Mukanda Utangu wa Samuele

31 A-Filistea te kanase jita ni A-Izalele. Maswalale ja Izalele yachina A-Filistea, anji a kuli ayo yafwila ku Mulundu Ngilboa. 2 A-Filistea yakaujola Saulu ni ana jenyi, chocho yashiha Jonata, Abinadambe ni Malakishua, ana ja Saulu. 3 Jita yiyikala chinji kuli Saulu, akwa-kwasa mivwi yamuwana, yamwasa ni kumulemeka chikolo. 4 Saulu yamba kuli mukwa-kumumbachila lukepwe ngwenyi: “Anda katana ungushihe, hanga yilima wano achine kungumwesa lamba ni kungushiha.” Alioze mukwa-kumumbachila lukepwe te kasolo kuchilinga, mumu te kanevu woma unji. Chocho Saulu yanda katana, yalishiha. 5 Muze mukwa-kumbata lukepwe amwene ngwenyi Saulu hafwa, neye yanda katana kenyi yalishiha, yafwa hamwe ni Saulu. 6 Chocho Saulu, ana jenyi atatu, mukwa-kumumbachila lukepwe ni atu jenyi eswe, yafwa ha tangwa lize. 7 Muze A-Izalele waze te ali mu mungulunga ni mu yihunda ya Yordau amwene ngwo, maswalale ja A-Izalele hachina, Saulu ni ana jenyi hafwa, yahichika mambonge jo, yachina. A-Filistea yeza, yatwamamo.

8 Mukwachako, muze A-Filistea ayile ni kwanda upite wa atu waze afwile, yawana Saulu ni ana jenyi atatu hafwa kulu ku Mulundu wa Ngilboa. 9 Chocho yapatula mutwe wa Saulu, yanda yitwa yenyi ya jita, yatuma mikeji hanga amwange sango ku mazuwo ja tuponya two ni hakachi ka atu. 10 Mba yanda yitwa yenyi ya jita, yayisa mu zuwo lia Asatarote. Mujimba wenyi yauzezeleka ku chipanga cha Mbete-Shane. 11 Muze Akwa-Njabeshe-Ngiliate evwile yize A-Filistea alingile kuli Saulu, 12 tujita eswe yakatuka, yenda ufuku wamuundu yahetako, yachiza mujimba wa Saulu, ni mijimba ya ana jenyi ku chipanga cha Mbete-Shane, mba yahiluka ku Njabeshe, yayochelako. 13 Chocho yanda yifwaha yo, yayifunda mushi lia mutondo wa tamalisha ku Njabeshe, yalitwamina kulia ha matangwa shimbiali.