Mukanda Utangu wa Samuele
23 Ha kupalika cha mashimbu, Ndawichi yatambula lusango ngwo: “A-Filistea kanase jita ni A-Kela, kanapupu yizungwilo.” 2 Chocho Ndawichi yahula Yehova ngwenyi: “Natamba kuya hanga ngwase jita ni A-Filistea?” Yehova yamba kuli Ndawichi ngwenyi: “Yako wase jita ni A-Filistea, upulwile A-Kela.” 3 Alioze atu ja Ndawichi yamba ngwo: “Nyi muno mu Yunda tunevu woma, mba yika mutwamba nyi twaya ku Kela tukase jita ni maswalale ja A-Filistea!” 4 Kashika, Ndawichi yahula nawa Yehova. Yehova yamukumbulula ngwenyi: “Yako, palumuka ku Kela, mumu mungukunjika A-Filistea mu moko je.” 5 Chocho Ndawichi yaya ni atu jenyi ku Kela, yasa jita ni A-Filistea, yashiha anji a kuli ayo, yatambula mapanga jo ni kulamwina A-Kela.
6 Muze Abiatare, mwana wa Ahimeleke, achinyine hanga alichinge ni Ndawichi ku Kela, kambachile efode yimuwika. 7 Saulu yatambula lusango ngwo: “Ndawichi kali ku Kela.” Chocho Saulu yamba ngwenyi: “Zambi kamukunjika* kuli yami, mumu kanjila mu mbonge yize yili ni mapito ni yikuvu,* kechi kuhasa kuchina.” 8 Kashika, Saulu yakungulula maswalale jenyi eswe aye ku jita. Apalumuke ku Kela, ajingilike Ndawichi ni atu jenyi. 9 Muze Ndawichi anyingikine ngwenyi Saulu kanamutwama punga, yalweza sasendote Abiatare ngwenyi: “Ngunehene efode.” 10 Ndawichi yamba ngwenyi: “Yehova, Zambi wa Izalele, yami kavumbi kenu nevwa ngwo, Saulu kaneza hanga anongese mbonge ya Kela mumu lia yami. 11 Shina A-Kela mangukunjika mu moko jenyi? Shina Saulu meza lume ngwe chocho nevwa? Yehova, Zambi wa Izalele, lisesa ngukumbulule kama yami kavumbi ke.” Yehova yamukumbulula ngwenyi: “Kumeza.” 12 Ndawichi yahula ngwenyi: “Shina A-Kela mangukunjika yami ni atu jami mu moko ja Saulu nyi?” Yehova yamukumbulula ngwenyi: “Ewa.”
13 Hazehene, Ndawichi ni atu jenyi 600, yatuhuka mu Kela, yaputuka kututuluka chihela ni chihela. Muze Saulu atambwile lusango ngwo, Ndawichi hachina mu Kela, kamukawile nawa. 14 Ndawichi yanunga ni kutwama ku milundu ya mu puya ya Zife, ku yihela kuze chikalu kuhetako. Saulu yanunga ni kufupa Ndawichi, alioze Yehova kamukunjikile ku moko jenyi. 15 Muze Ndawichi te ali mu puya ya Zife ku Horeshe, yevwa ngwo Saulu te kanamufupu hanga amushihe.
16 Chocho Jonata mwana wa Saulu yaya ni kulitakana ni Ndawichi ku Horeshe, yamukwasa hanga ajikijile muli Yehova. 17 Yamba ngwenyi: “Kanda wivwa woma mumu tata kechi kukuwana. Yena muopwa mwanangana wa Izalele, yami mwe mungukuhata, chipwe tata kanachinyingika.” 18 Chocho ayo yalinga usendo kumeso ja Yehova. Mba Jonata yahiluka ku zuwo, Ndawichi yasala ku Horeshe.
19 Kulutwe, atu a ku Zife yaya ku Ngibia, yalweza Saulu ngwo: “Ndawichi kanaswame hakamwihi ni yetu ku yihela yikalu kuhetako, mu Horeshe, ku mundundena wa Hachila, uze watwama ku uto wa Njeshimone. 20 Mwanangana, muze munuzanga kwiza, tweyenu, yetu mutumukunjika mu moko jenu.” 21 Chocho Saulu yamba ngwenyi: “Yehova anuwahise, mumu yenu nwanguvwila keke. 22 Lisesa, yeenu nufupe haze anaswame, ni yoze wamumonanga, mumu kangulweza ngwo kanakanyama chinji. 23 Fupenu, nunyingike yihela yeswe kuze akuswama-swama, nwize nungulweze. Mba munguya ni yenu, nyi ngwe kali mu chifuchi, yami mungumufupa mukachi ka tununu eswe ja A-Yunda ndo muze mungumuwana.”
24 Chocho ayo yatetekela, Saulu yasala kunyima. Ha shimbu liacho, Ndawichi ni atu jenyi te kali mu puya ya Mayone, ku Arapa, ku uto ya Njeshimone. 25 Mba Saulu yaya ni atu jenyi ni kufupa Ndawichi. Muze Ndawichi achivwile, hazehene yapalumuka ndo mu luliwe, yanunga mu puya ya Mayone. Muze Saulu achinyingikine, yakaula Ndawichi mu puya ya Mayone. 26 Muze Saulu ahetele sali limwe lia mulundu, Ndawichi ni atu jenyi te kali sali likwo. Ndawichi te kanachina Saulu, alioze Saulu ni atu jenyi te kanayi ni kukundama chinji kuze Ndawichi ni atu jenyi te ali hanga aakwate. 27 Alioze umwe mukeji yeza, yalweza Saulu ngwenyi: “Tambwisenuko mumu A-Filistea halukukila chifuchi!” 28 Chocho Saulu yalitwamina kukaujola Ndawichi, yaya ni kwasa jita ni A-Filistea. Kashika chihela chacho akuchivuluka ngwo Liwe Liakulihandununa.
29 Ndawichi yakatukako, yanunga ku yihela kuze chikalu kuhetako, mu Engidi.