Asonekene Luka

24 Ha tangwa litangu lia poso, mapwo yalimeneka chimene-mene ku fuka, yambata yitumbo ya vumba lipema yize aluliekele. 2 Alioze, yawana liwe halilangumuna ku fuka, 3 muze anjililemo, kawanyinemo mujimba wa Mwene Yesu. 4 Shimbu te machikakajana ha chikuma chino, malunga aali waze te anazala mahina a peyima, yakundama kuli ayo. 5 Mapwo yevwa woma, yahetamisa mitwe yo hashi, mba malunga jacho yaahula ngwo: “Mumu liaka nunafupu hakachi ka afu yoze uli ni mwono? 6 Iye keshi muno, alioze hamuhindwisa. Iwulukenu ngwenu, muze apwile ku Ngalileya, iye kanulwezele 7 ngwenyi, Mwana-mutu chamutamba kumukunjika ku moko ja yivulumunyi, makamushiha ha mutondo, mba ha tangwa liamuchitatu makamuhindwisa.” 8 Mba ayo yewuluka maliji jenyi, 9 chocho, yakatuka ku fuka, yaya yalweza kuli e Kumi ni Kashi yuma yeswe ni kuli tumbaji akwo eswe. 10 Mapwo jacho kapwile wano, Maria Ka-Mandala, Joana ni Maria, naye ya Tiangu. Ni mapwo akwo waze apwile no hamuwika, yalweza apostolo yuma yino yeswe. 11 Alioze, maliji jacho yasoloka kuli ayo ngwe a mahuza, kakatayijile yize mapwo aalwezele.

12 Alioze, Petulu yakatuka, yazomboka fuji ku fuka, yahetama, yamona wika mahina a linyu, chocho yaya kwenyi ni kulihula yize yalingiwako.

13 Alioze, ha tangwa lizeliene, aali a kuli ayo te kanayi ku chimwe chihunda avuluka ngwo, Emeu, chize chapwile ha usuhwe wa makilometru kumi ni kashi* ni Yerusaleme, 14 ayo te kanahanjika ha yuma yeswe yize yalingiwileko.

15 Shimbu te machihanjika ni kulihula ha yuma yino, Yesu mwene yakundama kuli ayo yaputuka kuya no hamuwika, 16 alioze ayo kahashile kumunyingika ngwo iye. 17 Iye yaahula ngwenyi: “Yuma yika nunahanjika muze nunende?” O yamana ni yinyengo ku meso. 18 Umwe wa kuli ayo, yoze avuluka ngwo Keleofwa, yamukumbulula ngwenyi: “Shina yena uli ngeji mu Yerusaleme, kuwanyingikine yize yalingiwamo matangwa wano?” 19 Iye yaahula ngwenyi: “Yuma yika yenayo?” Ayo yamukumbulula ngwo: “Yuma yize yinatala hali Yesu, Ka-Nazare, yoze wapwile profeta wa ndundo mu yitanga ni mu maliji kumeso ja Zambi ni ja atu eswe; 20 asasendote a lutwe ni akwa-kuyula jetu, kanakamukunjika ku upatwilo wa kufwa, mba yamuhachila ha mutondo. 21 Alioze, twapwile ni kushimbwila ngwetu lunga yono mwe te makuula Izalele. Chikwo nawa, lino lili tangwa liamuchitatu chize haze yuma yino yinakalingiwa. 22 Chikwo nawa, amwe mapwo hakachi ketu atukomwesanga, mumu kayanga chimene-mene ku fuka, 23 mba muze kawanyine mujimba wenyi, yafuna ni kwamba ngwo, kamonanga usolwelo wa angelo waze aalweza ngwo, iye kali ni mwono. 24 Amwe a kuli waze apwanga ni yetu, kayanga ku fuka yawana chizechene lume mapwo ambanga, alioze kamumwene.”

25 Iye yaalweza ngwenyi: “Mumu liaka kunushi mana, nwakukokoloka ha kutayiza yuma yeswe yize aprofeta ambile! 26 Te kuchatambile Kristu kumona lamba lia yino yuma ni kunjila mu uhenya wenyi?” 27 Yaputuka kwalumbunwina Yisoneko yize yahanjikile hakutwala kuli iye, katu kuli Mose ndo kuli Aprofeta eswe.

28 Muze ayo hakundama ku chihunda kuze te anayi, iye yalinga ngwe kananungu ni wenyi. 29 Alioze, ayo yaliumba hanga iye atwame no, yamba ngwo: “Twama ni yetu mumu hikwapwa chingoloshi ni lie tangwa linayi ni kutoka.” Chocho iye yanjila hanga atwame no. 30 Muze te anali no, yanda mbolo, yalemba, yamupalula yaahayo. 31 Chocho, meso jo yalaula, yamunyingika, alioze iye yatoka kumeso jo. 32 Yamba kuli umwe ni mukwo ngwo: “Ngwami mbunge jetu te jinasasaminya muze te anahanjika ni yetu mu jila ha kutulumbunwina kanawa Yisoneko?” 33 Ha shimbu lizeliene, ayo yakatuka yahiluka ku Yerusaleme, yawana e Kumi ni Kashi ni atu akwo waze te analikungulula hamwe no, 34 kanambe ngwo: “Pundu lume, Mwene hamuhindwisa, kasoloka kuli Semone!” 35 Mba ayo yalumbununa yize yalingiwanga mu jila ni chize anakamunyingika muze iye apalwile mbolo.

36 Muze ayo te anahanjika yuma yino, Yesu mwene yasoloka mukachi ko, yamba kuli ayo ngwenyi: “Sambukila yipwe ni yenu.” 37 Alioze, ayo yatungumuka, ni woma weswe yanyonga ngwe kanamono yimwe spiritu. 38 Kashika, iye yaalweza ngwenyi: “Mumu liaka nunalipikala, mumu liaka nunayambashana mu mambunge jenu? 39 Talenu moko ni molu jami, yami lume; ngukwatenu numone, mumu spiritu kuyishi musunya chipwe yifwaha, ngwe chize nunangumono yami.” 40 Muze te anambe chino, yaasolwela moko ni molu jenyi. 41 Alioze, chipwe chocho, ayo te kanda achitayiza mumu lia uwahililo unji ni kukomoka, mba iye yamba kuli ayo ngwenyi: “Nuli ni chimwe chuma hano cha kulia?” 42 Yamwaha chipinji cha yishi wa kwocha, 43 iye yachitambula yalia kumeso jo.

44 Mba iye yamba kuli ayo ngwenyi: “Wano kali maliji jami waze nanulwezele muze napwile ni yenu ngwo, yuma yeswe yize hanasoneka hakutwala kuli yami mu Shimbi ya Mose ni mu mikanda ya Aprofeta eswe ni mu Masamu, yatamba kumanunuka.” 45 Mba iye yaakwasa hanga anyingike kanawa ulumbunwiso wa Yisoneko, 46 yamba kuli ayo ngwenyi: “Hanasoneka ngwo, Kristu katamba kumona lamba, ha tangwa liamuchitatu makamuhindwisa hakachi ka afu, 47 chikwo nawa, ngwo, mu jina lienyi, kumakambujola sango ja kulikonyeka ku mavungu eswe hanga azuke ukonekeno wa shili, kuputuka ku Yerusaleme. 48 Yenu munukapwa yela ja yuma yino. 49 Alioze, nyingikenu ngwenu, mungunutumina yize Tata hanalakenya. Kashika, nungenu mu mbonge ndo muze manujika tachi ja mwilu.”

50 Iye yaatwala haze ndo ku Mbetaniya, yolola moko, yaawahisa. 51 Shimbu te machaawahisa, yamuhandununa ni ayo, yamutwala mu malilu. 52 Ayo yafulamana* kumeso jenyi, yafuna ku Yerusaleme ni uwahililo unji. 53 Matangwa eswe ayo te kakupwa mu tembele ni kuhalisa Zambi.