KWALULA

1 Ha tangwa litangu lia kakweji wamuchiali, ha mwaka wamuchiali, muze ayo akatukile mu chifuchi cha Engitu, Yehova yahanjika ni Mose mu puya ya Sinai, mu mbalaka ya kulikungulwila. Iye yamulweza ngwenyi: 2 “Alulenu chikungulwila cheswe cha A-Izalele, mutu ni mutu kulita ni usoko wenyi, kulita ni munyachi wa atato, sonekenu majina ja malunga eswe. 3 Yena ni Arone nwatamba kusoneka majina jo kulita ni yizavu yo, eswe waze ali ni miaka 20 hanji kuhiana waze hajama hanga apwe hakachi ka tujita ja A-Izalele.

4 “Mu munyachi ni munyachi andenumo lunga umuwika; lunga wacho katamba kupwa mukwa-lutwe mu munyachi wa tato. 5 Wano kali majina a malunga waze makapwa ni yenu: Ku munyachi wa Rupene, Elizure mwana wa Sedure; 6 ku munyachi wa Simeone, Selumiele mwana wa Zurisadai; 7 ku munyachi wa Yunda, Nasone mwana wa Aminandambe; 8 ku munyachi wa Yisaka, Netanele mwana wa Zuare; 9 ku munyachi wa Zapulone, Eliape mwana wa Helone; 10 kuli ana a malunga a Yosefwe: Ku munyachi wa Eframe, Elisama mwana wa Amihude; ku munyachi wa Manase, Ngamaliele mwana wa Pedazure; 11 ku munyachi wa Mbenjamine, Abidane mwana wa Ngideonyi; 12 ku munyachi wa Ndane, Aizere mwana wa Amisadai; 13 ku munyachi wa Ashe, Pagiele mwana wa Okra; 14 ku munyachi wa Ngate, Eliasafe mwana wa Duele; 15 ku munyachi wa Napatali, Aira mwana wa Ena. 16 Wano e asakwile hakachi ka chikungulwila, alemu a ku minyachi ya atato. Ayo kali akwa-lutwe ja A-Izalele anji.

17 Chocho Mose ni Arone yatwala malunga jacho waze asakwile kulita ni majina jo. 18 Ayo yakungulula chikungulwila cheswe ha tangwa litangu lia kakweji wamuchiali hanga malunga waze ali ni miaka 20 hanji kuhiana, aasoneke mutu ni mutu ha jina, kulita ni usoko wo ni minyachi ya atato, 19 ngwe chize Yehova atumine Mose hanga alinge. Kashika, iye yasoneka majina jo mu puya ya Sinai.

20 Ana ja Rupene, mwana mutangu wa Izalele, majina jo kaasonekene kulita ni usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula mutu ni mutu. 21 Atu eswe waze alwile a ku munyachi wa Rupene kapwile 46,500.

22 Akwa-munyachi wa Simeone, kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula mutu ni mutu. 23 Atu eswe waze alwile a ku munyachi wa Simeone kapwile 59,300.

24 Akwa-munyachi wa Ngate, kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula. 25 Atu eswe waze alwile a ku munyachi wa Ngate kapwile 45,650.

26 Akwa-munyachi wa Yunda, kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula. 27 Atu eswe waze alwile a ku munyachi wa Yunda kapwile 74,600.

28 Akwa-munyachi wa Yisaka, kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula. 29 Atu eswe waze alwile a ku munyachi wa Yisaka kapwile 54,400.

30 Akwa-munyachi wa Zapulone, kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula. 31 Atu eswe waze alwile a ku munyachi wa Zapulone kapwile 57,400.

32 Akwa-munyachi wa Yosefwe, kupalikila muli Eframe kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula. 33 Atu eswe waze alwile a ku munyachi wa Eframe kapwile 40,500.

34 Akwa-munyachi wa Manase, kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula. 35 Atu eswe waze alwile a ku munyachi wa Manase kapwile 32,200.

36 Akwa-munyachi wa Mbenjamine, kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula. 37 Atu eswe waze alwile a ku munyachi wa Mbenjamine kapwile 35,400.

38 Akwa-munyachi wa Ndane, kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula. 39 Atu eswe waze alwile a ku munyachi wa Ndane kapwile 62,700.

40 Akwa-munyachi wa Ashe, kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula. 41 Atu eswe waze alwile a ku munyachi wa Ashe kapwile 41,500.

42 Akwa-munyachi wa Napatali, kaalwile kulita ni majina jo, usoko ni minyachi ya atato. Malunga eswe waze apwile ni miaka 20 hanji kuhiana waze te hajama kuya mu jita, yaalula. 43 Atu eswe waze alwile a ku munyachi wa Napatali kapwile 53,400.

44 Wano kali waze asonekene majina jo kuli Mose, Arone ni kuli alemu 12 A-Izalele. Alemu jacho, mutu ni mutu te kakumanyinako munyachi wa tato. 45 A-Izalele eswe waze apwile ni miaka 20 hanji kuhiana waze te hajama kuya mu jita, yaalula kulita ni minyachi ya atato. 46 Atu eswe waze alwile kapwile 603,550.

47 Alioze, majina ja A-Levi kakasonekene hamuwika ni minyachi yikwo. 48 Yehova yalweza Mose ngwenyi: 49 “Kanda walula munyachi wa Levi, chipwe kwachinga hakachi ka A-Izalele akwo. 50 Watamba kuhana kuli A-Levi mulimo wa kufunga tabernakulu ya Uchela yize yili ni mawe a usendo ni yikwachilo yeswe ni yikashi yamo yeswe. Ayo mapwa ni kumbata tabernakulu ni yikwachilo yamo yeswe ni kukalakalilamo. Ayo katamba kutunga mbalaka jo hakamwihi ni tabernakulu ni kuyijingilika. 51 Mashimbu eswe waze munufupa kututulula tabernakulu hanga nuyise ha chihela cheka, A-Levi e atamba kuyijikula, muze munufupa kujika cheka nawa tabernakulu, A-Levi e atamba kuyijika. Mutu yoze hi Ka-Levi ko, nyi makundamako katamba kumushiha.

52 “Ka-Izalele mweswe katamba kusa mbalaka yenyi mu chilombo chize mamusa, mutu mweswe kulita ni chizavu chenyi cha minyachi yitatu, kulita ni yizavu yenyi. 53 A-Levi katamba kusa mbalaka jo hakamwihi ni tabernakulu ya Uchela hanga ufwatulo wami uhone kwiza mu chikungulwila cha A-Izalele. A-Levi nawa e ali ni chiteli cha kufunga tabernakulu ya Uchela.”

54 Chocho A-Izalele yalinga yeswe yize Yehova alwezele kupalikila muli Mose. Ayo yalinga chizechene aatumine kulinga.

2 Yehova yalweza Mose ni Arone ngwenyi: 2 “A-Izalele katamba kusa mbalaka jo mu chihela chize maaha mu chizavu cha minyachi yitatu. Mutu ni mutu hakamwihi ni chilayi chize chinasolola minyachi ya atato. Katamba kusa chilombo cho kulutwe lia mbalaka ya kulikungulwila ni kuyijingilika.

3 “Ku chivumbuko kumukukapwa chizavu cha minyachi yitatu mu chilombo cha A-Yunda, kulita ni yizavu yo. Mwata wa ana ja A-Yunda, kali Nasone mwana wa Aminandambe. 4 Majina ja atu waze asonekene mu chizavu cho kali 74,600. 5 Munyachi wa Yisaka muukasa mbalaka sali lienyi. Mwata wa ana ja Yisaka kali Netanele, mwana wa Zuare. 6 Majina ja atu waze asonekene mu chizavu cho kali 54,400. 7 Kusulaho, mukwiza munyachi wa Zapulone. Mwata wa ana ja Zapulone kali Eliape mwana wa Helone. 8 Majina ja atu waze asonekene mu chizavu cho kali 57,400.

9 “Majina ja atu eswe waze asonekene mu chilombo cha Yunda hanga apwe maswalale kali 186,400. Ayo katamba kutetekela.

10 “Chizavu cha minyachi yitatu cha mu chizavu cha Rupene, kulita ni yizavu yo, muchikapwa ku uto. Mwata wa ana ja Rupene kali Elizure, mwana wa Sedure. 11 Majina ja atu waze asonekene mu chizavu cho kali 46,500. 12 Munyachi wa Simeone muukasa chilombo sali lio. Mwata wa ana ja Simeone kali Selumiele, mwana wa Zurisadai. 13 Majina ja atu waze asonekene mu chizavu cho kali 59,300. 14 Mba munyachi wa Ngate muwiza. Mwata wa ana ja Ngate kali Eliasafe, mwana wa Duele. 15 Majina ja atu waze asonekene mu chizavu cho kali 45,650.

16 Majina ja atu eswe waze asonekene mu chilombo cha Rupene hanga apwe maswalale kali 151,450. Ayo katamba kukaula chizavu chitangu.

17 “Muze mbalaka ya kulikungulwila mayitutulula, chilombo cha A-Levi chatamba kupwa mukachi ka yilombo yikwo.

“Ayo katamba kuya wenyi kulita ni chilombo cho, mutu ni mutu mu chihela chenyi. Kulita ni yizavu ya minyachi yitatu.

18 “Chizavu cha minyachi yitatu cha mu chilombo cha Eframe, kulita ni yizavu yo muchikatwama ku chitokelo. Mwata wa ana ja Eframe kali Elisama mwana wa Amihude. 19 Majina ja atu waze asonekene mu chizavu cho kali 40,500. 20 Sali lia chilombo cho kumukukapwa munyachi wa Manase. Mwata wa ana ja Manase kali Ngamaliele mwana wa Pedazure. 21 Majina ja atu waze asonekene mu chizavu cho kali 32,200. 22 Mba mukwiza munyachi wa Mbenjamine. Mwata wa ana ja Mbenjamine kali Abidane mwana wa Ngideonyi. 23 Majina ja atu waze asonekene mu chizavu cho kali 35,400.

24 “Majina ja atu eswe waze asonekene hanga apwe maswalale mu chilombo cha Eframe kali 108,100. Ayo katamba kukaula chizavu chamuchiali.

25 “Chizavu cha minyachi yitatu cha mu chilombo cha Ndane, kulita ni yizavu yo muchikatwama ku sango. Mwata wa ana ja Ndane kali Aizere, mwana wa Amisadai. 26 Majina ja atu waze asonekene mu chizavu cho kali 62,700. 27 Munyachi wa Ashe muukasa chilombo sali lio. Mwata wa ana ja Ashe kali Pagiele, mwana wa Okra. 28 Majina ja atu waze asonekene mu chizavu cho kali 41,500. 29 Mba mukwiza munyachi wa Napatali. Mwata wa ana ja Napatali kali Aira, mwana wa Ena. 30 Majina ja atu waze asonekene mu chizavu cho kali 53,400.

31 “Majina ja atu eswe waze asonekene mu chilombo cha Ndane kali 157,600. Chizavu cho chatamba kupwa cha kasula, kulita ni yizavu ya minyachi yitatu.”

32 Wano kali A-Izalele waze asonekene kulita ni minyachi ya atato. Mu yilombo, unji wa atu waze asonekene hanga aye mu jita, kapwile 603,550. 33 Alioze, A-Levi kakasonekene ngwe chize alingile ni A-Izalele akwo, mumu chino che Yehova atumine Mose kulinga. 34 A-Izalele kalingile yeswe yize Yehova atumine kupalikila muli Mose. Chenacho te akusa chilombo cho kulita ni yizavu ya minyachi yitatu. Chenacho nawa te akwenda, mutu ni mutu kulita ni usoko ni minyachi ya atato.

3 Yino yapwile yisemuko ya Arone ni Mose, ha tangwa lize Yehova ahanjikile ni Mose ku Mulundu wa Sinai. 2 Wano kali majina ja ana ja Arone: Nandambe, mwana mutangu, Ambihu, Eleazare ni Itama. 3 Wano kali majina ja ana a malunga ja Arone, asasendote a kuwayisa waze atongwele hanga akalakale ngwe asasendote. 4 Alioze, Yehova yashiha Nandambe ni Ambihu, mumu mu puya ya Sinai ayo kahanyine mulambu* kuli Yehova uze te keshi ni ulite wa kuhana. Alioze, Eleazare ni Itama yanunga ni kukalakala ngwe asasendote hamwe ni tato Arone.

5 Chocho Yehova yamba kuli Mose ngwenyi: 6 “Sanyika munyachi wa A-Levi, alweze hanga amane kumeso ja sasendote Arone hanga amulingile. 7 Ayo katamba kulinga milimo hanga akwase Arone ni chikungulwila cheswe cha A-Izalele, kulutwe lia mbalaka ya kulikungulwila ha kulinga milimo ya mu tabernakulu. 8 Ayo katamba kufunga yikwachilo yeswe ya mu mbalaka ya kulikungulwila ni kulinga milimo hanga akwase A-Izalele, ha kulinga milimo ya mu tabernakulu. 9 Watamba kuhana A-Levi kuli Arone ni kuli ana jenyi. Ayo kanaahana kuli iye ngwe chawana hakachi ka A-Izalele. 10 Watamba kusakula Arone ni ana jenyi, ayo mafunga milimo yo ya usasendote. Mutu yoze keshi ni utayizo nyi makundamako katamba kumushiha.”

11 Yehova yamba nawa kuli Mose ngwenyi: 12 “Ngunasakula A-Levi mukachi ka Izalele, chichi kusakula ana eswe atangu A-Izalele, A-Levi kumapwa a yami. 13 Mumu ana eswe atangu a yami. Ha tangwa lize nashihile ana eswe atangu mu chifuchi cha Engitu, yingupemesa ana eswe atangu A-Izalele apwe ana jami, chize kuli atu ndo kuli tushitu. Ayo katamba kupwa a yami. Yami Yehova.”

14 Yehova yanunga ni kulweza Mose mu puya ya Sinai ngwenyi: 15 “Alula ana ja Levi kulita ni munyachi wa tato ni usoko wo. Watamba kwalula ana eswe a malunga waze ali ni kakweji umuwika hanji kuhiana.” 16 Mba Mose yaalula kulita ni shimbi ya Yehova, chizechene ngwe iye amutumine kulinga. 17 Wano kali majina ja ana ja A-Levi: Ngeshone, Kohate ni Merari.

18 Ana ja Ngeshone waze alukile majina kuli asoko jo kali wano: Lipini ni Shimei.

19 Ana ja Kohate waze alukile majina kuli asoko jo kali wano: Amarame, Izehare, Heprone ni Uziele.

20 Ana ja Merari waze alukile majina kuli asoko jo kali wano: Mahile ni Mushi.

Wano kapwile asoko ja A-Levi kulita ni minyachi ya atato.

21 Ku munyachi wa Ngeshone kwakatukile usoko wa Lipini ni usoko wa Shimei. Wano kapwile asoko ja Ngeshone. 22 Ana eswe a malunga a kakweji umuwika hanji kuhiana waze alwile kapwile 7,500. 23 Asoko ja Ngeshone kasele mbalaka jo kunyima lia tabernakulu ku chitokelo. 24 Mwata wa mu usoko wa Ngeshone kapwile Eliasafe mwana wa Laele. 25 Mulimo wa ana ja Ngeshone mu mbalaka ya kulikungulwila wapwile kufunga tabernakulu, mbalaka, fulumba yalio, chikalakala cha hina cha ku chikolo cha mbalaka, 26 yikalakala ya hina ya mu yiize, chikalakala cha hina cha ku chikolo cha yiize chize cha kujingilika tabernakulu, chilumbilo, ngoji ja mbalaka ni milimo yeswe yinatale ku yuma yacho.

27 Ku munyachi wa Kohate kwakatukile asoko ja A-Amarame, asoko ja A-Izehare ni asoko ja A-Uziele. Wano e apwile asoko ja A-Kohate. 28 Ana eswe a malunga a kakweji umuwika hanji kuhiana waze alwile kapwile 8,600. Ayo kapwile ni chiteli cha kufunga yuma ya muma musandu. 29 Asoko ja ana ja Kohate kasele mbalaka jo ku uto ya tabernakulu. 30 Mwata wa mu usoko wa A-Kohate kapwile Elizafane, mwana wa Uziele. 31 Mulimo wo wapwile kufunga mushete, mesa, ndeya, yilumbilo, yikashi ya kukalakala nayo muma musandu, chikalakala cha hina ni milimo yeswe yinatale ku yuma yacho.

32 Mwata wa miata ja A-Levi kapwile Eleazare, mwana wa sasendote Arone. Iye kapwile ni kusongwela atu waze apwile ni kukalakalila muma musandu.

33 Ku munyachi wa Merari kwakatukile usoko wa A-Mahile ni usoko wa A-Mushi. Wano kapwile asoko ja Merari. 34 Ana eswe a malunga, a kakweji umuwika hanji kuhiana waze asonekene kapwile 6,200. 35 Mwata wa asoko ja Merari kapwile Zuriele, mwana wa Abiale. Ayo kasele mbalaka jo ku sango ya tabernakulu. 36 Ana ja Merari kapwile ni chiteli cha kusokola ni kusokeka tabernakulu. Ayo te kakusokola ni kusokeka mikambo, manguji, yimanyino, yikashi yamo ni milimo yeswe yize te yinatale ku yuma yacho. 37 Chikwo nawa, ayo te kakujika ni kujikula manguji a chipanga, yimanyino yamo, mbambo ni mihipu.

38 Mose, Arone ni ana jenyi, e te akusa mbalaka jo kulutwe lia tabernakulu, ku chivumbuko, chekwamba, kulutwe lia mbalaka ya kulikungulwila. Chiteli cho chapwile kufunga muma musandu, ayo te kakuchilinga mu jina lia A-Izalele. Mutu yoze keshi ni utayizo nyi makundamako te kakumushiha.

39 A-Levi eswe a malunga a kakweji umuwika hanji kuhiana, waze Mose ni Arone asonekene kulita ni usoko wo, ngwe chize Yehova atumine kapwile 22,000.

40 Yehova yalweza Mose ngwenyi: “Soneka ana malunga eswe atangu A-Izalele, a kakweji umuwika hanji kuhiana, alula ni kusoneka majina jo. 41 Ngusakwile A-Levi hanga asalakane ana atangu A-Izalele. Ngusakwile yimuna ja A-Levi hanga asalakane tupula majimo a yimuna ja A-Izalele. Yami Yehova.” 42 Chocho, Mose yasoneka majina ja ana eswe atangu A-Izalele ngwe chize Yehova amutumine. 43 Ana eswe atangu a malunga apwile ni kakweji umuwika hanji kuhiana waze asonekene majina jo, kapwile 22,273.

44 Yehova yalweza nawa Mose ngwenyi: 45 “Ngusakwile A-Levi hanga asalakane ana atangu A-Izalele, ngusakwile yimuna ja A-Levi hanga asalakane tupula majimo a yimuna jo. A-Levi makapwa a yami. Yami Yehova. 46 Mba nuhase kukuula ana atangu 273 ja A-Izalele waze anahiana A-Levi, 47 nwatamba kukunga shekele* jitano hali mutu ni mutu, kulita ni shekele ja muma musandu.* Shekele yimuwika yakufwika 20 a ngera.* 48 Nwatamba kuhana mbongo kuli Arone ni ana jenyi mba nuhase kukuula unji wa waze ahiana A-Levi.” 49 Chocho, Mose yakunga mbongo ja kukuula najo waze ahianyine A-Levi. 50 Jino je mbongo jize iye atambwile kuli ana atangu ja A-Izalele: 1,365 a shekele, kulita ni shekele ya muma musandu. 51 Chocho, Mose yahana mbongo ja ukuule kuli Arone ni ana jenyi, kulita ni liji lia Yehova, ngwe chize Yehova atumine Mose.

4 Yehova yalweza Mose ni Arone ngwenyi: 2 “Nwatamba kwalula ana ja Kohate mukachi ka ana ja A-Levi, kulita ni usoko wo ni minyachi ya atato, 3 eswe a miaka 30 ndo 50 ali mukachi ka chizavu chize asakula hanga akalakale mu mbalaka ya kulikungulwila.

4 “Uno uli mulimo wa ana ja Kohate mu mbalaka ya kulikungulwila. Mulimo wacho uli usandu kuhiana. 5 Muze munumona ngwenu, kwasala hakehe hanga chilombo chikatuke, Arone ni ana jenyi manjila ande chikalakala cha hina hanga afuke nacho mushete wa Uchela. 6 Ha mushete wa Uchela ayo mafukaho lambu lia foka;* mafukaho nawa hina lia ulombo walauluka ni kuusokeka mikambo hanga aumbate.

7 “Ha mesa yize akusa mbolo ja kulambula kuli Zambi, ayo malaho hina lia ulombo walauluka, masaho malonga, misenge, mandoho ni milondo ya walwa wa kulambula. Mbolo jize akulambula mashimbu eswe, jatamba kununga ha mesa. 8 Yuma yacho mayifuka hina lichila, mesa mayifuka ni lambu lia foka ni kuyisa mikambo ya kuyimbata nayo. 9 Mba manda hina lialauluka hanga afuke nalio chikwachilo cha ndeya chize akutemuna nacho, ndeya, yijimino, yikwachilo ya uto ni yikwachilo yeswe ya maji waze akukwasa hanga kahia kahone kujima. 10 Chikwachilo cha ndeya ni yikashi yeswe mayivungila ha lambu lia foka ni kuyisa ha mikambo ya kumbachila. 11 Mba ayo mala hina lialauluka ha chilumbilo cha oru, machifuka ni lambu lia foka ni kusako mikambo ya kumbata nayo. 12 Kashika, ayo manda yikwata yeswe yize akukalakala nayo muma musandu mayivunga ha hina lialauluka ni kuyifuka lambu lia foka ni kuyisa ha mikambo hanga ayimbate.

13 “Ayo katamba kukomba uto weswe ha chilumbilo ni kwalaho hina lia ulombo wachiuluka. 14 Masaho yikashi yeswe nwakukalakala nayo ku chilumbilo: Yikwachilo ya kahia, nguto ja misako, yikasu, mandoho, yikwata yeswe ya chilumbilo. Katamba kuyifuka ni lambu lia foka ni kuyisa ha mikambo hanga ayimbate.

15 “Muze munumona ngwenu, kwasala hakehe hanga chilombo chikatuke, Arone ni ana jenyi katamba kuhwisa kufuka chihela chisandu ni yuma yeswe ya mu chihela chisandu. Muze mahwisa, mba ana ja Kohate manjila hanga ayimbate, alioze ayo katambile kukwata ku yuma ya mu chihela chisandu, nyi mayikwata mafwa. Uno we mulimo wa ana ja Kohate mu mbalaka ya kulikungulwila.

16 “Eleazare mwana wa sasendote Arone, mwe masongwela mulimo wakufunga maji a ndeya, insensu ya vumba lipema, mulambu wa wunga uze akulinga tangwa ha tangwa ni maji a kuwayisa no. Iye mwe wakusongwela milimo yeswe mu tabernakulu ni chihela chisandu ni yikashi yamo yeswe.”

17 Yehova yalweza Mose ni Arone ngwenyi: 18 “Kanda nwecha munyachi wa A-Kohate aunongese hakachi ka A-Levi. 19 Alioze, lingenu chino hanga ayo achine kufwa muze makundama ku yuma yisandu, Arone ni ana jenyi a malunga e manjila hanga aatetele milimo ni yuma yize mutu ni mutu mambata. 20 Ayo katambile kunjila hanga amone yuma yisandu chipwe ha shimbu likehe, nyi mayimona mafwa.”

21 Yehova yamba kuli Mose ngwenyi: 22 “Nwatamba kwalula ana ja Ngeshone kulita ni minyachi ya atato ni asoko jo. 23 Nwatamba kusoneka majina ja malunga eswe waze ali ni miaka 30 ndo 50 a mu chizavu chize hanatongola hanga akalakale mu mbalaka ya kulikungulwila. 24 Yino ye yuma yize ahanyine kuli A-Ngeshone hanga ambate: 25 Ayo mambata mahina a tabernakulu, mbalaka ya kulikungulwila, chifuko chayo, chifuko cha lambu lia foka chize chili helu, chikalakala cha hina cha kufuka ku chikolo cha mbalaka ya kulikungulwila, 26 yikalakala ya hina ya mu yiize, chikalakala cha hina cha ku chikolo cha yiize chize chakujingilika tabernakulu ni chilumbilo, mihipu yako, yikashi yeswe ni yuma yize akukalakala nayo mu mulimo wacho. Uno we mulimo uze ahanyine kuli A-Ngeshone. 27 Milimo yeswe ya A-Ngeshone ni yuma yize mambata, katamba kuyisongwela kuli Arone ni ana jenyi a malunga. Milimo yeswe yize malinga, yenu nwatamba kwahayo. 28 Uno we mulimo uze A-Ngeshone atamba kulinga mu mbalaka ya kulikungulwila; yoze masongwela mulimo wo kali Itama, mwana wa sasendote Arone.

29 “Majina ja ana ja Merari, watamba kwasoneka kulita ni asoko jo ni munyachi wa tato. 30 Mukasoneka majina ja malunga waze ali ni miaka 30 ndo 50 ali mu chizavu chize hanatongola hanga akalakale mu mbalaka ya kulikungulwila. 31 Mulimo wo mu mbalaka ya kulikungulwila uli wa kumbata yuma yino: Mapaya a ku tabernakulu, njalo jako, manguji jako ni yimanyino yako; 32 manguji a chipanga cha yiize, yimanyino yo, mbambo jo, mihipu ni yikashi yeswe hamwe ni yuma yeswe yize yinatale ha mulimo wacho. Yenu nwatamba kwalweza majina a yuma yize atamba kumbata. 33 Au we mulimo uze usoko wa ana ja Merari atamba kulinga mu mbalaka ya kulikungulwila; katamba kwasongwela kuli Itama, mwana wa sasendote Arone.”

34 Chenacho Mose ni Arone ni miata a chikungulwila asonekene majina ja ana ja A-Kohate kulita ni usoko wo ni munyachi wa atato, 35 eswe a miaka 30 ndo 50 waze apwile mu chizavu chize asakwile hanga akalakale mu mbalaka ya kulikungulwila. 36 Unji wa atu waze asonekene kulita ni usoko wo kapwile 2,750. 37 Wano e asonekene a mu usoko wa A-Kohate, waze te akukalakala mu mbalaka ya kulikungulwila. Mose ni Arone yasoneka majina jo kulita ni shimbi yize Yehova ahanyine kuli Mose.

38 Majina ja ana ja Ngeshone kaasonekene kulita ni usoko wo ni munyachi wa tato, 39 eswe a miaka 30 ndo 50 apwile mu chizavu chize asakwile hanga akalakale mu mbalaka ya kulikungulwila. 40 Unji wa atu waze asonekene kulita ni usoko wo ni munyachi wa tato, kapwile 2,630. 41 Yono mwe lusango wa usoko wa ana ja Ngeshone, waze te akukalakala mu mbalaka ya kulikungulwila. Mose ni Arone yasoneka majina ja ana jacho kulita ni shimbi ya Yehova.

42 Majina ja ana ja Merari kaasonekene kulita ni usoko wo ni munyachi wa tato, 43 eswe a miaka 30 ndo 50 apwile mu chizavu chize asakwile hanga akalakale mu mbalaka ya kulikungulwila. 44 Unji wa atu waze asonekene kulita ni usoko wo kapwile 3,200. 45 Yono mwe lusango wa usoko wa ana ja Merari, waze Mose ni Arone asonekene majina jo kulita ni shimbi yize Yehova ahanyine kupalikila muli Mose.

46 Mose, Arone ni miata ja A-Izalele, yasoneka A-Levi wano eswe kulita ni usoko wo ni minyachi ya atato; 47 ayo kapwile ni miaka 30 ndo 50, eswe kaatongwele hanga akalakale ni kumbata yikwata ya mu mbalaka ya kulikungulwila. 48 Unji wa atu waze asonekene wapwile wa 8,580. 49 Majina jo kaasonekene kulita ni shimbi yize Yehova ahanyine kupalikila muli Mose, mutu ni mutu kulita ni mulimo wenyi ni yikwata yize te atamba kumbata; majina jo kaasonekene kulita ni yize Yehova atumine Mose kulinga.

5 Yehova yamba nawa kuli Mose ngwenyi: 2 “Lweza A-Izalele hanga ase haze lia chilombo mutu mweswe yoze uli ni yikola ya mbumba, yoze uli ni yikola ya kuhita ku ulunga hanji ku upwo ni yoze malichisa ha kukwata mufu. 3 Apwe pwo chipwe lunga, nwatamba kwasa haze lia chilombo. Nwatamba kwasa haze lia chilombo hanga achine kusambulwisa musongo wo mu chilombo muze natwama.” 4 Yino ye A-Izalele alingile, yasa atu jacho haze lia chilombo. A-Izalele yalinga kulita ni chize Yehova alwezele Mose.

5 Yehova yalweza nawa Mose ngwenyi: 6 “Lweza A-Izalele ngwe: ‘Nyi lunga hanji pwo malinga shili ngwe yize atu eswe akulinga ni kuhona kushishika kuli Yehova, mutu wacho mapwa ni mulonga. 7 Mutu wacho katamba kwambulula shili yize alinga ni kufweta ndando yize muyifuka mulonga wenyi. Chikwo nawa, katamba kuwezelaho chihanda chamuchitano ni kuhana yuma yacho kuli yoze avulumuna. 8 Alioze, nyi mutu yoze avulumuna keshi ni usoko yoze matambula fweto ya mulonga wacho, fweto yacho katamba kuyihana kuli Yehova, yikapwe ya sasendote. Ha fweto yacho mawezelaho mwana panga yoze sasendote malambula hanga afuke shili ya mutu yoze wavulumuna.

9 “‘Milambu yeswe yisandu yize A-Izalele maneha kuli sasendote, yatamba kupwa ya sasendote. 10 Yuma yisandu yize mutu ni mutu maneha, muyipwa ya sasendote. Yize mutu ni mutu mahana kuli sasendote muyipwa ya sasendote.’”

11 Yehova yamba nawa kuli Mose ngwenyi: 12 “Lweza A-Izalele ngwe: ‘Yino ye ayo atamba kulinga nyi pwo lia umwe lunga malumbuka 13 ha kulimona ni lunga mweka, alioze maswekela mukwo-lunga, chocho iye mapwa waluchisa, chakuhona kupwa ni yela waze amumonanga chipwe kumukwata makoji: 14 Nyi mukwo-lunga mevwa ukwa ni kunyonga ngwenyi, mukwo-pwo kalumbuka, mba chochene lume iye kalichisa, hanji nyi mukwo-lunga mevwa ukwa mba manyonga ngwenyi kota mukwo-pwo kalumbuka, alioze mukwo-pwo kalichishile, 15 lunga katamba kutwala mukwo-pwo kuli sasendote, hamwe ni mulambu uze mamuhanyina, mulambu wa chihanda cha kumi cha efa ya wunga wa sevada. Iye katambile kuzujila maji a olevwe ha mulambu chipwe kusaho libano, mumu uli mulambu wa mbuto unatale ha ukwa, uli mulambu wa mbuto uze wa kwiwulula mulonga.

16 “‘Sasendote maneha pwo wacho kulutwe ni kumumanyisa kumeso ja Yehova. 17 Sasendote maswita meya asandu mu chikwachilo cha uma, manda amwe mavu hashi mu tabernakulu ni kwasa mu meya. 18 Mba sasendote mamanyisa pwo kumeso ja Yehova, makasulula kambu ni kusa ha moko jenyi mulambu wa mbuto wa kwiwulula, chekwamba, mulambu wa ukwa; sasendote masa ha kwoko lienyi meya asasu waze akuneha shingo.

19 “‘Sasendote meta kuli pwo hanga alishinge ha kumulweza ngwenyi: “Nyi kuwalipombele ni lunga mukwo muze uchili mu chiyulo cha mukwenu-lunga, nyi kuwalumbukile chipwe kulichisa, meya wano asasu akuneha shingo kanda akulinga upi. 20 Alioze, nyi walumbuka muze uchili mu chiyulo cha mukwenu-lunga, ni kupomba ni lunga mweka—” 21 Chocho, sasendote makashingisa pwo ni maliji a shingo, sasendote malweza pwo ngwenyi: “Yehova akakupwise chilweza muze matongola shingo hakachi ka atu je. Yehova akasosewese chitongo* che ni kujimbisa* jimo lie. 22 Meya wano a shingo manjila mu jimo lie hanga ajimbise jimo lie ni kusosewesa chitongo che.” Mba pwo katamba kwamba ngwenyi: “Amene! Amene!”*

23 “‘Kashika sasendote katamba kusoneka shingo liacho mu mukanda ni kulijimuna mu meya asasu. 24 Iye manwisa pwo meya asasu waze akuneha shingo, mba meya waze akuneha shingo manjila muli iye ni kumusashisa. 25 Sasendote katamba kwanda mulambu wa mbuto wa ukwa uze uli ha kwoko lia pwo hanga auhunge kulutwe ni kunyima kumeso ja Yehova, mba matwala mulambu wacho ha chilumbilo. 26 Ha mulambu wa mbuto, sasendote mandaho ndambu hanga ayoche ha chilumbilo, mba manwisa meya pwo wacho. 27 Muze sasendote mamunwisa meya, nyi pwo wacho te halichisa ni kulumbuka ni lunga mweka, meya a shingo mamunjila ni kumupwisa musasu, jimo lienyi mulijimba ni chitongo chenyi muchisosewa. Pwo wacho mapwa chilweza cha shingo hakachi ka atu jenyi. 28 Alioze, nyi pwo wacho kalichishile, shingo lino kulichi kumukwata, makamita ni kusema ana.

29 “‘Yino ye shimbi ya ukwa, nyi ngwe umwe pwo malumbuka ni kulichisa muze ali mu chiyulo cha mukwo-lunga, 30 hanji muze umwe lunga mamona ngwenyi, mukwo-pwo kalumbuka. Iye katamba kumanyisa pwo lienyi kumeso ja Yehova. Sasendote katamba kukaula shimbi jeswe hakutwala ku mulonga wa pwo wacho. 31 Lunga kechi kupwa ni mulonga, alioze mukwo-pwo makamusopesa mumu lia mulonga wenyi.’”

6 Yehova yalweza nawa Mose ngwenyi: 2 “Lweza A-Izalele ngwe, ‘nyi lunga hanji pwo malinga chilakenyo chakutwama ngwe Ka-Nazireu kuli Yehova, 3 katamba kulitwamina kunwa vinyu ni walwa ukwo usasu, katambile kunwa vinagre ya vinyu chipwe ya walwa usasu. Chikwo nawa, katambile kunwa walwa wa kulinga ni uva, chipwe kulia uva ya wisu hanji yumu. 4 Katambile kulia nichimwe cha ku mutondo wa uva, uva ya wisu chipwe yula ya uva ha matangwa eswe a mulimo wenyi wa Unazireu.

5 “‘Iye katambile kutewula kambu jenyi ha matangwa eswe a chilakenyo chenyi cha Nazireu. Katamba kupwa musandu ha kwecha kambu jenyi jisuhwe ndo muze matangwa jenyi akulihana kuli Yehova mahwa. 6 Katambile kukundama kuli mufu ha matangwa eswe waze malihana kuli Yehova. 7 Chipwe ngwe tato, naye, ndumbwenyi wa lunga hanji wa pwo mafwa, iye katambile kulipwisa wa luchisa, mumu ku mutwe wenyi kuli chilayi cha Unazireu kuli Zambi.

8 “‘Iye mapwa musandu kuli Yehova ha matangwa eswe a Unazireu wenyi. 9 Alioze, nyi tungumuku mutu mafwila hakamwihi ni iye ni kupwisa kambu jenyi ja luchisa, jize jakusolola kulihana chenyi kuli Zambi, iye katamba kujitewula ha tangwa lia kulipemesa chenyi. Chekwamba, ha tangwa liamuchishimbiali. 10 Ha tangwa liamuchinake, katamba kutwala kuli sasendote tutele aali hanji ana a membe aali ku unjililo wa mbalaka ya kulikungulwila. 11 Sasendote malambula umuwika ngwe mulambu wa shili, mukwo ngwe mulambu wa kwocha hanga amufukile shili, mumu kavulumuna ha kukundama kuli mufu. Chocho, Ka-Nazireu mapemesa mutwe wenyi ha tangwa liacho. 12 Iye katamba kulihana cheka kuli Yehova hanga aputuke cheka mulimo wenyi wa Unazireu. Katamba kutwala kuji a panga wa mwaka umuwika hanga amuhane ngwe mulambu wa shili. Alioze matangwa a kunyima katambile kwalula, mumu kapwisa mulimo wenyi wa Unazireu wa luchisa.

13 “‘Yino ye shimbi hakutwala ku Unazireu: Muze iye malinga matangwa aali a Unazireu wenyi, katamba kumutwala ku unjililo wa mbalaka ya kulikungulwila. 14 Kwenako iye mahana mulambu wenyi kuli Yehova: Kuji a panga wa mwaka umuwika keshi kapalia ngwe mulambu wa kwocha, chihwo cha panga wa mwaka umuwika keshi kapalia ngwe mulambu wa shili, kuji a panga keshi kapalia ngwe mulambu wa sambukila, 15 mutonga umuwika wa mbolo jajinguluka kujishi futunwiso ja kulinga ni wunga wa kuchinga ni maji a olevwe ni mbolo japatama ja kukwita maji a olevwe ni mulambu wa mbuto ni walwa. 16 Sasendote makayisolola kumeso ja Yehova ni kuhana mulambu wa shili ni mulambu wa kwocha. 17 Malambula kuli Yehova kuji a panga ngwe chitapo cha mulambu wa sambukila ni mutonga wa mbolo kujishi futunwiso. Sasendote makahana mulambu wa mbuto ni mulambu wa walwa.

18 “‘Ka-Nazireu matewula kambu jenyi ku chikolo cha mbalaka ya kulikungulwila, manda kambu jize jasoka ha mashimbu a Unazireu wenyi, majisa mu kahia kaze kali kushi lia chitapo cha mulambu wa sambukila. 19 Sasendote manda chilama cha kuji a panga cha kuteleka, lumbolo wajinguluka keshi futunwiso wa kuchiza mu mutonga, lumbolo wa patama keshi futunwiso, yuma yacho mayisa ha moko ja Ka-Nazireu muze hatewula kambu jize jili chilayi cha Unazireu wenyi. 20 Sasendote katamba kuhungisa yuma yacho kulutwe ni kunyima ngwe mulambu wa kuhungisa kumeso ja Yehova. Mumu yino yili yisandu kuli sasendote. Pambo lize ahana ngwe mulambu wa kuhungisa ni kulu lize ahana ngwe mulambu, neyo yili yisandu. Muze malinga yuma yino, mba Ka-Nazireu mahasa kunwa vinyu.

21 “‘Yino ye shimbi hakutwala kuli Nazireu yoze malinga chilakenyo: Nyi mapwa ni uhashi wakuhana mulambu kuli Yehova kuhiana uze A-Nazireu atamba kuhana ni kulinga chilakenyo ha chikuma chacho, iye katamba kumanununa chilakenyo chenyi hakutwala ku shimbi ya Unazireu wenyi.’”

22 Yehova yalweza Mose ngwenyi: 23 “Lweza Arone ni ana jenyi ngwe: ‘Yino ye atamba kuhanjika hanga awahise A-Izalele:

24 “Yehova anuwahise ni kunufunga.

25 Yehova asolole ngwenyi kanawahilila ni yenu.

26 Yehova anuvwile keke ni kunwaha sambukila.”’

27 Ayo makavuluka jina liami hali A-Izalele hanga ngwawahise.”

7 Ha tangwa lize Mose ahwishile kumika tabernakulu, yayiwahisa ni kuyipemesa, ni yuma yamo yeswe, ni chilumbilo ni yikwata yamo yeswe. Muze hawahisa ni kupemesa yuma yacho, 2 miata A-Izalele ni akwa-lutwe a minyachi ya atato yahana mulambu. Miata wano a minyachi apwile ni kusongwela mulimo wa kwalula, 3 yahana mulambu wo kuli Yehova: Matemba asambano a kufuka ni ngombe 12. Miata aali yahana temba limuwika, mutu ni mutu wa kuli ayo yahana ngombe umuwika, yasa milambu yacho kulutwe lia tabernakulu. 4 Yehova yalweza Mose ngwenyi: 5 “Tambula yuma yino hanga akalinge nayo milimo mu mbalaka ya kulikungulwila, watamba kuyihana kuli A-Levi kulita ni mulimo uze mutu ni mutu malinga.”

6 Chocho, Mose yatambula matemba ni ngombe, yayihana kuli A-Levi. 7 Yanda matemba aali ni ngombe awana yayihana kuli ana ja Ngeshone kulita ni mulimo wo, 8 yahana matemba awana ni ngombe nake kuli ana ja Merari, kulita ni mulimo wo. Yino yeswe kayihanyine ni usongwelo wa Itama, mwana wa sasendote Arone. 9 Alioze, iye kakahanyine nichimwe kuli ana ja Kohate mumu kapwile ni kukalakalila mu chihela chisandu ni kumbata yuma yisandu ha yipaya.

10 Miata kahanyine milambu yo ha tangwa lia kukunjika chilumbilo, ha tangwa lize achiwayishile. Muze miata atwalile milambu yo kulutwe lia chilumbilo, 11 Yehova yalweza Mose ngwenyi: “Mwata ni mwata makapwa ni tangwa lienyi lia kuneha mulambu wa kukunjika nawo chilumbilo.”

12 Nasone, mwana wa Aminandambe wa ku munyachi wa A-Yunda, mwe waliangile kuhana mulambu ha tangwa litangu. 13 Kalambwile longa limuwika lia prata lize te liakulema 130 a shekele ni ndoho yimuwika ya prata yize te yakulema 70 a shekele, kulita ni kweseka cha chihela chisandu. Yikashi yacho te yinazala too ni wunga wa kuchinga ni maji a olevwe hanga ahane mulambu wa mbuto, 14 ndoho yikehe ya oru yize te yakulema 10 lia shekele ya too ni insensu, 15 chimbembe wa kuji umuwika, kuji a panga umuwika ni mwana panga wa mwaka umuwika hanga ahane ngwe mulambu wa kwocha 16 ni pembe umuwika hanga ahane ngwe mulambu wa kufuka nawo shili. 17 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji a ana mapanga atano a mwaka umuwika. Uno we mulambu uze Nasone, mwana wa Aminandambe ahanyine.

18 Ha tangwa liamuchiali, mwata wa Yisaka, Netanele, mwana wa Zuare, yahana mulambu wenyi. 19 Iye yalambula longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 20 ndoho yikehe ya oru yize te yakulema 10 lia shekele, ya too ni insensu, 21 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 22 ni pembe umuwika hanga ahane ngwe mulambu wa kufuka nawo shili. 23 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji a ana mapanga atano a mwaka umuwika. Uno we mulambu uze Netanele, mwana wa Zuare ahanyine.

24 Ha tangwa liamuchitatu, mwata wa ana ja Zapulone, Eliape mwana wa Helone, 25 yalambula yuma yino: Longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 26 ndoho yikehe ya oru yize te yakulema 10 lia shekele, ya too ni insensu, 27 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 28 ni pembe umuwika hanga ahane ngwe mulambu wa kufuka nawo shili. 29 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji ja ana mapanga atano a mwaka umuwika. Uno we mulambu uze Eliape, mwana wa Helone ahanyine.

30 Ha tangwa liamuchiwana, mwata wa ana ja Rupene, Elizure mwana wa Sedure, 31 yalambula yuma yino: Longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 32 ndoho yikehe ya oru yize te yakulema 10 lia shekele, ya too ni insensu, 33 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 34 ni pembe umuwika hanga ahane ngwe mulambu wa kufuka nawo shili. 35 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji ja ana mapanga atano a mwaka umuwika. Uno we mulambu uze Elizure, mwana wa Sedure ahanyine.

36 Ha tangwa liamuchitano, mwata wa ana ja Simeone, Selumiele, mwana wa Zurisadai, 37 yalambula yuma yino: Longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 38 ndoho yikehe ya oru yize te yakulema 10 lia shekele, ya too ni insensu, 39 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 40 ni pembe umuwika hanga ahane ngwe mulambu wa kufuka nawo shili. 41 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji ja ana mapanga atano a mwaka umuwika. Uno we mulambu uze Selumiele, mwana wa Zurisadai ahanyine.

42 Ha tangwa liamuchisambano, mwata wa ana ja Ngate, Eliasafe, mwana wa Duele 43 yalambula yuma yino: Longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 44 ndoho yikehe ya oru yize te yakulema 10 lia shekele, ya too ni insensu, 45 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 46 ni pembe umuwika hanga ahane ngwe mulambu wa kufuka nawo shili. 47 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji a ana mapanga atano a mwaka umuwika. Uno we mulambu uze Eliasafe, mwana wa Duele ahanyine.

48 Ha tangwa liamuchishimbiali, mwata wa ana ja Eframe, Elisama mwana wa Amihude, 49 yalambula yuma yino: Longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 50 ndoho yikehe ya oru yize te yakulema 10 lia shekele ya too ni insensu, 51 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 52 ni pembe umuwika hanga ahane ngwe mulambu wa kufuka nawo shili. 53 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji a ana mapanga atano a mwaka umuwika. Uno we mulambu uze Elisama, mwana wa Amihude ahanyine.

54 Ha tangwa liamuchinake, mwata wa ana ja Manase, Ngamaliele mwana wa Pedazure, 55 yalambula yuma yino: Longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 56 ndoho yikehe ya oru yize te yakulema 10 lia shekele ya too ni insensu, 57 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 58 ni pembe umuwika hanga ahane ngwe mulambu wa kufuka nawo shili. 59 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji a ana mapanga atano a mwaka umuwika. Uno we mulambu uze Ngamaliele, mwana wa Pedazure ahanyine.

60 Ha tangwa liamuchilivwa, mwata wa ana ja Mbenjamine, Abidane mwana wa Ngideonyi, 61 yalambula yuma yino: Longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 62 ndoho yikehe ya oru yize te yakulema 10 lia shekele ya too ni insensu, 63 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 64 ni pembe umuwika hanga ahane ngwe mulambu wa kufuka nawo shili. 65 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji a ana mapanga atano a mwaka umuwika. Uno we mulambu uze Abidane, mwana wa Ngideonyi ahanyine.

66 Ha tangwa liamuchikumi, mwata wa ana ja Ndane, Aizere mwana wa Amisadai, 67 yalambula yuma yino: Longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 68 ndoho yikehe ya oru yize te yakulema 10 lia shekele ya too ni insensu, 69 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 70 ni pembe umuwika hanga ahane ngwe mulambu wa kufuka nawo shili. 71 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji a ana mapanga atano a mwaka umuwika. Uno we mulambu uze Aizere, mwana wa Amisadai ahanyine.

72 Ha tangwa 11, mwata wa ana ja Ashe, Pagiele mwana wa Okra, 73 yalambula yuma yino: Longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 74 ndoho yikehe ya oru yize te yakulema 10 lia shekele ya too ni insensu, 75 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 76 ni pembe umuwika hanga ahane ngwe mulambu wa kufuka nawo shili. 77 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji a ana mapanga atano a mwaka umuwika. Uno we mulambu uze Pagiele, mwana wa Okra ahanyine.

78 Ha tangwa 12, mwata wa ana ja Napatali, Aira mwana wa Ena, 79 yalambula yuma yino: Longa limuwika lia prata lize te liakulema 130 a shekele, ndoho ya prata yize te yakulema 70 a shekele, kulita ni cheseko cha chihela chisandu. Yikashi yacho te yinazale too ni wunga wa kuchinga ni maji a olevwe hanga ahane mulambu wa mbuto, 80 ndoho yikehe ya oru yize te yakulema 10 lia shekele ya too ni insensu, 81 chimbembe wa kuji umuwika, kuji a panga umuwika, mwana panga wa mwaka umuwika hanga ahane ngwe mulambu wa kwocha 82 ni pembe umuwika hanga ahane ngwe mulambu wa kufuka nawo shili. 83 Hakutwala ku chitapo cha mulambu wa sambukila, yahana ngombe aali, kuji a mapanga atano, pembe atano ni kuji a ana mapanga atano a mwaka umuwika. Uno we mulambu uze Aira, mwana wa Ena ahanyine.

84 Yino ye milambu ya kukunjika nayo chilumbilo, yize miata A-Izalele alingile muze achiwayishile: Malonga 12 a prata, mandoho 12 a prata ni mandoho akehe-akehe a oru 12. 85 Longa limuwika lia prata lize te liakulema 130 a shekele, ndoho yimuwika yize te yakulema 70 a shekele, prata yeswe yalemene 2,400 a shekele, kulita ni cheseko cha chihela chisandu. 86 Mandoho akehe-akehe 12 a oru a too ni insensu alemene 10 lia shekele, kulita ni cheseko cha chihela chisandu. Mandoho eswe akehe-akehe a oru te kakulema 120 a shekele. 87 Yimuna waze ahanyine ngwe mulambu wa kwocha kapwile kuji a yimbembe 12, kuji a mapanga 12, kuji a ana mapanga 12 ni kuji a pembe 12 waze ahanyine ngwe mulambu wa kufuka nawo shili. 88 Yimuna waze ahanyine ngwe chitapo cha mulambu wa sambukila kapwile, ngombe 24, kuji a mapanga 60, pembe 60 ni ana mapanga 60 a mwaka umuwika. Uno we mulambu uze ayo ahanyine ha kukunjika chilumbilo muze te hachiwayisa.

89 Mashimbu eswe, muze Mose apwile ni kunjila mu mbalaka ya kulikungulwila hanga ahanjike ni Zambi, iye te kakwivwa liji linakatuka mu chifukilo cha mushete wa Uchela mukachi ka akerupimi aali. Zambi te kakuhanjika nenyi.

8 Yehova yalweza Mose ngwenyi: 2 “Lweza Arone ngwe: ‘Muze mutemuna ndeya, ndeya shimbiali jatamba kutemuna kulutwe lia chikwachilo cha ndeya.’” 3 Chocho, Arone yalinga chino: Yakwachisa ndeya hanga atemune kulutwe lia chikwachilo cha ndeya, ngwe chize Yehova atumine Mose kulinga. 4 Chikwachilo cha ndeya chapwile cha oru, chize ku chishina ndo ku yitemo, kachilingile ni oru yakutatula. Chikwachilo cha ndeya kachilingile kulita ni shimbi yize Yehova ahanyine kuli Mose mu usolwelo.

5 Yehova yalweza nawa Mose ngwenyi: 6 “Handununa A-Levi mukachi ka A-Izalele ni kwapemesa. 7 Yino ye watamba kulinga hanga waapemese: Asapwile meya a kupemesa no shili, katamba kukwala kambu jeswe mu mujimba wo ni tewula, kukosa mazalo jo ni kulipemesa. 8 Ayo manda mwana-ngombe wa kuji ni mulambu wa wunga wa kuchinga ni maji a olevwe, mba yena muwanda mwana-ngombe mukwo wa kuji hanga uhane ngwe mulambu wa kufuka nawo shili. 9 Watamba kusolola A-Levi kulutwe lia mbalaka ya kulikungulwila ni kukunga chikungulwila cheswe cha A-Izalele. 10 Muze musolola A-Levi kuli Yehova, A-Izalele katamba kusayika moko jo hali A-Levi. 11 Arone mahana A-Levi kuli Yehova ngwe mulambu wa kuhungisa wa A-Izalele, mba A-Levi malinga milimo ya Yehova.

12 “Chocho A-Levi masa moko jo ha mitwe ya ana ngombe a kuji, mba malambula umuwika ngwe mulambu wa shili, mukwo ngwe mulambu wa kwocha kuli Yehova, wakufuka nenyi shili ya A-Levi. 13 Muukamanyisa A-Levi kumeso ja Arone ni ana jenyi ni kwahana kuli Yehova akapwe mulambu wa kuhungisa. 14 Watamba kuhandununa A-Levi hakachi ka A-Izalele. Mumu A-Levi mapwa ni jami. 15 Mba A-Levi manjila hanga akalakale mu mbalaka ya kulikungulwila. Chenacho watamba kwapemesa ni kwahana apwe mulambu wa kuhungisa. 16 Mumu ayo hanaahana kuli yami ngwe chawana mukachi ka A-Izalele. Mungwapwisa ni jami mu chihela cha ana eswe atangu A-Izalele. 17 Ana eswe atangu A-Izalele ni a yimuna jo, kali a yami. Hingunaapemesa hanga apwe ni jami ha tangwa lize nashihile ana eswe atangu mu chifuchi cha Engitu. 18 Mungusakula A-Levi mu chihela cha ana eswe atangu A-Izalele. 19 Munguhana A-Levi kuli Arone ni kuli ana jenyi ngwe chawana hakachi ka A-Izalele hanga aalingile milimo mu mbalaka ya kulikungulwila ni kwafukila shili hanga kuchine kupwa chilungo nichimwe hakachi ka A-Izalele nyi makundama mu chihela chisandu.”

20 Mose, Arone ni chikungulwila cheswe cha A-Izalele, yalinga yuma yino kuli A-Levi. A-Izalele yalinga yuma yeswe yize Yehova atumine Mose ha kutwala kuli A-Levi. 21 Chocho, A-Levi yalipemesa ni kukosa mazalo jo. Mba Arone yaahana kuli Yehova ngwe mulambu wa kuhungisa. Arone yafuka shili yo hanga aapemese. 22 Mba A-Levi yanjila hanga alinge milimo yo mu mbalaka ya kulikungulwila kumeso ja Arone ni ana jenyi. Ayo yalinga kuli A-Levi, ngwe chizechene Yehova atumine Mose kulinga.

23 Yehova yamba kuli Mose ngwenyi: 24 “Yino yinatale hali A-Levi: Lunga yoze uli ni miaka 25 hanji kuhiana, malichinga mu chizavu cha waze akukalakala mu mbalaka ya kulikungulwila. 25 Alioze, nyi mahianyisa miaka 50 katamba kukatuka mu chizavu chacho cha milimo, katambile kulinga mulimo niumwe. 26 Iye mahasa kulingila mandumbu jenyi waze akukalakala mu mbalaka ya kulikungulwila, alioze katambile kulinga mulimo niumwe mu mbalaka. Yino ye watamba kulinga ha kutwala kuli A-Levi ni yiteli yo.”

9 Yehova yalweza Mose mu puya ya Sinai ha kakweji mutangu wa mwaka wamuchiali, muze ayo te hatuhuka kulu mu chifuchi cha Engitu, ngwenyi: 2 “A-Izalele katamba kululieka chitapo cha Chizomboka ha mwaka uze hanatese. 3 Nwatamba kuchilulieka ha tangwa lize hanatese, ha tangwa 14 lia kakweji yono, ha chingoloshi ni ufuku. Nwatamba kuchilulieka kulita ni shimbi yeswe ni usongwelo weswe uze hanahane ha kutwala ku Chizomboka.”

4 Mba Mose yalweza A-Izalele hanga alulieke chitapo cha Chizomboka. 5 Chocho, ayo yalulieka chitapo cha Chizomboka ha tangwa 14 lia kakweji mutangu ha kunjila cha tangwa mu puya ya Sinai. A-Izalele yalinga yeswe yize Yehova atumine Mose kulinga.

6 Alioze, kwapwile amwe malunga waze alipwishile a luchisa ha kukwata mufu, kashika kakahashile kululieka chitapo cha Chizomboka ha tangwa liacho. Malunga jacho yaya kuli Mose ni Arone ha tangwa liacho, 7 yamba ngwo: “Twalipwisa a luchisa ha kukwata mufu. Mumu liaka chino muchitukinda kuhana mulambu kuli Yehova hamuwika ni A-Izalele akwo ha tangwa lize hanatese?” 8 Mose yaakumbulula ngwenyi: “Shimbwilenu hano, chitangu mungwivwa yize Yehova mamba ha kutwala kuli yenu.”

9 Yehova yamba kuli Mose ngwenyi: 10 “Lweza A-Izalele ngwe: ‘Mutu mweswawo hakachi kenu hanji wa ku yisemuko yenu malipwisa wa luchisa ha kukwata mufu hanji mapwa mu wenyi kusuku, chipwe chocho katamba kululieka chitapo cha Chizomboka hanga ahane kuli Yehova. 11 Ayo katamba kululieka chitapo cha Chizomboka ha kakweji wamuchiali, ha tangwa 14, ha chingoloshi ni ufuku. Ha tangwa liacho ayo katamba kulia yifwo ya mwana-panga hamwe ni mbolo kujishi futunwiso ni mafwo awisu asasu. 12 Ayo katambile kutulika kulia chacho hanga achilie tangwa likwo, chipwe kumakuna chifwaha nichimwe cha mwana-panga. Ayo katamba kululieka Chizomboka kulita ni shimbi ya Chizomboka. 13 Alioze, nyi mutu kanapeme hanji kayile mu wenyi, mba mehuka kululieka chitapo cha Chizomboka, mutu wacho katamba kumuchiza mukachi ka A-Izalele, mumu kahanyine mulambu kuli Yehova ha shimbu lize hanatese. Mutu wacho katamba kufweta ha shili yenyi.

14 “‘Nyi mukachi kenu muli umwe chilambala, neye katamba kululieka chitapo cha Chizomboka hanga ahane kuli Yehova. Katamba kuchilinga kulita ni shimbi ya Chizomboka ni usongwelo uze anuhele. Kwatamba kupwa wika shimbi yimuwika hali yenu eswe, chipwe kuli chilambala ni kuli Ka-Izalele.’”

15 Ha tangwa lize amikine tabernakulu, lelwa yilifuka tabernakulu, ye mbalaka ya Uchela. Alioze ha ufuku chuma chize chapwile ngwe nguji lia kahia yichipwa helu lia tabernakulu ndo ha chimene. 16 Chuma te chakulingiwa mashimbu eswe chapwile chino: Ha mwalwa, lelwa lie te liakufuka tabernakulu, ha ufuku, chuma chize chapwile ngwe nguji lia kahia. 17 Muze lelwa te liakukatuka ha mbalaka, A-Izalele no te kakukatuka, ha chihela haze lelwa te liakumana, henaho A-Izalele apwile ni kusa chilombo. 18 A-Izalele kapwile ni kukatuka kulita ni shimbi ya Yehova ni kusa chilombo kulita ni shimbi ya Yehova. Muze lelwa te liakumana helu lia tabernakulu, ayo te kakununga mu chilombo. 19 Muze lelwa liapwile ni kumana helu lia tabernakulu ha matangwa anji, A-Izalele te kakwononokena Yehova, te keshi kuya. 20 Ha mashimbu amwe, lelwa te liakumana ha tabernakulu ha matangwa akehe. Ayo te kakununga mu chilombo kulita ni shimbi ya Yehova ni kukatuka kulita ni shimbi ya Yehova. 21 Ha mashimbu amwe, lelwa liapwile ni kumana wika chize ha chingoloshi ndo ha mandemba. Muze lelwa te liakukatuka ha chimene ni ayo te kakukatuka. Chipwe ngwe lelwa mulikatuka ha chimene hanji ha ufuku, ayo te kakukatuka. 22 Muze lelwa te liakununga ha tabernakulu ha matangwa aali chipwe kakweji umuwika hanji kuhiana, A-Izalele te kakununga mu chilombo cho, te keshi kukatuka. Alioze, muze lelwa te liakukatuka ni ayo te kakuya. 23 Ayo te kakusa chilombo kulita ni shimbi ya Yehova ni kukatuka kulita ni shimbi ya Yehova. Ayo kapwile ni kukaula maliji a Yehova kulita ni shimbi yize Yehova ahanyine kupalikila muli Mose.

10 Yehova yalweza Mose ngwenyi: 2 “Linga yitavwi yaali ya prata ya kutatula hanga upwe ni kusanyika nayo chikungulwila ni kuhana utowezo wa kukatwisa chilombo. 3 Muze memba yitavwi yeswe yaali, chikungulwila cheswe cha A-Izalele muchiza kuli yena ku chikolo cha mbalaka ya kulikungulwila. 4 Alioze, nyi membisa wika chitavwi chimuwika, miata ni akwa-lutwe a tununu twa A-Izalele e wika malikungulula kuli yena.

5 “Muze memba chitavwi ni zungo liachikima, chilombo chize chili ku chivumbuko chatamba kukatuka. 6 Muze memba kamuchiali chitavwi ni zungo liachikima, yilombo yili ku uto yatamba kukatuka. Chenacho nwatamba kwimba chitavwi ha mashimbu waze chilombo chimwe muchikatuka.

7 “Ha kusanyika chikungulwila nwatamba kwimba yitavwi, alioze kunwatambile kuyimba ni zungo liachikima. 8 Ana ja sasendote Arone, katamba kwimba yitavwi, yino muyikapwa shimbi ya mutolo kuli yenu ni ku yisemuko yenu yeswe.

9 “Nyi mu chifuchi chenu munwasa jita ni akwa-kole jenu waze ananumwesa lamba linji, nwatamba kwimbisa chitavwi cha zungo lia jita, mba Yehova Zambi yenu manwiwuluka ni kunulamwina kuli akwa-kole jenu.

10 “Ha mashimbu jenu a uwahililo, ha yiwanyino yenu ni ku uputukilo wa tukweji, yenu nwatamba kwimba yitavwi kulutwe lia milambu ya kwocha ni yitapo yenu ya sambukila. Yino muyikapwa chiwulwiso kumeso ja Zambi hali yenu. Yami Yehova, Zambi yenu.”

11 Ha mwaka wamuchiali, ha tangwa 20 lia kakweji wamuchiali, lelwa yilikatuka helu lia tabernakulu ya Uchela. 12 Chocho chikungulwila cheswe cha Izalele yichikatuka ku puya ya Sinai kulita ni shimbi yakukatuka yize aahele, mba lelwa yilimana mu puya ya Parane. 13 Chino che chisuho chitangu chize A-Izalele akatukile kulita ni shimbi ya Yehova yize ahanyine kupalikila muli Mose.

14 Chocho, chizavu cha minyachi yitatu cha ana ja Yunda, yichilianga kukatuka kulita ni yizavu yo, Nasone mwana wa Aminandambe mwe te unasongwela yizavu yacho. 15 Netanele mwana wa Zuare mwe te unasongwela chizavu cha munyachi wa ana ja Yisaka. 16 Eliape mwana wa Helone mwe te unasongwela chizavu cha munyachi wa ana ja Zapulone.

17 Muze tabernakulu ayisokwele, ana ja Ngeshone ni ana ja Merari waze te akumbata tabernakulu, yaya.

18 Mba chizavu cha minyachi yitatu cha ana ja Rupene yichikatuka kulita ni yizavu yo, Elizure mwana wa Sedure mwe te unasongwela yizavu yacho. 19 Selumiele mwana wa Zurisadai mwe te unasongwela chizavu cha munyachi wa ana ja Simeone. 20 Eliasafe mwana wa Duele mwe te unasongwela chizavu cha munyachi wa ana ja Ngate.

21 Chocho, A-Kohate waze te akumbata yikashi ya muma musandu yakatuka. Ayo te katamba kuwana tabernakulu yakusokeka kulu.

22 Mba chizavu cha minyachi yitatu cha ana ja Eframe, yichikatuka kulita ni yizavu yo, Elisama mwana wa Amihude mwe te unasongwela yizavu yacho. 23 Ngamaliele mwana wa Pedazure mwe te unasongwela chizavu cha munyachi wa ana ja Manase. 24 Abidane mwana wa Ngideonyi mwe te unasongwela chizavu cha munyachi wa ana ja Mbenjamine.

25 Chizavu cha minyachi yitatu cha ana ja Ndane yichikatuka kulita ni yizavu yo, yichipwa kunyima lia yilombo yeswe. Aizere mwana wa Amisadai mwe te unasongwela yizavu yacho. 26 Pagiele mwana wa Okra mwe te unasongwela chizavu cha munyachi wa ana ja Ashe. 27 Aira mwana wa Ena mwe te unasongwela chizavu cha munyachi wa ana ja Napatali. 28 Chino che A-Izalele ni yizavu yo apwile ni kwenda.

29 Chocho Mose yalweza Hobabe mwana wa tato-weno Reuele,* mwe Ka-Mindiane ngwenyi: “Tunayi ku chihela chize Yehova ambile ngwenyi: ‘Mungunwahacho.’ Tweya hamuwika ni yetu, mututwama kanawa ni yena mumu Yehova hanalakenya yuma yipema kuli A-Izalele.” 30 Alioze, iye yakumbulula ngwenyi: “Ka, chichi kuya ni yenu. Munguhiluka ku chifuchi chami ni kuli asoko jami.” 31 Mose yamba ngwenyi: “Lisesa tweya kama ni yetu, mumu unanyingika kanawa yihela yize twatamba kutulila mu puya, tweya kama hanga utusongwele. 32 Nyi weza ni yetu, kwamba pundu, mutukusolwela keke yize Yehova matusolwela.”

33 Chocho, yakatuka ku mulundu wa Yehova, yaya wenyi wa matangwa atatu, mushete wa usendo wa Yehova, yatetekela nawo kulutwe mu wenyi wa matangwa atatu hanga awane chihela cha kuhwimina. 34 Ha mashimbu a mwalwa muze ayo akatukile mu chihela chize apwile, lelwa lia Yehova yilipwa hali ayo.

35 Mashimbu eswe te akututulula Mushete, Mose te kakwamba ngwenyi: “Katuka kama Yehova, akwa-kole je eswe alimwange, akwa-kole je eswe akatuke kulutwe.” 36 Muze lelwa te liakumana, iye te kakwamba ngwenyi: “Yehova, hiluka kuli tununu a tununu ja A-Izalele.”

11 Chocho, atu yaputuka kulinyenyeta chinji kumeso ja Yehova. Muze Yehova achivwile, yevwa uli unji. Yehova yahulumwisa kahia mwilu, yikaputuka kulekwoka mukachi ko ni kwocha amwe a kuli ayo ku songo lia chilombo. 2 Muze atu atetele kuli Mose, iye yaliumba kuli Yehova mba kahia yikajima. 3 Kashika, chihela chacho yachiluka jina ngwo, Tabera* mumu kwenako Yehova ahulumwishine kahia.

4 Chocho, yilambala waze apwile mukachi ko yevwa katu ya kulia yifwo, mba A-Izalele yaputuka kulila nawa ni kwamba ngwo: “Iya matwaha kama yifwo hanga tulie? 5 Tunevu usona unji wa yishi waze te twakulia mu Engitu chawana, tusakwa, ulenga, kalumingu ni sopwola jeka ni jeka! 6 Haliapwila hijatuhwa. Kutushi ni chuma chikwo cha kulia, shina wika manaa.”

7 Manaa yapwile yitoma ngwe jimwe mbuto jikehe-jikehe.* 8 Atu te kakulimwanga hanga ayitongone, te kakuyikunga hanga ayifwenye hanji kuyitwa mu chinu, mba mayiteleka hanji kuyilinga mbolo. Manaa te yakuyema ngwe mbolo ja kulinga ni maji a olevwe. 9 Muze mu chilombo te mwakupwa mume ha ufuku, manaa neyo te yakuholoka.

10 Mose yevwa asoko anji kanalila mutu ni mutu ku chikolo cha mbalaka yenyi. Mba Yehova yevwa uli unji ni Mose neye yapihilila. 11 Chocho Mose yamba kuli Yehova ngwenyi: “Mumu liaka wangunehena kapinda mupwahaha? Mumu liaka chapwile ni utayizo wenu, alioze wangutwika yiteli ya atu wano? 12 Shina yami mwe namichine atu wano? Yami mwe naasemene mba wambe ngwe, ambate mukondo ngwe chize ndeji akumbata mwana kemba hanga ngwatwale mu chifuchi chize walishingile kuhana kuli tulamba two? 13 Kulihi munguwana yifwo hanga nguhane kuli atu wano? Mumu kananungu ni kulila kuli yami ni kwamba ngwo: ‘Twehe yifwo hanga tulie!’ 14 Chichi kuhasa kumbata yiteli ya atu wano ukawami, yoka naye kuli yami. 15 Nyi mununga ni kungulinga yuma yino, lisesa ngushihe haliapwila. Nyi nguli ni utayizo kumeso jenu, kanda nungumwesa nawa lamba nilimwe.”

16 Yehova yalweza Mose ngwenyi: “Ngukungile makulwana A-Izalele 70, malunga waze yena unanyingika ngwe, kali makulwana ni alemu ja atu. Atwale mu mbalaka ya kulikungulwila utwame no hamuwika. 17 Mungusunuka, munguhanjika ni yena, mungwanda ndambu ya spiritu yize yili hali yena munguyisa hali ayo, ayo makukwasa kumbata yiteli ya atu wano hanga uhone kuyimbata ukawe. 18 Watamba kulweza atu ngwe: ‘Lipemesenu hanga hamene nukalie yifwo, mumu nwalila kuli Yehova ni kwamba ngwenu: “Iya matwaha yifwo hanga tulie? Mu Engitu tunakapwa kwetu kanawa!” Yehova manwaha yifwo yize munulia. 19 Yifwo yacho kunuchi kayilia ha tangwa limuwika, ha matangwa 2, ha matangwa 5, ha matangwa 10 chipwe ha matangwa 20, 20 alioze munukayilia ha kakweji wamuundu ndo muze muyinutuhukila mu mazulu. Munuyivwila lwaji, mumu nwehuka Yehova yoze uli mukachi kenu. Nwalila kumeso jenyi ni kwamba ngwenu: “Mumu liaka watuchiza ku Engitu?”’”

21 Chocho, Mose yamba ngwenyi: “Atu wano ngunasongwela kali anji, kali 600,000 a malunga anende hashi, chipwe chocho unambe ngwe: ‘Mungwaha yifwo yakumbana yize malia ha kakweji wamuundu!’ 22 Chipwe mashiha mapanga ni ngombe anji, shina makumbana kuli ayo? Chipwe makwata yishi eswe a mu kalunga-lwiji, shina makumbana kuli ayo?”

23 Yehova yamba kuli Mose ngwenyi: “Shina kwoko lia Yehova lili lihi chinji? Haliapwila mumona nyi yuma yize ngunambe muyilingiwa nyi ka.”

24 Chocho, Mose yakatuka yalweza atu maliji a Yehova. Yakunga malunga 70 makulwana ja atu, yaalweza hanga ajingilike mbalaka. 25 Yehova yasunuka kupalikila mu lelwa, yahanjika nenyi, yanda ndambu ya spiritu yize yapwile muli iye yayisa hali makulwana 70. Muze spiritu ayisele hali ayo, yaputuka kusolola yitanga ngwe ya aprofeta, alioze kachilingile wika ha tangwa lize.

26 Hakachi ka malunga waze asakwile, hapwile aali waze te achili mu chilombo, kakayile mu mbalaka. Majina jo kapwile Eldade ni Medade. Spiritu yiyiza hali ayo, yaputuka kusolola yitanga ngwe ya aprofeta mu chilombo. 27 Umwe mukweze yazomboka kuli Mose, yamulweza ngwenyi: “Eldade ni Medade kanasolola yitanga ngwe ya aprofeta mu chilombo!” 28 Chocho, Yoshua mwana wa Nune, yoze wapwile chikwashi wa Mose chize mu ukweze, yamba kuli Mose ngwenyi: “Mwene wami, alweze hanga alitwamine!” 29 Mba Mose yamukumbulula ngwenyi: “Yami chevwile ukwa, mba mumu liaka yena unevu ukwa? Te muchipema chinji nyi atu eswe ja Yehova mapwa aprofeta, nyi Yehova masa spiritu yenyi hali ayo!” 30 Kulutwe lia yino, Mose yahiluka ni makulwana a Izalele mu chilombo.

31 Chocho, fuji ya Yehova yiyichiza ngwali sali lia kalunga-lwiji ni kwaholwela hakamwihi ni chilombo, yalumbama sali lieswe. Mutu te katamba kwenda tangwa lia muundu mba ahiane haze ngwali te analumbama. 32 Mba atu yaputuka kutongona ngwali ha tangwa lieswe ni ha ufuku weswe ni ha tangwa lize liasulileko. Niumwe wa kuli ayo wakungile mushi lia homere* kumi, wakuhi. Ayo yanyika ngwali hakamwihi ni chilombo. 33 Muze yifwo te yichili mu kanwa, ufwatulo wa Yehova hali atu yiwiza, Yehova yashiha anji a kuli ayo.

34 Chocho, chihela chacho yachivuluka ngwo, Kibrote-Hatava, mumu he afunjile atu waze apwile ni usolo upi. 35 Atu yakatuka ku Kibrote-Hatava yaya ku Hazerote, yatwama ku Hazerote.

12 Miriame ni Arone yaputuka kulimika ni Mose mumu lia pwo Ka-Kushe yoze Mose ambachile. 2 Ayo yaputuka kwamba ngwo: “Shina Yehova kahanjika wika ni Mose? Shina kahanjikile nawa ni yetu?” Yuma yeswe te anahanjika, kuma Yehova te kanayivwa. 3 Alioze, Mose kapwile mukwa-kulikehesa chikolo hakachi ka atu eswe hano hashi.

4 Hazehene, Yehova yalweza Mose, Arone ni Miriame ngwenyi: “Tuhukenu yenu eswe atatu hanga nuye ku mbalaka ya kulikungulwila.” Chocho, eswe atatu yatuhuka. 5 Yehova yahulumuka mu nguji lia lelwa, yamana ku chikolo cha mbalaka, yasanyika Arone ni Miriame. Ayo yakundama. 6 Iye yamba kuli ayo ngwenyi: “Lisesa panjikenu maliji jami. Nyi hakachi kenu hali umwe profeta wa Yehova, kachi mungulisolola kuli iye mu usolwelo ni kuhanjika nenyi mu yilota. 7 Alioze, chino chinalise ni kavumbi kami Mose. Iye hingunamwehe mulimo wa kusongwela atu jami eswe A-Izalele. 8 Nakuhanjika nenyi meso ni meso, hi mu yishima ko, iye kakumona yilayi ya Yehova. Mumu liaka kunwevwile woma ha kuhanjika yuma yipi hali kavumbi kami Mose?”

9 Chocho, Yehova yevwa uli unji, mba yaahichika. 10 Lelwa yilikatuka helu lia mbalaka, hazehene, Miriame yakwachika musongo wa mbumba yitoma ngwe neve. Muze Arone atalile kuli Miriame, yamona ngwenyi iye kakwachika musongo wa mbumba. 11 Hazehene, Arone yalweza Mose ngwenyi: “Ngunaliumbu mwata wami! Lisesa, tukonekene kama! Twalinga yuma ya uhepuke. 12 Lisesa, kanda wecha mujimba wenyi upwe ngwe mufu, ngwe mwana yoze aselumuna!” 13 Mba Mose yaputuka kuliumba kuli Yehova ngwenyi: “Zambi, lisesa muuke kama!”

14 Yehova yamba kuli Mose ngwenyi: “Nyi ngwe tato mamufwila mate ku meso, kachi kechi kwivwa sonyi ha matangwa shimbiali? Kashika, musenu haze lia chilombo hanga atwameho matangwa shimbiali ukawenyi; muze matangwa jacho mahwa, mba munumuhilwisa.” 15 Chocho, Miriame yamusa haze lia chilombo ukawenyi hanga alingeho matangwa shimbiali. Ha shimbu liacho atu kakakatukile, yanunga ni kushimbwila ndo muze Miriame ahilukile mu chilombo. 16 Chocho, atu yakatuka ku Hazerote, yasa chilombo cho ku puya ya Parane.

13 Yehova yalweza Mose ngwenyi: 2 “Tumenu malunga hanga endese chifuchi cha Kanana chize munguhana kuli A-Izalele. Nwatamba kutuma lunga umuwika wa munyachi ni munyachi wa tulamba jenu, malunga jacho katamba kupwa miata ja mu usoko.”

3 Chocho, Mose yaatuma kukatuka mu puya ya Parane kulita ni shimbi ya Yehova. Malunga jacho eswe kapwile akwa-lutwe ja A-Izalele. 4 Wano e majina ja malunga jacho: Ku munyachi wa Rupene, Shamua, mwana wa Zakure; 5 ku munyachi wa Simeone, Sefate, mwana wa Hore; 6 ku munyachi wa Yunda, Kalemba, mwana wa Yefune; 7 ku munyachi wa Yisaka, Ingale, mwana wa Yosefwe; 8 ku munyachi wa Eframe, Hosea, mwana wa Nune; 9 ku munyachi wa Mbenjamine, Palite, mwana wa Rafu; 10 ku munyachi wa Zapulone, Ngadiele, mwana wa Sondi; 11 ku munyachi wa Yosefwe, kupalikila muli munyachi wa Manase, Ngadi, mwana wa Susi; 12 ku munyachi wa Ndane, Amiele, mwana wa Ngemali; 13 ku munyachi wa Ashe, Seture, mwana wa Mikele; 14 ku munyachi wa Napatali, Napi, mwana wa Vofshi; 15 ku munyachi wa Ngate, Ngewele, mwana wa Make. 16 Wano e majina ja malunga waze Mose atumine hanga endese chifuchi. Mba Mose yaluka Hosea, mwana wa Nune, jina ngwo, Yoshua.*

17 Muze te anaatumu hanga endese chifuchi cha Kanana, Mose yaalweza ngwenyi: “Yeenu ku Nengeve, mba nukanduke ku chifuchi cha milundu. 18 Nukatala chifuchi chize chapwa, nyi atu jamo kali ni tachi jinji nyi ka, nyi anji hanji akehe; 19 nyi chifuchi chacho chipema nyi chipi, nyi mambonge jamo kakwete yipanga nyi ka. 20 Nyingikenu nyi chifuchi chacho chakwima mbuto nyi ka, nyi muli mitondo nyi ka. Nwatamba kupwa ni hamu hanga nunehe yimwe mihuko ya mu chifuchi chacho.” Mumu te hapwa ha mashimbu a kuhela uva yitangu.

21 Chocho, ayo yaya yendesa chifuchi, chize ku puya ya Zini ndo ku Rehobo, hakamwihi ni Lebo-Hamate. 22 Muze akandukile ku Nengeve, yaheta ku Heprone, kuze te kwatwama A-Ahimane, A-Sheshai, A-Talamai, eswe te A-Anake. Alioze, Heprone kaliangile kuyitunga miaka shimbiali kunyima muze te kanda achitunga Zoane ya mu Engitu. 23 Muze ahetele mu chikulo cha Esekole, yateta mutango wa chichakata cha uva, uze te atamba kumbata kuli malunga aali; yaneha nawa yimwe mihuko ya romana ni makuyu. 24 Ayo yasanyika chihela chacho ngwo, chikulo cha Esekole, mumu lia chichakata cha uva chize A-Izalele atetelemo.

25 Muze te hendesa chifuchi ha matangwa 40, ayo yahiluka. 26 Chocho, ayo yaya kuli Mose ni Arone ni ku chikungulwila cheswe cha A-Izalele mu puya ya Parane ku Kandeshe. Yalweza chikungulwila cheswe yuma yize amwene mu chifuchi chacho, yaasolwela nawa mihuko yize ejile nayo. 27 Yalweza Mose ngwo: “Twanjila mu chifuchi chize watutumanga, mu chifuchi chacho, muli yamwa ni wuchi; yino ye mihuko yize tweza nayo. 28 Alioze atu a mu chifuchi chacho kali yitakame, mambonge jo akolo, kali anene-anene. Twamonamo nawa A-Anake. 29 A-Amaleke katwama mu chifuchi cha Nengeve; A-Hete, A-Yepushe ni A-Amore katwama ku chifuchi cha milundu; A-Kanana katwama hakamwihi ni kalunga-lwiji ni mu chikulo cha lwiji Yordau.”

30 Kalemba yahumikiza atu kumeso ja Mose ngwenyi: “Tuyenu haliapwila lume, kwamba pundu, chifuchi chacho mutuchizuka ni kuchikumba.” 31 Alioze, malunga waze ayile ni Kalemba yamba ngwo: “Kutuchi kuhasa kulimika ni atu a mu chifuchi chacho, mumu kali ni tachi jinji kuhiana yetu.” 32 Ayo yanunga ni kulweza A-Izalele lusango mupi hakutwala ku chifuchi chize ayile ni kwendesa, ngwo: “Chifuchi chize twendesa chili chifuchi chize chakuumbula atu jamo, malunga eswe twamonamo kali anene-anene chinji. 33 Twamonamo yindululu, ana ja A-Anake, a ku munyachi wa yindululu. Ha kwatesa ni yetu twapwanga ngwe mapasu kumeso jo.”

14 Chocho, A-Izalele eswe yaputuka kukololoka ha ufuku wacho ni kulila. 2 A-Izalele eswe yaputuka kulinyenyeta hakutwala kuli Mose ni Arone, chikungulwila cheswe yichilimika ni ayo ni kwamba ngwo: “Kachi tunakafwila kwetu ku Engitu hanji muno mu puya! 3 Mumu liaka Yehova atuneha mu chifuchi chino hanga atushihe ni katana? Mapwo jetu ni ana jetu maambata ngwe funge. Ngwami kachi twahiluka kwetu ku Engitu?” 4 Ayo yamba kuli umwe ni mukwo ngwo: “Tusakulenu umwe kasongo hanga tuhiluke ku Engitu!”

5 Mumu lia chino, Mose ni Arone yafulamana kumeso ja chikungulwila cheswe cha A-Izalele waze te analikungulula. 6 Yoshua, mwana wa Nune, ni Kalemba, mwana wa Yefune, waze apwile hakachi ka waze ayile ni kwendesa chifuchi, yasuwa mazalo jo 7 ni kulweza chikungulwila cheswe cha A-Izalele ngwo: “Chifuchi chize twendesa chili chifuchi chipema chinji. 8 Nyi Yehova mawahilila ni yetu, iye matunjisa mu chifuchi chacho ni kutwahacho, chili chifuchi cha yamwa ni wuchi. 9 Alioze kanda nulimika ni Yehova, chipwe kwivwa woma wa atu a mu chifuchi chacho, mumu mutwakumba. Ayo keshi nawa ni yoze maafunga, Yehova kali ni yetu. Kanda nwevwila woma.”

10 Chikungulwila cheswe yichilitesa kwasa mawe. Mba uhenya wa Yehova yiusoloka kuli A-Izalele eswe mu mbalaka ya kulikungulwila.

11 Chocho Yehova yamba kuli Mose ngwenyi: “Ndo ha shimbu lika atu wano manunga ni kunguhona vumbi? Ndo ha shimbu lika manunga ni kuhona ufulielo muli yami, chipwe ngwe hinalinga yilayi yinji mukachi ko? 12 Mungwatumina yikola ni kwanongesa. Alioze yena mungukupwisa vungu linene lia tachi, kuhiana ayo.”

13 Alioze, Mose yamba kuli Yehova ngwenyi: “Yena wachijile atu je ku Engitu ni ndundo je. Muze A-Engitu mevwa yize hiwalinga, 14 ayo mahetesa lusango wacho kuli atu a mu chifuchi chino. Atu jacho hanevu ngwo, yena Yehova uli mukachi ka A-Izalele, wakulisolola kuli ayo. Hanevu nawa ngwo, yena uli Yehova, lelwa lie lili hali ayo; mwalwa yena wakuya kulutwe lio mu nguji lia lelwa, ha ufuku mu nguji lia kahia. 15 Nyi te mushiha atu wano ha shimbu limuwika, akwa-mavungu waze evwile lufuma we mamba ngwo: 16 ‘Yehova kahashile kutwala atu wano mu chifuchi chize alakenyene kwaha, kashika aashihila mu puya.’ 17 Haliapwila Yehova, lisesa, solola ndundo je jinene, ngwe chize walakenyene muze wambile ngwe: 18 ‘Yehova, keshi kutenuka ni kawashi, zango lienyi kulishi kuhwa, kakukonekena shili ni uhenge, alioze keshi kulengulula yoze uli ni mulonga, kakufwetesa upi wa yisemi hali ana, ha chisemuko chamuchitatu ni chamuchiwana.’ 19 Konekena kama atu wano kulita ni zango lie lize kulishi kuhwa, ngwe chize hiunaakonekena chize ku Engitu ndo musono.”

20 Yehova yamba ngwenyi: “Mungwakonekena kulita ni chize wamba. 21 Alioze, ngunalishingi ngwami, hashi heswe muhazala ni uhenya wa Yehova. 22 Malunga waze amwene uhenya wami ni yilayi yize nalingile mu Engitu ni mu puya, chipwe chocho yanunga ni kungusa mu cheseko ha yisuho kumi, kakapanjikile liji liami, 23 ayo kechi kamona chifuchi chize nalakenyene kuli atato. Waze eswe a kunguhona vumbi kechi kamona chifuchi chacho. 24 Alioze, kavumbi kami Kalemba, kasolwele yitanga yipema, kanungine ni kungukaula ni mbunge yenyi yeswe. Kashika, mungumunjisa mu chifuchi chize ayile, ana jenyi makatwamamo. 25 A-Amaleke ni A-Kanana katwama mu chikulo, kashika hamene nwatamba kuhiluka hanga nuye mu puya, mu jila ya kuya ku Kalunga-Lwiji Muchila.”

26 Chocho Yehova yamba kuli Mose ni kuli Arone ngwenyi: 27 “Ndo ha shimbu lika chikungulwila chino chipi cha A-Izalele muchinunga ni kulinyenyeta hali yami? Hinevwa kulinyenyeta cho. 28 Alweze ngwe: ‘“Yehova kanalishingi ngwenyi, “Mungulinga kuli yenu yize nunambe! 29 Kumunufwila muno mu puya, yenu eswe nuli ni miaka 20 hanji kuhiana waze anakasonekesa, yenu eswe nwalinyenyeta hakutwala kuli yami. 30 Niumwe wa kuli yenu manjila mu chifuchi chize nalakenyene kunwaha hanga nutwamemo, wakuhi. Shina wika Kalemba, mwana wa Yefune ni Yoshua, mwana wa Nune.

31 “‘“Alioze ana jenu, waze nwambile ngwenu matwala ngwe funge, mungukaanjisa mu chifuchi chize yenu nwalituna, ayo makatwamamo. 32 Alioze yenu munufwila muno mu puya. 33 Ana jenu makapwa tufunga mu puya ha miaka 40, ayo makamona lamba mumu lia ukoi wenu, ndo muze yenu eswe munukuwa muno mu puya. 34 Munukamona lamba ha miaka 40 mumu lia uhenge wenu, kulita ni kwalula cha matangwa waze nwendesele chifuchi, matangwa 40, chekwamba, tangwa limuwika mulikalumbunuka mwaka umuwika, mba munukanyingika mumu liaka chili chipi kulimika ni yami.

35 “‘“Yami Yehova, hinahanjika. Chino che mungukalinga ku chikungulwila chino chipi chalimika ni yami: Yenu eswe munukafwila mu puya yino. 36 Malunga waze Mose atumine hanga endese chifuchi, mba chikungulwila yichiputuka kulimika nenyi mumu lia lusango mupi yoze anehene ha kutwala ku chifuchi, 37 ewa, malunga waze anehene lusango mupi ha kutwala ku chifuchi, makaashiha kumeso ja Yehova. 38 Alioze Yoshua, mwana wa Nune, ni Kalemba, mwana wa Yefune, apwile hamuwika ni waze ayile ni kwendesa chifuchi, manunga ni mwono.”’”

39 Muze Mose alwezele A-Izalele eswe yuma yino, ayo yevwa yinyengo yinji. 40 Chikwo nawa, yahinduka chimenemene yaya ku chifuchi cha ku mulundu, yamba ngwo: “Haliapwila mutukanduka ku chihela chize Yehova atulwezanga, mumu twavulumuna.” 41 Alioze, Mose yamba ngwenyi: “Mumu liaka nunehuka shimbi ya Yehova? Kunuchi kukumba. 42 Kanda nukanduka, mumu Yehova keshi ni yenu. Kumakanukumba kuli akwa-kole jenu. 43 A-Amaleke ni A-Kanana kananushimbwila hanga ase jita ni yenu, manushiha ni katana. Mumu nwehuka Yehova, kashika Yehova kechi kupwa ni yenu.”

44 Chipwe chocho, ayo yakalisa mbunge jo, yaya mu chifuchi cha ku mulundu; alioze mushete wa usendo wa Yehova yiununga mu chilombo, hamuwika ni Mose. 45 Chocho, A-Amaleke ni A-Kanana, waze te atwama mu chifuchi cha ku mulundu yaapalumuka, yaashiha ni kwahanga ndo ku Horoma.

15 Yehova yamba kuli Mose ngwenyi: 2 “Lweza A-Izalele ngwe: ‘Muze mununjila mu chifuchi chize mungunwaha hanga nutwamemo 3 ni muze munulambula ngombe, mapanga hanji pembe ngwe mulambu wa kahia kuli Yehova ni milambu ya kwocha hanji chitapo hanga numanunune chilakenyo chalipwila, hanji mulambu wa kuzanga chenu hanji milambu yize nwakuhana ha yiwanyino ya miaka hanga nunyinyise vumba lipema kuli Yehova, 4 yoze mahana mulambu wenyi mahana nawa kuli Yehova mulambu wa wunga wa mbuto, wa chihanda chimuwika cha kumi lia yihanda ya efa ya kuchinga ni chihanda chimuwika cha ku yihanda yiwana ya hine ya maji a olevwe. 5 Ni yena nawa watamba kuhana chihanda chimuwika cha yihanda yiwana ya hine ngwe mulambu wa walwa hamwe ni mulambu wa kwocha hanji chitapo cha mwana panga mweswe. 6 Nyi mulambula mwana panga, watamba kuhana mulambu wa wunga wa mbuto wa yihanda yaali ya ku yihanda kumi ya efa wa kuchinga ni chihanda chimuwika cha ku yihanda yitatu ya hine ya maji a olevwe. 7 Watamba kuhana chihanda chimuwika cha ku yihanda yitatu ya hine ya vinyu ngwe mulambu wa walwa wa vumba lipema kuli Yehova.

8 “‘Alioze nyi mulambula mwana panga ngwe mulambu wa kwocha hanji ngwe chitapo hanga umanunune chimwe chilakenyo chize walingile hanji ngwe chitapo cha sambukila kuli Yehova, 9 mwana panga wacho watamba kumuhana nawa hamwe ni mulambu wa wunga wa mbuto wa yihanda yitatu ya ku kumi lia yihanda ya efa wa kuchinga ni chihanda cha hakachi cha hine ya maji a olevwe. 10 Watamba kuhana nawa chihanda cha hine cha vinyu ngwe mulambu wa walwa, chikapwe mulambu wa kahia wa vumba lipema kuli Yehova. 11 Yino ye nwatamba kulinga ni kuji a ngombe mweswe ni kuji a panga mweswe ni kuji wa mwana panga mweswe ni mwana pembe mweswe. 12 Chipwe ngwe munulambula yimuna anji, yino ye nwatamba kulinga ni chimuna mweswe kulita ni unji wo. 13 Chino che atamba kulinga mutu mweswe yoze wasemukine ngwe Ka-Izalele, katamba kuhana mulambu wa kahia wa vumba lipema kuli Yehova.

14 “‘Chipwe chilambala yoze watwama ni yenu hanji mutu yoze watwama hakachi kenu ha miaka yinji, neye katamba kuhana mulambu wa kahia wa vumba lipema kuli Yehova, katamba kulinga ngwe chize yenu nwakulinga. 15 Yenu akwa-chikungulwila cha Izalele ni chilambala yoze uli mukachi kenu munukaula shimbi yimuwika. Shimbi yacho muyikapwa ya mutolo ku yisemuko yenu yeswe. Chilambala katamba kupwa ngwe yenu kumeso ja Yehova. 16 Kwatamba kupwa shimbi yimuwika ni chiyulo cha upatwilo chimuwika kuli yenu ni kuli chilambala yoze watwama mukachi kenu.’”

17 Yehova yamba kuli Mose ngwenyi: 18 “Lweza A-Izalele ngwe: ‘Muze mununjila mu chifuchi chize ngunanutwala 19 ni kulia mbolo ya mu chifuchi chacho, nwatamba kuhana mulambu kuli Yehova. 20 Nwatamba kulambula mbolo ja jinguluka ja wunga wa mbuto yitangu ya mu munda wenu. Yenu nwatamba kuuhana ngwe chizechene nwakuhana mulambu wa chizungwilo. 21 Mu yisemuko yenu yeswe nwatamba kuhana ngwe mulambu kuli Yehova wunga wa mbuto yenu yitangu.

22 “‘Nyi munuvulumuna ni kulitwamina kukaula shimbi jize Yehova anwaha kupalikila muli Mose, 23 yuma yeswe yize Yehova anulweza kupalikila muli Mose, chize ha tangwa lize Yehova alwezele yisemuko yenu yeswe, 24 nyi munuvulumuna chakuhona kunyingika, chikungulwila cheswe chatamba kuneha mwana ngombe ngwe mulambu wa kwocha wa vumba lipema kuli Yehova, hamuwika ni mulambu wa mbuto ni walwa kulita ni shimbi ni pembe umuwika ngwe mulambu wa shili. 25 Sasendote malambula mulambu wa kufuka nawo shili hali A-Izalele eswe mba ayo maakonekena. Mumu kalinga shili chakuhona kunyingika, kaneha milambu yo, mulambu wa kahia kuli Yehova ni mulambu wa shili kumeso ja Yehova, mumu kalinga shili chakuhona kunyingika. 26 Chikungulwila cheswe cha A-Izalele ni yilambala waze atwama mukachi ko maakonekena, mumu kalinga shili chakuhona kunyingika.

27 “‘Nyi mutu mavulumuna chakuhona kunyingika, katamba kulambula mwana pembe wa mwaka umuwika hanga apwe mulambu wa shili. 28 Sasendote mamulambwila mulambu wa kufuka nawo shili, mumu kavulumuna kumeso ja Yehova chakuhona kunyingika, iye malambula mulambu wa kufuka nawo shili, mba mutu wacho mamukonekena. 29 Kwatamba kupwa shimbi yimuwika kuli yoze malinga shili chakuhona kunyingika, apwe Ka-Izalele chipwe chilambala yoze watwama mukachi ko.

30 “‘Alioze mutu yoze malinga shili ku tachi, apwe Ka-Izalele hanji chilambala, mutu wacho kanashililika kuli Yehova, katamba kumushiha. 31 Amu mutu wacho alengulula liji lia Yehova ni kulituna shimbi yenyi, mutu wacho katamba kumushiha. Shili yenyi yimushate.’”

32 Muze A-Izalele te ali mu puya, yawana umwe lunga kanachaha kunyi ha tangwa lia Sambata. 33 Waze amuwanyine kanachaha kunyi yamutwala kuli Mose, Arone ni ku chikungulwila cheswe. 34 Chocho yamusa mu chimwe chihela hanga ahone kuchina mumu te kanda achinyingika yize mamulinga.

35 Yehova yalweza Mose ngwenyi: “Lunga wacho katamba kumushiha, chikungulwila cheswe chatamba kumwasa mawe haze lia chilombo.” 36 Chocho chikungulwila cheswe yichimutwala haze lia chilombo, yamwasa mawe, yafwa, ngwe chize Yehova atumine Mose kulinga.

37 Yehova yamba kuli Mose ngwenyi: 38 “Lweza A-Izalele ngwe katamba kusa sapo ku songo lia mahina jo, katamba kuchilinga ku yisemuko yo yeswe, katamba nawa kusa wanda wa lauluka helu lia sapo ja ku masongo ja mahina jo. 39 ‘Nwatamba kusa sapo jacho ku songo lia mahina jenu hanga muze munujimona nwiwuluke shimbi jeswe ja Yehova ni kujikaula. Kanda nukaula mbunge yenu chipwe meso jenu, mumu ye yinanutwala kulinga ukoi* wa ku spiritu. 40 Chino muchinukwasa kwiwuluka shimbi jami jeswe ni kujikaula mba nupwe asandu kuli Zambi yenu. 41 Yami nguli Yehova Zambi yenu, yoze wanuchijile mu chifuchi cha Engitu hanga ngupwe Zambi yenu. Yami nguli Yehova Zambi yenu.’”

16 Chocho Kora mwana wa Izehare, mwana wa Kohate, mwana wa Levi, yalichinga ni Ndatane, Apirame ana ja Eliape ni One mwana wa Pelete, ana ja Rupene. 2 Ayo ni A-Izalele akwo 250, miata akusakula mu chikungulwila, malunga a lufuma, yalimika ni Mose. 3 Chocho, yalichinga hanga alimike ni Mose ni Arone, yamba ngwo: “Kutwanuzangile nawa, chikungulwila cheswe chili chisandu, atu eswe, Yehova kali mukachi ko. Mba mumu liaka nunalise helu lia chikungulwila cha Yehova?”

4 Muze Mose achivwile, hazehene yafulamana hashi. 5 Chocho yalweza Kora ni eswe waze apwile sali lienyi ngwenyi: “Hamene chimene Yehova masakula yoze ni wenyi, yoze musandu ni yoze mahasa kukundama kuli iye. Yoze iye masakula mwe makundama kuli iye. 6 Yena Kora ni eswe waze anakukwasa, lingenu chino: Andenu yikwachilo ya insensu, 7 hanga hamene nukasemo kahia ni insensu kumeso ja Yehova, mba mutu yoze Yehova masakula kali musandu. Kwahwa, yenu ana ja A-Levi!”

8 Mose yamba kuli Kora ngwenyi: “Lisesa panjikenu, yenu ana ja A-Levi. 9 Shina chili chuma chikehe kuli yenu kumona Zambi ya Izalele manuhandununa ku chikungulwila cha A-Izalele ni kunwecha nukundame kuli iye hanga nulinge milimo ya Yehova mu tabernakulu ni kumulingila kumeso ja atu? 10 Zambi kanutayiza hanga nukundame kuli iye hamwe ni mandumbu jenu eswe, ana ja A-Levi, haliapwila nunazange anwehe nawa usasendote nyi? 11 Yena Kora ni eswe waze anakukwasa, nunalimika ni Yehova. Mba hakutwala kuli Arone, yika alinga hanga nulinyenyete hakutwala kuli iye?”

12 Kulutwe lia yino, Mose yatuma kusanyika Ndatane ni Apirame, ana ja Eliape, alioze ayo yamba ngwo: “Kutuchi kuyako! 13 Shina chili chamokomoko kuli yena kutuchiza mu chifuchi cha yamwa ni wuchi hanga utushihile mu puya yino? Haliapwila unazange nawa kupwa mwata hali yetu nyi? 14 Yena kuwatunehene mu chifuchi cha yamwa ni wuchi, chipwe kutwaha minda ni minda ya vinyu ngwe chihinga. Haliapwila unazange kupupuchisa meso ja malunga wano nyi? Kutuchi kuyako!”

15 Chocho Mose yevwa uli unji, yalweza Yehova ngwenyi: “Kanda utayiza mulambu wo wa mbuto. Yami chatambwile kuli ayo chipwe chimbulu umuwika, chipwe kulinga upi kuli umwe wa kuli ayo.”

16 Mose yalweza Kora ngwenyi: “Hamene soloka kumeso ja Yehova ni eswe waze anakukwasa, yena, ayo ni Arone nwatamba kusoloka. 17 Mutu ni mutu wa kuli yenu, katamba kukwata chikwachilo chenyi cha insensu ni kusamo insensu, mutu ni mutu masolola chikwachilo chenyi cha insensu, malunga waze anakukwasa makwata 250 yikwachilo ya insensu kumeso ja Yehova. Ayo malichinga hali yena ni Arone, mutu ni mutu ni chikwachilo chenyi cha insensu.” 18 Mutu ni mutu yanda chikwachilo chenyi cha insensu, yasamo kahia ni insensu, yamana ku chikolo cha mbalaka ya kulikungulwila hamwe ni Mose ni Arone. 19 Muze Kora akungulwile yikwashi jenyi hanga alimike no ku chikolo cha mbalaka ya kulikungulwila, uhenya wa Yehova yiusoloka ku chikungulwila cheswe.

20 Yehova yamba kuli Mose ni Arone ngwenyi: 21 “Lihandununenu ni chizavu chino hanga nguchinongese ha chisuho chimuwika.” 22 Chocho, Mose ni Arone yafulamana hashi, yamba ngwo: “Zambi yami, Zambi ya spiritu ya atu eswe, shina muvwila chikungulwila chino cheswe uli mumu lia shili ya mutu umuwika?”

23 Mba Yehova yalweza Mose ngwenyi: 24 “Lweza chikungulwila cheswe ngwe: ‘Sosolokenu ku mbalaka ya Kora, Ndatane ni Apirame!’”

25 Chocho Mose yaya kuli Ndatane ni Apirame ni makulwana a mu Izalele yaya hamwe nenyi. 26 Mose yalweza chikungulwila ngwenyi: “Lisesa, katukenu ku mbalaka ja malunga wano api, kanda nukwata ku chuma nichimwe cha ayo hanga achine kununongesa mumu lia shili yo.” 27 Hazehene ayo yakatuka ku mbalaka ya Kora, Ndatane ni Apirame. Ndatane ni Apirame yatuhuka mu mbalaka jo, yamana ku chikolo hamwe ni mapwo jo, ana jo a makulwana ni ana-kemba.

28 Mose yamba ngwenyi: “Mumu lia chino, munukanyingika ngwenu Yehova mwe wangutuma hanga ngulinge yuma yino yeswe, yuma yino kuyakatukile mu manyonga jami: 29 Nyi ayo mafwa ngwe chize atu eswe akufwa, nyi mamona lamba ngwe lize malunga eswe akumona, chino muchilumbunuka ngwo, hi Yehova ko wangutuma. 30 Alioze, nyi Yehova malinga chuma chakukomwesa kuli ayo ni hashi muhazuluka ni kwamina eswe ni yikumba yo, mba mapalumuka ni mwono mu Fuka,* yenu mununyingika ngwenu malunga wano kahona Yehova vumbi.”

31 Muze ahwishile kuhanjika maliji wano, hashi yihazuluka. 32 Hashi yihazuluka, yihaamina hamwe ni akwa-zuwo lio ni yikumba yo yeswe ni eswe waze apwile ni kukwasa Kora. 33 Chocho, ayo ni eswe waze te akwakwasa, yapalumuka a mwono mu Fuka, yaashikila mu mavu, chocho ayo yakuwa mukachi ka chikungulwila. 34 Mumu lia kuteta cho, A-Izalele waze eswe apwileho yachina ni kwamba ngwo: “Ni yetu tunevu woma ngwetu, hashi muhatumina.” 35 Hazehene Yehova yatuma kahia, yikashiha malunga 250 waze te analambula insensu.

36 Yehova yamba kuli Mose ngwenyi: 37 “Lweza Eleazare mwana wa sasendote Arone hanga achize yikwachilo ya insensu ha kahia, mumu yili yisandu. Mulweze nawa hanga aye ni kumwangina uto kusuku. 38 Yikwachilo ya insensu ya malunga waze avulumuna ni kufweta ni mwono wo, nwatamba kuyitatula hanga nufuke nayo chilumbilo mumu kayisolola kuli Yehova, hiyapwa yisandu. Yikwachilo yacho yatamba kupwa chilayi kuli A-Izalele.” 39 Chocho sasendote Eleazare, yakwata yikwachilo ya insensu ya unengu yize asolwele kuli waze ochele, yayitatula yafuka nayo chilumbilo, 40 ngwe chize Yehova aatumine kupalikila muli Mose. Chino chapwile chiwulwiso kuli A-Izalele ngwo, mutu yoze keshi ni utayizo, yoze hi wa ku munyachi wa Arone ko, katambile kukundama ni kwocha insensu kuli Yehova. Chikwo nawa, niumwe wa kuli ayo katambile kwimbulula Kora ni waze amukwashile.

41 Mukwachako, chikungulwila cheswe cha Izalele yichiputuka kulinyenyeta hali Mose ni Arone ni kwamba ngwo: “Yenu e nwashiha atu ja Yehova.” 42 Muze chikungulwila chalikungulwile hanga chilimike ni Mose ni Arone, yatala ku mbalaka ya kulikungulwila, yamona lelwa te hiliafuka mbalaka, mba uhenya wa Yehova yiuputuka kusoloka.

43 Mose ni Arone yaya kulutwe lia mbalaka ya kulikungulwila, 44 Yehova yalweza Mose ngwenyi: 45 “Katukenu mukachi ka chikungulwila chino hanga nguchinongese.” Chocho, ayo yafulamana hashi. 46 Mose yalweza Arone ngwenyi: “Anda chikwachilo cha insensu sakoho kahia ka ha chilumbilo ni insensu, yako kawashi-washi hanga ufuke shili ya chikungulwila, mumu Yehova hevwa uli. Musongo hiwaputuka.” 47 Hazehene, Arone yanda chikwachilo cha insensu ngwe chize Mose amulwezele, yazomboka mukachi ka chikungulwila, alioze musongo te hiwaputuka kulu. Yasa insensu mu chikwachilo yaputuka kufuka shili ya atu. 48 Yamana mukachi ka afu ni akwa-mwono, chocho musongo yiuhwa. 49 Waze afwile mumu lia musongo kapwile 14,700 kuwezaho nawa waze afwile mumu lia Kora. 50 Muze Arone afunyine kuli Mose ku chikolo cha mbalaka ya kulikungulwila, musongo te hiwahwa kulu.

17 Yehova yalweza Mose ngwenyi: 2 “Lweza A-Izalele hanga mutu ni mutu anehe lukanda* umuwika wa munyachi wa tato, wa alemu ha minyachi ya tato, kanda jeswe mujipwa 12. Soneka jina lia mutu ni mutu ha lukanda wenyi. 3 Watamba kusoneka jina lia Arone ha lukanda wa A-Levi, mumu kuli lukanda wa mwata ni mwata. 4 Sako kanda jacho mu mbalaka ya kulikungulwila kulutwe lia mushete wa Uchela, kuze nakulisolola kuli yenu matangwa eswe. 5 Lukanda wa mutu yoze mungusakula masoka mafwo, chocho munguholesa kulinyenyeta hakachi ka Izalele ni yami ni yenu.”

6 Chocho Mose yahanjika ni A-Izalele, mba miata eswe yahana kanda jo, mwata ni mwata wa minyachi ya tato yahana lukanda umuwika, kanda jeswe japwile 12 mba lukanda wa Arone kapwile mukachi ka kanda jo. 7 Mose yasa kanda jacho kumeso ja Yehova mu mbalaka ya Uchela.

8 Mukwachako, Mose yanjila mu mbalaka ya Uchela, yamona lukanda wa Arone wa ku vungu lia Levi, hasoka mafwo, yitemo ni yitota ya amendoa yize hiyahia. 9 Mose yaneha haze kanda jeswe jize japwile kumeso ja Yehova kuli ana ja Izalele. Ayo yahengwola kanda jacho, mutu ni mutu yanda lukanda wenyi.

10 Yehova yamba kuli Mose ngwenyi: “Funyisa lukanda wa Arone mu mushete wa Uchela hanga akapwe chilayi kuli yihulia eche kulinyenyeta-nyenyeta hakutwala kuli yami ahone kufwa.” 11 Kawashi-washi Mose yalinga yize Yehova amulwezele. Chocho yalinga.

12 Mba A-Izalele yalweza Mose ngwo: “Haliapwila mutufwa kwetu, mututoka, yetu eswe mutufwa! 13 Mweswawo makundama ku tabernakulu ya Yehova, kumafwa! Shina yetu eswe che mutufwa?”

18 Yehova yalweza Arone ngwenyi: “Yena, ana je ni munyachi we munumona lamba nyi nwavulumuna shimbi yeswayo ya mu chihela chisandu, yena ni ana je munumona lamba nyi nwavulumuna shimbi ya usasendote. 2 Sanyika nawa mandumbu je a munyachi wa Levi, munyachi wa kalamba ke hanga alichinge ni yena, akulingile yena ni ana je mu mbalaka ya Uchela. 3 Ayo makukwasa ku mulimo we ni mulimo wa mu mbalaka. Alioze katambile kukundama ku yikashi ya muma musandu ni ya ku chilumbilo hanga yenu ni ayo nuchine kufwa. 4 Ayo malichinga ni yena ni kulinga milimo yo mu mbalaka ya kulikungulwila ni milimo yeswe ya mu mbalaka, mutu yoze keshi ni utayizo, katambile kukundama kuli yenu. 5 Yenu nwatamba kulinga milimo yenu ya muma musandu ni ya ku chilumbilo hanga ufwatulo wami uchine kwiza hali A-Izalele. 6 Yami mwene hinahandununa mandumbu je, A-Levi, mukachi ka A-Izalele apwe chawana kuli yenu. Ayo hanaahana kuli Yehova hanga alinge milimo ya mu mbalaka ya kulikungulwila. 7 Yena ni ana je nuli ni mulimo wa usasendote hakutwala ku chilumbilo ni yize yili kunyima lia chikalakala cha hina, yenu nwatamba kulinga mulimo wacho. Hingunanwehe mulimo wa usasendote ngwe chawana, mutu yoze keshi ni utayizo nyi makundamako, katamba kumushiha.”

8 Yehova yalweza nawa Arone ngwenyi: “Yami nakwaha mulimo wakutambula milambu yize akuneha kuli yami. Yena ni ana je nanwaha chihanda cha mutolo, chihanda cha yuma yeswe yisandu yize A-Izalele akulambula kuli yami. 9 Yino ye muyipwa ya yena hakachi ka milambu yisandu yakuhana ha kahia: Milambu yeswe yize ayo mahana, kuchingaho milambu ya mbuto, milambu ya shili ni milambu ya uhenge yize malambula kuli yami. Milambu yino yili yisandu kuli yena ni kuli ana je. 10 Watamba kuyilila muma musandu mwahiana. Malunga eswe mahasa kuyilia. Kumuyikapwa yuma yisandu kuli yena. 11 Yino nawa nayihana kuli yena: Yawana yize A-Izalele mahana hamwe ni milambu yeswe ya kuhungisa. Yami hinayihana kuli yena, kuli ana je a malunga ni a mapwo ngwe chihanda chenu cha mutolo. Mweswawo yoze unalinanga ku zuwo lie mahasa kuyilia.

12 “Mungukwaha mihuko yitangu yize ayo mahana kuli Yehova, maji apema a olevwe, vinyu yaha yipema ni mbuto. 13 Mihuko yeswe yitangu ya mu chifuchi cho yize hiyahia maneha kuli Yehova, muyikapwa ni yenu. Mweswawo yoze unalinanga ku zuwo lie mahasa kuyilia.

14 “Chuma cheswe chize A-Izalele mahana kuli Zambi chatamba kupwa cha yena.

15 “Mwana mutangu mweswe wa mutu hanji wa chimuna yoze mahana kuli Yehova, katamba kupwa niwe. Alioze, watamba kutayiza ndando ya ukuule ya mwana mutangu wa mutu ni mwana mutangu wa chimuna yoze wa luchisa. 16 Nyi kali ni kakweji umuwika hanji kuhiana, watamba kumukuula ni ndando yize hanatese ya shekele jitano ja prata, kulita ni shekele ya mu chihela chisandu. Chekwamba 20 a ngera.* 17 Alioze kanda ukuula mwana mutangu wa ngombe, wa panga, chipwe mwana mutangu wa pembe. Ayo kali asandu. Yena watamba kusapwila manyinga jo ha chilumbilo ni kwocha maji jo ngwe mulambu wa kahia wa lupembo mupema kuli Yehova. 18 Yifwo yatamba kupwa ya yena. Chipwe pambo lize akusolola ngwe mulambu wakuhungisa ni kulu lia utata, yeswe yatamba kupwa ya yena. 19 Mulambu weswe usandu uze A-Izalele mahana kuli Yehova, munguuhana kuli yena, kuli ana je a malunga ni a mapwo. Chiyulo chino muchinunga ndo ku miaka ya mutolo. Uno uli usendo wa mutolo uze Yehova alinga ni yena ni ana je.”

20 Yehova yalweza Arone ngwenyi: “Yena kuuchi kupwa ni chihinga mu chifuchi cho, nichimwe chihanda cha chifuchi cho muchipwa cha yena chakuhi. Yami nguli chihanda che ni chihinga che mukachi ka A-Izalele.

21 “Tala, ngunahana kuli ana ja A-Levi, yihanda yeswe ya kumi mu Izalele yikapwe chihinga ha milimo yize nwakulinga mu mbalaka ya kulikungulwila. 22 A-Izalele katambile nawa kukundama ku mbalaka ya kulikungulwila, nyi machilinga mavulumuna ni kufwa. 23 A-Levi ene e atamba kulinga milimo mu mbalaka ya kulikungulwila, ayo e mamona lamba ha uhenge weswe uze malinga. Yino yili shimbi ya mutolo ku yisemuko yenu yeswe. Ayo katambile kutambula chihinga nichimwe hakachi ka A-Izalele. 24 Munguhana ngwe chihinga kuli A-Levi, chihanda cha kumi chize A-Izalele malambula kuli Yehova. Kashika ngunaalweze ngwami: ‘Ayo katambile kupwa ni chihinga nichimwe mukachi ka A-Izalele.’”

25 Yehova yalweza Mose ngwenyi: 26 “Yena watamba kulweza A-Levi ngwe: ‘Yenu munutambula yihanda ya kumi kuli A-Izalele yize ngunanwehe ngwe chihinga. Mu yihanda ya kumi yize ngunanwehe, nwatamba kwandamo chihanda cha kumi hanga nuhane ngwe mulambu kuli Yehova. 27 Chihanda chacho muchipwa mulambu wenu, muchipwa ngwe mbuto ya mu chizungwilo chenu, kwoka cha vinyu mu ukamino wenu hanji cha maji a olevwe. 28 Chocho, ni yenu munuhana mulambu kuli Yehova ha yihanda yeswe ya kumi munutambula kuli A-Izalele. Ha yihanda yacho ya kumi yenu nwatamba kuhana kuli sasendote Arone mulambu uze uli wa Yehova. 29 Yenu munukahana kuli Yehova mulambu wa milali yeswe ngwe chuma chisandu, yuma yipema ha yawana yeswe yize akunwaha.’

30 “Alweze nawa ngwe: ‘Muze munulambula yuma yipema yahiana, yize muyisalaho, yenu A-Levi yimonenu ngwe mbuto ya mu chizungwilo chenu, mbuto ya ukamino wenu wa vinyu hanji ya maji a olevwe. 31 Yenu ni akwa-zuwo lienu munuhasa kuyilila ku chihela cheswacho, mumu yili fweto yenu ha mulimo uze nwakulinga mu mbalaka ya kulikungulwila. 32 Nyi munulambula yuma yipema yahiana, yenu kunuchi kulinga shili hakutwala ku chikuma chino, kanda nupihisa yuma yisandu ya A-Izalele, kuchina munufwa.’”

19 Yehova yalweza nawa Mose ni Arone ngwenyi: 2 “Yino ye shimbi yize Yehova ahana ngwenyi: ‘Lweza A-Izalele hanga anunehene chimbembe wa chihwo muchila mupema, yoze keshi kapalia, yoze kanda achimusa kanga. 3 Nwatamba kumuhana kuli sasendote Eleazare; iye mamutwala haze lia chilombo, mba mamushihila kumeso jenyi. 4 Chocho, sasendote Eleazare masa munwe wenyi mu manyinga ni kwasapwila yisuho shimbiali ku chikolo cha mbalaka ya kulikungulwila. 5 Chimbembe wacho mamwocha kumeso jenyi. Kupu lienyi, yifwo, manyinga ni ufwachi mayochela hamuwika. 6 Sasendote manda mutondo wa sedru, chisapo ni hina lichila, yeswe mayimbila haze anochela mwe chimbembe. 7 Kulutwe lia yuma yino, sasendote makosa mazalo jenyi ni kusana meya, mba manjila mu chilombo; alioze sasendote manunga wa luchisa ndo ufuku.

8 “‘Mutu yoze wocha chimbembe, makosa mazalo jenyi ni kusana, neye manunga wa luchisa ndo ufuku.

9 “‘Lunga yoze unapeme makunga uto wa chimbembe ni kuusa mu chihela chipema haze lia chilombo. Chikungulwila cha Izalele chatamba kufunga uto wacho hanga auchinge mu meya akupemesa no akwa-luchisa. Uno uli mulambu wa shili. 10 Yoze makunga uto wa chimbembe, katamba kukosa mazalo jenyi ni kupwa wa luchisa ndo ufuku.

“‘Yino muyikapwa shimbi ya mutolo kuli A-Izalele ni kuli yilambala waze atwama mukachi ko. 11 Yoze makwata mufu mapwa wa luchisa ha matangwa shimbiali. 12 Iye katamba kulipemesa ni meya a kulipemesa no ha tangwa liamuchitatu, mba ha tangwa liamuchishimbiali mapema. Alioze, nyi kalipemesene ha tangwa liamuchitatu, ha tangwa liamuchishimbiali kechi kapema. 13 Mweswawo makwata mufu, nyi kalipemesene mapihisa tabernakulu ya Yehova. Mutu wacho katamba kumushiha. Iye manunga wa luchisa, mumu kamusapwilile meya akupemesa no.

14 “‘Yino ye shimbi nwatamba kukaula muze umwe mutu mafwila mu mbalaka: Yoze manjilamo ni yoze ulimo, ayo eswe katamba kupwa a luchisa ha matangwa shimbiali. 15 Yikwachilo yeswe kuyishi yifukilo, muyipwa ya luchisa. 16 Mweswawo uli mu yambu nyi makwata mutu yoze ashiha ni katana, mufu, chifwaha cha mufu, hanji ha fuka, mapwa wa luchisa ha matangwa shimbiali. 17 Mukwa-luchisa katamba kumwanjila ndambu ya uto wa mulambu wa shili uze ocha, katamba kuusa mu chikashi ni kuwezaho meya waze anda mu chikwachilo. 18 Mba lunga yoze unapeme manda chisapo machichupika mu meya masapwila meya jacho ha mbalaka, ha yikwata, hali atu waze te alimo, hali yoze wakwata yifwaha, hali mutu yoze ashiha, hali mufu hanji ha fuka. 19 Yoze unapeme masapwila meya kuli mukwa-luchisa ha tangwa liamuchitatu ni ha tangwa liamuchishimbiali; mba ha tangwa liamuchishimbiali mamupemesa ku shili. Chocho, mukwa-luchisa makosa mazalo jenyi ni kusana, ha ufuku iye mapema.

20 “‘Alioze mukwa-luchisa yoze kalipemesene, katamba kumuchiza mu chikungulwila, mumu kapihisa muma musandu mwa Yehova. kamusapwilile meya a kupemesa no, kashika kali wa luchisa.

21 “‘Yino muyikapwa shimbi ya mutolo kuli ayo: Yoze masapwila meya a kulipemesa no katamba kukosa mazalo jenyi, yoze makwata meya a kulipemesa no, makapwa wa luchisa ndo ha ufuku. 22 Chuma cheswacho chize mukwa-luchisa makwata, necho muchipwa cha luchisa, mutu yoze machikwata neye mapwa wa luchisa ndo ha ufuku.’”

20 Ha kakweji mutangu, chikungulwila cheswe cha A-Izalele yichiheta mu puya ya Zini, yichitwama mu Kandeshe. Mwenamo Miriame afwilile ni kumufunda.

2 Atu kakapwile ni meya, kashika ayo yalichinga hanga alimike ni Mose ni Arone. 3 Atu yazwelesa Mose ni kwamba ngwo: “Kachi ni yetu twafwile kwetu muze mandumbu jetu afwile kumeso ja Yehova! 4 Mumu liaka yenu nwaneha chikungulwila cha Yehova mu puya yino, hanga yetu ni yimuna jetu tufwile muno? 5 Mumu liaka nwatuchijile ku Engitu ni kutuneha ku chihela chino chipi? Chino hi chihela ko cha kulimina, chipwe kutumba makuyu, chipwe mitondo ya uva, chipwe romana ni e meya a kunwa keshiko.” 6 Chocho, Mose ni Arone yakatuka mukachi ka chikungulwila, yaya ku chikolo cha mbalaka ya kulikungulwila yafulamana hashi, mba uhenya wa Yehova yiuputuka kusoloka kuli ayo.

7 Mba Yehova yalweza Mose ngwenyi: 8 “Anda lukanda, kungulula chikungulwila, yena ni yayenu Arone. Hanjikenu ku liwe lize lili kumeso jo hanga lituhwise meya; mba yenu munutuhwisa meya mu liwe hanga atu ni yimuna jo anwe.”

9 Kashika, Mose yanda lukanda yoze wapwile kumeso ja Yehova, ngwe chize iye amutumine. 10 Mba Mose ni Arone yasanyika chikungulwila kulutwe lia liwe, iye yamba ngwenyi: “Haliapwila panjikenu, yenu yihulia! Kumana nunazange hanga tunutuhwishile meya mu liwe lino?” 11 Chocho, Mose yolola kwoko lienyi, yalamba ku liwe ni lukanda wenyi ha yisuho yaali, ku liwe yikuputuka kufwambuka meya anji, mba atu ni yimuna jo yaputuka kunwa meya.

12 Kulutwe lia yuma yino, Yehova yalweza Mose ni Arone ngwenyi: “Amu kunwangufulielele chipwe kungulemesa kumeso ja A-Izalele, yenu kunuchi katwala chikungulwila chino mu chifuchi chize mungukaaha.” 13 Wano kali meya a Meripa, ha chihela haze A-Izalele alimikine ni Yehova, mba iye yalipwisa musandu hakachi ko.

14 Kukatuka ku Kandeshe, Mose yatuma ngendeshi kuli mwanangana wa Endome hanga amulweze ngwo: “Chocho anambe mwana-kwenu Izalele ngwenyi: ‘Yenu nunanyingika kanawa lamba lieswe lize twamona. 15 Tulamba jetu kayile ku Engitu, yitutwama ku Engitu ha miaka yinji, mba A-Engitu yatumwesa lamba hamwe ni tulamba jetu. 16 Yituteta kuli Yehova, iye yatwivwa, yatuma mungelo wenyi yoze watuchijile ku Engitu; haliapwila tuli muno mu Kandeshe, mbonge yize yili mu chifuchi che. 17 Kashika, lisesa tweche kama tupalikile mu chifuchi che. Kutuchi kupalikila mu minda hanji mu minda ya uva, chipwe kunwa meya a mu mashima jenu. Mutupalikila mu tapalo lia wanangana, kutuchi kuhambuluka chipwe ku sali lia utata hanji ku sali lia umama, ndo muze mutuhichika chifuchi che.’”

18 Alioze, Endome yamulweza ngwenyi: “Yena kuuchi kupalikila mu chifuchi chetu, nyi wachilinga munguya kulimika ni yena ni katana.” 19 Chocho A-Izalele yamulweza ngwo: “Mutupalikila mu tapalo. Nyi yetu ni yimuna jetu mutunwa meya a mu chifuchi chenu, mutwafweta. Chuma tunazange wika chili kupalika.” 20 Chipwe chocho iye yamba ngwenyi: “Yenu kunuchi kupalika.” Mba Endome ni maswalale anji a ndundo yaya ni kulitakana no. 21 Endome kakatayijile hanga A-Izalele apalikile mu chifuchi chenyi. Chocho, A-Izalele yapalikila kweka.

22 Chikungulwila cheswe cha A-Izalele yichikatuka mu Kandeshe, yichiheta ku Mulundu wa Hore. 23 Yehova yalweza Mose ni Arone ku Mulundu wa Hore mu njiza ya chifuchi cha Endome ngwenyi: 24 “Arone kumafwa ni kumufunda ngwe tulamba jenyi. Iye kechi kanjila mu chifuchi chize mungukahana kuli A-Izalele, mumu yenu nwalimikanga ni shimbi jami hakutwala ku meya a Meripa. 25 Twala Arone ni mwanenyi Eleazare helu lia Mulundu wa Hore. 26 Zula mazalo ja Arone hanga waajike mwanenyi Eleazare, mba Arone mafwila hazehene.”

27 Mose yalinga ngwe chize Yehova amutumine. Ayo yanyina ha Mulundu wa Hore kumeso ja chikungulwila cheswe. 28 Chocho, Mose yazula mazalo ja Arone, yaajika mwanenyi Eleazare. Mba Arone yafwila hazehene. Mose ni Eleazare yapalumuka ku mulundu. 29 Muze chikungulwila cheswe chamwene ngwo, Arone hafwa, A-Izalele eswe yalila Arone ha matangwa 30.

21 Muze mwanangana Arata, Ka-Kanana, yoze watwama ku Nengeve evwile ngwo, A-Izalele kanejila mu jila ya Atirama, iye yaya ni kwasa jita ni A-Izalele, yatwala amwe mu undungo. 2 Chocho, A-Izalele yalakenya kuli Yehova ngwo: “Nyi mukunjika atu wano mu moko jetu, mutunongesa mambonge jo.” 3 Yehova yapanjika A-Izalele, yakunjika A-Kanana mu moko jo. Mba A-Izalele yashiha A-Kanana ni kunongesa mambonge jo. Kashika, chihela chacho yachivuluka ngwo, Horoma.

4 Muze akatukile ku Mulundu Hore, ayo yanunga wenyi wo mu jila ya kuya ku Kalunga-Lwiji Muchila hanga ajinge chifuchi cha Endome, alioze atu yahonga chinji mumu lia wenyi. 5 Atu yaputuka kulimika ni Zambi ni Mose ha kwamba ngwo: “Mumu liaka nunakatuchiza ku Engitu hanga tufwile muno mu puya? Muno kulia kuchishimo chipwe meya, ni ye mbolo ayi hiyatukenya.” 6 Yehova yatuma tupela a ulembe hanga asume atu. Chocho, A-Izalele anji yafwa.

7 Kashika, atu yaya kuli Mose, yamba ngwo: “Twavulumuna ha kulimika ni Yehova ni ha kulimika ni yena. Tulembele kama kuli Yehova hanga achize tupela wano mukachi ketu.” Mba Mose yalembela atu. 8 Yehova yalweza Mose ngwenyi: “Linga umwe kapela unalifu ni kapela wa ulembe hanga umuzezeleke ku mutondo usuku. Muze mutu mamusuma kuli kapela, katamba kutala kuli kapela wacho mba anunge ni mwono.” 9 Hazehene, Mose yalinga kapela wa unengu, yamuzezeleka ku mutondo. Muze mutu te akumusuma kuli kapela, mba matala kuli kapela wa unengu, iye te kakununga ni mwono.

10 A-Izalele yanunga ni wenyi wo, yasa chilombo cho mu Obote. 11 A-Izalele yakatuka ku Obote, yasa chilombo cho ku Iye-Aparime mu puya yalisulangana ni Moape, ku chivumbuko. 12 Ayo yakatuka kuze apwile, yanunga wenyi, mba yasa chilombo cho mu chikulo cha Zerede. 13 Yakatuka ku Zerede yanunga wenyi, yasa chilombo cho mu sali lia Arnone, mu puya yize yinalitande ndo mu njiza ya A-Amore; mumu Arnone yapwile usulilo wa njiza ya Moape, hakachi ka Moape ni A-Amore. 14 Kashika mukanda wa Jita ya Yehova unatongola “Vahebe mu Sufa, yikulo ya Arnone 15 ni mihwahwa ya yikulo yize yinayi ku mbonge ya Are ndo mu njiza ya Moape.”

16 Kusulaho, yaya ndo ku Mbia kuze kwapwile shima lize Yehova alwezele Mose ngwenyi: “Kunga atu hanga ngwehe meya.”

17 Ha shimbu liacho, A-Izalele yemba mwaso uno ngwo:

“Ena shima, vwelwoka meya! Likumbululenu ni mwaso!

Chocho yanunga wenyi wo yakatuka mu puya, yaya ndo ku Matana. 19 Yakatuka ku Matana yaya ku Nahaliele. Yakatuka ku Nahaliele yaya ku Mbamote. 20 Ayo yakatuka ku Mbamote yaya mu chifuchi cha Moape, yapalika ha mulundu wa Pisiga, haze hakusoloka puya ya Jeshimote.

21 A-Izalele yatuma mikeji hanga alweze Sahone, mwanangana wa A-Amore ngwo: 22 “Tweche kama tupalikile mu chifuchi che. Kutuchi kunjila mu minda, chipwe mu munda wa uva. Kutuchi kunwa meya a mu mashima jenu. Mutukapalikila mu tapalo lia mwanangana ndo muze mututuhuka mu chifuchi che. 23 Alioze, Sahone kakatayijile hanga A-Izalele apalike mu chifuchi chenyi. Shimbu atayize, Sahone yakunga tujita jenyi eswe, yaya ni kulimika ni A-Izalele mu puya. Muze ahetele ku Yahaze, yaputuka kwasa jita ni A-Izalele. 24 Alioze, A-Izalele yamushiha ni katana, yatambula chifuchi chenyi, chize ku Arnone ndo ku Yapoke, hakamwihi ni A-Amone, mumu njiza ya Yazere yapwile hakamwihi ni A-Amone.

25 Chocho, A-Izalele yatambula mambonge eswe ni kutwama mu mambonge eswe a A-Amore mu Heshebone ni mu yihunda yamo yeswe. 26 Heshebone yapwile mbonge ya Sahone mwanangana wa A-Amore, yoze washile jita ni mwanangana wa Moape, mba yatambula chifuchi chenyi cheswe ndo ku Arnone. 27 Kashika atele chishima ngwo:

“Tweyenu ku Heshebone.

Mbonge ya Sahone akayitunge ni kuyikolesa.

28 Mumu ku Heshebone kwatuhukile kahia; ku mbonge ya Sahone mulengi wa kahia.

Kahia kochele mbonge ya Are ku Moape, e miata a manangamo a ku Arnone.

29 Lamba lie, yena Moape! Yenu akwa-Chemoshe, makanunongesa!

Iye hanachinyisa ana jenyi a malunga ni kuhana ana jenyi a mapwo ngwe funge kuli Sahone, mwanangana wa A-Amore.

31 Chocho A-Izalele yatwama mu chifuchi cha A-Amore. 32 Mba Mose yatuma malunga hanga endese chifuchi cha Yazere. Ayo yatambula yihunda yamo ni kuhuma A-Amore waze apwilemo. 33 Ayo yatalikisa kweka, yakanduka mu jila ya ku Mbashane. Oge, mwanangana wa Mbashane, yeza ni tujita jenyi eswe hanga ase jita ni A-Izalele ku Endreya. 34 Yehova yalweza Mose ngwenyi: “Kanda umuvwila woma, mungumukunjika mu moko je ni atu jenyi eswe ni chifuchi chenyi. Yena mulinga kuli iye ngwe chize walingile kuli Sahone, mwanangana wa A-Amore, yoze te watwama mu Heshebone.” 35 Chocho, ayo yamushiha ni ana jenyi ni atu jenyi eswe; niumwe yoze wasalile ni mwono wakuhi. Yatambula chifuchi chenyi.

22 A-Izalele yakatuka, yasa chilombo cho mu chana cha Moape kulutwe lia mbonge ya Yeriku mu sali lia Yordau. 2 Mbalake mwana wa Zepore kamwene yeswe yize A-Izalele alingile kuli A-Amore. 3 Mba A-Moape yevwa woma unji wa A-Izalele, mumu ayo kapwile anji. Chochene, A-Moape yevwa woma unji mumu lia A-Izalele. 4 A-Moape yalweza makulwana A-Mindiane ngwo: “Haliapwila mbunga yino muyinongesa yuma yeswe yize yinatujingilika ngwe chize ngombe akulia mwambu.”

Ha shimbu liacho, Mbalake mwana wa Zepore mwe wapwile mwanangana wa A-Moape. 5 Iye yatuma mikeji hanga asanyike Mbalau, mwana wa Mbeore, yoze te watwama ku Petore, chifuchi chize chili hakamwihi ni Lwiji Ufrateze ni kumulweza ngwenyi: “Kuno kuli atu waze akatuka ku Engitu, ayo halitanda hashi heswe, kali hakamwihi ni yami. 6 Haliapwila tweya kama hanga ungushingile atu wano, mumu ayo kali ni tachi jinji kuhiana yami. Hanji munguhasa kwakumba ni kwahanga mu chifuchi, mumu ngunanyingika ngwami, yoze yena wakuwahisa, kakuwaha, alioze yoze yena wakushinga, kakushingiwa.”

7 Chocho, makulwana A-Moape ni makulwana A-Mindiane yalinga wenyi, ayo yambata mbongo jize te mamufweta hanga atahe. O yaya kuli Mbalau, yamulweza lusango wa Mbalake. 8 Iye yaalweza ngwenyi: “Pombenu kuno, mba mungunulweza kumbululo lize Yehova mangwaha.” Chocho, miata A-Moape yapomba ku zuwo lia Mbalau.

9 Zambi yasoloka kuli Mbalau ni kumuhula ngwenyi: “Malunga wano uli no aya?” 10 Mbalau yakumbulula Zambi wamwenemwene ngwenyi: “Mbalake mwana wa Zepore mwanangana wa Moape, kangutumina lusango ni kwamba ngwenyi: 11 ‘Kuno kweza atu waze akatuka ku Engitu, ayo halitanda hashi heswe. Haliapwila tweya ungushingilewo. Hanji munguhasa kulimika no ni kwahanga.’” 12 Alioze Zambi yalweza Mbalau ngwenyi: “Kanda uya no. Kanda ushinga atu jacho, mumu ayo kali akuwahisa.”

13 Mbalau yahinduka chimene yalweza miata ja Mbalake ngwenyi: “Funenu mu chifuchi chenu, mumu Yehova kangutayijile kuya ni yenu.” 14 Chocho miata A-Moape yakatuka, yaya kuli Mbalake ni kumulweza ngwo: “Mbalau katayijile kwiza ni yetu.”

15 Alioze, Mbalake yatuma cheka miata anji, a lufuma munji kuhiana atangu. 16 Ayo yaya kuli Mbalau ni kumulweza ngwo: “Mbalake mwana wa Zepore, kamba ngwenyi: ‘Lisesa kanda wecha chuma nichimwe chikukinde kwiza kuli yami, 17 mumu mungukulemesa chinji ni kulinga yeswe yize yena mungulweza. Kashika, tweya kama hanga ungushingile atu wano.’” 18 Alioze Mbalau yakumbulula tuvumbi ja Mbalake ngwenyi: “Chipwe ngwe Mbalake mangwaha zuwo lienyi lia too ni prata ni oru, yami chichi kuhasa kulinga chuma nichimwe chinene hanji chikehe, chize muchihiana shimbi ya Yehova Zambi yami. 19 Alioze, ni yenu pombenu kuno hanga ngunyingike nawa yize Yehova mangulweza.”

20 Chocho, Zambi yasoloka nawa kuli Mbalau ha ufuku ni kumulweza ngwenyi: “Nyi malunga wano keza kukusanyika, yako no. Alioze, mukahanjika wika yize mungukulweza.” 21 Mbalau yahinduka chimene, yalulieka chimbulu wenyi, yaya hamwe ni miata A-Moape.

22 Alioze Zambi yatenuka ha kumona iye kanayi. Mungelo wa Yehova yamana mu tapalo hanga amukinde. Mbalau te kali ha chimbulu wenyi ni yikwashi jenyi aali kapwile hamwe nenyi. 23 Muze chimbulu amwene mungelo wa Yehova kanamana mu tapalo ni katana wenyi ku kwoko, yeseka kukondoloka mu tapalo hanga anjile mu yambu. Alioze Mbalau yaputuka kulamba chimbulu hanga amufunyise mu tapalo. 24 Chocho mungelo wa Yehova yamana mu jila mukachi ka minda yaali ya uva, yize yapwile ni yipanga yaali ya mawe sali ni sali. 25 Muze chimbulu amwene mungelo wa Yehova, yaputuka kulishinjika ku chipanga, mba yapalakenya kulu lia Mbalau ku chipanga. Chocho Mbalau yamulamba cheka.

26 Mungelo wa Yehova yasenya kulutwe, yamana ha chihela haze jila te yinalipola hanga ahone kutewulukila ku sali lia utata chipwe ku sali lia umama. 27 Muze chimbulu amwene mungelo wa Yehova, yautama ku molu ja Mbalau, mba Mbalau yevwa uli unji yamulamba cheka ni lukanda wenyi. 28 Yehova yapakula kanwa lia chimbulu, iye yamba kuli Mbalau ngwenyi: “Yika nalinga hanga ungulambe yisuho yino yitatu?” 29 Mbalau yakumbulula chimbulu ngwenyi: “Yena wanguhepwisa. Nyi te nguli ni katana ku kwoko, kachi nakushiha!” 30 Chimbulu yakumbulula Mbalau ngwenyi: “Ngwami yami nguli chimbulu we yoze wakwendela matangwa eswe? Shina tangwa limwe hingunakulingi kama chuma cha mutapu au?” Iye yakumbulula ngwenyi: “Ka!” 31 Mba Yehova yazulula meso ja Mbalau, iye yamona mungelo wa Yehova kanamana mu tapalo ni katana wakutomona mu kwoko lienyi. Hazehene iye yafulamana hashi.

32 Mungelo wa Yehova yamba kuli iye ngwenyi: “Mumu liaka walamba chimbulu we katatu keswe? Tala! Yami mwe neza kuno hanga ngukukwike, mumu yuma unalinga yinalimika ni upale wami. 33 Chimbulu kangumona, kashika eseka kukondoloka katatu keswe. Achinyonga yize te muyilingiwa kuli yena nyi iye kakondolokele kuli yami! Kachi nakushiha ni kuhichika chimbulu ni mwono.” 34 Mbalau yamba kuli mungelo wa Yehova ngwenyi: “Navulumuna, mumu te chanyingikine ngwami, nuli mu tapalo hanga nungukinde. Kashika, nyi chino chili chipi kumeso jenu, ami munguhiluka.” 35 Mungelo wa Yehova yalweza Mbalau ngwenyi: “Yako ni malunga jacho, alioze yena mukahanjika wika yize mungukulweza.” Chocho Mbalau yanunga ni wenyi hamwe ni miata ja Mbalake.

36 Muze Mbalake anyingikine ngwenyi Mbalau haheta, hazehene yaya ni kulitakana nenyi mu mbonge ya Moape yize yatwama mu njiza ya Arnone. 37 Chocho Mbalake yahula Mbalau ngwenyi: “Ngwami natumanga kukusanyika? Mumu liaka kuwejile? Shina wanyonga ngwe yami chichi kuhasa kukulemesa?” 38 Mbalau yakumbulula Mbalake ngwenyi: “Haliapwila nguli kumeso je. Shina nguli ni chimwe chize munguhasa kukulweza? Mungukulweza wika maliji waze Zambi masa mu kanwa liami.”

39 Chocho Mbalau yaya ni Mbalake, yaheta ku Kiriate-Huzote. 40 Mbalake yalambula ngombe ni mapanga, yatuma yifwo yikwo kuli Mbalau ni miata waze apwile nenyi. 41 Chimene, Mbalake yakanduka ni Mbalau ku Mbamote-Mbale. Kuzekwene, iye yamona A-Izalele eswe.

23 Mbalau yalweza Mbalake ngwenyi: “Tunga yilumbilo shimbiali, lulieka kuji a ngombe shimbiali ni kuji a mapanga shimbiali.” 2 Hazehene Mbalake yalinga yize Mbalau amulwezele. Mbalake ni Mbalau yalambula kuji a ngombe umuwika ni kuji a panga umuwika ha chilumbilo ni chilumbilo. 3 Mbalau yalweza Mbalake ngwenyi: “Sala hano ni mulambu we wa kwocha, yami ngunachiya akuze. Hanji Yehova mahanjika ni yami. Mungukulweza yeswe yize iye mangulweza.” Chocho iye yaya ha umwe mulundu haze te kuheshi mitondo.

4 Chocho Zambi yasoloka kuli Mbalau, mba Mbalau yamulweza ngwenyi: “Nalulieka yilumbilo shimbiali, nalambula kuji a ngombe umuwika ni kuji a panga umuwika ha chilumbilo ni chilumbilo.” 5 Yehova yasa maliji wano mu kanwa lia Mbalau ngwenyi: “Hiluka kuli Mbalake, yino ye watamba kumulweza.” 6 Chocho Mbalau yahiluka, yamona Mbalake ni miata eswe a Moape kanamana hakamwihi ni mulambu wenyi wa kwocha. 7 Mba iye yata chishima chino ngwenyi

‘Tweya ungushingile Yakomba.

Ewa, tweya unguhishile Izalele.’

 8 Kuchi munguhasa kushinga waze Zambi kashingile?

Kuchi munguhasa kuhisa waze Yehova kahishile?

11 Chocho Mbalake yalweza Mbalau ngwenyi: “Yika wangulinga? Yami nakuneha hanga ushinge akwa-kole jami, alioze yena unaawahisa.” 12 Iye yamukumbulula ngwenyi: “Shina chatambile kuhanjika yeswe yize Yehova masa mu kanwa liami?”

13 Mbalake yamba ngwenyi: “Lisesa, tweya kama ni yami ku chihela chikwo kuze muukamwena. Mukamona wika amwe a kuli ayo, kuuchi kamona eswe. Kwenako mukaashingila.” 14 Chocho Mbalake yamutwala mu munda wa Zofime ha mulundu wa Pisiga, yatungaho yilumbilo shimbiali, yalambula kuji a ngombe umuwika ni kuji a panga umuwika ha chilumbilo ni chilumbilo. 15 Mbalau yalweza Mbalake ngwenyi: “Yena sala hano ni mulambu we wa kwocha, yami munguchiya akuze hanga nguhanjike nenyi.” 16 Mba Yehova yasoloka kuli Mbalau, yasa maliji wano mu kanwa lienyi ngwenyi: “Funa kuli Mbalake, yino ye watamba kumulweza.” 17 Iye yaya ndo kuli Mbalake, yamuwana kanamana ni mulambu wenyi wa kwocha ni miata A-Moape. Mbalake yamuhula ngwenyi: “Yika Yehova akulweza?” 18 Ha kumukumbulula, iye yata chishima chino:

“Lilulieke, Mbalake ni kungupanjika.

Ngupanjike, yena mwana wa Zepore.

Iye nyi mamba chuma, shina keshi kuchilinga?

Nyi mahanjika, shina keshi kumanununa yize akulakenya?

22 Zambi kaachiza ku Engitu.

Kuli ayo iye kali ngwe mbinga ja kuji a mbau.

Haliapwila mahasa kwamba hakutwala kuli Yakomba ni Izalele ngwo:

‘Talenu yuma yize Zambi alinga!’

25 Chocho Mbalake yalweza Mbalau ngwenyi: “Nyi kuuchi kuhasa kwashinga, kuwatambile kwawahisa.” 26 Mbalau yakumbulula Mbalake ngwenyi: “Chakulwezele ngwami mungulinga yeswe yize Yehova mangulweza?”

27 Mbalake yalweza nawa Mbalau ngwenyi: “Lisesa, tweya kama hanga ngukutwale ku chihela chikwo. Hanji kuzekwene Zambi wamwenemwene matayiza hanga ungushingilewo.” 28 Chocho Mbalake yatwala Mbalau ku mulundu wa Peore, kuze te mahasa kumona puya ya Njeshimone. 29 Mbalau yalweza Mbalake ngwenyi: “Tunga hano yilumbilo shimbiali, lulieka kuji a ngombe shimbiali ni kuji a panga shimbiali.” 30 Chocho, Mbalake yalinga yize Mbalau amulwezele, yalambula kuji a ngombe umuwika ni kuji a panga umuwika ha chilumbilo ni chilumbilo.

24 Muze Mbalau amwene ngwenyi, Yehova kanawahisa A-Izalele, iye yalitwamina kuya ni kufupa nawa yuma ya yipanda-panda, alioze yatalikisa meso jenyi mu puya. 2 Muze Mbalau ahetwile meso jenyi, yamona A-Izalele hasa yilombo kulita ni minyachi yo. Hazehene spiritu ya Zambi yiyiza hali iye. 3 Chocho, iye yata chishima chino ngwenyi:

10 Chocho, Mbalake yevwila Mbalau uli unji. Mba Mbalake yalamba moko jenyi pwaa, yamba kuli Mbalau ngwenyi: “Yami nakusanyika hanga ushinge akwa-kole jami, alioze yena wawahisa ha yisuho yeswe yitatu. 11 Haliapwila, yako ku zuwo lie. Yami te ngunazange kukulemesa, alioze Yehova kazangile hanga ngukulemese.”

12 Mbalau yamba kuli Mbalake ngwenyi: “Ngwami nalwezele mikeji je ngwo: 13 ‘Chipwe ngwe Mbalake mangwaha zuwo lienyi lia too ni prata ni oru, yami chichi kuhasa kulinga chuma nichimwe, chipema hanji chipi, chize muchihiana shimbi ya Yehova. Yami munguhanjika wika yize Yehova mangulweza.’ 14 Haliapwila, ngunayi kwami kuli atu jami. Alioze shimbu kanda nguchiya, mana ngukulweze yize atu wano makalinga kuli atu je kulutwe lia matangwa.” 15 Chocho, iye yata chishima chino ngwenyi:

20 Muze iye atalile kuli A-Amaleke, yanunga ni chishima chenyi ha kwamba ngwenyi:

21 Muze atalile kuli A-Kene, Mbalau yanunga ni chishima chenyi ngwenyi:

“Zuwo lie likolo, zuwo lie lia kutungila ha liwe.

22 Alioze umwe makashiha A-Kene ni kahia.

Mba tangwa lika A-Shure makamutwala mu undungo?”

23 Iye yanunga ni chishima chenyi ha kwamba ngwenyi:

“Mama yami! Iya makamona mwono muze Zambi makalinga yuma yino?

Alioze, ni iye makamunongesa liakulu.”

25 Chocho, Mbalau yaya kwenyi, yafuna kumahio. Mbalake neye yaya mu jila yenyi.

25 Muze A-Izalele te ali mu Shitime, atu yaputuka kulinga utanji ni ana-mapwo a Moape. 2 Mapwo a Moape yasanyika atu hanga aye no ha chiwanyino chakuhana yitapo kuli tuzambi jo, mba atu yaputuka kulia ni kufulamana kumeso ja tuzambi jo. 3 Chocho, A-Izalele yaputuka kuwayila Mbale wa Peore, mba Yehova yevwila A-Izalele uli unji. 4 Yehova yamba kuli Mose ngwenyi: “Kwata akwa-lutwe eswe waze avulumuna, ashihe ni kwasukika ha mitondo kumeso ja Yehova hanga atu eswe amone, mba ufwatulo wa Yehova hali A-Izalele upatuke.” 5 Mose yalweza akwa-kuyula ja A-Izalele ngwenyi: “Mutu ni mutu wa kuli yenu katamba kushiha malunga waze aputuka kuwayila Mbale wa Peore.”

6 Alioze, ha shimbu lizeliene, umwe Ka-Izalele yaneha mukachi ka mandumbu jenyi umwe pwo Ka-Mindiane kumeso ja Mose ni ja chikungulwila cheswe cha A-Izalele, muze ayo te analila ku chikolo cha mbalaka ya kulikungulwila. 7 Muze Finehase, mwana wa Eleazare, mwana wa sasendote Arone achimwene, yakatuka kawashi-washi mukachi ka chikungulwila, yanda kunga lienyi. 8 Yakaula lunga Ka-Izalele mu mbalaka, yatuwa ni kunga eswe aali, mwe pwo yamutuwa ku upwo wenyi. Mba musongo uze te unashiha A-Izalele yiuhwa. 9 Waze afwile mumu lia musongo wacho, kapwile 24,000.

10 Yehova yalweza Mose ngwenyi: 11 “Finehase, mwana wa Eleazare, mwana wa sasendote Arone, kakondolola ufwatulo wami kuli A-Izalele, mumu iye kashiha waze kashishikile kuli yami. Kashika, chanongesene A-Izalele mumu lia kuzanga hanga anguwayile wika yami. 12 Kashika, mulweze ngwe: ‘Ngunalingi nenyi usendo wa sambukila. 13 Muukapwa usendo wa usasendote wa mutolo kuli iye ni munyachi wenyi, mumu iye kashiha waze kashishikile kuli Zambi yenyi, kafuka shili ya A-Izalele.’”

14 Jina lia Ka-Izalele yoze ashihile hamuwika ni Ka-Mindiane liapwile Zimiri, mwana wa Salu, mukwa-lutwe ku munyachi wa tato hakachi ka A-Simeone. 15 Jina lia pwo Ka-Mindiane yoze ashihile liapwile Koshipi, mwana wa Zure. Zure kapwile kasongo wa amwe akwa-jiko mu Mindiane.

16 Yehova yalweza Mose ngwenyi: 17 “Mwesenu lamba A-Mindiane ni kwashiha, 18 mumu ayo kanumwesa lamba ni yitanga yo yipi ha chikuma cha Peore ni Koshipi mwana wa mukwa-lutwe wa A-Mindiane ni ndumbwo yoze ashihile ha tangwa lia musongo uze wejile mumu lia Peore.”

26 Muze musongo te hiwapalika, Yehova yalweza Mose ni Eleazare mwana wa sasendote Arone, ngwenyi: 2 “Alulenu chikungulwila cheswe cha A-Izalele kukatuka kuli waze ali ni miaka 20 hanji kuhiana, kulita ni minyachi ya atato, alulenu eswe waze hajama kuya mu jita.” 3 Muze apwile mu puya ya Moape, ku Lwiji Yordau hakamwihi ni Yeriku, Mose ni sasendote Eleazare yamba ngwo: 4 “Alulenu eswe waze ali ni miaka 20 hanji kuhiana, kulita ni chize Yehova atuma Mose kulinga.”

Ana ja A-Izalele waze akatukile ku chifuchi cha Engitu kali wano: 5 Rupene, mwana mutangu wa Izalele; ana ja Rupene kali wano: A kuli Hanoke, akwa-munyachi wa A-Hanoke; a kuli Palu, akwa-munyachi wa A-Palu; 6 a kuli Hezerone, akwa-munyachi wa A-Hezerone; a kuli Kame, akwa-munyachi wa A-Kame. 7 Wano e apwile asoko ja Rupene. Waze alwile kapwile 43,730.

8 Eliape mwe wapwile mwana wa Palu. 9 Ana ja Eliape kapwile Nemule, Ndatane ni Apirame. Ndatane ni Apirame kapwile ni yiteli mu chikungulwila; ayo hamwe ni chizavu cha Kora yalimika ni Mose ni Arone, muze alimikine ni Yehova.

10 Chocho hashi yihazuluka, yihaamina. Kora ni waze te akumukwasa yafwa muze kahia kashihile malunga 250. Ayo yapwa chilweza cha utowezo kuli eswe. 11 Alioze, ana ja Kora kakafwile.

12 Ana ja Simeone kulita ni usoko wo kapwile wano: A kuli Nemule, akwa-munyachi wa A-Nemule; a kuli Yamine, akwa-munyachi wa A-Yamine; a kuli Yakine, akwa-munyachi wa A-Yakine; 13 A kuli Zera, akwa-munyachi wa A-Zera; a kuli Shalo, akwa-munyachi wa A-Shalo. 14 Akwa-munyachi wa A-Simeone kapwile 22,200.

15 Ana ja Ngate, kulita ni usoko wo kapwile wano: A kuli Zefwone, akwa-munyachi wa A-Zefwone; a kuli Hangi, akwa-munyachi wa A-Hangi; a kuli Shuni, akwa-munyachi wa A-Shuni; 16 a kuli Ozeni, akwa-munyachi wa A-Ozeni; a kuli Ire, akwa-munyachi wa A-Ire; 17 a kuli Erote, akwa-munyachi wa A-Erote; a kuli Arele, akwa-munyachi wa A-Arele. 18 Wano e apwile asoko ja ana ja Ngate. Waze alwile kapwile 40,500.

19 Ana ja Yunda kapwile Ere ni Onane. Alioze, Ere ni Onane kafwile mu chifuchi cha Kanana. 20 Ana ja Yunda, kulita ni usoko wo kapwile wano: A kuli Shela, akwa-munyachi wa A-Shela; a kuli Pereze, akwa-munyachi wa A-Pereze; a kuli Zera, akwa-munyachi wa A-Zera. 21 Ana ja Pereze kapwile wano: A kuli Hezerone, akwa-munyachi wa A-Hezerone; a kuli Hamuli, akwa-munyachi wa A-Hamuli. 22 Wano e apwile asoko ja Yunda. Waze alwile kapwile 76,500.

23 Ana ja Yisaka, kulita ni usoko wo kapwile wano: A kuli Tola, akwa-munyachi wa A-Tola; a kuli Puvwa, akwa-munyachi wa A-Puvwa; 24 a kuli Yasupe, akwa-munyachi wa A-Yasupe; a kuli Shimerone, akwa-munyachi wa A-Shimerone. 25 Wano e apwile asoko ja Yisaka. Waze alwile kapwile 64,300.

26 Ana ja Zapulone, kulita ni usoko wo kapwile wano: A kuli Serote, akwa-munyachi wa A-Serote; a kuli Elone, akwa-munyachi wa A-Elone; a kuli Yalile, akwa-munyachi wa A-Yalile. 27 Wano e apwile asoko ja Zapulone. Waze alwile kapwile 60,500.

28 Ana ja Yosefwe, kulita ni usoko wo, kapwile Manase ni Eframe. 29 Ana ja Manase kapwile wano: A kuli Makire, akwa-munyachi wa A-Makire. Makire yapwa tato ya Ngiliate. A kuli Ngiliate, akwa-munyachi wa A-Ngiliate. 30 Ana ja Ngiliate kapwile wano: A kuli Jezere, akwa-munyachi wa A-Jezere; a kuli Heleke, akwa-munyachi wa A-Heleke; 31 a kuli Asariele, akwa-munyachi wa A-Asariele; a kuli Shekeme, akwa-munyachi wa A-Shekeme; 32 a kuli Shemida, akwa-munyachi wa A-Shemida; a kuli Hefere, akwa-munyachi wa A-Hefere. 33 Alioze, Zelofehade, mwana wa Hefere, kakapwile ni ana a malunga, kapwile wika ni ana a mapwo. Majina ja ana ja Zelofehade kapwile wano: Mala, Noa, Hogala, Milika ni Tiriza. 34 Wano e apwile asoko ja Manase. Waze alwile kapwile 52,700.

35 Ana ja Eframe, kulita ni usoko wo, kapwile wano: A kuli Sutela, akwa-munyachi wa A-Sutela; a kuli Mbechi, akwa-munyachi wa A-Mbechi; a kuli Tahane, akwa-munyachi wa A-Tahane. 36 Wano e apwile ana a malunga a Sutela: A kuli Erane, akwa-munyachi wa A-Erane. 37 Wano e apwile asoko ja ana ja Eframe. Waze alwile kapwile 32,500. Wano kapwile ana ja Yosefwe, kulita ni usoko wo.

38 Ana ja Mbenjamine, kulita ni usoko wo, kapwile wano: A kuli Mbela, akwa-munyachi wa A-Mbela; a kuli Asembele, akwa-munyachi wa A-Asembele; a kuli Ahirame, akwa-munyachi wa A-Ahirame; 39 a kuli Sufame, akwa-munyachi wa A-Sufame; a kuli Hufame, akwa-munyachi wa A-Hufame. 40 Ana ja Mbela kapwile Arande ni Naamane; a kuli Arande, akwa-munyachi wa A-Arande; a kuli Naamane, akwa-munyachi wa A-Naamane. 41 Wano e apwile ana ja Mbenjamine, kulita ni usoko wo. Waze alwile kapwile 45,600.

42 Wano e apwile ana ja Ndane, kulita ni usoko wo: A kuli Suhame, akwa-munyachi wa A-Suhame. Wano e apwile asoko ja Ndane kulita ni usoko wo. 43 Atu eswe waze alwile a mu usoko wa A-Suhame kapwile, 64,400.

44 Ana ja Ashe, kulita ni usoko wo, kapwile wano: A kuli Ima, akwa-munyachi wa A-Ima; a kuli Ishevwi, akwa-munyachi wa A-Ishevwi; a kuli Mberia, akwa-munyachi wa A-Mberia; 45 ana ja Mberia kapwile wano: A kuli Hepere, akwa-munyachi wa A-Hepere; a kuli Malikiele, akwa-munyachi wa A-Malikiele. 46 Jina lia mwana wa pwo wa Ashe, liapwile Sara. 47 Wano e apwile asoko ja ana ja Ashe. Waze alwile kapwile 53,400.

48 Ana ja Napatali, kulita ni usoko wo, kapwile wano: A kuli Yozele, akwa-munyachi wa A-Yozele; a kuli Nguni, akwa-munyachi wa A-Nguni; 49 a kuli Yeze, akwa-munyachi wa A-Yeze; a kuli Shilemi, akwa-munyachi wa A-Shilemi. 50 Wano e apwile asoko ja Napatali, kulita ni usoko wo. Waze alwile kapwile 45,400.

51 Unji wa A-Izalele eswe waze alwile kapwile 601,730.

52 Yehova yalweza Mose ngwenyi: 53 “Chifuchi nwatamba kuchihana kuli atu jacho ngwe chihinga, kulita ni kwalula cha majina jo. 54 Watamba kuhana chihinga chinene ku yizavu yinene-yinene, ku yizavu yikehe-yikehe, watamba kuhana chihinga chikehe. Chihinga chatamba kulita ni unji wa atu waze ali mu chizavu chacho. 55 Alioze, chihinga katamba kuchihana kulita ni chela chize mata. Ayo katamba kutambula chihinga cho, kulita ni majina a minyachi ya atato. 56 Chihinga cheswe katamba kuchihana kulita ni chela ku yizavu yinene-yinene ni yikehe-yikehe.”

57 Wano e A-Levi waze alwile, kulita ni usoko wo: A kuli Ngeshone, akwa-munyachi wa A-Ngeshone; a kuli Kohate, akwa-munyachi wa A-Kohate; a kuli Merari, akwa-munyachi wa A-Merari. 58 Wano e apwile asoko ja A-Levi: Akwa-munyachi wa A-Lipini, akwa-munyachi wa A-Heprone, akwa-munyachi wa A-Mahile, akwa-munyachi wa A-Mushi ni akwa-munyachi wa A-Kora.

Kohate yasema Amarame. 59 Jina lia pwo lia Amarame, liapwile Yokepete, mwana yoze Levi ni mukwo-pwo asemene ku Engitu. Iye ni mukwo-lunga Amarame yaluka ana jo majina wano: Arone, Mose ni Miriame, ndumbwo wa pwo. 60 Arone yapwa tato ya Nandambe, Ambihu, Eleazare ni Itama. 61 Alioze, Nandambe ni Ambihu kafwile mumu kalambwile kahia kaze kakalitele kuli Yehova.

62 Malunga eswe a kakweji umuwika hanji kuhiana, waze alwile kapwile 23,000. Ayo kakaalwile hamuwika ni A-Izalele akwo, mumu ayo te katambile kutambula chihinga mukachi ka A-Izalele.

63 Wano kali waze alwile kuli Mose ni kuli sasendote Eleazare, muze alwile A-Izalele mu yana ya Moape, hakamwihi ni Lwiji Yordau, mu Yeriku. 64 Alioze hakachi ko, kuhakapwile niumwe yoze alwile kuli Mose ni sasendote Arone ha shimbu lize alwile A-Izalele mu puya ya Sinai. 65 Mumu Yehova kambile hakutwala kuli ayo ngwenyi: “Pundu lume, ayo mafwila mu puya.” Chocho, niumwe wa kuli ayo wasalile ni mwono wakuhi, kuchizako wika Kalemba, mwana wa Yefune ni Yoshua, mwana wa Nune.

27 Chocho ana a mapwo a Zelofehade, mwana wa Hefere, mwana wa Ngiliate, mwana wa Makire, mwana wa Manase, a mu usoko wa Manase, mwana wa Yosefwe yakundama. Majina ja ana jenyi a mapwo kapwile, Mala, Noa, Hogala, Milika ni Tiriza. 2 Ayo yamana kumeso ja Mose, ja sasendote Eleazare, ja akwa-lutwe ni ja chikungulwila cheswe ku chikolo cha mbalaka ya kulikungulwila. Yamba ngwo: 3 “Tata kanakafwila mu puya, alioze iye kakapwile mu chizavu chize chalimikine ni Yehova, chize chakwashile Kora. Iye kafwile mumu lia shili yenyi. Chikwo nawa, kakapwile ni ana a malunga. 4 Shina jina lia tata liatamba kujimuka mukachi ka usoko wenyi mumu lia kuhona mwana wa lunga? Twehenu chimwe chihinga mukachi ka mandumbu ja tata.” 5 Chocho, Mose yasolola chikuma cho kuli Yehova.

6 Mba Yehova yalweza Mose ngwenyi: 7 “Ana ja Zelofehade kahanjika umwenemwene. Watamba kwaha chimwe chihanda ngwe chihinga mukachi ka mandumbu ja tato. Ehe chihinga cha tato. 8 Lweza A-Izalele ngwe: ‘Nyi umwe lunga mafwa, alioze kahichikile mwana wa lunga, nwatamba kuhana chihinga chenyi kuli mwanenyi wa pwo. 9 Nyi kasemene mwana wa pwo, nwatamba kuhana chihinga chenyi kuli mandumbu jenyi. 10 Nyi keshi ni mandumbu, nwatamba kuhana chihinga chenyi kuli mandumbu ja tato. 11 Nyi tato keshi ni mandumbu, nwatamba kuhana chihinga chenyi kuli umwe wa kuli usoko wenyi, iye mwe machihinga. Yino yili shimbi ya mutolo kuli A-Izalele, ngwe chize Yehova alweza Mose.’”

12 Yehova yalweza Mose ngwenyi: “Kanduka ku mulundu uno wa Aparime hanga umone chifuchi chize mungukahana kuli A-Izalele. 13 Muze muchimona, ni yena mufwa ngwe chize anakafwa yayenu Arone. 14 Mumu muze chikungulwila chalimikine ni yami mu puya ya Zini, yenu yinwehuka shimbi yami, kunwanguhalishile kumeso jo, muze natuhwishile meya. Meya a Meripa ku Kandeshe mu puya ya Zini.”

15 Mose yalweza Yehova ngwenyi: 16 “Yehova, Zambi yoze wakuhana mwono kuli atu eswe, atongole umwe mutu mu chikungulwila 17 yoze maasongwela mu yuma yeswe hanga chikungulwila cha Yehova chihone kupwa ngwe mapanga waze keshi kafunga.” 18 Yehova yalweza Mose ngwenyi: “Sanyika Yoshua, mwana wa Nune, lunga wajama, sayika kwoko lie hali iye. 19 Mumanyise kumeso ja sasendote Eleazare ni kumeso ja chikungulwila cheswe, mutongole hanga apwe kasongo wo. 20 Yena watamba kumwaha chihanda cha wata we hanga chikungulwila cheswe cha Izalele chimupanjike. 21 Iye makalisolola kuli sasendote Eleazare, yoze makamuhulila kuli Yehova kupalikila mu Urimi. Shimbi yenyi* makayikaula kuli atu eswe, iye ni A-Izalele eswe ni chikungulwila.”

22 Chocho Mose yalinga yize Yehova amulwezele. Yasanyika Yoshua, yamumanyisa kumeso ja sasendote Eleazare ni ja chikungulwila cheswe, 23 yasayika moko jenyi hali iye, yamutongola apwe kasongo ngwe chize Yehova ambile kupalikila muli Mose.

28 Mba Yehova yamba kuli Mose ngwenyi: 2 “Lweza A-Izalele ngwe: ‘Nwatamba kuhana mulambu wami ni kulia chami. Milambu yami ya kahia ya vumba lipema kuli yami, nwatamba kuyihana ha shimbu liayo.’

3 “Alweze ngwe: ‘Uno we mulambu wa kahia nwatamba kuhana kuli Yehova: Ha tangwa, kuji a mapanga aali apema a mwaka umuwika apwe mulambu wa kwocha uze nwatamba kuhana matangwa eswe. 4 Yenu munulambula mwana panga umuwika ha chimene, mukwo chingoloshi, 5 hamuwika ni mulambu wa mbuto wa chihanda chimuwika cha ku kumi lia yihanda ya efa ya wunga wa kuchinga ni chihanda chimuwika cha ku yihanda yiwana ya hine* ya maji apema a olevwe. 6 Uno uli mulambu wa kwocha uze atamba kuhana matangwa eswe, uze waputukile ku Mulundu wa Sinai ngwe mulambu wa vumba lipema, mulambu wa kahia kuli Yehova. 7 Mulambu wa walwa muupwa wa chihanda chimuwika cha ku yihanda yiwana ya hine hali mwana panga umuwika. Zujila walwa usasu mu chihela chisandu ngwe mulambu wa walwa kuli Yehova. 8 Mwana panga mukwo munumulambula chingoloshi. Yenu munumulambula hamwe ni mulambu wa mbuto ni mulambu wa walwa. Mulambu wacho watamba kupwa ngwe mulambu uze nwalambulanga chimene, ngwe mulambu wa kahia wa vumba lipema kuli Yehova.

9 “‘Alioze, ha tangwa lia Sambata, mulambu watamba kupwa wa kuji a mapanga aali apema a mwaka umuwika ni yihanda yaali ya chihanda cha kumi ya efa ya wunga wa kuchinga ni maji a olevwe ngwe mulambu wa mbuto hamwe ni mulambu wa walwa. 10 Uno we mulambu wa kwocha wa Sambata, kuchingaho mulambu wa kwocha wa matangwa eswe ni mulambu wa walwa.

11 “‘Ku uputukilo wa tukweji eswe watamba kulambula kuli Yehova ngwe mulambu wa kwocha, yimbembe aali a kuji, kuji a panga umuwika ni kuji a mapanga shimbiali a mwaka umuwika. 12 Munulambula yihanda yitatu ya ku kumi lia yihanda ya wunga wa kuchinga ni maji a olevwe ngwe mulambu wa mbuto ha chimbembe umuwika ni yihanda yaali ya ku kumi lia yihanda ya wunga wa kuchinga ni maji a olevwe ngwe mulambu wa mbuto hali kuji a panga 13 ni chihanda chimuwika cha ku kumi lia yihanda ya wunga wa kuchinga ni maji a olevwe ngwe mulambu wa mbuto hali kuji a panga, uno uli mulambu wa kwocha wa vumba lipema, mulambu wa kahia kuli Yehova. 14 Milambu ya walwa yatamba kupwa ya chihanda cha hakachi cha hine ya vinyu hali chimbembe wa kuji, chihanda chimuwika cha ku yihanda yitatu ya hine hali kuji a panga ni chihanda chimuwika cha ku yihanda yiwana ya hine hali mwana panga. Uno we mulambu wa kwocha uze nwatamba kuhana tukweji eswe ha mwaka. 15 Kuchizako mulambu wa kwocha uze nwatamba kulambula mashimbu eswe ni mulambu wa walwa, nwatamba kulambula nawa kuli Yehova kuji a pembe umuwika ngwe mulambu wa shili.

16 “‘Ha kakweji mutangu, ha tangwa 14 lia kakweji, kumukukapwa chizomboka cha Yehova. 17 Ha tangwa 15 lia kakweji wacho, kumukukapwa chimwe chiwanyino. Munukalia mbolo kujishi futunwiso ha matangwa shimbiali. 18 Ha tangwa litangu kumukukapwa kukunguluka chisandu. Ha tangwa liacho, kanda nulinga mulimo niumwe wa ku musunya. 19 Nwatamba kuhana ngwe mulambu wa kwocha ha kahia kuli Yehova, yimbembe aali a kuji, kuji a panga umuwika ni kuji a mapanga shimbiali a mwaka umuwika. Nwatamba kulambula yimuna apema. 20 Yimuna jacho, nwatamba kwahana hamuwika ni milambu ya wunga wa mbuto wa kuchinga ni maji a olevwe; yihanda yitatu ya ku kumi lia yihanda hali chimbembe, yihanda yaali ya ku kumi lia yihanda hali kuji a panga 21 ni chihanda chimuwika cha ku kumi lia yihanda hali mwana panga mweswe wa kuli ana mapanga shimbiali. 22 Yenu nwatamba nawa kulambula kuji a pembe umuwika ngwe mulambu wa shili hanga akanufukile shili. 23 Munukalambula milambu yino hamuwika ni mulambu wa kwocha wa chimene, mulambu wa kwocha uze nwakulambula mashimbu eswe. 24 Milambu yino neyo nwatamba kuyilambula matangwa eswe ha matangwa shimbiali, ngwe kulia cha mulambu wa kahia, cha vumba lipema kuli Yehova. Nwatamba kuhana mulambu wacho ni mulambu wa kwocha wa mashimbu eswe hamwe ni mulambu wa walwa. 25 Ha tangwa liamuchishimbiali, nwatamba kulinga kukunguluka chisandu. Ha tangwa liacho kunwatambile kulinga mulimo niumwe wa ku musunya.

26 “‘Ha tangwa lize munulambula mihuko yitangu yichila, muze munuhana kuli Yehova mulambu wa mbuto jaha, yenu nwatamba kulinga kukunguluka chisandu ha yiwanyino yenu ya poso. Kunwatambile kulinga mulimo niumwe wa ku musunya. 27 Munukahana ngwe mulambu wa kwocha wa vumba lipema kuli Yehova yimbembe aali a kuji, kuji a panga umuwika ni kuji a mapanga shimbiali a mwaka umuwika. 28 Munuhana ngwe mulambu wa mbuto, wunga wa kuchinga ni maji a olevwe, yihanda yitatu ya ku kumi lia yihanda hali chimbembe mweswe wa kuji ni yihanda yaali ya ku kumi lia yihanda hali kuji a panga mweswe 29 ni chihanda chimuwika cha ku kumi lia yihanda hali mwana panga mweswe wa kuli ana mapanga shimbiali. 30 Chikwo nawa, munulambula kuji a pembe umuwika hanga anufukile nenyi shili. 31 Munukahana milambu yino hamuwika ni mulambu wa kwocha uze nwakuhana mashimbu eswe ni mulambu wa mbuto. Yimuna katamba kupwa apema ni kwahana hamuwika ni milambu ya walwa.

29 “‘Ha kakweji wamuchishimbiali, ha tangwa litangu lia kakweji, nwatamba kulinga kukunguluka chisandu. Ha tangwa liacho, kunwatambile kulinga mulimo niumwe wa ku musunya. Lili tangwa lize yenu nwatamba kwimba chitavwi. 2 Munuhana ngwe mulambu wa kwocha wa vumba lipema kuli Yehova chimbembe wa kuji umuwika, kuji a panga umuwika ni kuji a mapanga shimbiali a mwaka umuwika, eswe apema. 3 Hakutwala ku mulambu wa wunga wa mbuto wa kuchinga ni maji a olevwe, nwatamba kuhana yihanda yitatu ya ku kumi lia yihanda ya efa hali chimbembe wa kuji, yihanda yaali ya ku kumi lia yihanda hali kuji a panga 4 ni chihanda chimuwika cha ku kumi lia yihanda hali mwana panga mweswe wa kuli ana-mapanga shimbiali. 5 Munuhana kuji a pembe umuwika ngwe mulambu wa shili hanga anufukile shili. 6 Munuhana milambu yino ni mulambu wa kwocha uze nwakuhana tukweji eswe hamwe ni mulambu wa mbuto. Munuhana nawa mulambu wa kwocha uze nwakuhana mashimbu eswe hamwe ni mulambu wa mbuto, chimuwika ni mulambu wa walwa, kulita ni shimbi ya mulambu, yipwe milambu ya vumba lipema, ngwe mulambu wa kahia kuli Yehova.

7 “‘Ha tangwa liamuchikumi, lia kakweji yono wamuchishimbiali, yenu nwatamba kulinga kukunguluka chisandu ni kusolola ngwo nunalinyenge mumu lia shili yenu. Ha tangwa liacho kunwatambile kulinga mulimo niumwe wa ku musunya. 8 Munuhana kuli Yehova mulambu wa kwocha wa vumba lipema, chimbembe wa kuji umuwika, kuji a panga umuwika ni ana-mapanga shimbiali a mwaka umuwika, eswe apema. 9 Hakutwala ku mulambu wa wunga wa mbuto wa kuchinga ni maji a olevwe, nwatamba kuhana yihanda yitatu ya ku kumi lia yihanda hali chimbembe wa kuji ni yihanda yaali ya ku kumi lia yihanda hali kuji a panga 10 ni chihanda chimuwika cha ku kumi lia yihanda hali mwana-panga mweswe wa kuli ana-mapanga shimbiali. 11 Yenu nwatamba kulambula nawa kuji a pembe umuwika ngwe mulambu wa shili. Milambu yino yeswe ni mulambu wa shili nwatamba kuyilambula ha tangwa liacho ni mulambu wa kwocha uze nwakuhana mashimbu eswe ni mulambu wa mbuto, hamwe ni milambu ya walwa.

12 “‘Ha tangwa 15 lia kakweji wamuchishimbiali, yenu nwatamba kulinga kukunguluka chisandu. Ha tangwa liacho, kunwatambile kulinga mulimo niumwe wa ku musunya; yenu nwatamba kulinga chiwanyino cha Yehova ha matangwa shimbiali. 13 Nwatamba kuhana ngwe mulambu wa kwocha ni mulambu wa kahia wa vumba lipema kuli Yehova, yimbembe 13, kuji a mapanga 2 ni ana-mapanga 14 a mwaka umuwika, eswe apema. 14 Hakutwala ku mulambu wa wunga wa mbuto wa kuchinga ni maji a olevwe, nwatamba kuhana yihanda yitatu ya ku kumi lia yihanda hali chimbembe wa kuji mweswe wa kuli yimbembe a kuji 13, yihanda yaali ya ku kumi lia yihanda hali kuji a panga mweswe wa kuli kuji 2 a mapanga 15 ni chihanda chimuwika cha ku kumi lia yihanda hali mwana-panga mweswe wa kuli ana-mapanga 14. 16 Yenu nwatamba kulambula nawa kuji a pembe umuwika ngwe mulambu wa shili. Hanenu milambu yino yeswe, mulambu wa shili, mulambu wa kwocha uze nwakuhana mashimbu eswe ni mulambu wa mbuto ni mulambu wa walwa.

17 “‘Ha tangwa liamuchiali lia chiwanyino, munulambula yimbembe a kuji 12, kuji a mapanga 2 ni ana-mapanga 14 a mwaka umuwika, eswe apema; 18 munuhana nawa milambu ya mbuto ni ya walwa hali yimbembe a kuji, hali kuji a mapanga ni hali ana-mapanga, kulita ni kwalula cho ni shimbi ya mulambu; 19 ni kuji a pembe umuwika ngwe mulambu wa shili. Hanenu milambu yino hamwe ni mulambu wa kwocha uze nwakuhana mashimbu eswe ni mulambu wa mbuto ni milambu ya walwa.

20 “‘Ha tangwa liamuchitatu lia chiwanyino, munulambula yimbembe a kuji 11, kuji a mapanga 2 ni ana-mapanga 14 a mwaka umuwika, eswe apema; 21 munuhana nawa milambu ya mbuto ni ya walwa hali yimbembe a kuji, hali kuji a mapanga ni hali ana-mapanga, kulita ni kwalula cho ni shimbi ya mulambu; 22 ni kuji a pembe umuwika ngwe mulambu wa shili. Hanenu milambu yino hamwe ni mulambu wa kwocha uze nwakuhana mashimbu eswe ni mulambu wa mbuto ni mulambu wa walwa.

23 “‘Ha tangwa liamuchiwana lia chiwanyino, munulambula yimbembe a kuji 10, kuji a mapanga 2 ni ana-mapanga 14 a mwaka umuwika, eswe apema; 24 munuhana nawa milambu ya mbuto ni ya walwa hali yimbembe a kuji, hali kuji a mapanga ni hali ana-mapanga, kulita ni kwalula cho ni shimbi ya mulambu; 25 ni kuji a pembe umuwika ngwe mulambu wa shili. Hanenu milambu yino hamwe ni mulambu wa kwocha uze nwakuhana mashimbu eswe ni mulambu wa mbuto ni mulambu wa walwa.

26 “‘Ha tangwa liamuchitano lia chiwanyino, munulambula yimbembe a kuji 9, kuji a mapanga 2 ni ana-mapanga 14 a mwaka umuwika, eswe apema; 27 munuhana nawa milambu ya mbuto ni ya walwa hali yimbembe a kuji, hali kuji a mapanga ni hali ana-mapanga, kulita ni kwalula cho ni shimbi ya mulambu; 28 ni kuji a pembe umuwika ngwe mulambu wa shili. Hanenu milambu yino hamwe ni mulambu wa kwocha uze nwakuhana mashimbu eswe ni mulambu wa mbuto ni mulambu wa walwa.

29 “‘Ha tangwa liamuchisambano lia chiwanyino, munulambula yimbembe a kuji 8, kuji a mapanga 2 ni ana-mapanga 14 a mwaka umuwika, eswe apema; 30 munuhana nawa milambu ya mbuto ni ya walwa hali yimbembe a kuji, hali kuji a mapanga ni hali ana-mapanga, kulita ni kwalula cho ni shimbi ya mulambu; 31 ni kuji a pembe umuwika ngwe mulambu wa shili. Hanenu milambu yino hamwe ni mulambu wa kwocha uze nwakuhana mashimbu eswe ni mulambu wa mbuto ni mulambu wa walwa.

32 “‘Ha tangwa liamuchishimbiali lia chiwanyino, munulambula yimbembe a kuji 7, kuji a mapanga 2 ni ana-mapanga 14 a mwaka umuwika, eswe apema; 33 munuhana nawa milambu ya mbuto ni ya walwa hali yimbembe a kuji, hali kuji a mapanga ni hali ana-mapanga, kulita ni kwalula cho ni shimbi ya mulambu; 34 ni kuji a pembe umuwika ngwe mulambu wa shili. Hanenu milambu yino hamwe ni mulambu wa kwocha uze nwakuhana mashimbu eswe ni mulambu wa mbuto ni mulambu wa walwa.

35 “‘Ha tangwa liamuchinake lia chiwanyino, nwatamba kulinga kukunguluka cha mbonge chilemu. Ha tangwa liacho, kunwatambile kulinga mulimo niumwe wa ku musunya. 36 Hakutwala ku mulambu wa kwocha ni mulambu wa kahia wa vumba lipema kuli Yehova, nwatamba kulambula chimbembe wa kuji umuwika, kuji a panga umuwika ni ana-mapanga shimbiali a mwaka umuwika, eswe apema; 37 munuhana nawa milambu ya mbuto ni ya walwa hali yimbembe a kuji, hali kuji a mapanga ni hali ana-mapanga, kulita ni kwalula cho ni shimbi ya mulambu; 38 ni kuji a pembe umuwika ngwe mulambu wa shili. Hanenu milambu yino hamwe ni mulambu wa kwocha uze nwakuhana mashimbu eswe ni mulambu wa mbuto ni mulambu wa walwa.

39 “‘Yino ye milambu nwatamba kuhana kuli Yehova ha yiwanyino yenu ya ha mwaka, hamwe ni milambu yize munuhana hanga numanunune chilakenyo chenu ni milambu yize nwakuhana ni mbunge yeswe, ngwe milambu ya kwocha, milambu ya mbuto, milambu ya walwa ni yitapo ya sambukila.’” 40 Mose yalweza A-Izalele yuma yeswe yize Yehova amutumine kulinga.

30 Kashika, Mose yalweza miata a minyachi ya Izalele ngwenyi: “Yino ye Yehova atuma: 2 Nyi lunga malakenya kuli Yehova chilakenyo chimwe hanji kulishinga hanga alitwamine kulinga yimwe, iye katambile kujilula liji lienyi. Katamba kulinga yeswe yize alakenya.

3 “Nyi pwo yoze uchili mukweze, chikwo nawa uchili ku zuwo lia tato, malakenya chimwe chuma kuli Yehova hanji malishinga kulitwamina kulinga yimwe, 4 mba tato manyingika chilakenyo chacho hanji shingo lize alinga lia kulitwamina kulinga yimwe, alioze tato kechi kumukwika, acho yuma yeswe yize alakenya katamba kuyilinga, shingo lienyi lia kulitwamina kulinga yimwe liatamba kununga. 5 Alioze, nyi tato manyingika chilakenyo hanji shingo lize alinga lia kulitwamina kulinga yimwe mba mamukanjisa, acho yilakenyo yacho kuyichi kununga. Yehova mamukonekena mumu tato mwe wamukanjisa.

6 “Alioze, nyi pwo maya ku ulo ni chilakenyo chenyi, hanji ni shingo lize alinga chakuhona kunyonga kanawa, 7 mba mukwo-lunga machinyingika, nihindu kechi kumukanjisa, acho yilakenyo yacho hanji shingo lienyi lia kulitwamina kulinga yimwe, yeswe muyinunga. 8 Alioze, nyi mukwo-lunga machinyingika mba mamukanjisa, chilakenyo chacho hanji shingo lize alipupwishile kulinga kuyichi kupwako nawa; Yehova mamukonekena.

9 “Nyi tuliwa hanji pwo yoze alakula malakenya chimwe chuma, yuma yeswe yize alakenya katamba kuyilinga.

10 “Alioze, nyi chilakenyo hanji shingo lia kulitwamina kulinga yimwe kanakayilingila ku zuwo lia mukwo-lunga, 11 mba mukwo-lunga yachinyingika, alioze kamukanjishile chipwe kumuzwelesa, yuma yeswe yize alakenyene, hanji shingo lieswalio alingile lia kulitwamina kulinga yimwe, yeswe katamba kuyilinga. 12 Alioze, nyi mukwo-lunga machinyingika, mba makanjisa chilakenyo, hanji shingo lieswe lia kulitwamina kulinga yimwe, iye te katambile kulinga yuma yacho, mumu mukwo-lunga mwe wamukanjisa, Yehova mamukonekena. 13 Lunga kali ni ulite wa kutayiza hanji kukanjisa chilakenyo cheswacho hanji shingo lieswalio linatale ha chilakenyo cha kulitwamina kulinga chimwe. 14 Alioze, hakupalika cha matangwa, nyi lunga kambile nichimwe, chino chinalumbunuka ngwo iye katayiza yilakenyo yeswe ni shingo lize mukwo-pwo alinga lia kulitwamina kulinga chimwe. Katayiza yilakenyo yacho, mumu chipwe ngwe kayinyingika, nihindu kambile nichimwe. 15 Alioze, nyi kwapalika mashimbu mba lunga makanjisa yilakenyo yacho, iye mwe mamona lamba mumu lia uhenge wa mukwo-pwo.

16 “Yino ye shimbi yize Yehova ahanyine kuli Mose hakutwala kuli lunga ni mukwo-pwo, kuli chisemi wa lunga ni mwanenyi wa pwo yoze uchili ku zuwo lienyi.”

31 Yehova yalweza Mose ngwenyi: 2 “Fwetesa A-Mindiane mumu lia upi uze alinga kuli A-Izalele. Mba kulutwe, yena muufwa.”

3 Mose yalweza atu ngwenyi: “Luliekenu malunga hakachi kenu hanga aye ni kwasa jita ni A-Mindiane, nukaule usongwelo wa Yehova ni kufwetesa A-Mindiane upi uze alinga kuli A-Izalele. 4 Nwatamba kutuma mu jita malunga 1,000 a ku minyachi yeswe ya Izalele.” 5 Chocho, hakachi ka tununu a tununu A-Izalele, yasakulaho malunga 1,000 a ku minyachi yeswe. Malunga eswe waze aluliekele hanga aye mu jita kapwile 12,000.

6 Mose yatuma mu jita malunga 1,000 a ku minyachi yeswe hamwe ni Finehase, mwana wa Eleazare, yoze wakawile maswalale. Iye yambata yikashi yisandu ni yitavwi yakuhana nayo chilayi cha jita. 7 Ayo yasa jita ni A-Mindiane ngwe chize Yehova atumine Mose kulinga, yashiha malunga eswe. 8 Hakachi ka waze afwile hapwile mianangana A-Mindiane, mianangana jacho kali wano: Evi, Rekeme, Zure, Hure ni Reba, mianangana atano A-Mindiane. Yaashiha nawa Mbalau mwana wa Mbeore ni katana. 9 Alioze, A-Izalele yakwata mapwo, ana A-Mindiane, yaatwala ngwe funge. Yanda nawa yimuna yo yeswe, mapanga ni upite wo weswe. 10 Yocha mambonge jo eswe muze te atwama ni yilombo yo yeswe. 11 Yanda yikumba yeswe, yuma yeswe ya kupupa, atu ni yimuna. 12 Chocho, ayo yaneha funge, yuma ya kupupa ni yikumba kuli Mose, sasendote Eleazare ni ku chikungulwila cha A-Izalele mu chilombo mu yana ya Moape hakamwihi ni Lwiji Yordau, mu Yeriku.

13 Mose, sasendote Eleazare ni akwa-lutwe eswe a chikungulwila yaya ni kulitakana no haze lia chilombo. 14 Alioze, Mose yevwila uli malunga waze atumine mu jita, tupitau a tununu ni tupitau a kulakaji waze te anakatuka mu jita. 15 Mose yaahula ngwenyi: “Mumu liaka nwahichika mapwo eswe ni mwono? 16 Ayo e avulumwishine A-Izalele kumeso ja Yehova kupalikila mu chiyulo cha Mbalau ha chikuma cha Peore, mba musongo yiwiza mu chikungulwila cha Yehova. 17 Haliapwila yenu nwatamba kushiha ana a malunga ni mapwo eswe waze hanalimona ni malunga. 18 Alioze, nwatamba kuhichika ni mwono ana mapwo eswe waze kanda achilimona ni malunga. 19 Yenu nwatamba kutwama haze lia chilombo ha matangwa shimbiali. Mweswe wa kuli yenu yoze washiha mutu hanji wakwata mufu, katamba kulipemesa ha tangwa liamuchitatu ni ha tangwa liamuchishimbiali hamwe ni funge jenu. 20 Nwatamba kupemesa mazalo jenu eswe, yuma yeswe ya malambu, yuma yeswe yakulinga ni wona-wona wa pembe ni yuma yeswe ya mapaya.”

21 Sasendote Eleazare yalweza maswalale waze ayile mu jita ngwenyi: “Yino ye shimbi yize Yehova ahana kuli Mose ngwenyi: 22 ‘Oru, prata, unengu, utale, chifoya ni shumbu, 23 yuma yeswe yize kuyishi kuwema mu kahia nwatamba kuyipalikisa mu kahia hanga nuyipemese. Alioze, nwatamba kuyipemesa nawa ni meya akupemesa no. Yuma yeswe yize yakuwema mu kahia, nwatamba kuyipalikisa mu meya. 24 Ha tangwa liamuchishimbiali nwatamba kukosa mazalo jenu hanga nulipemese mba nunjile mu chilombo.’”

25 Yehova yalweza Mose ngwenyi: 26 “Alula yuma ya kupupa yize eza nayo, yize atambula hamwe ni atu ni yimuna, chilinge hamuwika ni sasendote Eleazare ni akwa-lutwe akwo a chikungulwila. 27 Teta yuma yacho mu yihanda yaali, chihanda chimuwika chihane kuli maswalale waze anakaya mu jita, chihanda chikwo chihane ku chikungulwila. 28 Ha chihanda cha yuma ya maswalale waze anakaya mu jita, nwatamba kwandaho chuma chimuwika-chimuwika ha chizavu cha 500 a funge, ngombe, yimbulu ni mapanga, chikapwe mulambu wa Yehova. 29 Nwatamba kuyihana kuli sasendote Eleazare ngwe mulambu wa Yehova. 30 Ha chizavu cha 50 a funge, ngombe, yimbulu ni mapanga hanji ha yimuna yeswayo ya A-Izalele, watamba kwandaho chuma chimuwika-chimuwika hanga uchihane kuli A-Levi waze akufunga yuma mu tabernakulu ya Yehova.”

31 Chocho Mose ni sasendote Eleazare, yaalinga yeswe yize Yehova atumine Mose kulinga. 32 Ha yuma ya kupupa yize yasalile ha upite uze atambwile malunga waze ayile ku jita, hapwile mapanga 675,000, 33 ngombe 72,000 34 ni yimbulu 61,000. 35 Mapwo waze te kanda achilimona ni malunga kapwile 32,000. 36 Chihanda cha upite wa maswalale waze ayile mu jita chapwile cha mapanga 337,500. 37 Mapanga waze ahanyine ngwe mulambu kuli Yehova kapwile 675. 38 Hapwile nawa ngombe 36,000, hakachi ka ngombe jacho he anjile 72 waze ahanyine ngwe mulambu kuli Yehova. 39 Hapwile yimbulu 30,500, hakachi ka yimbulu jacho he anjile 61 waze ahanyine ngwe mulambu kuli Yehova. 40 Hapwile atu 16,000, hakachi ka atu jacho he achijile 32 waze ahanyine ngwe mulambu kuli Yehova. 41 Chocho Mose yahana mulambu kuli sasendote Eleazare ngwe mulambu wa Yehova, kulita ni yize Yehova atumine Mose kulinga.

42 Chihanda cha A-Izalele chize Mose achijile hakachi ka chihanda cha malunga waze ayile mu jita chili chino: 43 Chihanda cha mapanga chapwile 337,500; 44 chihanda cha ngombe chapwile 36,000; 45 chihanda cha yimbulu chapwile 30,500; 46 chihanda cha atu chapwile 16,000. 47 Hakachi ka chihanda cha A-Izalele, Mose yanda funge umuwika hakachi ka funge 50 ni chimuna umuwika hakachi ka yimuna, yayihana kuli A-Levi waze te akufunga yuma mu tabernakulu ya Yehova, kulita ni chize Yehova atumine Mose kulinga.

48 Chocho, malunga waze asakwile hanga aye mu jita, tupitau a tununu ni tupitau a kulakaji, yeza kuli Mose, 49 yamulweza ngwo: “Tuvumbi je kalulanga tujita waze ali mu chiyulo chetu, mba katulwezanga ngwo kwahonene niumwe wa kuli ayo. 50 Kashika, mutu ni mutu wa kuli yetu alambule kuli Yehova yize anakawana: Yikwata ya oru, malenge, mikosa, tuzeya, yingeliengelie ni yuma yikwo ya ndando hanga atufukile shili kumeso ja Yehova.”

51 Chocho Mose ni sasendote Eleazare yatayiza oru yacho ni yuma yeswe ya ndando. 52 Oru yeswe yize tupitau a tununu ni tupitau a kulakaji ahanyine kuli Yehova yapwile 16,750 ya shekele. 53 Maswalale eswe kahele chihanda cha upite wa kupupa. 54 Mose ni sasendote Eleazare, yatayiza oru ya tupitau a tununu ni tupitau a kulakaji, yayitwala mu mbalaka ya kulikungulwila hanga yipwe chiwulwiso hali A-Izalele kumeso ja Yehova.

32 Ana ja Rupene ni ana ja Ngate kapwile ni yimuna anji. Ayo yamona ngwo chifuchi cha Yazere ni chifuchi cha Ngiliate, yili yipema chinji hanga alishilemo yimuna. 2 Chocho, ana ja Ngate ni ana ja Rupene yakundama kuli Mose, sasendote Eleazare ni kuli akwa-lutwe ja chikungulwila, yamba ngwo: 3 “Chifuchi cha Atarote, Ndibone, Yazere, Nimera, Heshebone, Eleale, Shebame, Nebo ni Mbeone, 4 yifuchi yize Yehova akumbile kumeso ja chikungulwila cha A-Izalele, yili yifuchi yipema hanga alishilemo yimuna. Tuvumbi je kali ni yimuna anji.” 5 Ayo yamba nawa ngwo: “Nyi muchilita twehenu kama yifuchi yacho ngwe chihinga. Kanda nutuzawisa Yordau.”

6 Chocho Mose yahula ana ja Ngate ni ana ja Rupene ngwenyi: “Chekwamba ngwo, mandumbu jenu maya mu jita, alioze yenu munusala muno? 7 Mumu liaka nunazange kuhongesa A-Izalele hanga ahone kunjila mu chifuchi chize Yehova maaha? 8 Yino ye yisemi jenu alingile ku Kandeshe-Mbania muze naatumine hanga aye ni kwendesa chifuchi. 9 Muze ayo ahetele mu chikulo cha Esekole yamona chifuchi, alioze yahongesa A-Izalele ahone kunjila mu chifuchi chize Yehova te maaha. 10 Ufwatulo wa Yehova yiukasumuka ha tangwa liacho, chocho iye yalishinga ngwenyi: 11 ‘Malunga a miaka 20 hanji kuhiana waze akatuka ku Engitu kechi kanjila mu chifuchi chize nalakenyene kuli Apalahama, Izake ni Yakomba, mumu kangukawile ni mbunge yo yeswe, 12 kuchiza ko wika Kalemba mwana wa Yefune, Ka-Kenaze ni Yoshua mwana wa Nune, mumu ayo kakawile Yehova ni mbunge yo yeswe.’ 13 Kashika, Yehova yevwila A-Izalele uli, yaendanganyisa mu puya ha miaka 40, ndo muze munyachi uze walingile yuma yipi kumeso ja Yehova wakuwile. 14 Haliapwila, yenu munyachi wa yivulumunyi, nunalingi yize atatenu alingile hanga nwokese uli wa Yehova hali A-Izalele. 15 Nyi nwecha kumukaula, iye manuhichika mu puya ha chisuho chamuchiali, yenu munumwesa atu eswe lamba.”

16 Mba ayo yakundama kuli iye ni kumulweza ngwo: “Twechenu hanga tutunge matanga a mawe a yimuna jetu ni mambonge ja ana jetu kuno. 17 Mutununga ni kulilulieka hanga twase jita, mutuya kulutwe lia mandumbu jetu ndo muze manjila mu chifuchi cho. Alioze ana jetu matwama mu mambonge a kujingilika ni yipanga yikolo hanga alifunge kuli atu a mu chifuchi chino. 18 Kutuchi kafuna ku mazuwo jetu ndo muze A-Izalele eswe matambula chifuchi cho ngwe chihinga. 19 Kutuchi katambula chihinga hamwe no mu sali lia Lwiji Yordau, ku chivumbuko.”

20 Mose yaalweza ngwenyi: “Nyi munulinga yize hinwamba, nyi munulilulieka nuye ni kwashila jita Yehova, 21 nyi yenu eswe munulilulieka nuzauke Yordau kumeso ja Yehova muze iye mahanga akwa-kole jenyi 22 ndo muze munukumba chifuchi ni ukwaso wa Yehova, mba munukafuna ni kusamba kuli Yehova ni kuli A-Izalele. Chifuchi chino muchikapwa nichenu kumeso ja Yehova. 23 Alioze, nyi kunwachilingile, munuvulumuna kuli Yehova. Mumu lia chino, nyingikenu ngwenu munukamona lamba mumu lia shili yenu. 24 Munuhasa kutunga mambonge ja ana jenu ni yipanga ya yimuna jenu, alioze nwatamba kulinga yize nwalakenya.”

25 Ana ja Ngate ni ana ja Rupene yamba kuli Mose ngwo: “Yetu tuvumbi je mutulinga kulita ni chize nwamba. 26 Ana jetu, mapwo jetu, mapanga jetu ni yimuna jetu eswe makasala mu mambonge a Ngiliate, 27 alioze yetu tuvumbi jenu mutuzauka Yordau, maswalale eswe mutuya mu jita hanga twashile jita Yehova, ngwe chize yenu, mwene wetu nwamba.”

28 Chocho, Mose yahana shimbi ha kutwala kuli ayo kuli sasendote Eleazare, Yoshua, mwana wa Nune ni kuli miata akwo ja A-Izalele. 29 Mose yaalweza ngwenyi: “Nyi ana ja Ngate ni ana ja Rupene makazauka Yordau hamwe ni yenu, malunga eswe malilulieka hanga aye ni kwashila Yehova jita ni kutambula chifuchi, yenu munwaha chifuchi cha Ngiliate ngwe chihinga. 30 Alioze, nyi ayo kaliluliekele ni kuzauka hamwe ni yenu, makatwama ni yenu mu chifuchi cha Kanana.”

31 Chocho ana ja Ngate ni ana ja Rupene yakumbulula ngwo: “Mutulinga yize Yehova atulweza. 32 Mutulilulieka ni kuzauka Yordau kumeso ja Yehova hanga tuye mu chifuchi cha Kanana, alioze chifuchi cha chihinga chetu chize mutukatambula muchipwa mu sali lino lia Lwiji Yordau.” 33 Chocho Mose yahana kuli ana ja Ngate ni kuli ana ja Rupene ni ku chihanda cha munyachi wa Manase, mwana wa Yosefwe, chifuchi cheswe cha Sahone, mwanangana wa A-Amore, ni chifuchi cheswe cha Oge, mwanangana wa Mbashane, hamwe ni mambonge jamo eswe.

34 Ana ja Ngate yatunga mbonge ya Ndibone, Atarote, Aroere, 35 Atarote-Sofa, Yazere, Jogabeha, 36 Mbete-Nimera, Mbete-Harane, mambonge ali ni yipanga; yatunga nawa malimba a mawe hanga asemo yimuna. 37 Ana ja Rupene yatunga mbonge ya Heshebone, Eleale, Kiriataime, 38 Nebo, Mbale-Meone (yalumuna majina jo) ni Sibima. Mambonge jacho yaaluka majina eka.

39 Ana ja Makire, mwana wa Manase, yaya ni kutambula Ngiliate, yahuma A-Amore waze apwilemo. 40 Chocho Mose yahana mbonge ya Ngiliate kuli Makire, mwana wa Manase, iye yatwamamo. 41 Njaire, mwana wa Manase yatambula yihunda ya mbalaka ya mu chifuchi chacho, yayiluka jina ngwo, Havote-Njaire.* 42 Noba yatambula mbonge ya Kenate ni yihunda yamo, yayiluka jina ngwo, Noba, kulita ni jina lienyi mwene.

33 Chino che A-Izalele apwile ni kulinga wenyi, chize muze akatukile ku Engitu kulita ni yizavu yo, kupalikila mu usongwelo wa Mose ni Arone. 2 Mose yasoneka majina a yihela yize ayo apwile ni kusa yilombo, kulita ni usongwelo wa Yehova. Yihela yacho yapwile yino: 3 Ayo yakatuka ku Ramese ha kakweji mutangu, ha tangwa 15 lia kakweji. Muze Chizomboka te hichapalika, A-Izalele yakatuka ni hamu kumeso ja A-Engitu eswe. 4 Muze A-Izalele akatukile ku Engitu, A-Engitu te kanafunda ana jo eswe atangu, waze Yehova ashihile. Mumu Yehova te hasolola ngwenyi, tuzambi two keshi ni ndundo.

5 Chocho, A-Izalele yakatuka ku Ramese, yatulila ku Sukote. 6 O yakatuka ku Sukote, yatulila ku Etame, ku songo lia puya. 7 Yakatuka ku Etame, yaafuna kunyima, yaatalikisa ku Paihahiro, kulutwe lia Mbale-Zefwone, mba yasa chilombo cho kulutwe lia Mingondole. 8 Yakatuka ku Paihahiro, yaapalika mu kalunga-lwiji, yaaheta mu puya. Yalinga wenyi wa matangwa atatu mu puya ya Etame, yatulila ku Mara.

9 Yakatuka ku Mara, yaaheta ku Elime. Mu Elime mwapwile mashima a meya 12 ni mingaji 70, mba yasako chilombo cho. 10 Yakatuka ku Elime, yatulila ku sesa lia Kalunga-Lwiji Muchila. 11 Yakatuka ku Kalunga-Lwiji Muchila, yasa chilombo cho mu puya ya Shini. 12 Yakatuka mu puya ya Shini, yatulila ku Ndofika. 13 Yakatuka ku Ndofika, yatulila ku Alushe. 14 Yakatuka ku Alushe, yatulila ku Refwindimi, kuze te kukushi meya a kunwa. 15 Yakatuka ku Refwindimi, yasa chilombo cho mu puya ya Sinai.

16 Yakatuka ku puya ya Sinai, yatulila ku Kibrote-Hatava. 17 Yakatuka ku Kibrote-Hatava, yasa chilombo cho ku Hazerote. 18 Mba yakatuka ku Hazerote, yasa chilombo cho ku Ritema. 19 Yakatuka ku Ritema, yasa chilombo cho ku Rimone-Pereze. 20 Yakatuka ku Rimone-Pereze, yasa chilombo cho ku Libna. 21 Ayo yakatuka ku Libna, yasa chilombo cho ku Risa. 22 Mba yakatuka ku Risa, yasa chilombo cho ku Kehelata. 23 Yakatuka ku Kehelata, yasa chilombo cho ku Mulundu wa Sefere.

24 Yakatuka ku Mulundu wa Sefere, yasa chilombo cho ku Harada. 25 Yakatuka ku Harada, yasa chilombo cho ku Makelote. 26 Mba yakatuka ku Makelote, yasa chilombo cho ku Tahate. 27 Yakatuka ku Tahate, yasa chilombo cho ku Tera. 28 Yakatuka ku Tera, yasa chilombo cho ku Miteka. 29 Yakatuka ku Miteka, yasa chilombo cho ku Hasmona. 30 Yakatuka ku Hasmona, yasa chilombo cho ku Moserote. 31 Mba yakatuka ku Moserote, yasa chilombo cho ku Mbene-Jakane. 32 Yakatuka ku Mbene-Jakane, yasa chilombo cho ku Hore-Hangindingate. 33 Mba yakatuka ku Hore-Hangindingate, yasa chilombo cho ku Jotepata. 34 Yakatuka ku Jotepata, yasa chilombo cho ku Aperona. 35 Yakatuka ku Aperona, yasa chilombo cho ku Ezione-Ngebere. 36 Yakatuka ku Ezione-Ngebere, yasa chilombo cho mu puya ya Zini, chekwamba, ku Kandeshe.

37 Mba kulutwe yakatuka ku Kandeshe, yasa chilombo cho ku Mulundu wa Hore, mu njiza ya chifuchi cha Endome. 38 Sasendote Arone yanyina ha Mulundu wa Hore kulita ni shimbi ya Yehova, ha mwaka 40 wa kukatuka cha A-Izalele mu chifuchi cha Engitu yafwa, ha kakweji wamuchitano, ha tangwa litangu lia kakweji wacho. 39 Arone kapwile ni miaka 123 muze afwile ku Mulundu wa Hore.

40 Chocho, mwanangana Arata wa ku Kanana yoze te watwama mu Nengeve, mu chifuchi cha Kanana, yanyingika ngwenyi, A-Izalele kaneza.

41 Hakupalika cha mashimbu, yakatuka ku Mulundu wa Hore, yasa chilombo cho ku Zalmona. 42 Mba yakatuka ku Zalmona, yasa chilombo cho ku Punome. 43 Yakatuka ku Punome, yasa chilombo cho ku Obote. 44 Yakatuka ku Obote, yasa chilombo cho ku Iye-Aparime, mu njiza ya Moape. 45 Mba Yakatuka ku Imi, yasa chilombo cho ku Ndibone-Ngate. 46 Yakatuka ku Ndibone-Ngate, yasa chilombo cho ku Alamone-Ndiblataime. 47 Yakatuka ku Alamone-Ndiblataime, yasa chilombo cho ku milundu ya Aparime, hakamwihi ni Nebo. 48 Kusulaho, yakatuka ku milundu ya Aparime, yasa chilombo cho mu yana ya Moape, hakamwihi ni Lwiji Yordau, ku Yeriku. 49 Yasa chilombo cho hakamwihi ni Lwiji Yordau, chize ku Mbete-Jeshimote ndo ku Abele-Shitime mu yana ya Moape.

50 Yehova yalweza Mose mu yana ya Moape hakamwihi ni Lwiji Yordau, mu Yeriku ngwenyi: 51 “Lweza A-Izalele ngwe: ‘Yenu munuzauka Yordau hanga nuye mu chifuchi cha Kanana. 52 Humenu atu eswe a mu chifuchi chacho, palulenu mawe jo eswe a kutota ni kupuzula tuponya jo eswe a kuzuzulula ni yilumbilo yo yeswe yisandu. 53 Yenu munukatambula chifuchi ni kutwamamo, mumu yami mungukanwaha chifuchi chacho hanga chikapwe chihinga chenu. 54 Yenu nwatamba kuteta chifuchi ni kuchihana ngwe chihinga kuli asoko, kulita ni chela. Ku yizavu yinene, nwatamba kutohwesa chihinga cho, ku yizavu yikehe, nwatamba kukehesa chihinga cho. Chihinga cha mutu ni mutu munuchihana kulita ni haze chela muchiholokela. Yenu munukatambula chihinga chenu kulita ni minyachi ya atatenu.

55 “‘Alioze, nyi kunwahumine atu a mu chifuchi chino, waze makasala mukachi kenu, makapwa kuli yenu ngwe yiswaswa mu meso jenu ni mbimbo mu mijimba yenu. Ayo kumakanupinjisa mu chifuchi chize munukatwama. 56 Mba mungukalinga kuli yenu yize hingunatesa kulinga kuli ayo.’”

34 Yehova yalweza nawa Mose ngwenyi: 2 “Lweza A-Izalele ngwe: ‘Muze mununjila mu chifuchi cha Kanana, munutambula chifuchi chacho ngwe chihinga, chifuchi cheswe cha Kanana ni njiza jacho.

3 “‘Ku uto njiza muyilitanda chize ku puya ya Zini hakamwihi ni Endome. Ku chivumbuko, njiza ya ku uto muyiputukila ku songo lia Kalunga-Lwiji wa Mungwa. 4 Njiza muyitalikisa kweka hanga yipalike ku uto ni kukanduka ku Akarabimi ni kununga ndo ku Zini ni ku songo lia ku uto wa Kandeshe-Mbania. Mba muyilitanda ndo ku Haza-Andare ni kununga ndo ku Azamone. 5 Ku Azamone njiza muyitalikisa ku Lwiji* wa Engitu ni kusulila ku Kalunga-Lwiji.*

6 “‘Njiza ya ku chitokelo muyikapwa Kalunga-Lwiji Munene ni mbaka yako. Yino ye muyikapwa njiza ya ku chitokelo.

7 “‘Njiza ya ku sango muyikakatuka ku Kalunga-Lwiji Munene ni kuya ndo ku Mulundu wa Hore. 8 Njiza muyiputukila ku Mulundu wa Hore ndo ku Lebo-Hamate, muyisulila ku Zedade. 9 Njiza muyipalikila ku Zifrome muyihwila ku Haza-Ena. Yino ye njiza ya ku sango.

10 “‘Njiza yenu ya ku chivumbuko muyiputukila ku Haza-Ena ndo ku Sefa. 11 Njiza muyiya ku Sefa ndo ku Ribila ku chivumbuko cha Ayine, muyipalumuka ku ngenge ya Kalunga-Lwiji wa ku chivumbuko ku Chinerote.* 12 Mba njiza muyiheta ku Lwiji Yordau ni kusulila ku Kalunga-Lwiji wa Mungwa. Chino che muchikapwa chifuchi che ni njiza yamo.’”

13 Mose yalweza A-Izalele ngwenyi: “Chino che chifuchi chize nwatamba kuhana ngwe chihinga kulita ni chela, ngwe chize Yehova atuma hanga nuhane ku minyachi livwa ni chipinji. 14 Mumu munyachi wa A-Rupene kulita ni akwa-jiko lia tato, munyachi wa A-Ngate kulita ni akwa-jiko lia tato ni chihanda cha munyachi wa A-Manase hatambula kulu chihinga cho. 15 Minyachi yaali ni chipinji yatambula kulu chihinga cho ku chivumbuko cha Yordau ku Yeriku ku utuhukilo wa tangwa.”

16 Yehova yalweza nawa Mose ngwenyi: 17 “Wano e majina ja malunga waze makanutetela chifuchi ni kunwahacho ngwe chihinga: Sasendote Eleazare ni Yoshua mwana wa Nune. 18 Sanyikenu akwa-lutwe a minyachi yeswe hanga anukwase kuteta chifuchi chize munutambula ngwe chihinga. 19 Majina ja malunga jacho kali wano: Ku munyachi wa Yunda, Kalemba mwana wa Yefune; 20 ku munyachi wa ana ja Simeone, Shemuele mwana wa Amihude; 21 ku munyachi wa Mbenjamine, Elidade mwana wa Chiselone; 22 ku munyachi wa ana ja Ndane, mukwa-lutwe umuwika, Mbuke mwana wa Yokele; 23 kuli ana ja Yosefwe, a ku munyachi wa ana ja Manase, mukwa-lutwe umuwika, Haniele mwana wa Efode; 24 ku munyachi wa ana ja Eframe, mukwa-lutwe umuwika, Kemuele mwana wa Shifetane; 25 ku munyachi wa ana ja Zapulone, mukwa-lutwe umuwika, Elizafane mwana wa Panake; 26 ku munyachi wa ana ja Yisaka mukwa-lutwe umuwika, Palitele mwana wa Aza; 27 ku munyachi wa ana ja Ashe, mukwa-lutwe umuwika, Ahihude mwana wa Selomi; 28 ku munyachi wa ana ja Napatali, mukwa-lutwe umuwika, Pendaele mwana wa Amihude.” 29 Yehova katumine malunga wano hanga atetele A-Izalele chihinga mu chifuchi cha Kanana.

35 Yehova yalweza Mose mu yana ya Moape, hakamwihi ni Lwiji-Yordau, hatalanganyi ni Yeriku ngwenyi: 2 “Lweza A-Izalele ngwe, chihinga chize matambula, akahane kuli A-Levi mambonge waze makatwama. Ayo katamba nawa kuhana kuli A-Levi yihela ya kulishilamo yimuna jo. 3 A-Levi makatwama mu mambonge jacho, yihela yize yili hakamwihi muyikapwa ya kulishila yimuna jo ni kutulikila yikumba yo ni yimuna akwo. 4 Yihela yili hakamwihi ni mbonge yize munukahana kuli A-Levi muyikapwa ya mbandu 1,000. Muyikaputukila ku chikalakala hakamwihi ni mbonge. 5 Haze lia mbonge, nwatamba kwalula 2,000 a mbandu ku chivumbuko, 2,000 a mbandu ku uto, 2,000 a mbandu ku chitokelo ni 2,000 a mbandu ku sango; mbonge muyikapwa mukachi. Yino ye yihela ya kulishila yimuna yili hakamwihi ni mbonge jo.

6 “Helu lia mambonge 42, munuhana nawa kuli A-Levi mambonge 6 a uchinyino hanga yoze mashiha mutu achinyinemo. 7 Yenu nwatamba kuhana kuli A-Levi unji wa mambonge 48 hamwe ni yihela ya kulishilamo yimuna. 8 Mambonge waze munukahana kuli A-Levi, makakatuka ku chihinga cha A-Izalele. Ku yizavu yinene-yinene, munutambulako mambonge anji, ku yizavu yikehe-yikehe munutambulako mambonge akehe. Chizavu ni chizavu muchikahana kuli A-Levi mambonge jo amwe, kulita ni chihinga chize matambula.”

9 Yehova yamba nawa kuli Mose ngwenyi: 10 “Lweza A-Izalele ngwe: ‘Munuzauka Yordau ni kunjila mu chifuchi cha Kanana. 11 Sakulenu mambonge ashi kuwana apwe mambonge a uchinyino, hanga muchinyine mutu yoze mashiha mukwo chakuhona kumuhalila. 12 Mambonge jacho mapwa mambonge a uchinyino kuli yenu hanga yoze mashiha mukwo achine kumushiha, shimbu kanda achimusopesa mu chikungulwila. 13 Mambonge asambano waze munukahana, makapwa mambonge a uchinyino. 14 Yenu munukasakula mambonge atatu mu sali lia Yordau ni mambonge atatu mu chifuchi cha Kanana hanga akapwe mambonge a uchinyino. 15 Mambonge jacho asambano, makapwa mambonge a uchinyino kuli A-Izalele, kuli yilambala ni kuli waze ali mukachi ko hanga yoze mashiha mutu chakuhona kumuhalila achinyinemo.

16 “‘Alioze, nyi iye kalamba mukwo ni utale, mba mutu wacho mafwa, iye kali chingalwe. Chingalwe katamba kumushiha. 17 Nyi iye kakonga liwe kuli mukwo, mba mutu wacho mafwa, iye kali chingalwe. Chingalwe katamba kumushiha. 18 Nyi iye malamba mukwo ni mutondo, mba mutu wacho mafwa, iye kali chingalwe. Chingalwe katamba kumushiha.

19 “‘Mukwa-kukala manyinga mwe mashiha chingalwe. Iye mamushiha muze mamuwana. 20 Nyi mutu mafwa mumu lia kumununguna kuli mukwo yoze te unamuvwila kole hanji kumwasa chimwe chuma, 21 hanji kumulamba kome mumu lia kole, mba mukwo mafwa, iye katamba kumushiha, mumu kali chingalwe. Mukwa-kukala manyinga makashiha chingalwe muze mamuwana.

22 “‘Alioze, nyi iye manunguna mukwo hanji kumwasa chimwe chuma chakuhona kumuhalila hanji kumuvwila kole, 23 hanji mamuholwela liwe mumu kamumwene, chipwe ngwe hi mukwa-kole wenyi ko, hanji kazangile kumulinga upi, mba mutu wacho mafwa, 24 ha chikuma chino, chikungulwila chatamba kusopa mulonga hakachi ka iye ni mukwa-kukala manyinga, kulita ni usongwelo uno. 25 Chikungulwila chatamba kulamwina mutu yoze washiha mukwo ku moko ja mukwa-kukala manyinga ni kumufunyisa mu mbonge ya uchinyino kuze achinyina. Iye katamba kutwama mu mbonge yacho ndo ha kufwa cha sasendote wa lutwe, yoze awayishile ni maji asandu.

26 “‘Alioze, nyi yoze washiha mukwo makatuka mu njiza ya mbonge ya uchinyino 27 mba mukwa-kukala manyinga mawana mutu wacho haze lia mbonge ya uchinyino ni kumushiha, mukwa-kukala manyinga kechi kupwa ni mulonga wa manyinga. 28 Mutu yoze washiha mukwo katamba kutwama mu mbonge ya uchinyino ndo ha kufwa cha sasendote wa lutwe. Mba muze sasendote wa lutwe mafwa, iye mahasa kufuna ku maho. 29 Usongwelo uno muukapwa shimbi kuli yenu ja kusopesa najo yisemuko yenu yeswe, kweswako kuze munutwama.

30 “‘Mweswawo yoze mashiha mukwo, katamba kumushiha ngwe chingalwe kulita ni sango ja yela. Alioze, katambile kushiha mutu niumwe kulita ni yize chela umuwika mamba. 31 Kanda nutayiza ndando ya ukuule wa kulamwina mwono wa chingalwe yoze watamba kufwa. Iye katamba kufwa. 32 Kanda nutayiza ndando ya ukuule hali mutu yoze wachinyina mu mbonge ya uchinyino ni kumwecha hanga afune mu chifuchi chenyi, muze sasendote wa lutwe kanda achifwa.

33 “‘Kanda nupihisa chifuchi chize nwatwama, mumu manyinga kakupihisa chifuchi. Kwatambile kupwa chuma nichimwe chize muchifuka shili ya mutu yoze wamwanga manyinga, shina wika manyinga ja yoze washiha mutu wacho. 34 Kanda nupihisa chifuchi chize nwatwama, chize yami natwama. Mumu yami Yehova, natwama mukachi ka A-Izalele.’”

36 Akwa-lutwe a munyachi wa Ngiliate, mwana wa Makire, mwana wa Manase, a mu usoko wa ana ja Manase, yakundama kuli Mose ni kuli miata akwo A-Izalele, 2 yamba ngwo: “Yehova katuma yena mwene wetu hanga utetele A-Izalele chifuchi ngwe chihinga ha kuta chela. Yehova katuma nawa yena mwene wetu hanga uhane chihinga cha Zelofehade ndumbwetu kuli ana jenyi a mapwo. 3 Nyi ayo malimbata ni malunga a munyachi weka wa A-Izalele, chihinga cha mapwo wano machichiza ku chihinga cha munyachi wa yisemi jetu hanga achiwezele ha chihinga cha munyachi wa malunga waze malimbata no, chocho chihanda chimwe cha chihinga chetu matutambulacho. 4 Ha mwaka wa Chiwanyino cha Utuswilo wa A-Izalele, chihinga cha mapwo wano makachiwezela ha chihinga cha munyachi wa malunga waze malimbata no. Chocho chihinga cho makachichiza ha chihinga cha munyachi wa yisemi jetu.”

5 Kashika, kulita ni shimbi ja Yehova, Mose yalweza A-Izalele ngwenyi: “Yuma yize munyachi wa ana ja Yosefwe amba yinalite. 6 Yino ye Yehova atuma ha kutwala kuli ana ja Zelofehade ngwenyi: ‘Ayo mahasa kulimbata ni mweswawo yoze mazanga, alioze mutu wacho katamba kupwa wa mu usoko wa munyachi wa tato. 7 Munyachi ni munyachi wa A-Izalele kuwatambile kupalikisa chihinga cho ku munyachi ukwo, mumu A-Izalele katamba kununga ni chihinga cha munyachi wa tulamba jo. 8 Pwo yoze uli ni chihinga mukachi ka minyachi ya A-Izalele katamba kulimbata ni lunga wa mu munyachi wa tato hanga A-Izalele anunge ni chihinga cha tulamba jo. 9 Chihinga nichimwe katambile kuchihana ku munyachi ukwo, mumu munyachi ni munyachi wa A-Izalele watamba kununga ni chihinga cho.’”

10 Ana ja Zelofehade yalinga kulita ni chize Yehova atumine kupalikila muli Mose. 11 Chocho, Mala, Tiriza, Hogala, Milika ni Noa, ana ja Zelofehade, yaambata kuli ana a usoko wa tato. 12 Ayo yalimbata ni malunga a mu usoko wa Manase, mwana wa Yosefwe hanga chihinga cho chinunge mu munyachi wa tato.

13 Jino je shimbi ni yiyulo yize Yehova ahanyine kuli A-Izalele kupalikila muli Mose mu yana ya Moape, hakamwihi ni Lwiji Yordau, ku Yeriku.