Mukanda Utangu wa Samuele
18 Muze Ndawichi ni Saulu ahwishile kuhanjika, Jonata ni Ndawichi yapwa masepa akolo, Jonata yaputuka kuzanga chinji Ndawichi ngwe chize te akulizanga mwene. 2 Chize ha tangwa lize, Saulu yatwama ni Ndawichi, kamutayijile nawa hanga afune ku zuwo lia tato. 3 Jonata te kakuzanga Ndawichi ngwe chize te akulizanga iye mwene, chocho yalinga usendo ni Ndawichi. 4 Jonata yahana chikuto chenyi cha moko ehi kuli Ndawichi, hamwe ni mazalo jenyi a jita, katana kenyi, uta wa manana ni muya wa mu zalilo. 5 Ndawichi yaputuka kuya ku jita, kweswako Saulu apwile ni kumutuma, yuma yeswe yapwile ni kwenda kanawa. Chocho Saulu yapwisa Ndawichi mwata wa tujita, A-Izalele eswe hamwe ni tuvumbi twa Saulu yawahilila.
6 Muze Ndawichi ni maswalale ahilukile kuze ayile ni kushiha A-Filistea, mapwo a mu mambonge eswe a Izalele yatuhuka ni uwahililo, yaya ni kupatwiza mwanangana Saulu ni kwimba ni kuhangana ni tumikupiela* ni yisaji ya kusa. 7 Mapwo kapwile ni kuwahilila ni kwimba ngwo:
“Saulu hashiha tununu,
Ndawichi hashiha tununu a tununu.”
8 Saulu yevwa uli unji, kazangile chize mapwo te anembi, yamba ngwenyi: “Kanembi ngwo, Ndawichi hashiha makumi a tununu, alioze yami nashiha wika tununu. Kwasala wika amwehe wanangana!” 9 Chize ha tangwa lize, Saulu yaputuka kunyongena Ndawichi yuma yipi.
10 Mukwachako, spiritu yipi ya kuli Zambi yiyiza hali Saulu, iye yaputuka kulinga yuma mu zuwo lienyi ngwe chizaluke* muze Ndawichi te anembi kalialia ngwe chize apwile ni kulinga. Saulu te kali ni kunga ku kwoko; 11 yakonga Ndawichi kunga, yamba ngwenyi: ‘Mungupalakenya Ndawichi ku chikalakala!’ Kachilingile kaali keswe, alioze Ndawichi yalieha. 12 Kashika, Saulu yevwa woma wa Ndawichi, mumu Yehova kapwile hamwe nenyi, alioze te homba nyima Saulu. 13 Chocho Saulu yachiza Ndawichi ku zuwo lienyi, yamutongola hanga apwe mwata wa kanunu ka maswalale, Ndawichi yaputuka kusongwela maswalale ku jita. 14 Yuma yeswe yize Ndawichi apwile ni kulinga te yakwenda kanawa, mumu Yehova kapwile hamwe nenyi. 15 Muze Saulu amwene ngwenyi yuma yeswe yinende kanawa ku mwono wa Ndawichi, yamuvwila woma unji. 16 Alioze, atu eswe mu Izalele ni mu Yunda kapwile ni kuzanga Ndawichi, mumu te kakwasongwela ku jita.
17 Kulutwe, Saulu yalweza Ndawichi ngwenyi: “Mwanami wa pwo wa mukulwana Merabe au. Mungukwahaye hanga apwe mukwenu-pwo. Alioze, nunga ni kusolola hamu ha kwasa jita ya Yehova.” Mumu Saulu kapwile ni kwamba ngwenyi: ‘Kanda afwila ku moko jami, alioze, afwile ku moko ja A-Filistea.’ 18 Ndawichi yamba kuli Saulu ngwenyi: “Yami iya, yisemi jami kuchi apwa, usoko wa tata kuchi wapwa mu Izalele mba yami ngupwe uko wa mwanangana?” 19 Alioze muze mashimbu a kuhana Merabe mwana wa Saulu kuli Ndawichi hanga amumbate ahetele, tato te hamuhana kulu kuli Adriele Ka-Meholate hanga apwe pwo lienyi.
20 Mikale mwana wa Saulu te kakufwila* Ndawichi. Muze Saulu amulwezelecho, yawahilila chinji. 21 Kashika, Saulu yanyonga ngwenyi: “Munguhana Mikale kuli Ndawichi hanga apwe muheto kuli iye, A-Filistea amushihe.” Chocho Saulu yalweza Ndawichi ha chisuho chamuchiali ngwenyi: “Musono yena muopwa tata-weno.” 22 Chikwo nawa, Saulu yamba kuli tuvumbi twenyi ngwenyi: “Hanjikenu ni Ndawichi ku tenga ngwenu: ‘Mwanangana kakukuzanga, ni tuvumbi twenyi eswe no kakukuzanga. Kashika, tayiza kama hanga upwe tato-weno.’” 23 Muze tuvumbi twa Saulu ambile yuma yino kuli Ndawichi, iye yamba ngwenyi: “Yenu nunamono ngwe chili chashi kuli chiswale ngwe yami, mutu wamokomoko kupwa uko wa mwanangana nyi?” 24 Tuvumbi twa mwanangana Saulu yamulweza yize Ndawichi ambile.
25 Kashika, Saulu yamba ngwenyi: “Lwezenu Ndawichi ngwenu: ‘Mwanangana kazangile yihako, alioze kanazange wika lukama wa misosha* ya A-Filistea, hanga akale akwa-kole jenyi.’” Saulu te kanazange hanga Ndawichi amushihe kuli A-Filistea. 26 Chocho tuvumbi twa Saulu yalweza Ndawichi maliji wano, Ndawichi yazanga nyonga lia kupwa uko wa mwanangana. Shimbu tangwa lize amuselele te kanda lichiheta, 27 Ndawichi ni maswalale jenyi yaya, yashiha A-Filistea 200. Ndawichi yatwala misosha* yeswe kuli mwanangana hanga apwe uko wenyi. Mba Saulu yamwaha mwanenyi Mikale hanga apwe mukwo-pwo. 28 Saulu yamona ngwenyi Yehova te kali hamwe ni Ndawichi, chikwo nawa, ni mwanenyi Mikale te kakuzanga chinji Ndawichi. 29 Hachino, Saulu yevwila Ndawichi woma unji kuhiana. Saulu yapwa mukwa-kole wa Ndawichi ku mwono wenyi weswe.
30 Mashimbu eswe yilolo ja A-Filistea apwile ni kuya ku jita, Ndawichi te kakukumba kuhiana tuvumbi eswe a Saulu, chocho jina lia Ndawichi yilifumana chinji.