Kutuhuka
32 Chocho, muze atu amwene ngwo Mose kanashimbula chinji ku mulundu, atu yalikungulula kuli Arone, yamba kuli iye ngwo: “Tuye! Tulingile umwe kazambi yoze matutetekela, mumu kutwanyingikine yize yalingiwa kuli yono Mose, yoze watuchijile mu chifuchi cha Engitu.” 2 Mba Arone yamba kuli ayo ngwenyi: “Zulenu yimbilingwa ya oru ku matwi ja mapwo jenu, ana jenu a malunga ni a mapwo, nuyinehe kuli yami.” 3 Chocho atu eswe yazula yimbilingwa ya oru ku matwi, yayitwala kuli Arone. 4 Iye yanda oru yize ayo anehene, yayizuzulula, mba yanda shizo yayisonga, yalinga kaponya wa mwana-ngombe. Mba ayo yaputuka kwamba ngwo: “Yenu A-Izalele, yono mwe Zambi yenu yoze wanuchijile mu chifuchi cha Engitu!”
5 Muze Arone amwene yuma yino, yatunga chilumbilo kulutwe lia mwana-ngombe. Mba Arone yatwa mutambi ngwenyi: “Hamene mukukapwa chiwanyino cha Yehova.” 6 Mukwachako, ayo yalaula chimenemene, yahana milambu ya kulumba ni kuneha yitapo ya sambukila. Atu yatwama, yalia, yanwa. Mba yakatuka hanga ahehe.
7 Yehova yamba kuli Mose ngwenyi: “Yako, sunuka, mumu atu je, waze wachijile mu chifuchi cha Engitu, halichisa. 8 Hahambuluka ni kawashi mu jila yize naatumine kwendela. Halilingila kaponya* walifwa ni mwana-ngombe, kanafulamana kulutwe lienyi ni kumwaha yitapo ni kwamba ngwo: ‘Yenu A-Izalele yono mwe Zambi yenu, yoze wanuchijile mu chifuchi cha Engitu.’” 9 Yehova yamba nawa kuli Mose ngwenyi: “Hinamona ngwami atu wano akwa-mbunge jikalu. 10 Kashika, kanda weseka kungukwika, ngweche ngwashihe eswe mu utenu wami usasu. Mba mungupwisa yena vungu linene mu chihela cho.”
11 Chocho, Mose yaliumba kuli Yehova Zambi yenyi ngwenyi: “Yehova, yena wachijile atu je mu chifuchi cha Engitu ni ndundo jinji ni kwoko lia ndundo, mba haliapwila mumu liaka unatenuka no chichize? 12 Kanda wecha A-Engitu ambe ngwo: ‘Waachijile mu Engitu ni nyonga lipi hanga waashihe ku milundu ni kwakuwisa hashi.’ Lisesa nyonga kama kanawa ha chiyulo* unambe kukwata, kanda uneha lamba lino hali atu je. 13 Yiwuluka kama tuvumbi twe wano: Apalahama, Izake ni Izalele, atu waze walishingile ni kwamba ngwe: ‘Mungukokesa munyachi wenu ngwe tutongonoshi a mwilu, ni kuhana chifuchi cheswe chino nanulweza ku munyachi wenu, hanga chipwe chihinga cho cha mutolo.’”
14 Chocho, Yehova yanyonga kanawa ha chiyulo* chize ambile kukwata ni ha lamba lize azangile kuneha hali atu jenyi.
15 Mba Mose yatewuluka, yasunuka ku mulundu ni mawe aali a Uchela mu moko. Ha mawe jacho hapwile hakusoneka sali ni sali, ku lutwe ni kunyima. 16 Mawe jacho Zambi waaluliekele, ni maliji waze apwileho, iye mwe waasonekene. 17 Muze Yoshua aputukile kwivwa zungo lia atu te anatete, yamba kuli Mose ngwenyi: “Mu chilombo muli chizungozungo cha jita.” 18 Alioze Mose yamba ngwenyi:
“Hi chizungozungo ko cha kukumba,
Chipwe chizungozungo cha kunenganyana mumu lia kwakumba.
Ngunevu chizungozungo cha kwimba.”
19 Muze Mose ahetele hakamwihi ni chilombo mba yamona mwana-ngombe ni chize A-Izalele te anahangana, yevwa uli unji, yambila mawe hashi waze te ali mu moko jenyi, mawe yapalwoka mushi lia mulundu. 20 Iye yanda mwana-ngombe yoze alingile, yamwocha, yamufwenya, mba yanda uto yaumbila mu meya, meya jacho yaanwisa A-Izalele. 21 Mba Mose yamba kuli Arone ngwenyi: “Yika atu wano akulinga mba waakokele shili yipwahaha?” 22 Arone yakumbulula ngwenyi: “Mwene wami kanda nutenuka. Yenu nunanyingika kanawa ngwenu atu wano kakuzanga kulinga yuma yipi. 23 Ayo kambanga kuli yami ngwo: ‘Tulingile umwe kazambi yoze matutetekela, mumu kutwanyingikine yize yalingiwa kuli yono Mose, yoze watuchijile mu chifuchi cha Engitu.’ 24 Kashika nambanga kuli ayo ngwami: ‘Mweswe uli ni yimbilingwa ya oru, ayizule, ayinehe kuli yami.’ Chocho, yingumbila oru yacho ha jiko, yihatuhuka mwana-ngombe au.”
25 Mose yamona ngwenyi atu te kanalingi yuma chamulingila, mumu Arone kakahashile kwakwika, chino yichaasaula kumeso ja akwa-kole jo. 26 Chocho, Mose yamana ku unjililo wa chilombo, yamba ngwenyi: “Iya uli sali lia Yehova? Eze kuli yami!” Mba A-Levi eswe yamujingilika. 27 Yamba kuli ayo ngwenyi: “Chocho anambe Yehova Zambi ya Izalele ngwenyi: ‘Mutu ni mutu alipachike katana kenyi mu zalilo, endangane mu chilombo cheswe ku chikolo ni chikolo, ashihe ndumbwenyi, mwenyembo ni sepa lienyi.’” 28 A-Levi yalinga kulita ni chize Mose aatumine. Chocho ha tangwa lize malunga 3,000 yaashiha. 29 Mba Mose yamba ngwenyi: “Musono liselenu ku usandu hanga nulinge milimo ya Yehova, mumu nwononokena yeswe yize iye anulweza, mutu ni mutu kashiha mwanenyi ni ndumbwenyi, musono iye manuwahisa.”
30 Mukwachako, Mose yamba kuli atu ngwenyi: “Yenu nwalinga shili yinene chinji, kashika mungukanduka haliapwila ngukaliwane ni Yehova, hanga ngukanuhanjikile hanji iye makonekena shili yenu.” 31 Chocho, Mose yahiluka kuli Yehova, yamba ngwenyi: “Atu wano kalinga shili yinene! Kalilingila kazambi wa oru. 32 Alioze, haliapwila, nyi muchilita ni upale we, konekena kama shili yo. Nyi ka, lisesa ngujimune kwe mu mukanda uze wangusonekene.” 33 Alioze, Yehova yamba kuli Mose ngwenyi: “Yoze walinga shili, mwe mungujimuna mu mukanda wami. 34 Haliapwila, yako, usongwele atu ndo ku chihela kuze nakulwezele. Mungelo wami maya kulutwe lienu. Mba ha tangwa lize mungukaafwetesa, mungukaneha lamba hali ayo mumu lia shili yo.” 35 Chocho, Yehova yaneha chilungo hali atu ha kulinga mwana-ngombe, mwana-ngombe yoze Arone alingile.