Mukanda Wamuchiali wa Samuele
9 Tangwa limwe Ndawichi yahula ngwenyi: “Shina kwasala umwe mutu mu usoko wa Saulu hanga ngumusolwele zango lize kulishi kuhwa mumu lia Jonata?” 2 Saulu kapwile ni umwe kavumbi jina lienyi te Ziba. Chocho yamuneha kumeso ja mwanangana Ndawichi, iye yamuhula ngwenyi: “Yena mwe Ziba?” Ziba yakumbulula ngwenyi: “Ewa, yami.” 3 Mwanangana yamuhula ngwenyi: “Shina mu usoko wa Saulu mwasala umwe mutu yoze yami natamba kusolwela zango lia Zambi lize kulishi kuhwa?” Ziba yakumbulula mwanangana ngwenyi: “Kwasala mwana umuwika wa Jonata, iye kali chitonji ku molu eswe aali.” 4 Mwanangana yamuhula ngwenyi: “Kulihi ali?” Ziba yakumbulula mwanangana ngwenyi: “Kali ku Lo-Debare, ku zuwo lia Makire mwana wa Amiele.”
5 Hazehene, mwanangana Ndawichi yatuma kumusaka ku zuwo lia Makire mwana wa Amiele, ku Lo-Debare. 6 Muze Mefiposhete mwana wa Jonata, mujikulu wa Saulu, amunehene kuli Ndawichi, yalimbila hashi, yafulamana. Ndawichi yamusanyika ngwenyi: “Mefiposhete!” Iye yakumbulula ngwenyi: “Ewa mwene wami, yami uno.” 7 Ndawichi yamba kuli iye ngwenyi: “Kanda wivwa woma, pundu lume, mungukusolwela zango lize kulishi kuhwa mumu lia tatenu Jonata. Yami munguhilwisa mavu eswe a kakenu Saulu kuli yena. Yena mununga ni kulia* ku mesa yami.”
8 Mefiposhete ha kuchivwa yafulamana, yamba ngwenyi: “Yami iya mwene wami, mba nunguse chize mbunge, se nguli kawa mufu?” 9 Chocho mwanangana yatuma kusaka Ziba yoze wapwile chikwashi cha Saulu, yamulweza ngwenyi: “Ngunahana yuma yeswe yize yapwile ya mwene we Saulu ni ya akwa-zuwo lienyi kuli mujikulu wenyi Mefiposhete. 10 Yena, ana je ni tuvumbi twe, munukamulimina ni kucha yize muyikema mu minda, hanga usoko wa Mefiposhete ukapwe ni kulia. Alioze, Mefiposhete mujikulu wa mwene we, manunga ni kulia ku mesa yami.”
Ziba kapwile ni ana 15 ni tuvumbi 20. 11 Chocho Ziba yamba kuli mwanangana ngwenyi: “Yami kavumbi kenu mungulinga yeswe yize nwamba mwene wami, mwanangana.” Mefiposhete te kakulia ku mesa ya Ndawichi ngwe umwe wa kuli ana ja mwanangana. 12 Mefiposhete kapwile ni mwana wa lunga wa kanuke jina lienyi te Mika. Eswe waze apwile ku zuwo lia Ziba yapwa tuvumbi twa Mefiposhete. 13 Mefiposhete te katwama mu Yerusaleme, mumu te kakulia ku mesa ya mwanangana mashimbu eswe. Iye kapwile chitonji ku molu eswe aali.