KUTUHUKA

1 Wano e majina ja ana ja Izalele waze ayile ni Yakomba mu Engitu, mutu ni mutu ni akwa-zuwo lienyi: 2 Rupene, Simeone, Levi ni Yunda. 3 Yisaka, Zapulone ni Mbenjamine. 4 Ndane ni Napatali, Ngate ni Ashe. 5 Atu eswe a mu usoko wa Yakomba kapwile 70, alioze, Yosefwe te katwama kulu mu Engitu. 6 Mba Yosefwe ni mandumbu jenyi eswe yafwa ni atu eswe a mu chisemuko chenyi no yafwa. 7 A-Izalele yasema ana anji, yoka chinji, yanunga ni kuliokesa, yapwa ni tachi jinji, yoka mu chifuchi.

8 Ha kupalika cha mashimbu, mu Engitu yimupwa mwanangana mwaha yoze te kanyingikine Yosefwe. 9 Mba iye yamba kuli atu jenyi ngwenyi: “Talenu, A-Izalele hoka chinji, chikwo nawa, kali ni tachi jinji kuhiana yetu. 10 Tukanyamenu no, nyi ka, ayo manunga ni kuliokesa, mba muze mukupwa jita mu chifuchi malichinga ni akwa-kole jetu, malimika ni yetu, chocho makatuka mu chifuchi.”

11 Kashika, A-Engitu yasela A-Izalele miata hanga aamwese lamba ha kwaha milimo yikalu chinji, chocho ayo yatungila Falau mazuwo a kutulikila kulia, che kwamba, Pitome ni Ramese. 12 Alioze, muze apwile ni kwamwesa lamba linji, no kapwile ni kwoka chinji ni kulimwanga mu chifuchi, chocho A-Engitu yaputuka kuvwila A-Izalele woma unji. 13 Mba A-Engitu yaputuka kumwesa A-Izalele lamba linji ni kwapwisa tupinji. 14 Yakalisa chinji mwono wo ha kwaha milimo yikalu yakulinga ndambo ni tijolu, ni milimo yikalu ya kulima minda. Yaashinjila hanga alinge milimo yikalu chinji, milimo yeka ni yeka ya upinji.

15 Kulutwe, mwanangana wa Engitu yahanjika ni Shipara ni Puvwa, yifunguji A-Hepreu. 16 Mwanangana yamba kuli ayo ngwenyi: “Muze munupwa ha kufungula mapwo A-Hepreu, nyi mwana mapwa wa lunga numushihe, alioze nyi wa pwo kanda numushiha.” 17 Alioze yifunguji te kakuvwila Zambi woma, kashika kalingile yize mwanangana wa Engitu aalwezele, chocho yecha ana a malunga ni mwono. 18 Ha kupalika cha mashimbu, mwanangana wa Engitu yasanyika yifunguji, yaahula ngwenyi: “Mumu liaka kunwashihile ana a malunga?” 19 Yifunguji yakumbulula Falau ngwo: “Mapwo A-Hepreu keshi ngwe mapwo A-Engitu. Ayo kakwete tachi jinji, kakusema shimbu yifunguji kanda achiheta.”

20 Kashika, Zambi yakwasa yifunguji jacho, A-Izalele yanunga ni kwoka ni kupwa ni ndundo jinji. 21 Kashika, amu yifunguji jacho evwilile Zambi wamwenemwene woma, Zambi yaaha ana. 22 Mba Falau yalweza atu jenyi eswe ngwenyi: “Ana-kemba eswe a malunga A-Hepreu waze masemuka, nwatamba kwambila mu Lwiji Nilu, alioze ana a mapwo kanda nwashiha.”

2 Ha mashimbu jacho umwe lunga wa ku munyachi wa Levi, yambata mwana wa Levi. 2 Mba mwe pwo yapwa kafumba, yasema mwana wa lunga. Muze amumwene ngwenyi mupema chinji, yamusweka ha tukweji atatu. 3 Muze amwene ngwenyi kahashile nawa kumusweka, yanda mushete wa manenga yaushila ni usososhi ni ulimbo, yasamo mwana, mba yanda mushete wacho yausa hakachi ka mbungu ku sesa lia Lwiji Nilu. 4 Alioze, ndumbwenyi yamanyina hasuku hanga amone yize muyilingiwa kuli iye.

5 Mwana wa pwo wa Falau yapalumuka ku Lwiji Nilu hanga asane, shimbu te ngamba jenyi anendangana ku sesa lia lwiji. Chocho iye yamona mushete hakachi ka mbungu, hazehene yatuma ngamba jenyi hanga awande. 6 Muze awazulwile, yawanamo mwana wa lunga, mwana wacho te kanalila. Iye yamuvwila keke, chocho yamba ngwenyi: “Mwana yono wa A-Hepreu.” 7 Ndumbu ya mwana-kemba yamba kuli mwana wa Falau ngwenyi: “Shina muchilita nguye ngusanyike ndeji Ka-Hepreu hanga apwe ni kunupapishila mwana nyi?” 8 Mwana wa Falau yamba kuli iye ngwenyi: “Yako!” Hazehene mwana-pwo yazomboka, yasanyika naye ya mwana. 9 Mwana wa Falau yamba kuli iye ngwenyi: “Mbata mwana yono hanga upwe ni kungupapishilaye, mba yami mungukufweta.” Chocho, pwo yaya ni mwana, yaputuka kumupapisa. 10 Muze mwana akolele, iye yamutwala kuli mwana wa pwo wa Falau, mba yapwa mwanenyi. Chocho iye yamuluka jina ngwenyi Mose,* yamba ngwenyi: “Mumu namwanjile mu meya.”

11 Muze Mose te hakola,* yaya ni kutala mandumbu jenyi, yamona lamba lize mandumbu jenyi te akumona, yamona nawa umwe Ka-Engitu kanalambe umwe wa kuli mandumbu jenyi Ka-Hepreu. 12 Mba yatala sali ni sali kamwene niumwe, chocho yashiha Ka-Engitu, yamuvumbika mu lusenga.

13 Mukwachako, iye yayako nawa, mba yamona A-Hepreu aali kanalilambe. Chocho yamba kuli yoze wahengesa ngwenyi: “Mumu liaka unalambe ndumbwe?” 14 Iye yamukumbulula ngwenyi: “Iya wakutongola hanga upwe mukwa-kutuyula ni kupwa ngaji hakachi ketu? Shina unazange kungushiha ngwe chize washihanga Ka-Engitu nyi?” Chocho Mose yevwa woma, yamba ngwenyi: “Pundu lume chize nalinganga kachinyingika!”

15 Mba Falau yachinyingika, yazanga kushiha Mose, alioze Mose yachina Falau, yaya mu chifuchi cha A-Mindiane. Koko yatwama ku shima lia meya. 16 Sasendote wa Mindiane kapwile ni ana a mapwo shimbiali, o yaya ni kutaha meya azalise yingolongolo hanga anwise mapanga ja tato meya. 17 Alioze ngwe chize te chakulingiwa matangwa eswe, tufunga yeza, yaahuma. Chocho Mose yakatuka, yakalila* ana-mapwo, yanwisa yimuna meya. 18 Muze ayo ahilukile ku zuwo, tato Reuele* yaahula ngwenyi: “Mumu liaka musono nwahiluka ni kawashi?” 19 O yakumbulula ngwo: “Umwe Ka-Engitu katukalila kuli tufunga a mapanga, chikwo nawa, katutahila meya ni kunwisa yimuna.” 20 Iye yahula ana jenyi ngwenyi: “Mba mwe lunga kulihi ali? Mumu liaka nwamuhichika? Musanyikenu hanga tulie nenyi.” 21 Mba Mose yazanga kutwama ku zuwo lia Reuele, chocho iye yamwaha mwanenyi Zepora hanga amumbate. 22 Kulutwe Zepora yasema mwana wa lunga, chocho Mose yamuluka jina ngwenyi Ngeshome,* mumu yamba ngwenyi: “Yami napwa chilambala mu chifuchi chambala.”

23 Ha kupalika cha miaka yinji, mwanangana wa Engitu yafwa, alioze A-Izalele yanunga ni kutwa mikuma ni kuteta mumu lia undungo, mba miteto yo mumu lia undungo yahetele kuli Zambi wamwenemwene. 24 Mba Zambi yevwa miteto yo, chocho Zambi yewuluka usendo uze alingile ni Apalahama, Izake ni Yakomba. 25 Chocho Zambi yewuluka A-Izalele, yamona lamba lio.

3 Mose yapwa mukwa-kufunga yimuna ya tato-weno Yetoru sasendote wa Mindiane. Muze te anatwala yimuna sali lia puya, yaheta ku Horepe mulundu wa Zambi wamwenemwene. 2 Mba mungelo wa Yehova yamusolokela mu mulengi wa kahia mukachi ka umwe mungonga. Mose yatala ku mungonga yamona ngwenyi unalekwoka ni kahia, alioze kuusolo kuwema. 3 Kashika, Mose yamba ngwenyi: “Mungukundama hakamwihi hanga ngutale kanawa chikomokeso chino, ngunyingike mumu liaka mungonga kuusolo kuwema.” 4 Muze Yehova amwene ngwenyi Mose kanakundama hanga atale, yamusanyika mukachi ka mungonga ngwenyi: “Mose! Mose!” Iye yakumbulula ngwenyi: “Yami uno.” 5 Kashika Zambi yamba ngwenyi: “Kanda ukundama nawa. Zula sapato, mumu homa hano unamana hali hasandu.”

6 Iye yanunga ngwenyi: “Yami nguli Zambi ya tatenu, Zambi ya Apalahama, Zambi ya Izake ni Zambi ya Yakomba.” Chocho Mose yafuka ku meso, mumu te woma anevu wa kutala kuli Zambi wamwenemwene. 7 Yehova yamba nawa ngwenyi: “Pundu lume, namona lamba lize atu jami ali mu Engitu anamono, nevwa miteto yo yize anatete mumu lia waze akwashinjila hanga akalakale, ngunanyingika kanawa lamba lize anamono. 8 Mungupalumuka hanga ngwatusule ku moko ja A-Engitu ni kwatwala haze lia chifuchi chize, mungwatwala mu chifuchi chinene, chipema, mu chifuchi muze mwatwama yamwa yinji ni uchi, mu mavu ja A-Kanana, ja A-Hete, ja A-Amore, ja A-Perize, ja A-Hevwe ni ja A-Yepushe. 9 Muteto wa A-Izalele waheta kuli yami, chikwo nawa, namona chize A-Engitu akwahungumiona chinji. 10 Tweya, mungukutuma kuli Falau, mba mukachiza atu jami A-Izalele mu Engitu.”

11 Alioze Mose yamba kuli Zambi wamwenemwene ngwenyi: “Yami iya mba nguye kuli Falau, nguchize A-Izalele mu Engitu?” 12 Chocho Zambi yamba ngwenyi: “Mungupwa hamwe ni yena. Chino che chilayi muchisolola ngwo yami mwe nakutuma: Muze muchiza A-Izalele mu Engitu, yenu munukalingila* yami Zambi wamwenemwene ha mulundu uno.”

13 Alioze Mose yamba kuli Zambi wamwenemwene ngwenyi: “Tunyongenu ngwetu, munguya kuli A-Izalele ni kwalweza ngwami: ‘Zambi ya tulamba twenu kangutuma kuli yenu,’ mba o manguhula ngwo: ‘Jina lienyi iya?’ Kuchi mungwakumbulula?” 14 Zambi yamba kuli Mose ngwenyi: “Yami Mungupwa* Cheswacho Munguzanga Kupwa.”* Mba yamba nawa ngwenyi: “Yino ye watamba kulweza kuli A-Izalele ngwe: ‘“Yami Mungupwa,” kangutuma kuli yenu.’” 15 Zambi yamba nawa kuli Mose ngwenyi:

“Yino ye watamba kulweza kuli A-Izalele ngwe: ‘Yehova, Zambi ya tulamba twenu, Zambi ya Apalahama, Zambi ya Izake ni Zambi ya Yakomba kangutuma kuli yenu.’ Lino lie jina liami ndo ku miaka yeswe, chenacho makangwiwuluka ku chisemuko ni chisemuko. 16 Haliapwila, yako ukungulule makulwana ja A-Izalele ni kwalweza ngwe: ‘Yehova, Zambi ya tulamba twenu, Zambi ya Apalahama, Zambi ya Izake ni Zambi ya Yakomba, kasoloka kuli yami ni kwamba ngwenyi: “Pundu lume, ngunamono chize ananupinjisa mu Engitu. 17 Kashika ngunambe ngwami: Mungunuchiza mu lamba lize nunamono ku moko ja A-Engitu ni kunutwala mu chifuchi cha A-Kanana, cha A-Hete, cha A-Amore, cha A-Perize, cha A-Hevwe ni cha A-Yepushe, hanga ngunutwale mu chifuchi muze mwatwama yamwa yinji ni uchi.”’

18 “Pundu lume, ayo makapanjika liji lie, mba mukaya kuli mwanangana wa Engitu hamwe ni makulwana ja A-Izalele. Yenu nwatamba kwamba kuli iye ngwenu: ‘Yehova, Zambi ya A-Hepreu kahanjika ni yetu. Kashika, lisesa, tweche kama tuye wenyi wa matangwa atatu mu puya hanga tukalambule yitapo kuli Yehova, Zambi yetu.’ 19 Alioze ngunanyingika kanawa ngwami, mwanangana wa Engitu kechi kanwecha, shina wika nyi limwe kwoko lia ndundo mulimushinjila kuchilinga. 20 Kashika, mungwolola kwoko liami hanga ngumwese A-Engitu lamba ni yitanga yami ya kukomwesa, mba makanutusula hanga nuye. 21 Mungulinga hanga A-Engitu evwile keke atu jami, hanga muze makakatuka mu Engitu, achine kukatukamo mokomoko. 22 Pwo mweswe katamba kwita yikwata ya prata ni ya oru ni mazalo kuli mwenyembo wenyi ni kuli pwo mweswe yoze watwama ku zuwo lienyi, mba yuma yacho munukayijika kuli ana jenu a malunga ni a mapwo, munukatambula yuma yeswe ya A-Engitu.”

4 Alioze Mose yakumbulula ngwenyi: “Tunyongenu ngwetu, kechi kufuliela muli yami ni ha yuma yize mungwalweza mumu makamba ngwo: ‘Yehova kasolokele kuli yena.’” 2 Yehova yamuhula ngwenyi: “Yika unakwata?” Mose yakumbulula ngwenyi: “Mulumbu.” 3 Iye yamba ngwenyi: “Achi umbile hashi.” Chocho Mose yambila mulumbu hashi, mulumbu yiwalumuka lunoka, mba Mose yachina lunoka* wacho. 4 Yehova yamba kuli Mose ngwenyi: “Olola kwoko lie hanga umukwate ku muchila.” Iye yolola kwoko yamukwata, yapwa cheka mulumbu* mu kwoko lienyi. 5 Mba Zambi yamba ngwenyi: “Chino muchikaakwasa hanga afuliele ngwo Yehova, Zambi ya tulamba two, Zambi ya Apalahama, Zambi ya Izake ni Zambi ya Yakomba, kasoloka kuli yena.”

6 Yehova yamba nawa kuli iye ngwenyi: “Lisesa njisa kwoko mu chikuto ha tulo ye.” Chocho, iye yanjisa kwoko mu chikuto. Muze alituhwishile, kwoko te linatoma too ni mbumba! 7 Chocho Zambi yamba ngwenyi: “Njisa nawa kwoko lie mu chikuto ha tulo.” Iye yanjisa nawa kwoko mu chikuto, muze alituhwishile, yilihinduka, yilipwa ngwe chize liapwile! 8 Zambi yamba ngwenyi: “Nyi kakufulielele ni kutayiza chilayi chitangu, pundu lume matayiza chilayi chamuchiali. 9 Alioze, chipwe ngwe katayijile yilayi yino yaali hanji kupanjika liji lie, ukaswite ndambu ya meya mu Lwiji Nilu ni kwamwangina hashi, mba e meya mukaswita mu Lwiji Nilu, makalumuka manyinga hashi.”

10 Mose yamba kuli Yehova ngwenyi: “Ngukonekene, Yehova, chishi kuhasa kuhanjika kanawa chipwe ku mashimbu a kunyima, chipwe haliapwila unahanjika ni kavumbi ke, mumu nakuhanjika hakehe-hakehe, chikwo nawa nguli mukwa-chilimi.” 11 Yehova yamba kuli iye ngwenyi: “Iya wahanyine kanwa kuli mutu? Iya wakupwisa mutu kamama hanji kafwa-matwi? Iya wakumukwasa kumona kanawa hanji kupwa kapuputa? Hi yami ko Yehova nyi? 12 Kashika, yako haliapwila, yami mungupwa hamwe ni yena, mungukakulongesa yize watamba kuhanjika.” 13 Alioze Mose yamba ngwenyi: “Ngukonekene, Yehova. Lisesa, tuma kama mutu mukwo, mweswawo muzanga.” 14 Chocho Yehova yevwila Mose uli unji, yamba ngwenyi: “Mba yika muwamba hali yayenu Arone, Ka-Levi? Ngunanyingika ngwami iye kakuhanjika kanawa. Ha shimbu lino mu jila ali, kaneza hanga alitakane ni yena. Muze makumona, mbunge yenyi muyiwahilila. 15 Kashika, hanjika nenyi ni kumulweza yize nakulweza, muze munukahanjika, yami mungukapwa hamwe ni yenu ni kunulongesa yize nwatamba kulinga. 16 Iye makakuhanjikila kuli atu, makapwa kanwa lie, yena mukapwa Zambi kuli iye. 17 Mukambata mulumbu uno mu kwoko ukalinge nawo yilayi.”

18 Chocho, Mose yafuna kuli tato-weno Yetoru yamba ngwenyi: “Lisesa ngunazange kufuna kuli mandumbu jami waze ali mu Engitu hanga ngunyingike nyi achili ni mwono.” Yetoru yamba kuli Mose ngwenyi: “Yako ni sambukila.” 19 Mba Yehova yamba kuli Mose ku Mindiane ngwenyi: “Hiluka ku Engitu, mumu atu eswe waze afupile kukushiha hanafu.”

20 Chocho, Mose yanda mukwo-pwo ni ana jenyi yaanyinyisa helu lia chimbulu, yahiluka mu chifuchi cha Engitu. Chikwo nawa, Mose yambata mu kwoko lienyi mulumbu wa Zambi wamwenemwene. 21 Mba Yehova yamba kuli Mose ngwenyi: “Muze mufuna mu Engitu, ukalinge kumeso ja Falau yikomokeso yeswe yize nakulweza. Alioze mungwecha hanga akalise mbunge yenyi, iye kechi kecha hanga atu jami aye. 22 Ukalweza Falau ngwe: ‘Yehova kanambe ngwenyi: “Izalele kali mwanami, mwanami mutangu. 23 Ngunambe kuli yena ngwami, echa mwanami aye hanga anguwayile. Alioze nyi kuwatayijile hanga aye, mungushiha mwane, mwane mutangu.”’”

24 Yatulila homa haze te ngeji akupombela, Yehova yamuwana, yafupa kumushiha muze ayo te ali mu wenyi. 25 Mba Zepora yanda liwe liambuka ni kupwisa mwanenyi ngalami, yalinga hanga chikonda* chiholokele ha molu ja mwanenyi, mba yamba ngwenyi: “Nalinga chuma chino mumu uli lunga liami wa manyinga.” 26 Chocho Zambi yamwecha hanga aye. Mumu lia kutwala mwanenyi ku mukanda, Zepora yamba ngwenyi: “Lunga liami wa manyinga.”

27 Mba Yehova yamba kuli Arone ngwenyi: “Yako mu puya hanga ulitakane ni Mose.” Chocho Arone yaya, yaliwana nenyi ku mulundu wa Zambi wamwenemwene, yamumeneka ni mbeju. 28 Chocho, Mose yalweza Arone maliji eswe a Yehova, yoze wamutumine, yamulweza nawa hakutwala ku yilayi yeswe yize Iye amutumine kulinga. 29 Kulutwe, Mose ni Arone yakungulula makulwana eswe ja A-Izalele. 30 Arone yaalweza maliji eswe waze Yehova ambile kuli Mose, chocho yalinga yikomokeso kumeso ja A-Izalele. 31 Hachino, A-Izalele yafuliela Mose. Muze evwile ngwo Yehova hewuluka A-Izalele ni kumona lamba lio, yasa makungunwa hashi yafulamana.

5 Mba Mose ni Arone yaya kuli Falau, yamba ngwo: “Yehova, Zambi ya Izalele kanambe ngwenyi: ‘Echa atu jami aye, hanga akangulingile chiwanyino mu puya.’” 2 Alioze Falau yamba ngwenyi: “Yehova iya mba ngwononokene liji lienyi, ngweche A-Izalele hanga aye? Chanyingikine Yehova, chikwo nawa, chichi kwecha A-Izalele hanga aye.” 3 Chocho, ayo yamba ngwo: “Zambi wa A-Hepreu kahanjika ni yetu, lisesa, tunazange kulinga wenyi wa matangwa atatu mu puya hanga tuhane yitapo kuli Yehova Zambi yetu, nyi ka, iye matushiha ni misongo hanji kwecha akwa-kole atushihe ni katana.” 4 Mwanangana wa Engitu yamba kuli ayo ngwenyi: “Mose ni Arone, mumu liaka nunachiza atu ku milimo yo? Funenu ku milimo yenu!” 5 Falau yamba nawa ngwenyi: “Yenu ene nunamono ngwenu atu wano kali anji, haliapwila nunazange hanga eche milimo yo?”

6 Tangwa lizeliene, Falau yamba kuli akwa-kuhana milimo ni kuli tupita waze asakwile hakachi ka A-Izalele ngwenyi: 7 “Kanda nuhana nawa mwambu kuli atu wano hanga aumbe tijolu, echenu ene alikungile mwambu. 8 Alioze anunge ni kuumba unji wa tijolu uzewene apwile ni kulinga kunyima, kanda atepulula unji wa tijolu, mumu kanapu yileya. Kashika anateta-teta ngwo: ‘Tunazange kuya, tunazange kuhana yitapo kuli Zambi yetu!’ 9 Akalakalisenu milimo yikalu, kanda nwecha ahwime, hanga achine kupanjika maliji a mahuza.”

10 Chocho, akwa-kuhana milimo ni tupita, yaya ni kulweza atu ngwo: “Falau kamba ngwenyi: ‘Chichi kunwaha nawa mwambu. 11 Yeenu yenu ene nufupe mwambu kweswako munuuwana, alioze mulimo wenu kuuchi kutepuluka.’” 12 Chocho A-Izalele yalimwanga mu chifuchi cha Engitu ni kuya ni kufupa mwambu uze te wakusala muze anachi. 13 Akwa-kuhana milimo yashinjila A-Izalele ha kwamba ngwo: “Mutu ni mutu katamba kuhwisa mulimo wenyi weswe wa ha tangwa, ngwe chize nwapwile ni kulinga muze apwile ni kunwaha mwambu.” 14 Chikwo nawa, tupita waze asakwile hakachi ka A-Izalele kuli akwa-kuhana milimo ja Falau hanga asongwele atu, no yaalamba. Akwa-kuhana milimo yahula tupita ngwo: “Mumu liaka zau ni musono kunwalingile unji wa tijolu uze te nwakulinga kunyima?”

15 Chocho, A-Izalele waze apwile tupita yaya ni kulilila kuli Falau ngwo: “Mumu liaka unamwesa tuvumbi twe lamba chichize? 16 Keshi kutwaha nawa mwambu, alioze kanatwambe ngwo: ‘Umbenu tijolu!’ Yetu tuvumbi twe kakutulamba, alioze atu je e ali ni mulonga.” 17 Alioze Falau yamba ngwenyi: “Yenu nunapu yileya, chochene lume, nunapu yileya! Kashika nunambe ngwenu: ‘Tunazange kuya, tunazange kuhana yitapo kuli Yehova.’ 18 Haliapwila hilukenu nukalakale! Kunuchi kutambula nawa mwambu, chipwe chocho nwatamba kulinga unji wa tijolu uzewene te nwakulinga.”

19 Chocho yichikaliwa chinji kuli A-Izalele waze apwile tupita, mumu lia shimbi yize aehele ngwo: “Kanda nutepulula unji wa tijolu uze nwakulinga ha tangwa.” 20 Mba muze hakatuka kumeso ja Falau, yalitakana ni Mose ni Arone waze te anaashimbwila. 21 Hazehene o yamba kuli Mose ni Arone ngwo: “Yehova atale ha yize nwalinga, anusopese, mumu hinwatupwisa atu amokomoko* kumeso ja Falau ni tuvumbi twenyi, hinwaha katana hanga atushihe.” 22 Chocho Mose yamba kuli Yehova ngwenyi: “Yehova, mumu liaka wakokela atu wano lamba lipwahaha? Mumu liaka wangutumine? 23 Chize tangwa lize nalisolwele kuli Falau hanga nguhanjike nenyi mu jina lie, iye kakumwesa atu wano lamba linji kuhiana mashimbu a kunyima, alioze yena kuwapulwile atu je.”

6 Chocho Yehova yamba kuli Mose ngwenyi: “Haliapwila mumona yize mungulinga kuli Falau. Mungumushinjila ni kwoko liami lia ndundo hanga anweche nuye. Ni kwoko liami lia ndundo, mungumushinjila hanga anuhume mu chifuchi.”

2 Mba Zambi yamba nawa kuli Mose ngwenyi: “Yami nguli Yehova. 3 Yami napwile ni kusoloka kuli Apalahama, Izake ni kuli Yakomba ngwe Zambi Mukwa-Ndundo-Jeswe, alioze hakutwala ku jina liami, Yehova, chakaalwezelelio. 4 Chikwo nawa, nalingile no usendo hanga ngwehe chifuchi cha Kanana, chifuchi chize ayo atwamine ngwe yilambala. 5 Yami mwene hinevwa miteto ya A-Izalele waze A-Engitu apwisa tupinji. Newuluka usendo wami.

6 “Kashika, amba kuli A-Izalele ngwe: ‘Yami nguli Yehova. Mungunutusula mushi lia milimo yikalu yize ananulingisa kuli A-Engitu ni kunuchiza mu undungo, mungunukuula ni kwoko liami lia ndundo ni upatwilo unene. 7 Munukapwa atu jami, yami mungukapwa Zambi yenu, pundu lume, munukanyingika ngwenu yami nguli Yehova, Zambi yenu, yoze manuchiza ku milimo yikalu yize nwakulinga mu Engitu. 8 Mungunutwala mu chifuchi chize nalishingile kuhana kuli Apalahama, Izake ni Yakomba. Mungunwahacho hanga chipwe nichenu. Yami nguli Yehova.’”

9 Mba Mose yalweza A-Izalele maliji wano, alioze ayo kamupanjikile mumu lia kuhonga ni mumu lia lamba linji lize te akwamwesa.

10 Chocho, Yehova yamba kuli Mose ngwenyi: 11 “Yako kuli Falau mwanangana wa Engitu umulweze hanga eche A-Izalele akatuke mu chifuchi chenyi.” 12 Alioze, Mose yamba kuli Yehova ngwenyi: “A-Izalele kama kangupanjikile, mba kuchi Falau mangupanjika se yami chanyingikine kuhanjika?”* 13 Chocho, Yehova yalweza nawa Mose ni Arone shimbi jize te atamba kulweza A-Izalele ni Falau mwanangana wa Engitu, hanga atuhwise A-Izalele mu chifuchi cha Engitu.

14 Wano e apwile miata a usoko mu majiko ja atato: Ana ja Rupene mwana mutangu wa Izalele wano: Hanoke, Palu, Hezerone ni Kame. Wano e a mu jiko lia Rupene.

15 Ana ja Simeone wano: Yemule, Yamine, Ohate, Yakine, Zohare ni Shalo mwana wa umwe pwo Mukwa-Kanana. Wano e a mu jiko lia Simeone.

16 Majina ja ana ja Levi kulita ni yisemuko yo wano: Ngeshone, Kohate ni Merari. Levi katwamine miaka 137.

17 Ana ja Ngeshone kapwile: Lipini ni Shimei, kulita ni majiko jo.

18 Ana ja Kohate kapwile: Amarame, Izehare, Heprone ni Uziele. Kohate katwamine miaka 133.

19 Ana ja Merari kapwile: Mahile ni Mushi.

Wano e majiko ja A-Levi kulita ni yisemuko yo.

20 Amarame yambata Yokepete ndumbu ya tato, iye yamusemena ana wano: Arone ni Mose. Amarame yatwama miaka 137.

21 Ana ja Izehare kapwile: Kora, Nefwe ni Zikiri.

22 Ana ja Uziele kapwile: Mishaele, Elezafwa ni Shitiri.

23 Arone yambata Eleshipa mwana wa Aminandambe, ndumbu ya Nashone. Iye yamusemena ana wano: Nandambe, Ambihu Eleazare ni Itama.

24 Ana ja Kora kapwile: Asere, Elekana ni Apasa. Wano e akwa-jiko lia Kora.

25 Eleazare mwana wa Arone yambata umwe wa kuli ana ja Putiele, yamusemena mwana umuwika, jina lienyi Finehase.

Wano e miata a mu jiko lia A-Levi kulita ni majiko jo.

26 Wano e Arone ni Mose waze Yehova ambile kuli ayo ngwenyi: “Tuhwisenu A-Izalele mu chifuchi cha Engitu mu yizavu ni yizavu.” 27 Ayo, Mose ni Arone e ahanjikile ni Falau mwanangana wa Engitu hanga atuhwise A-Izalele mu Engitu.

28 Tangwa lize Yehova ahanjikile ni Mose mu chifuchi cha Engitu, 29 Yehova yamba kuli Mose ngwenyi: “Yami nguli Yehova. Lweza Falau mwanangana wa Engitu yuma yeswe yize mungukulweza.” 30 Mba Mose yamba kuli Yehova ngwenyi: “Yami kwami chishi kuhanjika kanawa, mba kuchi Falau mangupanjika?”*

7 Chocho, Yehova yamba kuli Mose ngwenyi: “Tala, nakupwisa ngwe Zambi* kuli Falau, yayenu Arone mapwa profeta we. 2 Ukalweze yayenu Arone yuma yeswe yize mungukulweza, mba Arone makayilweza Falau. Mba Falau makecha A-Izalele hanga atuhuke mu chifuchi chenyi. 3 Hakutwala kuli yami, mungwecha hanga Falau akalise mbunge yenyi. Mungwokesa yilayi yami ni yikomokeso yami mu chifuchi cha Engitu. 4 Alioze, Falau kechi kanwivwa, kashika mungukasolola ndundo jami mu chifuchi cha Engitu ngukatuhwisemo atu jami A-Izalele ni upatwilo unene. 5 Pundu lume, A-Engitu makanyingika ngwo, yami nguli Yehova, muze mungukolola kwoko liami hanga likalimike ni Engitu ni kutusula A-Izalele mukachi ko.” 6 Mose ni Arone yalinga yize Yehova aatumine, yalinga chizechene aalwezele. 7 Mose te kali ni miaka 80, Arone te kali ni miaka 83 muze ayile ni kuhanjika ni Falau.

8 Mba Yehova yamba kuli Mose ni Arone ngwenyi: 9 “Nyi Falau mamba kuli yenu ngwenyi: ‘Lingenu chikomokeso,’ lweza Arone ngwe: ‘Anda mulumbu we uumbile hashi kumeso ja Falau.’ Mba mulumbu wacho muukalumuka kapela munene.” 10 Chocho, Mose ni Arone yasoloka kumeso ja Falau, yalinga chizechene Yehova atumine. Arone yakonga mulumbu wenyi hashi kumeso ja Falau ni tuvumbi twenyi, mba mulumbu yiwalumuka kapela munene. 11 Chocho Falau yasanyika akwa-mana, nganga ni akwa-kutaha ngombo a mu Engitu, no yalinga chizechene ni tufuta-futa two. 12 Mutu ni mutu wa kuli ayo yambila mulumbu wenyi hashi, mba milumbu yiyalumuka tupela anene-anene, alioze mulumbu* wa Arone yiumina milumbu yo. 13 Chipwe chocho Falau yakalisa mbunge yenyi, kaapanjikile ngwe chize Yehova ambile.

14 Mba Yehova yamba kuli Mose ngwenyi: “Mbunge ya Falau yikalu. Kashika katayijile kwecha atu hanga aye. 15 Hamene chimene, yako ulimone ni Falau. Muze iye matuhuka hanga aye ku Lwiji Nilu, ukamana ku sesa lia Lwiji hanga uliwane nenyi. Ukambata mulumbu uze walumukanga kapela. 16 Ukambe kuli iye ngwe: ‘Yehova, Zambi ya A-Hepreu kangutuma kuli yena. Iye kanambe ngwenyi: “Echa atu jami aye hanga angulingile mu puya,” alioze yena kuwononokene ndo haliapwila. 17 Kashika Yehova kanambe ngwenyi: “Haliapwila munyingika ngwe yami nguli Yehova. Mulumbu uno uli mu kwoko liami, munguulamba mu Lwiji Nilu, mba meya eswe malumuka manyinga. 18 Yishi a mu Nilu mafwa, lwiji mweswe manuka vumba lipi, mba A-Engitu kechi kuhasa kunwa meya a mu Lwiji Nilu.”’”

19 Mba Yehova yamba kuli Mose ngwenyi: “Lweza Arone ngwe: ‘Anda mulumbu we wolole kwoko lie ha meya eswe a mu Engitu, mu ngiji, mu tupila, mu yitende ni mu mashima eswe a meya hanga alumuke manyinga.’ Chifuchi cheswe cha Engitu muchikazala too ni manyinga, chipwe lume mu sapa ja mitondo ni mu sapa ja mawe.” 20 Hazehene, Mose ni Arone yalinga yize Yehova aatumine. Iye yolola mulumbu, yaulamba mu meya a mu Lwiji Nilu kumeso ja Falau ni ngamba jenyi, mba meya eswe a mu lwiji yalumuka manyinga. 21 Yishi yafwa, chocho lwiji yaputuka kunuka vumba lipi. Kashika, A-Engitu kahashile kunwa meya mu Lwiji Nilu. Chifuchi cheswe cha Engitu yichizala ni manyinga.

22 Alioze, Akwa-kutaha ngombo a mu Engitu yalinga chizechene ni wanga wo, kashika Falau yanunga ni kukalisa mbunge yenyi, kaapanjikile, ngwe chize Yehova ambile. 23 Chocho Falau kapalileko, yahiluka ku zuwo. 24 Kashika, A-Engitu eswe yafula mashima ku sesa lia Lwiji Nilu hanga awane meya a kunwa, mumu te kechi kuhasa kunwa meya a mu Lwiji Nilu. 25 Yikupalika matangwa shimbiali chize haze Yehova alumwine meya a mu Lwiji Nilu apwe manyinga.

8 Yehova yamba kuli Mose ngwenyi: “Yako kuli Falau umulweze ngwe, ‘Yehova kanambe ngwenyi: “Echa atu jami aye hanga angulingile. 2 Nyi mununga ni kulituna kwecha hanga aye, munguzalisa chifuchi che cheswe ni mbwota. 3 Lwiji Nilu mazala ni mbwota, makanduka ni kunjila mu zuwo lie, ni mu chipatulo che cha kupomba, makanyina ha muhela we, makanjila ni mu mazuwo ja tuvumbi twe ni ja atu je, ni ha majiko* je akwochela mbolo, ni mu yikashi ye yakulingila mbolo. 4 Mbwota makeza kuli yena, kuli atu je, ni kuli tuvumbi twe eswe.”’”

5 Kulutwe, Yehova yamba kuli Mose ngwenyi: “Lweza Arone ngwe, ‘olola kwoko lie ni mulumbu ha ngiji, ha tupila a Nilu ni ha yitende, tuhwisamo mbwota hanga akanduke mu chifuchi cha Engitu.’” 6 Mba Arone yolola kwoko ha ngiji ja mu Engitu, chocho yimutuhuka mbwota waze azalishile chifuchi cheswe cha Engitu. 7 Alioze, akwa-kutaha no yalinga chizechene ni wanga wo, yatuhwisa mbwota mu chifuchi cha Engitu. 8 Kashika, Falau yamba kuli Mose ni Arone ngwenyi: “Liumbenu kuli Yehova hanga achize mbwota wano kuli yami ni kuli atu jami, mumu ngunazange kwecha A-Izalele aye, hanga akalambule yitapo kuli Yehova.” 9 Mba Mose yakumbulula kuli Falau ngwenyi: “Yenu munusakula tangwa lize nunazange nguliumbe kuli Zambi hanga mbwota akatuke kuli yenu, kuli tuvumbi twenu, kuli atu jenu ni mu mazuwo jenu. Alioze masala wika mu Lwiji Nilu.” 10 Mba Falau yamba ngwenyi: “Hamene.” Chocho Mose yamba ngwenyi: “Muchilingiwa kulita ni liji lienu, hanga nunyingike ngwenu, niumwe yoze walifwa ni Yehova, Zambi yetu wakuhi. 11 Mbwota makatuka kuli yenu, mu mazuwo jenu, kuli tuvumbi twenu ni kuli atu jenu. Alioze masala wika mu Lwiji Nilu.”

12 Mose ni Arone yakatuka kumeso ja Falau, Mose yaliumba kuli Yehova mumu lia mbwota waze Iye atumine kuli Falau. 13 Yehova yapanjika kwita cha Mose, mba mbwota yaputuka kufwa mu mazuwo, ha maze ni mu minda. 14 Yakunga mbwota jacho milumba yinji, mba chifuchi yichiputuka kunuka vumba lipi. 15 Muze Falau amwene ngwenyi mbwota hahwa, yakalisa mbunge, katayijile kwapanjika ngwe chize Yehova ambile.

16 Yehova yamba kuli Mose ngwenyi: “Lweza Arone ngwe: ‘Olola mulumbu we, ulambe hashi, mba fufuta muyalumuka tumwe mu chifuchi cheswe cha Engitu.’” 17 Kashika o yalinga chocho. Arone yolola kwoko ni mulumbu wenyi, yaulamba hashi, mba fufuta yeswe ya hashi yiyalumuka tumwe mu chifuchi cheswe cha Engitu. Chocho tumwe yaputuka kusuma atu ni tushitu. 18 Akwa-kutaha yeseka kulinga chizechene hanga alumbe tumwe ni wanga wo, alioze yahona. Mba tumwe yasuma atu ni tushitu. 19 Chocho akwa-kutaha yamba kuli Falau ngwo: “Achi kachilinga ni ndundo* ja Zambi!” Nihindu Falau yanunga ni kukalisa mbunge yenyi, kaapanjikile, ngwe chize ambile Yehova.

20 Chocho, Yehova yamba kuli Mose ngwenyi: “Katuka chimenemene ukaliwane ni Falau. Muze makapwa ha kuya ku lwiji, ukambe kuli iye ngwe, ‘Yehova kanambe ngwenyi: “Echa atu jami aye hanga angulingile. 21 Alioze, nyi wechele atu jami aye, mungutuma jiji* kuli yena, kuli tuvumbi twe, kuli atu je ni mu mazuwo je. Mu mazuwo ja A-Engitu mumukazala too ni jiji, ni hashi haze akuliata muhakazala too ni jiji. 22 Ha tangwa lize, pundu lume, mungukahandununa chifuchi cha Ngoshone muze mwatwama atu jami. Mu chifuchi chacho kumuchikapwa niumwe jiji, mba mukanyingika ngwe, yami Yehova nguli mu chifuchi chino. 23 Mungukasa kalisa hakachi ka atu jami ni atu je. Chilayi chacho muchikalingiwa hamene.”’”

24 Mba Yehova yalinga chocho. Yizavu yinene ya jiji, yiyiputuka kunjila mu zuwo lia Falau, mu mazuwo ja tuvumbi twenyi ni mu chifuchi cheswe cha Engitu. Jiji yapihisa chifuchi cheswe. 25 Mba Falau yasanyika Mose ni Arone, yamba kuli ayo ngwenyi: “Yeenu nuhane yitapo kuli Zambi yenu muno mwene mu chifuchi.” 26 Alioze Mose yamba ngwenyi: “Kuchalitele kulinga chocho, mumu yitapo yize tunazange kuhana kuli Yehova Zambi yetu, A-Engitu keshi kuyizanga. Nyi mutuhana yitapo kumeso ja A-Engitu yize keshi kuzanga, shina ayo kechi kutwasa mawe? 27 Mutulinga wenyi wa matangwa atatu mu puya, kwenako mutukahanyina yitapo kuli Yehova Zambi yetu, ngwe chize iye atulwezele.”

28 Kashika, Falau yamba ngwenyi: “Mungunwecha nuye hanga nukahane yitapo kuli Yehova Zambi yenu mu puya. Alioze kanda nuya chinji kusuku. Ngulembelenu kuli Zambi yenu hanga achize jiji wano.” 29 Chocho Mose yamba ngwenyi: “Haliapwila, muze mungukatuka kuli yena, munguya nguliumbe kuli Yehova. Hamene, jiji waze ali ku zuwo lie, kuli tuvumbi twe ni kuli atu je, makatuka. Alioze kanda utwonga nawa ha kulituna kutwecha hanga tuye tuhane yitapo kuli Yehova.” 30 Mose yakatuka kumeso ja Falau, yaliumba kuli Yehova. 31 Chocho, Yehova yalinga yize Mose amwichile, jiji yakatuka kuli Falau, kuli tuvumbi twenyi ni kuli atu jenyi. Kukwasalile chipwe jiji umuwika. 32 Alioze, Falau yakalisa nawa mbunge, kechele A-Izalele hanga aye.

9 Yehova yamba kuli Mose ngwenyi: “Yako kuli Falau wambe ngwe, ‘Yehova, Zambi ya A-Hepreu kanambe ngwenyi: “Echa atu jami aye hanga angulingile. 2 Nyi mulituna kwecha hanga aye ni kununga ni kwakwika, 3 nyingika ngwe, kwoko lia Yehova mulishiha yimuna ye yeswe yize yili mu yambu. Mukupwa chipuho chize muchikashiha tuvwalu, yimbulu, tumelu, ngombe ni mapanga. 4 Alioze, Yehova makasa kalisa hakachi ka ngombe ja A-Izalele ni ngombe ja A-Engitu. Niumwe chimuna wa A-Izalele kechi kafwa.”’” 5 Chikwo nawa, Yehova yatesa shimbu lize chino te muchilingiwa, yamba ngwenyi: “Hamene, Yehova makalinga chuma chino mu chifuchi.”

6 Mukwachako, Yehova yalinga chize ambile, yimuna eswe a mu Engitu yaputuka kufwa, alioze niumwe chimuna wa A-Izalele kafwile. 7 Muze Falau atumine atu jenyi kutala, yanyingika ngwenyi niumwe chimuna wa A-Izalele kafwile. Chipwe chocho, Falau yanunga ni kukalisa mbunge, kechele A-Izalele hanga aye.

8 Mba Yehova yamba kuli Mose ni Arone ngwenyi: “Zomonenu moko aali a too ni uto wa ha jiko, Mose katamba kuukuwa mwilu, kumeso ja Falau. 9 Uto wacho muukapwa fufuta mu chifuchi cheswe cha Engitu, mba fufuta yacho muyikaneha yivunda ya mashina kuli atu ni kuli tushitu mu chifuchi cheswe cha Engitu.”

10 Chocho, ayo yazomona uto ha jiko, yaya yamana kumeso ja Falau. Mose yakuwa uto wacho mwilu, mba uto yiuneha yivunda ya mashina hali atu ni tushitu. 11 Akwa-kutaha kahashile kumana kumeso ja Mose, mumu no yivunda yaakwachile hamwe ni A-Engitu eswe. 12 Alioze, Yehova yecha hanga Falau akalise mbunge yenyi, mba iye kapanjikile Mose ni Arone ngwe chize Yehova ambile kuli Mose.

13 Yehova yamba kuli Mose ngwenyi: “Ukakatuka chimenemene, ukaye kuli Falau wambe kuli iye ngwe: ‘Yehova, Zambi ya A-Hepreu kanambe ngwenyi: “Echa atu jami aye hanga angulingile. 14 Haliapwila, yilungo yami yeswe munguyitalikisa hali yena, hali tuvumbi twe ni hali atu je, hanga unyingike ngwe kukushi mutu niumwe walifwa ni yami hashi heswe. 15 Mumu yena ni atu je kachi nanushihile kulu ni chilungo chipi ni kununongesa* hashi. 16 Alioze, chikuma chize nakwechela ni mwono chili chino: Hanga ngusolole ndundo jami, ni jina liami alinyingike hashi heswe. 17 Yena kusolo kwecha atu jami hanga aye, muchinunga ni kulinangamisa. 18 Hamene, ha ola ngwe yino, mungukanokesa chiwe cha makelekeshi chize kanda chichinoka kama mu Engitu, chize haze atungilile chifuchi chino ndo musono. 19 Kashika, tuma kuchiza yimuna ye eswe ni yikwata ye yeswe yize yili mu yambu. Atu eswe ni yimuna waze kakatukile mu yambu, makafwa muze chiwe muchikanoka hali ayo.”’”

20 Tuvumbi eswe a Falau waze te akuvwila liji lia Yehova woma, yanjisa ni kawashi ngamba jo ni yimuna yo mu mazuwo. 21 Alioze, waze eswe alelesele liji lia Yehova, yecha ngamba jo ni yimuna yo mu yambu.

22 Mba Yehova yamba kuli Mose ngwenyi: “Olola kwoko lie mwilu hanga chiwe chinoke mu chifuchi cheswe cha Engitu, chinoke hali atu, ni hali tushitu ni ha kulia cheswe chize chakusoka mu minda mu chifuchi cha Engitu.” 23 Chocho, Mose yolola mulumbu wenyi mwilu, mba Yehova yatuma mihenyo ni chiwe, kahia* yikahulumukina hashi, mba Yehova yanokesa chiwe mu chifuchi cheswe cha Engitu. 24 Kwapwile chiwe, mba mukachi ka chiwe mwapwile kahia. Vula wacho wa chiwe kapwile munji, te kanda anoka kama mu chifuchi, chize haze chifuchi cha Engitu chaputukile kupwa vungu. 25 Chiwe yichinongesa yuma yeswe yapwile mu yambu mu chifuchi cheswe cha Engitu. Chize kuli atu ndo kuli yimuna, yichinongesa kulia cheswe ni mitondo yeswe mu yambu. 26 Mu chifuchi cha Ngoshone wika muze apwile A-Izalele, mwe kumwakanokene chiwe.

27 Chocho, Falau yatuma kusanyika Mose ni Arone, yamba kuli ayo ngwenyi: “Ha chisuho chino navulumuna. Yehova kali mukwa-ululi, alioze yami ni atu jami twahengesa. 28 Liumbenu kuli Yehova hanga ahwise mihenyo ni chiwe cha kuli Zambi. Mba mungunwecha hanga nuye, kunuchi kutwama nawa muno.” 29 Kashika, Mose yamba kuli iye ngwenyi: “Muze mungutuhuka mu mbonge, mungwolola moko kumeso ja Yehova. Mihenyo muyihwa ni chiwe necho muchihwa, hanga unyingike ngwe hashi hambala ha Yehova. 30 Alioze, ngunanyingika ngwami yena ni tuvumbi twe nihindu kunuchi kuvwila Yehova Zambi woma.”

31 Mitondo ya linyu ni sevada yayinongesa, mumu sevada te hiyapwa ni mitwe, mitondo ya linyu te hiyapwa ni yitemo. 32 Alioze, tiliku ni shipeleta* kakayinongesene. Mumu te kanda yichikola. 33 Mose yakatuka kumeso ja Falau, yatuhuka mu limbo, yazundula moko jenyi kuli Yehova, mba mihenyo ni chiwe yiyihwa, ni vula yapatuka. 34 Muze Falau amwene ngwenyi, vula, chiwe ni mihenyo hiyahwa, iye ni ngamba jenyi yavulumuna cheka, chikwo nawa, yakalisa mbunge. 35 Falau yanunga ni kukalisa mbunge, katayijile kwecha A-Izalele hanga aye, ngwe chize Yehova ambile kupalikila muli Mose.

10 Mba Yehova yamba kuli Mose ngwenyi: “Lisolole kumeso ja Falau mumu hinecha hanga iye ni tuvumbi twenyi akalise mbunge jo, hanga ngusolole yilayi yami kumeso jenyi. 2 Hanga ni yena ukambulwile ana je ni ajikulu je lamba lize nanehene mu Engitu ni yilayi yize nalingile mukachi ko. Chocho, pundu lume, yenu munukanyingika ngwenu yami nguli Yehova.”

3 Kashika, Mose ni Arone yaya kuli Falau, yamba kuli iye ngwo: “Yehova, Zambi ya A-Hepreu kanambe ngwenyi: ‘Ndo tangwa lika mununga ni kulituna kungwononokena? Echa atu jami aye hanga angulingile. 4 Alioze, nyi mununga ni kulituna kwecha atu jami hanga aye, hamene mungukaneha mapasu mu chifuchi che. 5 O makazala hashi heswe, chipwe mavu kechi kasoloka. Makanongesa yuma yeswe yize yanusalileho muze kwanokene chiwe, makalia mitondo yeswe yize yakusoka mu minda ye. 6 Makazala mu mazuwo je, mu mazuwo ja tuvumbi twe eswe ni mu mazuwo a mu chifuchi cheswe cha Engitu, atatenu ni akakenu kanda amona kama mapasu ngwe wano chize haze asemukinyine mu chifuchi chino ndo musono.’” Chocho Mose yateuluka, yakatuka kumeso ja Falau.

7 Mba tuvumbi twa Falau yamba kuli iye ngwo: “Ndo tangwa lika lunga yono manunga ni kutuchikimisa?* Echa atu wano aye hanga akalingile Yehova Zambi yo. Kunwamwene ngwenu chifuchi cheswe cha Engitu chinanongo?” 8 Chocho, Mose ni Arone yaatwala nawa kuli Falau, mba iye yamba kuli ayo ngwenyi: “Yeenu nukalingile Yehova Zambi yenu. Alioze, iya yoze maya?” 9 Mose yakumbulula ngwenyi: “Mutuya ni akweze jetu, tushinakaji jetu, ana jetu a malunga, ana jetu a mapwo, mapanga jetu ni ngombe jetu, mumu mutukalingila Yehova chiwanyino.” 10 Falau yamba kuli ayo ngwenyi: “Nyi tangwa limwe mungunwecha nuye hamwe ni ana jenu, pundu lume, acho Yehova kali hamwe ni yenu! Chinasoloka zwalala ngwo nunazange kulinga yuma yipi. 11 Ka! Malunga wika e maya hanga alingile Yehova, mumu yino ye nwechile.” Chocho, yaahuma kumeso ja Falau.

12 Kashika, Yehova yamba kuli Mose ngwenyi: “Olola kwoko lie ha chifuchi cha Engitu hanga usanyike mapasu eze alie kulia cheswe mu chifuchi, ni yuma yeswe yize chiwe chakanongesene.” 13 Hazehene, Mose yolola mulumbu wenyi ha chifuchi cha Engitu, mba Yehova yaneha fuji ya ku chivumbuko mu chifuchi ha tangwa liacho liamuundu, ni ufuku weswe. Muze kwachile, fuji ya ku chivumbuko yiyineha mapasu. 14 Mba mapasu yeza mu chifuchi cheswe cha Engitu, yazala mu chifuchi cheswe. Chilungo chacho chapwile chikalu chinji. Te kanda kupwa kama mapasu anji chichize, chikwo nawa, kechi keza kapwako nawa. 15 Mapasu yazala mu chifuchi cheswe, chifuchi chacho yichilaa pwi ni mapasu. Yalia kulia cheswe mu chifuchi, ni mihuko yeswe ya ku mitondo yize chiwe chakanongesene. Kukwasalile chipwe lifwo limuwika ku mitondo, chipwe mu minda mu chifuchi cheswe cha Engitu.

16 Chocho, Falau yasanyika Mose ni Arone ni kawashi, yamba ngwenyi: “Navulumuna kuli Yehova Zambi yenu, ni kuli yenu. 17 Haliapwila, lisesa, konekenenu kama shili yami chisuho chino, liumbenu kuli Yehova Zambi yenu hanga achize kama chilungo chino chipi kuli yami.” 18 Mba iye* yakatuka kumeso ja Falau, yaliumba kuli Yehova. 19 Chocho Yehova yalumuna fuji, fuji yinji yiyikatuka ku chitokelo, yiyihungumuna mapasu ni kwambila mu Kalunga-lwiji Muchila. Kukwasalile niumwe pasu mu chifuchi cheswe cha Engitu. 20 Alioze, Yehova yecha hanga Falau akalise mbunge, iye kechele A-Izalele hanga aye.

21 Kashika, Yehova yamba kuli Mose ngwenyi: “Olola kwoko lie kwilu hanga milima yize mu chifuchi cha Engitu, milima yacho muyipwa yinji.” 22 Hazehene Mose yolola kwoko kwilu, milima yinji yiyiza mu chifuchi cheswe cha Engitu ha matangwa atatu. 23 A-Engitu te keshi kulimona, niumwe wa kuli ayo kakatukile ha chihela haze te ali ha matangwa atatu, alioze kuze A-Izalele te atwama kwapwile pangu. 24 Chocho Falau yasanyika Mose, yamba ngwenyi: “Yako ulingile Yehova. Mapanga ni ngombe jenu e wika masala. Chipwe ana jenu munuhasa kuya no.” 25 Alioze Mose yamba ngwenyi: “Yena mwene watamba kutwaha yimuna, hanga tukahane yitapo ni milambu ya kulumba kuli Yehova Zambi yetu. 26 Chipwe yimuna yetu mutuya nayo. Kutuchi kuhichika niumwe chimuna,* mumu mutukalingila Yehova Zambi yetu ni amwe a ku yimuna jacho. Kutwanyingikine yize mutulambula kuli Yehova hanga tumuwayile mumu kanda tuchihetako.” 27 Yehova yecha hanga Falau akalise mbunge, chocho Falau katayijile kwecha A-Izalele hanga aye. 28 Falau yamba kuli iye ngwenyi: “Katuka kumeso jami! Kanda ukeza nawa kuli yami, mumu tangwa lize mukeza kuli yami, mukafwa.” 29 Chocho Mose yamba ngwenyi: “Mungulinga chize wamba, chichi keza nawa kuli yena.”

11 Mba Yehova yamba kuli Mose ngwenyi: “Munguneha nawa chilungo chimuwika hali Falau ni mu chifuchi cha Engitu. Iye manwecha hanga nuye. Muze makanwecha hanga nuye, pundu lume, makanuhuma mu chifuchi chino. 2 Haliapwila, lweza atu, malunga ni mapwo hanga ete yikwata ya prata ni ya oru kuli enyembo jo.” 3 Mba Yehova yakwasa A-Izalele hanga aevwile keke kuli A-Engitu. Chikwo nawa, tuvumbi twa Falau ni atu eswe a mu Engitu kapwile ni kuvumbika chinji Mose.

4 Kashika, Mose yamba ngwenyi: “Yehova kanambe ngwenyi: ‘Mungukapalika mu Engitu hakachi ka ufuku, 5 mba tupula-majimo eswe a mu chifuchi cha Engitu kumakafwa, chize kuli kapula-jimo wa Falau yoze unatwama ha ngunja ya wanangana ndo kuli kapula-jimo wa ngamba wa pwo yoze uli ku utwilo, ni tupula-majimo eswe a yimuna no makafwa. 6 Mu chifuchi cheswe cha Engitu, mumukapwa miteto yinji, miteto yize kanda yipwamo kama, chikwo nawa, kuyichi keza kapwamo nawa. 7 Chipwe kawa kechi kapwozela A-Izalele, chipwe atu, chipwe yimuna jo, hanga nukanyingike ngwenu Yehova mahasa kusa kalisa hakachi ka A-Engitu ni A-Izalele.’ 8 Pundu lume, tuvumbi twe eswe makeza kuli yami, makafulamana kumeso jami ni kwamba ngwo: ‘Yako, yena hamwe ni atu je waze akukukaula.’ Mba kulutwe lia chino, mungukatuhuka.” Chocho Mose yakatuka kumeso ja Falau ni uli unji.

9 Yehova yamba kuli Mose ngwenyi: “Falau kechi kanupanjika, hanga yikomokeso yami yikoke mu chifuchi cha Engitu.” 10 Mose ni Arone yalinga yikomokeso yeswe yino kumeso ja Falau, alioze Yehova yecha hanga Falau akalise mbunge, Falau kechele hanga A-Izalele akatuke mu chifuchi.

12 Yehova yamba kuli Mose ni Arone mu chifuchi cha Engitu ngwenyi: 2 “Kakweji yono mapwa uputukilo wa tukweji. Makapwa kuli yenu kakweji mutangu wa ha mwaka. 3 Amba ku chikungulwila cheswe cha A-Izalele ngwe: ‘Ha tangwa liamuchikumi lia kakweji yono, mutu ni mutu katamba kusakula panga umuwika mu jiko* lienyi, ku zuwo ni zuwo panga umuwika. 4 Alioze, nyi mu jiko mwatwama atu akehe hanga alie panga wamuundu, katamba kumulila mu zuwo lio hamuwika ni mwenyembo wenyi yoze alisulangana nenyi kulita ni unji wa atu.* Hakulitetela panga wacho, nukatese yifwo yize mutu ni mutu atamba kulia. 5 Chimuna katamba kupwa keshi kapalia, kuji wa mwaka umuwika. Munuhasa kusakula panga hanji pembe. 6 Nukafunge yimuna jacho ndo ha tangwa 14 lia kakweji yono, mba jiko ni jiko mu chikungulwila cha A-Izalele likashihe chimuna ha kunjila cha tangwa. 7 Munukanda manyinga amwe nukaakwite ku tushilu ni ha chikuli cha helu ku chikolo cha zuwo lize munukamulila.

8 “‘Ha ufuku wacho munukalia yifwo. Nwatamba kuyocha ni kuyilia ni mbolo kujishi futunwiso ni mafwo asasu. 9 Kanda nulia yifwo yacho ya wisu chipwe ya kuteleka. Nukoche chimuna mweswe wamuundu hamwe ni mutwe, molu ni yuma ya mu jimo. 10 Kanda nutulika yifwo niyimwe ndo hamene, alioze nyi mukusala yimwe ndo hamene, nwatamba kuyocha. 11 Nwatamba kuyilia chino: Nukalikase miya mu zalilo, nukazale sapato ni kukwata milumbu ku moko. Nwatamba kuyilia ni kawashi. Mumu chili Chizomboka cha Yehova. 12 Mumu ha ufuku wacho, mungukapalika mu chifuchi cha Engitu ni kushiha tupula-majimo eswe a mu chifuchi cha Engitu, chize kuli atu ndo kuli yimuna. Mba mungukaneha upatwilo kuli tuzambi eswe a mu Engitu. Yami Yehova. 13 Manyinga makapwa chilayi mu mazuwo muze munukapwa. Yami mungukamona manyinga mba mungukanupalika, chilungo kuchichi keza hali yenu hanga chikanunongese muze mungukalamba A-Engitu.

14 “‘Nwatamba kwiwuluka tangwa lino. Nupwe ni kulinga-linga chiwanyino cha Yehova ha tangwa lino ndo ku yisemuko yenu yeswe. Shimbi yino yili ya mutolo. 15 Nwatamba kulia mbolo kujishi futunwiso ha matangwa shimbiali. Ewa, ha tangwa litangu nwatamba kuchiza futunwiso mu mazuwo jenu, mumu mutu* yoze malia chuma chize chili ni futunwiso, chize ha tangwa litangu ndo ha tangwa liamuchishimbiali, katamba kumushiha hakachi ka A-Izalele. 16 Ha tangwa litangu nukalinge kukunguluka chisandu, ni ha tangwa liamuchishimbiali nukalinge kukunguluka chikwo chisandu. Kunwatambile kulinga mulimo niumwe ha matangwa jacho. Nwatamba kululieka wika yize mutu ni mutu* malia.

17 “‘Nukalinge Chiwanyino cha Mbolo Kuyishi Futunwiso, mumu ha tangwa lizeliene, mungukachiza mbunga yenu mu chifuchi cha Engitu. Nukafunge tangwa lino ku yisemuko yenu yeswe. Yino yili shimbi ya mutolo. 18 Nwatamba kulia mbolo kujishi futunwiso ha kakweji mutangu, chize ha kutoka cha tangwa 14 lia kakweji ndo ha kutoka cha tangwa 21 lia kakweji. 19 Ha matangwa shimbiali katambile kuwana niyimwe futunwiso mu mazuwo jenu, mumu mutu yoze malia chuma chize chili ni futunwiso, chipwe chilambala hanji Ka-Izalele mwene, katamba kumushiha mukachi ka chikungulwila cha A-Izalele. 20 Kunwatambile kulia chuma nichimwe chize chili ni futunwiso. Mu mazuwo eswe nwatamba kulia mbolo kujishi futunwiso.’”

21 Hazehene, Mose yasanyika makulwana eswe a A-Izalele, yamba kuli ayo ngwenyi: “Sakulenu misamba* mu matanga jenu kulita ni majiko jenu nushihe yitapo ya Chizomboka. 22 Mba nukande chisapo cha hisopo ni kuchichupika mu manyinga ali ha mbashila hanga nukakwite manyinga ku chikuli cha helu ni ku tushilu aali ku chikolo cha zuwo. Niumwe wa kuli yenu katambile kutuhuka mu zuwo ndo muze mukucha. 23 Mba muze Yehova mapalika hanga ashihe A-Engitu, mamona manyinga ku chikuli cha helu ni ku tushilu a chikolo, pundu lume, Yehova makapalika, kechi kecha hanga chilungo cha kufwa chinjile mu mazuwo jenu.

24 “Lingenu chino, yino yili shimbi ya mutolo kuli yenu ni kuli ana jenu. 25 Muze munukanjila mu chifuchi chize Yehova makanwaha ngwe chize anulwezele, nungenu ni kulinga chiwanyino chino. 26 Mba muze ana jenu makanuhula ngwo: ‘Yika chiwanyino chino chinalumbunuka kuli yenu?’ 27 Nukaakumbulule ngwenu: ‘Chili chitapo cha Chizomboka cha Yehova yoze wapalikile mazuwo ja A-Izalele mu Engitu muze ashihile A-Engitu, alioze yafunga mazuwo jetu.’”

Chocho, atu yafulamana hashi. 28 Mba A-Izalele yalinga ngwe chize Yehova alwezele Mose ni Arone. Yalinga chizechene aalwezele.

29 Mba ha muchima ufuku, Yehova yashiha tupula-majimo eswe a mu chifuchi cha Engitu, chize kuli kapula-jimo wa Falau yoze watwama ha ngunja ya wanangana ndo kuli kapula-jimo wa funge yoze te uli mu zuwo lia ususu, ni tupula-majimo eswe a tushitu. 30 Ha ufuku wacho, Falau yalaula, ni tuvumbi twenyi eswe ni A-Engitu akwo eswe no yalaula, mukachi ka A-Engitu mwapwile miteto yinji, mumu kumwakapwile zuwo nilimwe lize te kulishi ni mufu. 31 Hazehene, Falau yasanyika Mose ni Arone ha ufuku wacho, yamba ngwenyi: “Yeenu kwenu, katukenu mukachi ka atu jami, yeenu hamwe ni A-Izalele akwo. Yeenu nulingile Yehova, ngwe chize nwambile. 32 Mbatenu nawa mapanga ni ngombe jenu ngwe chize nwambile. Alioze ni yami nunguwahisa.”

33 Mba A-Engitu yaputuka kushinjila A-Izalele hanga akatuke kawashi mu chifuchi, mumu te kanambe ngwo: “Tuli ngwe hitunafu kulu!” 34 Chocho atu yambata unga wa mbolo uze te kuushi futunwiso, yambata nawa yikashi haze akulingila mbolo ha yipaya yakuvungila ha mahina jo. 35 A-Izalele yalinga yize Mose aalwezele, yeta kuli A-Engitu yikwata ya prata ni ya oru hamwe ni mazalo. 36 Yehova yalinga hanga A-Engitu evwile A-Izalele keke, kashika, A-Engitu yahana yuma yeswe yize A-Izalele echile. Mba A-Izalele yatambula yuma yinji kuli A-Engitu.

37 A-Izalele yenda hashi kukatuka ku Ramese ndo ku Sukote, unji wo wapwile malunga 600,000, kuchizako ana. 38 Atu anji waze te hi A-Izalele ko yaya no, yaya ni mapanga ni ngombe anji. 39 Yalinga mbolo jize kujishi futunwiso ni unga uze ambachile mu Engitu. Mbolo kujakapwile ni futunwiso mumu A-Izalele kaahumine susumuku mu chifuchi cha Engitu, kashika kakapwile ni shimbu lia kuteleka kulia chikwo.

40 Miaka yize A-Izalele atwamine mu Engitu yapwile 430. 41 Ha tangwa lize miaka 430 yakumbanyine, mbunga* eswe a Yehova yatuhuka mu chifuchi cha Engitu. 42 Ufuku wacho muukapwa ufuku wa kulingila Yehova chiwanyino mumu lia kunuchiza mu chifuchi cha Engitu. Uli ufuku uze A-Izalele eswe atamba kulingila Yehova chiwanyino ku yisemuko yo yeswe.

43 Yehova yamba kuli Mose ni Arone ngwenyi: “Yino ye shimbi yinatale ha Chizomboka: Chilambala niumwe katambile kulia Chizomboka. 44 Alioze, nyi mutu umwe mapwa ni ndungo yoze alanjile ni mbongo, katamba kumupwisa ngalami. Chocho mba iye mahasa kulia Chizomboka. 45 Ngeji ni mukwa-mulimo yoze akufweta katambile kuchilia. 46 Panga katamba kumulila mu zuwo limuwika. Kanda nutuhuka chipwe ni yifwo yikehe haze, kanda numakuna chifwaha nichimwe. 47 Chikungulwila cheswe cha A-Izalele chatamba kulinga chiwanyino cha Chizomboka. 48 Nyi umwe chilambala watwama ni yenu mazanga kulingila Yehova chiwanyino cha Chizomboka, katamba kutwala ku mukanda malunga eswe a ku zuwo lienyi. Nyi malinga chocho, mba mahasa kukundama ha chiwanyino, iye mapwa ngwe Ka-Izalele mwene. Alioze chilima niumwe katambile kulia Chizomboka. 49 Shimbi yacho muyikwata chipwe hali A-Izalele ni hali yilambala waze atwama mukachi kenu.”

50 Chocho A-Izalele eswe yalinga ngwe chize Yehova alwezele Mose ni Arone. Yalinga chizechene aalwezele. 51 Ha tangwa lizeliene, Yehova yachiza A-Izalele mu Engitu hamwe ni mbunga* yo.

13 Yehova yamba nawa kuli Mose ngwenyi: 2 “Nguselenu* ku usandu tupula-majimo eswe a malunga hakachi ka A-Izalele. Tupula-majimo eswe masemuka chipwe hakachi ka atu, hanji hakachi ka yimuna kali a yami.”

3 Mose yamba kuli atu ngwenyi: “Iwulukenu tangwa lino lize nwatuhukile mu Engitu, chifuchi cha undungo,* mumu Yehova kanuchijile muno ni kwoko lienyi lia ndundo. Kashika kunwatambile kulia nichimwe chize chili ni futunwiso. 4 Musono nunatuhuka, ha kakweji wa Ambimbi.* 5 Muze Yehova manutwala mu chifuchi cha A-Kanana, cha A-Hete, cha A-Amore, cha A-Hevwe ni cha A-Yepushe, chize alishingile kuhana kuli tulamba twenu, mu chifuchi muze mwatwama yamwa yinji ni uchi, nukalinge chiwanyino chino ha kakweji yono. 6 Nwatamba kulia mbolo jize kujishi futunwiso ha matangwa shimbiali, mba ha tangwa liamuchishimbiali mukukapwa chiwanyino cha Yehova. 7 Nwatamba kulia mbolo kujishi futunwiso ha matangwa shimbiali. Katambile kuwana mukachi kenu chuma nichimwe chize chili ni futunwiso, niyimwe futunwiso katambile kuyiwana mukachi kenu, mu membo* jenu eswe. 8 Ha tangwa liacho nukalweze ana jenu ngwenu: ‘Tunalingi chiwanyino mumu lia yize Yehova alingile hali yetu muze twatuhukile mu Engitu.’ 9 Chiwanyino chino muchipwa kuli yenu ngwe chilayi ha moko jenu ni chiwulwiso ha mahuma jenu, hanga shimbi ya Yehova yikapwe mu makanwa jenu, mumu Yehova kanuchijile mu Engitu ni kwoko lienyi lia ndundo. 10 Nukafunge shimbi yino mwaka ha mwaka nyi nwaheta ha tangwa liacho.

11 “Muze Yehova makanunjisa mu chifuchi cha Kanana ni kunwahacho, ngwe chize alakenyene kuli yenu ni kuli tulamba twenu, 12 nukahane kuli Yehova tupula-majimo eswe a malunga ni tupula-majimo a yimuna eswe waze munupita. Ayo kali ambala a Yehova. 13 Kapula-jimo mweswe wa chimbulu, katamba kumukuula ni panga, nyi kamukuulile, amumakune kota. Nwatamba kukuula tupula-majimo eswe ja ana jenu.

14 “Nyi ana jenu makanuhula ngwo: ‘Yika chino chinalumbunuka?’ Nukaakumbulule ngwenu: ‘Yehova katuchijile mu Engitu, chifuchi cha undungo ni kwoko lienyi lia ndundo. 15 Muze Falau akalishile mbunge ha kulituna kutwecha hanga tuye, Yehova yashiha tupula-majimo eswe a mu chifuchi cha Engitu, chize kuli kapula-jimo wa atu ndo kuli kapula-jimo wa yimuna, kashika tunalambula kuli Yehova tupula-majimo a yimuna ni kukuula tupula-majimo ja ana jetu.’ 16 Chino muchikapwa chilayi ha moko jenu ni ha mahuma jenu, mumu Yehova katuchijile ni kwoko lia ndundo mu Engitu.”

17 Muze Falau echele atu hanga aye, Zambi kaatwalile mu jila yinatalikisa ku chifuchi cha A-Filistea, chipwe ngwe jila yacho yapwile yihi. Mumu Zambi yamba ngwenyi: “Hanji atu malumuna manyonga jo muze mamona jita mafuna mu chifuchi cha Engitu.” 18 Chocho Zambi yajingisa atu mu jila ya mu puya ya Kalunga-lwiji Muchila. Alioze A-Izalele yatuhuka mu chifuchi cha Engitu mu mikana, akululieka kanawa ngwe maswalale. 19 Mose yambata yifwaha ya Yosefwe, mumu Yosefwe kashingishile ana ja Izalele ngwenyi: “Pundu lume, Zambi makanwiwuluka. Kashika, nukachiza yifwaha yami muno, nukaye nayo.” 20 O yakatuka ku Sukote, yatulila ku Etame, ku songo lia puya.

21 Yehova kapwile ni kutetekela kulutwe lio, mu mwalwa ni nguji lia lelwa hanga aasongwele mu jila, ha ufuku ni nguji lia kahia, aatemwine mu jila, mba te ahase kulinga wenyi mwalwa ni ufuku. 22 Nguji lia lelwa kuliakatukile kuli atu ha mashimbu a mwalwa, chipwe nguji lia kahia kuliakatukile kuli ayo ha ufuku.

14 Yehova yamba kuli Mose ngwenyi: 2 “Amba kuli A-Izalele ahiluke hanga ajike mbalaka jo kulutwe lia Paihahiro, hakachi ka Mingondole ni kalunga-lwiji, hakamwihi ni Mbale-Zefwone. Nwatamba kujika mbalaka ku sesa lia kalunga-lwiji kulutwe lia Mbale-Zefwone. 3 Mba Falau makamba hakutwala kuli A-Izalele ngwenyi: ‘Ayo kanachamangina mu chifuchi, kamwene kuze maya. Hatoka mu puya.’ 4 Mungwecha hanga Falau akalise mbunge yenyi. Iye manukaula mba mungufumanyisa jina liami kupalikila muli Falau ni yizavu yenyi ya tujita. Pundu lume, A-Engitu makanyingika ngwo, yami nguli Yehova.” Mba A-Izalele yalinga chocho.

5 Kulutwe, yalweza Falau ngwo, A-Izalele hachina. Hazehene, Falau ni tuvumbi twenyi yalumuna nyonga lio hakutwala kuli A-Izalele, yamba ngwo: “Mumu liaka twalinga chuma chino? Twatusula tupinji jetu A-Izalele!” 6 Chocho, yalulieka matemba jenyi a jita, yaya hamwe ni atu jenyi. 7 Yanda matemba apema a jita 600 ni matemba akwo eswe a mu Engitu, temba ni temba liapwile ni tujita. 8 Chocho Yehova yecha hanga Falau mwanangana wa Engitu akalise mbunge yenyi, iye yakaula A-Izalele shimbu te A-Izalele anatuhuka mu Engitu ni woma wakuhi. 9 A-Engitu yakaula A-Izalele, tuvwalu eswe ni matemba a jita a Falau ni akwa-kwendesa tuvwalu ni maswalale, yakundama kuli A-Izalele shimbu o te achili ku sesa lia kalunga-lwiji hakamwihi ni Paihahiro, kulutwe lia Mbale-Zefwone.

10 Muze Falau ahetele hakamwihi, A-Izalele yahetula meso jo yamona ngwe A-Engitu te kanaakaula. A-Izalele yevwa woma unji, mba yaputuka kuteta kuli Yehova. 11 O yamba kuli Mose ngwo: “Shina mu Engitu kumushi mafuka, kashika watuneha muno mu puya hanga tufwilemo? Mumu liaka watuchiza mu Engitu? 12 Twakakulwezele mu Engitu ngwetu: ‘Tweche kwetu tulingile A-Engitu’? Mumu shinaho kulingila A-Engitu kuhiana kufwila muno mu puya.” 13 Chocho Mose yalweza atu ngwenyi: “Kanda nwivwa woma. Jikizenu, manenu numone chize Yehova manulamwina ha tangwa lia musono. Mumu A-Engitu waze nunamono musono, kunuchi keza kaamona nawa. 14 Yehova manwashila jita, alioze yenu kwenu holenu kuluu.”

15 Yehova yamba kuli Mose ngwenyi: “Mumu liaka unanungu ni kungulilila? Lweza A-Izalele anunge ni wenyi wo. 16 Alioze yena, zundula mulumbu we, olola kwoko ha kalunga-lwiji, muhandunune hanga A-Izalele ahase kupalika mukachi ka kalunga-lwiji hashi homu. 17 Mungwecha A-Engitu akalise mbunge, chocho ayo makaula A-Izalele mu kalunga-lwiji. Hachino, mungulifumanyisa kupalikila muli Falau, tujita twenyi eswe, matemba jenyi a jita ni akwa-kwendesa tuvwalu. 18 Mba A-Engitu pundu lume, makanyingika ngwo yami nguli Yehova muze mungukalifumanyisa kupalikila muli Falau, matemba jenyi a jita ni akwa-kwendesa tuvwalu jenyi.”

19 Mungelo wa Zambi wamwenemwene, yoze te unatetekela A-Izalele, yakatuka kulutwe lio yaya kunyima lio, ni nguji lia lelwa nelio yilikatuka kulutwe lio, yilimana kunyima lio. 20 Chocho, nguji lia lelwa yilimana hakachi ka A-Izalele ni tujita twa A-Engitu. Sali limwe nguji lia lelwa yilineha milima, sali likwo yilineha pangu. Chocho, chizavu chimwe kuchakundamine ku chizavu chikwo ufuku weswe.

21 Mose yolola kwoko ha kalunga-lwiji, Yehova yatuma fuji ya ku chivumbuko, mba meya a mu kalunga-lwiji yalihandununa, ha mashima a kalunga-lwiji yihoma chau. 22 Chocho A-Izalele yazauka mukachi ka kalunga-lwiji hashi homu, meya yapwa ngwe chipanga sali ni sali. 23 A-Engitu yakaula A-Izalele, tuvwalu eswe a Falau, matemba jenyi a jita ni akwa-kwendesa tuvwalu yakaula A-Izalele mukachi ka kalunga-lwiji. 24 Ha mandemba,* Yehova kapwile mukachi ka nguji lia kahia ni mukachi ka nguji lia lelwa, yatala tujita twa A-Engitu, yaalumbanganyisa. 25 Iye yasokola malota* a matemba jo, kashika waze te anendesa kahashile kwendesa kanawa. Chocho A-Engitu yamba ngwo: “Tuchinenu A-Izalele mumu Yehova kanaashila jita mu kulimika ni A-Engitu.”

26 Mba Yehova yalweza Mose ngwenyi: “Olola kwoko ha kalunga-lwiji hanga meya apukukine hali A-Engitu, matemba jo a jita ni hali akwa-kwendesa tuvwalu.” 27 Hazehene, Mose yolola kwoko ha kalunga-lwiji, mba muze te kunayi ni kucha kalunga-lwiji yafuna ngwe chizechene apwile. A-Engitu yafupa kuchina, alioze Yehova yaambila mukachi ka kalunga-lwiji. 28 Meya yapukuka, yafuka matemba a jita ni akwa-kwendesa tuvwalu eswe a Falau, waze akawile A-Izalele mu kalunga-lwiji. Kukwasalile niumwe wa kuli ayo.

29 Alioze, A-Izalele yenda mukachi ka kalunga-lwiji hashi homu, meya yapwa ngwe yipanga sali ni sali. 30 Chocho ha tangwa lize, Yehova yalamwina A-Izalele ku moko ja A-Engitu. A-Izalele yamona A-Engitu waze afwile ku sesa lia kalunga-lwiji. 31 A-Izalele yamona nawa ndundo jinji ja Yehova jize akumbile najo A-Engitu. Chocho ayo yaputuka kuvwila Yehova woma ni kufuliela muli Yehova ni muli kavumbi kenyi Mose.

15 Ha tangwa liacho, Mose ni A-Izalele yembila Yehova mwaso uno ngwo:

“Mungwimbila Yehova mumu iye hanangama chinji.

Hambila tuvwalu ni akwa-kwendesa tuvwalu mu kalunga-lwiji.

 2 Yehova iye tachi jami ni ndundo jami, mumu iye hapwa ulamwino wami.

Yono mwe Zambi yami, mungumuhalisa, Zambi ya tata, mungumunangamisa.

 3 Yehova kali kajita wa ndundo. Yehova lie jina lienyi.

 5 Meya haafuka, o hashimbama ngwe liwe ha mashima.

 9 Mukwa-kole yamba ngwenyi: ‘Mungwakaula, mungwawana!

Mungutambula yikumba yo yeswe yize ngunazange!

Mungutomona katana kami! Kwoko liami mulianongesa!’

11 Yehova, kazambi muka walifwa ni yena?

Iya wakusolola ndundo mu usandu ngwe yena?

Yena yoze atamba kuvwila woma ni kwimbila miaso ya uhaliso, yena yoze wakulinga yikomokeso.

12 Wazundulanga kwoko lie lia chindume, chocho hashi yihaamina.

Atu eswe a mu Kanana makazeya.

16 Woma unji muukaakwata.

18 Yehova makayula ku miaka ya mutolo.

20 Mba profeta wa pwo, Miriame, ndumbu ya Arone, yanda ngoma, mapwo eswe yamukaula ni kwimba ngoma ni kuhangana. 21 Miriame kapwile ni kukumbulula malunga ni kwimba ngwenyi:

“Imbilenu Yehova, mumu halinangamisa chikolo.

Hambila kavwalu ni mukwa-kwendesa kavwalu mu kalunga-lwiji.”

22 Kulutwe, Mose yakatuka ni A-Izalele ku Kalunga-lwiji Muchila, yaya mu puya ya Shure, yenda matangwa atatu mu puya, alioze kawanyine meya. 23 Yaheta ku Mara, alioze kahashile kunwa meya jako, mumu meya jacho te asasu. Kashika Mose alukile chihela chacho jina ngwenyi, Mara. 24 Chocho atu yaputuka kulinyenyeta kuli Mose ngwo: “Yika mutunwa?” 25 Iye yaliumba kuli Yehova, mba Yehova yamulweza umwe mutondo. Muze Mose ambilile mutondo wacho mu meya, meya yapwa ayema.

Kuzekwene Zambi yaasela shimbi, yaeseka hanga amone nyi te mamwononokena nyi ka. 26 Zambi yamba ngwenyi: “Nyi yenu nwapanjika kanawa liji lia yami Yehova Zambi yenu, nwalinga yuma yipema kumeso jami, nwapanjika kanawa shimbi jami ni kujifunga, chichi kaneha hali yenu misongo yize nanehene hali A-Engitu, mumu yami Yehova, nakunuuka.”

27 Mba o yaheta ku Elime, kuze kwapwile mafuji a meya 12 ni yingaji 70. Chocho yajikako mbalaka hakamwihi ni meya.

16 Muze ayo akatukile ku Elime, chikungulwila cheswe cha A-Izalele yichiheta ku puya ya Shini, yize yatwama hakachi ka Elime ni Sinai, ha tangwa 15 lia kakweji wamuchiali, chize haze akatukile mu Engitu.

2 Chocho chikungulwila cheswe cha A-Izalele yichiputuka kulinyenyeta kuli Mose ni Arone mu puya. 3 A-Izalele yamba kuli ayo ngwo: “Kachi Yehova katushihile kwetu mu Engitu, muze te twakulia mandoho a yifwo ni kulia mbolo ngwe chize te tunazange! Alioze yenu nwatuneha mu puya yino hanga chikungulwila cheswe chifwe ni zala.”

4 Mba Yehova yamba kuli Mose ngwenyi: “Mungununokesena kulia kukatuka mwilu. Tangwa ni tangwa, mutu mweswe katamba kwanda kulia chenyi, hanga ngwase mu cheseko ngumone nyi mononokena shimbi yami nyi ka. 5 Alioze, ha tangwa liamuchisambano, akande kulia cha matangwa aali, ni kulianga kuchilulieka.”

6 Kashika, Mose ni Arone yamba kuli A-Izalele ngwo: “Musono chingoloshi, yenu mununyingika pundu ngwenu Yehova mwe wanuchijile mu chifuchi cha Engitu. 7 Hamene chimene munumona uhenya wa Yehova, mumu Yehova kevwa kulinyenyeta chenu kuli iye. Yetu aya mba nulinyenyete kuli yetu?” 8 Mose yamba nawa ngwenyi: “Chingoloshi, muze Yehova makanwaha yifwo ni kunwaha mbolo chimene ngwe chize nwakuzanga, munukanyingika ngwenu Yehova kevwa kulinyenyeta chenu. Alioze yetu aya? Yenu kunwalinyenyetene kuli yetu, alioze nwalinyenyeta kuli Yehova.”

9 Mba Mose yamba kuli Arone ngwenyi: “Lweza chikungulwila cheswe cha A-Izalele ngwe: ‘Tweyenu kumeso ja Yehova, mumu iye kevwa kulinyenyeta chenu.’” 10 Muze Arone halweza chikungulwila cha A-Izalele maliji wano, ayo yateuluka yatala ku puya, yamona uhenya wa Yehova mu lelwa.

11 Yehova yamba nawa kuli Mose ngwenyi: 12 “Hinevwa kulinyenyeta cha A-Izalele. Amba kuli ayo ngwe: ‘Chingoloshi munukalia yifwo, chimene munukalia mbolo ngwe chize nwakuzanga, pundu lume, munukanyingika ngwenu yami nguli Yehova Zambi yenu.’”

13 Chingoloshi, ngwali yeza, yazala too mu chilombo, chimene mume unji yiujingilika chilombo cheswe. 14 Muze mume womine, yikusoloka tuma tukehe-tukehe hashi mu puya ngwe chiwe. 15 Muze A-Izalele amwene tuma twacho, yamba kuli umwe ni mukwo ngwo: “Ayi yene yika?” Mumu te kayinyingikine. Mose yaalweza ngwenyi: “Che kulia achi Yehova anwaha. 16 Yehova kamba ngwenyi: ‘Mutu ni mutu ande kulia chize mahasa kulia. Mutu ni mutu ande ngomere yimuwika kulita ni unji wa atu atwama ku zuwo lienyi.’” 17 A-Izalele yalinga chocho, amwe yanda kulia chinji, akwo yanda chikehe. 18 Muze esekele kulia chacho mu ngomere, yamona ngwo mutu ni mutu kanjile kulia chakumbana. Mutu ni mutu kanjile kulita ni chize te mahasa kulia.

19 Chocho Mose yamba kuli ayo ngwenyi: “Mutu niumwe katambile kutulika kulia ndo hamene.” 20 Alioze ayo kapanjikile Mose. Muze amwe a kuli ayo atulikile kulia chacho ndo ha tangwa likwo, kulia yichipwa ni mavuno, yichinuka vumba lipi. Chocho Mose yaevwila uli. 21 Ha chimene cheswe, mutu mweswe kapwile ni kwanda kulia chize te mahasa kulia, muze mwalwa wapwile ni kutwa, kulia chacho te chakusangunuka.

22 Ha tangwa liamuchisambano, ayo yanda kulia cha matangwa aali, mutu ni mutu ngomere jaali. Mba miata eswe a chikungulwila yaya ni kulweza Mose chikuma chacho. 23 Kashika, iye yamba kuli ayo ngwenyi: “Yehova kanambe ngwenyi, tangwa lia hamene mulikapwa tangwa lia kuhwima, mumu mulikapwa sambata yisandu kuli Yehova. Ochenu yize munufupa, telekenu yize munufupa, alioze yize muyisalaho nuyitulike ndo hamene.” 24 Chocho, o yatulika kulia ndo tangwa likwo ngwe chize Mose aalwezele, kulia chize atulikile kuchanukine, chipwe kutuhuka mavuno. 25 Mba Mose yamba ngwenyi: “Chilienu musono, mumu musono sambata ya Yehova. Musono kunuchi kuwana kulia hashi. 26 Yenu munupwa ni kwanda kulia ha matangwa asambano, alioze ha tangwa liamuchishimbiali, lia Sambata, kuchichi kupwako.” 27 Chipwe chocho, ha tangwa liamuchishimbiali, amwe a kuli A-Izalele yaya hanga ande kulia, alioze kawanyine nichimwe.

28 Mba Yehova yamba kuli Mose ngwenyi: “Ndo tangwa lika munulituna kukaula yuma yize nakunulweza ni shimbi jami? 29 Kanda nuvulama ngwenu Yehova kanuhele Sambata. Kashika ha tangwa liamuchisambano iye akunwaha kulia cha matangwa aali. Ha tangwa liamuchishimbiali mutu ni mutu atwame ha chihela chenyi, kanda akatuka ni kuya kweka.” 30 Chocho A-Izalele yafunga Sambata ha tangwa liamuchishimbiali.

31 A-Izalele yavuluka kulia chacho ngwo, “manaa.”* Manaa kapwile atoma ngwe mbuto ya koentru, kuyema cho chapwile ngwe mbolo ja kuchinga ni uchi. 32 Mose yamba ngwenyi: “Yehova kanambe ngwenyi: ‘Andenu ngomere yimuwika ya manaa nuyitulike ndo ku yisemuko yenu yeswe, hanga ayo akamone kulia chize nanuhele mu puya muze nanuchijile mu chifuchi cha Engitu.’” 33 Chocho Mose yamba kuli Arone ngwenyi: “Anda mulondo usemo ngomere yimuwika ya manaa, uyise kumeso ja Yehova hanga ayitulike ndo ku yisemuko yeswe.” 34 Arone yasa mulondo wacho kulutwe lia Mushete wa Uchela hanga aufunge, ngwe chize Yehova alwezele Mose. 35 A-Izalele yalia manaa ha miaka 40 ndo muze ahetele mu chifuchi muze mwapwile atu. Yalia manaa ndo muze ahetele mu njiza ya chifuchi cha Kanana. 36 Chikashi chimuwika cha Efa* chapwile ni kunjila ngomere kumi.

17 Chikungulwila cheswe cha A-Izalele yichikatuka mu puya ya Shini ni kulinga wenyi hakehe-hakehe, kulita ni chize Yehova aalwezele, yatunga chilombo cho ku Refwindimi. Alioze ku chihela chacho kwakapwile meya a kunwa.

2 Chocho A-Izalele yaputuka kuzwelesa Mose ngwo: “Twehe meya hanga tunwe.” Alioze Mose yamba kuli ayo ngwenyi: “Mumu liaka nunanguzwelesa? Mumu liaka nunanungu ni kusa Yehova mu cheseko?” 3 A-Izalele te kanevu pwila yinji, meya te anafupu. Ayo te kanalinyenyeta kuli Mose ngwo: “Mumu liaka unakatuchiza mu Engitu hanga utushihe ni pwila, yetu, ana jetu ni yimuna yetu?” 4 Mba Mose yaliumba kuli Yehova ngwenyi: “Yika natamba kulinga ni atu wano? Kwasala hakehe mangwasa mawe!”

5 Yehova yamba kuli Mose ngwenyi: “Palika kulutwe lia A-Izalele, yako ni amwe a kuli makulwana ja A-Izalele, mbata nawa mulumbu uze walambile ha Lwiji Nilu, yako. 6 Tala! Yami mungumana kumeso je ku liwe lize lili ku Horepe, lamba ku liwe, mba mukutuhuka meya, atu anwe.” Mose yachilinga kulutwe lia makulwana ja A-Izalele. 7 Mba iye yaluka chihela chacho jina ngwenyi Masa* ni Meripa,* mumu lia kumuzwelesa kuli A-Izalele ni mumu lia ayo kusa Yehova mu cheseko ni kwamba ngwo: “Shina Yehova kali mukachi ketu nyi ka?”

8 A-Amaleke yeza ni kwasa jita ni A-Izalele ku Refwindimi. 9 Hamukunda wa chino, Mose yamba kuli Yoshua ngwenyi: “Sakula amwe malunga hanga nuye ni kwasa jita ni A-Amaleke. Hamene yami mungukamana helu lia mulundu ni mulumbu wa Zambi wamwenemwene ku kwoko.” 10 Chocho Yoshua yasa jita ni A-Amaleke ngwe chize Mose amulwezele. Mose, Arone ni Hure yakanduka helu lia mulundu.

11 Muze Mose apwile ni kuzundula moko jenyi, A-Izalele te kakukumba, alioze muze apwile ni kwapalumwisa, A-Amaleke e te akukumba. 12 Muze moko ja Mose alemene, Arone ni Hure yanda liwe yamusela ngwe chitwamo, chocho Mose yatwamaho, mba ayo yakwata moko jenyi, umwe sali limwe, mukwo sali likwo. Chocho moko jenyi yajikiza ndo ha kunjila cha tangwa. 13 Chocho Yoshua yakumba A-Amaleke ni katana.

14 Mba Yehova yamba kuli Mose ngwenyi: “Soneka chikuma chino mu mukanda hanga akachiwuluke. Lweza nawa Yoshua ngwe: ‘Mungukanongesa A-Amaleke hanga jina lio litoke hashi.’” 15 Chocho Mose yatunga chilumbilo, yachiluka jina ngwenyi, Yehova-Nisi,* 16 ni kwamba ngwenyi: “Amu kwoko lienyi liakulimika ni ngunja ya Yehova, Yehova makasa jita ni A-Amaleke ndo ku yisemuko yenyi yeswe.”

18 Yetoru, sasendote wa Mindiane, tato-weno ya Mose, yevwa yuma yeswe yize Zambi alingilile Mose ni atu jenyi A-Izalele, ni chize Yehova atuhwishile A-Izalele mu Engitu. 2 Tangwa limwe, Mose kahilwishile mukwo-pwo Zepora ku zuwo lia tato-weno Yetoru, chocho Yetoru yatambula Zepora 3 hamwe ni ana jenyi aali a malunga. Umwe jina lienyi te Ngeshome,* mumu Mose yamba ngwenyi: “Napwa chilambala mu chifuchi cha yilambala.” 4 Mukwo jina lienyi te Elieza,* mumu iye yamba ngwenyi: “Zambi ya tata mwe chikwashi chami yoze wangulamwinyine ku moko ja Falau.”

5 Chocho, Yetoru tato-weno ya Mose yaya hamwe ni ana ni pwo lia Mose ni kulitakana nenyi mu puya, kuze iye apwile mu chilombo, hakamwihi ni mulundu wa Zambi wamwenemwene. 6 Mba iye yatumina Mose maliji wano ngwenyi: “Yami tatenu-weno Yetoru, nguneza ngulitakane ni yena, nguneza hamwe ni mukwenu-pwo ni ana je aali.” 7 Hazehene Mose yatuhuka, yaya ni kulitakana ni tato-weno, yafulamana, yamwaha mbeju. Mutu ni mutu yahula chize mukwo te ali, mba yanjila mu mbalaka.

8 Mose yalweza tato-weno yuma yeswe yize Yehova alingile kuli Falau ni kuli A-Engitu mumu lia A-Izalele, ni lamba lieswe lize amwene mu jila ni chize Yehova anakaapulwila. 9 Yetoru yawahilila ha yuma yeswe yipema yize Yehova anakalingila A-Izalele ha kwatusula mu Engitu. 10 Mba Yetoru yamba ngwenyi: “Yehova afumane, yoze wanutusula ku moko ja A-Engitu ni ja Falau, ni kutusula A-Izalele mu wanangana wa A-Engitu. 11 Haliapwila hinanyingika ngwami, Yehova kali munene kuhiana tuzambi akwo eswe, mumu lia yize alinga hali A-Engitu waze te akumwesa atu jenyi lamba ni kulinangamisa.” 12 Chocho, Yetoru tato-weno ya Mose, yaneha mulambu wa kulumba ni yitapo kuli Zambi, mba Arone hamwe ni makulwana eswe a mu Izalele, yaya ni kulia hamuwika ni tato-weno ya Mose, kumeso ja Zambi wamwenemwene.

13 Mukwachako, Mose yatwama hanga asopese A-Izalele ngwe chize te akulinga, atu yatwama kumeso ja Mose chize chimene ndo chingoloshi. 14 Muze Yetoru amwene yuma yeswe yize Mose apwile ni kulingila A-Izalele, yamba ngwenyi: “Mumu liaka unalingi chize? Mumu liaka unasopesa A-Izalele eswe ukawe shimbu ayo anamana kumeso je chize chimene ndo chingoloshi?” 15 Mose yamba kuli tato-weno ngwenyi: “Mumu A-Izalele kakwiza kuli yami hanga ngwahulile kuli Zambi. 16 Muze kwakupwa mulonga hakachi ka atu aali, kakungulwezawo hanga ngwasopese ni kwalweza yize Zambi wamwenemwene amba ni shimbi jenyi.”

17 Yetoru yamba kuli Mose ngwenyi: “Yize unalingi kuyapemene. 18 Pundu lume, yena ni atu wano munuhonga, mumu mulimo uno uli ukalu chinji, watambile kuulinga ukawe. 19 Haliapwila ngupanjike. Mungukwaha mana, Zambi mapwa hamwe ni yena. Yena pwako hako wa atu kumeso ja Zambi wamwenemwene ni kulweza Zambi wamwenemwene milonga yo. 20 Walongese shimbi ni kwalweza jila yize atamba kwendela ni mulimo uze atamba kulinga. 21 Sakula nawa malunga ajama hakachi ka atu, waze akuvwila Zambi woma, waze mahasa kujikijila, waze keshi kuzanga kuzuka mbongo mu jila yipi, wapwise miata a kanunu ka atu, miata a lukama, miata a makumi atano ni miata a kumi. 22 Muze mukupwa mulonga,* ayo masopesa atu, mulonga uze uli ukalu mautwala kuli yena, alioze milonga yashi ayo mahasa kuyisopa. Lianyine no chiteli che, hanga chiteli che chilele. 23 Nyi wachilinga, chikwo nawa nyi Zambi machitayiza, mulinga mulimo we kanawa, mutu mweswe mafuna ku zuwo lienyi ni uwahililo.”

24 Hazehene Mose yapanjika yize tato-weno amulwezele, yeswe amulwezele yayilinga. 25 Mose yasakula malunga ajama hakachi ka A-Izalele eswe, yaatongola hanga apwe miata a kanunu ka atu, miata a lukama, miata a makumi atano ni miata a kumi. 26 Muze te kwakupwa mulonga, ayo e apwile ni kuusopa. Milonga yeswe yikalu te kakuyitwala kuli Mose, alioze milonga yeswe yashi ayo e apwile ni kuyisopa. 27 Mba Mose yalishika ni tato-weno, tato-weno yahiluka mu chifuchi chenyi.

19 Ha kakweji wamuchitatu, muze A-Izalele atuhukile mu chifuchi cha Engitu, tangwa lioliene, lie ahetele mu puya ya Sinai. 2 Yakatuka mu Refwindimi, yaheta mu puya ya Sinai, yasa chilombo mu puya. A-Izalele yasa chilombo kulutwe lia mulundu.

3 Chocho Mose yakanduka, akaliwane ni Zambi wamwenemwene ku mulundu; Yehova yamusanyika kukatuka ku mulundu, yamba kuli iye ngwenyi: “Yino ye watamba kulweza akwa-zuwo lia Yakomba, ana ja Izalele ngwo: 4 ‘Yenu ene nwamona ni meso jenu chize nalinga kuli A-Engitu, chize nanuzundwile helu lia mapulwa a pupa ni kununeha kuli yami. 5 Haliapwila, nyi munwononokena liji liami ni mbunge yenu yeswe, ni kufunga usendo wami, pundu lume, munukapwa atu jami alipwila* hakachi ka atu eswe, mumu mavu eswe kali a yami. 6 Munupwa kuli yami wanangana wa asasendote ni munyachi usandu.’ Wano e maliji watamba kulweza A-Izalele.”

7 Mba Mose yasanyika makulwana ja A-Izalele yaalweza maliji eswe waze Yehova amulwezele. 8 Chocho, A-Izalele eswe yakumbulula hamuwika ngwo: “Mutulinga yeswe yize Yehova amba.” Hazehene Mose yatwala kumbululo lio kuli Yehova. 9 Yehova yamba kuli Mose ngwenyi: “Tala, mungwiza kuli yena mu lelwa lilaa, hanga A-Izalele evwe muze munguhanjika ni yena, chikwo nawa, anunge ni kufuliela muli yena.” Chocho Mose yalweza Yehova maliji waze atu akumbulwile.

10 Yehova yamba kuli Mose ngwenyi: “Yako kuli A-Izalele, wasele ku usandu musono ni hamene, ayo katamba kukosa mazalo jo. 11 Katamba kulilulieka mumu lia tangwa liamuchitatu, mumu ha tangwa liamuchitatu, Yehova makapalumuka ha Mulundu wa Sinai kumeso ja A-Izalele eswe. 12 Ukasele atu njiza yize muyijingilika mulundu, haze ayo atamba kusulila, ni kwalweza ngwe: ‘Kanyamenu, kanda nunyina ha mulundu, chipwe kukwata ku sesa liawo. Mutu mweswe makwata ku mulundu, pundu lume, mamushiha. 13 Mutu niumwe kanda akwata mutu wacho, alioze amwase mawe hanji mivu. Apwe kashitu, hanji mutu, amushihe.’ Alioze, muze chitavwi cha lumbinga wa panga muchimba, ayo mahasa kukundama ku mulundu.”

14 Mba Mose yakatuka ku mulundu, yaya kuze A-Izalele apwile, yaputuka kwasela ku usandu, ayo yakosa mazalo jo. 15 Iye yamba kuli A-Izalele ngwenyi: “Liluliekenu mumu lia tangwa liamuchitatu. Kanda nulimona* ni mapwo jenu.”

16 Mukwachako, ha tangwa liamuchitatu, yikupwa kukulunguza ni mihenyo, lelwa lilaa pwi yilifuka mulundu, ni chitavwi yichimba chikolo. Atu eswe mu chilombo yaputuka kuchikima. 17 Mose yatwala A-Izalele haze lia chilombo hanga aliwane ni Zambi wamwenemwene, ayo yamana ku sesa lia mulundu. 18 Mulundu weswe wa Sinai wapwile ni kukakumuka mwishi; mumu Yehova kejileho mukachi ka kahia, mwishi wacho wapwile ni kukanduka ngwe unakatuka mu lutengo wa kahia, mulundu weswe te unachikima chinji. 19 Muze chitavwi chembile chinji kuhiana, Mose yahanjika, mba Zambi wamwenemwene yamukumbulula.

20 Chocho Yehova yeza ha Mulundu wa Sinai, helu lia mulundu. Yehova yasanyika Mose helu lia mulundu, mba Mose yakanduka. 21 Yehova yalweza Mose ngwenyi: “Palumuka, toweza A-Izalele kanda atangunuka njiza hanga amone Yehova; nyi ka, anji a kuli ayo mafwa. 22 Chikwo nawa, asasendote waze akukundama kuli Yehova mashimbu eswe, alisele ku usandu, hanga Yehova achine kwashiha.” 23 Mose yamba kuli Yehova ngwenyi: “A-Izalele katambile kukanduka ku Mulundu wa Sinai, mumu hiwatutoweza ha kwamba ngwe: ‘Sako njiza yize muyijingilika mulundu ni kuyipwisa yisandu.’” 24 Alioze, Yehova yamba kuli iye ngwenyi: “Yako, palumuka, mba ukanduke nawa hamuwika ni Arone, alioze, kanda wecha asasendote ni A-Izalele ahiane njiza, hanga akanduke aliwane ni Yehova, hanga iye achine kwashiha.” 25 Chocho Mose yapalumuka ndo kuze A-Izalele apwile, yaalweza maliji jacho.

20 Mba Zambi yamba maliji wano eswe ngwenyi:

2 “Yami nguli Yehova Zambi ye, yoze wakuchijile mu chifuchi cha Engitu, chifuchi cha undungo.* 3 Kanda upwa ni tuzambi tweka, shina wika yami.

4 “Kanda ulisongela niumwe kaponya walifwa ni chimwe chuma mwilu, hanji hashi, chipwe mu meya. 5 Kanda ufulamana kuli ayo chipwe kwalingila,* mumu yami Yehova Zambi yenu, nguli Zambi yoze wakuzanga hanga atu anguwayile wika yami, nakuneha lamba ha uhenge wa yisemi hali ana, ha chisemuko chamuchitatu ni ha chisemuko chamuchiwana cha waze eswe akunguvwila kole, 6 alioze nakusolola utu wa zango kuli tununu twa yisemuko ya waze akunguzanga ni kufunga shimbi jami.

7 “Kanda utongola jina lia Yehova Zambi ye mokomoko, mumu Yehova mamwesa lamba mutu yoze matongola jina lienyi mokomoko.

8 “Iwulukenu ngwenu tangwa lia Sambata lili lisandu. 9 Linga milimo ye yeswe ha matangwa asambano, 10 alioze tangwa liamuchishimbiali, lili sambata ya Yehova Zambi ye. Kanda ukalinga niumwe mulimo, chipwe yena, chipwe mwane wa lunga, chipwe mwane wa pwo, chipwe ngamba ye wa lunga, chipwe ngamba ye wa pwo, chipwe chimuna che, chipwe chilambala yoze uli mu mambonge je. 11 Mumu Yehova katangile malilu ni hashi ni kalunga-lwiji ni yuma yeswe yize yatwamamo ha matangwa asambano, mba yahwima ha tangwa liamuchishimbiali. Kashika Yehova awahishile tangwa lia Sambata ni kulipwisa lisandu.

12 “Vumbika tatenu ni noko hanga utwame matangwa anji mu chifuchi chize Yehova Zambi ye makwaha.

13 “Kanda ushiha mutu.

14 “Kanda ulinga upangala.*

15 “Kanda wiya.

16 “Muze unahana uchela hakutwala kuli mwenyembo we, kanda uhanjika mahuza.

17 “Kanda uvwila chipululu zuwo lia mwenyembo we, kanda uvwila chipululu pwo lia mwenyembo we, chipwe ngamba yenyi wa lunga, chipwe ngamba yenyi wa pwo, chipwe ngombe wenyi, chipwe chimbulu chenyi, chipwe chuma chikwo chize alinacho mwenyembo we.”

18 A-Izalele eswe yevwa kukulunguza ni kwimba cha chitavwi, yamona mihenyo ni mwishi uze te unakakumuka ku mulundu, chocho yaputuka kuchikima ni woma, yamanyina kusuku. 19 Kashika, ayo yamba kuli Mose ngwo: “Hanjika ni yetu, mutupanjika, alioze Zambi kanda ahanjika ni yetu, hanga tuchine kufwa.” 20 Chocho Mose yamba kuli A-Izalele ngwenyi: “Kanda nwivwa woma, mumu Zambi wamwenemwene keza ni kunweseka hanga nununge ni kumuvwila woma, nuchine kuvulumuna.” 21 A-Izalele yanunga ni kumanyina kusuku, alioze Mose yakundama ku lelwa lilaa, kuze Zambi wamwenemwene te ali.

22 Mba Yehova yamba kuli Mose ngwenyi: “Yino ye watamba kulweza A-Izalele ngwe: ‘Yenu ene nwalimwena chize nahanjika ni yenu kukatuka mu malilu. 23 Kanda nulinga tuzambi twa prata hanga nwawayile shina wika yami, chipwe kulilingila tuzambi twa oru. 24 Ngulingile chilumbilo cha mavu, henaho mukahanyina milambu ye ya kulumba ni milambu ye ya sambukila, mapanga ni ngombe je. Kweswako mungukakulweza hanga unguwayile, mungukeza ni kukuwahisa. 25 Nyi munungutungila chilumbilo cha mawe, kanda nuchitunga ni mawe a kupatula ni yikungo, mumu nyi nwachitunga ni mawe a kupatula ni chikungo, munuchipihisa. 26 Kanda unyinyina ha ndalo ha chilumbilo chami, hanga uselesele we uchine kusoloka.’

21 “Lweza A-Izalele shimbi jino ngwe:

2 “Nyi mulanda ngamba Ka-Hepreu, iye makukalakalila miaka yisambano, alioze ha mwaka wamuchishimbiali umutusule chakuhona kukufweta nichimwe. 3 Nyi kejile ukawenyi, maya ukawenyi. Nyi kejile ni mukwo-pwo, maya ni mukwo-pwo. 4 Nyi mwene wenyi mamwaha pwo, mba pwo wacho mamusemena ana a malunga hanji a mapwo, pwo ni ana, mapwa a mwene wenyi, iye maya ukawenyi. 5 Alioze nyi ngamba mamba ngwenyi: ‘Nakuzanga mwene wami, pwo liami ni ana jami, chazangile angutusule,’ 6 mwene wenyi amutwale kumeso ja Zambi wamwenemwene, mba maya nenyi ku chikolo hanji ku nguji lia chikolo, mwene wenyi amutuwe twitwi ni katwala,* apwe ndungo yenyi ku mwono wenyi weswe.

7 “Nyi umwe lunga malanjisa mwanenyi wa pwo ngwe ngamba, mwana wacho kechi kamutusula ngwe chize akutusula ngamba wa lunga. 8 Nyi mwene wenyi kawahilile nenyi, chikwo nawa kazangile hanga apwe pwo lienyi mukwo, alioze kanazange kumulanjisa kuli mutu mukwo, kanda amulanjisa kuli chilambala, mumu kulinga chino chili chipi. 9 Nyi mamuhangisa kuli mwanenyi wa lunga, akamulingile yuma yeswe yize te malingila mwanenyi wa pwo. 10 Nyi mwanenyi wa lunga mambata pwo mukwo, katambile kutepulula yuma yize akuhana kuli pwo mutangu, ngwe kulia, mazalo ni kulisumbakenya.* 11 Nyi lunga kamuhele yuma yino yitatu, pwo wacho akatusuke chawana.

12 “Nyi mutu malamba mukwo, mba mukwo mafwa, neye katamba kumushiha. 13 Alioze, nyi kachilingile ku tachi, chikwo nawa Zambi wamwenemwene mecha hanga chilingiwe, mungukulweza chihela kuze mutu wacho atamba kuchinyina. 14 Nyi umwe mutu mevwila mukwo uli unji ni kumushiha ku tachi, neye katamba kumushiha, chipwe ngwe machinyina ku chilumbilo chami. 15 Mutu mweswawo malamba tato hanji naye, katamba kumushiha.

16 “Nyi mutu meya mutu ni mukwo ni kumulanjisa, chipwe mamuwana nenyi, katamba kumushiha.

17 “Yoze mashinga tato hanji naye, amushihe.

18 “Nyi atu aali mazwela, mba umwe masa mukwo liwe hanji kumwaha kome, kafwile, alioze mapwa ha muhela, lingenu chino: 19 Nyi kutala ngwe kanahase kukatuka ni kwendela ku pango, kanda alinga upi kuli mutu yoze wamulambanga. Alioze amufwete ha matangwa waze kahashile kukalakala ndo haze mahindukila.

20 “Nyi umwe malamba mutondo ngamba yenyi wa lunga hanji wa pwo ni kumushiha, mwene wenyi katamba kumumwesa lamba. 21 Alioze nyi matwama ni mwono tangwa limuwika hanji matangwa aali, kanda amwesa mwene wenyi lamba, mumu kamulanjile ni mbongo jenyi.

22 “Nyi malunga malilamba, mba manunguna pwo kafumba, chocho pwo masema muze shimbu lienyi lia kusema kanda lichiheta, alioze niumwe kafwile, yoze wanungunanga pwo mafweta yeswe yize mukwo-lunga mamwita kupalikila muli ngaji. 23 Alioze nyi umwe mafwa, akafwete mwono ni mwono, 24 liso ni liso, lizo ni lizo, kwoko ni kwoko, kulu ni kulu, 25 kwocha ni kwocha, chilonda ni chilonda, kulikita ni kulikita.

26 “Nyi mutu malamba ngamba yenyi wa lunga hanji wa pwo chuma ku liso, chocho liso mulifwa, katamba kumutusula ngwe fweto mumu lia liso lienyi. 27 Nyi mapukula lizo lia ngamba yenyi wa lunga hanji wa pwo, katamba kumutusula ngwe fweto mumu lia lizo lienyi.

28 “Nyi ngombe mapupa ni mbinga lunga hanji pwo, chocho mutu wacho mafwa, ngombe wacho katamba kumwasa mawe ndo haze mafwila, yifwo yenyi kanda ayilia, mwenya-ngombe kanda amusuma mulonga. 29 Alioze nyi ngombe te kakupupa atu ni mbinga, mba matoweza mwenya-ngombe, chipwe chocho iye kamukashile, mba ngombe wacho mashiha lunga hanji pwo, katamba kumwasa mawe ndo haze mafwila, ni mwenya-ngombe katamba kumushiha. 30 Nyi mamwita chimwe hanga akuule mwono* wenyi, katamba kufweta cheswacho mamwita. 31 Nyi ngombe mapupa ni mbinga mwana wa lunga hanji wa pwo, chatamba kukaula shimbi yino-yene. 32 Nyi ngombe mapupa ni mbinga ngamba wa lunga hanji wa pwo, mwenya-ngombe afwete shekele* 30 kuli mwenya-ngamba, ngombe amwase mawe ndo haze mafwila.

33 “Nyi umwe mutu mafukula wina hanji mafula wina kaufukile, mba ngombe hanji chimbulu maholokelamo, 34 mwenya-wina katamba kufweta. Katamba kufweta mbongo kuli mwenya-chimuna, chimuna yoze wafwa mapwa wa mwenya-wina. 35 Nyi ngombe wa umwe mutu malemeka ngombe wa mukwo ni kumushiha, ayo katamba kulanjisa ngombe wa mwono, alitetele mbongo, chikwo nawa, alianyine kashitu yoze wafwa. 36 Nyi mwenya-ngombe te kanyingika ngwenyi ngombe wenyi kakwete chako cha kupupa, alioze kamukashile, iye mafweta ngombe ni ngombe, kashitu yoze wafwa mapwa ni wenyi.

22 “Nyi umwe mutu meya ngombe hanji panga, mamushiha hanji kumulanjisa, akafwete ngombe atano ha ngombe umuwika, mapanga awana ha panga umuwika.

2 (“Nyi makwata mwiji kanapupu zuwo, mamulemeka hanji kumushiha, yoze wamushiha kanda amusuma mulonga wa manyinga. 3 Alioze, nyi chino muchilingiwa chimene, mutu yoze wamushihanga mapwa ni mulonga wa manyinga.)

“Mwiji makafweta. Nyi keshi ni chize mafweta, akamulanjise hanga afwete yuma yize eya. 4 Nyi mawana ni mwono chimuna yoze eyanga chipwe ngombe, chipwe chimbulu, chipwe panga, akafwete kaali.

5 “Nyi umwe mutu maya ni kulisa yimuna mu munda, hanji mu munda wa vinyu, mba mecha yimuna hanga yilile mu munda wambala, katamba kufweta yuma yipema ya mu munda wenyi hanji ya mu munda wenyi wa vinyu.

6 “Nyi umwe mutu mawika kahia, mba mukasambuluka ku yiputa ni kwocha yichita ya mbuto yize te hacha kulu, hanji mbuto yize yichili mu munda, chipwe we munda weswe, mutu yoze wawikanga kahia kacho afwete yuma yize yawema.

7 “Nyi umwe mutu mahana mbongo hanji chuma cheswacho kuli mwenyembo wenyi hanga amufungilecho, mba yuma yacho mayiyila mu zuwo lienyi, nyi makwata mwe mwiji, afwete yuma yeswe kaali. 8 Alioze, nyi mwiji kasolokele, mwenya-zuwo katamba kumutwala kumeso ja Zambi wamwenemwene, hanga amone nyi iye mwe weya yuma ya mwenyembo wenyi nyi ka. 9 Nyi umwe mutu malamikiza mukwo ngwenyi kasweka chuma chize hi nichenyi ko, ngwe ngombe, chimbulu, panga, mazalo hanji chuma cheswacho, ayo katamba kuya kumeso ja Zambi wamwenemwene hanga asolole mwenya-chuma, Zambi masolola mutu yoze uli ni mulonga, mba mutu wacho mafweta kaali kuli mwenyembo wenyi.

10 “Nyi umwe mutu mahana chimbulu, ngombe, panga, hanji chimuna mweswawo kuli mukwo hanga amufungileye, mba chimuna wacho mafwa, mapwa chilema, hanji mamwiya niumwe kachimwene, 11 yoze ahele chimuna alishinge kumeso ja Yehova ngwenyi hi iye ko wamwiyanga. Mwenya-chimuna atayize chikuma chino. Chocho yoze ahele chimuna kanda afweta. 12 Alioze, nyi chimuna mamwiyila ku moko ja yoze te unamufungu, iye katamba kufweta mwenyaye. 13 Nyi chimuna mamulia kuli kashitu wa mu yambu, iye katamba kutwala chimuna yoze alia hanga akamusolole kuli mwenyaye, katambile kufweta chimuna yoze alia kuli kashitu wa mu yambu.

14 “Alioze, nyi umwe mutu matambula chimuna wa mukwo, mba chimuna wacho mapwa chilema hanji kufwa muze mwenyaye keshiho, mutu yoze watambulanga chimuna katamba kufweta. 15 Nyi mwenya-chimuna te hwali, katambile kumufweta. Alioze, nyi chimuna wacho kamulukalile, falanga ja lukeza jatamba kupwa fweto.

16 “Nyi umwe lunga mazanga umwe mwana-pwo wa virgem yoze kanda achimutenda, mba malimona nenyi, lunga wacho katamba kuhana yihako hanga apwe pwo lienyi. 17 Alioze, nyi tato ya mwana-pwo malituna kumwahaye, lunga katamba kufweta ndando yize yinalite ni yihako.

18 “Nganga katamba kumushiha.

19 “Mutu mweswawo malisumbakenya* ni kashitu, katamba kumushiha.

20 “Mweswawo malambula yitapo kuli kazambi mukwo, sapu ayilambule wika kuli Yehova, katamba kumushiha.

21 “Kanda numwesa lamba chipwe kuhungumiona chilambala, mumu ni yenu nwapwile yilambala mu chifuchi cha Engitu.

22 “Kanda numwesa lamba tuliwa niumwe, chipwe mwana-shiwa.* 23 Nyi munwamwesa lamba, mba ayo mateta kuli yami, pundu lume, yami mungwivwa muteto wo; 24 mungwivwa kupiha chinji, mungunushiha ni katana, mapwo jenu masala tuliwa, ana jenu masala shiwa.

25 “Nyi muhana kongo lia mbongo kuli umwe chiswale wa kuli atu jami, mutu yoze watwama mukachi kenu, kanda umufwetesa mbwezo.

26 “Nyi mutambula uzalo wa mwenyembo we ngwe chijikilo ha kongo lize akutambwile, watamba kumuhilwisawo shimbu tangwa kanda litoka, 27 mumu chizechene wika alinacho, akulifuka. Halihi iye mapomba? Muze mateta kuli yami mungumwivwa, mumu yami nguli mukwa-keke.

28 “Kanda utuka Zambi, chipwe kushinga mukwa-kuyula atu je.

29 “Kanda ukalaluka kulambula ya kulumbama cha mbuto ye, ni ya ku ukamino we wa maji ni vinyu. Ukangwehe tupula-majimo je a malunga. 30 Yino ye watamba kulinga nawa ni ngombe we ni panga: Mwana katamba kutwama ni naye ha matangwa shimbiali. Ha tangwa liamuchinake, watamba kungwahaye.

31 “Yenu nwatamba kupwa atu asandu kumeso jami, kanda nulia yifwo ya kashitu yoze ashiha kuli kashitu wa mu yambu. Nwatamba kuyihana kuli tuwa.

23 “Kanda umwanga sango ja mahuza. Kanda ukwasa mutu mupi ha kuhana uchela wa mahuza hanga alinge upi hali mukwo. 2 Kanda ukaula mbunga hanga ulinge yuma yipi. Muze muhana uchela, kanda uhengesa ululi hanga ukwase mbunga. 3 Kanda ukasopa mulonga wa chiswale ni katonde.

4 “Nyi muwana ngombe hanji chimbulu wa mukwa-kole ye katoka, watamba kumuhilwisa kuli mwene. 5 Nyi mumona chimbulu wa mutu yoze wakukuvwila kole kalimbuka ni yilemu, kanda uhiana chakuhona kumukwasa. Mukwase kumushatununa yilemu.

6 “Kanda uhengesa ululi ha kusopa mulonga wa chiswale yoze watwama mukachi kenu.

7 “Kanda ulinjisa mu yuma ya mahuza chipwe kushiha mutu yoze keshi chitela hanji mukwa-ululi, mumu chichi kasambisa yoze malinga yuma yipi.

8 “Kanda utayiza fweto hanga ukwase mutu ha usopeso, mumu fweto yakupupuchisa akwa-mana, chikwo nawa, muyihasa kuhengesa maliji ja akwa-ululi.

9 “Kanda numwesa lamba chilambala. Yenu nunanyingika chize mwono wa chilambala wapwa, mumu nwapwile yilambala mu chifuchi cha Engitu.

10 “Nukalime minda yenu ni kucha mbuto yamo ha miaka yisambano. 11 Alioze ha mwaka wamuchishimbiali kunwatambile kulima, nwatamba kuhwimisa mavu. Chocho, yiswale a kuli atu jenu makalia yize muyikema ha mavu jacho, mba yize muyikasala makayilia kuli tushitu a mu yambu. Chino che nwatamba kulinga ni munda wenu wa vinyu ni wa olevwe.

12 “Yenu nwatamba kulinga milimo yenu ha matangwa asambano, alioze ha tangwa liamuchishimbiali kunwatambile kulinga mulimo niumwe, hanga ngombe jenu ni yimbulu ahwime, ni mwana wa ngamba ye wa pwo ni chilambala no ahwime.

13 “Nukafunge yuma yeswe yize hinamba kuli yenu. Kanda nukavuluka majina ja tuzambi eka, chipwe kwivwa majina jo mu makanwa jenu.

14 “Ha mwaka ni mwaka, nwatamba kungulingila yiwanyino yitatu. 15 Nukalinge Chiwanyino cha Mbolo Kuyishi Futunwiso. Nwatamba kulia mbolo kuyishi futunwiso ha matangwa shimbiali ha shimbu lialita ha kakweji wa Ambimbi ngwe chize nanuhele shimbi, mumu yono mwe kakweji nwakatukile mu chifuchi cha Engitu. Niumwe katambile kwiza mokomoko kumeso jami. 16 Nukalinge Chiwanyino cha Kucha Mbuto,* mbuto yitangu ya kuhondangana chenu, ya yize nwakulima mu minda. Nukalinge nawa Chiwanyino cha Kukunga Mbuto* ku songo lia mwaka, muze munukakunga mu minda mihuko ya kuhondangana chenu. 17 Malunga eswe akasoloke kumeso ja Yehova, Mwene wamwenemwene katatu ha mwaka.

18 “Kanda nukalambula manyinga a chitapo chami hamuwika ni chuma chize chili ni futunwiso. Ni yitapo ya maji a yimuna waze nwakuhana ha yiwanyino yami, kunwatambile kuyifunga ufuku weswe ndo mukucha.

19 “Nwatamba kutwala ku zuwo lia Yehova Zambi yenu mbuto yitangu yipema yize hiyahia ya mu minda yenu.

“Kanda nukateleka mwana-pembe mu yamwa ya naye.

20 “Mungutuma mungelo kulutwe lienu hanga anufunge mu jila ni kunutwala ku chihela chize hingunanululiekela. 21 Mupanjikenu ni kwononokena liji lienyi. Kanda nulimika nenyi mumu kechi kanukonekena milonga yenu, mumu jina liami lili muli iye. 22 Alioze, nyi munununga ni kwononokena liji lienyi ni kulinga yeswe yize mungunulweza, munguvwila kole akwa-kole jenu ni kulimika ni waze malimika ni yenu. 23 Mumu mungelo wami makaya kulutwe lienu ni kunutwala kuli A-Amore, A-Hete, A-Perize, A-Kanana, A-Hevwe ni A-Yepushe, yami mungukaanongesa. 24 Kanda nukafulamana kumeso ja tuzambi a mavungu wano chipwe kwalingila. Kanda nukembulula yitanga yo, alioze nukanongese tuzambi two ni kupuzula yilumbilo yo yisandu. 25 Nukawayile Yehova Zambi yenu, mba iye makanuwahisa ha kunwaha kulia ni meya. Mungukachiza misongo mukachi kenu. 26 Mu chifuchi chenu niumwe pwo kechi kaselumuna mwana chipwe kupwa mumba, mungukokesa miaka ya mwono wenu.

27 “Shimbu kanda nuchihetako, atu eswe makevwa hakutwala kuli yami, makachikima. Mungukalumbanganyisa atu eswe waze munukawana, mungukanukwasa nukumbe akwa-kole jenu eswe, ayo makanuchina mumu lia yami. 28 Mungukakekemesa moko ni molu jo shimbu yenu kanda nuchihetako. Mungukahuma A-Hevwe, A-Kanana ni A-Hete kumeso jenu. 29 Chichi kaahuma eswe ha mwaka umuwika, chifuchi chichine kusala chahululu hanga tushitu a mu yambu achine kuliokesa ni kulimika ni yenu. 30 Mungukaahuma kumeso jenu hakehe-hakehe ndo muze yenu munukapwa anji ni kuzuka chifuchi.

31 “Mungukanwaha chifuchi chize ku Kalunga-lwiji Muchila ndo ku kalunga-lwiji wa A-Filistea, chize ku puya ndo ku lwiji Ufrateze. Mumu mungukakunjika atu a mu chifuchi chize mu moko jenu, mba yenu munukaahuma kumeso jenu. 32 Kanda nukalinga no usendo chipwe kulinga usendo ni tuzambi two. 33 Ayo katambile kutwama mu chifuchi chenu hanga achine kunuvulumwisa kuli yami. Kuchina yenu munukalingila tuzambi two, chuma chize muchikapwa kambwila kuli yenu.”

24 Mba iye yamba kuli Mose ngwenyi: “Kanduka kuli Yehova, hamuwika ni Arone, Nandambe, Ambihu ni makulwana 70 A-Izalele nufulamanyine kusuku. 2 Mose mwe watamba kukundama kuli Yehova ukawenyi, akwo katambile kukundama, chikwo nawa, A-Izalele katambile kukanduka hamuwika ni iye.”

3 Chocho Mose yaya kuli A-Izalele yaalweza maliji eswe a Yehova ni shimbi jenyi, A-Izalele eswe yakumbulula hamuwika ngwo: “Mutulinga yeswe yize Yehova amba.” 4 Mba Mose yasoneka maliji eswe a Yehova. Yahinduka chimenemene, yatunga chilumbilo ku mbumbulu ya mulundu, yajika manguji 12 kulita ni minyachi 12 ya A-Izalele. 5 Mba yatuma akweze a malunga A-Izalele, ayo yalambula milambu ya kulumba ni kulambula ngombe kuli Yehova ngwe milambu ya sambukila. 6 Mose yanda ndambu ya manyinga yayisa ha malonga, ndambu yikwo ya manyinga yayisapwila ha chilumbilo. 7 Chocho iye yanda mukanda wa usendo yautangila A-Izalele ni liji mwilu. Mba Ayo yamba ngwo: “Mutulinga yeswe yize Yehova amba, mutumwononokena.” 8 Kashika Mose yanda manyinga, yaasapwila hali A-Izalele, yamba ngwenyi: “Wano kali manyinga a usendo uze Yehova alinga ni yenu kulita ni maliji eswe wano nwevwa.”

9 Mose, Arone, Nandambe, Ambihu ni makulwana 70 A-Izalele yakanduka 10 yamona Zambi wa Izalele. Kushi lia yiliato yenyi kwapwile yuma yimwe ngwe mawe a safwira akwala, atoma ngwe malilu. 11 Iye kashihile malunga ajama A-Izalele, ayo yamona Zambi wamwenemwene mu usolwelo, yalia, yanwa.

12 Mba Yehova yamba kuli Mose ngwenyi: “Kanduka kuno ku mulundu utwameko. Mungukwaha mawe, mungusonekaho shimbi hanga ulongese A-Izalele.” 13 Mose ni chikwashi chenyi Yoshua yalilulieka, chocho Mose yakanduka ku mulundu wa Zambi wamwenemwene. 14 Alioze iye kalwezele makulwana ngwenyi: “Tushimbwilenu hano ndo muze mutuhiluka, Arone ni Hure masala ni yenu. Mweswawo mapwa ni mulonga aye kuli ayo.” 15 Mba Mose yakanduka ku mulundu shimbu te lelwa linafuku mulundu.

16 Uhenya wa Yehova yiununga ha Mulundu wa Sinai, lelwa yilinunga ni kufuka mulundu ha matangwa asambano. Ha tangwa liamuchishimbiali, iye yasanyika Mose kukatuka mu lelwa. 17 A-Izalele waze te anatale, yamona uhenya wa Yehova ngwe kahia kanalekwoka helu lia mulundu. 18 Chocho Mose yanjila mu lelwa, yanyina ha mulundu. Yatwama ku mulundu matangwa 40 ni ufuku 40.

25 Mba Yehova yamba kuli Mose ngwenyi: 2 “Lweza A-Izalele hanga angunehene milambu, tambulenu milambu yeswe yize mutu ni mutu mahana kulita ni chize mbunge yenyi muyizanga. 3 Uno we mulambu nwatamba kutambula kuli ayo: Oru, prata ni unengu, 4 wanda ulauluka, wa ufungo, uchila, linyu yipema, wona wa pembe, 5 makupu* a kuji a mapanga a kukwita ulombo uchila, makupu a tushitu,* mitondo ya mikesha, 6 maji a kusa mu ndeya, balsamo ya kulinga nayo maji a kuwayisa no ni akulinga no insensu ya vumba lipema, 7 mawe a onikise ni mawe akwo waze atamba kulamika ha efode ni ha chipwiko. 8 O makangulingila chihela chisandu cha uwayilo, mba yami mungukatwama mukachi ko. 9 Yenu nwatamba kulinga tabernakulu ni yikashi yamo yeswe kulita ni chize mungukulweza.

10 “Ayo katamba kutunga mushete wa mutondo wa mukesha, usuhwe wawo watamba kupwa ni centimetru* 110, utohwe wawo watamba kupwa ni centimetru* 70, ni chizundamo chawo chatamba kupwa cha centimetru* 70. 11 Mba mukaukwita oru yipema haze ni muchima. Ukaulamike oru ku masongo. 12 Ukalinga ngo jiwana ja oru ni kujisa helu lia molu awana a mushete, ngo jaali sali limwe, ngo jaali sali likwo. 13 Ukasonge mikambo ya mutondo wa mukesha, ukayikwite oru, 14 mba ukanjise mikambo yacho mu ngo ya mushete, hanga apwe ni kuhasa kuumbata. 15 Mikambo yikatwame ku ngo ya mushete, katambile kuyitomonako. 16 Ukasa mukachi ka Mushete mawe a shimbi waze mungukakwaha ngwe Uchela.

17 “Ukalinge chifuko cha oru, usuhwe wa chifuko chacho ukapwe wa centimetru 110, utohwe wacho ukapwe wa centimetru 70. 18 Watamba kulinga akerupimi aali a oru, ukaalinge ni oru ya kutatula ni mweto* ku masongo eswe aali a chifuko. 19 Linga akerupimi aali, umwe mapwa songo limwe, mukwo songo likwo lia chifuko. 20 Mapulwa aali akerupimi katamba kupwa a kuzazulula, kanazulamina ha chifuko. Akerupimi akalitale meso ni meso, mahuma jo ahetamine ha chifuko. 21 Mushete ukaufuke ni chifuko, mba mukachi ka Mushete ukasemo mawe a shimbi waze mungukakwaha ngwe Uchela. 22 Yami mungukasoloka kuli yena ni kuhanjika ni yena helu lia chifuko. Kukatuka mukachi ka akerupimi aali waze ali ha Mushete wa Uchela, mungukakwaha shimbi jize watamba kulweza A-Izalele.

23 “Yena watamba kulinga nawa mesa ya mutondo wa mukesha, usuhwe wayo watamba kupwa wa centimetru 90, utohwe wayo watamba kupwa wa centimetru 45, chizundamo chayo cha centimetru 70. 24 Ukaukwite oru yipema ni kuulamika oru ku masongo. 25 Ku songo lia mesa mukasako mukomo umuwika uli ni utohwe wa mbanda kwoko,* mukomo wacho ukaujingilike ni oru. 26 Ukafulile mesa ngo jiwana ja oru, ukase ngo jacho ha mambango awana haze hatwama molu awana a mesa. 27 Ngo jatamba kupwa hakamwihi ni mukomo, mu ngo jacho mwe matomeka mikambo hanga apwe ni kumbachila mesa. 28 Ukasonge mikambo ya mutondo wa mukesha, ukayikwite oru, mikambo yacho ye mapwa ni kumbachila mesa.

29 “Watamba kulinga nawa malonga, misenge ya ha mesa ni milondo yayo ni malonga, haze makatehwina yitapo ya walwa. Yikwata yino watamba kuyilinga ni oru yipema. 30 Mashimbu eswe ukase ku mesa mbolo* jize ayo akungwaha.

31 “Mukalinga chikwachilo cha ndeya ni oru yipema. Chikwachilo chacho watamba kuchilinga ni oru ya kutatula ni mweto. Chishina, mukungo, yikwachilo, misenge, maundu ni yitemo, yeswe yatamba kupwa chuma chimuwika. 32 Ku mukungo mukukakatuka yikwachilo yisambano, yikwachilo yitatu sali limwe, yitatu sali likwo. 33 Sali ni sali mukukapwa misenge yitatu ha yikwachilo yitatu yalifwa ni chitemo cha amendoa ni maundu ni yitemo ya kulonga. Chocho muyikapwa yikwachilo yisambano yize yinakatuka ku mukungo wa chikwachilo cha ndeya. 34 Ku mukungo wa chikwachilo cha ndeya, mukukapwa misenge yiwana yalifwa ni yitemo ya amendoa ni maundu ni yitemo. 35 Mushi lia chikwachilo chitangu, chize chinakatuka ku mukungo wa chikwachilo cha ndeya, mwatamba kupwa undu limuwika. Mushi lia chikwachilo chamuchiali mwatamba kupwa undu limuwika, mushi lia chikwachilo cha kasula nemo mwatamba kupwa undu limuwika. Yikwachilo yeswe yisambano yinakatuka ku mukungo wa chikwachilo cha ndeya che yatamba kupwa. 36 Maundu, yikwachilo ni chikwachilo cheswe cha ndeya, yatamba kupwa chuma chimuwika, chakulinga ni oru yipema, ya kutatula ni mweto. 37 Chikwachilo cha ndeya, ukachilingile ndeya shimbiali, muze ndeya mujikatemuna, mujikaminyika kulutwe lia chikwachilo cha ndeya. 38 Malumana ni malonga a kukwachila uto katamba kupwa a oru yipema. 39 Chikwachilo cha ndeya ni yuma yacho yeswe, katamba kuyilinga ni talentu* yimuwika ya oru yipema. 40 Nukalinge tabernakulu ni yuma yeswe yatwamamo ngwe chize nanulweza.

26 “Ukalinge tabernakulu ni mahina kumi a linyu yipema chinji, wanda ulauluka, wa ufungo ni wanda uchila. Ha hina liacho watamba kutongelaho chizulie cha akerupimi. 2 Hina ni hina liatamba kupwa ni usuhwe wa metru* 13 ni utohwe wa metru 4. Mahina eswe katamba kupwa ni utohwe umuwika. 3 Anda mahina atano waanunge limwe ni likwo hanga apwe hina limuwika linene, ulinge chizechene ni mahina akwo atano, chocho mapwa mahina aali anene-anene. 4 Ku songo lia hina ni hina linene, unukeko miya ya wanda ulauluka hanga ununge mahina jacho apwe hina limuwika. 5 Unuke miya 50 ku hina limwe, miya 50 ku songo lia hina likwo, hanga miya yikalitale yimwe ni yikwo haze mukanungina mahina aali. 6 Ukafula nawa 50 a ngo ja oru, ukanunga mahina ni je ngo hanga tabernakulu yikapwe chuma chimuwika.

7 “Ukalinga nawa mahina a wona wa kuji wa pembe, hanga akapwe mbalaka helu lia tabernakulu. Ukalinga mahina 11. 8 Hina ni hina mulipwa ni usuhwe wa metru 13 ni utohwe wa metru 4. Mahina eswe 11 katamba kupwa unene umuwika. 9 Ku mahina jacho ukanunga atano hamuwika, mahina akwo asambano hamuwika, hina liamuchisambano ulikoneke kulutwe lia tabernakulu. 10 Ulinge miya 50 ku songo lia hina kuze mukanungina hina likwo, ni miya 50 ku songo lia hina likwo haze mukaanungina. 11 Ukafula ngo 50 ja unengu ni kujisa ku miya, jikanunge yihanda ya hina lia mbalaka hanga lipwe hina limuwika. 12 Chihanda cha ku mahina a mbalaka chize muchisala, muchizezala. Chihanda cha hina chize muchisala, muchizezala kunyima lia tabernakulu. 13 Chipinji cha hina chize muchizezala sali ni sali lia tabernakulu, chatamba kupwa ni centimetru 45, chatamba kupwa chisuku kuhiana hina litangu lia ha tabernakulu, chatamba nawa kufuka sali ni sali.

14 “Ukatunga nawa chifuko cha mbalaka ni kupu lia kuji wa panga lia kukwita ulombo uchila, helu lia kupu liacho, mukafukaho kupu lia foka.

15 “Ukasonge mapaya a mutondo wa mukesha, ukaajike ni kujingilika tabernakulu. 16 Paya lieswe liatamba kupwa ni usuhwe wa metru 4 ni utohwe wa centimetru 70. 17 Paya ni paya liatamba kupwa ni mbambo jaali jakupalakenya najo, chino che mukalinga ni mapaya eswe a tabernakulu. 18 Sali lia ku uto lia tabernakulu, ukalingilako mapaya 20.

19 “Ukafula nawa yimanyino ya prata 40 hanga yikapwe kushi lia manguji 20: Yimanyino yaali yize yili ni yituwa, mwe mumukanjila mbambo jaali ja paya litangu, kushi lia paya ni paya mukukapwa yimanyino yaali yize yili ni yituwa. 20 Ukalinge nawa mapaya 20, ukaase sali lia ku sango lia tabernakulu 21 ni yimanyino 40 ya prata yize yili ni yituwa, yimanyino yaali yize yili ni yituwa yikapwe ha paya litangu. Kushi lia paya ni paya mukukapwa yimanyino yaali yize yili ni yituwa. 22 Ukalinge mapaya asambano ukaase kunyima lia tabernakulu ku chitokelo. 23 Ukasonga mapaya aali waze makapwa ngwe manguji ha mambango a tabernakulu. 24 Mapaya jacho katamba kupwa akupalakenya aali aali, chize kushi ndo kwilu ku ngo yitangu. Mapaya eswe ukaalinge chizechene hanga akapwe manguji ha mambango. 25 Kashika, mukukapwa mapaya nake, ni yimanyino ya prata 16 yize yili ni yituwa, yimanyino yaali yize yili ni yituwa yikapwe ha nguji litangu. Kushi lia paya ni paya mukukapwa yimanyino yaali yize yili ni yituwa.

26 “Mukalinga kangalo ja mutondo wa mukesha: Kangalo jitano mujikapwa ku mapaya sali limwe lia tabernakulu, 27 kangalo jitano ukajisa ku mapaya sali likwo lia tabernakulu, kangalo jikwo jitano ukajisa ku mapaya a kunyima lia tabernakulu sali lia chitokelo. 28 Lukangalo wa hakachi, yoze unapalika hakachi ni hakachi ka mapaya, makakatuka songo limwe ndo songo likwo.

29 “Ku mapaya ukakwitako oru ni kulinga ngo ja oru muze mumukapalika kangalo, kangalo nejo watamba kujikwita oru. 30 Ukalinge tabernakulu kulita ni chize akulwezele ku mulundu.

31 “Ukalinga chikalakala cha hina cha wanda ulauluka, wa ufungo, wanda uchila ni linyu yipema chinji. Ku masongo ukatongeleko chizulie cha akerupimi. 32 Ukazezeleke chikalakala cha hina ku manguji a mutondo wa mukesha a kukwita oru. Ngo ja manguji jatamba kupwa ja oru. Manguji makaajika ha yimanyino ya prata yize yili ni yituwa. 33 Mukazezeleka hina lia chikalakala mushi lia ngo ni kutwala Mushete wa Uchela muchima, kunyima lia chikalakala cha hina. Chikalakala cha hina muchikanuhandunwina Muma Musandu ni Muma Musandu Mwahiana. 34 Ukase chifuko ha Mushete wa Uchela Muma Musandu Mwahiana.

35 “Mukasa mesa haze lia chikalakala cha hina, ndeya muyikapwa sali lia ku uto lia tabernakulu kulutwe lia mesa, mba mukasa mesa ku sango. 36 Ku chikolo cha tabernakulu mukalingilako chikalakala cha hina cha wanda ulauluka, wa ufungo, wanda uchila ni linyu yipema chinji. 37 Chikalakala cha hina ukachilingila manguji atano a mutondo wa mukesha ni kwakwita oru. Ngo ja manguji jatamba kupwa ja oru, ukalingila manguji yimanyino yitano ya unengu yize yili ni yituwa.

27 “Ukalinge chilumbilo cha mutondo wa mukesha, chilumbilo chacho chatamba kupwa ni usuhwe wa metru jitano ni utohwe wa metru jitano. Chizundamo chayo chikapwe cha centimetru 134. 2 Ukasonga mbinga ha mbango jiwana ja chilumbilo, chilumbilo mukachikwita unengu. 3 Ukalinga yikwata ya kuchiza nayo uto, ukalinga nawa yikaso, yenga, nguto ya misako ni malonga a kukwachila kahia. Yikwata yeswe ya chilumbilo ukayilinge ni unengu. 4 Chilumbilo ukachilingila munyingo, munyingo wacho ukaulinge ni unengu. Ku munyingo mukukapwa ngo jiwana ja unengu, ngo ni ngo muyikapwa ha mbango ya chilumbilo. 5 Munyingo wacho ukause mushi lia mukomo wa chilumbilo, hanga ukapwe hakachi ni hakachi ka chilumbilo. 6 Chilumbilo ukachilingila mikambo ya mutondo wa mukesha, ni kuyikwita unengu. 7 Mikambo makayitomeka mu ngo, hanga mikambo yacho yikapwe sali ni sali lia chilumbilo muze makachizundula. 8 Mukalinga chilumbilo cha mapaya, muchima mukapwe mwawashi. Watamba kuchilinga ngwe chize Iye akulwezele ku mulundu.

9 “Ukalinge yiize ya tabernakulu. Sali lia ku uto ukaseko chikalakala cha hina lia linyu yipema chinji, chikapwe ni usuhwe wa metru 45 sali liacho. 10 Kukapwe manguji 20 ni yimanyino 20 ya unengu yize yili ni yituwa. Ngo ya manguji ni yikwata yeswe ya kukasa nayo yikapwe ya prata. 11 Sali lia ku sango neko mukukapwa chikalakala cha hina cha usuhwe wa metru 45. Kukapwe manguji 20 ni yimanyino 20 ya unengu yize yili ni yituwa, ngo ya manguji ni yikwata yeswe ya kukasa nayo, neyo yikapwe ya prata. 12 Sali lia ku chivumbuko mukukapwa chikalakala cha hina cha metru 23 kulita ni utohwe wa yiize ni manguji kumi ni yimanyino kumi yize yikwete yituwa. 13 Ku chivumbuko cha tangwa, utohwe wa yiize muukapwa wa metru 23. 14 Sali limwe lia unjililo, mukukapwa chikalakala cha hina cha metru 7, manguji atatu ni yimanyino yitatu yize yili ni yituwa, 15 mba sali likwo lia unjililo, mukukapwa chikalakala cha hina cha metru 7, manguji atatu ni yimanyino yitatu yize yili ni yituwa.

16 “Ku unjililo wa yiize kwatamba kupwa chikalakala cha hina chize chili ni usuhwe wa metru 9, chakulinga ni wanda ulauluka, wa ufungo, wanda uchila ni linyu yipema chinji, kukapwe manguji awana ni yimanyino yiwana yize yili ni yituwa. 17 Manguji eswe makajingilika yiize, akapwe ni yikwachilo ya kukasa nayo ya prata ni ngo ja prata, alioze yimanyino yo yize yikwete yituwa, yikapwe ya unengu. 18 Yiize yatamba kupwa ni usuhwe wa metru 45, utohwe wa metru 23 ni chizundamo cha metru 3. Akayilinge ni linyu yipema chinji, yimanyino yayo yize yikwete yituwa, yatamba kupwa ya unengu. 19 Yikashi yeswe ni yikwata yeswe makakalakala nayo mu tabernakulu, hamuwika ni mbambo jeswe ni mbambo jeswe ja mu yiize, yatamba kupwa ya unengu.

20 “Lweza A-Izalele akanehe maji apema a olevwe akutemuna no ndeya, hanga ndeya yikatemune matangwa eswe. 21 Arone ni ana jenyi a malunga makasa shindakenyo ngwo, ndeya jinatemuna kumeso ja Yehova chize ha kutoka cha tangwa ndo chimene mu tabernakulu sali lia haze lia chikalakala cha hina lize lili hakamwihi ni Mushete wa Uchela. Yino yili shimbi ya mutolo yize A-Izalele atamba kwononokena ku yisemuko yo yeswe.

28 “Watamba kutongola hakachi ka A-Izalele yayenu Arone ni ana jenyi a malunga hanga akangulingile mulimo wa usasendote. Tongola Arone ni ana jenyi a malunga: Nandambe, Ambihu, Elieza ni Itama. 2 Ukatongele yayenu Arone mazalo asandu hanga akamwehe uhenya ni upeme. 3 Lweza atu eswe waze akwete utotombo* nahele spiritu yami ya mana, akatonge mazalo ja Arone a kumusela no ku usandu, hanga akangulingile mulimo wa usasendote.

4 “Wano e mazalo waze matonga: Chipwiko, efode, chikuto cha moko ehi, chikuto chisuku cha yipeka-yipeka, chitambala ni muya. Akatongele yayenu Arone ni ana jenyi a malunga mazalo wano asandu hanga akangulingile mulimo wa usasendote. 5 Akwa-utotombo akakalakale ni oru, wanda ulauluka, wa ufungo, wanda uchila ni linyu yipema.

6 “Efode katamba kuyilinga ni oru, wanda ulauluka, wa ufungo, wanda uchila ni linyu yipema chinji, akayikundule ni wanda ku songo. 7 Efode yatamba kupwa ni yihanda yaali ya mahina waze atamba kulinungina ha yipaya, chihanda chimwe kulutwe, chikwo kunyima. 8 Muya wa kukundula ku masongo uze uli wa kutongela ku efode hanga ukakwate efode, katamba kuulinga ni yikwata yimuwika: Oru, wanda ulauluka, wa ufungo, wanda uchila ni linyu yipema chinji.

9 “Watamba kwanda mawe aali a onikise ni kwolaho majina ja ana a Izalele: 10 Majina asambano ha liwe limwe, majina akwo asambano ha liwe likwo, kuputuka kuli mwana mutangu ndo kuli kasula-songo. 11 Mukwa-kwola, makola majina ja ana a Izalele ha mawe jacho aali ngwe chize akusa chijikilo. Watamba kutuma akaase mu yikwachilo ya oru. 12 Ukanangike mawe aali ha yipaya ya efode, mawe jacho makapwa chiwulwiso kuli ana a Izalele. Arone akambate majina jo kumeso ja Yehova ha yipaya yenyi ngwe chiwulwiso. 13 Watamba kulinga yikwachilo ya oru muze mukasa mawe 14 ni malenge aali a oru yipema a kuhosa ngwe mihipu. Malenge jacho watamba kwazezeleka ku yikwachilo.

15 “Watamba kutuma chilangaji hanga alinge chipwiko cha upatwilo. Chipwiko katamba kuchilinga ngwe efode: Ni oru, ni wanda ulauluka, wa ufungo, wanda uchila ni linyu yipema. 16 Muze machikoneka, mambango eswe awana katamba kupwa chimuwika, usuhwe watamba kupwa wa centimetru* 22, ni utohwe wa centimetru 22. 17 Ha chipwiko ukalamikeho milongo yiwana ya mawe. Mulongo utangu wa liwe lia rubi, topaze ni esmeralda. 18 Mulongo wamuchiali wa liwe lia turukeza, safwira ni jasepe. 19 Mulongo wamuchitatu wa liwe lia lesheme,* agata ni ametita. 20 Mulongo wamuchiwana wa liwe lia krisolita, onikise ni jade. Mawe wano eswe katamba kwalamika ha yikwachilo ya oru. 21 E mawe akalite ni majina 12 ja ana a Izalele. Ha liwe ni liwe akoleho jina lia mutu ngwe chize akusa chijikilo, jina ni jina mulisolola vungu limwe lia mavungu 12.

22 “Chipwiko ukachilingile malenge aali a oru yipema, a kuhosa ngwe mihipu. 23 Chipwiko ukachilingile ngo jaali ja oru, ngo jacho ukajise ku masongo a chipwiko. 24 Malenge aali a oru watamba kwanjisa mu ngo jaali jize jili ku masongo a chipwiko. 25 Masongo a malenge aali makapalika mu yituwa ya chikwachilo ni kwakashila ha yipaya ya efode, kulutwe liayo. 26 Ukalinga ngo jaali ja oru ni kujisa ku masongo aali a chipwiko ku chihanda cha muchima chize chinahate ha efode. 27 Watamba kulinga nawa ngo jaali ja oru ni kujisa helu lia efode, mushi lia mikapa yaali yinapalika ha chipaya, hakamwihi ni unungino wa efode helu lia muya wa efode wa kukundula. 28 Watamba kukasa chipwiko ku ngo ja chipwiko ni ngo ja efode ni wanda ulauluka hanga chipwiko chichine kukasuluka. Chino muchikwasa hanga chipwiko chipwe ha chihela chacho, ha efode helu lia muya wa kukundula.

29 “Muze Arone manjila Muma Musandu, akapwe ni majina ja ana a Izalele ha chipwiko cha upatwilo ha pambo lienyi, ngwe chiwulwiso kumeso ja Yehova. 30 Ukase Urimi ni Tumimi* mukachi ka chipwiko cha upatwilo, hanga yikapwe ha pambo lia Arone muze makasoloka kumeso ja Yehova. Chocho, mashimbu eswe Arone masoloka kumeso ja Yehova, makasoloka ni yuma yino ha pambo, yize muyikakwasa ha kusopesa A-Izalele.

31 “Ukanuke chikuto chisuku cha efode cha moko ehi, cheswe chatamba kupwa cha wanda ulauluka. 32 Mukukapwa chituwa cha kutuhwishila mutwe hakachi ni hakachi ka chikuto, chituwa chacho katamba kuchikundula ku masongo ni wanda. Ku kota muchikapwa ngwe chikuto cha maswalale hanga chichine kusuwika. 33 Ku songo lia chikuto, ukatongelako mafufu alifwa ngwe muhuko wa romana, akulinga ni wanda ulauluka, wa ufungo ni wanda uchila, hakachi ka fufu limuwika lia romana ni fufu likwo, ukaseho ngezo ya oru. 34 Watamba kusa ngezo ya oru yinalikaula ni romana, ngezo yimuwika ya oru, romana limuwika. Chikuto cheswe cha moko ehi ukachijingilike chocho. 35 Arone makachizala hanga akalinge mulimo wa usasendote. Zungo lia ngezo, makalivwa muze makanjila mu chihela chisandu kumeso ja Yehova ni muze makatuhukamo hanga iye achine kufwa.

36 “Watamba kulinga chipenya chapeyima cha oru yipema, ni kwolaho ngwe chize akusa chijikilo ngwe: ‘Usandu wapwa wambala wa Yehova.’ 37 Ukachikashila ku chitambala ni muya ulauluka. Chipenya chatamba kupwa kulutwe lia chitambala. 38 Chipenya chikapwe ha huma lia Arone. Arone makapwa ni mulonga nyi ngwe umwe mutu malelesa yuma yisandu. A-Izalele katamba kuhana yuma yino ngwe chawana chisandu kuli Zambi. Chipenya chikapwe ha huma lia Arone mashimbu eswe, hanga ayo akapwe ni utayizo kumeso ja Yehova.

39 “Ukatonge chikuto chisuku cha linyu yipema, cha yipeka-yipeka, ukatonge nawa chitambala ni linyu yipema ni muya.

40 “Ukatongele nawa ana ja Arone mazalo asuku-asuku, miya ni yitambala hanga yikaahe uhenya ni upeme. 41 Watamba kujika yayenu Arone ni ana jenyi a malunga, ukaawayise, ukaase* ha milimo yo ni kwasela ku usandu, ayo makapwa asasendote jami. 42 Ukaanukina nawa tuputula* a linyu hanga akafuke uselesele wo. Tuputula makakatuka mu zalilo ndo mu shina lia molu. 43 Arone ni ana jenyi a malunga, makaazala muze makanjila mu tabernakulu hanji muze makakundama ku chilumbilo hanga akakalakale muma musandu, kuchina mavulumuna, mafwa. Yino yili shimbi ya mutolo kuli iye ni ku minyachi* yenyi.

29 “Chino che watamba kulinga waasele ku usandu hanga akapwe asasendote jami: Ukanda mwana-ngombe umuwika ni kuji a mapanga aali waze keshi kapalia, 2 mbolo kujishi futunwiso, mbolo ja kujingulula ngwe kazeya kujishi futunwiso, ja kulinga ni maji, mbolo japatamana kujishi futunwiso, ja kukwita maji. Watamba kulinga mbolo jacho ni unga wa tiliku wafufunuka. 3 Ukajise mu mutonga ni kujineha mu mutonga wacho hamuwika ni mwana-ngombe ni kuji a mapanga aali.

4 “Ukaya ni Arone ni ana jenyi a malunga ku chikolo cha mbalaka ya kulikungulwila, ukaasanyise meya. 5 Mba mukanda mazalo, ukajike Arone chikuto chisuku, chikuto cha moko ehi cha efode, efode ni chipwiko. Ukajichike kanawa muya wa efode wa kukundula* mu zalilo yenyi. 6 Mukamukasa chitambala ku mutwe ni kusa chipenya* chisandu ha chitambala. 7 Mba mukanda maji a kuwayisa no mukaazujila ha mutwe wenyi, ukamuwayise.

8 “Kusulaho, ana jenyi a malunga akakundame, ukaajike mazalo asuku-asuku. 9 Ukajichike Arone ni ana jenyi a malunga miya ni kwakasa yitambala ku mitwe. Chocho usasendote muukapwa wa ayo — yino yili shimbi ya mutolo. Chenacho watamba kutongola Arone ni ana jenyi a malunga hanga alinge mulimo wa usasendote.*

10 “Watamba kwiza ni mwana-ngombe kulutwe lia mbalaka ya chikungulwila, mba Arone ni ana jenyi makasa moko jo ha mutwe wa mwana-ngombe. 11 Ukashihe mwana-ngombe kumeso ja Yehova, ku chikolo cha mbalaka ya chikungulwila. 12 Ukachupike munwe mu manyinga ja mwana-ngombe ni kwakwita ku mbinga ja ku chilumbilo. Alioze manyinga waze masala, ukaazujila ku shina lia chilumbilo. 13 Ukanda maji eswe atwama ku mijingwa, maji a ku liayi, ana-sukwa aali ni maji jo, ukayoche ha chilumbilo yikakumuke mwishi. 14 Alioze, yifwo, kupu ni tuji a mwana-ngombe ukayochele haze lia chilombo. Uli mulambu wa shili.

15 “Hakachi ka makuji a mapanga, andaho kuji wa panga umuwika hanga Arone ni ana jenyi a malunga akase moko ha mutwe wa panga. 16 Shiha kuji wa panga, anda manyinga jenyi wasapwile sali ni sali lia chilumbilo cheswe. 17 Patula kuji wa panga mu yihanda-yihanda, kosa mijingwa ni molu jenyi, lumbika yihanda yenyi hamwe ni mutwe wenyi. 18 Ocha kuji wa panga mweswe ha chilumbilo hanga mwishi ukakumuke. Uli mulambu wa Yehova wa kulumba wa lupembo mupema. Uli mulambu wa kwocha wa Yehova.

19 “Anda kuji wa panga mukwo hanga Arone ni ana jenyi a malunga akase moko jo ha mutwe wa kuji wa panga. 20 Shiha kuji wa panga, anda ndambu ya manyinga jenyi waakwite ku songo lia twitwi lia chindume lia Arone, ni ku masongo a matwi a chindume ja ana jenyi. Ukwite nawa ku munwe wa shina wa kwoko lia chindume ni ku munwe wa shina wa kulu lia chindume lia mutu ni mutu, ukasapwile manyinga sali ni sali lia chilumbilo cheswe. 21 Mba mwanda ndambu ya manyinga waze ali ha chilumbilo ni ndambu ya maji a kuwayisa no, wasapwile kuli Arone ni ku mazalo jenyi, usapwile nawa ana jenyi ni ku mazalo jo, hanga Arone ni mazalo jenyi, ana jenyi ni mazalo jo apwe asandu.

22 “Anda maji ni muchila wa maji wa kuji wa panga, maji waze atwama ku mijingwa, maji a ku liayi, ana-sukwa aali ni maji jo, ni kulu lia chindume, mumu kali panga wa kusa nenyi mutu ha usasendote. 23 Wande mbolo kujishi futunwiso mu mutonga uze uli kumeso ja Yehova, anda nawa mbolo ya muundu, mbolo ya kujingulula ngwe kazeya, yakulinga ni maji ni mbolo yapatamana. 24 Uyise yeswe mu moko ja Arone ni mu moko ja ana jenyi, uyihungise kulutwe ni kunyima ngwe mulambu wa kuhungisa kumeso ja Yehova. 25 Mba muyichiza mu moko jo, muyocha ha chilumbilo, helu lia mulambu wa kulumba ngwe lupembo mupema kumeso ja Yehova. Uli mulambu wa kwocha wa Yehova.

26 “Mba wande pambo lia kuji wa panga lize ahananga hanga Arone alinge mulimo wa usasendote, ulihungise kulutwe ni kunyima ngwe mulambu wa kuhungisa kumeso ja Yehova. Chino muchipwa chihanda cha yena. 27 Panga yoze muhana hanga use Arone ni ana jenyi ha usasendote, watamba kumuchiza pambo lize muhana ngwe mulambu wa kuhungisa hanga ulisele ku usandu, ni kulu lize muhana ngwe chihanda chisandu: Chuma chize ahungisanga ni chize ahananga ngwe mulambu. 28 Amu chihanda chino chili chisandu, yihanda yino muyipwa ya Arone ni ana jenyi ngwe shimbi ya mutolo yize A-Izalele atamba kukaula. Yihanda yino muyikapwa yisandu yize A-Izalele mapwa ni kuhana. Chili chihanda cho chisandu cha kuhana kuli Yehova, cha ku milambu yo ya sambukila.

29 “Kulutwe, mazalo asandu a Arone, ana jenyi makazala muze maakawayisa ni kwapwisa asasendote. 30 Sasendote yoze makamusalakana hakachi ka ana jenyi a malunga ni kunjila mu mbalaka ya kulikungulwila hanga akalakale muma musandu, makazala mazalo wano ha matangwa shimbiali.

31 “Mukanda panga wa kuji wa kusa nenyi Arone ni ana jenyi ha mulimo wa usasendote, ukatelekele yifwo yenyi muma musandu. 32 Arone ni ana jenyi a malunga makalia yifwo ya kuji wa panga ni mbolo jize jili mu mutonga ku chikolo cha mbalaka ya kulikungulwila. 33 Alie yuma yize afukile nayo shili muze aasele ha mulimo wa usasendote ni kwapwisa asandu. Alioze, mutu yoze keshi ni ulite katambile kuyilia mumu yili yisandu. 34 Nyi mukusala yifwo ya chitapo ya kusa nayo mutu ha usasendote ni mbolo ndo chimene, watamba kuyocha pwilili. Katambile kuyilia, mumu chili chuma chisandu.

35 “Chino che watamba kulinga kuli Arone ni kuli ana jenyi a malunga kulita ni yeswe yize nakulweza. Mukalinga matangwa shimbiali ha kwasa ha mulimo wa usasendote. 36 Matangwa eswe, muopwa ni kuhana mwana-ngombe ngwe chitapo ha shili hanga ufuke shili ni kupemesa chilumbilo ku shili ha kufuka shili yacho. Watamba kuwayisa chilumbilo ni maji hanga uchisele ku usandu. 37 Mukalinga matangwa shimbiali ha kufuka shili ya chilumbilo. Ukachisele ku usandu hanga chipwe chilumbilo chisandu chahiana. Mweswe makwata ku chilumbilo, katamba kupwa musandu.

38 “Yino ye muopwa ni kulambula ha chilumbilo: Tangwa ha tangwa ana mapanga aali a mwaka umuwika. 39 Ukahane mwana-panga wa kuji chimene, mukwo chingoloshi. 40 Mwana-panga wa kuji mutangu muhana, mukamuhana ni kilu* yimuwika ya unga wafufunuka, wakuchinga ni litru yimuwika ya maji apema a olevwe. Mulambu wa walwa, litru yimuwika ya vinyu. 41 Mwana-panga mukwo wa kuji mukamuhana chingoloshi, hamuwika ni mulambu wa mbuto ni mulambu wa walwa, ngwe chize walinganga chimene. Ukayihane ngwe lupembo mupema, mulambu wa kulumba wakuhana kuli Yehova. 42 Uli mulambu wa kulumba uze munupwa ni kuhana kuli Yehova ku yisemuko yenu yeswe ku chikolo cha mbalaka ya kulikungulwila, kuze mungupwa ni kusoloka kuli yenu hanga nguhanjike ni yena.

43 “Kwenako mungukasoloka kuli A-Izalele, uhenya wami muukapwisa chihela chacho chisandu. 44 Mbalaka ya chikungulwila ni chilumbilo munguyipwisa yisandu, Arone ni ana jenyi no mungwapwisa asandu hanga angulingile mulimo wa usasendote. 45 Mungutwama mukachi ka A-Izalele, mungupwa Zambi yo. 46 Mba ayo makanyingika pundu ngwo, yami nguli Yehova, Zambi yo, yoze waachijile mu chifuchi cha Engitu hanga ngutwame mukachi ko. Yami nguli Yehova, Zambi yo.

30 “Watamba kulinga chilumbilo cha kwochela insensu. Ukachilinge ni mapaya a mutondo wa mukesha. 2 Mambango eswe awana katamba kupwa usuhwe umuwika, usuhwe wacho muupwa wa centimetru 45, ni utohwe wacho muupwa wa centimetru 45 ni chizundamo cha centimetru 90. Chikapwe ni mbinga ku mambango. 3 Uchikwite oru yipema: Helu, sali ni sali ni ku mbinga, ukachilamike oru ku masongo. 4 Ukalingile nawa chilumbilo ngo jaali ja oru mushi lia masongo, sali ni sali. Mu ngo jacho mwe makatomeka mikambo yize makambata nayo chilumbilo. 5 Ulinge mikambo ya mutondo wa mukesha, ukayikwite oru. 6 Chilumbilo ukachise kulutwe lia chikalakala cha hina lize lili hakamwihi ni Mushete wa Uchela ni chifuko chacho, haze yami mungukalisolola kuli yena.

7 “Muze Arone makeza ni kululieka ndeya ha chimene ni chimene, makochela insensu ya lupembo mupema ha chilumbilo. 8 Arone makocha nawa insensu chingoloshi muze makatemuna ndeya, muukapwa mulambu wa insensu uze atamba kuhana mashimbu eswe kumeso ja Yehova, ku yisemuko yo yeswe. 9 Kanda nukalambula ha chilumbilo chacho insensu niyimwe yize shimbi kuyatayijile, chipwe mulambu wa kulumba, chipwe mulambu wa mbuto. Kanda ukazujilaho niumwe mulambu wa walwa. 10 Ha mwaka ni mwaka, Arone makazujila ndambu ya manyinga ya mulambu wa shili ha mbinga ja ku chilumbilo, hanga apemese chilumbilo. Chino makachilinga kamuwika ha mwaka ku yisemuko yeswe, hanga apemese chilumbilo. Chilumbilo muchikapwa chisandu chahiana kuli Yehova.”

11 Mba Yehova yamba kuli Mose ngwenyi: 12 “Mashimbu eswe mukasonekesa ni kwalula ana ja Izalele, ha tangwa liacho, mutu ni mutu katamba kuhana chimwe kuli Yehova cha kukuula nacho mwono wenyi. Hanga nichimwe chilungo kanda chikeza hali ayo muze makalisonekesa. 13 Eswe waze makasonekesa katamba kuhana chihanda cha shekele* kulita ni shekele yize akuhana mu chihela chisandu, shekele yimuwika yinalumbunuka jera* 20. Chihanda cha shekele chili mulambu wa Yehova. 14 Mweswe yoze mapwa kusonekesa uli ni miaka 20 ndo kulutwe, katamba kuhana chawana kuli Yehova. 15 Pichi katambile kuweza ha chihanda cha shekele, chipwe chiswale katambile kutepululaho muze mahana chawana kuli Yehova hanga akuule mwono* wo. 16 Watamba kutambula kuli A-Izalele mbongo ja prata ja kufuka najo shili, ukajihane hanga akajilingile milimo ya mbalaka ya kulikungulwila, chikapwe chiwulwiso kumeso ja Yehova mumu lia A-Izalele hanga akakuule mwono* wo.”

17 Yehova yamba nawa kuli Mose ngwenyi: 18 “Linga mbashila ya unengu ni chikwachilo cha unengu, hanga apwe ni kusanyinaho. Ukayise hakachi ka mbalaka ya kulikungulwila ni chilumbilo ni kusaho meya. 19 Arone ni ana jenyi a malunga he makasanyina ku moko ni ku molu. 20 Muze ayo makanjila mu mbalaka ya kulikungulwila, hanji muze makakundama ku chilumbilo hanga alinge mulimo wo, ni kuhana yawana yakwocha kuli Yehova, katamba kusana hanga achine kufwa. 21 Makasana ku moko ni ku molu hanga achine kufwa. Yino yili shimbi ya mutolo kuli iye ni ku munyachi wenyi, ndo ku yisemuko yo yeswe.”

22 Mba Yehova yamba kuli Mose ngwenyi: 23 “Anda maji a vumba lipema chinji: Kilograma 6 ja mira yize hiyakala, kilograma 3 ja kanela ya vumba lipema, kilograma 3 ja kalamu ya vumba lipema, 24 ni kilograma 6 ja kasia, yeswe kulita ni shekele yize akuhana mu chihela chisandu ni litru jitatu ja maji a olevwe ni chipinji. 25 Yuma yino ukalinge nayo maji asandu a kuwayisa no, watamba kwalulieka kanawa.* Katamba kupwa maji asandu a kuwayisa no.

26 “Maji jacho e mukawayisa no mbalaka ya kulikungulwila, Mushete wa Uchela, 27 mesa ni yikwata yayo yeswe, chikwachilo cha ndeya ni yikwata yayo, chilumbilo cha insensu, 28 chilumbilo cha mulambu wa kulumba ni yikwata yayo yeswe ni mbashila ni chikwachilo chayo. 29 Yiwayise hanga yipwe yisandu yahiana. Mutu mweswe makwata ku yuma yacho katamba kupwa musandu. 30 Mba yena mukawayisa Arone ni ana jenyi a malunga ni kwasela ku usandu, hanga akangulingile mulimo wa usasendote.

31 “Ukalweze A-Izalele ngwe: ‘Maji wano katamba kununga asandu, waze yami mungupwa ni kuwayisa no ndo ku yisemuko yenu yeswe. 32 Watambile kwazujila ha mujimba wa mutu niumwe, chipwe kulinga maji akwo alifwa ni wano. Muchipwa chuma chisandu. Chatamba kununga ni kupwa chisandu kuli yenu. 33 Mutu mweswe malinga maji alifwa ni wano ni yoze maazujila hali mutu yoze kalitele, katamba kumwonwona* hakachi ka atu jenyi.’”

34 Kusulaho, Yehova yamba kuli Mose ngwenyi: “Anda maji wano a lupembo mupema: Masoto-soto a astonake, onecha, ngalapanu ya lupembo mupema ni libanu yipema, maji eswe wano katamba kupwa unji umuwika. 35 Yuma yino ukalinge nayo insensu. Milungo yino ya vumba lipema watamba kuyilulieka ni ulangaji weswe. Mukasako mungwa, yikapwe yipema, yikapwe yisandu. 36 Ndambu yimwe watamba kuyitwa ndo muze muyipwa unga-unga, mba ndambu yimwe ya unga watamba kuyisa kulutwe lia Uchela mu mbalaka ya kulikungulwila kuze mungukalisolola kuli yena. Yatamba kupwa yisandu yahiana kuli yenu. 37 Kanda ukalilingila yena mwene insensu ni milungo yino. Mumu yili yuma yisandu kuli Yehova. 38 Mutu mweswe malinga insensu yino hanga evwe vumba liayo, katamba kumwonwona* hakachi ka atu jenyi.”

31 Yehova yamba nawa kuli Mose ngwenyi: 2 “Tala, nasakula* Mbezalele, mwana wa Uri, mwana wa Hure, wa ku vungu lia Yunda. 3 Mungukamuzalisa ni spiritu ya Zambi, ha kumwaha mana, malinjekela ni yinyingi ya kulinga milimo yeka ni yeka, 4 hanga alinge yuma yakululieka kanawa, akalakale ni oru, prata ni unengu, 5 atote ni kululieka mawe ni kulinga milimo yeswe yize akulinga ni mapaya. 6 Chikwo nawa, natongola Aholiambe, mwana wa Ahisamake, wa ku vungu lia Ndane, hanga amukwase. Mungukazalisa nawa mbunge ja yilangaji eswe ni mana, hanga akalinge milimo yeswe yize nakulwezele: 7 Mbalaka ya kulikungulwila, Mushete wa Uchela ni chifuko chawo, ni yikwata yeswe ya mu mbalaka, 8 mesa ni yikwata yayo, chikwachilo cha ndeya cha oru yipema ni yikwata yayo yeswe, chilumbilo cha insensu, 9 chilumbilo cha mulambu wa kulumba ni yikwata yayo yeswe, mbashila ni chikwachilo chayo, 10 mazalo akutonga ni ulangaji, mazalo asandu a sasendote Arone, mazalo ja ana jenyi, hanga angulingile mulimo wa usasendote, 11 maji a kuwayisa no ni insensu ya lupembo mupema ya mu chihela chisandu. Ayo makalinga yuma yeswe yize nakulwezele.”

12 Yehova yamba nawa kuli Mose ngwenyi: 13 “Amba kuli A-Izalele ngwe: ‘Yenu nwatamba kufunga sambata jami, mumu chino chili chilayi hakachi ka yenu ni yami ku yisemuko yenu yeswe, hanga nukanyingike ngwenu, yami Yehova, nakunusela ku usandu. 14 Nukafunge Sambata mumu yili yisandu kuli yenu. Mweswawo kononokene shimbi ya sambata makamushiha. Nyi umwe mutu malinga umwe mulimo ha tangwa liacho, katamba kumwonwona* hakachi ka atu jenyi. 15 Nwatamba kukalakala ha matangwa asambano, alioze tangwa liamuchishimbiali likapwe sambata ya kuhwima. Tangwa liacho lili lisandu kuli Yehova. Mweswawo makalakala ha tangwa lia sambata, katamba kumushiha. 16 A-Izalele makafunga Sambata, akayifunge ku yisemuko yo yeswe. Uno uli usendo wa mutolo. 17 Sambata yili chilayi hakachi ka yami ni A-Izalele, mumu ha matangwa asambano Yehova watangile malilu ni hashi, mba ha tangwa liamuchishimbiali yecha kukalakala. Yahwima.’”

18 Chocho, Zambi yahwisa kuhanjika ni Mose ku Mulundu wa Sinai, yamwaha mawe aali a Uchela, ha mawe jacho hapwile maliji waze Zambi asonekene ni munwe wenyi.

32 Chocho, muze atu amwene ngwo Mose kanashimbula chinji ku mulundu, atu yalikungulula kuli Arone, yamba kuli iye ngwo: “Tuye! Tulingile umwe kazambi yoze matutetekela, mumu kutwanyingikine yize yalingiwa kuli yono Mose, yoze watuchijile mu chifuchi cha Engitu.” 2 Mba Arone yamba kuli ayo ngwenyi: “Zulenu yimbilingwa ya oru ku matwi ja mapwo jenu, ana jenu a malunga ni a mapwo, nuyinehe kuli yami.” 3 Chocho atu eswe yazula yimbilingwa ya oru ku matwi, yayitwala kuli Arone. 4 Iye yanda oru yize ayo anehene, yayizuzulula, mba yanda shizo yayisonga, yalinga kaponya wa mwana-ngombe. Mba ayo yaputuka kwamba ngwo: “Yenu A-Izalele, yono mwe Zambi yenu yoze wanuchijile mu chifuchi cha Engitu!”

5 Muze Arone amwene yuma yino, yatunga chilumbilo kulutwe lia mwana-ngombe. Mba Arone yatwa mutambi ngwenyi: “Hamene mukukapwa chiwanyino cha Yehova.” 6 Mukwachako, ayo yalaula chimenemene, yahana milambu ya kulumba ni kuneha yitapo ya sambukila. Atu yatwama, yalia, yanwa. Mba yakatuka hanga ahehe.

7 Yehova yamba kuli Mose ngwenyi: “Yako, sunuka, mumu atu je, waze wachijile mu chifuchi cha Engitu, halichisa. 8 Hahambuluka ni kawashi mu jila yize naatumine kwendela. Halilingila kaponya* walifwa ni mwana-ngombe, kanafulamana kulutwe lienyi ni kumwaha yitapo ni kwamba ngwo: ‘Yenu A-Izalele yono mwe Zambi yenu, yoze wanuchijile mu chifuchi cha Engitu.’” 9 Yehova yamba nawa kuli Mose ngwenyi: “Hinamona ngwami atu wano akwa-mbunge jikalu. 10 Kashika, kanda weseka kungukwika, ngweche ngwashihe eswe mu utenu wami usasu. Mba mungupwisa yena vungu linene mu chihela cho.”

11 Chocho, Mose yaliumba kuli Yehova Zambi yenyi ngwenyi: “Yehova, yena wachijile atu je mu chifuchi cha Engitu ni ndundo jinji ni kwoko lia ndundo, mba haliapwila mumu liaka unatenuka no chichize? 12 Kanda wecha A-Engitu ambe ngwo: ‘Waachijile mu Engitu ni nyonga lipi hanga waashihe ku milundu ni kwakuwisa hashi.’ Lisesa nyonga kama kanawa ha chiyulo* unambe kukwata, kanda uneha lamba lino hali atu je. 13 Yiwuluka kama tuvumbi twe wano: Apalahama, Izake ni Izalele, atu waze walishingile ni kwamba ngwe: ‘Mungukokesa munyachi wenu ngwe tutongonoshi a mwilu, ni kuhana chifuchi cheswe chino nanulweza ku munyachi wenu, hanga chipwe chihinga cho cha mutolo.’”

14 Chocho, Yehova yanyonga kanawa ha chiyulo* chize ambile kukwata ni ha lamba lize azangile kuneha hali atu jenyi.

15 Mba Mose yatewuluka, yasunuka ku mulundu ni mawe aali a Uchela mu moko. Ha mawe jacho hapwile hakusoneka sali ni sali, ku lutwe ni kunyima. 16 Mawe jacho Zambi waaluliekele, ni maliji waze apwileho, iye mwe waasonekene. 17 Muze Yoshua aputukile kwivwa zungo lia atu te anatete, yamba kuli Mose ngwenyi: “Mu chilombo muli chizungozungo cha jita.” 18 Alioze Mose yamba ngwenyi:

19 Muze Mose ahetele hakamwihi ni chilombo mba yamona mwana-ngombe ni chize A-Izalele te anahangana, yevwa uli unji, yambila mawe hashi waze te ali mu moko jenyi, mawe yapalwoka mushi lia mulundu. 20 Iye yanda mwana-ngombe yoze alingile, yamwocha, yamufwenya, mba yanda uto yaumbila mu meya, meya jacho yaanwisa A-Izalele. 21 Mba Mose yamba kuli Arone ngwenyi: “Yika atu wano akulinga mba waakokele shili yipwahaha?” 22 Arone yakumbulula ngwenyi: “Mwene wami kanda nutenuka. Yenu nunanyingika kanawa ngwenu atu wano kakuzanga kulinga yuma yipi. 23 Ayo kambanga kuli yami ngwo: ‘Tulingile umwe kazambi yoze matutetekela, mumu kutwanyingikine yize yalingiwa kuli yono Mose, yoze watuchijile mu chifuchi cha Engitu.’ 24 Kashika nambanga kuli ayo ngwami: ‘Mweswe uli ni yimbilingwa ya oru, ayizule, ayinehe kuli yami.’ Chocho, yingumbila oru yacho ha jiko, yihatuhuka mwana-ngombe au.”

25 Mose yamona ngwenyi atu te kanalingi yuma chamulingila, mumu Arone kakahashile kwakwika, chino yichaasaula kumeso ja akwa-kole jo. 26 Chocho, Mose yamana ku unjililo wa chilombo, yamba ngwenyi: “Iya uli sali lia Yehova? Eze kuli yami!” Mba A-Levi eswe yamujingilika. 27 Yamba kuli ayo ngwenyi: “Chocho anambe Yehova Zambi ya Izalele ngwenyi: ‘Mutu ni mutu alipachike katana kenyi mu zalilo, endangane mu chilombo cheswe ku chikolo ni chikolo, ashihe ndumbwenyi, mwenyembo ni sepa lienyi.’” 28 A-Levi yalinga kulita ni chize Mose aatumine. Chocho ha tangwa lize malunga 3,000 yaashiha. 29 Mba Mose yamba ngwenyi: “Musono liselenu ku usandu hanga nulinge milimo ya Yehova, mumu nwononokena yeswe yize iye anulweza, mutu ni mutu kashiha mwanenyi ni ndumbwenyi, musono iye manuwahisa.”

30 Mukwachako, Mose yamba kuli atu ngwenyi: “Yenu nwalinga shili yinene chinji, kashika mungukanduka haliapwila ngukaliwane ni Yehova, hanga ngukanuhanjikile hanji iye makonekena shili yenu.” 31 Chocho, Mose yahiluka kuli Yehova, yamba ngwenyi: “Atu wano kalinga shili yinene! Kalilingila kazambi wa oru. 32 Alioze, haliapwila, nyi muchilita ni upale we, konekena kama shili yo. Nyi ka, lisesa ngujimune kwe mu mukanda uze wangusonekene.” 33 Alioze, Yehova yamba kuli Mose ngwenyi: “Yoze walinga shili, mwe mungujimuna mu mukanda wami. 34 Haliapwila, yako, usongwele atu ndo ku chihela kuze nakulwezele. Mungelo wami maya kulutwe lienu. Mba ha tangwa lize mungukaafwetesa, mungukaneha lamba hali ayo mumu lia shili yo.” 35 Chocho, Yehova yaneha chilungo hali atu ha kulinga mwana-ngombe, mwana-ngombe yoze Arone alingile.

33 Yehova yamba nawa kuli Mose ngwenyi: “Yako, ununge ni wenyi ni atu waze yena wachijile mu Engitu, hanga waatwale mu chifuchi chize nalishingile kuhana kuli Apalahama, Izake ni Yakomba, ni kwamba ngwami: ‘Mungukachihana ku munyachi we.’ 2 Mungukatuma mungelo kulutwe lienu ni kuhuma A-Kanana, A-Amore, A-Hete, A-Perize, A-Hevwe ni A-Yepushe. 3 Yako mu chifuchi muze mwatwama yamwa yinji ni uchi. Alioze yami chichi kuya mukachi kenu, mumu nuli akwa-mbunge jikalu, nyi naya mukachi kenu, mungununongesa mu jila.”

4 Muze atu evwile maliji wano akalu, yaputuka kulila, niumwe wazalile yimbilingwa* wakuhi. 5 Yehova yamba kuli Mose ngwenyi: “Lweza A-Izalele ngwe: ‘Yenu nuli atu a mbunge jikalu. Te munguhasa kupalika mukachi kenu ha shimbu likehe ni kununongesa. Haliapwila kanda nuzala yimbilingwa,* shimbu munguchinyonga yize mungunulinga.’” 6 Kashika chize ku Mulundu wa Horepe, A-Izalele kakazalile* nawa yimbilingwa yo.

7 Mose yajika mbalaka yenyi haze lia chilombo, kusuku ndambu ni chilombo, yayivuluka ngwenyi mbalaka ya kulikungulwila. Mweswawo yoze wazangile kuhula Yehova, kapwile ni kuya ku mbalaka ya kulikungulwila haze lia chilombo. 8 Muze Mose apwile ni kuya ku mbalaka, A-Izalele eswe kapwile ni kumana ku yikolo ya mambalaka jo ni kutala Mose ndo muze manjila mu mbalaka ya kulikungulwila. 9 Muze Mose apwile ni kunjila mu mbalaka, nguji lia lelwa liapwile ni kuhulumuka ni kumana ku unjililo wa mbalaka shimbu Zambi anahanjika ni Mose. 10 Muze atu eswe apwile ni kumona nguji lia lelwa linamana ku chikolo cha mbalaka ya kulikungulwila, mutu ni mutu kapwile ni kufulamana ku chikolo cha mbalaka yenyi. 11 Yehova kapwile ni kuhanjika ni Mose meso ni meso, ngwe chize umwe mutu akuhanjika ni mutu-ni-mukwo. Muze Mose apwile ni kuhiluka mu chilombo, kavumbi kenyi Yoshua, mwana wa Nune, yoze wapwile chikwashi chenyi, te keshi kukatuka mu mbalaka.

12 Mose yamba kuli Yehova ngwenyi: “Yena unambe ngwe: ‘Songwela atu wano,’ alioze kuwangulwezele yoze maya hamwe ni yami. Chikwo nawa, hiwangulweza ngwe: ‘Yami ngunakunyingika* ha jina, uli ni utayizo kumeso jami.’ 13 Lisesa, nyi napwa ni utayizo kumeso je, ngulweze kama majila je, hanga ngukunyingike, ngununge kupwa ni utayizo kumeso je, yiwuluka nawa ngwe vungu lino kali atu je.” 14 Chocho Zambi yamba kuli iye ngwenyi: “Yami mwene munguya* hamwe ni yena, mba mungukakwaha uhwimino.” 15 Mba Mose yamba kuli iye ngwenyi: “Nyi yena mwene kuwayile* hamuwika ni yetu, kanda utuchiza hano tuli. 16 Kuchi mutunyingika ngwetu yami ni atu je, tuli ni utayizo kumeso je? Nyi yena muoya hamwe ni yetu, yami ni atu je, mutulisa ni atu eswe a hashi.”

17 Yehova yamba kuli Mose ngwenyi: “Ni chino unechi necho munguchilinga, mumu yena hiwapwa ni utayizo kumeso jami, yami ngunakunyingika ha jina.” 18 Mba Mose yamba ngwenyi: “Lisesa, ngulweze kama uhenya we.” 19 Iye yakumbulula ngwenyi: “Mungukulweza utu wami weswe ni kukwambulwila jina liami, Yehova. Mungutayiza mweswawo munguzanga kutayiza, ni kuvwila keke mweswawo munguzanga.” 20 Alioze yamba nawa ngwenyi: “Yena kuwatambile kumona chifwa chami, mumu niumwe mutu mamona chifwa chami manunga ni mwono wakuhi.”

21 Yehova yamba nawa ngwenyi: “Tala, chihela chili hakamwihi ni yami. Mana ha liwe. 22 Muze uhenya wami muukapalika, mungukakusa ku chimwe chivwenge cha liwe ni kufukako kwoko liami ndo muze mungupalika. 23 Muze mungukachizako kwoko liami, mukamona nyima yami. Alioze chifwa chami keshi kuchimona.”

34 Yehova yamba kuli Mose ngwenyi: “Sesa mawe aali waze alifwa ni atangu, mungusonekaho maliji waze apwile ha mawe atangu wapalwile. 2 Lilulieke chimene, mumu chimene mukakanduka ku Mulundu wa Sinai ukalisolole kuli yami helu lia mulundu. 3 Alioze, niumwe mutu katambile kukanduka hamwe ni yena. Ku mulundu kukwatambile kupwa mutu niumwe. Chipwe panga hanji ngombe kanda akalilako.”

4 Chocho, Mose yasesa mawe aali alifwa ni atangu. Yahinduka chimenemene yakanduka ku Mulundu wa Sinai ngwe chize Yehova amulwezele. Yambata mawe aali ku moko. 5 Mba Yehova yapalumuka mu lelwa, yamana hamuwika ni Mose ni kwambulula jina lia Yehova. 6 Yehova yapalika kumeso ja Mose ni kwamba ngwenyi: “Yehova, Yehova, Zambi mukwa-keke yoze wakulisa ha chihela cha akwo,* keshi kutenuka ni kawashi,* wazala too ni zango lia ushishiko,* Zambi wa umwenemwene, 7 yoze wakusolola zango lia ushishiko kuli tununu a tununu twa atu, yoze wakukonekena tupalia ni waze keshi kwononokena shimbi ni yivulumunyi. Alioze, keshi kwecha kuhana fumbo kuli yoze wahengesa. Makaneha lamba lia tupalia twa yisemi hali ana ni hali ajikulu jo, ha chisemuko chamuchitatu ni chamuchiwana.”

8 Hazehene Mose yahetama hashi yafulamana. 9 Mba yamba ngwenyi: “Yehova, nyi nguli ni utayizo kumeso je, lisesa, Yehova uye kama hamwe ni yetu chipwe ngwe tuli akwa-mbunge jikalu. Tukonekene kama tupalia ni shili yetu, ututayize kama ngwe atu je.” 10 Iye yakumbulula ngwenyi: “Ngunalingi usendo ni yenu ngwami: Mungulinga yuma ya kukomwesa kumeso ja atu je yize kanda achilinga kama ku chihela nichimwe hashi, chipwe ku mavungu eka. Atu eswe waze munukatunga no makamona milimo ya Yehova mumu ngunanulingila chuma cha kukomwesa.

11 “Panjika kanawa yize ngunakulweze musono. Munguhuma kumeso je A-Amore, A-Kanana, A-Hete, A-Perize, A-Hevwe ni A-Yepushe. 12 Kanyama uchine kulinga usendo ni atu a mu chifuchi chize unayi hanga chino chichine kupwa kambwila kuli yenu. 13 Alioze, yenu munukapuzula yilumbilo yo, kupupa manguji jo asandu ni kupatula mitondo yo yisandu. 14 Yenu kunwatambile kufulamana kumeso ja kazambi mweka mumu Yehova kakuzanga hanga atu amuwayile wika iye. Ewa, iye kali Zambi yoze wakuzanga hanga atu amuwayile wika iye. 15 Kanyamenu hanga nuchine kulinga usendo ni atu a mu chifuchi chize. Mumu muze malinga ukoi ni tuzambi two ni kulambula yitapo kuli ayo, umwe makanusanyika, chocho munukalia yitapo yo. 16 Mba yenu munukambachila ana jenu amwe a kuli ana jo a mapwo, ana jo a mapwo makalinga ukoi ni tuzambi two ni kutwala ana jenu a malunga kulinga ukoi ni tuzambi two.

17 “Kanda nulinga tuzambi twa utale wa kuzuzulula.

18 “Nwatamba kulinga Chiwanyino cha Mbolo Kujishi Futunwiso. Nukalie mbolo kujishi futunwiso ngwe chize nanulwezele. Nukachilinge ha matangwa shimbiali ha shimbu lize nasele ha kakweji wa Ambimbi, mumu nwatuhukile mu Engitu ha kakweji wa Ambimbi.

19 “Tupula-majimo eswe a malunga a yami ni tupula-majimo eswe a yimuna jenu, chipwe ana atangu a ngombe, chipwe a mapanga eswe a yami. 20 Kapula-jimo wa chimbulu ukamukuule ni mwana-panga. Alioze, nyi wamukuulile, ukamumakune kota. Tupula-majimo eswe a ana je a malunga watamba kwakuula. Niumwe katambile kwiza kumeso jami mokomoko.

21 “Watamba kukalakala ha matangwa asambano, alioze ha tangwa liamuchishimbiali ukahwime.* Chipwe lume ha mashimbu a kulima hanji a kucha watamba kuhwima.

22 “Ukalinge Chiwanyino cha Poso ni mbuto yitangu yize hiyahia ya kucha cha tiliku. Ukalinge nawa Chiwanyino cha Kukunga Mbuto* ku songo lia mwaka.

23 “Malunga eswe katamba kusoloka kumeso ja Mwene wamwenemwene, Yehova, Zambi wa A-Izalele katatu ha mwaka. 24 Mumu mungukahuma mavungu kumeso jenu ni kutohwesa chifuchi chenu. Niumwe kechi kavwila chifuchi chenu chipululu muze munukakanduka katatu ha mwaka hanga nukasoloke kumeso ja Yehova, Zambi yenu.

25 “Kanda uhana chitapo chami cha manyinga hamuwika ni chuma chize chili ni futunwiso. Chitapo cha Chizomboka nwatambile kuchifunga ndo tangwa likwo.

26 “Nwatamba kutwala ku zuwo lia Yehova Zambi yenu mbuto yitangu yipema yize hiyahia ya mu minda yenu.

“Kanda nukateleka mwana-pembe mu yamwa ya naye.”

27 Yehova yamba nawa kuli Mose ngwenyi: “Watamba kusoneka maliji wano, mumu mungulinga usendo ni yena ni A-Izalele kulita ni maliji wano.” 28 Mose yatwama ni Yehova ku mulundu matangwa 40 ni ufuku 40. Kalile mbolo chipwe kunwa meya. Yasoneka maliji a usendo ha mawe, lie Kumi lia Shimbi.

29 Chocho, Mose yasunuka ku Mulundu wa Sinai, te kali ni mawe aali a Uchela ku moko jenyi. Ha kusunuka ku mulundu, Mose te kanyingikine ngwenyi huma lienyi linahenye chinji mumu lia kuhanjika ni Zambi. 30 Muze Arone ni A-Izalele eswe atalile ku meso ja Mose, yamona ngwo kunahenye chinji, chocho yevwa woma wa kukundama kuli iye.

31 Alioze, Mose yaasanyika, mba Arone ni miata eswe a chikungulwila yakundama kuli iye, chocho Mose yahanjika no. 32 Kulutwe lia chino, A-Izalele eswe yakundama kuli iye mba yaalweza shimbi jeswe jize Yehova amuhele ku Mulundu wa Sinai. 33 Muze Mose apwile ni kuhwisa kuhanjika no, te kakulifuka chitambala ku meso. 34 Alioze, muze Mose apwile ni kusoloka kumeso ja Yehova hanga ahanjike nenyi, te kakuchiza chitambala ndo muze makatuka kumeso jenyi. Mba makatuka, maya ni kulweza A-Izalele shimbi jize atambula. 35 A-Izalele te kakumona ngwo ku meso ja Mose te kunahenye chinji. Chocho Mose kapwile ni kufuka cheka chitambala ku meso ndo muze manjila hanga ahanjike ni Zambi.*

35 Kulutwe, Mose yakungulula chikungulwila cheswe cha A-Izalele, yamba kuli ayo ngwenyi: “Yino ye Yehova amba hanga nulinge: 2 Munuhasa kukalakala ha matangwa asambano, alioze tangwa liamuchishimbiali lili lisandu kuli yenu, lili sambata ya uhwimino mumu lia Yehova. Mweswawo makalakala ha tangwa liacho akamushihe. 3 Kanda nukawika kahia ku mazuwo jenu ha tangwa lia Sambata.”

4 Mose yamba nawa ku chikungulwila cheswe cha A-Izalele ngwenyi: “Yino ye Yehova anambe ngwenyi: 5 ‘Kungilenu Yehova milambu mukachi kenu. Waze eswe mbunge yo muyizanga, anehe milambu kuli Yehova: Oru, prata, unengu, 6 wanda ulauluka, wa ufungo, wanda uchila, linyu yipema, wona wa pembe, 7 makupu a kuji a panga a kukwita ulombo uchila, makupu a foka, mapaya a mutondo wa mukesha, 8 maji a kusa mu ndeya, mbalasamu ya kulinga nayo maji a kuwayisa no ni ya kulinga nayo insensu ya lupembo mupema, 9 mawe a onikise ni mawe akwo hanga akaase ha efode ni ha chipwiko.

10 “‘Eswe waze akwete utotombo mukachi kenu, eze hanga alinge yeswe yize Yehova hamba: 11 Tabernakulu ni mbalaka yayo ni chifuko chayo, ngo ni mapaya, kangalo, manguji ni yimanyino yize yili ni yituwa, 12 Mushete ni mikambo yawo, chifuko ni chikalakala cha hina chakuhandununa muma musandu ni muma musandu mwahiana, 13 mesa ni mikambo yayo, yikwata yayo yeswe ni mbolo* jize akuhana kuli Zambi, 14 chikwachilo cha ndeya ya kutemuna ni yikwata yayo, ndeya jacho ni maji akusa mu ndeya, 15 chilumbilo cha insensu ni mikambo yacho, maji a kuwayisa no ni insensu ya lupembo mupema, chikalakala cha hina cha ku unjililo wa tabernakulu, 16 chilumbilo cha mulambu wa kulumba ni munyingo wacho wa unengu, mikambo yacho ni yikwata yacho yeswe, mbashila ni chikwachilo chayo, 17 mahina akuzezeleka a yiize, manguji jo ni yimanyino yo yize yili ni yituwa, chikalakala cha hina cha ku unjililo wa yiize, 18 mbambo ja tabernakulu ni mbambo ja yiize ni ngoji jayo, 19 mazalo a kutonga kanawa waze makakalakala no mu chihela chisandu, mazalo asandu a sasendote Arone ni mazalo ja ana jenyi a malunga, hanga akalinge mulimo wa usasendote.’”

20 Chocho, chikungulwila cheswe cha A-Izalele yichikatuka kumeso ja Mose. 21 Eswe waze azangile kuhana ni mbunge yimuwika* yaneha milambu yo kuli Yehova mu mbalaka ya kulikungulwila, hanga alinge nayo milimo yeswe ni mazalo asandu. 22 Ayo yanunga ni kwiza, malunga ni mapwo, eswe waze apwile ni mbunge ya kuhana. Yaneha yingeliengelie ya kusa ku mazalo, yimbilingwa, tuzeya ni yuma yeka ni yeka ya oru. Eswe yahana milambu yo ya oru kuli Yehova. 23 Mba eswe waze apwile ni wanda ulauluka, wa ufungo, wanda uchila, linyu yipema, wona wa pembe, makupu a kuji a panga a kukwita ulombo uchila ni makupu a foka, yaaneha. 24 Eswe waze ahanyine milambu ya prata hanji unengu yayineha kuli Yehova, ni eswe waze apwile ni mapaya a mutondo wa mukesha, yaaneha hanga alinge no milimo yeka ni yeka.

25 Mapwo eswe waze apwile ni ukete, yahosa ni moko jo, mba yaneha yize ahosele: Wanda ulauluka, wa ufungo, wanda uchila ni linyu yipema. 26 Mapwo eswe akwete ukete waze azangile, yahosa wona wa pembe.

27 Miata yaneha mawe a onikise ni mawe akwo hanga aase ha efode ni ha chipwiko. 28 Yaneha nawa mbalasamu, maji a kusa mu ndeya, maji akuwayisa no ni akulinga no insensu ya lupembo mupema. 29 Malunga ni mapwo eswe waze azangile kuhana ni mbunge yimuwika yaneha chimwe ku mulimo wa Yehova, uze atumine kulinga kupalikila muli Mose. A-Izalele yaneha yuma yeswe ni mbunge yimuwika ngwe yawana kuli Yehova.

30 Chocho, Mose yamba kuli A-Izalele ngwenyi: “Talenu! Yehova hasakula Mbezalele, mwana wa Uri, mwana wa Hure, wa ku vungu lia Yunda. 31 Kamuzalisa ni spiritu ya Zambi, ha kumwaha mana, malinjekela ni yinyingi ya kulinga milimo yeka ni yeka, 32 hanga alinge yuma ya kululieka kanawa, akalakale ni oru, prata ni unengu, 33 hanga atote ni kululieka mawe ni kulinga yuma yipema ya milali yeswe yize akulinga ni mapaya. 34 Yahana mbunge ya kulongesa kuli iye ni kuli Aholiambe, mwana wa Ahisamake, wa ku vungu lia Ndane. 35 Iye yaazalisa ni utotombo hanga alinge milimo yeka ni yeka: Mulimo wa kwola, wa ulangaji wa kukalakala ni wanda ulauluka, wa ufungo, wanda uchila ni linyu yipema, ni mulimo wa kuhosa. Malunga wano makalinga milimo yeka ni yeka ni kuwahisa milimo yeka ni yeka.

36 “Mbezalele makakalakala hamuwika ni Aholiambe ni malunga eswe akwete utotombo waze Yehova ahele mana ni malinjekela hanga alinge milimo yeswe yinatale ha milimo yisandu, ngwe chize Yehova ambile.”

2 Chocho, Mose yasanyika Mbezalele, Aholiambe ni malunga eswe akwete utotombo waze Yehova ahele mana, waze eswe apwile ni mbunge ya kulihana hanga alinge mulimo. 3 Ayo yatambula kuli Mose milambu yeswe yize A-Izalele anehene hanga alinge nayo milimo yisandu. Alioze chimene ni chimene, A-Izalele yanunga ni kuneha milambu.

4 Mba muze mulimo usandu waputukile, akwa-milimo eswe akwete utotombo, yaputuka kwiza umuwika-umuwika, 5 ni kuhanjika ni Mose. Ayo yamba ngwo: “Atu kananeha milambu yinji kuhiana yize mutukalakala nayo mu mulimo uze Yehova atuma kulinga.” 6 Ha kwivwa chocho, Mose yatuma kutwa mutambi uno mu chilombo cheswe ngwo: “Malunga ni mapwo, kanda nuneha nawa yikwata ya kulinga nayo mulimo usandu.” Chocho, katayijile nawa niumwe mutu anehe yimwe. 7 Yikwata te hiyoka naye kuhiana yize te makalakala nayo.

8 Chocho, akwa-milimo eswe akwete utotombo yatunga tabernakulu ni mahina kumi a linyu yipema chinji, wanda ulauluka, wa ufungo ni wanda uchila, iye* yatongelaho akerupimi. 9 Hina ni hina liapwile ni usuhwe wa metru* 13 ni utohwe wa metru 4. Mahina eswe kapwile ni utohwe umuwika. 10 Iye yanunga mahina atano, mba yanunga nawa mahina akwo atano. 11 Kusulaho, yalinga miya yikehe-yikehe ya wanda ulauluka ku songo lia hina lize te mulilinunga ni mahina akwo. Yalinga chizechene ku songo lia hina linene kuze mahina aali anene-anene te malinungina. 12 Yatonga miya 50 ku hina limwe, ni miya yikwo 50 ku songo lia hina likwo, kuze mahina aali anene-anene te malinungina, chocho miya yiyilitala yimwe ni yikwo. 13 Ku songo, yafula ngo 50 ja oru, yanunga mahina anene-anene ni ngo jacho, chocho tabernakulu yiyipwa chuma chimwika.

14 Mba iye yalinga mahina a wona wa pembe hanga akapwe mbalaka helu lia tabernakulu, yalinga mahina 11. 15 Hina ni hina te lili ni usuhwe wa metru 13 ni utohwe wa metru 4. Mahina eswe 11 te kali ni utohwe umuwika. 16 Iye yanunga mahina atano, yanunga nawa akwo asambano. 17 Mba yatonga miya 50 ku songo lia hina linene haze te manungina hina likwo linene, yalinga nawa miya yikwo 50 ku songo lia hina linene haze te manungina hina litangu. 18 Yafula ngo ja unengu 50, anunge yihanda ya mbalaka hanga mbalaka yipwe chuma chimuwika.

19 Iye yalingila mbalaka chifuko cha kupu lia kuji wa panga, yachikwita ulombo uchila, mba helu lia kupu liacho yafukaho kupu lia foka.

20 Mba yalinga mapaya a mutondo wa mukesha akujingilika no tabernakulu, chocho yaajika. 21 Paya ni paya liapwile ni uhuhwe wa metru jiwana ni utohwe wa centimetru 70. 22 Paya ni paya liapwile ni mbambo jaali jinalipalakenya umwe ni mukwo. Chenacho alingile ni mapaya eswe a tabernakulu. 23 Chocho yalinga mapaya, yaasa ku sali lia ku sule lia tabernakulu, sali lia ku uto yalingilako mapaya 20. 24 Mba yafula yimanyino 40 ya prata yize yili ni yituwa hanga yipwe kushi lia manguji 20, yimanyino yaali yize yili ni yituwa mwe mwanjilile mbambo jaali ja paya litangu, kushi lia paya ni paya yikupwa yimanyino yaali yize yili ni yituwa. 25 Sali lia ku sango ya tabernakulu, yalingilako mapaya 20 26 ni yamanyino yayo 40 yize yili ni yituwa. Yimanyino yaali yize yili ni yituwa yimunjila mbambo jaali ja paya litangu, kushi lia paya ni paya yikupwa yimanyino yaali yize yili ni yituwa.

27 Yalinga mapaya asambano, yaasa kunyima lia tabernakulu ku chitokelo. 28 Yalinga nawa mapaya aali hanga apwe ngwe manguji ha mbango jaali kunyima lia tabernakulu. 29 Mapaya jacho kaalingile akupalakenya aali-aali chize kushi ndo kwilu ku ngo yitangu. Chenacho alingile manguji aali a ha mambango. 30 Kashika, yikupwa mapaya nake ni yimanyino yo 16 ya prata yize yili ni yituwa, paya ni paya yilipwa ni yimanyino yaali yize yili ni yituwa.

31 Iye yalinga kangalo ja mutondo wa mukesha, kangalo jitano yijipwa ku mapaya sali limwe lia tabernakulu, 32 kangalo jitano yajisa ku mapaya sali likwo lia tabernakulu, kangalo jikwo jitano yajisa ku mapaya a kunyima lia tabernakulu sali lia ku chitokelo. 33 Yalinga lukangalo wa hakachi, yoze wapalikile hakachi ni hakachi ka mapaya, kukatuka songo limwe ndo songo likwo. 34 Ku mapaya yakwitako oru, yalingilako ngo ja oru muze te mumupalika kangalo, je kangalo yajikwita oru.

35 Mba kulutwe iye yalinga chikalakala cha hina cha wanda ulauluka, wa ufungo, wanda uchila ni linyu yipema chinji. Ku masongo a chikalakala cha hina yatongelako chizulie cha akerupimi. 36 Kusulaho, chikalakala cha hina yachilingila manguji awana a mutondo wa mukesha, yaakwita oru, yalinga nawa ngo ja oru. Manguji yaalingila yimanyino yiwana ya prata yize yili ni yituwa. 37 Mba ku chikolo cha mbalaka, yalingilako chikalakala cha hina cha wanda ulauluka, wa ufungo, wanda uchila ni linyu yipema chinji, 38 ni manguji atano ni ngo jo. Iye yakwita oru ku songo lia manguji ni yikwata yo ya kukasa nayo, alioze yimanyino yayo yitano yize yili ni yituwa yapwile ya unengu.

37 Mba Mbezalele yatunga Mushete wa mutondo wa mukesha. Usuhwe wawo wapwile wa centimetru* 110, utohwe wawo wapwile wa centimetru* 70, chizundamo chawo chapwile cha centimetru* 70. 2 Iye yaukwita oru yipema haze ni muchima, mba yaulamika oru ku masongo. 3 Yalinga ngo jiwana ja oru, hanga jipwe ha molu awana a Mushete, ngo jaali sali limwe, ngo jaali sali likwo. 4 Mba yasonga nawa mikambo ya mutondo wa mukesha, yayikwita oru. 5 Yanjisa mikambo yacho mu ngo ya Mushete, hanga apwe ni kuhasa kuumbata.

6 Iye yalinga chifuko cha oru yipema. Chifuko chacho chapwile ni usuhwe wa centimetru 110, utohwe wacho wapwile wa centimetru 70. 7 Yalinga akerupimi aali a oru ya kutatula ni mweto ku masongo eswe aali a chifuko. 8 Kerupimi umwe yapwa ku songo limwe, mukwo ku songo likwo. Yalinga akerupimi ku masongo eswe aali a chifuko. 9 Akerupimi eswe aali kapwile ni mapulwa akuzazulula, mapulwa jacho yazulamina ha chifuko. Akerupimi yalitala meso ni meso, mahuma jo yahetamina ha chifuko.

10 Mba yalinga mesa ya mutondo wa mukesha. Usuhwe wayo wapwile wa centimetru 90, utohwe wayo wapwile wa centimetru 45, chizundamo chayo cha centimetru 70. 11 Iye yaukwita oru yipema ni kuyilamika oru ku masango. 12 Ku songo lia mesa yasako mukomo umuwika uli ni utohwe wa mbanda kwoko,* mukomo wacho yaujingilika ni oru. 13 Chikwo nawa, iye yafula ngo jiwana ja oru, yajisa ha mambango awana, haze hatwama molu awana a mesa. 14 Ngo japwile hakamwihi ni mukomo, mu ngo jacho mwe atomekene mikambo hanga apwe ni kumbachila nayo mesa. 15 Mba iye yasonga mikambo yize mapwa ni kumbachila nayo mesa, yayilinga ni mutondo wa mukesha, yayikwita oru. 16 Mba yalinga yikwata yize te yakupwa ha mesa ni oru yipema: Malonga, misenge, yenga ni milondo yize makatehwina nayo milambu ya walwa.

17 Mwapwa muze, yalinga chikwachilo cha ndeya ni oru yipema, chikwachilo chacho yachilinga ni oru ya kutatula ni mweto. Chishina, mukungo, yikwachilo, misenge, maundu ni yitemo, yeswe yiyipwa chuma chimuwika. 18 Ku mukungo yikukatuka yikwachilo yisambano, yikwachilo yitatu sali limwe, yitatu sali likwo. 19 Sali ni sali yikupwa misenge yitatu ha yikwachilo yitatu yalifwa ni chitemo cha amendoa ni maundu ni yitemo ya kulonga. Chocho yalinga yikwachilo yisambano yize yakatukile ku mukungo wa chikwachilo cha ndeya. 20 Ku mukungo wa chikwachilo cha ndeya, yikupwa misenge yiwana yalifwa ni yitemo ya amendoa, ni maundu ni yitemo. 21 Mushi lia chikwachilo chitangu chize chinakatuka ku mukungo wa chikwachilo cha ndeya, yimupwa undu limuwika, mushi lia chikwachilo chamuchiali yimupwa undu limuwika, mushi lia chikwachilo cha kasula nemo yimupwa undu limuwika. Chocho alingile ni yikwachilo yisambano yize yakatukile ku mukungo wa chikwachilo cha ndeya. 22 Maundu, yikwachilo ni chikwachilo cheswe cha ndeya, yiyipwa chuma chimuwika, chakulinga ni oru yipema ya kutatula ni mweto. 23 Iye yalinga ndeya shimbiali, malumana jayo ni malonga jayo a kukwachila uto, yeswe yayilinga ni oru yipema. 24 Iye yanda talentu* yimuwika ya oru yipema yalinga nayo chikwachilo cha ndeya ni yuma yayo yeswe.

25 Iye yalinga chilumbilo cha insensu ni mapaya a mutondo wa mukesha. Chilumbilo chacho chapwile ni mambango awana a utohwe umuwika, usuhwe wacho wapwile wa centimetru 45, utohwe wacho wapwile wa centimetru 45 ni chizundamo chayo chapwile cha centimetru 90. Chilumbilo yichipwa ni mbinga ku mambango. 26 Iye yachikwita oru yipema, helu, sali ni sali ni ku mbinga, mba yachilamika oru ku masongo. 27 Iye yachilingila nawa ngo jaali ja oru mushi lia masongo sali ni sali muze matomeka mikambo yize mapwa ni kumbata nayo chilumbilo. 28 Mba yalinga mikambo ya mapaya a mutondo wa mukesha, yayikwita oru. 29 Iye yalinga nawa maji asandu akuwayisa no ni insensu yipema ya lupembo mupema, yeswe yayilulieka kanawa.*

38 Iye yalinga chilumbilo cha mulambu wa kulumba ni mapaya a mutondo wa mukesha. Mambango eswe awana a chilumbilo kapwile ni utohwe umuwika, chilumbilo chacho chapwile ni usuhwe wa metru 5, utohwe wa metru 5, chizundamo chayo chapwile cha metru 134. 2 Mba yasonga mbinga ha mbango jiwana ja chilumbilo. Kusulaho, yachikwita unengu. 3 Iye yalinga yikwata yeswe ya chilumbilo: Yikwata ya kuchiza nayo uto, yikaso, yenga, nguto ya misako ni malonga a kukwachila kahia. Yikwata yino yeswe yayilinga ni unengu. 4 Chilumbilo yachilingila munyingo, munyingo wacho wapwile wa unengu, yausa mushi lia mukomo, hakachi ni hakachi lia chilumbilo. 5 Yalinga ngo jiwana, yajisa ha mbango jiwana ja chilumbilo hakamwihi ni munyingo wa unengu, muze makatomeka mikambo. 6 Mba yalinga mikambo ya mapaya a mutondo wa mukesha, yayikwita unengu. 7 Yatomeka mikambo mu ngo sali ni sali lia chilumbilo hanga akahase kuchimbata. Iye yalinga chilumbilo cha mapaya, muchima yimupwa mwawashi.

8 Yalinga mbashila ya unengu ni chikwachilo cha unengu, ni ngaza* ja mapwo waze aluliekele hanga alinge milimo ku unjililo wa mbalaka ya kulikungulwila.

9 Mba yalinga yiize. Sali lia ku uto, yasako chikalakala cha hina lia linyu yipema chinji, cha usuhwe wa metru 45. 10 Manguji 20 ni yimanyino 20 yize yili ni yituwa yapwile ya unengu, ngo ja manguji ni yikwata yeswe ya kukasa nayo yapwile ya prata. 11 Sali lia ku sango neko kwapwile chikalakala cha hina cha usuhwe wa metru 45. Manguji 20 ni yimanyino 20 yize yili ni yituwa yapwile ya unengu. Ngo ja manguji ni yikwata yeswe ya kukasa nayo yapwile ya prata. 12 Sali lia ku chivumbuko, kwapwile chikalakala cha hina cha metru 23. Kwapwile manguji 10 ni yimanyino 10 yize yili ni yituwa. Ngo ja manguji ni yikwata yeswe ya kukasa nayo yapwile ya prata. 13 Ku chivumbuko cha tangwa, utohwe wa yiize wapwile wa metru 23. 14 Sali limwe lia unjililo, kwapwile chikalakala cha hina cha metru 7, manguji atatu ni yimanyino yitatu yize yili ni yituwa. 15 Mba sali likwo lia unjililo neko kwapwile chikalakala cha hina cha metru 7, manguji atatu ni yimanyino yitatu yize yili ni yituwa. 16 Yikalakala yeswe ya mahina yize yajingilika yiize yapwile ya linyu yipema chinji. 17 Yimanyino ya manguji yize yili ni yituwa yapwile ya unengu, ngo ni yikwata ya kukasa nayo manguji yapwile ya prata, ku masongo ja manguji kwapwile kwa kukwita prata. Manguji eswe a mu yiize kapwile ni yikwata ya kukasa nayo ya prata.

18 Chikalakala cha hina cha ku unjililo wa yiize kachitongele ni wanda ulauluka, wa ufungo, wanda uchila ni linyu yipema chinji. Chikalakala cha hina chapwile ni usuhwe wa metru 9 ni chizundamo cha metru 3, chikalakala chacho chapwile ni chizundamo chimuwika ni chikalakala cha hina cha mu yiize. 19 Manguji awana ni yimanyino yiwana yize yili ni yituwa yapwile ya unengu. Ngo ni yikwata ya kukasa nayo yapwile ya prata, ku masongo ja manguji kwapwile kwa kukwita prata. 20 Mbambo jeswe ja tabernakulu ni mbambo jeswe te jajingilika yiize japwile ja unengu.

21 Chino che kwalula cha yuma yize alingile nayo tabernakulu, tabernakulu ya Uchela. Yuma yacho yayalula kuli A-Levi kulita ni shimbi ya Mose. Yoze te unamanyinako kapwile Itama, mwana wa sasendote Arone. 22 Mbezalele, mwana wa Uri, mwana wa Hure, wa ku vungu lia Yunda yalinga yuma yeswe yize Yehova atumine Mose kulinga. 23 Kapwile ni Aholiambe, mwana wa Ahisamake, wa ku vungu lia Ndane, mukwa-kulinga milimo yeka ni yeka, mulimo wa kwola ni ulangaji wa kukalakala ni wanda ulauluka, wa ufungo, wanda uchila ni linyu yipema.

24 Oru yeswe yize akalakalile nayo mulimo mu chihela chisandu, yapwile unji uzewene ni oru yize ahanyine ngwe mulambu wa kuhungisa: Talentu* 29 ni shekele* 730, kulita ni shekele yize akuhana mu chihela chisandu.* 25 Prata ya atu waze alwile mu chikungulwila yapwile talentu 100 ni shekele 1,775, kulita ni shekele yize akuhana mu chihela chisandu.* 26 Mutu mweswe yoze asonekesene, kuchiza kuli mutu yoze wapwile ni miaka 20 ndo helu, yahana chipinji cha shekele kulita ni shekele yize te akuhana mu chihela chisandu.* Atu jacho kapwile 603,550.

27 Prata yize alingile nayo yimanyino yize yili ni yituwa ya mu chihela chisandu ni yimanyino yize yili ni yituwa ya chikalakala cha hina, yapwile talantu 100, yimanyino 100 yize yikwete yituwa kayilingile ni talentu 100, chekwamba, chimanyino ni chimanyino kachilingile ni talentu yimuwika. 28 Ngo ja ku manguji kajilingile ni shekele 1,775, ku masongo ja manguji yakwitako prata ni kwanunga limwe ni likwo.

29 Yawana* ya unengu yapwile talentu 70 ni shekele 2,400. 30 Ni unengu uno, iye yalinga nawo yimanyino yize yili ni yituwa ya ku unjililo wa mbalaka ya kulikungulwila, chilumbilo cha unengu, munyingo wa unengu wa chilumbilo ni yikwata yeswe ya chilumbilo, 31 yimanyino yize yili ni yituwa yajingilika yiize, yimanyino yize yili ni yituwa ya ku unjililo wa yiize, mbambo jeswe ja tabernakulu ni mbambo jeswe jajingilika yiize.

39 Mazalo a kukalakala no mu chihela chisandu, yaatonga kanawa ni wanda ulauluka, wa ufungo ni wanda uchila. Yalinga mazalo asandu ja Arone ngwe chize Yehova alwezele Mose.

2 Iye yalinga efode ni oru, wanda ulauluka, wa ufungo, wanda uchila ni linyu yipema chinji. 3 Yalinga yipenya ya oru, yayitatula ni mweto yiyilela ngwe mafwo, ku yipenya yacho kwe achijile sambu jize ahosele ni wanda ulauluka, wa ufungo, wanda uchila ni linyu yipema. Efode yayikundula ku masongo. 4 Efode yayilingila yihanda ya mahina, yize anunginyine ha yipaya. 5 Muya wa kukundula ku masongo uze uli wa kutongela ku efode hanga ukwate efode, kaulingile ni yikwata yimuwika: Oru, wanda ulauluka, wa ufungo, wanda uchila ni linyu yipema chinji, ngwe chize Yehova alwezele Mose.

6 Mba yasa mawe a onikise ha yikwachilo ya oru ni kwolaho majina ja ana a Izalele, ngwe chize akusa chijikilo. 7 Iye yanangika mawe aali ha yipaya ya efode, mawe jacho kapwile chiwulwiso kuli ana a Izalele, ngwe chize Yehova alwezele Mose. 8 Kusulaho, yalinga chipwiko ngwe chizechene alingile efode: Mulimo wa mukwa-kwola ni oru, wanda ulauluka, wa ufungo, wanda uchila ni linyu yipema chinji. 9 Muze apwile ni kuchikoneka, mambango eswe awana a chipwiko te kakupwa chimuwika. Kulita ni mulali uze alingilile chipwiko, muze apwile ni kuchikoneka te chakupwa ni usuhwe wa centimetru 22 ni utohwe wa centimetru 22.* 10 Ha chipwiko yalamikaho milongo yiwana ya mawe. Mulongo utangu wapwile wa liwe lia rupi, topajiu ni esmeralda. 11 Mulongo wamuchiali wapwile wa liwe lia turkeza, safwira ni jasepe. 12 Mulongo wamuchitatu wapwile wa liwe lia lesheme, agata ni ametita. 13 Mulongo wamuchiwana wapwile wa liwe lia krisolita, onikise ni jada. Mawe wano eswe kaalamikine ha yikwachilo ya oru. 14 E mawe kalitele ni majina 12 ja ana a Izalele, ha liwe ni liwe yolaho jina lia mutu ngwe chize akusa chijikilo. Jina ni jina yilisolola vungu limwe lia mavungu 12.

15 Mba chipwiko yachilingila malenge aali a oru yipema, akuhosa ngwe mihipu. 16 Yalinga nawa yikwachilo ya oru yiali ni ngo jiali ja oru, ngo jacho yajisa ku masongo aali a chipwiko. 17 Kusulaho, yapalikisa malenge aali a oru mu ngo jiali ku masongo a chipwiko. 18 Yapalikisa masongo a malenge aali mu yituwa ya yikwachilo yiali ni kwakashila ha yipaya ya efode kulutwe liayo. 19 Yalinga ngo jiali ja oru ni kujisa ku masongo aali a chipwiko, ku chihanda cha muchima chize chinatale ha efode. 20 Mba yalinga nawa ngo jiali ja oru ni kujisa helu lia efode mushi lia mikapa yiali yinapalika ha chipaya, hakamwihi ni unungino wa efode, helu lia muya wa efode wa kukundula. 21 Kusulaho, yakasa chipwiko ku ngo ja chipwiko ni ngo ja efode ni wanda ulauluka, hanga chipwiko chichine kukasuluka. Chino muchikwasa hanga chipwiko chipwe ha chihela chacho ha efode helu lia muya wa kukundula, ngwe chize Yehova alwezele Mose.

22 Mba iye yanuka chikuto chisuku cha efode cha moko ehi, cheswe chapwile cha wanda ulauluka, mulimo wa mukwa-kuhosa. 23 Chituwa cha kutuhwishila mutwe chapwile hakachi ni hakachi ka chikuto cha moko ehi. Chituwa chacho kachikundwile ku masongo ni wanda, ku kota yichipwa ngwe chikuto cha maswalale hanga chichine kusuwika. 24 Ku songo lia chikuto yatongelako mafufu alifwa ngwe muhuko wa romana, akulinga ni wanda ulauluka, wa ufungo ni wanda uchila, yeswe yakutongela hamuwika. 25 Mba yalinga ngezo ni oru yipema, yajijingilika ku songo lia chikuto cha moko ehi hakachi ka romana. 26 Ku songo lieswe lia chikuto cha moko ehi, yajingilikako ngezo yimuwika romana limuwika, ngezo yimuwika, romana limuwika, chikuto chacho kapwile ni kuchizala hanga alinge nacho mulimo wa usasendote, ngwe chize Yehova alwezele Mose.

27 Yatongela Arone ni ana jenyi a malunga mazalo asuku-asuku ni linyu yipema, mulimo wa mukwa-kuhosa. 28 Yalinga chitambala ni linyu yipema. Chitambala cha kululieka kanawa, tuputula a linyu yipema chinji, 29 ni muya wa kulinga ni linyu yipema chinji, wanda ulauluka, wa ufungo ni wanda uchila, ngwe chize Yehova alwezele Mose.

30 Kusulaho, yalinga chipenya chapeyima ni oru yipema, chilayi chisandu,* yolaho maliji wano ngwe chize akusa ha chijikilo ngwo: “Usandu wapwa wambala wa Yehova.” 31 Chipenya yachikasa ni lwoji wa kulinga ni wanda ulauluka hanga akachise ha chitambala, ngwe chize Yehova alwezele Mose.

32 Chocho, yahwisa mulimo weswe wa tabernakulu ni mbalaka ya kulikungulwila. A-Izalele yalinga yuma yeswe kulita ni chize Yehova atumine kuli Mose. Yalinga chizechene aalwezele.

33 Mba yatwala tabernakulu kuli Mose, mbalaka ya kulikungulwila ni yikwata yamo yeswe: Ngo, mapaya, kangalo, manguji, ni yimanyino yize yili ni yituwa, 34 kupu lia kuji wa panga lia kukwita ulombo uchila, kupu lia foka, chikalakala cha hina cha kuhandununa muma musandu ni muma musandu mwahiana, 35 mushete wa Uchela ni mikambo yawo ni chifuko, 36 mesa ni yikwata yayo yeswe ni mbolo jize akuhana kuli Zambi, 37 chikwachilo cha ndeya cha oru yipema, mulongo wa ndeya ni yikwata yayo yeswe ni maji akusa mu ndeya, 38 chilumbilo cha oru, maji akuwayisa no, insensu ya lupembo mupema, chikalakala cha hina cha ku unjililo wa mbalaka, 39 chilumbilo cha unengu ni munyingo wacho wa unengu, mikambo yayo ni yikwata yayo yeswe, mbashila ni chikwachilo chayo, 40 mahina akuzezeleka a yiize ni manguji jo ni yimanyino yo yize yili ni yituwa, chikalakala cha hina cha ku unjililo wa yiize ni ngoji jacho ni mbambo jacho, yikwata yeswe ya kulinga nayo milimo mu tabernakulu, mu mbalaka ya kulikungulwila, 41 mazalo a kutonga kanawa waze makakalakala no mu chihela chisandu, mazalo asandu ja sasendote Arone ni mazalo ja ana jenyi hanga alinge mulimo wa usasendote.

42 A-Izalele yalinga mulimo weswe kulita ni yuma yeswe yize Yehova alwezele Mose. 43 Muze Mose ahengwile kanawa mulimo weswe uze ayo alingile, yamona ngwenyi kaulingile kulita ni chize Yehova atumine. Chocho Mose yaawahisa.

40 Yehova yamba kuli Mose ngwenyi: 2 “Ha tangwa litangu lia kakweji mutangu, watamba kujika tabernakulu, mbalaka ya kulikungulwila. 3 Ukasemo Mushete wa Uchela ni kuuhengeka ni chikalakala cha hina. 4 Watamba kutwala mesa muchima ni kululieka yuma yize muyipwa helu lia mesa. Watamba kutwala nawa chikwachilo cha ndeya muchima ni kukwachisa ndeya jako. 5 Kulutwe lia Mushete wa Uchela, ukaseko chilumbilo cha oru cha kwochela insensu ni kusa chikalakala cha hina ku unjililo wa tabernakulu.

6 “Watamba kusa chilumbilo cha mulambu wa kulumba kulutwe lia unjililo wa tabernakulu, mbalaka ya kulikungulwila, 7 kusa mbashila hakachi ka mbalaka ya kulikungulwila ni chilumbilo, ni kusamo meya. 8 Ukajike yiize yakujingilika tabernakulu ni kuzezeleka chikalakala cha hina ku unjililo wa yiize. 9 Mba wande maji a kuwayisa no, uwayise tabernakulu ni yuma yeswe yize yilimo, uyipwise yisandu ni yikwata yamo yeswe, chocho tabernakulu muyipwa yisandu. 10 Watamba kuwayisa chilumbilo cha mulambu wa kulumba ni yikwata yacho yeswe ni kuchipwisa chisandu, chocho muchipwa chilumbilo chisandu chahiana. 11 Watamba kuwayisa mbashila ni chikwachilo chayo ni kuyipwisa yisandu.

12 “Mba unehe Arone ni ana jenyi a malunga hakamwihi ni unjililo wa mbalaka ya kulikungulwila, wasanyise meya. 13 Ujike Arone mazalo asandu, umuwayise ni kumupwisa musandu, hanga angulingile mulimo wa usasendote. 14 Mba unehe ana jenyi a malunga ni kwajika mazalo asuku-asuku. 15 Watamba kwawayisa ngwe chize wawayisa tato, chocho ayo mangulingila mulimo wa usasendote. Kuwayisa chino muchaakwasa hanga usasendote ununge kupwa ni wo ku yisemuko yo yeswe.”

16 Mose yalinga yeswe yize Yehova amutumine. Yalinga chizechene amulwezele.

17 Ha kakweji mutangu, ha mwaka wamuchiali, ha tangwa litangu lia kakweji, tabernakulu yayijika. 18 Muze Mose ajikile tabernakulu, yasa hashi yimanyino yize yili ni yituwa, yajika mapaya, yasa kangalo ni kujika manguji. 19 Iye yala tenda ha tabernakulu, mba yasa chifuko helu lia tenda, ngwe chize Yehova alwezele Mose.

20 Mba yanda mawe waze amuhele ngwe Uchela yaasa mu Mushete. Yatomeka mikambo ku Mushete, yaufuka chifuko. 21 Yatwala Mushete wa Uchela muchima lia tabernakulu, yazezeleka chikalakala cha hina chize chakuhandununa muma musandu ni muma musandu mwahiana, yahengeka Mushete wa Uchela, ngwe chize Yehova alwezele Mose.

22 Mba yasa mesa mu mbalaka ya kulikungulwila haze lia chikalakala cha hina, sali lia ku sango ya tabernakulu, 23 yasaho mbolo ja kulonga kanawa, kumeso ja Yehova, ngwe chize Yehova alwezele Mose.

24 Yasa ndeya mu mbalaka ya kulikungulwila kulutwe lia mesa sali lia ku uto ya tabernakulu. 25 Yakwachisa ndeya kumeso ja Yehova, ngwe chize Yehova alwezele Mose.

26 Yasa chilumbilo cha oru mu mbalaka ya kulikungulwila, kulutwe lia chikalakala cha hina, 27 hanga akocheleho insensu ya lupembo mupema, ngwe chize Yehova alwezele Mose.

28 Mba iye yazezeleka chikalakala cha hina ku unjililo wa tabernakulu.

29 Yasa chilumbilo cha mulambu wa kulumba ku unjililo wa tabernakulu, hanji ngwetu, mbalaka ya kulikungulwila, hanga ahanyineho milambu ya kulumba ni milambu ya mbuto, ngwe chize Yehova alwezele Mose.

30 Mba yasa mbashila hakachi ka mbalaka ya kulikungulwila ni chilumbilo, yasamo meya hanga ayo apwe ni kusana. 31 Mose, Arone ni ana jenyi a malunga yasanyinamo ku moko ni ku molu. 32 Mashimbu eswe te akunjila mu mbalaka ya kulikungulwila hanji kukundama ku chilumbilo, ayo kapwile ni kusana, ngwe chize Yehova alwezele Mose.

33 Kusongo, iye yajika yiize yakujingilika tabernakulu ni chilumbilo, yazezeleka chikalakala cha hina ku unjililo wa yiize.

Chocho Mose yahwisa mulimo. 34 Lelwa yiliputuka kufuka mbalaka ya kulikungulwila, mba tabernakulu yiyizala too ni uhenya wa Yehova. 35 Mose kahashile kunjila mu mbalaka ya kulikungulwila mumu lelwa te linamana helu lia mbalaka, tabernakulu te yinazala too ni uhenya wa Yehova.

36 Muze lelwa liapwile ni kukatuka helu lia tabernakulu, A-Izalele no kapwile ni kukatuka hanga akaule lelwa. Chino chapwile ni kulingiwa mu wenyi wo weswe. 37 Nyi lelwa kuliakatukile, niumwe yoze te wakukatuka wakuhi, ndo tangwa lize lelwa mulikatuka. 38 Mumu lelwa lia Yehova liapwile ni kutwama ha tabernakulu ha mashimbu a mwalwa, ha mashimbu a ufuku, hapwile ni kupwa nguji lia kahia, kumeso ja akwa-zuwo lieswe lia Izalele, mu wenyi wo weswe.