ULEVI

1 Mba Yehova yasanyika Mose kukatuka mu tabernakulu, yamba kuli iye ngwenyi: 2 “Amba kuli A-Izalele ngwe: ‘Nyi umwe mutu hakachi kenu mazanga kuhana mulambu kuli Yehova hakachi ka yimuna, katamba kulambula ngombe hanji panga chipwe pembe.

3 “‘Nyi mazanga kulambula mulambu wa kulumba hakachi ka ngombe jenyi, katamba kulambula ngombe wa kuji yoze keshi kapalia. Katamba kumuhana kuli Yehova ni mbunge yenyi yeswe ku unjililo wa mbalaka ya kulikungulwila. 4 Iye katamba kusa kwoko lienyi ha mutwe wa chimuna yoze mahana ngwe mulambu wa kulumba, mba Zambi matayiza mulambu wenyi ni kukonekena shili yenyi.

5 “‘Chocho mashiha mwana-ngombe wa kuji kumeso ja Yehova, mba asasendote, ana ja Arone manda manyinga ni kwasapwila ku masesa eswe a chilumbilo chize chili ku unjililo wa mbalaka ya kulikungulwila. 6 Katamba kuzuwa kupu lia mulambu wa kulumba ni kupatwola chimuna mu yipinji-yipinji. 7 Asasendote, ana ja Arone, akawike kahia ha chilumbilo ni kusaho kunyi. 8 Asasendote, ana ja Arone, makasa yipinji ya yifwo ya mulambu hamuwika ni mutwe ni maji* ha kunyi jize jili ha jiko helu lia chilumbilo. 9 Mijingwa ni molu akayikose ni meya. Sasendote makayifwinjisa yeswe ha chilumbilo ngwe mulambu wa kulumba. Uli mulambu wa kwocha wa lupembo mupema kuli Yehova.

10 “‘Nyi manda hakachi ka chendo chimuna yoze mahana ngwe mulambu wa kulumba, chipwe ana-mapanga a kuji hanji pembe, katamba kulambula kuji yoze keshi kapalia. 11 Chimuna katamba kumushihila sali lia ku sango lia chilumbilo kumeso ja Yehova, mba asasendote, ana ja Arone, makasapwila manyinga ku masesa eswe a chilumbilo. 12 Iye makapatwola chimuna mu yipinji-yipinji, mba sasendote mayichinga ni mutwe ni maji, ni kuyisa ha kunyi jize jili ha jiko helu lia chilumbilo. 13 Iye makakosa mijingwa ni molu ni meya. Sasendote makayifwinjisa yeswe ha chilumbilo ngwe mulambu wa kulumba. Uli mulambu wa kulumba, mulambu wa kwocha wa lupembo mupema kuli Yehova.

14 “‘Alioze, nyi iye mahana tujila ngwe mulambu wa kulumba kuli Yehova, akahane yawana ya tutele hanji ana a membe. 15 Sasendote akatwale kajila ku chilumbilo. Iye makapatula mutwe wa kajila ni chala ni kumufwinjisa ha chilumbilo. Alioze, makecha hanga manyinga ahichile sali lia chilumbilo. 16 Iye katamba kuchiza chisakwilia ni ngona ni kuyimbila sali lia chilumbilo, ku chivumbuko, kuze akumwangina uto. 17 Akamupule hakachi-ni-hakachi ka mapulwa, alioze katambile kumuhandununa mu yihanda yaali. Sasendote makafwinjisa kajila ha chilumbilo, ha kunyi jize jili ha jiko helu lia chilumbilo. Uli mulambu wa kulumba, mulambu wa kwocha wa lupembo mupema kuli Yehova.

2 “‘Nyi umwe* mazanga kuhana mulambu wa mbuto kuli Yehova, mulambu wacho watela kupwa wa unga wafufunuka, akaseho maji ni libanu. 2 Mba matwala mulambu wacho kuli asasendote, ana ja Arone, sasendote umwe hakachi ko mazomonaho kwoko lia unga ni maji ni libanu yeswe. Iye makafwinjisa mulambu wacho ha chilumbilo, hanga Zambi ewuluke mulambu weswe. Uli mulambu wa kwocha wa lupembo mupema kuli Yehova. 3 Yize muyisala ha mulambu wa mbuto, muyikapwa ya Arone ni ana jenyi a malunga, ngwe chuma chisandu chahiana cha ku mulambu wa kwocha wa Yehova.

4 “‘Nyi muzanga kuhana mulambu wa mbuto ya kwochela ha jiko, mulambu wacho watamba kupwa wa unga wafufunuka, mbolo ja kujingulula ngwe kazeya kujishi futunwiso ja kulinga ni maji, hanji mbolo japatamana kujishi futunwiso ja kukwita maji.

5 “‘Nyi mulambu we muupwa wa mbuto ya kukangila ha chikango,* watamba kupwa wa unga wafufunuka kuushi futunwiso wakuchinga ni maji. 6 Ukayipalule yihanda-yihanda ni kuyizujila maji. Uli mulambu wa mbuto.

7 “‘Nyi mulambu we muupwa wa mbuto ya kukangila mu ndoho, watamba kupwa wa unga wafufunuka wakuchinga ni maji. 8 Ukatwale mulambu wa mbuto kuli Yehova wakulinga ni yuma yacho. Akauhane kuli sasendote yoze makautwala hakamwihi ni chilumbilo. 9 Sasendote makanda ndambu ha mulambu wa mbuto, makafwinjisa mulambu wacho ha chilumbilo, hanga Zambi ewuluke mulambu weswe, uli mulambu wa kwocha wa lupembo mupema kuli Yehova. 10 Yize muyisala ha mulambu wa mbuto, muyikapwa ya Arone ni ana jenyi a malunga ngwe chuma chisandu chahiana cha ku mulambu wa kwocha wa Yehova.

11 “‘Kanda nukahana kuli Yehova niumwe mulambu wa mbuto uze uli ni futunwiso. Kunwatambile kufwinjisa futunwiso chipwe uchi ngwe mulambu wa kwocha wa Yehova.

12 “‘Nwatamba kuyihana kuli Yehova ngwe mulambu wa mbuto yitangu, alioze katambile kuyitwala ku chilumbilo ngwe mulambu wa lupembo mupema.

13 “‘Mulambu weswe wa mbuto uze munuhana, nwatamba kusako mungwa. Mungwa wa usendo wa Zambi yenu kuwatambile kuhona ha mulambu wenu wa mbuto. Munukaneha mungwa hamwe ni milambu yenu yeswe.

14 “‘Nyi mununeha milambu kuli Yehova ya mbuto yitangu yize hiyahia, yatamba kupwa mbuto ya wisu ya kukanga ha kahia, mbuto ya wisu ya kufwenya* ngwe mulambu wa mbuto yenu yitangu yize hiyahia. 15 Ha mulambu watamba kusaho maji ni libanu. Uli mulambu wa mbuto. 16 Sasendote makafwinjisa ndambu ya mbuto ya kufwenya ya kuchinga ni maji hanga Zambi ewuluke mulambu weswe, ni libanu yeswe, ngwe mulambu wa kwocha wa Yehova.

3 “‘Nyi umwe mutu maneha mulambu wa sambukila, mba mulambu wacho mawanda hakachi ka ngombe, apwe wa kuji hanji chihwo, katamba kuhana chimuna yoze keshi kapalia kumeso ja Yehova. 2 Mutu wacho katamba kusa kwoko ha mutwe wa mulambu wenyi, mba chimuna wacho makamushihila ku unjililo wa mbalaka ya kulikungulwila. Mba asasendote, ana ja Arone, makasapwila manyinga ku masesa eswe a chilumbilo. 3 Iye makahana chihanda cha mulambu wa sambukila ngwe mulambu wa kwocha wa Yehova: Maji eswe atwama ku mijingwa, 4 ana-sukwa* aali ni maji jako waze atwama ku mutanda. Iye makachiza maji a ku liayi hamuwika ni ana-sukwa. 5 Ana ja Arone makafwinjisa yuma yino yeswe ha chilumbilo, helu lia mulambu wa kulumba uze uli ha kunyi jize jili ha jiko. Uli mulambu wa kwocha wa lupembo mupema kuli Yehova.

6 “‘Nyi mulambu wa sambukila uze mahana kuli Yehova mawanda hakachi ka mapanga hanji pembe, ahane chimuna yoze keshi kapalia, apwe kuji hanji chihwo. 7 Nyi mulambu wenyi muupwa wa mwana-panga wa kuji, akamuhane kumeso ja Yehova. 8 Iye akase kwoko ha mutwe wa mulambu wenyi, mba chimuna wacho makamushihila kulutwe lia mbalaka ya kulikungulwila. Ana ja Arone makasapwila manyinga ku masesa eswe a chilumbilo. 9 Iye makahana maji a mulambu wa sambukila ngwe mulambu wa kwocha wa Yehova. Iye makachiza muchila weswe wamuundu hakamwihi ni mutanda, maji eswe a ku mijingwa, 10 ni ana-sukwa* aali ni maji jako waze atwama ku mutanda. Iye makachiza maji a ku liayi hamuwika ni ana-sukwa. 11 Sasendote makafwinjisa yuma yino yeswe ha chilumbilo ngwe kulia,* uli mulambu wa kwocha wa Yehova.

12 “‘Nyi mulambu wenyi muupwa wa pembe, akamuhane kumeso ja Yehova. 13 Iye akase kwoko ha mutwe wa mulambu wenyi, mba chimuna wacho makamushihila kulutwe lia mbalaka ya kulikungulwila. Ana ja Arone makasapwila manyinga ku masesa eswe a chilumbilo. 14 Chihanda chize iye makahana ngwe mulambu wa kwocha wa Yehova, chili maji eswe a ku mijingwa, 15 ni ana-sukwa* aali ni maji jako waze atwama ku mutanda. Iye makachiza maji a ku liayi hamuwika ni ana-sukwa. 16 Sasendote makafwinjisa yino yuma yeswe ha chilumbilo ngwe kulia,* uli mulambu wa kwocha wa lupembo mupema. Maji eswe kali ambala a Yehova.

17 “‘Yino yili shimbi ya mutolo ku yisemuko yenu yeswe, kweswako munukatunga: Kanda nulia maji chipwe manyinga.’”

4 Yehova yamba kuli Mose ngwenyi: 2 “Lweza A-Izalele ngwe: ‘Nyi umwe mutu* malinga shili chakuhona kunyingika, ha kulinga chuma cheswacho chize Yehova akanjishile ngwenyi kanda nuchilinga, chino che nwatamba kulinga:

3 “‘Nyi sasendote wakuwayisa mavulumuna ni kukokela atu mulonga, mumu lia shili yize alinga, iye katamba kuhana mwana-ngombe wa kuji kuli Yehova ngwe mulambu wa shili. 4 Iye akatwale ngombe wa kuji ku unjililo wa mbalaka ya kulikungulwila kumeso ja Yehova, akase kwoko ha mutwe wa mwana-ngombe wa kuji ni kumushiha kumeso ja Yehova. 5 Mba sasendote wakuwayisa makanda ndambu ya manyinga a mwana-ngombe wa kuji ni kwatwala muchima lia mbalaka ya kulikungulwila. 6 Sasendote makatata munwe mu manyinga ni kusapwila yimwe ndambu yisuho shimbiali kumeso ja Yehova, kulutwe lia chikalakala cha hina cha mu chihela chisandu. 7 Sasendote makasa nawa ndambu ya manyinga ku mbinga jili ku chilumbilo cha insensu ya lupembo mupema chize chili kumeso ja Yehova mu mbalaka ya kulikungulwila. Manyinga eswe a mwana-ngombe wa kuji waze masalaho, akaazujile ku shina lia chilumbilo cha mulambu wa kulumba chize chili ku unjililo wa mbalaka ya kulikungulwila.

8 “‘Iye makachiza maji eswe a mwana-ngombe yoze makahana ngwe mulambu wa shili, makachiza nawa maji eswe a ku mijingwa, 9 ana-sukwa aali ni maji jako waze atwama ku mutanda, makachiza nawa maji a ku liayi hamuwika ni ana-sukwa, 10 ngwe chizechene akulinga ni ngombe wa mulambu wa sambukila. Sasendote makafwinjisa yino yuma yeswe ha chilumbilo cha mulambu wa kulumba.

11 “‘Alioze, hakutwala ku kupu lia mwana-ngombe wa kuji, ni yifwo yenyi yeswe hamuwika ni mutwe, molu, mijingwa ni ufwachi 12 yeswe yize muyisalaho, akayitwale haze lia chilombo ku chihela chipema, kuze akumwangina uto* hanga akayoche ha jiko. Katamba kuyochela kuze akumwangina uto.

13 “‘Nyi chikungulwila cheswe cha A-Izalele muchipwa ni mulonga ha kulinga shili chakuhona kunyingika, mba chikungulwila muchihona kunyingika ngwo chalinga chuma chize Yehova akanjishile ngwenyi kanda achilinga, 14 mba shili yacho mayinyingika, chikungulwila chatamba kuhana mwana-ngombe wa kuji ngwe mulambu wa shili ni kuutwala kulutwe lia mbalaka ya kulikungulwila. 15 Makulwana a chikungulwila makasa moko ha mutwe wa mwana-ngombe wa kuji kumeso ja Yehova, mba makashiha mwe ngombe kumeso ja Yehova.

16 “‘Mba sasendote wakuwayisa makatwala ndambu ya manyinga a mwana-ngombe wa kuji muchima lia mbalaka ya kulikungulwila. 17 Sasendote makatata munwe mu manyinga ni kusapwila ndambu ya manyinga yisuho shimbiali kumeso ja Yehova, kulutwe lia chikalakala cha hina. 18 Sasendote makasa nawa ndambu ya manyinga ku mbinga jili ku chilumbilo chize chili kumeso ja Yehova mu mbalaka ya kulikungulwila. Manyinga eswe a mwana-ngombe waze masalaho, akaazujile ku shina lia chilumbilo cha mulambu wa kulumba chize chili ku unjililo wa mbalaka ya kulikungulwila. 19 Iye makachiza maji eswe a mwana-ngombe ni kwafwinjisa ha chilumbilo. 20 Akalinge ni mwana-ngombe yono ngwe chize alinganga ni mwana-ngombe mukwo yoze ahananga ngwe mulambu wa shili. Chenacho iye makalinga. Sasendote makafuka shili ya atu, mba Zambi makakonekena shili yo. 21 Sasendote akatwale mwana-ngombe wa kuji haze lia chilombo ni kumwochelaho ngwe chize ochanga mwana-ngombe wa kuji mutangu. Uli mulambu wa shili mumu lia chikungulwila.

22 “‘Muze umwe mwata malinga shili, alioze hi ku zango lienyi ko, ha kulinga chimwe cha ku yuma yize Yehova Zambi yenyi akanjishile ngwenyi kanda nuchilinga, mba mapwa ni mulonga, 23 hanji nyi iye manyingika ngwenyi kalinga shili, kavulumuna ha kwehuka shimbi, katamba kuhana pembe yoze keshi kapalia ngwe mulambu wenyi. 24 Iye makasa kwoko ha mutwe wa pembe ni kumushihila ha chihela chize akushihila mulambu wa kulumba kumeso ja Yehova. Uli mulambu wa shili. 25 Sasendote makatata munwe mu manyinga a mu mulambu wa shili ni kwasa ku mbinga ja ku chilumbilo cha mulambu wa kulumba. Manyinga a mulambu waze masalaho akaazujile ku shina lia chilumbilo cha mulambu wa kulumba. 26 Iye makafwinjisa maji ha chilumbilo ngwe chize akulinga ni maji a mulambu wa sambukila. Chocho, sasendote makafuka shili ya mwata, mba Zambi makamukonekena shili yenyi.

27 “‘Nyi umwe mutu hakachi kenu mu chifuchi mavulumuna, alioze hi ku zango lienyi ko, mba mapwa ni mulonga ha kulinga chuma cheswacho chize Yehova akanjishile ngwenyi kanda nuchilinga, 28 hanji nyi iye manyingika ngwenyi kalinga shili, katamba kutwala mwana-pembe wa chihwo yoze keshi kapalia ngwe mulambu ha shili yize alinga. 29 Iye makasa kwoko ha mutwe wa chimuna wa mulambu wa shili ni kushihila mulambu wacho ha chihela chizechene akushihila mulambu wa kulumba. 30 Sasendote makatata munwe mu manyinga a mwana-pembe ni kusa yimwe ndambu ya manyinga ku mbinga ja ku chilumbilo cha mulambu wa kulumba. Manyinga eswe a mulambu waze masalaho akaazujile ku shina lia chilumbilo. 31 Sasendote makachiza maji eswe a mwana-pembe ngwe chize akuchiza maji a mulambu wa sambukila, mba sasendote makafwinjisa maji jacho ha chilumbilo ngwe lupembo mupema kuli Yehova. Chocho, sasendote mafuka shili ya mutu wacho, mba Zambi mamukonekena shili yenyi.

32 “‘Alioze, nyi iye mahana panga ngwe mulambu wa shili, panga wacho katamba kupwa wa chihwo yoze keshi kapalia. 33 Iye makasa kwoko ha mutwe wa chimuna wa mulambu wa shili ni kumushiha ngwe mulambu wa shili ha chihela chizechene akushihila mulambu wa kulumba. 34 Sasendote makatata munwe mu manyinga a mu mulambu wa shili ni kwasa ku mbinga ja ku chilumbilo cha mulambu wa kulumba. Manyinga eswe a mulambu waze masalaho akaazujile ku shina lia chilumbilo. 35 Sasendote makachiza maji eswe a panga ngwe chize akuchiza maji a mwana-pembe wa mulambu wa sambukila, mba sasendote makayifwinjisa ha chilumbilo helu lia milambu ya kwocha ya Yehova. Chocho, sasendote mafuka shili ya mutu wacho, mba Zambi makonekena shili ya mutu wacho.

5 “‘Nyi umwe mutu* mapwa chela wa chimwe chuma, hanji machimona chipwe kuchivwa, alioze muze matwa mutambi iye mahola kuluu, kanavulumuna, shili yenyi yimushate.

2 “‘Nyi umwe mutu* makwata chimwe chuma cha luchisa, apwe kashitu wa luchisa wa mu yambu yoze hafwa hanji chimuna wa luchisa yoze hafwa, chipwe kakashitu* keswako ka luchisa kaze kakwendangana hashi, mutu wacho kalichisa, kahia, chipwe ngwe kachilinga chakuhona kunyingika. 3 Nyi umwe mutu makwata chuma cha luchisa ku mujimba wa mutu chakuhona kunyingika, chuma cheswacho cha luchisa chize muchihasa kumupwisa wa luchisa, mba machinyingika, kumahia.

4 “‘Hanji nyi umwe mutu* malishinga chamushingila chakuhona kunyingika, hanga alinge chuma chipema hanji chipi, hanji hanga alinge chuma cheswacho anazange, mba manyingika ngwenyi kalishinganga chamushingila, kumahia.

5 “‘Nyi umwe mutu mahia ha kulinga chimwe cha ku yuma yino, katamba kwambulula shili yenyi. 6 Chikwo nawa, mumu lia shili yize alinga, iye akanehe kuli Yehova mulambu wa uhie, chekwamba chimuna wa chihwo, panga wa chihwo chipwe mwana-pembe wa chihwo ngwe mulambu wa shili. Mba sasendote mafuka shili yenyi.

7 “‘Alioze, nyi keshi ni uhashi wa kuhana panga, katamba kuneha kuli Yehova tutele aali hanji ana-a-membe aali ngwe mulambu wa uhie mumu lia shili yize alinga, kajila umwe wa mulambu wa shili, kajila mukwo wa mulambu wa kulumba. 8 Katamba kwatwala kuli sasendote, mba iye mahana chitangu kajila wa mulambu wa shili. Sasendote mamukenda muliwu ni chala, alioze kanda amupatula mutwe. 9 Iye makasapwila ndambu ya manyinga a mulambu wa shili ku sesa lia chilumbilo, manyinga waze masalaho akaazujile ku shina lia chilumbilo. Uli mulambu wa shili. 10 Iye makahana kajila mukwo ngwe mulambu wa kulumba kulita ni shimbi. Chocho sasendote mafuka shili ya mutu, mba Zambi mamukonekena shili yenyi.

11 “‘Nyi iye keshi ni uhashi wa kuneha tutele aali hanji ana-a-membe aali, katamba kuneha kilu* yimuwika ya unga wafufunuka ngwe mulambu wa shili yenyi. Katambile kusaho maji chipwe libanu, mumu uli mulambu wa shili. 12 Iye makatwala mulambu kuli sasendote, mba sasendote makazomonaho kwoko lia unga, makafwinjisa mulambu wacho ha chilumbilo, helu lia mulambu wa kwocha wa Yehova, hanga Zambi ewuluke mulambu weswe. Uli mulambu wa shili. 13 Chocho sasendote makafuka shili yeswayo mutu alinga, mba shili ya mutu wacho mamukonekenayo. Yeswayo muyisala ha mulambu, muyipwa yambala ya sasendote, ngwe chize akulinga ni mulambu wa mbuto.’”

14 Yehova yamba nawa kuli Mose ngwenyi: 15 “Nyi umwe mutu mahona kushishika ha kwehuka shimbi hakutwala ku yuma yisandu ya Yehova chakuhona kunyingika, katamba kuneha mwana-panga yoze keshi kapalia ngwe mulambu wa uhie kuli Yehova, ndando ya mwana-panga wacho yatamba kulita ni shekele* ya prata, shekele yize akuhana mu chihela chisandu. 16 Mumu lia shili yize alinga hakutwala ku chihela chisandu, iye katamba kuweza ha chihanda chamuchitano ndando yize mafweta. Iye makauhana kuli sasendote, hanga sasendote akamufukile shili yenyi ni panga wa kuji ahana ngwe mulambu wa uhie, mba Zambi mamukonekena shili yenyi.

17 “Nyi umwe mutu mavulumuna ha kulinga chuma chize Yehova ambile ngwenyi kanda achilinga, chipwe ngwe kanyingikine ngwenyi kalinga chuma chacho, nihindu kahia, shili yenyi yimushate. 18 Iye katamba kutwala panga wa hakachi ka chendo yoze keshi kapalia kuli sasendote kulita ni ndando yize matesa ngwe mulambu wa uhie. Chocho sasendote makafuka shili ya mutu wacho, yize mutu alinga chakuhona kunyingika, chikwo nawa hi ku zango lienyi ko, mba Zambi mamukonekena shili yenyi. 19 Uli mulambu wa uhie. Pundu lume, iye kahia ha kuvulumuna kuli Yehova.”

6 Yehova yamba kuli Mose ngwenyi: 2 “Nyi umwe mutu malinga shili ha kuhona kushishika kuli Yehova, ha kwonga mwenyembo wenyi hakutwala ku chuma chize amuhele hanga achifunge, hanji chuma chize amuselele ngwe chijikilo, chipwe kwiya, hanji kutambula chuma cha mwenyembo wenyi ku tachi, 3 hanji manda chuma chize chatokele mba malionga hakutwala ku chuma chacho, ni kulishinga chamushingila hakutwala ku yimwe ya ku shili yize malinga, katamba kulinga chino: 4 Nyi iye havulumuna, chikwo nawa hahia, katamba kuhilwisa chuma chize eyile, chize azukile ha kuhanjika mahuza, chize atambwile ku tachi, chize amuhele kufunga, chize chatokele iye yachanda, 5 hanji kufweta ndando yalita ni chuma cheswacho chize alishingilile chamushingila, ni kuwezaho chihanda chamuchitano cha ndando yacho. Iye akachihane kuli mwenyacho ha tangwa lize mamuhisa. 6 Iye makatwala panga yoze keshi kapalia kuli sasendote ngwe mulambu wa uhie kuli Yehova, kulita ni ndando yize mamusela ngwe mulambu wa uhie. 7 Sasendote mamufukila shili kumeso ja Yehova, mba Zambi mamukonekena ha chuma cheswacho chize alinga, chize amuhishila.”

8 Yehova yamba nawa kuli Mose ngwenyi: 9 “Lweza Arone ni ana jenyi a malunga ngwe: ‘Yino ye shimbi yinatale ha mulambu wa kulumba: Mulambu wa kulumba muukapwa ha longa lia kukwachila kahia lia ha chilumbilo ufuku weswe, ndo muze mukucha. Kahia katambile kujima ha chilumbilo. 10 Sasendote makazala mazalo a mulimo a linyu ni kaputula wa linyu. Makachiza uto wa mulambu wa kulumba uze wawemanga ni kahia ni kuusa ku sesa lia chilumbilo. 11 Mba iye makazula mazalo, mazala eka, ni kutwala uto haze lia chilombo, ku chihela chipema. 12 Kahia katamba kununga ha chilumbilo. Katambile kujima. Chimene ni chimene sasendote akaseho kunyi, akase mulambu wa kulumba helu, ni kufwinjisaho maji a milambu ya sambukila. 13 Kahia katamba kununga ha chilumbilo. Katambile kujima.

14 “‘Yino ye shimbi yinatale ha mulambu wa mbuto: Yenu ana ja Arone, nwatamba kuuneha ku chilumbilo, kumeso ja Yehova. 15 Sasendote umwe hakachi ko makazomona kwoko lia unga wafufunuka ha mulambu wa mbuto, ni maji, ni libanu yeswe yize yili ha mulambu wa mbuto. Iye makafwinjisa mulambu wacho ha chilumbilo, hanga Zambi ewuluke mulambu weswe ngwe lupembo mupema kuli Yehova. 16 Arone ni ana jenyi a malunga akande unga uze muusala ha mulambu, akaulinge mbolo kujishi futunwiso ni kujilila mu chihela chisandu. Ayo akalile yize yasala ha mulambu mu yiize ya mbalaka ya kulikungulwila. 17 Katambile kuyocha ni chuma chize chili ni futunwiso. Chili chihanda cha mulambu wami wa kwocha chize nahana kuli ayo. Chili chuma chisandu chahiana, ngwe chize wapwa mulambu wa shili ni mulambu wa uhie. 18 Ana eswe a malunga a ku munyachi wa ana ja Arone, akaulie. Chili chihanda cho cha mutolo ku yisemuko yo yeswe, hakachi ka milambu ya kwocha ya Yehova. Chuma cheswe chize muchikwatako, muchipwa chisandu.’”

19 Yehova yamba nawa kuli Mose ngwenyi: 20 “Uno we mulambu uze Arone ni ana jenyi makahana kuli Yehova ha tangwa lize makamuwayisa: Makaneha kilu* yimuwika ya unga wafufunuka ngwe mulambu wa mbuto, ngwe chize chakulingiwa mashimbu eswe, ndambu chimene, ndambu chingoloshi. 21 Makayikanga ni maji mu chikango. Yena mukayineha ya kuchinga kanawa ni maji ni kuyihana ngwe mulambu wa mbuto ya kukanga, ya kupalula yihanda-yihanda ngwe mulambu wa lupembo mupema kuli Yehova. 22 Sasendote wa kuwayisa hakachi ka ana ja Arone yoze makamusalakana, neye makahana mulambu uno. Yino yili shimbi ya mutolo: Mulambu weswe wamuundu akawoche kumeso ja Yehova. 23 Mulambu weswe wa mbuto wa sasendote, akauhane weswe wamuundu, katambile kuulia.”

24 Yehova yamba nawa kuli Mose ngwenyi: 25 “Lweza Arone ni ana jenyi ngwe: ‘Yino ye shimbi yinatale ha mulambu wa shili: Ha chihela haze makashihila mulambu wa kulumba, he makashihila nawa mulambu wa shili kumeso ja Yehova. Chili chuma chisandu chahiana. 26 Sasendote yoze mahana mulambu wacho wa shili, akaulie. Makaulila mu chihela chisandu, mu yiize ya mbalaka ya kulikungulwila.

27 “‘Chuma cheswe chize muchikwata ku yifwo ya mulambu, muchipwa chisandu, mba nyi ndambu ya manyinga a mulambu muyisapukila ha mazalo a mutu, watamba kukosela mazalo jacho mu chihela chisandu. 28 Ndoho ya uma yize atelekela yifwo yacho, katamba kuyipalwola. Alioze nyi kayitelekela mu ndoho ya unengu, ndoho yacho akayicheke ni kuyikosongona ni meya.

29 “‘Lunga mweswe yoze uli sasendote, akayilie. Chili chuma chisandu chahiana. 30 Alioze, nyi ndambu ya manyinga ya mulambu wa shili mayineha mu mbalaka ya kulikungulwila, hanga afuke shili mu chihela chisandu, mulambu wacho katambile kuulia. Katamba kuwocha pwilili ha jiko.

7 “‘Yino ye shimbi yinatale ha mulambu wa uhie: Chili chuma chisandu chahiana. 2 Ayo makashihila mulambu wa uhie ha chihela chize akushihila milambu ya kulumba, manyinga katamba kwasapwila ku masesa eswe a chilumbilo. 3 Iye makahana maji eswe hamuwika ni muchila wamuundu, maji eswe a ku mijingwa, 4 ni ana-sukwa aali ni maji jako waze atwama ku mutanda. Iye makachiza maji a ku liayi hamuwika ni ana-sukwa. 5 Sasendote makafwinjisa yino yuma yeswe ha chilumbilo ngwe mulambu wa kwocha wa Yehova. Uli mulambu wa uhie. 6 Lunga mweswe yoze uli sasendote akaulie, katamba kuulila mu chihela chisandu. Chili chuma chisandu chahiana. 7 Shimbi yize yinatale ha mulambu wa shili, yinatale nawa ha mulambu wa uhie. Mulambu uli wambala wa sasendote yoze mafuka nawo shili.

8 “‘Muze sasendote mahanyina mutu mulambu wa kulumba, iye asale ni kupu lia mulambu wa kulumba uze ahana.

9 “‘Mulambu weswe wa mbuto wa kwocha ha jiko hanji wakukangila mu ndoho chipwe ha chikango, muukapwa wa sasendote yoze mauhana. Muukapwa wa iye. 10 Alioze, mulambu weswe wa mbuto wa kuchinga ni maji hanji umu, muukapwa wambala wa ana ja Arone. Eswe makatambula unji umuwika.

11 “‘Yino ye shimbi yinatale ha mulambu wa sambukila uze atamba kuhana kuli Yehova: 12 Nyi umwe mutu mauhana ngwe mulambu wa kusakwilila Zambi, katamba kuuhana hamuwika ni chitapo cha kusakwilila Zambi, mbolo ja kujingulula ngwe kazeya kujishi futunwiso, jakulinga ni maji, mbolo japatamana kujishi futunwiso, ja kukwita maji, mbolo ja kujingulula ngwe kazeya ja kulinga ni unga wafufunuka wakuchinga kanawa ni maji. 13 Iye makahana mulambu uno hamuwika ni mbolo ja kujingulula ngwe kazeya, ja kulinga ni futunwiso ni mulambu wa sambukila uze akuhana ngwe usakwililo kuli Zambi. 14 Ku mulambu wacho, makandako mbolo yimuwika-yimuwika ha milali yeswe ya mbolo ngwe chihanda chisandu kuli Yehova. Mbolo jacho mujipwa ja sasendote yoze masapwila manyinga a milambu ya sambukila. 15 Yifwo ya mulambu wa sambukila uze ahana ngwe usakwililo kuli Zambi, katamba kuyilia ha tangwa lizeliene iye ayihana. Iye katambile kufunga yifwo yikwo ndo tangwa likwo.

16 “‘Nyi chitapo chize iye mahana ngwe mulambu, muchipwa mulambu wa kumanununa nawo chimwe chilakenyo, hanji mulambu wa kuhana ni mbunge yimuwika, makachilia ha tangwa lize machihana. Alioze yifwo yize muyisalaho makayilia ha tangwa likwo. 17 Yifwo ya chitapo yize muyisalaho, katamba kuyocha pwilili ha tangwa liamuchitatu. 18 Alioze, nyi yifwo yimwe ya chitapo cha sambukila mayilia ha tangwa liamuchitatu, yoze wayihana kechi kupwa ni utayizo wa Zambi. Chitapo chacho kechi kamwalwilacho. Mumu chili chuma chipi, mba mutu yoze malia yifwo yacho, shili yenyi muyikamushata. 19 Katambile kulia yifwo yize yakwata ku chuma cha luchisa. Yifwo yacho akayoche pwilili. Mutu walinanga mahasa kulia yifwo yalinanga.

20 “‘Alioze, mutu mweswawo yoze uli ni luchisa, nyi malia yifwo ya chitapo cha sambukila chambala cha Yehova, mutu wacho katamba kumushiha hakachi ka atu jenyi. 21 Nyi umwe mutu makwata ku chuma cha luchisa, apwe luchisa wa mutu, hanji kashitu wa luchisa, chipwe chuma cheswacho cha luchisa hanji cha uzelwokeso, mba malia yifwo ya chitapo cha sambukila cha Yehova, mutu wacho katamba kumushiha hakachi ka atu jenyi.”’

22 Yehova yamba nawa kuli Mose ngwenyi: 23 “Lweza A-Izalele ngwe: ‘Kunwatambile kulia niamwe maji a ngombe, a mwana-panga wa kuji chipwe a pembe. 24 Maji a chimuna yoze walifwila ni maji a chimuna yoze ashiha kuli chimuna-ni-mukwo munuhasa kulinga no yuma yikwo, alioze kunwatambile kwalia. 25 Mutu mweswawo malia maji a chimuna yoze ahana ngwe mulambu wa kulumba wa Yehova akamushihe hakachi ka atu jenyi.

26 “‘Ku chihela kweswako munutwama, kanda nulia manyinga niamwe, apwe a kajila hanji a kashitu mweswawo. 27 Mweswawo malia manyinga a chitangiwa cheswacho, akamushihe hakachi ka atu jenyi.’”

28 Yehova yamba nawa kuli Mose ngwenyi: 29 “Lweza A-Izalele ngwe: ‘Mweswawo mahana chitapo cha sambukila kuli Yehova, akanehe chihanda cha chitapo chacho ngwe chawana kuli Yehova. 30 Iye akanehe maji ni pambo ha moko jenyi ngwe mulambu wa kwocha wa Yehova, akauhungise kulutwe ni kunyima ngwe mulambu wa kuhungisa kumeso ja Yehova. 31 Sasendote makafwinjisa maji ha chilumbilo, alioze pambo mulikapwa lia Arone ni ana jenyi.

32 “‘Yenu munukahana kuli sasendote kulu lia utata ngwe chihanda chisandu cha yitapo yenu ya sambukila. 33 Mwana wa Arone yoze mahana manyinga a yitapo ya sambukila ni maji, makatambula kulu lia utata ngwe chihanda chenyi. 34 Mumu ha milambu ya sambukila yize A-Izalele akuhana, ngunandeho pambo lize akuhana ngwe mulambu wa kuhungisa ni kulu lize akuhana ngwe chihanda chisandu ni kuyihana kuli sasendote Arone ni ana jenyi a malunga. Yino yili shimbi ya mutolo kuli A-Izalele.

35 “‘Chino che chapwile chihanda cha asasendote, Arone ni ana jenyi cha ku mulambu wa kwocha wa Yehova chize ha tangwa lize Mose aakunjikile kuli Yehova hanga amulingile mulimo wa usasendote. 36 Ha tangwa lize awayishile Arone ni ana jenyi, Yehova yahana shimbi kuli A-Izalele hanga apwe ni kwaha chihanda chino. Yili shimbi ya mutolo ku yisemuko yo yeswe.’”

37 Yino ye shimbi yinatale ha mulambu wa kwocha, mulambu wa mbuto, mulambu wa shili, mulambu wa uhie, chitapo cha kusa nacho mutu ha usasendote ni chitapo cha sambukila, 38 ngwe chize Yehova alwezele Mose ku Mulundu wa Sinai ha tangwa lize alwezele A-Izalele hanga ahane milambu yo kuli Yehova ku Mulundu wa Sinai.

8 Yehova yamba nawa kuli Mose ngwenyi: 2 “Tweya ni Arone ni ana jenyi hamwe ni mazalo, maji a kuwayisa no, mwana-ngombe wa mulambu wa shili, makuji a mapanga aali ni mutonga* wa mbolo jize kujishi futunwiso. 3 Ukungulule chikungulwila cheswe ku unjililo wa mbalaka ya kulikungulwila.”

4 Chocho Mose yalinga ngwe chize Yehova amulwezele, chikungulwila cheswe yichilikungulwila ku unjililo wa mbalaka ya kulikungulwila. 5 Mose yamba ku chikungulwila ngwenyi: “Yino ye Yehova atuma hanga tulinge.” 6 Mba Mose yakundamisa Arone ni ana jenyi a malunga, yaasanyisa meya. 7 Mwapwa-muze, yajika Arone mazalo asuku-asuku, yamujichika muya mu zalilo ni kumujika chikuto cha moko ehi. Mba yasa efode helu, yakasa kanawa efode ni muya wa kukundula ku masongo. 8 Mwapwa-muze, yamujika chipwiko, mba ha chipwiko yasaho Urime ni Tumimi. 9 Yamujika chitambala ku mutwe, helu lia chitambala yasaho chipenya cha oru chapeyima, chilayi chisandu,* ngwe chize Yehova alwezele Mose.

10 Mose yanda maji a kuwayisa no, yawayisa tabernakulu ni yikwata yamo yeswe, yayisela ku usandu. 11 Mba yasapwila ndambu ya maji yisuho shimbiali ha chilumbilo, yachiwayisa, yawayisa nawa yikwata yaho yeswe ni mbashila ni chikwachilo chayo hanga ayisele ku usandu. 12 Kusulaho, yazujila ndambu ya maji a kuwayisa no ha mutwe wa Arone, yamuwayisa hanga amusele ku usandu.

13 Mba Mose yakundamisa ana ja Arone, yaajika mazalo asuku-asuku ni miya, yaajika yitambala ku mitwe, ngwe chize Yehova amutumine.

14 Yaneha mwana-ngombe wa mulambu wa shili, mba Arone ni ana jenyi a malunga yasa moko ha mutwe wa mwana-ngombe wa mulambu wa shili. 15 Mose yashiha mwana-ngombe, yatata munwe mu manyinga yaakwita* ku mbinga jeswe ja ku chilumbilo, yapemesa chilumbilo ku shili. Alioze manyinga waze asalileho, iye yaazujila ku shina lia chilumbilo hanga achisele ku usandu, apwe ni kufukilaho shili. 16 Mose yanda maji eswe atwama ku mijingwa, maji a ku liayi ni ana-sukwa aali ni maji jako, yayifwinjisa ha chilumbilo. 17 Mba yeswe yasalileho, kupu lia ngombe, yifwo ni ufwachi yayochela haze lia chilombo, ngwe chize Yehova amutumine.

18 Mba kulutwe yeza ni panga wa kuji wa mulambu wa kulumba, Arone ni ana jenyi yasa moko ha mutwe wa panga. 19 Mose yashiha panga wacho mba yasapwila manyinga sali lieswe lia chilumbilo. 20 Mose yapatwola panga wa kuji mu yipinji-yipinji mba yafwinjisa mutwe, yipinji yacho hamwe ni maji. 21 Iye yakosa mijingwa ni molu, mba Mose yafwinjisa chimuna mweswe ha chilumbilo, uno wapwile mulambu wa kulumba wa lupembo mupema, mulambu wa kwocha wa Yehova ngwe chize Yehova atumine kuli Mose.

22 Mba Mose yaneha panga wamuchiali wa kuji, panga wa kusa nenyi mutu ha usasendote. Arone ni ana jenyi yasa moko ha mutwe wa panga. 23 Mose yashiha panga wacho, yanda ndambu ya manyinga yayikwita ku songo lia twitwi lia chindume lia Arone, ku munwe wa shina wa ku kwoko lia chindume ni ku munwe wa shina wa ku kulu lia chindume. 24 Kusulaho, Mose yakundamisa ana ja Arone a malunga, mutu ni mutu yamukwita ndambu ya manyinga ku songo lia twitwi lia chindume, ku munwe wa shina wa ku kwoko lia chindume ni ku munwe wa shina wa ku kulu lia chindume. Alioze manyinga waze asalileho yaazujila ku masesa eswe a chilumbilo.

25 Mba yanda maji, muchila wa maji, maji eswe atwama ku mijingwa, maji a ku liayi, ana-sukwa aali ni maji jako ni kulu lia chindume. 26 Mba mu mutonga wa mbolo jize kujishi futunwiso uze te uli kumeso ja Yehova, iye yandamo mbolo yimuwika ya kujingulula ngwe kazeya yize kuyishi futunwiso, mbolo yimuwika ya kujingulula ngwe kazeya ya kulinga ni maji, ni mbolo yimuwika yapatamana. Chocho yayisa ha yipinji-yipinji ya maji ni ha kulu lia chindume. 27 Mba yasa yuma yeswe yino ha moko ja Arone ni ha moko ja ana jenyi, iye yaputuka kuyihungisa kulutwe ni kunyima ngwe mulambu wa kuhungisa kumeso ja Yehova. 28 Chocho, Mose yayichiza ha moko jo yayifwinjisa yeswe ha chilumbilo, helu lia mulambu wa kulumba. Chapwile chitapo cha kusa nacho mutu ha usasendote cha lupembo mupema, mulambu wa kwocha wa Yehova.

29 Mba Mose yanda pambo lia panga wa kuji, yalihungisa kulutwe ni kunyima ngwe mulambu wa kuhungisa kumeso ja Yehova. Chihanda chino cha panga cha kusa nacho mutu ha usasendote yichipwa cha Mose, ngwe chize Yehova amutumine.

30 Mba Mose yanda ndambu ya maji a kuwayisa no ni ndambu ya manyinga waze te ali ha chilumbilo, yaasapwila kuli Arone ni ku mazalo jenyi, yaasapwila nawa kuli ana ja Arone ni ku mazalo jo. Chocho yasela Arone ni mazalo jenyi ku usandu, yasela nawa ana jenyi ni mazalo jo ku usandu.

31 Mose yalweza Arone ni ana jenyi ngwenyi: “Telekelenu yifwo ku unjililo wa mbalaka ya kulikungulwila, nukayilile kuzekwene ni mbolo yize yili mu mutonga,* ngwe chize angutumine ngwo: ‘Arone ni ana jenyi akayilie.’ 32 Yifwo ni mbolo yize muyisalaho, nukayoche pwilili. 33 Ha matangwa shimbiali, kanda nukakatuka ku unjililo wa mbalaka ya kulikungulwila ndo muze matangwa a kunusa ha usasendote makumbana, mumu mukupalika matangwa shimbiali mba akanuse ha usasendote. 34 Chize twalinga musono, che Yehova atutumine kulinga, hanga tufuke shili yenu. 35 Yenu munukatwama ku unjililo wa mbalaka ya kulikungulwila ufuku ni mwalwa, matangwa shimbiali, nukamanunune mulimo wenu kuli Yehova hanga nuchine kufwa, mumu chenacho angutumine.”

36 Chocho Arone ni ana jenyi yalinga yuma yeswe yize Yehova atumine kupalikila muli Mose.

9 Ha tangwa liamuchinake, Mose yasanyika Arone ni ana jenyi a malunga ni makulwana a mu Izalele. 2 Iye yamba kuli Arone ngwenyi: “Anda mwana-ngombe ngwe mulambu wa shili, panga wa kuji ngwe mulambu wa kulumba, eswe katamba kupwa keshi kapalia, wahane kumeso ja Yehova. 3 Alioze, lweza A-Izalele ngwe: ‘Andenu pembe wa kuji apwe mulambu wa shili, mwana-ngombe, ni mwana-panga wa kuji, eswe a mwaka umuwika, waze keshi kapalia hanga apwe mulambu wa kulumba, 4 ngombe wa kuji umuwika, panga wa kuji umuwika, apwe mulambu wa sambukila, hanga akanusele ku usandu kumeso ja Yehova; ni mulambu wa mbuto wakuchinga ni maji, mumu musono Yehova masoloka kuli yenu.’”

5 Chocho ayo yatwala yize Mose atumine kulutwe lia mbalaka ya kulikungulwila. Chikungulwila cheswe yichikundama, yichimana kumeso ja Yehova. 6 Mose yamba ngwenyi: “Yino ye Yehova anutuma kulinga, hanga uhenya wa Yehova usoloke kuli yenu.” 7 Mose yamba kuli Arone ngwenyi: “Kundama ku chilumbilo uhane mulambu we wa shili, ni mulambu we wa kulumba, ulifukile shili ye ni ya akwa-zuwo lie, mba uhane mulambu wa A-Izalele ni kwafukila shili, ngwe chize Yehova atuma.”

8 Hazehene, Arone yakundama ku chilumbilo, yashiha mwana-ngombe wa mulambu wa shili yenyi. 9 Chocho ana ja Arone yamwaha manyinga, iye yatatamo munwe, yaakwita* ku mbinga ja ku chilumbilo, mba waze asalileho yaazujila ku shina lia chilumbilo. 10 Iye yafwinjisa maji, ana-sukwa, maji a ku liayi lia chimuna yoze ahana ngwe mulambu wa kulumba ha chilumbilo, ngwe chize Yehova atumine Mose kulinga. 11 Chocho, yocha yifwo ni kupu pwilili haze lia chilombo.

12 Mba yashiha chimuna wa mulambu wa kulumba, ana ja Arone yamwaha manyinga, iye yaazujila ku masesa eswe a chilumbilo. 13 Ayo yamwaha yipinji-yipinji ya mulambu wa kulumba hamuwika ni mutwe, iye yayifwinjisa ha chilumbilo. 14 Chikwo nawa, iye yakosa mijingwa ni molu a chimuna, ni kuyifwinjisa ha chilumbilo helu lia mulambu wa kulumba.

15 Mba Arone yahana mulambu wa A-Izalele, yanda pembe wa kuji wa mulambu wa shili ya atu, yamushiha, yamuhana ngwe mulambu wa shili, ngwe chizechene alingile ni chimuna mutangu. 16 Mba yahana mulambu wa kulumba, yauhana kulita ni shimbi.

17 Mba yahana mulambu wa mbuto, ha mulambu wacho, yazomonaho kwoko liamuundu, yaufwinjisa ha chilumbilo. Kuchizako mulambu wa kulumba wa chimene.

18 Yashiha ngombe wa kuji, ni panga wa kuji wa mulambu wa sambukila wa A-Izalele. Chocho ana ja Arone yamwaha manyinga, iye yaasapwila ku masesa eswe a chilumbilo. 19 Alioze, yipinji ya maji a ngombe wa kuji, muchila wa maji wa panga wa kuji, maji waze atwama ku yuma ya mujimo, ana-sukwa ni maji a ku liayi, 20 ayo yasa yipinji yino yeswe ya maji helu lia mapambo a yimuna, mba iye yafwinjisa yipinji yacho ya maji ha chilumbilo. 21 Alioze, kulu lia chindume ni pambo ya chimuna ni chimuna, Arone yayihungisa kulutwe ni kunyima, ngwe mulambu wa kuhungisa kumeso ja Yehova, ngwe chize Mose atumine.

22 Mba Arone yazundula moko jenyi kulutwe lia A-Izalele, yaawahisa, chocho yasunuka muze te hahana mulambu wa shili, mulambu wa kulumba, ni milambu ya sambukila. 23 Ku songo, Mose ni Arone yanjila mu mbalaka ya kulikungulwila, mba yatuhuka, yawahisa A-Izalele.

Chocho uhenya wa Yehova yiusoloka kuli atu eswe, 24 kahia yikakatuka kuli Yehova, yikocha mulambu wa kulumba, ni yipinji ya maji yize te yili ha chilumbilo. A-Izalele eswe yachimona, yaputuka kukololoka ni kufulamana hashi.

10 Kulutwe, Nandambe ni Ambihu, ana ja Arone, mutu ni mutu yanda longa lienyi lia kukwachila kahia, yasaho makala a kahia mba yasa insensu helu. Chocho yahana kahia kaze kukalitele kumeso ja Yehova, chuma chize iye kakaatumine kulinga. 2 Chocho kahia yikakatuka kuli Yehova, yikaashiha, ayo yafwa kumeso ja Yehova. 3 Mose yamba kuli Arone ngwenyi: “Chino che Yehova amba ngwenyi: ‘Waze akukundama kuli yami katamba kwiwuluka ngwo, yami nguli musandu, chikwo nawa, makanguhalisa kumeso ja atu eswe.’” Arone yahola kuluu.

4 Mba Mose yasanyika Mishaele ni Elezafwa, ana ja Uziele natu ya Arone, yaalweza ngwenyi: “Tweyenu kuno, chizenu mandumbu jenu kulutwe lia chihela chisandu, nwatwale haze lia chilombo.” 5 Chocho yeza, yanda afu. Ha shimbu liacho, afu te achili ni mazalo jo asuku-asuku, yaatwala haze lia chilombo ngwe chize Mose aatumine.

6 Mose yamba kuli Arone ni kuli ana jenyi akwo, Eleazare ni Itama ngwenyi: “Kanda nwecha kambu jenu jivunde, chipwe kusuwa mazalo jenu, hanga nuchine kufwa, chikwo nawa, hanga Zambi ahone kuvwila uli chikungulwila cheswe. Mandumbu jenu, akwa-zuwo lieswe lia Izalele, malilila waze Yehova ashiha ni kahia. 7 Kanda nukatuka ku unjililo wa mbalaka ya kulikungulwila, nyi ka, munufwa. Mumu maji a kuwayisa no a Yehova kali hali yenu.” Chocho ayo yalinga ngwe chize Mose aatumine.

8 Mba Yehova yamba kuli Arone ngwenyi: 9 “Kanda unwa vinyu chipwe walwa ukwo usasu, chipwe yena, chipwe ana je muze mununjila mu mbalaka ya kulikungulwila hanga nuchine kufwa. Yino yili shimbi ya mutolo ku yisemuko yenu yeswe, 10 hanga hapwe kalisa hakachi ka chuma chisandu ni chize hi chisandu ko, hakachi ka chuma chalinanga ni cha luchisa, 11 hanga ukalongese A-Izalele shimbi jeswe jize Yehova aalwezele kupalikila muli Mose.”

12 Mose yamba kuli Arone ni kuli ana jenyi a malunga waze asalile, Eleazare ni Itama ngwenyi: “Ha milambu ya kwocha ya Yehova, andenu yize yasala ha mulambu wa mbuto nulinge mbolo kujishi futunwiso, nujilile hakamwihi ni chilumbilo, mumu chili chuma chisandu chahiana. 13 Nwatamba kujilila mu chihela chisandu, mumu chili chihanda chenu ni ana jenu, ha milambu ya kwocha ya Yehova, mumu chino che angutumine kulinga. 14 Yenu munukalila nawa mu chihela chalinanga pambo lize ahanyine ngwe mulambu wa kuhungisa ni kulu lize ahanyine ngwe chihanda chisandu, yenu, ana jenu a malunga ni a mapwo, mumu yihanda yino ya milambu ya sambukila ya A-Izalele, kayihanyine kuli yenu ni ana jenu ngwe chihanda chenu. 15 Ayo makaneha kulu lize ahanyine ngwe chihanda chisandu ni pambo lize ahanyine ngwe mulambu wa kuhungisa, hamwe ni milambu ya maji ya kwocha hanga ahungise mulambu wa kuhungisa kumeso ja Yehova. Chino muchipwa chihanda che ni cha ana je a malunga ku miaka yeswe, ngwe chize Yehova atumine.”

16 Mba Mose yafupa chinji pembe wa kuji wa mulambu wa shili, yanyingika ngwenyi hanamwocho, chocho yevwila uli Eleazare ni Itama, ana ja Arone waze asalile, yamba ngwenyi: 17 “Mumu liaka kunwalile mulambu wa shili mu chihela chisandu, se chili chuma chisandu chahiana? Iye hanauhane kuli yenu hanga numbate shili ya chikungulwila ni kwafukilayo kumeso ja Yehova. 18 Talenu! Manyinga a mulambu kaatwalile mu chihela chisandu. Pundu lume mulambu te nwatamba kuulila mu chihela chisandu, ngwe chize angutumine.” 19 Arone yamba kuli Mose ngwenyi: “Musono ayo kahana mulambu wa shili ni mulambu wa kulumba kumeso ja Yehova, chipwe chocho, yuma yino yalingiwa kuli yami. Nyi te musono nalianga mulambu wa shili, shina chino te muchipema kuli Yehova?” 20 Muze Mose hachivwa, yawahilila.

11 Yehova yamba kuli Mose ni Arone ngwenyi: 2 “Lwezenu A-Izalele ngwenu: ‘Wano e tushitu a hashi waze munuhasa kulia: 3 Tushitu eswe akwete sende ja kupula, waze akusekula, munuhasa kulia.

4 “‘Alioze nwatambile kulia tushitu wano akusekula hanji waze ali ni sende ja kupula: Kamelu, mumu kakusekula, alioze katwamine ni sende ja kupula. Kali wa luchisa kuli yenu. 5 Ni sele, mumu kakusekula, alioze katwamine ni sende ja kupula. Kali wa luchisa kuli yenu. 6 Ni mbalu, mumu kakusekula, alioze katwamine ni sende ja kupula. Kali wa luchisa kuli yenu. 7 Ni ngulu, mumu kakwete sende ja kupula, alioze keshi kusekula. Kali wa luchisa kuli yenu. 8 Kanda nulia yifwo ya tushitu wano, chipwe kwakwata muze hafwa. Mumu kali a luchisa kuli yenu.

9 “‘Tushitu a mu meya waze nwatamba kulia kali wano: Tushitu eswe atwama mu meya waze akwete yihehe ni mahalo, apwe a mu tulunga-lwiji, chipwe a mu ngiji. 10 Alioze tushitu eswe waze atwama mu tulunga-lwiji ni mu ngiji keshi yihehe hanji mahalo, chipwe hakachi ka tushitu akehe-akehe waze akwendangana mu meya, chipwe hakachi ka tushitu akwo eswe waze atwama mu meya, kali a luchisa kuli yenu. 11 Ewa, tushitu wano katamba kupwa a luchisa kuli yenu, kanda nulia yifwo yo. Nyi hafwa nwatamba kwavwila lwaji. 12 Tushitu eswe a mu meya waze katwamine ni yihehe hanji ni mahalo, kali a luchisa kuli yenu.

13 “‘Wano e tujila atamba kupwa a luchisa kuli yenu, kunwatambile kwalia mumu kali a luchisa: Pupa ni pupa yoze wakukwata yishi, chiselele, 14 hula-yula, ni hula-yula mulaa ni milali yo yeswe, 15 yikwakwalo a milali yeswe, 16 kakulu, chikungulu, ngavota, yikoji a milali yeswe, 17 chikulu mukehe, katovwi, chikulu munene, 18 pato wa mu meya, toji, kuyu, 19 nange, yitokola a milali yeswe, mbwembweto ni kafukufuku. 20 Ni tushitu eswe akehe-akehe akwete mapulwa, waze akwendangana hashi, akwenda ni molu awana, kali a luchisa kuli yenu.

21 “‘Hakutwala ku tushitu eswe akahe-akehe akwete mapulwa, waze akwendangana hashi, akwenda ni molu awana, munuhasa kulia wika waze akwete molu aali asuku akwo ehi. 22 Wano e nwatamba kulia: Makumbi a milali yeka ni yeka, ni mapasu akwo waze atu akulia, tuzeze ni mapasu a mulali ukwo. 23 Alioze tushitu eswe akahe-akehe akwete mapulwa ni molu awana, waze akwendangana hashi, kali a luchisa kuli yenu. 24 Ayo mahasa kunupwisa a luchisa. Mweswawo makwata umwe wa kuli tushitu wano yoze hafwa, mapwa wa luchisa ndo chingoloshi. 25 Mweswawo manda umwe wa kuli tushitu wano yoze hafwa, katamba kukosa mazalo jenyi, iye mapwa wa luchisa ndo chingoloshi.

26 “‘Kashitu mweswawo ukwete sende ja kupula alioze hi jiali ko, chikwo nawa keshi kusekula, kali wa luchisa kuli yenu. Mweswawo mamukwata mapwa wa luchisa. 27 Tushitu eswe a molu awana, waze akwendela ha makata, kali a luchisa kuli yenu. Mweswawo makwata kuli kashitu wacho muze hafwa, mapwa wa luchisa ndo chingoloshi. 28 Mweswawo manda umwe wa kuli tushitu wano yoze hafwa, katamba kukosa mazalo jenyi, iye mapwa wa luchisa ndo chingoloshi. Ayo kali a luchisa kuli yenu.

29 “‘Wano e tushitu akwendangana hashi waze apwa a luchisa kuli yenu: Kolo, tumbi ni yitombwe a milali yeswe, 30 kasulu, chiku, kasengelekwekwe, musevu ni nongwena. 31 Tushitu wano akwendangana hashi, kali a luchisa kuli yenu. Mweswawo maakwata muze hafwa, mapwa wa luchisa ndo chingoloshi.

32 “‘Tushitu wano muze hafwa, nyi maholokela ha chuma cheswacho, muchipwa cha luchisa, chipwe ha chikwachilo cha mutondo, chipwe ha hina, chipwe ha kupu, chipwe ha chikeleyi. Chikwata cheswacho chipwe ngwe kakulinga nacho mulimo weswawo, katamba kuchichupika mu meya, muchipwa cha luchisa ndo chingoloshi, mba muchipema. 33 Nyi umwe wa kuli tushitu wano maholokela mu chikashi cha uma, nwatamba kuchipalwola, chikwo nawa yuma yeswe yize te yilimo muyipwa ya luchisa. 34 Nyi meya a mu chikashi chacho mamwanganyina ha kulia cheswacho, kulia chacho muchipwa cha luchisa, chipwe chuma cheswacho cha kunwa chize chili mu chikashi chacho, necho muchipwa cha luchisa. 35 Chuma cheswacho kashitu wacho maholokela muze hafwa, muchipwa cha luchisa, chipwe haze akwochela mbolo, chipwe ha jiko, akayonwone. Yili ya luchisa, muyinunga ni kupwa ya luchisa kuli yenu. 36 Nyi maholokela ha fuji lia meya hanji mu shima lia meya, kuyichi kupwa ya luchisa, alioze mutu yoze makwata kashitu wacho yoze hafwa, mapwa wa luchisa. 37 Nyi kashitu wacho yoze hafwa maholokela ha mbuto jize anambe kutumba, mbuto mujinunga jalinanga. 38 Alioze, nyi mbuto hajihinjila meya, mba chihanda cha kashitu wacho yoze hafwa muchiholokelaho, mbuto jacho mujipwa ja luchisa kuli yenu.

39 “‘Nyi kashitu yoze nwakulia malifwila, yoze mamukwata mapwa wa luchisa ndo chingoloshi. 40 Mweswawo malia ndambu ya yifwo ya kashitu wacho, katamba kukosa mazalo jenyi, mapwa wa luchisa ndo chingoloshi. Yoze mambata kashitu wacho, katamba kukosa mazalo jenyi, mapwa wa luchisa ndo chingoloshi. 41 Tushitu eswe akahe-akehe akwendangana hashi, kapwa a luchisa. Kunwatambile kwalia. 42 Kanda nulia kashitu mweswawo yoze wakulikoka ni jimo hashi, kashitu mweswawo wakwenda ni molu awana, chipwe tushitu eswe akahe-akehe waze akwendangana hashi, waze akwete molu anji, mumu kali a luchisa. 43 Kanda nulichisa ni tushitu wano akahe-akehe waze akwendangana hashi, kanda nulipwisa a luchisa ni tushitu wano. 44 Mumu yami nguli Yehova, Zambi yenu, liselenu ku usandu hanga nupwe asandu, mumu yami nguli musandu. Kashika, kanda nulichisa ni tushitu wano akahe-akehe waze akwendangana hashi. 45 Mumu yami nguli Yehova, yoze wanuchijile mu chifuchi cha Engitu hanga ngupwe Zambi yenu. Kashika, pwenu asandu, mumu yami nguli musandu.

46 “‘Yino ye shimbi yize yinatale hali tushitu, tushitu waze akuhumuka, tushitu eswe waze atwama mu meya ni hali tushitu eswe waze akwendangana hashi, 47 hanga hapwe kalisa hakachi ka yuma yalinanga ni yuma ya luchisa, ni hakachi ka tushitu waze nwatamba kulia ni waze kunwatambile kulia.’”

12 Yehova yamba kuli Mose ngwenyi: 2 “Lweza A-Izalele ngwe: ‘Nyi umwe pwo mapwa kafumba, masema mwana wa lunga, iye mapwa wa luchisa ha matangwa shimbiali ngwe chize akupwa wa luchisa muze akupwa ku chijila.* 3 Ha tangwa liamuchinake, mwana wacho mamupwisa ngalami. 4 Iye manunga ni kulipemesa ku manyinga waze atokesa ha matangwa 33 waze mahataho. Katambile kukwata ku chuma nichimwe chisandu chipwe kunjila mu chihela chisandu ndo muze matangwa a kulipemesa chenyi makumbana.

5 “‘Nyi iye masema mwana wa pwo, mapwa wa luchisa ha matangwa 14 ngwe chize akupwa wa luchisa muze akupwa ku chijila. Iye manunga ni kulipemesa ku manyinga waze atokesa ha matangwa 66 waze mahataho. 6 Muze matangwa a kulipemesa chenyi makumbana mumu lia mwana wa lunga hanji wa pwo yoze asemanga, iye makaneha kuli sasendote mwana-panga wa kuji yoze uli ni mwaka umuwika ngwe mulambu wa kulumba ku unjililo wa mbalaka ya kulikungulwila, ni mwana-liembe umuwika hanji katele ngwe mulambu wa shili. 7 Sasendote makayihana kumeso ja Yehova hanga afukile pwo wacho shili, mba mwe pwo mapema ku kuhita chenyi cha manyinga. Yino ye shimbi yinatale hali pwo yoze masema mwana wa lunga hanji wa pwo. 8 Alioze, nyi iye keshi ni uhashi wa kuhana mwana-panga wa kuji, katamba kutwala tutele aali hanji ana-a-membe aali. Kajila umwe wa mulambu wa kulumba, mukwo wa mulambu wa shili. Sasendote makamufukila shili, mba iye mapema.’”

13 Yehova yamba nawa kuli Mose ni Arone ngwenyi: 2 “Nyi ha chikowa cha mutu muhajimba, muhapwa chilonda hanji chipeka, chize muchisoloka ngwe chilayi cha mbumba* ha chikowa chenyi, katamba kumutwala kuli sasendote Arone hanji kuli umwe wa kuli asasendote hakachi ka ana ja Arone. 3 Sasendote makatala kanawa chilonda chize chili ha chikowa, nyi wona-wona uze uliho unatomonoka, mba musongo muusoloka ngwe wanjila chinji kushi lia chikowa, ayo yili mbumba. Sasendote makatala kanawa we musongo, mba mavuluka mwe mutu ngwenyi wa luchisa. 4 Alioze, nyi chipeka muchipwa chitoma, mba kuchanjilile chinji kushi lia chikowa, chikwo nawa, nyi wona-wona kuwatomonokene, sasendote makasa mutu yoze unayiji kwaukawenyi ha matangwa shimbiali. 5 Sasendote makamutala kanawa ha tangwa liamuchishimbiali, nyi mamona ngwenyi musongo kuwalitanjile ha chikowa, unanungu ngwe chize te uli, sasendote makamusa kwaukawenyi ha matangwa akwo shimbiali.

6 “Ha tangwa liamuchishimbiali, sasendote makamutala nawa kanawa, nyi musongo unafwililila, kuwalitanjile ha chikowa, sasendote mamuvuluka ngwenyi kanapeme, te kachilonda wika kaliho. Mutu wacho makakosa mazalo jenyi mba mapema. 7 Alioze, nyi chilonda chaputuka kulitanda ha chikowa, muze sasendote hamulweza kulu ngwenyi kanapeme, iye katamba kusoloka cheka kuli sasendote. 8 Sasendote makatala kanawa chilonda, nyi mamona ngwenyi chinalitande ha chikowa, sasendote makamuvuluka ngwenyi wa luchisa. Yili mbumba.

9 “Nyi umwe mutu mapwa ni mbumba, amutwale kuli sasendote, 10 sasendote akamutale kanawa. Nyi ha chikowa hanajimbi ni kutomonoka ni kutomonwesa wona-wona, chikwo nawa homa haze hanajimbi hali chilonda, 11 yili mbumba yize kuyishi kuya, sasendote mamuvuluka ngwenyi wa luchisa. Kechi kusa mutu wacho kwaukawenyi, mumu kali wa luchisa. 12 Alioze, nyi mbumba muyilitanda mu mujimba weswe, heswaho sasendote matala musongo unasoloka, 13 mba sasendote matala kanawa mamona ngwenyi mbumba yalitanda mu mujimba weswe, chocho iye mavuluka mutu yoze unayiji ngwenyi kanapeme.* Mujimba weswe hiwatomonoka, mutu kanapeme. 14 Alioze, tangwa chilonda muchisoloka ha chikowa, iye mamuvuluka ngwenyi wa luchisa. 15 Muze sasendote mamona chilonda, avuluke mutu wacho ngwenyi wa luchisa. Chilonda chacho chili cha luchisa, yino yili mbumba. 16 Alioze, nyi chilonda muchitomonoka nawa, iye akaye kuli sasendote. 17 Sasendote makamutala kanawa, nyi chilonda chinatomonoka, sasendote makavuluka mutu yoze unayiji ngwenyi kanapeme. Iye kanapeme.

18 “Nyi mutu mapwa ni hute, hute liacho muliya, 19 mba homa haze hanakapwa hute muhajimba ni kutomonoka, hanji muhasoloka chipeka chichila kanda chitoma, iye katamba kuya ni kulisolola kuli sasendote. 20 Sasendote makatala kanawa chilonda, nyi mamona ngwenyi chinajotoka, ni wona-wona uze uliho unatomonoka, sasendote makavuluka mutu wacho ngwenyi wa luchisa. Yize yasoloka ha hute yili mbumba. 21 Alioze, nyi sasendote matala kanawa chilonda, mba mamona ngwenyi kuheshi wona-wona utomonoka, chikwo nawa, chilonda chacho kuchajotokele, chinayi, chocho sasendote akase mutu wacho kwaukawenyi ha matangwa shimbiali. 22 Nyi chipeka muchilitanda ha chikowa, sasendote mamuvuluka ngwenyi wa luchisa. Uli umwe musongo. 23 Alioze, nyi chipeka kuchatohwele, chekwamba, kuchalitanjile, chili wika kujimba cha hute, sasendote mavuluka mwe mutu ngwenyi, kanapeme.

24 “Hanji, nyi mutu mawema ha chikowa, mba yifwo muyisoloka, ha chihela chacho muhasoloka chipeka chitoma, kanda chichila, 25 sasendote akamutale kanawa. Nyi wona-wona ha chipeka chacho muusoloka utomonoka, mba chipeka muchisoloka ngwe chanjila chinji kushi lia chikowa, yize yasoloka homa haze awema yili mbumba, sasendote makavuluka mwe mutu ngwenyi, kali wa luchisa. Yili mbumba. 26 Alioze, nyi sasendote matala kanawa chipeka chacho ni kumona ngwenyi kuheshi wona-wona utoma, chikwo nawa, kuchanjilile chinji kushi lia chikowa, chinayi, sasendote akamuse kwaukawenyi ha matangwa shimbiali. 27 Sasendote makamutala kanawa ha tangwa liamuchishimbiali, nyi chipeka chalitanda ha mujimba weswe, sasendote mamuvuluka ngwenyi, kali wa luchisa. Yili mbumba. 28 Alioze, nyi chipeka kuchatohwele, chekwamba, kuchalitanjile ha chikowa, chikwo nawa chinayi, chili wika kujimba cha haze mutu awemene, sasendote makamuvuluka ngwenyi, kanapeme, mumu chili wika kujimba cha homa haze awemene.

29 “Nyi mutu wa lunga hanji wa pwo mapwa ni chilonda ku changi hanji mu mutwe, 30 sasendote matala kanawa chilonda chacho, nyi mamona ngwenyi chilonda chinajotoka chinji kuhiana chikowa, ni kambu jinachiwuluka ni kuhulwoka, sasendote mavuluka mutu wacho ngwenyi, wa luchisa, chili chilonda cha mu mutwe hanji ku changi. Yili mbumba ya mu mutwe hanji ku changi. 31 Alioze, nyi sasendote mamona ngwenyi chilonda kuchajotokele chinji kuhiana chikowa, chikwo nawa kuheshi kambu jilaa, iye katamba kusa mutu yoze unayiji kwaukawenyi ha matangwa shimbiali. 32 Ha tangwa liamuchishimbiali, sasendote makatala kanawa chilonda, nyi kuchalitanjile hanji kuheshi kambu jichiwuluka, chikwo nawa kuchajotokele chinji kuhiana chikowa, 33 mutu wacho katamba kutewula kawewe ni wevu, alioze katambile kutewula haze hali chilonda. Mba sasendote masa mutu yoze unayiji kwaukawenyi ha matangwa akwo shimbiali.

34 “Ha tangwa liamuchishimbiali, sasendote makatala kanawa haze te hali chilonda, nyi chilonda kuchalitanjile mu mutwe hanji ku changi, chipwe kuchajotokele chinji ha chikowa, sasendote mavuluka mutu wacho ngwenyi, kanapeme, iye makakosa mazalo jenyi, mba mapema. 35 Alioze nyi chilonda chaputuka kulitanda ha chikowa muze te hamulweza kulu ngwo kanapeme, 36 sasendote matala kanawa mutu, nyi chilonda hichalitanda ha chikowa, sasendote kechi kufupa nawa hanga amone nyi kambu jinachila, mumu mutu wacho kali wa luchisa. 37 Alioze, nyi ha kumutala kanawa sasendote mamona ngwenyi chilonda kuchalitanjile, chikwo nawa, ha chihela chacho hasoka kambu jilaa, acho musongo waya. Mutu wacho kanapeme, sasendote mamuvuluka ngwenyi, kanapeme.

38 “Nyi ha mujimba wa lunga hanji wa pwo muhasoloka yipeka, nyi yipeka yacho yili yitoma, 39 sasendote mayitala kanawa, nyi yinatomonoka, yili yimbulu yamokomoko. Mutu kanapeme kwenyi.

40 “Nyi kambu ja umwe lunga mujihuluka, mapwa ni lwole, iye keshi wa luchisa. 41 Nyi kambu jize mujihuluka jili ja ha huma, iye mapwa ni lwole, mutu wacho keshi wa luchisa. 42 Alioze, nyi muhasoloka chilonda kanda chitoma, kanda chichila ha lwole hanji ha huma, yili mbumba ya ha mbanda-mutwe hanji ya ha huma. 43 Sasendote matala kanawa mutu wacho, nyi kujimba cha ha chilonda cha ha mbanda-mutwe hanji ha huma chili kanda chitoma, kanda chichila, chinalifu ni mbumba ya ha chikowa, 44 iye kali mukwa-mbumba. Kali wa luchisa, sasendote katamba kumuvuluka ngwenyi, wa luchisa mumu lia musongo uze ali nawo mu mutwe. 45 Hakutwala kuli yoze uli ni musongo wa mbumba, akasuwe mazalo jenyi, kambu jenyi katambile kujilulieka, chikwo nawa, katamba kufuka wevu wa ha muvumbo wa kwilu ni kukololoka ngwenyi: ‘Nguli wa luchisa, nguli wa luchisa!’ 46 Iye makapwa wa luchisa ha mashimbu eswe waze ali ni musongo. Makatwama kwaukawenyi mumu lia kupwa wa luchisa. Makatwama haze lia chilombo.

47 “Nyi mbumba muyikwata ku mazalo, chipwe mazalo akulinga ni wanda hanji ni linyu, 48 chipwe wanda wa ha usuku ni wa ha utohwe wa ku hina lia linyu hanji ni wona wa panga, chipwe ku chuma cheswacho cha kulinga ni kupu, 49 hanji chipeka cha musongo cha ulombo wa matamba kanda cha usungwa hanji chichila muchisoloka ha mazalo, ku wanda wa ha usuku ni wa ha utohwe wa hina lia linyu, hanji ku chuma cheswacho cha kulinga ni kupu, uli musongo wa mbumba, katamba kuusolola kuli sasendote. 50 Sasendote makatala kanawa chipeka chacho ni kusa chuma chize chili ni chilayi cha weji wa mbumba kwaukawacho ha matangwa shimbiali. 51 Mba ha tangwa liamuchishimbiali, iye makatala kanawa chipeka chacho, nyi mamona ngwenyi chipeka chacho chalitanda ha mazalo,* ha wanda wa ha usuhwe ni wa ha utohwe, hanji ha kupu (chipwe ngwe kupu liacho kakulilingila mulimo weswawo), chipeka chacho chili mbumba yipi chinji, chikwata chacho chili cha luchisa. 52 Iye katamba kwocha mazalo, wanda wa ha utohwe ni wa ha usuhwe wa hina, (upwe wona wa panga hanji linyu), chipwe chuma cheswacho cha kulinga ni kupu haze hasoloka chipeka, mumu yili mbumba yipi chinji. Chuma chacho katamba kuchocha.

53 “Alioze, nyi sasendote matala kanawa mba mamona ngwenyi chipeka kuchalitanjile ha mazalo, ha wanda wa ha usuhwe ni wa ha utohwe, chipwe ku chuma cheswacho cha kulinga ni kupu, 54 sasendote matuma kukosa chuma chize chili ni weji ni kuchisa kwaukawacho ha matangwa akwo shimbiali. 55 Muze chuma chacho hachikosa, sasendote makachitala kanawa, nyi chipeka chanunga chizechene, chipwe ngwe kuchalitanjile, chikwata chacho muchipwa cha luchisa. Watamba kuchocha, mumu hichaliwa muchima ni haze.

56 Alioze, nyi sasendote matala kanawa chipeka mba mamona ngwenyi hichaputuka kujimuka muze hakosa chikwata, sasendote akapatule haze hali weji, ha mazalo, ha kupu ni ha wanda wa ha usuhwe ni wa ha utohwe. 57 Alioze, nyi chipeka chasolokela ha chihela chikwo cha mazalo, cha wanda wa ha usuhwe ni wa ha utohwe, hanji ha chuma cha kulinga ni kupu, chipeka chacho chinalitande, watamba kwocha chuma chize chili ni chipeka. 58 Alioze, nyi chipeka muchijimuka ha mazalo, ha wanda wa ha usuhwe ni wa ha utohwe, hanji ha chuma cha kulinga ni kupu chize mukosa, chocho ukakose chuma chize chasoloka ni chipeka ha chisuho chamuchiali, mba chuma chacho muchipema.

59 “Yino ye shimbi yinatale ha weji wa mbumba uze muusoloka ha mazalo waze akulinga ni wanda, hanji ni linyu, ha wanda wa ha usuhwe ni wa ha utohwe, hanji ha chimwe chuma cha kulinga ni kupu, hanga akachivuluke ngwo chipema hanji cha luchisa.”

14 Yehova yalweza nawa Mose ngwenyi: 2 “Yino ye shimbi yinatale hali mukwa-mbumba ha tangwa lize makamutwala kuli sasendote hanga amuvuluke ngwenyi kanapeme. 3 Sasendote makatuhuka mu chilombo hanga amutale kanawa. Nyi mbumba hiyaya, 4 sasendote makamutuma hanga anehe tujila aali apema a mwono, mutondo wa sedru, hina lichila ni chisapwilo hanga amupemese nayo. 5 Sasendote makatuma hanga kajila umuwika akamushihile mu ndoho ya uma yize yili ni meya akuswita mu lwiji. 6 Mba ande kajila wa mwono, mutondo wa sedru, hina lichila ni chisapwilo ayichupike mu manyinga a kajila yoze ashihilanga mu meya a mu lwiji. 7 Mba iye makasapwila manyinga yisuho shimbiali kuli mutu yoze anapemesa ku mbumba, ni kumuvuluka ngwenyi kanapeme. Mba akatusule kajila wa mwono aye kwenyi mu yambu.

8 “Mutu yoze mapemesa akakose mazalo jenyi, atewule kambu jenyi jeswe ni kusana, chocho makapema. Mba manjila mu chilombo. Alioze makatwama haze lia mbalaka yenyi matangwa shimbiali. 9 Ha tangwa liamuchishimbiali, iye akatewule kambu jeswe ja ku mutwe, wevu ni yikenyi-kenyi. Muze hatewula kambu jenyi jeswe, makosa mazalo jenyi, masana, mba mapema.

10 “Ha tangwa liamuchinake, iye makanda ana-mapanga aali a kuji apema, panga umuwika wa chihwo mupema wa mwaka umuwika, kilu* jitatu ni chipinji ja unga wafufunuka wakuchinga ni maji ngwe mulambu wa mbuto ni musenge* umuwika wa maji. 11 Sasendote yoze makalweza mutu ngwenyi kanapeme, makeza nenyi kumeso ja Yehova, ku unjililo wa mbalaka ya kulikungulwila, hamwe ni milambu yacho. 12 Sasendote makanda umwe wa kuli ana-mapanga a kuji ni kumuhana ngwe mulambu wa uhie, hamuwika ni musenge wa maji, makayihungisa kulutwe ni kunyima ngwe mulambu wa kuhungisa kumeso ja Yehova. 13 Mba makashiha mwana-panga wa kuji mu chihela chisandu, ha chihela haze akushihila mulambu wa shili ni mulambu wa kulumba, mumu ngwe chizechene mulambu wa shili wapwa wambala wa sasendote, ni mulambu wa uhie uli wambala wa sasendote. Chili chuma chisandu chahiana.

14 “Mba sasendote manda ndambu ya manyinga a mulambu wa uhie ni kwakwita ku songo lia twitwi lia utata lia mutu yoze anapemesa, ku munwe wa shina wa ku kwoko lia utata ni ku munwe wa shina wa ku kulu lia utata. 15 Sasendote manda ndambu ya maji waze ali mu musenge ni kwazujila ha kwoko lienyi mwene lia umama. 16 Sasendote makatata munwe wenyi wa ku kwoko lia utata ha maji waze ali ha kwoko lienyi lia umama, mba masapwila ndambu ya maji ni munwe yisuho shimbiali kumeso ja Yehova. 17 Sasendote manda ndambu ya maji waze asala ha kwoko lienyi, makwita akehe ku songo lia twitwi lia utata lia yoze anapemesa, ku munwe wa shina wa ku kwoko lia utata, ni ku munwe wa shina wa ku kulu lia utata, haze akwitanga manyinga a mulambu wa uhie. 18 Maji waze masala ha kwoko lia sasendote, maazujila ha mutwe wa mutu yoze anapemesa, chocho sasendote mamufukila shili yenyi kumeso ja Yehova.

19 “Sasendote makahana mulambu wa shili ni kufukila shili mutu yoze anapemesa ku luchisa, mba makashiha mulambu wa kulumba. 20 Sasendote makalambula ha chilumbilo mulambu wa kulumba ni mulambu wa mbuto. Chenacho sasendote makafuka shili ya mutu, mba mutu wacho mapema.

21 “Alioze nyi mutu kali chiswale, keshi ni yize mahana, makaneha mwana-panga wa kuji wa mulambu wa uhie, hanga amuhane ngwe mulambu wa kuhungisa, hanga amufukile shili yenyi, hamuwika ni kilu yimuwika ya unga wafufunuka wakuchinga ni maji, ngwe mulambu wa mbuto ni musenge umuwika wa maji, 22 ni tutele aali hanji ana-a-membe aali kulita ni uhashi wenyi. Kajila umwe akamuhane ngwe mulambu wa shili, mukwo akamuhane ngwe mulambu wa kulumba. 23 Ha tangwa liamuchinake, iye makayitwala kuli sasendote hanga akamuvuluke ngwenyi mupema kumeso ja Yehova, ku unjililo wa mbalaka ya kulikungulwila.

24 “Sasendote makanda mwana-panga wa kuji wa mulambu wa uhie ni musenge wa maji, makayihungisa kulutwe ni kunyima ngwe mulambu wa kuhungisa kumeso ja Yehova. 25 Chocho sasendote mashiha mwana-panga wa kuji wa mulambu wa uhie, mba manda ndambu ya manyinga a mulambu wa uhie ni kuyisa ku songo lia twitwi lia utata lia mutu yoze anapemesa, ku munwe wa shina wa ku kwoko lia utata ni ku munwe wa shina wa ku kulu lia utata. 26 Sasendote mazujila ndambu ya maji ha kwoko lienyi lia umama, 27 akasapwile ndambu ya maji waze ali ha kwoko lienyi lia umama ni munwe wenyi wa ku kwoko lia utata yisuho shimbiali kumeso ja Yehova. 28 Sasendote manda ndambu ya maji waze asala ha kwoko lienyi, makwita akehe ku songo lia twitwi lia utata lia yoze anapemesa, ku munwe wa shina wa ku kwoko lia utata ni ku munwe wa shina wa ku kulu lia utata, homa hazehene akwitanga manyinga a mulambu wa uhie. 29 Maji waze masala ha kwoko lia sasendote, maazujila ha mutwe wa mutu yoze anapemesa hanga amufukile shili yenyi kumeso ja Yehova.

30 “Yoze anapemesa, makahana umwe wa kuli tutele hanji umwe wa kuli ana-a-membe kulita ni uhashi wenyi, 31 kajila umwe akapwe wa mulambu wa shili, mukwo wa mulambu wa kulumba, akayihane hamuwika ni mulambu wa mbuto, chocho sasendote makafukila shili yoze anapemesa kumeso ja Yehova.

32 “Yino ye shimbi yize yinatale hali mutu yoze wapwile ni mbumba, alioze keshi ni uhashi hanga amupemese ku luchisa wenyi.”

33 Mba Yehova yalweza Mose ni Arone ngwenyi: 34 “Muze mununjila mu chifuchi cha Kanana, chize ngunanwehe hanga chipwe nichenu, muze mungusa musongo wa mbumba ku zuwo lia umwe mu chifuchi chenu, 35 mwenya-zuwo katamba kuya kuli sasendote ni kumulweza ngwenyi: ‘Ku zuwo liami weji uliko.’ 36 Sasendote makatuma atu hanga achize yuma yeswe mu zuwo shimbu kanda achitala kanawa weji wacho, hanga achine kwamba ngwenyi yuma yeswe yili mu zuwo yili ya luchisa. Mba sasendote manjila hanga atale kanawa zuwo. 37 Iye makatala kanawa ha chihela haze hali weji wacho, nyi ku yikalakala kuli yipeka ya ulombo wa matamba, wa usungwa hanji uchila, nyi yipeka muyisoloka ngwe yanjila chinji mu yikalakala, 38 mba sasendote matuhuka mu zuwo, majila zuwo liacho ha matangwa shimbiali.

39 “Sasendote makafuna ha tangwa liamuchishimbiali ni kutala kanawa zuwo. Nyi weji walitanda ku yikalakala yeswe ya zuwo, 40 sasendote makatuma atu hanga achize mawe eswe ali ni weji ni kwambila haze lia mbonge, ku chihela cha luchisa. 41 Mba matuma kukwala mu zuwo lieswe, mavu waze makwalamo katamba kwambila haze lia mbonge, ku chihela cha luchisa. 42 Mba masalakanyisa mawe akwo ha chihela cha mawe waze achizanga, makashingula zuwo ni mavu eka.

43 “Alioze, nyi weji wacho muusoloka nawa muze hachiza mawe ni muze zuwo halikwala ni kulishingula, 44 sasendote makanjila ni kutala kanawa mu zuwo. Nyi weji wacho walitanda chinji mu zuwo, acho muli mbumba yipi chinji. Zuwo lili lia luchisa. 45 Sasendote makatuma hanga awuzule zuwo, mawe, mitondo ni mavu eswe a ku zuwo, akayimbile haze lia mbonge, ku chihela cha luchisa. 46 Alioze, mutu mweswe manjila mu zuwo ha matangwa waze lichili lia kwajila, mapwa wa luchisa ndo chingoloshi. 47 Mweswawo mapomba mu zuwo liacho, katamba kukosa mazalo jenyi, ni yoze malila mu zuwo liacho katamba kukosa mazalo jenyi.

48 “Nyi sasendote mamona ngwenyi weji kuwalitanjile mu zuwo muze halishingula, akavuluke zuwo liacho ngwenyi linapeme, mumu weji hiwaya. 49 Iye akande tujila aali, mitondo ya sedru, hina lichila ni chisapwilo hanga apemese zuwo ku luchisa. 50 Katamba kushihila kajila umuwika mu chikashi cha uma muze muli meya a mu lwiji. 51 Mba manda mutondo wa sedru, chisapwilo, hina lichila ni kajila wa mwono, mayichupika mu manyinga a kajila yoze ashihilanga mu meya a mu lwiji, ni kusapwila manyinga jacho yisuho shimbiali ku zuwo. 52 Sasendote makapemesa zuwo ni manyinga a kajila, meya a mu lwiji, kajila wa mwono, mutondo wa sedru, chisapwilo ni hina lichila. 53 Mba sasendote makatusula kajila wa mwono haze lia mbonge hanga aye kwenyi mu yambu, akafukile zuwo shili, chocho mulipema.

54 “Yino ye shimbi yinatale ha mbumba ya mutapu weswe, ya mu mutwe hanji ya ku changi, 55 mbumba ya ku mazalo hanji ya ku zuwo, 56 ni haze hanajimba, yilonda ni yipeka, 57 hanga anyingike muze chuma chili ni luchisa, ni muze chinapeme. Yino ye shimbi yinatale ha mbumba.”

15 Yehova yamba nawa kuli Mose ni Arone ngwenyi: 2 “Lwezenu A-Izalele ngwenu: ‘Nyi umwe lunga mapwa ni musongo wa kuhita ku ulunga wenyi, kuhita chacho muchimupwisa wa luchisa. 3 Iye kali wa luchisa mumu lia kuhita chenyi, chipwe yize yinahita yinanungu hanji yasakaminya, nihindu kali wa luchisa.

4 “‘Muhela weswawo mapomba mutu yoze unahita, muupwa wa luchisa, chuma cheswacho matwama muchipwa cha luchisa. 5 Yoze makwata ku muhela wenyi katamba kukosa mazalo jenyi ni kusana, mapwa wa luchisa ndo chingoloshi. 6 Mweswawo matwama ha chuma chize atwamanga mutu yoze unahita, katamba kukosa mazalo jenyi ni kusana, mapwa wa luchisa ndo chingoloshi. 7 Mweswawo makwata ku mujimba wa mutu yoze unahita, katamba kukosa mazalo jenyi ni kusana, mapwa wa luchisa ndo chingoloshi. 8 Nyi mutu yoze unahita mafwila mate mutu yoze unapeme, mutu yoze afwila mate, katamba kukosa mazalo jenyi ni kusana, mapwa wa luchisa ndo chingoloshi. 9 Nyi mutu yoze unahita matwama ha kachitwamo kaze akutwama helu lia kashitu, kachitwamo kacho mukapwa ka luchisa. 10 Mweswe makwata chuma chize iye atwamanga, mapwa wa luchisa ndo chingoloshi. Mweswawo mambata chuma chacho katamba kukosa mazalo jenyi ni kusana, mapwa wa luchisa ndo chingoloshi. 11 Nyi mutu yoze unahita kasanyine ku moko makwata mutu, mutu yoze akwata katamba kukosa mazalo jenyi ni kusana, mapwa wa luchisa ndo chingoloshi. 12 Katamba kupalwola chikashi cheswacho cha uma chize mutu yoze unahita makwata. Nyi makwata ku chikwachilo cha mutondo katamba kuchikosa.

13 “‘Muze kuhita cha mutu muchipatuka, chocho mapema, iye akalule matangwa shimbiali a kulipemesa chenyi, katamba kukosa mazalo jenyi ni kusana meya a mu lwiji mba mapema. 14 Ha tangwa liamuchinake, katamba kwanda tutele aali hanji ana-a-membe aali ni kuya kumeso ja Yehova ku unjililo wa mbalaka ya kulikungulwila, ni kuhana tujila jacho kuli sasendote. 15 Sasendote makaahana, umwe ngwe mulambu wa shili, mukwo ngwe mulambu wa kulumba. Sasendote mamufukila shili kumeso ja Yehova mumu lia kuhita chenyi.

16 “‘Nyi umwe lunga matuhwisa ana,* iye katamba kusana mujimba weswe, mapwa wa luchisa ndo chingoloshi. 17 Katamba kukosa mazalo ni kukosa chuma cheswacho cha kulinga ni kupu haze hali ana,* yuma yacho muyipwa ya luchisa ndo chingoloshi.

18 “‘Muze lunga malimona ni pwo chocho matuhwisa ana,* ayo katamba kusana, mapwa a luchisa ndo chingoloshi.

19 “‘Nyi pwo mapwa ku chijila, mapwa wa luchisa ha matangwa shimbiali mumu lia kuhita cha manyinga jenyi. Mweswawo mamukwata mapwa wa luchisa ndo chingoloshi. 20 Heswaho makapomba shimbu uchili wa luchisa mumu lia kupwa ku chijila, muchipwa cha luchisa, ni heswaho matwama muhapwa ha luchisa. 21 Yoze makwata ku muhela wenyi, katamba kukosa mazalo jenyi ni kusana, mapwa wa luchisa ndo chingoloshi. 22 Mweswawo makwata ha chuma chize atwamanga, katamba kukosa mazalo jenyi ni kusana, mapwa wa luchisa ndo chingoloshi. 23 Nyi katwamanga ha muhela hanji ha chuma cheswacho, mutu yoze mayikwata mapwa wa luchisa ndo chingoloshi. 24 Nyi lunga malimona nenyi chocho manyinga mamukwata, mapwa wa luchisa ha matangwa shimbiali, muhela weswawo lunga wacho mapomba muupwa wa luchisa.

25 “‘Nyi pwo mahita manyinga matangwa anji muze shimbu lienyi liakupwa ku chijila kanda liheta, hanji nyi manunga ni kuhita manyinga kuhiana shimbu lize akupwa ku chijila, iye mapwa wa luchisa ha matangwa eswe mahita manyinga, ngwe chize chakulingiwa ha matangwa waze akupwa ku chijila. 26 Muhela weswawo mapomba ha matangwa waze anahita manyinga, muupwa wa luchisa, ngwe chize muhela wenyi wakupwa muze akupwa ku chijila. Chuma cheswacho matwama muchipwa cha luchisa, ngwe chize chakulingiwa ha matangwa waze akupwa ku chijila. 27 Yoze makwata yuma yacho mapwa wa luchisa, katamba kukosa mazalo jenyi ni kusana, mapwa wa luchisa ndo chingoloshi.

28 “‘Alioze nyi kuhita cha manyinga chapatuka, iye malula matangwa shimbiali, mba mapema. 29 Ha tangwa liamuchinake, iye katamba kwanda tutele aali hanji ana-a-membe aali ni kwatwala kuli sasendote ku unjililo wa mbalaka ya kulikungulwila. 30 Kajila umwe sasendote makamuhana ngwe mulambu wa shili, mukwo ngwe mulambu wa kulumba, sasendote makamufukila shili kumeso ja Yehova, mumu lia luchisa wa kuhita chenyi.

31 “‘Chenacho munukahandununa A-Izalele ku luchisa, hanga achine kufwa mu luchisa wo ha kushililika tabernakulu yize yili hakachi ko.

32 “‘Yino ye shimbi yinatale hali lunga yoze unahita, lunga yoze uli wa luchisa mumu lia kutuhwisa ana,* 33 hakutwala kuli pwo yoze uli wa luchisa mumu lia kupwa ku chijila, hakutwala kuli lunga hanji pwo yoze unahita ni hakutwala kuli lunga yoze malimona ni pwo uli wa luchisa.’”

16 Yehova yahanjika ni Mose muze ana aali ja Arone te hafwa, waze afwile mumu lia kukundama kuli Yehova. 2 Yehova yamba kuli Mose ngwenyi: “Lweza yayenu Arone ngwe, katambile kunjila mu chihela chisandu ha ola yeswayo, kunyima lia chikalakala cha hina, kulutwe lia chifuko cha mushete hanga achine kufwa. Mumu mungukasoloka mu lelwa helu lia chifuko.

3 “Yino ye Arone atamba kuneha muze manjila mu chihela chisandu: Mwana-ngombe wa kuji ngwe mulambu wa shili ni panga wa kuji ngwe mulambu wa kulumba. 4 Akazale mazalo asandu asuku-asuku a linyu. Tuputula* a linyu katamba kufuka uselesele wenyi. Katamba kujichika muya wa linyu mu zalilo ni kulikasa chitambala cha linyu ku mutwe. Kali mazalo asandu. Muze masana, mba maazala.

5 “Iye katamba kutambula ku chikungulwila cha A-Izalele pembe aali ngwe mulambu wa shili ni panga umuwika ngwe mulambu wa kulumba.

6 “Mba Arone malambula mwana-ngombe wa kuji wa mulambu wa shili yenyi, ni kufuka shili yenyi ni ya akwa-zuwo lienyi.

7 “Iye makanda pembe aali a kuji ni kwamanyisa kumeso ja Yehova ku unjililo wa mbalaka ya kulikungulwila. 8 Arone akate chela hali pembe aali, chela chimuwika cha Yehova, chikwo cha Azazele.* 9 Arone maneha pembe yoze chela muchiholokela mumu lia Yehova ni kumuhana ngwe mulambu wa shili. 10 Alioze, pembe yoze uchela muuholokela mumu lia Azazele, katamba kuya nenyi ni mwono kumeso ja Yehova hanga afukile shili ha mujimba wenyi mba amutusule aye kwenyi mu puya mumu lia Azazele.

11 “Arone makahana mwana-ngombe wa kuji ngwe mulambu wa shili yenyi ni kulifukila shili yenyi ni ya akwa-zuwo lienyi. Mba makashiha mwana-ngombe wa kuji ngwe mulambu wa shili yenyi.

12 “Mba makanda longa lia kukwachila kahia lia too ni makala a kahia akuchiza ha chilumbilo chize chili kumeso ja Yehova, ni kuzomona moko aali a insensu ya lupembo mupema, akayitwale kunyima lia chikalakala cha hina. 13 Iye makasa insensu ha kahia kumeso ja Yehova, mwishi uze muukakumuka ha insensu muukafuka chifuko cha Mushete wa Uchela hanga iye achine kufwa.

14 “Makanda ndambu ya manyinga a mwana-ngombe wa kuji ni kwasapwila ni munwe kulutwe lia chifuko sali lia chivumbuko. Akasapwile ndambu ya manyinga ni munwe yisuho shimbiali kulutwe lia chifuko.

15 “Iye makashiha pembe wa kuji wa mulambu wa shili ya atu. Akatwale manyinga kunyima lia chikalakala cha hina, mba manyinga jacho makalinga no yize alinganga ni manyinga a mwana-ngombe wa kuji. Akaasapwile ku chifuko, kulutwe lia chifuko.

16 “Iye makafukila shili chihela chisandu mumu lia yuma ya luchisa yize A-Izalele akulinga, mumu lia utanguko wo ni mumu lia shili yo. Chenacho atamba kulinga mumu lia mbalaka ya kulikungulwila yize yatwama mukachi ko, hakachi ka yuma ya luchisa yize ayo akulinga.

17 “Niumwe mutu katambile kupwa mu mbalaka ya kulikungulwila chize ha ola yize Arone manjila mu chihela chisandu hanga afuke shili ndo muze matuhukamo. Iye malifukila shili yenyi mwene, ya akwa-zuwo lienyi ni ya chikungulwila cheswe cha A-Izalele.

18 “Mba matuhuka ni kuya ku chilumbilo chize chili kumeso ja Yehova, mafukila chilumbilo shili. Manda ndambu ya manyinga ya mwana-ngombe wa kuji ni manyinga a pembe wa kuji ni kwasa ku mbinga jeswe ja chilumbilo. 19 Iye makasapwila nawa ndambu ya manyinga ni munwe yisuho shimbiali ku chilumbilo, akachipemese ku yitanga ya luchisa ya A-Izalele ni kuchipwisa chisandu.

20 “Muze mahwisa kufukila shili chihela chisandu, mbalaka ya kulikungulwila ni chilumbilo, iye maneha pembe wa kuji wa mwono. 21 Arone makasa moko jenyi eswe aali ha mutwe wa pembe wa kuji wa mwono ni kwambulwilaho tupalia eswe A-Izalele, utanguko wo weswe ni shili yo yeswe. Iye makayisa ha mutwe wa pembe wa kuji ni kumutuma mu puya ku moko ja mutu yoze atongola hanga achilinge. 22 Pembe makambata tupalia two eswe ku chihela kuze kwatwamine atu. Makamutuma mu puya.

23 “Mba Arone manjila mu mbalaka ya kulikungulwila, machiza mazalo a linyu waze azalanga muze anjilanga mu chihela chisandu ni kwahichikamo. 24 Iye katamba kusanyina mu chihela chisandu ni kuzala mazalo jenyi, mba makatuhuka akahane mulambu hali iye mwene ni mulambu wa kulumba hali A-Izalele. Malifukila shili yenyi mwene ni ya A-Izalele. 25 Makafwinjisa maji a mulambu wa shili ha chilumbilo.

26 “Mutu yoze wayanga ni pembe wa Azazele katamba kukosa mazalo jenyi ni kusana, mba makanjila mu chilombo.

27 “Mwana-ngombe wa kuji wa mulambu wa shili ni pembe wa mulambu wa shili, waze manyinga jo anjilile no mu chihela chisandu hanga afuke no shili, makaatwala haze lia chilombo. Kupu, yifwo ni ufwachi wa tushitu jacho makayocha pwilili. 28 Yoze mayocha katamba kukosa mazalo jenyi ni kusana, mba manjila mu chilombo.

29 “Yino yili shimbi ya mutolo kuli yenu: Ha kakweji wamuchishimbiali, ha tangwa kumi, nwatamba kusolola ngwenu nunanenganyana* mumu lia shili yenu, apwe Ka-Izalele, apwe chilambala yoze uli mukachi kenu, kanda akalinga mulimo niumwe. 30 Tangwa liacho makanufukila shili hanga anuvuluke ngwenu nunapeme. Munukapema ku shili yenu yeswe kumeso ja Yehova. 31 Yili sambata yize nwatamba kuhwima ku milimo yenu yeswe. Nwatamba kunenganyana mumu lia shili yenu. Yino yili shimbi ya mutolo.

32 “Sasendote yoze makawayisa hanga akasalakane tato ha mulimo wa usasendote, makafuka shili ni kuzala mazalo asandu a linyu. 33 Iye makafukila shili chihela chisandu, mbalaka ya kulikungulwila ni chilumbilo. Makafukila nawa asasendote shili ni chikungulwila cheswe cha A-Izalele. 34 Yino yili shimbi ya mutolo kuli yenu, hanga akafukile A-Izalele shili chisuho chimuwika ha mwaka, mumu lia shili yo yeswe.”

Chocho Arone yalinga kulita ni chize Yehova atumine kuli Mose.

17 Yehova yamba nawa kuli Mose ngwenyi: 2 “Lweza Arone, ana jenyi eswe ni A-Izalele eswe ngwe: ‘Yino ye Yehova atuma ngwenyi:

3 “‘“Nyi umwe mutu hakachi ka A-Izalele mashiha ngombe, mwana-panga wa kuji hanji pembe mu chilombo hanji haze lia chilombo, 4 shimbu amutwale ku unjililo wa mbalaka ya kulikungulwila, hanga amuhane ngwe mulambu kuli Yehova, kulutwe lia tabernakulu ya Yehova, mutu wacho makapwa ni mulonga wa manyinga. Iye kamwanga manyinga, kashika katamba kumushiha hakachi ka atu jenyi, 5 hanga A-Izalele achine kushihila nawa yimuna haze, alioze aatwale kuli Yehova ku unjililo wa mbalaka ya kulikungulwila, kuli sasendote. Ayo katamba kwahana kuli Yehova ngwe chitapo cha sambukila. 6 Sasendote makasapwila manyinga ha chilumbilo cha Yehova ku unjililo wa mbalaka ya kulikungulwila, ni kufwinjisa maji ngwe lupembo mupema kuli Yehova. 7 Hanga ayo achine kulambula milambu kuli andemoniu alifwa ni pembe, waze akulinga no utanji. Yino muyipwa shimbi ya mutolo kuli yenu ku yisemuko yenu yeswe.”’

8 “Watamba kwalweza ngwe: ‘Ka-Izalele mweswawo hanji chilambala mweswawo yoze watwama hakachi kenu, yoze mahana mulambu wa kulumba hanji chitapo 9 chakuhona kutwala chitapo chacho ku unjililo wa mbalaka ya kulikungulwila hanga achilambule kuli Yehova, katamba kumushiha hakachi ka atu jenyi.

10 “‘Nyi umwe Ka-Izalele hanji chilambala yoze watwama hakachi kenu malia manyinga a chitangiwa cheswacho, pundu lume, yami mungulimika nenyi, mungumushiha hakachi ka atu jenyi. 11 Mumu mwono* wa chitangiwa watwama mu manyinga, yami mwene nanwaha-o hanga nulifukile no shili ha chilumbilo. Mumu manyinga e akufuka shili kupalikila mu mwono uze watwamamo. 12 Kashika nambile kuli yenu ngwami: “Niumwe wa kuli yenu katambile kulia manyinga, niumwe chilambala yoze watwama hakachi kenu katambile kulia manyinga.”

13 “‘Nyi umwe Ka-Izalele hanji chilambala yoze watwama hakachi kenu maya ni kuzomba, mba makwata umwe kashitu hanji kajila yoze akulia, katamba kumwanga manyinga jenyi ni kwashikila ni mavu. 14 Mumu manyinga we mwono* wa yitangiwa* ya milali yeswe, mumu mwono watwama mu manyinga. Kashika nambile kuli A-Izalele ngwami: “Kanda nulia manyinga a chitangiwa cheswacho, mumu manyinga we mwono wa yitangiwa yeswe. Yoze malia manyinga akamushihe.” 15 Mutu mweswawo, apwe Ka-Izalele hanji chilambala, nyi malia yifwo ya kashitu yoze awananga hanafu kulu, hanji yoze ashihanga kuli kashitu wa mu yambu, mutu wacho katamba kukosa mazalo jenyi ni kusana, iye mapwa wa luchisa ndo chingoloshi, mba mapema. 16 Alioze, nyi iye kakosele mazalo jenyi ni kusana, shili yenyi muyikamushata.’”

18 Yehova yamba nawa kuli Mose ngwenyi: 2 “Lweza A-Izalele ngwe: ‘Yami nguli Yehova, Zambi yenu. 3 Kanda nukapwa ni yitanga ngwe ya A-Engitu, chifuchi chize te nwatwama. Kanda nukalinga yuma yize A-Kanana akulinga mu chifuchi muze ngunanutwala. Kanda nukakaula mianda yo. 4 Yenu nwatamba kwononokena yiyulo yami, kufunga shimbi jami ni kujikaula. Yami nguli Yehova, Zambi yenu. 5 Fungenu shimbi jami ni yiyulo yami. Yoze malinga chocho, mapwa ni mwono kupalikila mu shimbi ni yiyulo yacho. Yami nguli Yehova.

6 “‘Niumwe wa kuli yenu katambile kukundama kuli usoko wenyi wa ha muchima hanga alisumbakenye nenyi. Yami nguli Yehova. 7 Kanda ukalisumbakenya ni tatenu chipwe kulisumbakenya ni noko. Mumu iye kali noko, kanda ukalisumbakenya nenyi.

8 “‘Kanda ukalisumbakenya ni pwo lia tatenu. Mumu chino muchikolesa tatenu sonyi.*

9 “‘Kanda ukalisumbakenya ni ndumbwe wa pwo, apwe ndumbwe yoze wasemukine nenyi kuli tatenu, apwe ndumbwe wasemukine nenyi kuli noko. Chipwe ngwe nwasemukinyine mu zuwo limuwika, chipwe ngwe kasemukinyine kweka.

10 “‘Kanda ukalisumbakenya ni mujikulu we wa pwo wakusema kuli mwane wa lunga hanji kuli mwane wa pwo, mumu kali uselesele wa yena mwene.*

11 “‘Kanda ukalisumbakenya ni mwana wa pwo wa pwo lia tatenu, mumu kali ndumbwe, mwana wa tatenu.

12 “‘Kanda ukalisumbakenya ni ndumbu ya tatenu, mumu kali manyinga amuwika ni tatenu.

13 “‘Kanda ukalisumbakenya ni yayo hanji mwana-kwo wa pwo wa noko, mumu kali manyinga amuwika ni noko.

14 “‘Kuwatambile kukolesa sonyi* yayo hanji mwana-kwo ya tatenu ha kulisumbakenya ni pwo lienyi, mumu iye kali noko.

15 “‘Kanda ukalisumbakenya ni tembwa-mwane mumu iye kali pwo lia mwane. Kanda ulisumbakenya nenyi.

16 “‘Kanda ukalisumbakenya ni pwo lia yayenu hanji lia mwana-kwenu. Mumu chino muchikolesa sonyi* yayenu hanji mwana-kwenu.

17 “‘Kanda ukalisumbakenya ni pwo ni kulisumbakenya nawa ni mwanenyi. Kanda ukambata mwana wa mwanenyi wa lunga, hanji mwana wa mwanenyi wa pwo hanga ulisumbakenye no. Mumu chili chitanga cha sonyi.

18 “‘Kanda ukambata yayo hanji mwana-kwo ya pwo lie hanga ahalike nenyi, ni kulisumbakenya nenyi shimbu pwo lie uchili ni mwono.

19 “‘Kanda ukalisumbakenya ni pwo shimbu ali wa luchisa mumu lia kupwa ku chijila.

20 “‘Kanda ukalisumbakenya ni pwo lia mukwenu ni kulipwisa wa luchisa.

21 “‘Kanda utayiza hanga alambule mwane niumwe kuli Moleke. Kanda nupihisa jina lia Zambi yenu. Yami nguli Yehova.

22 “‘Kanda ukalisumbakenya ni lunga-ni-mukwenu ngwe chize chakulingiwa ni pwo. Chili chuma chipi chinji.

23 “‘Lunga katambile kulisumbakenya ni kashitu ni kulipwisa wa luchisa. Chipwe pwo niumwe katambile kulisumbakenya ni kashitu. Chili chuma cha lwaji.

24 “‘Kanda nulichisa ni chuma nichimwe cha ku yuma yino. Akwa-mavungu waze ngunahumu kumeso jenu hanapu a luchisa mumu lia yuma yino. 25 Kashika chifuchi cho chili cha luchisa, mungwamwesa lamba mumu lia uhenge wo. Chifuchi cho muchikaasaza. 26 Alioze yenu kanda nukalinga nichimwe cha ku yuma yino ya kuzelwokesa, chipwe Ka-Izalele, chipwe chilambala yoze uli hakachi kenu. 27 Mumu yuma yino yeswe ya kuzelwokesa, ye alingile atu waze atwamine mu chifuchi chino shimbu yenu te kanda nuchizamo, kashika chifuchi chili cha luchisa. 28 Chocho, chifuchi kuchichi kanusaza ha kuchipihisa, ngwe chize muchikasaza atu waze aliangile kutwamamo. 29 Mweswawo malinga yuma yino ya luchisa, akamushihe hakachi ka atu jenyi. 30 Kanda nulinga yuma ya kuzelwokesa, yize alingile atu waze aliangile kutwama mu chifuchi chino hanga nuchine kupwa a luchisa mumu lia yuma yacho. Yami nguli Yehova, Zambi yenu.’”

19 Yehova yamba nawa kuli Mose ngwenyi: 2 “Lweza chikungulwila cheswe cha A-Izalele ngwe: ‘Yenu nwatamba kupwa asandu, mumu yami Yehova, Zambi yenu nguli musandu.

3 “‘Mutu mweswe wa kuli yenu katamba kuvumbika tato ni naye ni kufunga sambata jami. Yami nguli Yehova, Zambi yenu. 4 Kanda nuwayila tuzambi amokomoko, chipwe kulilingila tuzambi a utale a kuzuzulula. Yami nguli Yehova, Zambi yenu.

5 “‘Nyi munuhana chitapo cha sambukila kuli Yehova, nwatamba kuchihana mu mulali uze munuzuka utayizo wenyi. 6 Nwatamba kuchilia ha tangwa lize munuchihana ni ha tangwa lize mulihataho, alioze chize muchisalaho ndo ha tangwa liamuchitatu, nwatamba kuchocha pwilili. 7 Alioze, nyi munulia yifwo yacho ha tangwa liamuchitatu, chitapo chacho kechi kuchitayiza mumu chili chuma chipi chinji. 8 Mweswawo mayilia, shili yenyi muyimushata mumu kashililika chuma chisandu cha Yehova, mutu wacho akamushihe hakachi ka atu jenyi.

9 “‘Muze munukacha mbuto mu chifuchi chenu, kanda nukacha mbuto jeswe ku masesa a minda yenu, chipwe kutongona jeswe jize mujisala ha kucha. 10 Chikwo nawa, kanda nucha yize muyisala mu minda yenu ya vinyu, chipwe kutongona uva yize yaholokela mu minda yenu. Nwatamba kuyihichikila yiswale ni yilambala. Yami nguli Yehova, Zambi yenu.

11 “‘Kanda nwiya, kanda nulionga, kanda nuhanjika mahuza umwe kuli mukwo. 12 Kanda nulishinga ni mahuza mu jina liami, ni kupihisa jina lia Zambi yenu. Yami nguli Yehova. 13 Kanda upupa yuma ya mwenyembo we, chipwe kwiya. Fweto ya ngamba ye kanda yitwama mu kwoko lie ufuku weswe ndo muze mukucha.

14 “‘Kanda ushinga kafwa-matwi chipwe kusa chitalingiso kulutwe lia kapuputa. Vwila Zambi ye woma. Yami nguli Yehova.

15 “‘Kanda usopesa ni uhenge. Kanda upwa sali lia chiswale mumu lia iye kupwa chiswale, chipwe kupwa sali lia pichi mumu lia upite wenyi. Watamba kupatwila mwenyembo we ni ululi.

16 “‘Kanda wendangana ni saki hakachi ka atu jenu. Kanda ukakatukila mwono* wa mwenyembo* we. Yami nguli Yehova.

17 “‘Kanda utulikila ndumbwe kole mu mbunge. Alioze, watamba kumukumika hanga uchine kupwa ni mulonga ngwe iye.

18 “‘Kanda ulikalila milonga, chipwe kutulikila ana ja atu je kakucha. Zanga mwenyembo we ngwe chize wakulizanga yena mwene. Yami nguli Yehova.

19 “‘Yenu nwatamba kufunga shimbi jami. Kanda nuchinga chimuna wa mulali umwe hanga alisumbakenye ni chimuna wa mulali ukwo. Kanda nukuwa mbuto ja milali yiali yalisa mu minda yenu, chipwe kuzala mazalo akutonga ni wanda waali walisa.

20 “‘Nyi umwe lunga malisumbakenya ni umwe pwo, mba mwe pwo kali ngamba yenyi yoze hanambisa* kuli lunga mweka, alioze kanda achimukuula chipwe kumutusula, eswe aali akaamwese lamba. Alioze katambile kwashiha, mumu pwo te kanda achipwa ni utuswilo. 21 Iye katamba kuneha kuli Yehova mulambu wenyi wa uhie ku unjililo wa mbalaka ya kulikungulwila, akanehe panga wa kuji ngwe mulambu wa uhie. 22 Sasendote makamufukila shili kumeso ja Yehova ni panga wa kuji wa mulambu wa uhie mumu lia shili yize alinga, mba mamukonekena shili yenyi.

23 “‘Muze munukanjila mu chifuchi ni kutumba mitondo yize yakwima mihuko, mihuko ya mitondo yacho nwatamba kuyimona ngwe ya luchisa. Kunwatambile kuyilia ha miaka yitatu. 24 Alioze, ha mwaka wamuchiwana, mihuko yeswe muyikapwa yisandu, mulikapwa tangwa lia kuwahilila kumeso ja Yehova. 25 Ha mwaka wamuchitano, munukalia mihuko yako, chocho munukawezela mihuko yacho ha mihuko yize nwakucha. Yami nguli Yehova, Zambi yenu.

26 “‘Kanda nulia chuma nichimwe chize chili ni manyinga.

“‘Kanda nutaha, chipwe kulinga tufuta-futa.

27 “‘Kanda nukatewula kambu mu mambalangwe, chipwe kupihisa wevu ku masongo.

28 “‘Kanda nulichata ha mijimba yenu mumu lia mutu yoze wafwa, chipwe kulisoneka* ha mijimba. Yami nguli Yehova.

29 “‘Kanda ukolesa mwane wa pwo sonyi ha kumupwisa chikoi hanga mu chifuchi muchine kupwa ukoi ni kuzala too ni yitanga ya sonyi.

30 “‘Fungenu sambata jami ni kuvumbika* chihela chami chisandu. Yami nguli Yehova.

31 “‘Kanda nuya kuli tahi, chipwe kuli atu waze akulweza akwo yuma ya kulutwe lia matangwa, ni kulichisa kupalikila muli ayo. Yami nguli Yehova, Zambi yenu.

32 “‘Ukamane kulutwe lia mukwa-kambu* jitoma, vumbika kashinakaji ni kuvwila woma Zambi ye. Yami nguli Yehova.

33 “‘Nyi umwe chilambala katwama hakachi kenu, kanda numumwesa lamba. 34 Nwatamba kumona chilambala yoze watwama hakachi kenu ngwe Ka-Izalele. Nwatamba kumuzanga ngwe chizechene nwakulizanga yenwene, mumu ni yenu nwapwile yilambala mu chifuchi cha Engitu. Yami nguli Yehova, Zambi yenu.

35 “‘Muze uneseka yuma ha usuhwe, ha unene hanji ha unji, kanda ukalakala ni yipimino ya mahuza. 36 Nwatamba kupimina yuma ha chipimino chalita, yipwe yuma yumu, yipwe ya meya. Yami nguli Yehova, Zambi yenu, yoze wanuchijile mu chifuchi cha Engitu. 37 Fungenu shimbi jami ni yiyulo yami yeswe ni kuyononokena. Yami nguli Yehova.’”

20 Yehova yamba kuli Mose ngwenyi: 2 “Watamba kulweza A-Izalele ngwe: ‘Mutu mweswawo mu Izalele hanji chilambala mweswawo watwama mu Izalele yoze mahana mwanenyi kuli Moleke, pundu lume katamba kumushiha. Atu a mu chifuchi katamba kumwasa mawe ndo muze mafwa. 3 Yami mwene mungulimika ni mutu wacho ni kumushiha hakachi ka atu jenyi, mumu kahana mwanenyi kuli Moleke, kapihisa chihela chami chisandu ni kupihisa nawa jina liami lisandu. 4 Nyi atu a mu chifuchi chenu malengulula mulonga wacho chakuhona kushiha mutu wacho, yoze wahana mwanenyi kuli Moleke, 5 pundu lume, yami mwene mungulimika ni mutu wacho ni usoko wenyi. Mungumwonwona hakachi ka atu jenyi hamwe ni atu waze alichinganga nenyi ha kulinga utanji ni Moleke.

6 “‘Hakutwala kuli mutu* yoze maya kuli tahi ni kuli atu waze akulweza akwo yuma ya kulutwe lia matangwa ni kulinga no ukoi ku uspiritu, pundu lume, yami mungukalimika nenyi ni kumushiha hakachi ka atu jenyi.

7 “‘Liselenu ku usandu, nupwe asandu, mumu yami nguli Yehova, Zambi yenu. 8 Fungenu shimbi jami ni kujononokena, yami nguli Yehova, yoze wakunusela ku usandu.

9 “‘Mweswawo mashinga tato hanji naye, pundu lume nwatamba kumushiha. Manyinga jenyi makapwa ha mujimba wenyi, mumu kashinga tato hanji naye.

10 “‘Lunga yoze malinga utanji ni pwo lia mukwo, ewa, lunga yoze malinga utanji ni pwo lia mwenyembo wenyi, pundu lume katamba kumushiha, iye ni mwe pwo. 11 Lunga yoze malisumbakenya ni pwo lia tato, kakolesa tato sonyi. Eswe aali katamba kwashiha. Manyinga jo makapwa ha mijimba yo ene. 12 Nyi lunga malisumbakenya ni tembwa-mwanenyi, eswe aali katamba kwashiha. Kalinga chuma chipi chinji. Manyinga jo makapwa ha mijimba yo ene.

13 “‘Nyi lunga malisumbakenya ni lunga-ni-mukwo ngwe chize chakulingiwa kuli pwo ni lunga, eswe aali kalinga chuma cha uzelwokeso. Pundu lume katamba kwashiha. Manyinga jo makapwa ha mijimba yo ene.

14 “‘Nyi lunga malisumbakenya ni pwo, malisumbakenya nawa ni naye ya pwo, chili chuma cha sonyi. Katamba kwocha eswe atatu, hanga chitanga chino cha sonyi kanda chinunga mukachi kenu.

15 “‘Nyi lunga malisumbakenya ni kashitu, pundu lume nwatamba kumushiha, nwatamba kushiha nawa mwe kashitu. 16 Nyi umwe pwo makundama kuli kashitu hanga alisumbakenye nenyi, shihenu mwe pwo ni kashitu. Pundu lume nwatamba kwashiha. Manyinga jo makapwa ha mijimba yo ene.

17 “‘Nyi umwe lunga malisumbakenya ni ndumbwenyi, mwana wa tato hanji mwana wa naye, mamona uselesele wenyi, ndumbwenyi neye mamona uselesele wenyi, chili chuma cha sonyi. Katamba kwashihila kumeso ja atu. Iye kakolesa ndumbwenyi sonyi.* Shili yenyi yatamba kumushata.

18 “‘Nyi umwe lunga mapomba ni umwe pwo yoze uli ku chijila ni kulisumbakenya nenyi, eswe aali kayaulula chijila chenyi. Katamba kwashiha hakachi ka atu jo.

19 “‘Kanda ulisumbakenya ni yayo hanji mwana-kwo ya noko wa pwo, chipwe tatenu-pwo, mumu chino muchikolesa sonyi usoko we wa hamuchima. Eswe aali akaamwese lamba mumu lia uhenge wo. 20 Mutu yoze malisumbakenya ni pwo lia natu, kakolesa natu sonyi. Ayo makatambula fweto mumu lia shili yo. Katamba kufwa chakuhona kusema. 21 Nyi mutu malisumbakenya ni pwo lia yayo, hanji pwo lia mwana-kwo, chili chuma chipi chinji. Iye kakolesa yayo hanji mwana-kwo sonyi. Ayo katambile kusema.

22 “‘Fungenu shimbi jami jeswe ni yiyulo yami yeswe ni kuyononokena, hanga chifuchi chize ngunanutwala nutwamemo kanda chikanusaza. 23 Kanda nukaula mianda ya akwa-mavungu waze ngunahumu kulutwe lienu, mumu ayo kalingile yuma yino yeswe, kashika nakwavwila lwaji. 24 Kashika nanulwezele ngwami: “Yenu munukatambula chifuchi cho, mungukanwahacho hanga chipwe chihinga chenu, chifuchi chize chinazale too ni yamwa ni uchi. Yami nguli Yehova, Zambi yenu, yoze wanuhandununa ni atu akwo.” 25 Senu kalisa hakachi ka kashitu mupema ni wa luchisa, ni hakachi ka kajila mupema ni wa luchisa. Kanda nulipwisa a luchisa mumu lia tushitu, mumu lia tujila hanji mumu lia yuma yeswe yize yakukalala hashi, yize nahandununa hanga nuyimone ngwenu ya luchisa. 26 Pwenu asandu kuli yami, mumu yami Yehova nguli musandu. Ngunanuhandununa kuli atu akwo hanga nupwe atu jami.

27 “‘Lunga mweswawo hanji pwo yoze mapwa tahi, chipwe mukwa-kulweza akwo yuma ya kulutwe lia matangwa, pundu lume nwatamba kumushiha. Atu katamba kumwasa mawe ndo muze mafwa. Manyinga jo makapwa ha mijimba yo ene.’”

21 Yehova yamba kuli Mose ngwenyi: “Lweza asasendote, ana ja Arone ngwe: ‘Niumwe sasendote katambile kulichisa mumu lia mutu yoze wafwa hakachi kenu. 2 Alioze iye mahasa kulinga chino nyi ngwe mafwisa usoko wenyi wa ha muchima, ngwe naye, tato, mwanenyi wa lunga, mwanenyi wa pwo, mwana-kwo hanji yayo.* 3 Iye mahasa kulichisa mumu lia ndumbwenyi alisulangana nenyi yoze kanda achilimona ni lunga chipwe kuya ku ulo. 4 Kanda akalichisa ni kulijilula mumu lia pwo yoze uli ni lunga hakachi ka atu jenu. 5 Katambile kutewula kawewe chipwe kutewula wevu ku masesa, hanji kulichata-chata mu mujimba. 6 Ayo katamba kupwa asandu kuli Zambi yo, katambile kupihisa jina lia Zambi yo, mumu kakuhana milambu ya kwocha kuli Yehova, kulia cha Zambi yo. Katamba kupwa asandu. 7 Iye katambile kumbata pwo chikoi, chipwe pwo yoze hanalelesa, hanji pwo yoze hanalakula, mumu sasendote kali musandu kuli Zambi yenyi. 8 Musele ku usandu, mumu iye mwe wakuhana kulia cha Zambi yenu. Iye katamba kupwa musandu kuli yenu mumu yami Yehova yoze wakunusela ku usandu, nguli musandu.

9 “‘Nyi mwana wa pwo wa sasendote malijilula ha kulinga ukoi, iye majilula tato. Katamba kumwocha.

10 “‘Mwata wa asasendote hakachi ka mandumbu jenyi, yoze asakwile hanga azale mazalo a usasendote, katambile kwecha kambu jenyi jivunde, chipwe kusuwa mazalo jenyi. 11 Katambile kukundama kuli mufu, katambile kulichisa chipwe hali tato hanji naye. 12 Katambile kutuhuka muma musandu chipwe kujilula muma musandu mwa Zambi, mumu chilayi cha kulihana chenyi, maji a kuwayisa no a Zambi yenyi kali hali iye. Yami nguli Yehova.

13 “‘Iye katamba kumbata pwo yoze kanda achilimona ni lunga.* 14 Katambile kumbata pwo tuliwa, chipwe pwo yoze hanalakula, chipwe pwo yoze hanalelesa, chipwe chikoi. Alioze katamba kumbata pwo hakachi ka atu jenyi yoze kanda achilimona ni lunga. 15 Iye katambile kusaula munyachi* wenyi hakachi ka atu jenyi, mumu yami nguli Yehova, yoze wakumusela ku usandu.’”

16 Yehova yamba nawa kuli Mose ngwenyi: 17 “Lweza Arone ngwe: ‘Ku yisemuko ye yeswe, niumwe mutu hakachi ka minyachi ye, yoze uli ni umwe ulema katambile kukundama hanga ahane kulia kuli Zambi yenyi. 18 Nyi mukupwa umwe mutu yoze ukwete ulema, katambile kukundama: Chitonji, kapuputa, yoze ukwete ulema ku meso, hanji yoze ukwete kulu hanji kwoko limwe lisuku likwo lihi, 19 mutu yoze ukwete kulu hanji kwoko liamakuka, 20 mutu yoze ukwete kunda, chipwe wakushinda,* chipwe yoze uli ni mutoyo, chipwe yoze uli ni mukule, chipwe yoze uli ni yimbulu, chipwe yoze uli ni maundu* a ulunga a ulema. 21 Niumwe mutu hakachi ka munyachi wa sasendote Arone, yoze uli ni ulema, katambile kukundama hanga ahane milambu ya kwocha kuli Yehova. Mumu lia kupwa ni umwe ulema, katambile kukundama hanga ahane kulia kuli Zambi yenyi. 22 Mahasa kulia kwenyi kulia cha Zambi yenyi hakachi ka yuma yisandu yahiana, chipwe kulia chisandu. 23 Alioze, katambile kukundama ku chikalakala cha hina, chipwe ku chilumbilo, mumu iye kali ni umwe ulema, katambile kupihisa muma mwami musandu, mumu yami nguli Yehova, yoze wakwasela ku usandu.’”

24 Chocho, Mose yalweza Arone, ana jenyi ni A-Izalele eswe maliji wano.

22 Yehova yamba nawa kuli Mose ngwenyi: 2 “Lweza Arone ni ana jenyi a malunga hanga akanyame muze makalakala ni yuma yisandu ya A-Izalele. Chikwo nawa, kanda ashililika jina liami lisandu hakutwala ku yuma yize ayo akungusela ku usandu. Yami nguli Yehova. 3 Alweze ngwe: ‘Mu yisemuko yenu yeswe mungwonwona kumeso jami mutu mweswawo wa luchisa hakachi ka minyachi yenu, nyi makundama ku yuma yisandu yize A-Izalele masela ku usandu mumu lia Yehova. Yami nguli Yehova. 4 Niumwe lunga wa ku munyachi wa Arone yoze uli ni mbumba, hanji yoze unahita ku ulunga wenyi, katambile kulia yuma yisandu, akalie wika muze mapema. Chipwe yoze makwata ku chuma chize chapwa cha luchisa mumu lia mutu yoze wafwa, chipwe yoze matuhwisa ana,* 5 chipwe yoze makwata ku chimwe cha ku yitangiwa yikehe-yikehe ya luchisa yize yakwendangana hashi, hanji makwata mutu yoze wapwa wa luchisa mumu lia chimwe chize muchihasa kumupwisa wa luchisa. 6 Mweswawo makwata ku chimwe cha ku yuma yino mapwa wa luchisa ndo chingoloshi, katambile kulia yuma yisandu, alioze katamba kusana. 7 Muze tangwa mulinjila, mapema mba mahasa kulia yuma yisandu mumu chili kulia chenyi. 8 Chikwo nawa, katambile kulia yifwo ya kashitu yoze walifwila, hanji kashitu yoze ashiha kuli kashitu wa mu yambu ni kulipwisa wa luchisa mumu lia yuma yino. Yami nguli Yehova.

9 “‘Ayo katamba kwononokena shimbi jami, katambile kupihisa yuma yisandu hanga achine kuvulumuna ni kufwa. Yami nguli Yehova, yoze wakwasela ku usandu.

10 “‘Mutu yoze keshi ni ulite katambile kulia yuma yisandu, chipwe chilambala yoze uli ku zuwo lia sasendote, chipwe mukwa-mulimo yoze akufweta tangwa ha tangwa katambile kuyilia. 11 Alioze, nyi sasendote malanda umwe mutu ku mbongo jenyi, mutu wacho mahasa kulia yuma yisandu. Ndungo waze asemukinyine ku zuwo lia sasendote no mahasa kulia kulia chacho. 12 Nyi mwana wa pwo wa sasendote mamumbata kuli mutu yoze hi sasendote ko, katambile kulia milambu yisandu yize atu akuhana. 13 Alioze, nyi mwana wa pwo wa sasendote mapwa tuliwa, hanji mamulakula chakuhona kusema, chocho mafuna ku zuwo lia tato, mahasa kulia kulia cha tato. Alioze mutu yoze keshi ni ulite katambile kuchilia.

14 “‘Nyi umwe mutu malia chuma chisandu chakuhona kunyingika, iye katamba kuhana kuli sasendote chuma chisandu ni kuwezaho chihanda chamuchitano ha ndando ya chuma chacho. 15 Chocho, ayo katambile kupihisa yuma yisandu yize A-Izalele akulambula kuli Yehova, 16 ni kulikokela ene lamba mumu lia uhenge wo ha kulia yuma yisandu. Yami nguli Yehova, yoze wakwasela ku usandu.’”

17 Yehova yamba nawa kuli Mose ngwenyi: 18 “Lweza Arone, ana jenyi a malunga ni A-Izalele eswe ngwe: ‘Muze umwe Ka-Izalele hanji chilambala mu Izalele, mahana mulambu wa kulumba kuli Yehova hanga amanunune chilakenyo, hanji kuhana chimwe chawana ni mbunge yeswe, 19 katamba kuhana ngombe wa kuji yoze keshi kapalia, mwana-panga wa kuji hanji pembe, mba apwe ni utayizo wa Zambi. 20 Kanda nulambula nichimwe chimuna chize chili ni kapalia, mumu chino kuchichi kunukwasa kupwa ni utayizo wa Zambi.

21 “‘Nyi umwe mutu maneha kuli Yehova mulambu wa sambukila hanga amanunune chilakenyo, hanji hanga auhane ngwe chawana cha mbunge yeswe, katamba kuhana chimuna yoze keshi kapalia hakachi ka ngombe, mapanga ni pembe. Chimuna wacho katambile kupwa ni kapalia niumwe. 22 Kanda nuhana niumwe chimuna yoze uli kapuputa, yoze hanamakuka, yoze uli ni chilonda, yoze uli ni sondondo, yoze uli ni mukule hanji yimbulu. Kanda nukahana niumwe wa kuli yimuna wano kuli Yehova, chipwe kwalambula kuli Yehova ha chilumbilo. 23 Muhasa kuhana ngombe wa kuji hanji panga yoze uli ni chilio chimwe chisuku, chikwo chihi ngwe chawana cha mbunge yeswe, alioze kechi kuchitayiza ngwe mulambu wa kumanununa nawo chilakenyo. 24 Kanda nuhana kuli Yehova, chimuna yoze uli ni maundu* a ulema, ja kuwonda, ja kupapulula hanji ja kuteta. Kunwatambile kulambula yimuna jacho mu chifuchi chenu. 25 Chimuna yoze makatuka kuli chilambala, kanda numuhana ngwe kulia kuli Zambi yenu, mumu yimuna jacho kakwete ulema ni tupalia. Kechi kaatayiza.’”

26 Yehova yamba nawa kuli Mose ngwenyi: 27 “Muze ngombe, panga hanji pembe masema, mwana katamba kununga ni naye ndo matangwa shimbiali, alioze ha tangwa liamuchinake mahasa kumutayiza ngwe mulambu wa kwocha wa Yehova. 28 Hakutwala kuli ngombe hanji panga, kunwatambile kumushiha ha tangwa limuwika ni mwanenyi.

29 “Nyi yenu munuhana mulambu wa usakwililo kuli Yehova, nwatamba kuuhana mu jila yize munupwa ni utayizo wenyi. 30 Nwatamba kuulia tangwa lioliene. Kanda nutulika niyimwe ndo tangwa likwo. Yami nguli Yehova.

31 “Fungenu shimbi jami ni kujononokena. Yami nguli Yehova. 32 Kanda nupihisa jina liami lisandu hanga A-Izalele anyingike ngwo, yami nguli musandu. Yami nguli Yehova, yoze wakunusela ku usandu, 33 yoze wanuchijile mu chifuchi cha Engitu hanga ngupwe Zambi yenu. Yami nguli Yehova.”

23 Yehova yamba nawa kuli Mose ngwenyi: 2 “Lweza A-Izalele ngwe: ‘Yiwanyino ya ha mwaka yize Yehova anulweza hanga nulinge, yili kukunguluka chisandu. Yenu nwatamba kuyambujola, yino ye yiwanyino yami:

3 “‘Munuhasa kukalakala ha matangwa asambano, alioze tangwa liamuchishimbiali lili sambata ya uhwimino kuli yenu, chili kukunguluka chisandu. Kunwatambile kulinga mulimo niumwe, yatamba kupwa sambata ya Yehova kweswako kuze munukatwama.

4 “‘Yino yili yiwanyino ya Yehova ya ha mwaka, kukunguluka chisandu, yize nwatamba kwambujola ha mashimbu jayo alita: 5 Ha kakweji mutangu, ha tangwa 14, chingoloshi, shimbu tangwa kanda lichinjila, mukukapwa Chizomboka cha Yehova.

6 “‘Ha tangwa 15 lia kakweji wacho, mukukapwa Chiwanyino cha Mbolo Kujishi Futunwiso cha Yehova. Nwatamba kulia mbolo kujishi futunwiso ha matangwa shimbiali. 7 Ha tangwa litangu, yenu munukalinga kukunguluka chisandu. Kunwatambile kulinga mulimo niumwe ukalu ha tangwa liacho. 8 Alioze ha matangwa shimbiali, yenu munukahana kuli Yehova mulambu wa kwocha. Ha tangwa liamuchishimbiali, mukukapwa kukunguluka chisandu. Kunwatambile kulinga mulimo niumwe ukalu ha tangwa liacho.’”

9 Yehova yamba nawa kuli Mose ngwenyi: 10 “Lweza A-Izalele ngwe: ‘Muze mununjila mu chifuchi chize ngunanwehe, mba munucha mbuto, nwatamba kutwala kuli sasendote chichita cha mbuto yitangu. 11 Iye makahungisa chichita chacho kulutwe ni kunyima kumeso ja Yehova, hanga nukapwe ni utayizo wa Zambi. Tangwa lize mulihata ha tangwa lia Sambata, sasendote makahungisa cheka chichita chacho. 12 Ha tangwa lize mahungisa chichita, nwatamba kuhana mwana-panga wa kuji yoze keshi kapalia wa mwaka umuwika ngwe mulambu wa kulumba wa Yehova. 13 Makamuhana hamuwika ni kilu* jiali ja unga wafufunuka wakuchinga ni maji, ngwe mulambu wa kwocha wa Yehova, wa lupembo mupema. Hamuwika ni litru* yimuwika ya vinyu ya mulambu wa walwa. 14 Kanda nulia mbolo niyimwe, chipwe mbuto jakukanga, chipwe mbuto jaha, ndo ha tangwa liacho, ndo ha tangwa lize munukatwala mulambu kuli Zambi yenu. Yino yili shimbi ya mutolo ku yisemuko yenu yeswe, kweswako kuze munukatwama.

15 “‘Yenu nwatamba kwalula sambata shimbiali, kukatuka ha tangwa lize mulihata ha tangwa lia sambata, chize ha tangwa lize munukatwala chichita cha mulambu wa kuhungisa. Nwatamba kwalula poso ja muundu. 16 Yenu munukalula matangwa 50, ndo ha tangwa lize mulihata ha Sambata yamuchishimbiali, mba munukahana mulambu waha wa mbuto kuli Yehova. 17 Yenu nwatamba kuneha mbolo jiali kukatuka ku mazuwo jenu, ngwe mulambu wa kuhungisa, ja kulinga ni kilu jiali ja unga wafufunuka. Nwatamba kujocha ni futunwiso, yili mihuko yitangu ya Yehova yize hiyahia. 18 Mbolo munukajineha hamuwika ni mapanga shimbiali waze keshi kapalia, panga ni panga katamba kupwa wa mwaka umuwika, mwana-ngombe umuwika, ni mapanga a kuji aali. Ayo makapwa mulambu wa kulumba wa Yehova, hamuwika ni milambu ya mbuto, ni milambu ya walwa, ngwe mulambu wa kwocha wa lupembo mupema kuli Yehova. 19 Yenu nwatamba kuhana pembe umuwika ngwe mulambu wa shili, ni mapanga aali a kuji a mwaka umuwika, ngwe mulambu wa sambukila. 20 Sasendote makahungisa kulutwe ni kunyima mapanga aali a kuji, hamuwika ni mbolo ja kulinga ni mihuko yitangu yize hiyahia, ngwe mulambu wa kuhungisa kumeso ja Yehova. Yuma yacho yikapwe yisandu kuli Yehova, muyikapwa yambala ya sasendote. 21 Ha tangwa lize, yenu munukambujola kukunguluka chisandu. Kunwatambile kulinga mulimo niumwe ukalu. Yino yili shimbi ya mutolo ku yisemuko yenu yeswe, kweswako kuze munukatwama.

22 “‘Muze munukacha mbuto mu chifuchi chenu, kanda nukacha mbuto jeswe ku masesa a minda yenu, chipwe kutongona jeswe jize mujisala muze nunachi. Nwatamba kujihichikila yiswale ni yilambala. Yami nguli Yehova, Zambi yenu.’”

23 Yehova yamba nawa kuli Mose ngwenyi: 24 “Lweza A-Izalele ngwe: ‘Ha tangwa litangu lia kakweji wamuchishimbiali nwatamba kuhwima ku milimo yenu yeswe. Tangwa lize memba chitavwi, muchikapwa chiwulwiso kuli yenu ni kulinga kukunguluka chisandu. 25 Kunwatambile kulinga mulimo niumwe ukalu ha tangwa liacho, nukahane mulambu wa kwocha kuli Yehova.’”

26 Yehova yamba nawa kuli Mose ngwenyi: 27 “Alioze tangwa kumi lia kakweji wacho wamuchishimbiali, mulikapwa Tangwa lia Kufuka Shili. Nwatamba kulinga kukunguluka chisandu, nwatamba kunenganyana* ni kuhana mulambu wa kwocha kuli Yehova. 28 Kunwatambile kulinga mulimo niumwe ha tangwa liacho, mumu lili tangwa lia kufuka shili, tangwa lia kunufukila shili kumeso ja Yehova Zambi yenu. 29 Mutu* mweswawo yoze kevwile chinyengo ha tangwa lize, katamba kumushiha hakachi ka atu jenyi. 30 Mutu mweswawo makalinga mulimo weswawo ha tangwa liacho, mungukamwonwona hakachi ka atu jenyi. 31 Kanda nukalinga mulimo niumwe. Yino yili shimbi ya mutolo ku yisemuko yenu yeswe, kweswako kuze munukatwama. 32 Yili sambata ya uhwimino kuli yenu, munukanenganyana ha chingoloshi cha tangwa livwa lia kakweji. Nukafunge sambata yenu putu chingoloshi chimwe, ndo chingoloshi chikwo.”

33 Yehova yamba nawa kuli Mose ngwenyi: 34 “Lweza A-Izalele ngwe: ‘Ha tangwa 15, lia kakweji wacho wamuchishimbiali, munukalingila Yehova Chiwanyino cha Yisakila ha matangwa shimbiali. 35 Ha tangwa litangu, mukukapwa kukunguluka chisandu, kunwatambile kulinga mulimo niumwe ukalu. 36 Nwatamba kuhana mulambu wa kwocha kuli Yehova ha matangwa shimbiali. Ha tangwa liamuchinake, nwatamba kulinga kukunguluka chisandu, nukahane kuli Yehova mulambu wa kwocha. Chili kukunguluka chalipwila. Kashika kunwatambile kulinga mulimo niumwe ukalu.

37 “‘Yino yili yiwanyino yize nwatamba kulingila Yehova, ni kuyambujola ngwe kukunguluka chisandu, nukahane kuli Yehova mulambu wa kwocha, mulambu wa kulumba, mulambu wa mbuto ya chitapo, ni mulambu wa walwa, kulita ni yize akwita ha tangwa ni tangwa. 38 Milambu yino nukayiwezele ha milambu yize nwakuhana ha masambata a Yehova, ha yawana, ha yawana ya kumanununa nayo chilakenyo, ni ha yawana ya kuhana ni mbunge yeswe yize nwatamba kuhana kuli Yehova. 39 Alioze ha tangwa 15 lia kakweji wamuchishimbiali, muze munukacha mbuto mu chifuchi, nwatamba kulinga chiwanyino cha Yehova ha matangwa shimbiali. Ha tangwa litangu ni ha tangwa liamuchinake, munukahwima ku milimo yenu yeswe. 40 Ha tangwa litangu, munukahela mihuko ya ku mitondo yipema, kuteta mafwo a yingaji, mitango ya ku mitondo* yikwete mafwo anji, ni ya ku mitondo ya mu mingulunga. Munukawahilila kumeso ja Yehova Zambi yenu ha matangwa shimbiali. 41 Munukalingila Yehova chiwanyino chino matangwa shimbiali ha mwaka. Nwatamba kuchilinga ha kakweji wamuchishimbiali. Yino yili shimbi ya mutolo ku yisemuko yenu yeswe. 42 Munukatwama mu yisakila ha matangwa shimbiali. A-Izalele eswe makatwama mu yisakila, 43 hanga yisemuko yenu ya kulutwe yikanyingike ngwo, natwamishine A-Izalele mu yisakila muze naachijile mu chifuchi cha Engitu. Yami nguli Yehova, Zambi yenu.’”

44 Chocho Mose yalweza A-Izalele hakutwala ku yiwanyino ya Yehova ya ha mwaka.

24 Yehova yamba nawa kuli Mose ngwenyi: 2 “Lweza A-Izalele akanehe maji apema a olevwe akutemuna no ndeya, hanga ndeya yikatemune matangwa eswe. 3 Arone makasa shindakenyo ngwenyi ndeya jinatemuna mashimbu eswe kumeso ja Yehova mu mbalaka ya kulikungulwila, chize ha kutoka cha tangwa ndo chimene, sali lia haze lia chikalakala cha hina lize lili hakamwihi ni Mushete wa Uchela. Yino yili shimbi ya mutolo ku yisemuko yenu yeswe. 4 Ndeya akajise ha chikwachilo cha ndeya chakulinga ni oru yipema, ni kujilulieka kanawa mashimbu eswe kumeso ja Yehova.

5 “Ukoche mbolo 12 ja kujingulula ngwe kazeya, ja kulinga ni unga wafufunuka. Mbolo ni mbolo ukayilinge ni kilu* jiali ja unga. 6 Mbolo ukajise mu milongo yiali helu lia mesa ya kulinga ni oru yipema kumeso ja Yehova. Mulongo ni mulongo ukapwe ni mbolo jisambano, yimwe helu lia yikwo. 7 Ha mulongo ni mulongo, ukaseho olibanu yipema. Olibanu yacho muyikapwa mulambu wamuundu wa mbolo. Muukapwa mulambu wa kwocha wa Yehova. 8 Iye katamba kulongeza kanawa mbolo kumeso ja Yehova mashimbu eswe, ha masambata eswe. Uno uli usendo wa mutolo ni A-Izalele. 9 Arone ni ana jenyi makayilila mu chihela chisandu, mumu chili chihanda chenyi chisandu chahiana cha ku milambu ya kwocha ya Yehova. Yino yili shimbi ya mutolo.”

10 Hakachi ka A-Izalele hapwile umwe mwana wa Ka-Izalele ni wa Ka-Engitu, chocho ana jacho yalitachika. 11 Mwana wa Ka-Izalele yaputuka kutuka jina lia Zambi ni kushinga jina liacho, chocho yamutwala kuli Mose. Jina lia naye ya mwana wacho te Shelomite, mwana wa Ndibri wa ku vungu lia Ndane. 12 Chocho, yamukasa ndo muze Yehova te masolola yize malinga kuli iye.

13 Mba Yehova yamba kuli Mose ngwenyi: 14 “Twala haze lia chilombo yoze washinganga lie Jina, mba eswe waze amwivwanga akase moko ha mutwe wenyi, chikungulwila cheswe chikamwase mawe. 15 Watamba kulweza A-Izalele ngwe: ‘Nyi umwe mutu mashinga jina lia Zambi yenyi, shili yenyi muyikamushata. 16 Chocho, mweswawo matuka jina lia Yehova, pundu lume, katamba kumushiha, chikungulwila cheswe chatamba kumwasa mawe. Apwe Ka-Izalele, apwe chilambala, katamba kumushiha mumu lia kutuka jina lia Zambi.

17 “‘Nyi umwe mutu mashiha mukwo, pundu lume, neye katamba kumushiha. 18 Mweswawo malamba ni kushiha chimuna chambala, katamba kufweta chimuna. Afwete mwono ha mwono.* 19 Nyi umwe mutu malemeka mukwo, neye katamba kumulemeka. 20 Kumakuna ni kumakuna, liso ni liso, lizo ni lizo. Chuma cheswacho makalinga kuli mukwo, neye akamulingecho. 21 Mweswawo malamba ni kushiha chimuna chambala, katamba kufweta chimuna. Alioze yoze malamba mukwo ni kumushiha, neye akamushihe.

22 “‘Shimbi yimuwika muyikakwata hali yenu eswe, chipwe hali chilambala, chipwe hali Ka-Izalele. Yami nguli Yehova, Zambi yenu.’”

23 Mba Mose yalweza A-Izalele, ayo yatwala haze lia chilombo mutu yoze washingile jina lia Zambi, yamwasa mawe. Chocho A-Izalele yalinga chizechene Yehova alwezele Mose.

25 Yehova yamba nawa kuli Mose ku mulundu wa Sinai ngwenyi: 2 “Lweza A-Izalele ngwe: ‘Muze mununjila mu chifuchi chize mungunwaha, mavu makafunga sambata* ya Yehova. 3 Ha miaka yisambano munukalima minda yenu, ha miaka yisambano munukalulieka mitondo yenu ya vinyu, mba munukacha mbuto ya mu chifuchi. 4 Alioze ha mwaka wamuchishimbiali, mavu akahwime, mumu uli mwaka wa sambata ya Yehova. Yenu kunwatambile kutumba mu minda yenu chipwe kululieka mitondo ya vinyu. 5 Mbuto jize jasalile mu munda, jize jalisokela jene kanda nukajicha chipwe kuhela uva ku mitondo yize kunwaluliekele. Mavu katamba kuhwima mwaka wamuundu. 6 Alioze munuhasa kulia kulia chize muchilisokela ha mwaka wa sambata, yena, ndungo ye wa lunga, ndungo ye wa pwo, mukwa-mulimo we yoze wakufweta tangwa ha tangwa ni akwa-kwiza waze atwama maha yena mahasa kulia. 7 Yimuna ni tushitu a mu yambu a mu chifuchi chenu no mahasa kuchilia. Munuhasa kulia kulia cheswacho muchilisokela.

8 “‘Munukalula miaka shimbiali ya sambata, miaka shimbiali ha yisuho shimbiali, matangwa a miaka shimbiali ya sambata makapwa miaka 49. 9 Ha tangwa liamuchikumi, kakweji wamuchishimbiali, munukemba chitavwi ha Tangwa lia Kufuka Shili, kuhiohia cha chitavwi akachivwe mu chifuchi cheswe. 10 Mwaka 50 nukausele ku usandu, ni kwambujola utuswilo kuli atu eswe mu chifuchi chenu. Muukapwa mwaka wa kutusuka mu undungo kuli yenu, mutu ni mutu makafuna ku chifuchi chenyi chize ahingile ni mu usoko wenyi. 11 Mwaka 50 muukapwa mwaka wa utuswilo kuli yenu. Kunwatambile kutumba, chipwe kucha mbuto jize jasalile mu minda yenu, jize jinakalisokela, chipwe kuhela uva ya ku mitondo ya vinyu yize kunwakaluliekele. 12 Mumu mwaka uno uli mwaka wa utuswilo. Watamba kupwa usandu kuli yenu. Yenu munuhasa kulia wika kulia chize chalisokela chene.

13 “‘Ha mwaka wa utuswilo, mutu ni mutu katamba kufuna mu chifuchi chenyi chize ahingile. 14 Nyi munulanjisa yimwe kuli mukwenu, chipwe kulanda yimwe kuli iye, kanda nulionga umwe ni mukwo. 15 Muze mulanda munda kuli mukwenu, ukalule unji wa miaka yize yapalika chize ha mwaka wa utuswilo. Iye neye akakulanjisewo kulita ni unji wa miaka ya kucha yize yasala. 16 Nyi kwasala miaka yinji, iye akaweze ndando, alioze, nyi kwasala miaka yikehe, iye akatepulule ndando, mumu kanaulanjisa kuli yena kulita ni unji wa mbuto yize mukacha. 17 Mutu niumwe hakachi kenu katambile kwonga mukwo. Vwilenu woma Zambi yenu, mumu yami nguli Yehova, Zambi yenu. 18 Nyi munwononokena shimbi jami ni kufunga yiyulo yami, munukatwama mu chifuchi ku matwi kuluu. 19 Chifuchi muchikema mbuto, yenu munukalia ni kukuta, munukatwamamo ku matwi kuluu.

20 “‘Alioze, nyi yenu munwamba ngwenu: “Mba yika mutukalia ha mwaka wamuchishimbiali, se kutuchi kutumba chipwe kucha?” 21 Nyingikenu ngwenu, mungukanuwahisa ha mwaka wamuchisambano, chifuchi muchikema mbuto jinji ja kulia ha miaka yitatu. 22 Yenu munukatumba ha mwaka wamuchinake, munukalia mbuto jikulu ndo ha mwaka wamuchilivwa. Munukalia mbuto jikulu ndo muze mbuto jize nwatumba mujikola.

23 “‘Kanda nulanjisa chifuchi kuli mutu hanga chipwe nichenyi ku miaka yeswe. Mumu chifuchi chili cha yami. Kuli yami yenu nuli yilambala, kanda akwa-kwiza. 24 Mu chifuchi chenu cheswe, nyi mutu malanjisa mavu jenyi, kali ni ulite wa kwakuula.

25 “‘Nyi ndumbwe mapwa chiswale, chocho malanjisa chihanda chenyi cha mavu, mukwa-kukuula yoze uli usoko wenyi wa ha muchima, katamba kwiza ni kukuula yize ndumbwenyi alanjishile. 26 Nyi mutu keshi ni mukwa-kumukuula, alioze mapwa pichi ni kupwa ni uhashi wa kwakuula, 27 iye akalule ndando kulita ni miaka yize yapalika chize haze alanjishile mavu, akahane mbongo kuli mutu yoze walanjile mavu jenyi kulita ni miaka yize yasala. Mba iye makamufunyishina mavu jenyi.

28 “‘Alioze, nyi keshi ni mbongo ja kukuula mavu jacho, mavu manunga kuli mutu yoze waalanjile ndo ha mwaka wa utuswilo, mba makamufunyishina-o ha mwaka wa utuswilo, chocho mavu makapwa cheka nienyi.

29 “‘Nyi mutu malanjisa zuwo mu mbonge yize yikwete yipanga, mahasa kukuula zuwo nyi mukupalika mwaka umuwika kukatuka haze alilanjishile. Ulite wenyi wa kukuula zuwo muulinga mwaka wamuundu. 30 Alioze, nyi kalikuulile ha mwaka wamuundu, zuwo lize lili mu mbonge yize yili ni yipanga mulipwa lia mutu yoze walilanjile ku yisemuko yenyi yeswe, ku miaka yeswe. Katambile kulifunyisa ha mwaka wa utuswilo. 31 Alioze mazuwo aze ali mu mambonge waze keshi yipanga, nwatamba kwamona ngwe yihanda ya minda ya mu chifuchi. Ulite wa kukuula zuwo liacho watamba kununga, katamba kulifunyisa ha mwaka wa utuswilo.

32 “‘Hakutwala ku mazuwo ja A-Levi mu mambonge, A-Levi kali ni ulite wa kwakuula ku miaka yeswe. 33 Nyi Ka-Levi kakuulile zuwo lienyi lize alanjishile, zuwo lize alanjishile mu mbonge, makamufunyisalio ha mwaka wa utuswilo. Mumu mazuwo a mu mambonge ja A-Levi kali chihinga cho mukachi ka A-Izalele. 34 Chikwo nawa, yihela ya kulishila yimuna yize yili hakamwihi ni mambonge, katambile kuyilanjisa, mumu yili yihinga yo ya mutolo.

35 “‘Nyi ndumbwenu mukachi kenu mapwa chiswale ni kuhona yuma ya kulikwasa nayo, nwatamba kumukwasa ngwe chize te munukwasa chilambala ni mukwa-kwiza, hanga ndumbwenu anunge ni mwono hakachi kenu. 36 Kanda umufwetesa mbwezo. Vwila woma Zambi ye, chocho ndumbwe makanunga ni mwono hakachi kenu. 37 Watambile kumwaha mbongo je hanga akakufwete ni mbwezo, chipwe kumwaha kulia hanga uzukeko yimwe. 38 Yami nguli Yehova, Zambi yenu, yoze wanuchijile mu chifuchi cha Engitu ni kunwaha chifuchi cha Kanana, hanga ngupwe Zambi yenu.

39 “‘Nyi ndumbwenu watwama mukachi kenu mapwa chiswale, chocho malilanjisa kuli yenu, kanda numushinjila hanga alinge milimo ngwe ndungo. 40 Nwatamba kumumona ngwe mukwa-mulimo yoze akufweta tangwa ha tangwa, ngwe mukwa-kwiza. Katamba kunukalakalila ndo ha mwaka wa utuswilo, 41 mba maya kwenyi, iye ni ana jenyi, mafuna kuli asoko jenyi. Iye mafuna ku chihinga cha tulamba twenyi. 42 Mumu ayo kali ndungo jami, waze nachijile mu chifuchi cha Engitu. Kashika, katambile kulilanjisa ngwe chize akulanjisa ndungo. 43 Kanda ukamumwesa lamba, vwila woma Zambi ye. 44 Ndungo ye wa lunga hanji wa pwo, katamba kukatuka ku yifuchi yize yanujingilika. Ku yifuchi yacho kwe nwatamba kulanda ndungo wa lunga hanji wa pwo. 45 Chikwo nawa, munuhasa kulanda ndungo hakachi ka ana ja akwa-kwiza waze atwama mukachi kenu, hakachi ko ni hakachi ka asoko jo waze asemukinyine mu chifuchi chenu, ayo makapwa ndungo jenu. 46 Munukaahana kuli ana jenu ngwe chihinga, mapwa a yenu ku miaka yeswe. Ayo makalakala ngwe ndungo jenu, alioze mandumbu jenu A-Izalele nwatambile kwamwesa lamba.

47 “‘Nyi chilambala, hanji mukwa-kwiza mapwa pichi hakachi kenu, alioze ndumbwenu Ka-Izalele yoze watwama hakachi kenu mapwa chiswale ni kulilanjisa kuli chilambala hanji mukwa-kwiza, hanji kuli umwe wa mu usoko wa chilambala, 48 iye manunga ni ulite wa kumukuula muze malilanjisa. Umwe wa kuli mandumbu jenyi makamukuula, 49 hanji natu, chipwe musonyenyi mahasa kumukuula, hanji mutu mweswawo wa mu usoko wo wa ha muchima, mahasa kumukuula.

“‘Chipwe iye mwene nyi mapwa pichi, mahasa kulikuula. 50 Iye katamba kwalula ni yoze wamulanjile anyingike mashimbu waze apalika chize ha mwaka uze alilanjishile ndo ha mwaka wa utuswilo, mbongo jize amulanjile najo jatamba kulita ni unji wa miaka. Ha mashimbu jacho, matangwa jenyi a mulimo katamba kwalula ngwe chize akwalula matangwa a mukwa-mulimo yoze akufweta tangwa ha tangwa. 51 Nyi mukusala miaka yinji, mbongo jize mafweta hanga alikuule najo jatamba kulita ni unji wa miaka yize yasala. 52 Alioze, nyi kwasala miaka yikehe hanga mwaka wa utuswilo uhete, iye katamba kulialwila miaka ni kufweta mbongo ja kulikuula najo kulita ni unji wa miaka yize yasala. 53 Iye katamba kukalakalila mwaka ha mwaka mutu yoze wamulanjile ngwe mukwa-mulimo yoze akufweta tangwa ha tangwa, alioze yenu kunwatambile kwecha hanga mutu yoze wamulanjile amumwese lamba. 54 Alioze, nyi kahashile kulikuula mwene mu majila wano, makamutusula ha mwaka wa utuswilo, iye ni ana jenyi.

55 “‘Mumu A-Izalele kali ndungo jami. Ayo kali ndungo jami waze nachijile mu chifuchi cha Engitu. Yami nguli Yehova, Zambi yenu.

26 “‘Kanda nulilingila tuzambi, mumu tuzambi eswe kali amokomoko. Chipwe kulilingila tuponya, hanji chilumbilo chisandu. Kanda nukajika liwe nilimwe mu chifuchi chenu hanga nukafulamane kulutwe lialio, mumu yami nguli Yehova, Zambi yenu. 2 Yenu nwatamba kufunga masambata jami ni kuvumbika* chihela chami chisandu. Yami nguli Yehova.

3 “‘Nyi munununga ni kwenda mu yiyulo yami ni kufunga shimbi jami ni kujononokena, 4 yami mungukanokesa vula ha shimbu lialita. Hashi muhakema mbuto yaho ni mitondo ya mu minda muyikema mihuko. 5 Mwaka wa kuzungula muuheta ndo ku mwaka wa kucha uva, mwaka wa kucha uva muuheta ndo ku mwaka wa kutumba. Yenu munukalia mbolo ngwe chize nwakuzanga, munukatwama mu chifuchi chenu ku matwi kuluu. 6 Mungukaneha sambukila mu chifuchi, niumwe makanuvwisa woma muze nunapombo wakuhi. Mungukapulula chifuchi ku tushitu a mu yambu, niumwe makanulukukila ni katana wakuhi. 7 Pundu lume, yenu munukahanga akwa-kole jenu ni kwashiha ni katana. 8 Atano a kuli yenu makahanga 100 a kuli ayo, 100 a kuli yenu makahanga 10,000 a kuli ayo. Munukashiha akwa-kole jenu ni katana.

9 “‘Yami mungukanuvwila keke, mungukanwaha ana anji ni kunwokesa. Mungukafunga usendo wami ni yenu. 10 Shimbu munuchilia mbuto ja mwaka-wali,* munukambila jikulu hanga nusalakanyiseho jaha. 11 Mungukasa tabernakulu yami hakachi kenu, chichi kanumbila.* 12 Mungukenda hakachi kenu, mungukapwa Zambi yenu, ni yenu munukapwa atu jami. 13 Yami nguli Yehova Zambi yenu, yoze wanuchijile mu chifuchi cha Engitu hanga nuchine kupwa nawa ndungo jo. Yami namakwine kanga yenu ya undungo ni kunutusula.*

14 “‘Alioze, nyi yenu kunwangupanjikile, kunwononokene shimbi jino jeswe, 15 nyi munulituna yiyulo ni shimbi jami, ha kuhona kujononokena ni kushiha usendo wami, 16 yino ye mungunulinga: Mungunukokela lamba, yikola ya mukaka ni kachiki. Kachiki wacho makanulayisa meso ni kunuhongesa. Munukakuwa mbuto chamokomoko, mumu akwa-kole jenu e makayilia. 17 Mungukalimika ni yenu, akwa-kole jenu makanukumba. Waze akunuvwila kole makanumwesa lamba. Yenu munukachina chipwe ngwe kukushi yoze unanuhange.

18 “‘Nyi chipwe chocho kunwangupanjikile, mungukanumwesa lamba kuhiana yisuho shimbiali mumu lia shili yenu. 19 Munguhwisa kulizata chenu, mungwalumuna malilu jenu apwe ngwe utale, mavu jenu apwe ngwe unengu. 20 Tachi jenu mujilitokela, mumu mavu jenu kechi kwima mbuto, chipwe mitondo ya mu chifuchi kuyichi kwima mihuko.

21 “‘Alioze, nyi munununga ni kulimika ni yami, chikwo nawa, munulituna kungupanjika, mungunumwesa lamba kuhiana yisuho shimbiali kulita ni shili yenu. 22 Mungunutumina tushitu a mu yambu, makalia ana jenu, makashiha yimuna jenu, matapalo* jenu makapwa a hululu.

23 “‘Chipwe chocho, nyi kunwatayijile fumbo liami, nwanunga ni kulimika ni yami, 24 ni yami mungulimika ni yenu. Yami mwene mungunumwesa lamba yisuho shimbiali mumu lia shili yenu. 25 Mungukaneha katana hakachi kenu yoze manufunyishina upi mumu lia kushiha usendo. Nyi munuchinyina mu mambonge jenu, mungutuma misongo hakachi kenu ni kunukunjika mu moko ja akwa-kole jenu. 26 Muze mungukakuwisa kulia* chenu, mapwo kumi makanwochela mbolo ha jiko limuwika, chocho makajeseka, mba manwahajo. Munukajilia, alioze kunuchi kakuta.

27 “‘Nyi chipwe chocho yenu kunwangupanjikile, nwanunga ni kulimika ni yami, 28 mungukokesa kulimika chami ni yenu, yami mwene mungukanumwesa lamba yisuho shimbiali mumu lia shili yenu. 29 Chocho, yenu munukalia yifwo ya ana jenu a malunga ni a mapwo. 30 Mungukonwona manangamo jenu asandu, mungukapuzula yilumbilo yenu ya insensu ni kulumbika afu jenu helu lia afu ja tuponya jenu a luchisa. Mungukanuvwila kole ni kunumba nyima. 31 Mungukonwona mambonge jenu ni yihela yenu yisandu. Chichi kevwa lupembo mupema wa yitapo yenu. 32 Yami mwene mungupwisa chifuchi cha hululu, chipwe akwa-kole jenu waze atwamamo malishimwoka. 33 Mungukanumwanga hakachi ka akwa-mavungu, munguneha akwa-kole jenu akalimike ni yenu ni tutana. Chifuchi chenu muchikapwa puya, mambonge jenu makapwa a hululu.

34 “‘Muze munukapwa mu chifuchi cha akwa-kole jenu, ha mashimbu jacho chifuchi chenu muchikahwima. 35 Chifuchi chenu muchikahwima ha matangwa eswe muchipwa cha hululu. Mumu te kuchishi kuhwima ha masambata muze nwapwilemo.

36 “‘Hakutwala kuli waze masala ni mwono, mungukaevwisa mwongo mu yifuchi ya akwa-kole jo. Zungo lia lifwo lize linahehuka ni fuji, mulikaachinyisa. Ayo makachina ngwe chize akuchina katana ni kulimbwoka chipwe ngwe kukushi yoze unaahange. 37 Ayo matalinga ene umwe kuli mukwo ngwe atu waze anachina katana, chipwe ngwe kukushi mutu yoze unaahange. Yenu kunuchi kapwa ni tachi ja kumana kumeso ja akwa-kole jenu. 38 Munukafwila hakachi ka akwa-mavungu, munukanongena mu chifuchi cha akwa-kole jenu. 39 Waze makasala, kumakaomba nyima hanga akapolele mu chifuchi cha akwa-kole jo mumu lia uhenge wo. Ewa, kumakapolelamo mumu lia uhenge wa yisemi jo. 40 Mba ayo makambulula uhenge wo ni uhenge wa atato, ni kuhona kushishika cha atato. Makatayiza ngwo kakashishikile mumu kalimikine ni yami, 41 kashika ni yami nalimikine no ni kwatwala mu chifuchi cha akwa-kole jo.

“‘Hanji te mbunge jo ja ulima* mujilikehesa, afwete mumu lia uhenge wo. 42 Mba mungukewuluka usendo wami ni Yakomba ni usendo wami ni Izake. Mungukewuluka nawa usendo wami ni Apalahama ni kwiwuluka chifuchi. 43 Muze ayo ahichikile chifuchi, chifuchi yichihwima. Yichipwa cha hululu muze te keshimo. Ayo yafweta mumu lia uhenge wo, mumu kalitunyine yiyulo yami ni kuvwila kole shimbi jami. 44 Alioze, chipwe chocho, chichi kaambila muze makapwa mu chifuchi cha akwa-kole jo, chipwe kwanongesa mumu chino te muchipihisa usendo wami ni ayo. Mumu yami nguli Yehova, Zambi yo. 45 Mungukewuluka usendo uze nalingile ni tulamba two, waze nachijile mu chifuchi cha Engitu ku moko ja akwa-mavungu hanga ngupwe Zambi yo. Yami nguli Yehova.’”

46 Jino je shimbi ni yiyulo yize Yehova asele hakachi ka iye ni A-Izalele kupalikila muli Mose ku Mulundu wa Sinai.

27 Yehova yamba nawa kuli Mose ngwenyi: 2 “Amba kuli A-Izalele ngwe: ‘Nyi umwe mutu malinga chilakenyo chalipwila kuli Yehova cha kuhana mbongo jize hanatese hali mutu, 3 ndando ya lunga yoze uli ni miaka 20 ndo 60 yatamba kupwa shekele 50 a prata, kulita ni shekele ya mu chihela chisandu. 4 Alioze hakutwala kuli pwo, ndando yenyi muyikapwa shekele 30. 5 Hakutwala kuli mutu yoze uli ni miaka 5 ndo 20, nyi lunga, ndando yenyi muyikapwa shekele 20, nyi pwo, ndando yenyi muyikapwa shekele 10. 6 Nyi mwana yoze uli ni kakweji umuwika ndo miaka yitano kali wa lunga, ndando yenyi muyikapwa shekele jitano ja prata, nyi pwo, shekele jitatu ja prata.

7 “‘Mutu yoze uli ni miaka 60 hanji kuhiana, nyi lunga, ndando yenyi muyikapwa shekele 15, nyi pwo, shekele 10. 8 Alioze, nyi yoze walingile chilakenyo uswale wamwoka naye, mba kahashile kufweta ndando yize hanatese, akamane kumeso ja sasendote, sasendote akamusele ndando. Sasendote makamusela ndando kulita ni yikumba yize ali nayo.

9 “‘Nyi chilakenyo chinatale hali chimuna yoze mahasa kuhana kuli Yehova ngwe mulambu, yize mahana kuli Yehova muyipwa yisandu. 10 Iye katambile kusalakanyisa mupema hali mupi, hanji mupi hali mupema, chipwe kwasumbakenya. Alioze, nyi mazanga kusalakanyisa chimuna, yoze mutangu ni wamuchiali eswe mapwa asandu. 11 Nyi chimuna kali wa luchisa, yoze katambile kuhana kuli Yehova ngwe mulambu, mwenyaye akamanyise chimuna kumeso ja sasendote. 12 Sasendote makamutala nyi kali mupema nyi ka, chocho chimuna wacho makafwika ndando yize sasendote matesa. 13 Alioze, nyi mazanga kumukuula, akaweze chihanda chamuchitano kulita ni ndando yize hanatesela chimuna.

14 “‘Nyi umwe mutu masela zuwo lienyi ku usandu hanga alihane kuli Yehova ngwe chuma chisandu, sasendote makatala kanawa zuwo liacho nyi linapeme nyi ka. Mulikafwika ndando yize sasendote matesa. 15 Alioze, nyi mutu yoze waselanga zuwo lienyi ku usandu mazanga kulikuula, iye maweza chihanda chamuchitano ku ndando yize atesele, mba zuwo mulipwa nilienyi.

16 “‘Nyi umwe mutu masela munda wenyi ku usandu hanga auhane kuli Yehova, ndando yawo makayitesa kulita ni mbuto jize makatumbamo. Homere* yimuwika ya mbuto ya sevada, muyikafwika 50 a shekele ya prata. 17 Nyi iye masela munda wenyi ku usandu ha mwaka wa ukuule, ndando ya munda wacho kuyatambile kwalumuka. 18 Nyi iye masela munda wenyi ku usandu muze mwaka wa utuswilo hiwapalika, sasendote makatesa ndando yawo kulita ni miaka yize yasalako hanga mwaka ukwo wa utuswilo uhete, katamba kutepulula ku ndando yize atesele. 19 Alioze, nyi mutu yoze waselanga munda wenyi ku usandu mazanga kuukuula, iye maweza chihanda chamuchitano ku ndando yize atesele, mba munda muununga ni kupwa niwenyi. 20 Alioze, nyi iye kakuulile munda, chocho maulanjisa kuli mutu mukwo, iye kechi kuhasa nawa kuukuula. 21 Muze munda muutusuka ha mwaka wa utuswilo, akauhane kuli Yehova upwe munda wenyi usandu. Munda wacho muupwa chihinga cha asasendote.

22 “‘Nyi umwe mutu masela munda uze alanjile ku usandu hanga auhane kuli Yehova, munda uze hi chihinga chenyi ko, 23 sasendote mamutesela ndando yawo kulita ni miaka yize yasalako hanga mwaka wa utuswilo uhete, akafwete ndando yacho ha tangwa lizeliene, chili chuma chisandu cha Yehova. 24 Ha mwaka wa utuswilo, munda muukafuna kuli mwenyawo, mutu yoze waulanjishile.

25 “‘Ndando yeswe katamba kuyitesa kulita ni shekele ya mu chihela chisandu. Shekele yimuwika yatamba kufwika 20 a gera.*

26 “‘Alioze niumwe katambile kusela ku usandu tupula-majimo a yimuna, mumu ayo hanasemuka kulu ngwe tupula-majimo ambala a Yehova. Apwe kapula-jimo wa ngombe chipwe wa panga, hanapu kulu ambala a Yehova. 27 Nyi mapwa kapula-jimo wa umwe chimuna wa luchisa, mba mamukuula kulita ni ndando yize hanatese, katamba kuweza chihanda chamuchitano ha ndando yacho. Alioze, nyi chimuna kamukuulile, katamba kumulanjisa kulita ni ndando yize hanatese.

28 “‘Alioze, mutu niumwe katambile kulanda chipwe kukuula yuma yisandu yize ahanyine kuli Yehova yipwe niyenyi ku miaka yeswe, chipwe mutu, chipwe chimuna, chipwe munda. Yuma yeswe yize mutu mahana, yili yisandu yahiana kuli Yehova. 29 Chikwo nawa, mutu yoze hanamupatwila hanga amushihe, katambile kumukuula. Katamba kumushiha lume.

30 “‘Chihanda cheswe cha kumi cha ha mavu, chipwe mbuto ya mu minda, chipwe mihuko ya ku mitondo, yapwa yambala ya Yehova. Chili chuma chisandu cha Yehova. 31 Nyi umwe mutu mazanga kukuula chihanda cha kumi cha yuma yenyi, katamba kufweta ndando yacho ni kuwezaho chihanda chamuchitano. 32 Hakutwala ku chihanda chamuchikumi cha ngombe, mapanga, pembe hanji chimuna mweswawo wamuchikumi yoze wapalika mushi lia mutondo wa kafunga, katamba kupwa chuma chisandu kuli Yehova. 33 Iye katambile kutala kanawa chimuna hanga amone nyi kali mupema hanji mupi, chipwe kumusalakanyisa. Alioze, nyi meseka kumusalakanyisa, chimuna mutangu ni wamuchiali, eswe mapwa asandu. Yimuna katambile kwakuula.’”

34 Jino je shimbi jize Yehova ahanyine kuli Mose, ku mulundu wa Sinai hanga alweze A-Izalele.