Shimbi Yamuchiali
1 Wano e maliji waze Mose alwezele A-Izalele eswe mu sali lia Lwiji Yordau, mu puya, mu yana yili hakamwihi ni Sufe, hakachi ka Parane, Tofele, Lapane, Hazerote ni Dizahabe. 2 Kukatuka ku Horepe ndo ku Kandeshe-Mbania kupalikila mu chifuchi cha ku Milundu cha Sere, atu te kakwenda matangwa 11 mba ahete. 3 Ha mwaka 40, ha kakweji 11, ha tangwa litangu lia kakweji, Mose yalweza A-Izalele* yuma yeswe yize Yehova amutumine kwalweza. 4 Yuma yacho yalingiwile muze te hakumba kulu Sahone, mwanangana wa A-Amore, yoze te watwama mu Heshebone ni muze te hakumba kulu Oge, mwanangana wa Mbashane, yoze te watwama mu Asatarote, ku Endreya. 5 Mu sali lia Lwiji Yordau, mu chifuchi cha Moape, Mose yaputuka kulumbununa Shimbi yino, ngwenyi:
6 “Yehova Zambi yetu katulwezele ku Horepe, ngwenyi: ‘Yenu hinwatwama mashimbu anji mu chifuchi chino cha ku milundu. 7 Liluliekenu hanga nuye mu chifuchi cha ku milundu cha A-Amore, talikisenu mu yifuchi yeswe yaajingilika mu Arapa, mu chifuchi cha ku milundu, mu yana, mu Nengeve, ku sesa lia kalunga-lwiji, chifuchi cha A-Kanana ni ku Lebano ni kuheta ndo ku lwiji munene, lwiji Ufrateze. 8 Talenu, ngunanwehe chifuchi chino. Njilenu hanga nutwame mu chifuchi chize Yehova alishingile kuhana kuli yisemi jenu, Apalahama, Izake, Yakomba ni ku minyachi yo.’
9 “Ha shimbu liacho yingwalweza ngwami: ‘Chichi kuhasa kunutwala ukawami. 10 Yehova Zambi yenu, hananwokesa, kashika musono hinwapwa atu anji ngwe tutongonoshi a mwilu. 11 Yehova, Zambi ya tulamba jenu, akanwokese yisuho tununu ni kunuwahisa ngwe chize alakenyene. 12 Kuchi munguhasa kumbata ukawami yilemu yenu, yiteli yenu ni kuhwisa vunda lienu? 13 Sakulenu mu minyachi yenu malunga a mana, a kanyama, akwa-lufuma mupema. Mba yami mungwasakula hanga apwe akwa-lutwe jenu.’ 14 Yenu nwangukumbulwile ngwenu: ‘Yize mwata wetu amba hanga tulinge yili yipema.’ 15 Kashika, yingusakula akwa-lutwe a minyachi yenu, malunga a mana, a lufuma mupema. Yingwasa hanga apwe miata ja tununu, miata ja kulakaji, miata ja makumi atano, miata ja kumi ni yilolo a minyachi yenu.
16 “Ha shimbu liacho yingulweza ngaji jenu ngwami: ‘Muze mukupwa mulonga hakachi ka mandumbu jenu, hakachi ka umwe lunga ni ndumbwenyi hanji chilambala, yenu nwatamba kuusopa ni ululi. 17 Kanda nusolola katonde muze munusopa umwe mulonga. Nwatamba kupanjika kanawa eswe, apwe pichi hanji chiswale. Kanda nuvwila atu woma, mumu nunasopela Zambi. Nyi mulonga muukala kuli yenu, nwatamba kuuneha kuli yami, mungunupanjika.’ 18 Ha mashimbu jacho, yingwalongesa yuma yeswe yize ayo te atamba kulinga.
19 “Chocho, yitukatuka ku Horepe, yitupalika mu puya yeswe yinene ya kole ni woma, yize nwamwene mu jila ya kuya mu chifuchi cha ku milundu cha A-Amore ngwe chize Yehova Zambi yetu atumine, mba yituheta ku Kandeshe-Mbania. 20 Yingwalweza ngwami: ‘Yenu nwaheta mu chifuchi cha ku milundu cha A-Amore chize Yehova, Zambi yenu anwaha. 21 Talenu, Yehova Zambi yenu, hanwaha chifuchi. Yeenu hanga nutwamemo ngwe chize Yehova Zambi ya tulamba jenu ambile. Kanda nwivwa woma chipwe mwongo.”
22 “Alioze, yenu eswe yinukundama kuli yami, yinwamba ngwenu: ‘Tutumenu malunga kulutwe lietu hanga endese chifuchi ni kutunehena sango hakutwala ku jila yize mutwendela ni mambonge waze mutukawanamo.’ 23 Chiyulo nwanguhele te chinalite, chocho yingusakula malunga 12 a ku munyachi ni munyachi. 24 Ayo yaya, yakanduka chifuchi cha ku milundu, yaheta mu Chikulo cha Esekole, yendesa chifuchi. 25 Yahela yimwe mihuko ya mu chifuchi chacho yatunehenayo. Yatulweza nawa ngwo: ‘Chifuchi chize Yehova Zambi yetu atwaha, chili chipema.’ 26 Alioze yenu yinulituna kuyamo, yinulimika ni shimbi ya Yehova Zambi yenu. 27 Yinulinyenyeta mu mbalaka jenu ni kwamba ngwenu: ‘Yehova keshi kutuzanga, kashika atuchijile ku chifuchi cha Engitu hanga atuhane kuli A-Amore atushihe. 28 Kulihi tunayi? Mandumbu jetu katuhongesa ha kwamba ngwo: “Ayo kali ni tachi jinji, kali asuku-asuku kuhiana yetu. Mambonge jo kali anene-anene ni yipanga yamo yisuku-yisuku, twamonamo nawa ana ja A-Anake.”’
29 “Mba yami yingwamba kuli yenu ngwami: ‘Kanda nwivwa woma, chipwe kwivwa mwongo mumu lia ayo. 30 Yehova Zambi yenu, maya kulutwe lienu ni kunwashila jita ngwe chize alingile ku Engitu kumeso jenu. 31 Mu puya, nwamwene chize Yehova Zambi yenu anufungile kuma kweswe kuze nwapalikile, ndo muze nwahetele mu chifuchi chino, ngwe chize umwe lunga akufunga mwanenyi.’ 32 Chipwe chocho, kunwakafulielele muli Yehova Zambi yenu, 33 yoze te wakutetekela kulutwe hanga anuwanyine chihela chize munusa chilombo. Ufuku te kakusoloka mu kahia, mwalwa mu lelwa hanga anusolwele jila yize nwatamba kwendela.
34 “Ha mashimbu eswawa, Yehova te kakwivwa yuma yeswe yize nwakwamba, kashika evwile uli ni kulishinga ngwenyi: 35 ‘Lunga niumwe wa mu chisemuko chino chipi makamona chifuchi chipema chize ngunalishingi kuhana kuli yisemi jenu, wakuhi. 36 Kalemba wika mwana wa Yefune mwe makachimona. Iye makachimona, yami mungukamwaha chifuchi chize iye endele, iye ni ana jenyi, mumu kakaula Yehova ni mbunge yenyi yeswe. 37 (Yehova yangutenukina nawa mumu lia yenu, yamba ngwenyi: “Ni yena kuuchi kanjila mu chifuchi chacho. 38 Yoshua mwana wa Nune, kavumbi ke, mwe makanjila mu chifuchi chacho. Kashika, mutakamise, mumu iye mwe makakwasa A-Izalele kuhinga chifuchi chacho.”) 39 Ana jenu, waze nwambile ngwenu kumakaambata ngwe funge ni ana jenu a malunga waze musono kanyingikine chipi ni chipema, e makanjilamo. Mungukaha chifuchi chino ngwe chihinga cho. 40 Alioze yenu, tewulukenu nuye mu puya mu jila ya Kalunga-Lwiji Muchila.’
41 “Mba yenu yinwamba kuli yami ngwenu: ‘Twavulumuna kuli Yehova. Haliapwila tukandukenu twase jita ngwe chize Yehova Zambi yetu atutumine.’ Mutu ni mutu wa kuli yenu yanda uta wenyi, yinunyonga ngwenu muchipwa chashi kukanduka ku chifuchi cha ku milundu. 42 Alioze Yehova yangulweza ngwenyi: ‘Alweze ngwe: “Kanda nukanduka chipwe kwasa jita, mumu chichi kupwa hamwe ni yenu. Nyi nwayako, manukumba kuli akwa-kole jenu.”’ 43 Yami nanulwezele, alioze kunwakangupanjikile. Mumu lia uhulia wenu, yinwehuka shimbi ja Yehova, yinweseka kukanduka ku chifuchi cha ku milundu. 44 Chocho A-Amore waze te atwama mu chifuchi chacho, yanuzukukila ngwe puka. Yinuchinyina ku Sere, yinuya ndo ku Horoma. 45 Yenu yinuhiluka mba yinuputuka kulila kumeso ja Yehova, alioze Yehova kanupanjikile chipwe kunupala. 46 Kashika nwalingile mashimbu anji mu Kandeshe.