Kutuhuka
3 Mose yapwa mukwa-kufunga yimuna ya tato-weno Yetoru sasendote wa Mindiane. Muze te anatwala yimuna sali lia puya, yaheta ku Horepe mulundu wa Zambi wamwenemwene. 2 Mba mungelo wa Yehova yamusolokela mu mulengi wa kahia mukachi ka umwe mungonga. Mose yatala ku mungonga yamona ngwenyi unalekwoka ni kahia, alioze kuusolo kuwema. 3 Kashika, Mose yamba ngwenyi: “Mungukundama hakamwihi hanga ngutale kanawa chikomokeso chino, ngunyingike mumu liaka mungonga kuusolo kuwema.” 4 Muze Yehova amwene ngwenyi Mose kanakundama hanga atale, yamusanyika mukachi ka mungonga ngwenyi: “Mose! Mose!” Iye yakumbulula ngwenyi: “Yami uno.” 5 Kashika Zambi yamba ngwenyi: “Kanda ukundama nawa. Zula sapato, mumu homa hano unamana hali hasandu.”
6 Iye yanunga ngwenyi: “Yami nguli Zambi ya tatenu, Zambi ya Apalahama, Zambi ya Izake ni Zambi ya Yakomba.” Chocho Mose yafuka ku meso, mumu te woma anevu wa kutala kuli Zambi wamwenemwene. 7 Yehova yamba nawa ngwenyi: “Pundu lume, namona lamba lize atu jami ali mu Engitu anamono, nevwa miteto yo yize anatete mumu lia waze akwashinjila hanga akalakale, ngunanyingika kanawa lamba lize anamono. 8 Mungupalumuka hanga ngwatusule ku moko ja A-Engitu ni kwatwala haze lia chifuchi chize, mungwatwala mu chifuchi chinene, chipema, mu chifuchi muze mwatwama yamwa yinji ni uchi, mu mavu ja A-Kanana, ja A-Hete, ja A-Amore, ja A-Perize, ja A-Hevwe ni ja A-Yepushe. 9 Muteto wa A-Izalele waheta kuli yami, chikwo nawa, namona chize A-Engitu akwahungumiona chinji. 10 Tweya, mungukutuma kuli Falau, mba mukachiza atu jami A-Izalele mu Engitu.”
11 Alioze Mose yamba kuli Zambi wamwenemwene ngwenyi: “Yami iya mba nguye kuli Falau, nguchize A-Izalele mu Engitu?” 12 Chocho Zambi yamba ngwenyi: “Mungupwa hamwe ni yena. Chino che chilayi muchisolola ngwo yami mwe nakutuma: Muze muchiza A-Izalele mu Engitu, yenu munukalingila* yami Zambi wamwenemwene ha mulundu uno.”
13 Alioze Mose yamba kuli Zambi wamwenemwene ngwenyi: “Tunyongenu ngwetu, munguya kuli A-Izalele ni kwalweza ngwami: ‘Zambi ya tulamba twenu kangutuma kuli yenu,’ mba o manguhula ngwo: ‘Jina lienyi iya?’ Kuchi mungwakumbulula?” 14 Zambi yamba kuli Mose ngwenyi: “Yami Mungupwa* Cheswacho Munguzanga Kupwa.”* Mba yamba nawa ngwenyi: “Yino ye watamba kulweza kuli A-Izalele ngwe: ‘“Yami Mungupwa,” kangutuma kuli yenu.’” 15 Zambi yamba nawa kuli Mose ngwenyi:
“Yino ye watamba kulweza kuli A-Izalele ngwe: ‘Yehova, Zambi ya tulamba twenu, Zambi ya Apalahama, Zambi ya Izake ni Zambi ya Yakomba kangutuma kuli yenu.’ Lino lie jina liami ndo ku miaka yeswe, chenacho makangwiwuluka ku chisemuko ni chisemuko. 16 Haliapwila, yako ukungulule makulwana ja A-Izalele ni kwalweza ngwe: ‘Yehova, Zambi ya tulamba twenu, Zambi ya Apalahama, Zambi ya Izake ni Zambi ya Yakomba, kasoloka kuli yami ni kwamba ngwenyi: “Pundu lume, ngunamono chize ananupinjisa mu Engitu. 17 Kashika ngunambe ngwami: Mungunuchiza mu lamba lize nunamono ku moko ja A-Engitu ni kunutwala mu chifuchi cha A-Kanana, cha A-Hete, cha A-Amore, cha A-Perize, cha A-Hevwe ni cha A-Yepushe, hanga ngunutwale mu chifuchi muze mwatwama yamwa yinji ni uchi.”’
18 “Pundu lume, ayo makapanjika liji lie, mba mukaya kuli mwanangana wa Engitu hamwe ni makulwana ja A-Izalele. Yenu nwatamba kwamba kuli iye ngwenu: ‘Yehova, Zambi ya A-Hepreu kahanjika ni yetu. Kashika, lisesa, tweche kama tuye wenyi wa matangwa atatu mu puya hanga tukalambule yitapo kuli Yehova, Zambi yetu.’ 19 Alioze ngunanyingika kanawa ngwami, mwanangana wa Engitu kechi kanwecha, shina wika nyi limwe kwoko lia ndundo mulimushinjila kuchilinga. 20 Kashika, mungwolola kwoko liami hanga ngumwese A-Engitu lamba ni yitanga yami ya kukomwesa, mba makanutusula hanga nuye. 21 Mungulinga hanga A-Engitu evwile keke atu jami, hanga muze makakatuka mu Engitu, achine kukatukamo mokomoko. 22 Pwo mweswe katamba kwita yikwata ya prata ni ya oru ni mazalo kuli mwenyembo wenyi ni kuli pwo mweswe yoze watwama ku zuwo lienyi, mba yuma yacho munukayijika kuli ana jenu a malunga ni a mapwo, munukatambula yuma yeswe ya A-Engitu.”