Akwa-Kuyula
11 Jefeta Ka-Ngiliate kapwile kajita wa hamu. Naye kapwile chikoi, tato Ngiliate. 2 Alioze, Ngiliate kapwile ni pwo, pwo wacho kanakamusemena ana. Muze ana ja pwo wacho akolele, yaahuma Jefeta ni kumulweza ngwo: “Kutuchi kukwaha chihinga cha tata, mumu uli mwana wa pwo mweka.” 3 Chocho, Jefeta yachina mandumbu jenyi, yaya ni kutwama mu chifuchi cha Tope. Mba malunga amokomoko yalichinga ni Jefeta, yaputuka kwenda nenyi.
4 Hakupalika cha mashimbu, A-Amone yasa jita ni A-Izalele. 5 Muze A-Amone aputukile kwasa jita ni A-Izalele, makulwana a mu Ngiliate yaya kawashi-washi ni kusaka Jefeta mu chifuchi cha Tope. 6 Ayo yamba kuli Jefeta ngwo: “Tweya upwe kapitau wetu hanga twase jita ni A-Amone.” 7 Alioze Jefeta yahula makulwana a mu Ngiliate ngwenyi: “Ngwami yenu nwanguvwilile kole mba yinunguhuma ku zuwo lia tata? Haliapwila amu nunamono lamba, kashika nuneza ni kungwita ukwaso nyi?” 8 Makulwana a mu Ngiliate yakumbulula Jefeta ngwo: “Ewa, ye twakaula. Nyi muwiza ni yetu hanga wase jita ni A-Amone, muupwa kasongo wetu ni wa A-Ngiliate eswe.” 9 Chocho Jefeta yamba kuli makulwana a mu Ngiliate ngwenyi: “Nyi munguya ni yenu hanga ngwase jita ni A-Amone, mba Yehova mangukwasa kwakumba, pundu lume mungupwa kasongo wenu!” 10 Makulwana a mu Ngiliate yalweza Jefeta ngwo: “Yehova akapwe chela hakachi ketu nyi kutwalingile yize hiwamba.” 11 Chocho Jefeta yaya hamwe ni makulwana a mu Ngiliate, mba atu yamutenga kasongo ni kapitau ko. Muze apwile ku Mizepa, Jefeta yahilukila yuma yeswe yize ambile kumeso ja Yehova.
12 Henaho Jefeta yatuma tunganda kuli mwanangana wa A-Amone hanga amuhule ngwenyi: “Yika nakulinga mba ulimike ni chifuchi chami?” 13 Mwanangana wa A-Amone yalweza tunganda ja Jefeta ngwenyi: “Mumu A-Izalele katambwile chifuchi chami muze akatukile ku Engitu, chize ku Arnone ndo ku Yapoke ni ku lwiji Yordau. Haliapwila nyi unazange sambukila, hilwisa chifuchi chami.” 14 Alioze, Jefeta yatuma cheka nawa tunganda kuli mwanangana wa A-Amone 15 hanga amulweze ngwenyi:
“Jefeta kamba ngwenyi: ‘A-Izalele kakatambwile chifuchi cha A-Moape chipwe cha A-Amone, 16 mumu muze A-Izalele akatukile ku Engitu, kendele mu puya ndo muze ahetele ku Kalunga-Lwiji Muchila ni ku Kandeshe. 17 A-Izalele yatuma tunganda kuli mwanangana wa Endome hanga amulweze ngwo: “Lisesa, tweche kama tupalikile mu chifuchi che.” Alioze mwanangana wa Endome katayijile. Ayo yeta nawa kuli mwanangana wa Moape, alioze ni iye katayijile. Chocho, A-Izalele yatwama mu Kandeshe. 18 Ayo yanunga ni kwenda mu puya, yajinguluka chifuchi cha Endome ni chifuchi cha Moape. Yapalikila mu chifuchi cha Moape ku chivumbuko, yasa chilombo cho mu chifuchi cha Arnone; kakanjilile mu njiza ya Moape, mumu mu Arnone te mwe mwasulila njiza ya chifuchi cha Moape.
19 “‘A-Izalele yatuma nawa tunganda kuli Sahone, mwanangana wa A-Amore, yoze te wakuyula mu Heshebone. A-Izalele yamulweza ngwo: “Lisesa tweche kama tupalikile mu chifuchi che hanga tuye mu chifuchi chetu.” 20 Alioze, Sahone kakajikijilile A-Izalele, kashika kakaatayijile hanga apalikile mu njiza yenyi. Mba Sahone yakunga atu, yasa chilombo ku Yahaze, yasa jita ni A-Izalele. 21 Chocho, Yehova Zambi ya A-Izalele, yakunjika Sahone ni atu jenyi mu moko ja A-Izalele, ayo yaakumba, A-Izalele yatambula chifuchi cha A-Amore ni atu jamo. 22 Chocho ayo yatambula chifuchi cheswe cha A-Amore, chize ku Arnone ndo ku Yapoke, chize mu puya ndo ku lwiji Yordau.
23 “‘Ngwami Yehova Zambi ya A-Izalele mwe wahumine A-Amore kumeso ja A-Izalele, haliapwila yena mwe unazange kuhuma A-Izalele? 24 Ngwami ni yena wakutambula yeswe yize zambi ye Chemoshe akukwaha? Kashika ni yetu mutuhuma atu waze Yehova Zambi yetu mahuma kumeso jetu. 25 Shina yena uli mulemu chinji kuhiana Mbalake mwana wa Zepore, mwanangana wa Moape? Shina tangwa limwe, iye hanapinjisa kama A-Izalele ni kwasa no jita? 26 A-Izalele katwamine miaka 300 mu Heshebone ni yihunda yamo, mu Aroere ni yihunda yamo ni mu mambonge eswe waze apwile hakamwihi ni Arnone. Ha miaka yeswayi, mumu liaka kuwakayitambwile? 27 Yami chavulumwine kuli yena, alioze yena unahengesa ha kwasa jita ni yami. Yehova apwe Ngaji musono hakachi ka A-Izalele ni A-Amone.’”
28 Alioze, mwanangana wa A-Amone yalituna kupanjika maliji a Jefeta.
29 Chocho spiritu ya Yehova yiyiza hali Jefeta, iye yapalika mu Ngiliate ni Manase, yaya ku Mizepa ya Ngiliate, ku Mizepa ya Ngiliate yanunga ndo kuli A-Amone.
30 Kwenako, Jefeta yalinga chilakenyo kuli Yehova, yamba ngwenyi: “Nyi mukunjika A-Amone ku moko jami, 31 mutu mweswawo yoze makeza ni kungupatwiza muze mungufuna kanawa mu jita yize mungwasa ni A-Amone, kumapwa wa Yehova, mungumuhana ngwe mulambu wa kwocha.”
32 Chocho Jefeta yaya ni kwasa jita ni A-Amone, mba Yehova yakunjika A-Amone mu moko jenyi. 33 Iye yapupa mambonge 20, chize ku Aroere ndo ku Minite, yaheta ndo ku Abele-Keramini. Chocho A-Amone yaakumba kuli A-Izalele.
34 Jefeta yafuna ku zuwo lienyi ku Mizepa, mba mwanenyi wa pwo yeza ni kumupatwiza, te kanembi kamukupiela* ni kuhangana. Jefeta kapwile wika ni mwana umuwika. 35 Muze amumwene, yasuwa mazalo jenyi, yamba ngwenyi: “Mama yami mwanami! Wangulimuna, mumu wangunehena lamba. Nalinganga chilakenyo kuli Yehova, kashika chichi kuhasa kufuna kunyima.”
36 Alioze, mwanenyi yamba ngwenyi: “Tata, nyi walinganga chilakenyo kuli Yehova, linga ni yami kulita ni yize hiwalakenya, mumu Yehova kanongesa akwa-kole je, A-Amone.” 37 Iye yalweza nawa tato ngwenyi: “Ngunazange kukwita chuma chimuwika: Ngwehe kama tukweji aali hanga nguye ni kulinyenga ku milundu hamwe ni masepa jami, mumu mungukafwa twamwishi.”*
38 Tato yamwamba ngwenyi: “Yako!” Chocho iye yaya, yalinga tukweji aali ku milundu hamwe ni masepa jenyi hanga alinyenge mumu te kechi kuya ulo. 39 Hakupalika cha tukweji aali iye yafuna, mba tato yamanununa chilakenyo chize alingile. Mwana-pwo wacho te kanda achilipomba ni lunga. Chocho mu Izalele yimupwa chako chino: 40 Ha mwaka ni mwaka, ha matangwa awana ha mwaka, akweze a mapwo a mu Izalele te kakuyaya ni kumeneka mwana wa Jefeta Ka-Ngiliate hanga amuchichimieke.