Mukanda Utangu wa Samuele
1 Mu chifuchi cha milundu ya Eframe, mu limbo lia Rama mwapwile umwe lunga wa ku Ramataime-Zofime jina lienyi te Elekana. Iye kapwile mwana wa Jerohame, mwana wa Elihu, mwana wa Tohu, mwana wa Zufu, Ka-Eframe. 2 Iye kapwile ni mapwo aali. Umwe te jina lienyi Hana, mukwo Penina. Penina kapwile ni ana, alioze Hana kakapwile ni mwana niumwe. 3 Mwaka ha mwaka, lunga wacho kapwile ni kukatuka ku mbonge yo ni kuya ku Shilo hanga awayile ni kuhana yitapo kuli Yehova-wa-Tujita. Kwenako Hofni ni Finehase, ana aali a Eli, apwile ni kukalakala ngwe asasendote a Yehova.
4 Tangwa limwe, muze Elekana te anahana chitapo, yahana tumba ya yifwo kuli pwo lienyi Penina ni kuli ana jenyi a malunga ni a mapwo. 5 Alioze yahana kuli Hana tumba yimuwika yalipwila, mumu Hana kapwile pwo yoze iye te akuzanga chinji. Alioze Yehova kakamuhele ana.* 6 Mukwo-muhali kapwile ni kumusosomba hanga amuvwise chinyengo, mumu Yehova kamupwishile mumba. 7 Chenacho Penina apwile ni kulinga kuli Hana miaka yeswe. Mashimbu eswe Hana apwile ni kukanduka ku zuwo lia Yehova, mukwo-muhali kapwile ni kumusosomba chinji, kashika Hana apwile ni kulila ni kulituna kulia. 8 Chocho lunga lienyi Elekana yamba kuli iye ngwenyi: “Hana, yika unalilila? Mumu liaka kuwazangile kulia? Mumu liaka unanenganyana chize? Shina kuli yena, yami chahianyine ana a malunga kumi nyi?”
9 Muze ahwishile kulia ni kunwa ku Shilo, Hana yakatuka. Sasendote Eli, te kanatwama ha chitwamo ku chikolo cha tembele* ya Yehova. 10 Hana te kananenganyana chinji, chocho yaputuka kulemba kuli Yehova ni kulila chinji. 11 Iye yalinga chilakenyo chino ngwenyi: “Yehova-wa-Tujita, nyi nwatala kama ku luyinda wa yami kavumbi kenu ni kungwiwuluka, nyi kuwanguvulamine kama yami kavumbi ke, ni kungwaha umwe mwana, mwana wa lunga, mungukamuhana kuli yena Yehova matangwa eswe a mwono wenyi, chipwe kambu ja ku mutwe wenyi kechi kajitewula.”
12 Shimbu iye te machinunga ni kulemba chinji kuli Yehova, Eli te kanamutale ku kanwa. 13 Hana te kanahanjikila mu mbunge yenyi, mivumbo wika ye te yinachikima, alioze liji lienyi kalivwile. Kashika Eli yanyonga ngwenyi iye kanazengewa. 14 Yamba kuli iye ngwenyi: “Tangwa lika mulitwamina kuzengewa? Echa kunwa vinyu.” 15 Hana yamukumbulula ngwenyi: “Ka, mwene wami! Nguli pwo mukwa-kunenganyana chinji, chanwine vinyu chipwe walwa ukwo usasu, alioze ngunalweze Yehova yize yili mu mbunge yami. 16 Kanda unyonga ngwe yami kavumbi ke nguli pwo wamokomoko, ngunalembe ndo haliapwila mumu lia lamba ni kunenganyana chami.” 17 Chocho Eli yamba ngwenyi: “Yako ni sambukila, Zambi wa Izalele akwehe kama yize wamwita.” 18 Iye yakumbulula ngwenyi: “Nguvwile kama keke yami kavumbi ke.” Chocho pwo yaya kwenyi, yalia, kanenganyanyine nawa.
19 Elekana ni usoko wenyi yahinduka chimenemene yafulamana kumeso ja Yehova, mba yahiluka ku zuwo lio ku Rama. Elekana yalimona ni mukwo-pwo Hana, chocho Yehova yewuluka Hana. 20 Ha mwaka uzewene, Hana yaka ufumba, yashita mwana wa lunga yamuluka jina ngwenyi, Samuele,* mumu yamba ngwenyi: “Namwichile kuli Yehova.”
21 Ha shimbu lialita, Elekana ni usoko wenyi yakanduka hanga ahane chitapo cha mwaka ha mwaka kuli Yehova, ni kuhana mulambu wenyi wa kumanununa nawo chilakenyo. 22 Alioze Hana kakandukile, iye yamba kuli mukwo-lunga ngwenyi: “Muze mungusumuna mwana mba mungumutwala ku zuwo lia Yehova akatwameko ku miaka yeswe.” 23 Mba mukwo-lunga Elekana yamba kuli iye ngwenyi: “Linga chize chinakupemena. Sala ku zuwo ndo muze musumuna mwana. Yehova akakulingile yize wamba.” Chocho, pwo yasala ku zuwo ni kufunga mwanenyi ndo muze amusumwine.
24 Muze asumwine mwana, yamutwala ku Shilo, hamuwika ni mwana-ngombe wa kuji wa miaka yitatu ni kilu* ja unga kumi ni kashi, chocho yaheta ni mwana ku zuwo lia Yehova ku Shilo. 25 Yashiha mwana-ngombe wa kuji, mba yatwala mwana kuli Eli. 26 Hana yamba ngwenyi: “Lisesa mwene wami! Ngunalishingi ni mwono wenu ngwami, yami nguli pwo yoze wamanyine hano ni yenu hanga ngulembe kuli Yehova. 27 Yono mwe mwana yoze netele mu yilemba, Yehova kakumbulula yilemba yami. 28 Kashika ngunamuhane kuli Yehova. Iye mapwa wambala wa Yehova ku mwono wenyi weswe.”
Chocho Elekena yafulamana kuze kumeso ja Yehova.