Mukanda Wamuchiali wa A-Korindu
5 Mumu tunanyingika ngwetu nyi zuwo lietu hano hashi, mbalaka yino muyipuzuka, mutukapwa ni zuwo lia kuli Zambi, zuwo lia mutolo mu malilu, lize katungile ni moko ja atu. 2 Kwamba pundu, tunatu mikuma mu zuwo lino. Kashika tunazange chinji zuwo lize hanatutungila, lili mu malilu, 3 hanga muze mutukanjilamo, kanda akatuwana uselesele. 4 Kwamba pundu, yetu waze twatwama mu zuwo lino, tunatu mikuma ni kusakalala, mumu kutwazangile kutuhuka mu zuwo liacho ngwe chize twakuzula mazalo. Alioze tunazange kutambula zuwo lia mu malilu, hanga mwono wa mutolo ukasalakane mijimba yetu ya kufwa. 5 Zambi mwe watululiekele ku chuma chino, iye hanatwehe spiritu ngwe chilayi cha yize muyikeza kulutwe.*
6 Kashika matangwa eswe twakutakama kuhiana, mumu tunanyingika ngwetu, shimbu lieswe lize twakutwama mu mujimba uno ngwe mu zuwo lietu, tuli kusuku ni Mwene, 7 mumu twakutwama kulita ni ufulielo hi kulita ni yize twakumona ko. 8 Alioze twakutakama chinji, twakuzanga kupwa kusuku ni mujimba uno ni kutwama hamwe ni Mwene. 9 Kashika, chipwe mututwama hamwe nenyi hanji mutupwa kusuku ni iye, tunazange kulinga yuma yize muyimuvwisa kuwaha. 10 Mumu yetu eswe kumutukamana* kulutwe lia chitwamo cha upatwilo wa Kristu, hanga mutu ni mutu akatambule fweto yenyi kulita ni yuma yize alingile muze apwile mu mujimba uno, chipwe yipema hanji yipi.*
11 Amu tunanyingika ngwetu, twatamba kuvwila Mwene woma, kashika twakununga ni kukwasa atu kufuliela ha yize twakwamba, alioze Zambi kanatunyingika kanawa. Chikwo nawa, ngunafuliela ngwami shimbi yenu ya mbunge muyinukwasa kunyingika kanawa utu wetu. 12 Kutwazangile kulichichimieka cheka nawa kuli yenu, alioze tunahanjika yino yeswe tunukolweze kuwahilila muli yetu, hanga nukahase kukumbulula kuli waze akulisamba mumu lia chifwa cho, hi mumu lia yize yili mu mbunge ko. 13 Nyi twazalukile, chino chalingiwile mumu hali Zambi, alioze nyi tuli ni manyonga apema, tuli no mumu hali yenu. 14 Zango lia Kristu liakutuyula, mumu tunanyingika chino, mutu umuwika wafwile mumu hali eswe; che kwamba, eswe afwile. 15 Iye kafwilile atu eswe hanga waze ali ni mwono kanda alivwisa kuwaha ene, alioze evwise kuwaha Kristu yoze wafwile mumu hali ayo ni kumuhindwisa.
16 Kashika, chize haliapwila, kutwanyingikine nawa niumwe kulita ni musunya. Chipwe ngwe twanyingikine Kristu kulita ni musunya, nihindu haliapwila kutwamunyingikine nawa chocho. 17 Kashika, nyi umwe kanalinungu ni Kristu, kali chitanga chaha. Yuma yikulu hiyinapalika. Talenu! Yuma yaha hiyinasoloka. 18 Alioze yuma yeswe yakukatuka kuli Zambi, yoze watuwanyishine ni iye mwene kupalikila muli Kristu, ni kutwaha mulimo uze wakukwasa atu kupwa cheka nawa ni usepa ni Zambi, 19 hanji ngwetu, mulimo wa kusolola ngwo Zambi kupalikila muli Kristu, hanalivwashana ni akwa-hashi, iye keshi kwalula shili yo. Alioze kakutukunjika sango jize jakukwasa atu kupwa cheka nawa ni usepa ni Zambi.
20 Kashika etu tuli tunganda a Wanangana, akwa-kusalakana Kristu, chapwa ngwe Zambi kanaliumbu kupalikila muli yetu. Ngwe akwa-kusalakana Kristu, tunaliumbu ngwetu: “Livwashanenu ni Zambi.” 21 Yoze kakanyingikine shili, walipwishile shili* mumu hali yetu, hanga kupalikila muli iye tukapwe ululi wa Zambi.