Mukanda Wamuchiali Kuli A-Tesalonika
1 Yami Paulu, hamwe ni Silivanu,* ni Timoteu, ku chikungulwila cha A-Tesalonika chize chinalinungu ni Zambi, Tata yetu, ni Mwene Yesu Kristu:
2 Chawana cha keke ni sambukila ya kuli Zambi mwe Tata, ni ya Mwene Yesu Kristu yikapwe hamwe ni yenu.
3 Chatutamba kusakwilila kuli Zambi matangwa eswe mumu hali yenu mandumbu. Chino chinalite mumu ufulielo wenu unatatuka chinji kuhiana, ni zango lize yenu eswe nukwete hali umwe ni mukwo linakola chinji. 4 Kashika twakuwahilila hali yenu mu yikungulwila ya Zambi, mumu lia kunyongonona chenu ni ha ufulielo uze nwakusolola mu yihungumiona yeswe ni lamba* lize nunamono.* 5 Chino chakusolola upatwilo wa ululi wa Zambi. Ha kulinga chino, munukapwa akwa-kutela Wanangana wa Zambi, uze nwakumwena lamba.
6 Mumu pundu, chapwa ululi kuli Zambi, kufwetesa ni luyinda waze akunukokela luyinda. 7 Alioze yenu, waze nwakupalika mu luyinda, kumunukatambula uhwimino hamwe ni yetu ha kusoloka cha Mwene Yesu kukatuka mu malilu, hamwe ni angelo jenyi a ndundo 8 ni kahia kakulekwoka, ni kupatwila waze kanyingikine Zambi ni waze keshi kwononokena sango jipema hakutwala kuli Mwene wetu Yesu. 9 Atu wano, kumakaahisa ku kwonwona cha mutolo ni kwahandununa kumeso ja Mwene ni ku ndundo jenyi ja uhenya, 10 muze iye makeza hanga akamuhalise hamwe ni asandu jenyi, ni kumukomoka ha tangwa liacho kuli akwa-kufuliela eswe. Mumu nwatayijile uchela uze twahanyine mukachi kenu.
11 Kashika twakulemba matangwa eswe mumu hali yenu, hanga Zambi yetu akanumone ngwe waze atela kutambika chenyi, ni kumanununa ni ndundo jenyi yuma yeswe yize yakumupemena ni yitanga yeswe ya ufulielo, 12 hanga akahalise jina lia Mwene wetu Yesu muli yenu, ni yenu mukulinunga nenyi, kulita ni chawana cha keke cha Zambi yetu ni cha Mwene Yesu Kristu.