Mukanda Utangu wa Mianangana

13 Umwe mutu wa Zambi yakatuka ku Yunda, yaya ku Mbetele kulita ni liji lia Yehova. Muze aheteleko, yawana Jeroboame kali ku chilumbilo hanga oche insensu. 2 Chocho mutu wacho yakololoka kulita ni liji lia Yehova ngwenyi: “Yena chilumbilo, yena chilumbilo, Yehova kanambe ngwenyi: ‘Ku zuwo lia Ndawichi mukukasemuka mwana wa lunga yoze makavuluka ngwo, Josia. Iye makalambula hali yena asasendote a manangamo waze akwocha insensu hali yena, makocha hali yena yifwaha ya malunga.’” 3 Ha tangwa liacho, mutu wa Zambi yamba ngwenyi: “Yehova kahana chilayi chino: ‘Chilumbilo muchikapulika, uto uze uliho muukamwangana.’”

4 Muze mwanangana Jeroboame evwile yize mutu wa Zambi wamwenemwene aprofetezele hakutwala ku chilumbilo cha ku Mbetele, iye yachiza kwoko ha chilumbilo, yamika munwe kuli mutu wa Zambi wamwenemwene, yamba ngwenyi: “Mukwatenu.” Hazehene kwoko lienyi yilikala mbe, kahashile nawa kulikoneka. 5 Chocho chilumbilo yichipulika, uto uze wapwileho yiumwangana kulita ni chilayi chize mutu wa Zambi wamwenemwene ahanyine ngwe chize Yehova ambile.

6 Mba mwanangana yalweza mutu wa Zambi wamwenemwene ngwenyi: “Lisesa, ngwichile kama kuli Yehova Zambi ye, ngulembele kama hanga auke kwoko liami.” Chocho mutu wa Zambi wamwenemwene yaliumba kuli Yehova, mba kwoko lia mwanangana yaliuka. 7 Mwanangana yalweza mutu wa Zambi wamwenemwene ngwenyi: “Tuye ku zuwo liami hanga ulie kamwe koma, mba mungukwaha nawa chimwe chawana.” 8 Alioze mutu wa Zambi wamwenemwene yalweza mwanangana ngwenyi: “Chipwe ngwe mungwaha chihanda cha upite we, chichi kuya ni yena, chichi kulia mbolo chipwe kunwa meya ku chihela chino. 9 Mumu Yehova kangulweza ngwenyi: ‘Kanda ulia mbolo chipwe kunwa meya, kanda uhilukila mu jila yize wejilanga.’” 10 Chocho, iye yaya mu jila yeka, kakahilukilile mu jila yize ejilile ku Mbetele.

11 Mu Mbetele mwapwile umwe profeta kashinakaji. Ana ja profeta wacho, yamulweza yuma yeswe yize mutu wa Zambi wamwenemwene alingile ha tangwa liacho ku Mbetele ni yize ambile kuli mwanangana. Muze te halweza tato yuma yacho, 12 tato yaahula ngwenyi: “Mu jila yika ayila?” Chocho ana jenyi yamulweza jila yize mutu wa Zambi wamwenemwene wa ku Yunda ayile. 13 Iye yalweza ana jenyi ngwenyi: “Ngululiekelenu chimbulu.” Ayo yamululiekela chimbulu, yanyinaho.

14 Mba iye yakaula mutu wa Zambi wamwenemwene, yamuwana kanatwama mushi lia mutondo unene. Yamuhula ngwenyi: “Yena mwe mutu wa Zambi wamwenemwene wakatuka ku Yunda?” Iye yamukumbulula ngwenyi: “Ewa.” 15 Profeta kashinakaji yamulweza ngwenyi: “Tuye ku zuwo liami hanga ulie mbolo.” 16 Alioze iye yamukumbulula ngwenyi: “Chatambile kuhiluka ni yena ku zuwo lie, chipwe kulia mbolo hanji kunwa meya mu chihela chino. 17 Mumu Yehova kangulweza ngwenyi: ‘Kanda ulia mbolo chipwe kunwa meya mu chihela chacho. Kanda uhilukila mu jila yize wejilanga.’” 18 Profeta kashinakaji yamulweza ngwenyi: “Ni yami nguli profeta ngwe yena, mungelo wa Yehova kangulweza ngwenyi: ‘Mulweze ahiluke ni yena ku zuwo lie hanga alie mbolo ni kunwa meya.’” (Alioze te kanamwongo.) 19 Chocho iye yahiluka ni profeta kashinakaji ku zuwo lienyi hanga alie mbolo ni kunwa meya.

20 Muze te achili ku mesa, liji lia Yehova yiliza kuli profeta kashinakaji, 21 iye yakololoka kuli mutu wa Zambi wamwenemwene wa ku Yunda ngwenyi: “Yehova kanambe ngwenyi: ‘Amu kuwakawile usongwelo wa Yehova, kuwafungile shimbi jize Yehova Zambi ye akuhele, 22 alioze wahiluka hanga ulie mbolo ni kunwa meya mu chihela muze akulwezele ngwo: “Kanda uliamo mbolo chipwe kunwamo meya.” Kashika mujimba we kechi kaufunda mu fuka lia tulamba twe.’”

23 Muze mutu wa Zambi wamwenemwene ahwishile kulia ni kunwa, profeta kashinakaji yamululiekela chimbulu hanga aye kwenyi. 24 Chocho iye yaya kwenyi, alioze mu jila yamushiha kuli ndumba. Mujimba wenyi yiusala muzemwene mu jila, chimbulu ni ndumba yamana sali lia mujimba. 25 Malunga amwe waze te anapalika yamona mujimba uli mu jila, ndumba te kanamana sali lia mujimba. Ayo yanjila mu mbonge muze te mwatwama profeta kashinakaji, yamulweza yuma yize amwene.

26 Muze profeta kashinakaji evwile yuma yacho, yamba ngwenyi: “Lunga wacho kali mutu wa Zambi wamwenemwene yoze wehuka shimbi ja Yehova, kashika Yehova amuhana kuli ndumba hanga amushihe kulita ni maliji waze Yehova mwene ambile.” 27 Chocho, iye yalweza ana jenyi ngwenyi: “Ngululiekelenu chimbulu.” Ana jenyi yachilinga. 28 Iye yaya, yawana mujimba mu jila, chimbulu ni ndumba te kanamana sali lia mujimba. Ndumba kakalile mujimba wa lunga wacho chipwe kushiha chimbulu. 29 Profeta kashinakaji yanda mujimba wa mutu wa Zambi wamwenemwene yausa ha chimbulu, yautwala mu mbonge yenyi hanga amulile ni kumufunda. 30 Chocho, yamufunda mu fuka lia profeta kashinakaji, ayo yalila ni kwamba ngwo: “Mama ndumbwami, ndumbwami hafwa.” 31 Muze te hamufunda, profeta kashinakaji yalweza ana jenyi ngwenyi: “Muze mungufwa munukangufunjila mu fuka lize twafunjila mutu wa Zambi wamwenemwene. Yifwaha yami munukayisa sali lia yifwaha yenyi. 32 Mumu yuma yize ambile kulita ni liji lia Yehova hakutwala ku chilumbilo cha ku Mbetele ni manangamo a mu mambonge a Samaria muyikamanunuka.”

33 Chipwe ngwe yuma yino yeswe yalingiwile, nihindu Jeroboame kakechele yitanga yenyi yipi. Iye yanunga ni kutongola atu hanga apwe asasendote ja manangamo. Kapwile ni kutongola mutu mweswawo yoze mazanga hanga apwe sasendote. Iye te kakwamba ngwenyi: “Apwe umwe wa kuli asasendote a manangamo.” 34 Mumu lia shili yino, Jeroboame ni akwa-zuwo lienyi yaanongesa ni kwakuwisa hashi heswe.