa, chocho yinambe spiritu ngwo, hanga akahwime ku yikilikita yo, mumu yuma yize alingile yakwakaula.”

14 Mba namwene lelwa litoma, ha lelwa liacho hatwamine umwe walifwa ni Mwana-mutu, kali ni chipangula cha oru ku mutwe wenyi, ku kwoko lienyi wakwachile chikwakwa chinambuka.

15 Mungelo mukwo watuhukile mu tembele, ni kukololoka ni liji linene kuli yoze watwamine ha lelwa ngwenyi: “Anda chikwakwa che, uche, ola ya kucha hiyaheta mumu mihuko ya hashi hiyahia chinji.” 16 Yoze watwamine ha lelwa yasa chikwakwa chenyi hashi, mba wachile mihuko ya hashi.

17 Mungelo mukwo watuhukile mu tembele yize yili mwilu, neye wapwile ni chikwakwa chinambuka.

18 Ku chilumbilo kwatuhukile mungelo mukwo, yoze wapwile ni chiyulo hakutwala ku kahia. Watambikile ni liji linene kuli yoze uli ni chikwakwa chinambuka, ngwenyi: “Anda chikwakwa che chinambuka uhele yilende ya vindera ya hashi, mumu uva hiyahia.” 19 Mungelo yasa chikwakwa chenyi hashi, yahela vindera ya hashi ni kuyinyasa mu ukamino unene wa ufwatulo wa Zambi. 20 Mba aliachile ukamino haze lia mbonge, ni manyinga yatuhuka mu ukamino ndo ku yikungo yize yakupwa ku makanwa a tuvwalu, ndo ku 300 a kilometru.*