Mukanda Utangu wa Mianangana
20 Mbene-Hadade Mwanangana wa Seria, yakungulula tujita jenyi eswe ni mianangana akwo 32 hamwe ni tuvwalu jenyi ni matemba jenyi a jita. Yakanduka ku Samaria, yayijingilika, yayipupa. 2 Chocho, yatuma mikeji kuli Ahabe Mwanangana wa Izalele hanga amulweze ngwenyi: “Mbene-Hadade kanambe ngwenyi: 3 ‘Prata ni oru ye, muyipwa ya yami, mapwo je ni ana je apema, mapwa a yami.’” 4 Mwanangana wa mu Izalele yamba ngwenyi: “Chilingiwe kulita ni liji lie mwene wami mwanangana. Nguli ni we, yuma yeswe yize nguli nayo, ya yena.”
5 Hakupalika cha mashimbu, mikeji yahiluka kuli Ahabe, yamba ngwo: “Mbene-Hadade kamba ngwenyi: ‘Natuma kukulweza ngwami: “Yena mungwaha prata ni oru ye ni mapwo je ni ana je.” 6 Alioze hamene, ha mashimbu ngwe wano, mungukatuma tuvumbi twami hanga akapolongoze mu zuwo lie ni mu mazuwo ja tuvumbi twe. Ayo makanda yuma yeswe yize makamona ngwo, yili yilemu.’”
7 Mumu lia chino, mwanangana wa mu Izalele yasanyika makulwana eswe a mu chifuchi, yamba ngwenyi: “Lisesa ngupanjikenu. Lunga yono hatesa kutulinga upi, mumu kanazange hanga ngumwehe mapwo jami, ana jami, prata yami ni oru yami. Alioze, natayiza kumwaha yuma yacho.” 8 Makulwana eswe ni atu yamukumbulula ngwo: “Kanda umwononokena, kanda umwaha yize anechi.” 9 Kashika, iye yalweza mikeji ja Mbene-Hadade ngwenyi: “Yeenu nulweze mwene wami mwanangana ngwenu: ‘Mungukwaha yuma yize wetanga ha chisuho chitangu, alioze yuma yize weta haliapwila chichi kukwahayo.’” Chocho, mikeji yatwala lusango wacho kuli Mbene-Hadade.
10 Mbene-Hadade yatuma mutu hanga amulweze ngwenyi: “Tuzambi angumwese lamba nyi yami ni maswalale jami kutwanongesene Samaria!” 11 Mwanangana wa mu Izalele yakumbulula ngwenyi: “Yeenu numulweze ngwenu: ‘Kajita wamwenemwene kakulisamba muze jita hiyahwa, hi ha kuputuka cha jita ko.’” 12 Muze Mbene-Hadade evwile lusango wacho, iye ni mianangana akwo te kananu walwa mu mbalaka jo. Mba yalweza tuvumbi twenyi ngwenyi: “Liluliekenu nuye ni kwasa jita!” Chocho ayo yalilulieka hanga aye ni kupupa mbonge.
13 Alioze, umwe profeta yakundama kuli Ahabe Mwanangana wa mu Izalele, yamulweza ngwenyi: “Yehova kanambe ngwenyi: ‘Unamono mbunga yino yinene? Nyingika ngwe, musono munguyikunjika mu moko je hanga unyingike ngwe, yami nguli Yehova.’” 14 Ahabe yahula ngwenyi: “Ni neya machilinga?” Profeta yakumbulula ngwenyi: “Yehova kanambe ngwenyi: ‘Machilinga kupalikila muli yikwashi ja alemu a mu mambonge.’” Ahabe yamuhula nawa ngwenyi: “Iya maputuka jita yacho?” Profeta yamukumbulula ngwenyi: “Yena mwe muyiputuka!”
15 Ahabe yalula yikwashi ja alemu a mu mambonge: Ayo kapwile 232; mba yalula malunga eswe a mu Izalele: Ayo kapwile 7,000. 16 Ayo yakatuka muze tangwa te hiliapwa ha muchima. Ha shimbu liacho, Mbene-Hadade ni mianangana akwo 32 te kananu walwa mu mbalaka jo. 17 Yikwashi ja alemu a mu mambonge yatuhuka chitangu. Kawashi-washi Mbene-Hadade yatuma maswalale. Mba maswalale yamulweza ngwo: “Mu Samaria malunga afwambukamo.” 18 Chocho, iye yamba ngwenyi: “Nyi kafwambuka ni sambukila akwatenu; chipwe ngwe kafwambuka hanga ase jita, nihindu akwatenu, kanda nwashiha.” 19 Alioze, muze yikwashi ja alemu a mu mambonge ni maswalale waze te anaakaula atuhukile mu mbonge, 20 mutu ni mutu yashiha mukwa-kole wenyi. A-Seria yachina, A-Izalele yaakaula. Alioze, Mbene-Hadade Mwanangana wa A-Seria yachinyina ha kavwalu hamuwika ni amwe akwa-kwendesa tuvwalu. 21 Chocho mwanangana wa Izalele yaya, yalukukila tuvwalu ni matemba a jita ja A-Seria, yaakumba.
22 Hakupalika cha mashimbu, profeta yeza kuli mwanangana wa Izalele, yamulweza ngwenyi: “Yako ulilulieke, nyonga kanawa ha yize mulinga. Mumu ku uputukilo wa mwaka mutukwata, mwanangana wa A-Seria meza hanga alimike ni yena.”
23 Tuvumbi ja mwanangana wa Seria yamulweza ngwenyi: “Zambi yo, kali Zambi wa milundu, kashika atukumba. Alioze, nyi twasa no jita mu chana, mutwakumba. 24 Linga nawa chino: Chiza mianangana eswe ha yihela yo hanga useho manguvulu. 25 Mba mukunga unji wa maswalale analita ni waze afwa mu jita, mukunga nawa unji uzewene wa tuvwalu ni matemba a jita. Twasenu no jita mu chana, mutwakumba.” Mwanangana yapanjika chiyulo cho, yalinga yize amulwezele.
26 Ku uputukilo wa mwaka, Mbene-Hadade yakunga A-Seria, yaya ku Afeke hanga ase jita ni A-Izalele. 27 A-Izalele no yalikungulula, yatambula kulia mba yaya ni kulitakana ni A-Seria. Muze A-Izalele asele chilombo kulutwe lio, ayo kapwile ngwe yizavu yaali yikehe ya ana-pembe. Alioze, A-Seria yazalisa chihela cheswe ni maswalale. 28 Mba mutu wa Zambi wamwenemwene, yaya kuli mwanangana wa Izalele, yamulweza ngwenyi: “Yehova kanambe ngwenyi: ‘A-Seria kamba ngwo: “Yehova kali Zambi wa milundu, hi Zambi wa mu chana ko,” kashika mungukunjika mbunga yino mu moko je, yenu munukanyingika ngwenu, yami nguli Yehova.’”
29 Maswalale A-Izalele ni maswalale A-Seria yatwama mu yilombo yo ha matangwa shimbiali. Ha tangwa liamuchishimbiali, jita yiyiputuka, ha tangwa limuwika A-Izalele yashiha 100,000 maswalale A-Seria. 30 Maswalale waze asalile yachinyina ku Afeke, yanjila mu mbonge. Alioze, chipanga yichishata malunga 27,000 waze asalile. Mbene-Hadade neye yachinyina mu mbonge, yaswama mu chipatulo cha limwe zuwo.
31 Mba tuvumbi a Mbene-Hadade yamulweza ngwo: “Mwanangana, twevwa ngwo, mianangana a mu Izalele kakwete keke yinji. Kashika, tuzalenu yikeleyi ni kulikasa miya ku mitwe hanga tulisolole kuli mwanangana wa mu Izalele, hanji matuvwila kama keke.” 32 Chocho, ayo yazala yikeleyi ni kukasa miya ku mitwe, mba yaya kuli mwanangana wa Izalele yamulweza ngwo: “Kavumbi kenu Mbene-Hadade kanambe ngwenyi: ‘Lisesa, kanda ungushiha kama.’” Mwanangana wa mu Izalele yaahula ngwenyi: “Kumana iye uchili ni mwono? Iye kali ndumbwami.” 33 Muze malunga evwile chocho yawahilila, yakumbulula ngwo: “Ewa, Mbene-Hadade kali ndumbwe.” Mwanangana yamba ngwenyi: “Yeenu numusake.” Chocho Mbene-Hadade yalihana kuli mwanangana Ahabe, mba Ahabe yamunyinyisa mu temba lienyi lia jita.
34 Mbene-Hadade yamba ngwenyi: “Mambonge waze tata atambwile kuli tatenu mungwahilwisa. Muhasa kusa matapalo ku Ndamaseku ngwe chize tata alingile ku Samaria.”
Ahabe yamba ngwenyi: “Nyi twalinga usendo wacho mungukutusula.”
Chocho yalinga nenyi usendo mba yamutusula.
35 Umwe wa kuli ana ja aprofeta, kulita ni liji lia Yehova yalweza mukwo ngwenyi: “Lisesa, ngulambe.” Alioze, lunga wacho yalituna kumulamba. 36 Kashika, iye yamulweza ngwenyi: “Amu kuwapanjikile liji lia Yehova, muze muya kwe ndumba makushiha.” Muze lunga wacho te anayi, yamushiha kuli ndumba.
37 Profeta yaliwana nawa ni lunga mukwo, yamulweza ngwenyi: “Lisesa, ngulambe.” Lunga wacho yamulamba ni kumulemeka.
38 Mba profeta yaya mu tapalo hanga ashimbwile mwanangana, yalifuka ku meso hanga achine kumumona. 39 Muze mwanangana te anapalika, iye yakololoka kuli mwanangana ngwenyi: “Kavumbi ke kapwanga mukachi ka jita muze umwe lunga amunehenanga funge ni kwamba ngwenyi: ‘Funga kanawa lunga yono. Nyi machina, mufweta mwono we ha mwono wenyi hanji mufweta talentu yimuwika ya prata.’ 40 Muze kavumbi ke te analaluka ni yuma yikwo, funge yachina.” Mwanangana wa mu Izalele yamulweza ngwenyi: “Uno we upatwilo we, yena mwene wautesa.” 41 Chocho iye yafukula ku meso, mba mwanangana yanyingika ngwenyi, kali profeta. 42 Iye yalweza mwanangana ngwenyi: “Yehova kanambe ngwenyi: ‘Hiwatusula mutu yoze nakulwezanga ngwami, katamba kufwa. Kashika, mufweta mwono we ha mwono wenyi, atu je hali atu jenyi.’” 43 Chocho, mwanangana wa mu Izalele yaya ku zuwo lienyi ku Samaria, yanenganyana.