Kwalula
16 Chocho Kora mwana wa Izehare, mwana wa Kohate, mwana wa Levi, yalichinga ni Ndatane, Apirame ana ja Eliape ni One mwana wa Pelete, ana ja Rupene. 2 Ayo ni A-Izalele akwo 250, miata akusakula mu chikungulwila, malunga a lufuma, yalimika ni Mose. 3 Chocho, yalichinga hanga alimike ni Mose ni Arone, yamba ngwo: “Kutwanuzangile nawa, chikungulwila cheswe chili chisandu, atu eswe, Yehova kali mukachi ko. Mba mumu liaka nunalise helu lia chikungulwila cha Yehova?”
4 Muze Mose achivwile, hazehene yafulamana hashi. 5 Chocho yalweza Kora ni eswe waze apwile sali lienyi ngwenyi: “Hamene chimene Yehova masakula yoze ni wenyi, yoze musandu ni yoze mahasa kukundama kuli iye. Yoze iye masakula mwe makundama kuli iye. 6 Yena Kora ni eswe waze anakukwasa, lingenu chino: Andenu yikwachilo ya insensu, 7 hanga hamene nukasemo kahia ni insensu kumeso ja Yehova, mba mutu yoze Yehova masakula kali musandu. Kwahwa, yenu ana ja A-Levi!”
8 Mose yamba kuli Kora ngwenyi: “Lisesa panjikenu, yenu ana ja A-Levi. 9 Shina chili chuma chikehe kuli yenu kumona Zambi ya Izalele manuhandununa ku chikungulwila cha A-Izalele ni kunwecha nukundame kuli iye hanga nulinge milimo ya Yehova mu tabernakulu ni kumulingila kumeso ja atu? 10 Zambi kanutayiza hanga nukundame kuli iye hamwe ni mandumbu jenu eswe, ana ja A-Levi, haliapwila nunazange anwehe nawa usasendote nyi? 11 Yena Kora ni eswe waze anakukwasa, nunalimika ni Yehova. Mba hakutwala kuli Arone, yika alinga hanga nulinyenyete hakutwala kuli iye?”
12 Kulutwe lia yino, Mose yatuma kusanyika Ndatane ni Apirame, ana ja Eliape, alioze ayo yamba ngwo: “Kutuchi kuyako! 13 Shina chili chamokomoko kuli yena kutuchiza mu chifuchi cha yamwa ni wuchi hanga utushihile mu puya yino? Haliapwila unazange nawa kupwa mwata hali yetu nyi? 14 Yena kuwatunehene mu chifuchi cha yamwa ni wuchi, chipwe kutwaha minda ni minda ya vinyu ngwe chihinga. Haliapwila unazange kupupuchisa meso ja malunga wano nyi? Kutuchi kuyako!”
15 Chocho Mose yevwa uli unji, yalweza Yehova ngwenyi: “Kanda utayiza mulambu wo wa mbuto. Yami chatambwile kuli ayo chipwe chimbulu umuwika, chipwe kulinga upi kuli umwe wa kuli ayo.”
16 Mose yalweza Kora ngwenyi: “Hamene soloka kumeso ja Yehova ni eswe waze anakukwasa, yena, ayo ni Arone nwatamba kusoloka. 17 Mutu ni mutu wa kuli yenu, katamba kukwata chikwachilo chenyi cha insensu ni kusamo insensu, mutu ni mutu masolola chikwachilo chenyi cha insensu, malunga waze anakukwasa makwata 250 yikwachilo ya insensu kumeso ja Yehova. Ayo malichinga hali yena ni Arone, mutu ni mutu ni chikwachilo chenyi cha insensu.” 18 Mutu ni mutu yanda chikwachilo chenyi cha insensu, yasamo kahia ni insensu, yamana ku chikolo cha mbalaka ya kulikungulwila hamwe ni Mose ni Arone. 19 Muze Kora akungulwile yikwashi jenyi hanga alimike no ku chikolo cha mbalaka ya kulikungulwila, uhenya wa Yehova yiusoloka ku chikungulwila cheswe.
20 Yehova yamba kuli Mose ni Arone ngwenyi: 21 “Lihandununenu ni chizavu chino hanga nguchinongese ha chisuho chimuwika.” 22 Chocho, Mose ni Arone yafulamana hashi, yamba ngwo: “Zambi yami, Zambi ya spiritu ya atu eswe, shina muvwila chikungulwila chino cheswe uli mumu lia shili ya mutu umuwika?”
23 Mba Yehova yalweza Mose ngwenyi: 24 “Lweza chikungulwila cheswe ngwe: ‘Sosolokenu ku mbalaka ya Kora, Ndatane ni Apirame!’”
25 Chocho Mose yaya kuli Ndatane ni Apirame ni makulwana a mu Izalele yaya hamwe nenyi. 26 Mose yalweza chikungulwila ngwenyi: “Lisesa, katukenu ku mbalaka ja malunga wano api, kanda nukwata ku chuma nichimwe cha ayo hanga achine kununongesa mumu lia shili yo.” 27 Hazehene ayo yakatuka ku mbalaka ya Kora, Ndatane ni Apirame. Ndatane ni Apirame yatuhuka mu mbalaka jo, yamana ku chikolo hamwe ni mapwo jo, ana jo a makulwana ni ana-kemba.
28 Mose yamba ngwenyi: “Mumu lia chino, munukanyingika ngwenu Yehova mwe wangutuma hanga ngulinge yuma yino yeswe, yuma yino kuyakatukile mu manyonga jami: 29 Nyi ayo mafwa ngwe chize atu eswe akufwa, nyi mamona lamba ngwe lize malunga eswe akumona, chino muchilumbunuka ngwo, hi Yehova ko wangutuma. 30 Alioze, nyi Yehova malinga chuma chakukomwesa kuli ayo ni hashi muhazuluka ni kwamina eswe ni yikumba yo, mba mapalumuka ni mwono mu Fuka,* yenu mununyingika ngwenu malunga wano kahona Yehova vumbi.”
31 Muze ahwishile kuhanjika maliji wano, hashi yihazuluka. 32 Hashi yihazuluka, yihaamina hamwe ni akwa-zuwo lio ni yikumba yo yeswe ni eswe waze apwile ni kukwasa Kora. 33 Chocho, ayo ni eswe waze te akwakwasa, yapalumuka a mwono mu Fuka, yaashikila mu mavu, chocho ayo yakuwa mukachi ka chikungulwila. 34 Mumu lia kuteta cho, A-Izalele waze eswe apwileho yachina ni kwamba ngwo: “Ni yetu tunevu woma ngwetu, hashi muhatumina.” 35 Hazehene Yehova yatuma kahia, yikashiha malunga 250 waze te analambula insensu.
36 Yehova yamba kuli Mose ngwenyi: 37 “Lweza Eleazare mwana wa sasendote Arone hanga achize yikwachilo ya insensu ha kahia, mumu yili yisandu. Mulweze nawa hanga aye ni kumwangina uto kusuku. 38 Yikwachilo ya insensu ya malunga waze avulumuna ni kufweta ni mwono wo, nwatamba kuyitatula hanga nufuke nayo chilumbilo mumu kayisolola kuli Yehova, hiyapwa yisandu. Yikwachilo yacho yatamba kupwa chilayi kuli A-Izalele.” 39 Chocho sasendote Eleazare, yakwata yikwachilo ya insensu ya unengu yize asolwele kuli waze ochele, yayitatula yafuka nayo chilumbilo, 40 ngwe chize Yehova aatumine kupalikila muli Mose. Chino chapwile chiwulwiso kuli A-Izalele ngwo, mutu yoze keshi ni utayizo, yoze hi wa ku munyachi wa Arone ko, katambile kukundama ni kwocha insensu kuli Yehova. Chikwo nawa, niumwe wa kuli ayo katambile kwimbulula Kora ni waze amukwashile.
41 Mukwachako, chikungulwila cheswe cha Izalele yichiputuka kulinyenyeta hali Mose ni Arone ni kwamba ngwo: “Yenu e nwashiha atu ja Yehova.” 42 Muze chikungulwila chalikungulwile hanga chilimike ni Mose ni Arone, yatala ku mbalaka ya kulikungulwila, yamona lelwa te hiliafuka mbalaka, mba uhenya wa Yehova yiuputuka kusoloka.
43 Mose ni Arone yaya kulutwe lia mbalaka ya kulikungulwila, 44 Yehova yalweza Mose ngwenyi: 45 “Katukenu mukachi ka chikungulwila chino hanga nguchinongese.” Chocho, ayo yafulamana hashi. 46 Mose yalweza Arone ngwenyi: “Anda chikwachilo cha insensu sakoho kahia ka ha chilumbilo ni insensu, yako kawashi-washi hanga ufuke shili ya chikungulwila, mumu Yehova hevwa uli. Musongo hiwaputuka.” 47 Hazehene, Arone yanda chikwachilo cha insensu ngwe chize Mose amulwezele, yazomboka mukachi ka chikungulwila, alioze musongo te hiwaputuka kulu. Yasa insensu mu chikwachilo yaputuka kufuka shili ya atu. 48 Yamana mukachi ka afu ni akwa-mwono, chocho musongo yiuhwa. 49 Waze afwile mumu lia musongo kapwile 14,700 kuwezaho nawa waze afwile mumu lia Kora. 50 Muze Arone afunyine kuli Mose ku chikolo cha mbalaka ya kulikungulwila, musongo te hiwahwa kulu.