Mukanda Utangu wa Mianangana
11 Mwanangana Solomone kakazangile wika mwana wa Falau, iye te kakuzanga nawa mapwo yilambala ngwe: Mapwo A-Moape, A-Amone, A-Endome, A-Sendone ni A-Hete. 2 Ayo kapwile mapwo a ku mavungu waze Yehova alwezele A-Izalele ngwenyi: “Kunwatambile kulimbata no, ni ayo katambile kulimbata ni yenu. Mumu nyi nwachilinga, ayo manupiangula hanga nulingile tuzambi two.” Alioze, Solomone yalalaminya kuli ayo ni kwazanga chinji. 3 Iye kapwile ni mapwo a kumbata 700 ni a konkubina 300. Hakehe-hakehe mapwo jacho yapiangula mbunge yenyi. 4 Muze Solomone te hapwa kashinakaji, mapwo jenyi yapiangula mbunge yenyi hanga alingile tuzambi akwo. Iye kakashishikile kuli Yehova Zambi yenyi ngwe chize alingile tato Ndawichi. 5 Solomone yaputuka kuwayila Asatarote, kazambi wa pwo wa A-Sendone ni Milikome, kazambi wa chizelwokeso wa A-Amone. 6 Solomone kalingile yuma yipi kumeso ja Yehova, kakashishikile kuli Yehova ngwe chize alingile tato Ndawichi.
7 Chocho Solomone yatunga manangamo asandu a kazambi Chemoshe, kazambi wa chizelwokeso wa A-Moape ni manangamo a kazambi Moleke, kazambi wa chizelwokeso wa A-Amone ku mulundu uze wapwile kulutwe lia Yerusaleme. 8 Yatungila nawa mapwo jenyi yilambala manangamo hanga ocheleho insensu ni kuhanyinaho yitapo kuli tuzambi two.
9 Yehova yevwila Solomone uli unji mumu lia kupianguka ni kwecha kuwayila Yehova Zambi ya Izalele, yoze wasolokele kuli iye mu yilota ha yisuho yaali 10 ni kumutoweza hanga achine kulingila tuzambi akwo. Alioze, Solomone kakapanjikile maliji a Yehova. 11 Chocho Yehova yalweza Solomone ngwenyi: “Amu kuwapanjikile maliji jami, kuwafungile usendo wami ni kwononokena shimbi yize nakutumine kukaula, mungukutambula wanangana, munguuhana kuli kavumbi ke. 12 Alioze, chichi kuchilinga muze uchili ni mwono mumu lia tatenu Ndawichi. Wanangana wacho mungukautambula mu moko ja mwane, 13 chichi katambula wanangana weswe. Mungukahana munyachi umuwika kuli mwane, mumu lia Ndawichi kavumbi kami ni mumu lia Yerusaleme, mbonge yize nasakwile.”
14 Mba Yehova yasolola mukwa-kole hanga alimike ni Solomone. Mukwa-kole wacho kapwile Hadade Ka-Endome, wa mu usoko wa mwanangana wa Endome. 15 Muze Ndawichi akumbile Endome, Joabe kapitau ka maswalale yaya ni kufunda atu waze afwile. Iye yazanga kukuwisa malunga eswe a mu Endome. 16 (Joabe ni A-Izalele eswe yatwamamo tukweji asambano ndo muze akuwishile malunga eswe a mu Endome.) 17 Alioze, Hadade yachina nenyi kuli tuvumbi ja tato, A-Endome. Yaya nenyi ku Engitu, ha shimbu liacho Hadade te uchili kanuke. 18 Chocho, yakatuka ku Mindiane yaya ku Parane, yaheta ku Engitu hamwe ni malunga amwe a ku Parane, yasoloka kuli Falau mwanangana wa Engitu. Iye yahana kuli Hadade zuwo, kulia ni minda. 19 Falau yazanga chinji Hadade, kashika yamwaha mwana-kwo ya mwazovu Tapene hanga apwe pwo lienyi. 20 Hakupalika cha mashimbu, mwana-kwo ya Tapene ni Hadade yapwa ni mwana umuwika wa lunga, Ngenubate. Tapene yamulelela ku zuwo lia Falau; Ngenubate yatwama ku zuwo lia Falau hamuwika ni ana ja Falau.
21 Kuzekwene ku Engitu, Hadade yanyingika ngwenyi, Ndawichi ni Joabe kapitau ka maswalale hafwa. Chocho, iye yaya kuli Falau yamba ngwenyi: “Ngunazange kuhiluka ku chifuchi chami.” 22 Alioze, Falau yamuhula ngwenyi: “Yika yinakuhono mba uzange kuhiluka ku chifuchi che?” Iye yamukumbulula ngwenyi: “Chahonene chuma nichimwe, alioze ngweche kama nguhiluke.”
23 Zambi yasolola nawa mukwa-kole mukwo wa Solomone, Rezone mwana wa Eliada. Iye kachinyine mwene wenyi Hadadezere mwanangana wa ku Zoba. 24 Muze Ndawichi akumbile malunga a ku Zoba, Rezone yakungulula malunga amwe, yapwa mwata wa yingalwe. Chocho, ayo yaya ku Ndamaseku yatwamako, iye yaputuka kuyula mu Ndamaseku. 25 Iye yalimika ni A-Izalele ha matangwa eswe a Solomone, yokesa kapinda yoze Hadade anehene. Rezone yevwila kole A-Izalele ha shimbu lieswe ayulile A-Seria.
26 Jeroboame mwana wa Nebate, neye yaputuka kulimika ni mwanangana. Iye kapwile Ka-Eframe wa ku Zereda kavumbi wa Solomone; naye kapwile tuliwa avuluka ngwo, Zerua. 27 Jeroboame kalimikine ni mwanangana mumu lia chikuma chino: Solomone kasele Mulundu wa Milo ni kululieka chipanga cha Mbonge ya Ndawichi. 28 Jeroboame kapwile chikilikita. Muze Solomone amwene ngwenyi iye kakukalakala chinji, yamutongola hanga asongwele milimo yeswe mu zuwo lia Yosefwe. 29 Ha shimbu liacho, Jeroboame yakatuka mu Yerusaleme, yalitakana ni profeta Ahija Ka-Shilone mu tapalo. Ahija te kanazala chikuto chaha, ayo te kali ukawo. 30 Ahija yasuwa chikuto chenyi mu yipinji 12. 31 Iye yalweza Jeroboame ngwenyi:
“Tambula yipinji kumi mumu Yehova Zambi ya Izalele kanambe ngwenyi: ‘Mungukatambula wanangana ku moko ja Solomone, mungukakwaha minyachi kumi. 32 Alioze, mungukamuhichikila munyachi umuwika mumu lia kavumbi kami Ndawichi, mumu lia Yerusaleme mbonge yize nasakwile mukachi ka minyachi ya A-Izalele. 33 Mungukalinga chino mumu ayo kangumba nyima, kawayila kazambi Asatarote zambi ya A-Sendone ni Chemoshe zambi ya Moape ni Milikome zambi ya A-Amone. Ayo kafungile shimbi jami, kalingile yuma yipema kumeso jami, kononokene yiyulo ni upatwilo wami ngwe chize alingile Ndawichi, tato ya Solomone. 34 Alioze, chichi kamutambula wanangana weswe, mungukamupwisa mwata ku mwono wenyi weswe mumu lia kavumbi kami Ndawichi yoze nasakwile. Mumu iye kononokene shimbi jami ni yiyulo yami. 35 Mungukatambula wanangana kuli mwana wa Solomone, yena mungukakwaha minyachi kumi. 36 Alioze mwanenyi makasala ni munyachi umuwika hanga kavumbi kami Ndawichi akapwe matangwa eswe ni yoze mamuhinga mu Yerusaleme, mbonge yize nasakwile hanga mupwe jina liami. 37 Mungukakutongola hanga ukayule vungu lieswe lia Izalele, mukapwa mwanangana hali A-Izalele. 38 Nyi mwononokena yuma yeswe yize ngunakulweza, muwenda mu majila jami, mulinga yuma yipema kumeso jami, mwononokena shimbi ni yiyulo yami ngwe chize alingile kavumbi kami Ndawichi, mungukapwa hamwe ni yena. Mungukakolesa zuwo lie ku miaka yeswe ngwe chize nakolesele zuwo lia Ndawichi, mba yena mukayula A-Izalele. 39 Chocho, mungukevwisa sonyi munyachi wa Ndawichi, alioze hi ku miaka yeswe ko.’”
40 Kashika, Solomone yazanga kushiha Jeroboame, alioze Jeroboame yachinyina ku Engitu kuli mwanangana Shishake. Iye yatwamako ndo muze Solomone afwile.
41 Sango jikwo ja ku mwono wa Solomone ni yuma yeswe yize alingile ni mana jenyi, yili ya kusoneka mu mukanda wa sango ja Solomone. 42 Solomone kayulile A-Izalele eswe mu Yerusaleme ha miaka 40. 43 Chocho Solomone yafwa, yamufunda mu Mbonge ya Ndawichi hamuwika ni tulamba twenyi. Mwanenyi Rehoboame yapwa mwanangana mu chihela chenyi.