Mukanda Utangu wa Mianangana

14 Ha mashimbu jacho, Abija mwana wa Jeroboame yayiza. 2 Jeroboame yalweza mukwo-pwo ngwenyi: “Lisesa, zala mahina eka hanga atu achine kunyingika ngwo, uli pwo liami, yako ku Shilo. Profeta Ahija kwe ali, iye mwe wambile ngwenyi mungupwa mwanangana wa atu wano. 3 Mbata mbolo kumi, tumbolo ni mulangi wa uchi, lisolole kuli iye. Iye makulweza yize muyilingiwa kuli mwana.”

4 Pwo lia Jeroboame yalinga yize amulwezele, yaya ku Shilo yaheta ku zuwo lia Ahija. Ahija meso te hamulaa mumu lia ushinakaji.

5 Yehova kalwezele Ahija ngwenyi: “Pwo lia Jeroboame meza hanga akuhule hakutwala kuli mwanenyi, mumu kanayiji. Muze maheta, mungukulweza yize watamba kumulweza. Iye kanazala mazalo eka.”

6 Muze Ahija evwile mishindo ya pwo ku chikolo, yamba ngwenyi: “Njila pwo lia Jeroboame. Mumu liaka unazala mazalo eka? Kangutongola hanga ngukulweze lusango mukalu. 7 Yako ulweze Jeroboame ngwo: ‘Yehova Zambi ya Izalele kanambe ngwenyi: “Nakusakwile hanga upwe mwanangana hali atu jami A-Izalele. 8 Natambwile wanangana ku zuwo lia Ndawichi hanga nguuhane kuli yena. Alioze, yitanga ye yinalisa chinji ni ya kavumbi kami Ndawichi yoze wafungile shimbi jami, washishikile kuli yami ni kulinga wika yuma yipema kumeso jami. 9 Yena wahengesa chinji kuhiana mianangana akwo waze aliangile. Walilingila tuzambi akwo ni tuponya a kuzuzulula hanga ungutuke, wangumba nyima. 10 Mungunongesa mu Izalele malunga eswe a ku zuwo lia Jeroboame ni mwana shiwa ni mutu yoze mulelu. Mungukomba zuwo lia Jeroboame ngwe chize mutu akukomba pinga jeswe. 11 Akwa-zuwo lia Jeroboame waze makafwila mu mbonge, makaalia kuli tuwa. Waze makafwila mu munda, makaalia kuli tujila, mumu Yehova mwe wachamba.”’

12 “Kashika, katuka uye ku zuwo lie. Alioze, muze muheta mu mbonge mwane wa lunga mafwa. 13 A-Izalele eswe mamulila ni kumufunda. Mu usoko wa Jeroboame iye wika mwe mafunda, mumu muli iye wika Yehova Zambi ya Izalele amona chuma chipema. 14 Chize ha tangwa lize, Yehova makaneha umwe mwanangana hali A-Izalele yoze makanongesa akwa-zuwo lia Jeroboame. Chuma chino hichaputuka kulu kulingiwa. 15 Yehova makamwesa A-Izalele lamba, makaahungisa ngwe mbungu jize jili mu meya, makaachiza mu chifuchi chipema chize ahanyine kuli tulamba two, makaamwangina mu sali lia lwiji Ufrateze, mumu kaalinga manangamo, kaatuka Yehova. 16 Iye makomba nyima A-Izalele mumu lia shili yize Jeroboame alinga ni kuvulumwisa A-Izalele.”

17 Chocho pwo lia Jeroboame yakatuka, yaya ku Tiriza. Muze ahetele ku chikolo cha zuwo, mwanenyi wa lunga yafwa. 18 A-Izalele eswe yamulila, yamufunda, kulita ni yize Yehova ahanjikile kupalikila muli profeta wenyi Ahija.

19 Sango jikwo ja ku mwono wa Jeroboame, jita jize ashile ni chize iye ayulile, yeswe yili ya kusoneka mu mukanda wa sango ja mianangana a ha mashimbu ja A-Izalele. 20 Jeroboame kayulile miaka 22, chocho iye yafwa. Mba mwanenyi Nandambe yamusalakana mu chihela chenyi.

21 Ha shimbu liacho, Rehoboame mwana wa Solomone te hapwa mwanangana mu Yunda. Rehoboame kapwile ni miaka 41 muze apwile mwanangana, iye kayulile miaka 17 mu Yerusaleme, mbonge yize Yehova asakwile mukachi ka minyachi yeswe ya Izalele hanga asemo jina lienyi. Naye ya Rehoboame jina lienyi liapwile Namahe, Ka-Amone. 22 A-Yunda yalinga yuma yipi chinji kumeso ja Yehova, ayo kavulumwine chinji kuhiana tulamba two. 23 Ayo yatunga nawa yilumbilo, manangamo ni manguji ku milundu yeswe ni mushi lia mitondo yeswe. 24 Mu chifuchi mwapwile nawa malunga waze apwile ni kulipomba ni malunga-ni-akwo muze te akuwayila tuzambi two. Ayo te kakulinga yuma yeswe yipi ngwe yize apwile ni kulinga mavungu waze Yehova ahumine mukachi ka A-Izalele.

25 Ha mwaka wamuchitano wa kuyula cha Rehoboame, Shishake Mwanangana wa mu Engitu yeza hanga ase jita ni Yerusaleme. 26 Iye yambata upite wa mu zuwo lia Yehova ni wa mu zuwo lia mwanangana. Yambata yuma yeswe hamwe ni kepwe jeswe ja oru jize mwanangana Solomone alingile. 27 Kashika, Mwanangana Rehoboame yalinga kepwe ja unengu hanga asalakanyisemo. Yajihana kuli kapitau ka tulayi yoze te wakufunga zuwo lia mwanangana. 28 Mashimbu eswe waze mwanangana te akuya mu zuwo lia Yehova, tulayi te kakumbata kepwe mba majihilwisa mu zuwo lia tulayi.

29 Sango jeswe ja ku mwono wa Rehoboame ni yeswe yize alingile, yili ya kusoneka mu mukanda wa sango ja mianangana ja A-Yunda a ha mashimbu jacho. 30 Mashimbu eswe te kwakupwa jita hakachi ka Rehoboame ni Jeroboame. 31 Mba Rehoboame yafwa, yamufunda hamwe ni tulamba twenyi mu Mbonge ya Ndawichi. Jina lia naye liapwile Namahe, Ka-Amone, mwanenyi Abijame yapwa mwanangana mu chihela chenyi.