Mukanda Utangu wa Samuele
20 Chocho Ndawichi yachina ku Naiote, mu Rama, yaliwana ni Jonata, yamuhula ngwenyi: “Yika nalinga? Mulonga uka navulumuna, hanji shili yika nalinga kuli tatenu yize iye anazange kungushihila?” 2 Jonata yamukumbulula ngwenyi: “Pundu lume, chino kuchichi kulingiwa! Kechi kukushiha. Tata kechi kulinga chuma nichimwe, chipwe chinene hanji chikehe shimbu kanda achingulwezacho. Mumu liaka tata manguswekela chuma cha mutapu au? Chikalu tata kulinga chuma cha mutapu au!” 3 Alioze Ndawichi yanunga ni kwamba ngwenyi: “Pundu lume, tatenu kananyingika kanawa ngwenyi, yena ni yami tuli masepa. Kashika hanji kanyonga ngwenyi: ‘Chichi kulweza Jonata chikuma chino, nyi ka mevwa chinyengo.’ Alioze, ni mwono wa Yehova, ni mwono we, pundu lume mwono wami ha chala uli!”
4 Chocho, Jonata yamba kuli Ndawichi ngwenyi: “Mungulinga yeswayo muwamba.” 5 Ndawichi yamba kuli Jonata ngwenyi: “Hamene lili tangwa lia kakweji mwaha, pundu lume, mwanangana mazanga hanga ni yami ngutwame hamuwika nenyi tulie. Alioze ngweche nguye kwami hanga nguswame mu yambu ndo hamene-lia-lize ufuku. 6 Nyi tatenu mangufupa, umulweze ngwe: ‘Ndawichi kangwita hanga aye ku mbonge yenyi ku Mbeteleme, akalinge chiwanyino cha chitapo cha ha mwaka hamuwika ni usoko wenyi.’ 7 Nyi iye mamba ngwenyi: ‘Kushi mulonga,’ chekwamba ngwo nichimwe muchilingiwa kuli kavumbi ke chakuhi. Alioze nyi iye matenuka, yena munyingika ngwe, chamwenemwene iye kanazange kungulinga upi. 8 Solola kama zango lize kulishi kuhwa kuli yami kavumbi ke, mumu unakalinga usendo ni yami kumeso ja Yehova. Alioze nyi nguli ni chimwe chitela, ngushihe yena mwene, mumu liaka mungukunjika nawa kuli tatenu?”
9 Kashika Jonata yamba ngwenyi: “Kanda wamba chuma cha mutapu au! Nyi mungunyingika ngwami tata kanazange lume kukulinga upi, mungukutoweza.” 10 Ndawichi yahula Jonata ngwenyi: “Iya mangulweza nyi tatenu makumbulula ni uli?” 11 Jonata yamba kuli Ndawichi ngwenyi: “Tweya, tuye chimuwika mu yambu.” Chocho, o yaya mu yambu. 12 Mba Jonata yamba kuli Ndawichi ngwenyi: “Yehova, Zambi wa Izalele mapwa chela, hamene hanji hamene-lia-lize mungufupa kunyingika manyonga ja tata. Nyi manyonga jenyi hakutwala kuli yena kali apema, mungukutoweza. 13 Alioze, nyi tata mazanga kukulinga upi, mba yami chakulwezele hanga uchine, Yehova angumwese lamba linji. Yehova apwe hamwe ni yena ngwe chize apwile hamwe ni tata. 14 Yena solola zango lia Yehova lize kulishi kuhwa hali yami shimbu nguchili ni mwono, chipwe lume muze mungufwa. 15 Kanda wiza kalitwamina kusolola zango lize kulishi kuhwa kuli akwa-zuwo liami, chipwe lume muze Yehova manongesa akwa-kole eswe a Ndawichi hashi lia mavu.” 16 Chocho Jonata yalinga usendo ni akwa-zuwo lia Ndawichi, yamba ngwenyi: “Yehova makamwesa lamba akwa-kole ja Ndawichi.” 17 Jonata yeta kuli Ndawichi hanga alishinge cheka hakutwala ha zango lienyi hali iye, mumu Jonata te kakumuzanga ngwe chize akulizanga iye mwene.
18 Jonata yamba ngwenyi: “Hamene tangwa lia kakweji mwaha, kashika makakufupa, mumu ha chihela che muhakapwa hamokomoko. 19 Hamene-lia-lize makakufupa chinji kuhiana. Kashika ukeza ha chihela chino haze waswamine tangwa lize, ukatwame hakamwihi ni liwe lino. 20 Yami mungukakonga mivwi yitatu sali limwe lia liwe, ngwe ngunatondekeza ha chimwe chuma. 21 Muze mungutuma chikwashi chami, mungumulweza ngwami: ‘Yako usake mivwi.’ Nyi namwamba ngwami: ‘Mivwi yili sali lino, yande uyinehe,’ chocho yena muhiluka, mumu ni mwono wa Yehova chino muchikalumbunuka ngwo, yuma yeswe yili kanawa, mwono we kuushi mu ponde. 22 Alioze nyi nalweza mukweze ngwami: ‘Mivwi yili ndambu kulutwe lie,’ watamba kuchina, mumu Yehova kanakulweze hanga uchine. 23 Hakutwala ku chilakenyo twalinga, Yehova apwe chela hakachi ka yena ni yami ku miaka yeswe.”
24 Chocho, Ndawichi yaswama mu yambu. Muze tangwa lia kakweji mwaha liahetele, mwanangana yatwama hanga alie. 25 Mwanangana yatwama ha chihela chenyi haze te akutwama hakamwihi ni chikalakala. Jonata yatwama kulutwe lia Saulu, Abenere yatwama sali lia Saulu, alioze ha chihela cha Ndawichi te hali hamokomoko. 26 Ha tangwa liacho, Saulu kambile nichimwe, yanyonga ngwenyi: ‘Kota chimwe chuma chalingiwa, kashika kali wa luchisa. Ewa kota kalichisa.’ 27 Ha tangwa liamuchiali lia kakweji mwaha, ha chihela cha Ndawichi nihindu te hali hamokomoko. Kashika Saulu yahula mwanenyi Jonata ngwenyi: “Mumu liaka mwana wa Yese kejile ni kulia chipwe zau chipwe musono?” 28 Jonata yakumbulula Saulu ngwenyi: “Ndawichi kaliumbanga kuli yami hanga ngumweche aye ku Mbeteleme. 29 Iye kambanga ngwenyi: ‘Lisesa, ngutayize kama nguye, mumu asoko jami mahana chitapo mu mbonge, chikwo nawa, yaya katuma kungusanyika. Nyi muchilita, ngweche kama nguye ngutale ayaya.’ Kashika kejile ni kulia ku mesa ya mwanangana.” 30 Chocho, Saulu yatenukina Jonata ni kwamba ngwenyi: “Mwana wa pwo chihulia! Unamono ngwe yami chanyingikine ngwami wakuzanga kupwa sali lia mwana wa Yese? Mulikolesa sonyi yena mwene ni kukolesa sonyi noko.* 31 Shimbu lieswe mwana wa Yese manunga ni mwono hashi lia mavu, chipwe ngwe yena muopwa mwanangana, kuchi kuyula ha mashimbu anji. Tuma hanga amunehe kuno mumu katamba kufwa.”
32 Jonata yamba kuli Saulu ngwenyi: “Mumu liaka iye atamba kufwa? Yika alinga?” 33 Chocho Saulu yakonga kunga kuli Jonata hanga amushihe. Kashika Jonata yamona ngwenyi chamwenemwene lume tato kanazange kushiha Ndawichi. 34 Hazehene, Jonata yakatuka ni uli ku mesa, kalile nawa ha tangwa liamuchiali lia kakweji mwaha, mumu kevwile chinyengo hamukunda wa Ndawichi, mumu tato kamukolesele sonyi.
35 Mukwachako, Jonata yaya mu yambu ni chikwashi chenyi hanga aliwane ni Ndawichi. 36 Iye yamba kuli chikwashi chenyi ngwenyi: “Zomboka hanga usake mivwi yize mungukonga.” Chikwashi yazomba, Jonata yakonga mwivwi kusuku. 37 Muze chikwashi haheta haze haholokela mwivwi, Jonata yamba kuli iye, ngwenyi: “Mwivwi uli ndambu kulutwe lie.” 38 Jonata yakololoka kuli chikwashi chenyi ngwenyi: “Tambwisa! Yako kawashi, kanda ushimbula!” Chocho, chikwashi yanda mivwi, yahiluka kuli mwene wenyi Jonata. 39 Chikwashi te kanyingikine chuma nichimwe hakutwala ku chikuma chacho. Jonata wika ni Ndawichi e te ananyingika ulumbunwiso. 40 Kashika Jonata yahana yitwa yenyi ya jita kuli chikwashi chenyi, yamwamba ngwenyi: “Yako, yitwale ku chihunda.”
41 Ndawichi kapwile hazehene hakamwihi, ku uto. Muze chikwashi ayile kwenyi, Ndawichi yakatuka haze te anaswame, yafulamana hashi yisuho yitatu. Chocho yalimbejala, eswe yalila, alioze Ndawichi mwe walilile chinji. 42 Jonata yamba kuli Ndawichi ngwenyi: “Yako ni sambukila, mumu twalishingile mu jina lia Yehova ngwetu: ‘Yehova apwe chela hakachi ka yena ni yami, ni hakachi ka minyachi yami ni minyachi ye, ku miaka yeswe.’”
Mba Ndawichi yaya kwenyi, Jonata yahiluka ku chihunda.