Mukanda Utangu wa A-Korindu

8 Haliapwila, hakutwala ku kulia chize akulambula ku mahamba, tunanyingika ngwetu eswe tuli ni chinyingi. Chinyingi chakupwisa mutu mukwa-kulifuza, alioze zango liakukolesa. 2 Nyi umwe manyonga ngwe kananyingika chimwe chuma, kanda achichinyingika ngwe chize te atamba kuchinyingika. 3 Alioze, yoze wakuzanga Zambi, Zambi neye kamunyingika.

4 Kashika, hakutwala ku kulia chize hanalambula ku mahamba, tunanyingika ngwetu hamba nichimweko hano hashi. Chikwo nawa, kukushi Zambi mukwo, shina umuwika. 5 Atu kakwamba ngwo, kwatwama tuzambi anji alisa, mu malilu ni hashi. Kashika kuli atu, kwatwama “tuzambi” anji ni “ene” anji. 6 Alioze, kuli yetu Zambi umuwika watwamako, mwe Tata, yoze watangile yuma yeswe, yoze nawa watutangile hanga tulinge upale wenyi. Kuli nawa Mwene umuwika, Yesu Kristu, yoze kupalikila muli iye yuma yeswe yatangiwile, ni yetu nawa tuli ni mwono mumu hali iye.

7 Alioze, hi eswe ko akwete chinyingi chino. Amwe, amu apwile ni kuwayila mahamba, muze akulia yuma yakulambula ku mahamba, kakunyonga ngwe kanawayila mahamba, kashika mbunge jo jilelu jakulichisa. 8 Kulia kuchichi kutukundamisa kuli Zambi; chipwe kutwalile, kutuchi kutokesa nichimwe, chipwe mutulia, kutuchi kuyuka nichimwe. 9 Alioze, kanyamenu hanga ulite wenu wa kusakula kanda upwa chitalingiso kuli waze apwa alelu. 10 Mumu nyi umwe mamona yena uli ni chinyingi unatwama ni kulia mu tembele ya hamba, shina mbunge ya mutu yoze uli mulelu kuyichi kuhamuka ni kulia, kulia chize akulambula ku mahamba nyi? 11 Mumu lia chinyingi yize ukwete, ufulielo wa ndumbwe mulelu yoze Kristu afwilile muukokoloka. 12 Muze nwakuvulumuna kuli mandumbu jenu ni kulemeka mbunge jo jilelu, nwakuvulumuna kuli Kristu. 13 Kashika, nyi kulia muchitalingisa ndumbwami, chichi kalia nawa yifwo niyimwe hanga nguchine kutalingisa ndumbwami.