Mukanda Utangu wa Samuele
13 Saulu kapwile ni miaka ...* muze apwile mwanangana, yayula A-Izalele ha miaka yaali. 2 Saulu yasakula malunga 3,000 mu Izalele, 2,000 yasala mu Mikimashi, ni mu chifuchi cha milundu mu Mbetele, 1,000 yasala ni Jonata mu Ngibia ya Mbenjamine. Malunga waze asalile, yaahilwisa mutu ni mutu mu mbalaka yenyi. 3 Jonata yashiha maswalale ja A-Filistea waze apwile mu Ngeba, mba A-Filistea yachinyingika. Saulu yatuma kwimba chitavwi mu chifuchi cheswe, ni kwamba ngwenyi: “A-Hepreu achivwe!” 4 A-Izalele eswe yevwa lusango wacho ngwo: “Saulu hashiha maswalale ja A-Filistea, haliapwila A-Filistea hevwila kole A-Izalele.” Chocho yasanyika atu eswe hanga akaule Saulu ku Ngilingali.
5 A-Filistea no yalikungulula hanga ase jita ni A-Izalele. Ayo kapwile ni matemba a jita 30,000, akwa-kwendesa tuvwalu kapwile 6,000, chizavu cha maswalale chapwile chinene chinji ngwe masekeseke ku sesa lia kalunga-lwiji. Ayo yakanduka, yasa chilombo cho ku Mikimashi, ku chivumbuko cha Mbete-Avene. 6 Muze A-Izalele amwene ngwo yuma hiyakala chinji, mwono wo uli mu ponde, yaswama mu yivwenge, mu mena, mu mawe, mu yimbongo ni mu mashima a meya. 7 A-Hepreu amwe yazauka lume Yordau yaya mu chifuchi cha Ngate ni Ngiliate. Alioze Saulu yasala mu Ngilingali, eswe waze te anamukaula te kanachikima ni woma. 8 Iye yashimbwila matangwa shimbiali kulita ni shimbu lize Samuele atesele, alioze Samuele kahetele ku Ngilingali, chocho atu waze apwile ni Saulu yaputuka kulimwanga. 9 Kashika, Saulu yamba ngwenyi: “Ngunehenenu mulambu wa kulumba ni mulambu wa sambukila.” Iye yahana mulambu wa kulumba.
10 Alioze, ha shimbu lizeliene ahwishile kuhana mulambu wa kulumba, Samuele yaheta. Chocho, Saulu yaya ni kumupatwiza, yamumeneka. 11 Samuele yamuhula ngwenyi: “Yika walinga?” Saulu yakumbulula ngwenyi: “Namona ngwami atu te kananguhichika, ni yenu kunwahetele ha shimbu lize nwatesele, chikwo nawa, ni A-Filistea te kanalikungulula ku Mikimashi. 12 Kashika, yingunyonga ngwami: ‘Haliapwila A-Filistea meza ni kulimika ni yami ku Ngilingali, yami kanda nguchita utayizo wa Yehova.’ Kashika namona ngwami chili chilemu kuhana mulambu wa kulumba.”
13 Samuele yamba kuli Saulu ngwenyi: “Walinga chuma cha uhepuke, kuwononokenene shimbi yize Yehova, Zambi ye akuhele. Nyi te wononoka, kachi Yehova makolesa wanangana we hali A-Izalele ku miaka yeswe. 14 Haliapwila, wanangana we kuuchi kakola. Yehova mawana mutu yoze wakulinga yuma yize yakumupemena. Yehova makamutongola hanga akayule atu jenyi, mumu yena kuwononokenene shimbi yize Yehova akuhele.”
15 Chocho, Samuele yakatuka ku Ngilingali, yaya ku Ngibia ya Mbenjamine. Mba Saulu yalula malunga waze asalile no, kapwile 600. 16 Saulu ni mwanenyi Jonata ni malunga waze te achili no yasala ku Ngeba ya Mbenjamine. A-Filistea kasele chilombo cho ku Mikimashi. 17 Maswalale ja A-Filistea yakatuka mu chilombo mu yizavu yitatu, chizavu chimwe yichitalikisa mu tapalo linayi ku Ofra, ku chifuchi cha Shuale, 18 chikwo yichitalikisa ku tapalo lia kuya ku Mbete-Horone. Chizavu chamuchitatu yichitalikisa mu tapalo lia kuya mu njiza yize yatwama kulutwe lia mungulunga wa Zepoime hakamwihi ni puya.
19 Mu chifuchi cheswe cha Izalele kumwakapwile nawa fuli niumwe mumu A-Filistea kambile ngwo: “Kanda twecha A-Hepreu afule tutana hanji makunga.” 20 Kashika, A-Izalele eswe te katamba kuya kuli A-Filistea hanga ahele yikungo ya sharua, matemo jo, njimbu jo ni kwengo jo. 21 A-Izalele kapwile ni kufweta grama nake ja prata mba ahele yikungo ya sharua, matemo, misako, njimbu ni kusongolola mitondo ya kuchoka-choka nayo ngombe. 22 Kashika ha tangwa lia jita, eswe waze apwile ni Saulu ni Jonata, kakapwile ni tutana hanji makunga, shina wika Saulu ni mwanenyi Jonata e apwile ni yitwa ya jita.
23 Maswalale akwo ja A-Filistea kayile mu ka jila kakehe ka mu chimbongo cha Mikimashi.