Mukanda Utangu wa Samuele
12 Samuele yamba kuli A-Izalele eswe ngwenyi: “Nanulingila yeswe yize nwangwitanga, nanutongwela mwanangana hanga anuyule. 2 Haliapwila, mwanangana yoze manuyula au! Yami kwami hinapwa kashinakaji, kambu hijangutoma, ana jami kali hakachi kenu. Nanusongwela chize ku ukweze wami ndo musono. 3 Yami uno, nyi nuli ni yimwe ya kwamba hakutwala kuli yami, yambenu kumeso ja Yehova ni kumeso ja yoze awayisa: Ngombe hanji chimbulu waya natambula? Yuma yaya neya? Iya namwesa lamba? Iya wangufwetele mbongo hanga ngumusambise? Nyi nalingile chocho, mungunuhilwishila yuma yenu.” 4 Ayo yamba ngwo: “Mwene, kunwatwiyile nichimwe chipwe kutumwesa lamba, kunwatayijile chuma nichimwe kuli mutu niumwe.” 5 Chocho iye yamba kuli ayo ngwenyi: “Musono Yehova kali chela, ni mwanangana yoze iye atongola kali chela ngwo, kunushi ni chitela cha kungusumina mulonga.” Mba ayo yamba ngwo: “Ewa, iye kali chela.”
6 Samuele yamba kuli atu ngwenyi: “Yehova yoze wanuhele Mose ni Arone, yoze wachijile tulamba twenu mu chifuchi cha Engitu kali chela. 7 Haliapwila manenu, mungunusopesa kumeso ja Yehova kulita ni yuma yeswe ya ululi yize Yehova alingile hali yenu ni tulamba twenu.
8 “Muze Yakomba ahetele mu Engitu, ni tulamba twenu yateta kuli Yehova hanga aakwase. Yehova yatuma Mose ni Arone hanga achize tulamba twenu mu Engitu ni kwaneha atwame mu chifuchi chino. 9 Alioze, ayo yavulama Yehova Zambi yo, chocho iye yaakunjika mu moko ja Sisera, kapitau ka tujita ka Hazore, mu moko ja A-Filistea ni mu moko ja mwanangana wa Moape, waze ashile no jita. 10 Mba yateta kuli Yehova ni kwamba ngwo: ‘Hitwavulumuna ha kwehuka Yehova hanga tulingile Ambale ni tuponya ja Asatarote. Haliapwila tulamwine kama ku moko ja akwa-kole jetu hanga tukulingile.’ 11 Chocho, Yehova yanutumina Njerubale, Mbedane, Jefeta ni Samuele hanga anulamwine ku moko ja akwa-kole jenu eswe waze anujingilika nuhase kutwama ku matwi kuluu. 12 Muze nwamwene Nahashi, mwanangana wa A-Amone kaneza ni kulimika ni yenu, yenu yinununga ni kwamba ngwenu: ‘Ka, tunazange mwanangana hanga atuyule,’ chipwe ngwe Yehova, Zambi yenu, kali Mwanangana wenu. 13 Haliapwila, au mwe mwanangana yoze nwasakula, yoze nweta. Talenu! Yehova hatongola mwanangana hanga anuyule. 14 Nyi nwevwila Yehova woma ni kumulingila, ni kwononokena liji lienyi, nyi kunwalimikine ni shimbi ja Yehova, chikwo nawa, nyi yenu ni mwanangana yoze unanuyulu nwakaula Yehova, Zambi yenu, yuma yeswe muyenda kanawa. 15 Alioze, nyi yenu kunwononokenene liji lia Yehova, nyi nwalimika ni shimbi ja Yehova, kwoko lia Yehova mulilimika ni yenu, mulilimika nawa ni yisemi jenu. 16 Haliapwila manenu numone chuma chakukomwesa chize Yehova malinga kumeso jenu. 17 Tuli ha mashimbu a kucha tiliku nyi ngwami? Mungwita kuli Yehova hanga atume kukulunguza ni vula. Mba yenu mununyingika ni kutayiza ngwenu nwalinga upi unene kumeso ja Yehova ha kwita mwanangana.”
18 Kashika Samuele yeta kuli Yehova, Yehova yatuma kukulunguza ni vula ha tangwa lize. Chocho, atu eswe yevwa woma unji wa Yehova ni wa Samuele. 19 Atu eswe yamba kuli Samuele ngwo: “Tulembelenu kama yetu tuvumbi twenu kuli Yehova Zambi yenu, mumu kutwazangile kufwa. Mumu twaweza upi ha shili yetu ha kwita hanga atwehe mwanangana.”
20 Chocho, Samuele yamba kuli atu ngwenyi: “Kanda nwivwa woma. Pundu lume, yenu nwalinga upi unene. Haliapwila kanda nulitwamina kukaula Yehova. Lingilenu Yehova ni mbunge yimuwika. 21 Kanda numwehuka hanga nukaule yuma yamokomoko yize kuyishi kuyukisa, kuyichi kuhasa kunulamwina, mumu yili yamokomoko. 22 Yehova kechi kumbila atu jenyi mumu lia jina lienyi linene, mumu Yehova kanazange nupwe atu jenyi. 23 Hakutwala kuli yami, chichi keza kavulumuna kuli Yehova ha kulitwamina kunulembela. Mungununga ni kunulongesa jila yipema, yalulama. 24 Ngunanwichi wika nuvwile Yehova woma ni kumulingila ni ushishiko ni mbunge yimuwika. Iwulukenu yuma ya kukomwesa yize hananulingila. 25 Alioze, nyi munulinga yuma yipi ku tachi, yenu ni mwe mwanangana wenu makanunongesa.”