Mukanda Wamuchiali wa Samuele
16 Muze Ndawichi te hapalika ndambu helu lia mulundu, kumana chikwashi wa Mefiposhete te kanamushimbwila, iye te kali ni yimbulu aali waze te anambata mbolo kama jiali, ni lukama wa yandanda ya uva yumu, lukama wa yandanda ya mihuko* ya ha mashimbu a lushiho ni mulondo wa vinyu. 2 Mwanangana yahula Ziba ngwenyi: “Mumu liaka waneha yuma yino?” Ziba yakumbulula ngwenyi: “Yimbulu naaneha hanga akwa-zuwo lia mwanangana anyineho, mbolo ni mihuko ya ha mashimbu a lushiho nayineha hanga atu alie, vinyu nayineha hanga waze mahonga mu puya anwe.” 3 Mwanangana yahula Ziba ngwenyi: “Mba mwana wa mwene we kulihi ali?” Ziba yakumbulula mwanangana ngwenyi: “Iye kasala ku Yerusaleme, mumu kamba ngwenyi: ‘Musono lie tangwa lize zuwo lia Izalele mulingufunyishina wanangana wa tata.’” 4 Mwanangana yalweza Ziba ngwenyi: “Yeswe yize yapwile ya Mefiposhete haliapwila hiyapwa ya yena.” Ziba yamba ngwenyi: “Ngunafulamana kumeso jenu mwene wami. Ngunanusakwilila ha kupwa ni utayizo kumeso jenu mwene wami mwanangana.”
5 Muze Mwanangana Ndawichi ahetele ku Mbahurime, umwe lunga wa ku usoko wa Saulu, avuluka ngwo Shimei, mwana wa Ngera, yeza ni kulitakana nenyi, yaputuka kumushinga. 6 Shimei te kanase mawe kuli Mwanangana Ndawichi, kuli tuvumbi twenyi eswe, kuli atu eswe waze apwile hamwe nenyi, ni kuli maswalale a ndundo waze apwile sali lia utata ni sali lia umama lia mwanangana. 7 Muze Shimei te anashingi Ndawichi, te kanambe ngwenyi: “Katuka kuno, katuka kuno, mukwa-kumwanga manyinga! Mutu wamokomoko! 8 Yehova kanakuhilwishila upi weswe ha manyinga waze wamwanga ku zuwo lia Saulu, yoze yena wasalakana ha wanangana. Yehova kanahana wanangana mu moko ja mwane Absalome. Haliapwila lamba hiliakuwana mumu lia manyinga waze wamwangine!”
9 Mba Abishai mwana wa Zeluia yamba kuli mwanangana ngwenyi: “Mumu liaka kawa yono mufu anashingi mwanangana? Ngweche nguye hanga ngumutete mutwe.” 10 Alioze mwanangana yamba ngwenyi: “Yenu ana ja Zeluia, shina mulonga uno unanutale? Mwechenu angushinge kwami, mumu Yehova kamulweza ngwenyi: ‘Shinga Ndawichi!’ Kashika, iya mamulweza ngwenyi: ‘Mumu liaka unamushingi?’” 11 Ndawichi yamba kuli Abishai ni kuli tuvumbi twenyi eswe ngwenyi: “Nyi mwanami, manyinga ja yami mwene, kanafupa kungushiha, mba yika mutwamba hali Ka-Mbenjamine? Mwechenu angushinge, mumu Yehova mwe wamulweza hanga achilinge. 12 Hanji Yehova mamona lamba liami, Yehova manguwahisa, kuhiana mashingo waze anangushingi musono kuli mutu yono.” 13 Ndawichi ni atu jenyi te kanendela mu tapalo, Shimei te kanendela ha mulundu ni kutalikisa kuze ayo te anayi, aku kanaashingi ni kwasa mawe, ni kwakuwa fufuta.
14 Mwapwa muze, mwanangana ni atu jenyi yaheta kuze te anayi, ayo te kanahongo chinji, chocho yahwima.
15 Ha shimbu liacho, Absalome ni malunga eswe a mu Izalele yaheta ku Yerusaleme, Ahitofele te kali hamwe nenyi. 16 Muze Hushai, Ka-Arke, sepa lia Ndawichi ayile kuli Absalome, Hushai yamba kuli Absalome ngwenyi: “Mwanangana afumane! Mwanangana afumane!” 17 Chocho, Absalome yahula Hushai ngwenyi: “Chechize wasolola ushishiko* kuli sepa lie? Mumu liaka kuwayile ni sepa lie?” 18 Hushai yamba kuli Absalome ngwenyi: “Chichi kulinga chuma cha mutapu au, yami nguli sali lia mutu yoze Yehova atongola, mutu yoze atu wano ni malunga eswe a mu Izalele asakula, mwenawo mungukwasa. 19 Chikwo nawa: Iya natamba kulingila? Hi mwana ko? Mungukulingila ngwe chize nalingilile tatenu.”
20 Absalome yahula Ahitofele ngwenyi: “Yika twatamba kulinga? Ngwehe chimwe chiyulo.” 21 Chocho Ahitofele yalweza Absalome ngwenyi: “Lisumbakenye ni mapwo ja tatenu waze ahichikile hanga afunge zuwo. Muze A-Izalele eswe manyingika ngwo tatenu keshi kukuzanga, waze akukukwasa majikiza.” 22 Yatungila Absalome mbalaka ha fulumba, Absalome yalisumbakenya ni mapwo ja tato kumeso ja A-Izalele eswe.
23 Ha matangwa waze, chiyulo chize Ahitofele te akuhana, kapwile ni kuchimona ngwe liji lia Zambi wamwenemwene. Chenacho Ndawichi ni Absalome apwile ni kumona yiyulo yeswe yize Ahitofele te akuhana.