Kuli A-Hepreu
7 Mumu Melekizeteke yono, mwanangana wa Saleme sasendote wa Zambi Chitunda, kayile ni kupatwiza Apalahama, muze Apalahama te anahiluka kuze ayile ni kushiha mianangana, mba yamuwahisa, 2 Apalahama yamwaha chihanda cha kumi, cha ku yuma yeswe. Chitangu, jina lienyi linalumbunuka “Mwanangana wa Ululi,” chikwo nawa, iye kali mwanangana wa Saleme, che kwamba, “Mwanangana wa Sambukila.” 3 Keshi tato, keshi naye, keshi tulamba, keshi uputukilo wa matangwa chipwe songo lia mwono wenyi, alioze ha kulifwa ni Mwana wa Zambi, kali sasendote ndo ku miaka ya mutolo.
4 Talenu ulemu wa lunga yono, yoze kalamba ketu Apalahama ahanyine chihanda cha kumi cha yuma yeswe yipema yize atambwile mu jita. 5 Kwamba pundu, kulita ni Shimbi, hakachi ka ana ja Levi waze akupwa asasendote, Shimbi ali nayo ya kutambula yihanda ya kumi kuli atu, che kwamba, kuli mandumbu jo chipwe ngwe no kali ana ja Apalahama. 6 Alioze, lunga yono, chipwe ngwe hi wa ku munyachi wa Levi ko, nihindu yatambula yihanda ya kumi kuli Apalahama ni kuwahisa yoze wapwile ni yilakenyo. 7 Kwamba pundu, yoze wakuwahisa mukwo, mwe munene kuhiana yoze anawahisa. 8 A-Levi waze akutambula yihanda ya kumi, kali atu waze akufwa, alioze mutu mukwo yoze watambwile chihanda cha kumi, yisoneko yinashindakenya ngwo, kali ni mwono. 9 Mutuhasa kwamba nawa ngwetu, kupalikila muli Apalahama, chipwe Levi yoze watambwile yihanda ya kumi, neye kafwetele yihanda ya kumi, 10 mumu muze Melekizeteke ayile ni kupatwiza Apalahama, iye te kanda achisemuka.
11 Nyi chamwenemwene usasendote wa Levi wakuchiza shili ya atu (mumu usasendote wapwile mu Shimbi yize ahanyine kuli atu), shina te kuli ulemu wa kuneha sasendote mweka yoze akwamba ngwo, kali ngwe Melekizeteke hi ngwe Arone ko? 12 Mumu amu akwalumuna usasendote, Shimbi neyo katamba kuyalumuna. 13 Mumu lunga mukwa-yuma yino anambe kakatukile ku munyachi weka, munyachi uze kuushi ni atu waze akalakalile ku chilumbilo. 14 Kwamba pundu, Mwene wetu kapwile wa ku munyachi wa Yunda, alioze Mose kakambile ngwenyi ku munyachi wacho mukukatuka asasendote.
15 Chino chasoloka nawa zwalala muze kwasoloka sasendote mweka, walifwa ni Melekizeteke, 16 yoze wapwile sasendote, hi kulita ko ni shimbi yize yinatale ha munyachi, alioze kulita ni ndundo ja mwono uze keshi kuhasa kuunongesa. 17 Mumu hakutwala kuli iye, mukanda wa Zambi wambile ha chimwe chisoneko ngwo: “Yena uli sasendote ku miaka yeswe, ngwe Melekizeteke.”
18 Kashika, shimbi yitangu hanayijimuna mumu yili yilelu, kuyishi ulemu. 19 Mumu Shimbi kuyapwishile nichimwe chuma chingunu, alioze kutalatala cha yuma yipema chize ambulwile, che chayipwishile yingunu, ni ukwaso wa kutalatala chino, twakukundama kuli Zambi. 20 Chikwo nawa, chino kakachilingile chakuhona shingo 21 (kwamba pundu, kuli atu waze alipwishile asasendote kulishinga, alioze yono hapwa sasendote kupalikila mu shingo lize alingile hali iye, kuli Yoze wambile ngwenyi: “Yehova* halishinga, kechi kuhiluka kunyima: ‘Yena uli sasendote ku miaka yeswe’”), 22 chocho Yesu yapwa chijikilo cha usendo upema. 23 Chikwo nawa, asasendote te katamba kulisalakana, mumu kufwa chapwile ni kwakwika kununga ni usasendote wo, 24 alioze amu iye ananungu ni mwono ku miaka ya mutolo, usasendote wenyi kuushi ni yoze mausalakana. 25 Kashika, iye mahasa kulamwina liakulu atu waze makundama kuli Zambi kupalikila muli iye, mumu kananungu ni mwono ku miaka yeswe hanga aechile kuli Zambi.
26 Mumu chinalite kupwa ni mwata wa asasendote a lutwe ngwe yono, washishika, keshi chitela, keshi chipeka, wakuhandununa hakachi ka yivulumunyi, wakunangamisa helu lia malilu. 27 Iye kalisa ni miata ja asasendote a lutwe akwo, mumu iye chamutambile kuhana yitapo matangwa eswe, chitangu ha shili yenyi mwene, mba hanyima ha shili ya atu, mumu chino kachilingile kamuwika kunahu, muze alilambwile iye mwene. 28 Mumu Shimbi yakusakula mutu yoze ukwete ulelu hanga apwe mwata wa asasendote a lutwe, alioze liji lia shingo lize asele hanyima lia Shimbi, liakusakula Mwana, yoze hanapwisa mungunu ku miaka yeswe.