EZERA

1 Ha mwaka utangu wa Siru Mwanangana wa Persia, mba te maliji waze Yehova ahanjikile kupalikila muli Jeremia amanunuke, Yehova yakasumuna mbunge ya Siru Mwanangana wa Persia, hanga atwe mutambi mu wanangana wenyi weswe ni kuusoneka. Mutambi wacho wambile ngwo:

2 “Chocho anambe Siru, Mwanangana wa Persia ngwenyi: ‘Yehova, Zambi wa mwilu, hanangwehe mawanangana eswe a hashi, ni kungutongola hanga ngumutungile zuwo mu Yerusaleme, yize yili mu Yunda. 3 Mweswawo hakachi kenu yoze uli wa kuli atu jenyi, Zambi yenyi apwe hamwe nenyi. Kashika, kandukenu ku Yerusaleme mu Yunda hanga nukatungulule zuwo lize lili ku Yerusaleme, zuwo lia Yehova,* Zambi ya Izalele, Zambi wamwenemwene. 4 Mweswawo yoze watwama ngwe chilambala, unazange kufuna, enyembo jenyi amukwase kweswako kuze ali ha kumwaha prata, oru, upite, yimuna hamwe ni mulambu hanga akauhane mu zuwo lia Zambi wamwenemwene, lize lili mu Yerusaleme.’”

5 Chocho, akwa-lutwe a minyachi ya atato ya A-Yunda ni A-Mbenjamine hamwe ni asasendote ni A-Levi, eswe waze Zambi wamwenemwene akasumwine mbunge jo, yaalilulieka hanga atungulule zuwo lia Yehova lize liapwile mu Yerusaleme. 6 Enyembo jo eswe yaakwasa ha kwaha yikwata ya prata, ya oru, upite, yimuna, yuma ya ndando yinji hamwe ni yawana yize apwile ni kuhana ni mbunge yeswe.

7 Chikwo nawa, mwanangana Siru yatuma kwanda yikwata ya mu zuwo lia Yehova yize Nabukanezore anjile ku Yerusaleme ni kuyisa mu zuwo lia zambi yenyi. 8 Mba Siru mwanangana wa Persia, yahana kuli Miteredate kafunga ka upite, chiteli cha kuchiza yikwata, mba yayalula ni kuhana yikwata yeswe kuli She-shabazare mukwa-lutwe wa Yunda.

9 Yuma yize alwile yili yino: 30 a yisoka ya oru, 1,000 ka yisoka ja prata, yikwachilo yikwo 29, 10 30 a misenge ya oru, 410 lia misenge ya prata ni 1,000 ka yikwachilo yikwo. 11 Yikwachilo yeswe ya oru ni ya prata yapwile 5,400. Yino yeswe kayimbachile kuli She-shabazare muze funge akatukile ku Babilonia ni kuya ku Yerusaleme.

2 Wano kali malunga a mu mbonge* waze akatukile mu undungo, hakachi ka waze Nabukanezore Mwanangana wa Babilonia atwalile ngwe funge mu undungo ku Babilonia. Ayo kafunyine ku Yerusaleme ni mu Yunda, mutu ni mutu mu mbonge yenyi. 2 Wano e ejile ni Zorobabele, Yeshua, Nehemia, Seraia, Relaia, Mordekai, Bilesane, Mizepare, Bikavaia, Rehume ni Bana.

Unji wa malunga A-Izalele kapwile wano: 3 Ana ja Paroshe, 2,172; 4 ana ja Shefatia, 372; 5 ana ja Ara, 775; 6 ana ja Pahata-Moape wa kuli ana ja Yoshua ni Joabe, 2,812; 7 ana ja Elame, 1,254; 8 ana ja Zatu, 945; 9 ana ja Zakai, 760; 10 ana ja Mbani, 642; 11 ana ja Bebai, 623; 12 ana ja Azegate, 1,222; 13 ana ja Adonikame, 666; 14 ana ja Bikavaia, 2,056; 15 ana ja Adine, 454; 16 ana ja Atere, usoko wa Hezekia, 98; 17 ana ja Bezaia, 323; 18 ana ja Jora, 112; 19 ana ja Hashume, 223; 20 ana ja Gibare, 95; 21 ana ja Mbeteleme 123; 22 malunga a ku Netofa, 56; 23 malunga a ku Anatote, 128; 24 ana ja Azmave, 42; 25 ana ja Kiriate-Arime, ana ja Chefira ni ana ja Mberote, 743; 26 ana ja Rama ni Ngeba, 621; 27 malunga a ku Mikimashi, 122; 28 malunga a ku Mbetele ni Ayi, 223; 29 ana ja Nebo, 52; 30 ana ja Magebishe, 156; 31 ana ja Elame mukwo, 1,254; 32 ana ja Harimi, 320; 33 ana ja Lode, ana ja Hadide ni ana ja Ono, 725; 34 ana ja Yeriku, 345; 35 ana ja Sena, 3,630.

36 Wano e asasendote: Ana ja Jedaia, usoko wa Yeshua, 973; 37 ana ja Imere, 1,052; 38 ana ja Pashure, 1,247; 39 ana ja Harimi, 1,017.

40 Wano e A-Levi: Ana ja Yeshua ni ja Kamiele, a kuli ana ja Hodavia, 74. 41 Wano e njimba: Ana ja Asafwe, 128. 42 Wano e ana ja akwa-kufunga mapito: Ana ja Shalume, ana ja Atere, ana ja Talmone, ana ja Akube, ana ja Hatita ni ana ja Shobai, ayo eswe kapwile 139.

43 Tuvumbi a mu tembele* kapwile wano: Ana ja Ziha, ana ja Hasufa ni ana ja Tabaote, 44 ana ja Kerose, ana ja Siaha, ana ja Padone, 45 ana ja Lebana, ana ja Hagaba, ana ja Akube, 46 ana ja Hagabe, ana ja Shalmai, ana ja Hanane, 47 ana ja Gidele, ana ja Gahare, ana ja Reaia, 48 ana ja Rezine, ana ja Nekoda, ana ja Gazame, 49 ana ja Uza, ana ja Pasea, ana ja Besai, 50 ana ja Asena, ana ja Meunime, ana ja Nefusime, 51 ana ja Bakabuke, ana ja Hakufa, ana ja Harure, 52 ana ja Bazelute, ana ja Mehida, ana ja Haresha, 53 ana ja Barkose, ana ja Sisera, ana ja Tema, 54 ana ja Nezia ni ana ja Hatifa.

55 Wano kali ana ja tuvumbi ja Solomone: Ana ja Sotai, ana ja Soferete, ana ja Peruda, 56 ana ja Jala, ana ja Darekone, ana ja Gidele, 57 ana ja Shefatia, ana ja Hatile, ana ja Pokerete-Zebaime ni ana ja Ami.

58 Tuvumbi eswe a mu tembele* ni ana ja tuvumbi ja Solomone kapwile, 392.

59 Wano kali majina ja atu waze akatukile ku Tela-Mela, Tela-Haresha, Kerube, Adane ni Imere. Alioze ayo kakahashile kusolola minyachi ya atato ni yisemuko yo hanga anyingike nyi kapwile A-Izalele nyi ka. 60 Ana ja Ndelaia, ana ja Tobia ni ja Nekoda, kapwile 652; 61 kuli ana ja asasendote kwapwile wano: Ana ja Habaia, ana ja Koze ni ana ja Bazilai, yoze wambachile pwo hakachi ka ana ja Bazilai Ka-Ngiliate, ni kuhinga jina lia usoko wacho. 62 Wano eswe kafupile majina jo mu mikanda ya yisemuko, alioze kakawanyinemo. Kashika, yaachiza ha mulimo wa usasendote.* 63 Nguvulu yaalweza hanga alitwamine kulia yuma yisandu ndo muze mukupwa umwe sasendote mahula Zambi kupalikila mu Urimi ni Tumimi.

64 Akwa-chikungulwila eswe kapwile 42,360, 65 kuchizako ndungo a malunga ni a mapwo waze apwile 7,337; hapwile nawa 200 ja njimba a malunga ni a mapwo. 66 Tuvwalu jo kapwile 736; mula jo kapwile 245; 67 tumelu jo kapwile 435; yimbulu jo kapwile 6,720.

68 Muze ahetele ku zuwo lia Yehova, ku Yerusaleme, amwe akwa-lutwe a minyachi ya atato yahana milambu ku zuwo lia Zambi wamwenemwene hanga alitungulule mu chihela chalio. 69 Kulita ni upite uze apwile nawo, ayo yahana milambu yakukwasa nayo milimo 61,000 drakma ja oru,* 5,000 a mina* ja prata ni 100 wa mazalo asuku-asuku ja asasendote. 70 Chocho asasendote, A-Levi, amwe a kuli atu, njimba, akwa-kufunga yajilo ni tuvumbi a mu tembele,* yaya ni kutwama mu mambonge jo. Ni A-Izalele* waze asalile yaya ni kutwama mu mambonge jo.

3 Muze kakweji wamuchishimbiali ahetele ni A-Izalele* te hapwa kulu mu mambonge jo, ayo yalikungulula hamuwika mu Yerusaleme. 2 Henaho, Yeshua mwana wa Jozadake ni asasendote akwo, ni Zorobabele mwana wa Salatiele ni akwa-milimo ni akwo yaputuka kutunga chilumbilo cha Zambi wa Izalele, hanga alambuleho milambu ya kwocha kulita ni chize chinasonewa mu Shimbi ya Mose, mutu wa Zambi wamwenemwene.

3 Chipwe ngwe kevwile woma wa atu waze te atwama mu yifuchi ya hakamwihi, nihindu yatunga chilumbilo mu chihela chizechene chapwile chitangu, yaputuka kulambula milambu ya kulumba kuli Yehova, milambu ya kulumba ya chimene ni ya chingoloshi. 4 Yaalinga Chiwanyino cha Yisakila kulita ni chize chasonewene. Matangwa eswe te kakuhana milambu ya kulumba kulita ni yize atesele kuhana ha tangwa ni tangwa. 5 Kulutwe, yalambula milambu ya kulumba ya matangwa eswe ni milambu ya tukweji aha ni ya yiwanyino yeswe yisandu ya Yehova, hamwe ni milambu yeswe yize atu apwile ni kuhana kuli Yehova ni mbunge yo yeswe. 6 Chize ha tangwa litangu lia kakweji wamuchishimbiali, yaputuka kulambula milambu ya kulumba kuli Yehova, chipwe ngwe fundamentu ya tembele ya Yehova te kanda achiyisa.

7 Ayo yahana mbongo kuli akwa-kupalwola mawe ni akwa-utotombo, yahana nawa kulia, walwa ni maji a olevwe kuli A-Sendone ni A-Teru mumu lia kuneha mapaya a sedru kupalikila mu kalunga-lwiji chize ku Lebano ndo ku Yopa, kulita ni usongwelo uze atambwile kuli Siru, Mwanangana wa Persia.

8 Muze te hikwapalika miaka yaali chize haze ahetele ku zuwo lia Zambi wamwenemwene mu Yerusaleme, ha kakweji wamuchiali, Zorobabele mwana wa Salatiele ni Yeshua mwana wa Jozadake, yaputuka mulimo wa kutunga hamwe ni akwa-milimo ni akwo, asasendote ni A-Levi ni eswe waze akatukile ku undungo, ayile ku Yerusaleme. Ayo yatongola A-Levi waze apwile ni miaka 20 hanji kuhiana hanga asongwele mulimo wa zuwo lia Yehova. 9 Chocho, Yeshua ni ana jenyi ni A-Levi ni akwo, ni Kamiele ni ana jenyi, waze apwile ana ja Yunda, yaalichinga hanga asongwele mulimo wa zuwo lia Zambi wamwenemwene, hamwe ni ana ja Henadade, ana jenyi ni mandumbu* jenyi waze no apwile A-Levi.

10 Muze akwa-kutunga asele fundamentu ya tembele ya Yehova, asasendote waze apwile ni mazalo jo a usasendote ni yitavwi yo ni A-Levi ana ja Asafwe waze apwile ni sembalu jo, yaakatuka hanga ahalise Yehova kulita ni usongwelo wa Ndawichi, Mwanangana wa Izalele. 11 Yaaputuka kuhalisa Yehova ni kumusakwilila ha kwimba mwaso uno ngwo: “Mumu iye mupema, utu wa zango lienyi hali A-Izalele muununga ndo ku miaka ya mutolo.” Chocho atu eswe yaakololoka ni liji mwilu ni kuhalisa Yehova, mumu fundamentu ya zuwo lia Yehova te hayisa. 12 Asasendote anji, A-Levi, akwa-lutwe a minyachi ya atato ni tushinakaji waze amwene zuwo litangu yalila mbimbi ha kumona chize asele fundamentu ya tembele. Alioze akwo waze apwileho yakololoka chikolo ni uwahililo. 13 Kashika, niumwe yoze wahashile kusa chinyingi cha zungo lia uwahililo ni cha mbimbi wakuhi, mumu atu akololokele ni liji mwilu. Zungo liacho liahetele kusuku.

4 Muze akwa-kole ja A-Yunda ni ja A-Mbenjamine anyingikine ngwo, waze akatukile ku undungo te kanatunga tembele ya Yehova, Zambi ya Izalele, 2 hazehene ayo yaya kuli Zorobabele ni kuli akwa-lutwe a minyachi ya atato ni kwamba ngwo: “Tutayizenu tutunge hamuwika ni yenu, mumu chizechene ngwe yenu, ni yetu twakuwayila* Zambi yenu, twakulambula yitapo kuli iye chize ha matangwa ja Ezare-Hadone Mwanangana wa Suria, yoze watunehene kuno.” 3 Alioze, Zorobabele, Yeshua ni akwa-lutwe akwo a minyachi ya atato ya A-Izalele, yaalweza ngwo: “Kunuchi kutunga ni yetu zuwo lia Zambi yetu, mumu yetu ene e mututunga zuwo lia Yehova, Zambi ya Izalele, ngwe chizechene atutumine kuli Siru, Mwanangana wa Persia.”

4 Chipwe chocho, atu a mu yifuchi ya hakamwihi te kakuhongesa A-Yunda mashimbu eswe ni kwevwisa woma hanga eche mulimo wa kutunga. 5 Yafweta mbongo kuli akwa-mana hanga apinjise A-Yunda ha matangwa eswe a Siru, Mwanangana wa Persia ndo ha kuyula cha Dariu, Mwanangana wa Persia. 6 Ku uputukilo wa kuyula cha Mwanangana Ahashueru, akwa-kole yaasoneka sango ja mahuza hanga asume mulonga atu a mu Yunda ni a mu Yerusaleme. 7 Ha matangwa ja Artasherke Mwanangana wa mu Persia, Bishalame, Miteredate, Tabiele ni atu akwo waze te akukalakala no yasonekena mwanangana Artasherke mukanda. Ayo yalumbununa mukanda wacho mu limi lia Arame ni kuusoneka ni sona ja Arame.*

8 *Rehume kapitau wa lutwe wa nguvulu ni Shimishaia mukwa-kusoneka, yasonekena mwanangana wa Persia mukanda wa kulimika ni Yerusaleme, ha mukanda wacho hapwile ha kusoneka ngwo: 9 (Mukanda wapwile wa Rehume, kapitau wa lutwe wa nguvulu, Shimishaia mukwa-kusoneka, ni atu akwo waze te akukalakala no, e ngaji, mihato ja nguvulu, akwa-kusoneka, atu a mu Ereke, A-Babilonia, ni atu a mu Shushane hanji ngwetu, atu a mu Elame, 10 ni mavungu akwo waze Asenapare mulemu wahiana atwalile mu undungo ni kwasa mu mambonge ja Samaria ni ku yihela yikwo ya hakamwihi ku chitokelo cha Lwiji Ufrateze. 11 Wano e maliji a mukanda uze atumine.)

“Kuli Mwanangana Artasherke, kukatuka kuli tuvumbi je, malunga a ku yihela ya ku chitokelo cha Lwiji Ufrateze: 12 Tunazange kunyingikisa mwanangana ngwetu, A-Yunda waze akatukile kuli yenu ni kwiza mu njiza yetu, haheta mu Yerusaleme. Ayo kanatungulula mbonge yipi ya uhulia, kanahwisa yipanga ni kukolesa fundamentu. 13 Mwanangana nyingikenu ngwenu, nyi mbonge yino mayitungulula ni yipanga yamo mayihwisa, ayo kechi kafweta nawa lijimu chipwe kuhana milambu ni mbongo. Chino muchihwisa upite mu mushete wa wanangana. 14 Amu fweto yetu yakukatuka ku zuwo lia wanangana, yitumona ngwetu, kuchalitele kuhola ha kumona chize ayo anapihisa mulimo wa mwanangana,* kashika twatuma lusango yono kuli mwanangana, 15 hanga nuhengwole mu mukanda wa sango ja tulamba twenu. Ha mukanda wacho munumonaho ngwenu, mbonge yino yili mbonge ya uhulia yize yakupinjisa mianangana. Chikwo nawa, chize ku mashimbu akunyima mukwete waze akusupwila akwo hanga anehe mbwanja, kashika mbonge yino ayinongesene. 16 Tunazange kulweza mwanangana ngwetu, nyi mbonge yino mayitungulula, chikwo nawa yipanga yamo mayihwisa, yenu mwanangana kunuchi kuhasa kuyula sali lino lia chitokelo lia Lwiji Ufrateze.”

17 Mwanangana yatuma lusango yono hanga akumbulule Rehume kapitau wa lutwe wa nguvulu, Shimishaia mukwa-kusoneka ni atu akwo waze apwile mu Samaria ni ku yihela yikwo ya ku chitokelo cha Lwiji Ufrateze, ngwenyi:

“Mwoyo wenu! 18 Mukanda uze nwangutuminanga kautanganga* kanawa kumeso jami. 19 Chocho yingutuma hanga ahengwole chikuma chacho, mba yanyingika ngwo, mbonge yino chize ku mashimbu akunyima yakulimika ni mianangana, chikwo nawa, mwakupwa mbwanja ni vunda yinji. 20 Mu Yerusaleme mwapwile mianangana a ndundo waze apwile ni kuyula chifuchi cheswe cha ku chitokelo cha Lwiji Ufrateze, te kakwafweta milambu, lijimu ni mbongo. 21 Kashika, hanenu shimbi hanga malunga jacho alitwamine kutungulula mbonge yacho ndo muze munguhana shimbi yeka. 22 Kanda nulengulula yize ngunanulweze hakutwala ku chikuma chino, hanga mbongo mu mushete wa wanangana jihone kuhwa.”‏

23 Muze atangile mukanda wa Mwanangana Artasherke kumeso ja Rehume ni Shimishaia mukwa-kusoneka ni akwa-milimo ni akwo, ayo yaya fuji-fuji kuli A-Yunda ku Yerusaleme, yaakwika kulinga mulimo. 24 Chocho mulimo wa zuwo lia Zambi ku Yerusaleme yiumana, yiumana ndo ha mwaka wamuchiali wa kuyula cha Dariu, Mwanangana wa Persia.

5 Kulutwe, profeta Hagaia ni profeta Zekaria mujikulu wa Ido, yaprofeteza kuli A-Yunda waze apwile mu Yunda ni mu Yerusaleme, mu jina lia Zambi ya Izalele yoze wapwile hamwe no. 2 Chocho Zorobabele, mwana wa Salatiele ni Yeshua mwana wa Jozadake, yaputuka mulimo wa kutungulula zuwo lia Zambi mu Yerusaleme. Aprofeta ja Zambi kapwile hamwe no ni kwakwasa. 3 Ha matangwa jacho Tatenaia, nguvulu wa mu chifuchi cha ku chitokelo cha sali lia Lwiji Ufrateze, Shetare-Bozena ni akwa-milimo ni akwo yahula ngwo: “Iya wanutuma kutunga zuwo lino ni kumanununa yikalakala yamo?” 4 Ayo yahula nawa ngwo: “Malunga wano analingi mulimo uno majina jo aya?” 5 Alioze Zambi te kakufunga* makulwana a mu Yunda, niumwe yoze wakwikile wakuhi ndo muze Dariu te matambula lusango ni kutuma cheka nawa mukanda hakutwala ku chikuma chacho.

6 Uno uli mukanda uze Tatenaia, nguvulu wa mu chifuchi cha ku chitokelo cha sali lia Lwiji Ufrateze, Shetare-Bozena ni akwa-milimo ni akwo, e mihato a nguvulu a ku chifuchi cha ku chitokelo cha sali lia Lwiji Ufrateze atumine kuli Mwanangana Dariu. 7 Yamutumina mukanda unambe ngwo:

“Kuli Mwanangana Dariu:

“Tunanumeneka, mwanangana! 8 Mwanangana, tunazange nunyingike ngwenu, twayanga mu mbonge ya Yunda, ku zuwo lia Zambi munene lize anatungulula ni mawe anene-anene ni mapaya waze anase ku yikalakala. Mulimo wacho kanaulingi ni uwahililo, chikwo nawa, unende kawashi-washi kulita ni tachi jo. 9 Chocho, yituhula makulwana jo ngwetu: ‘Iya wanutuma kutunga zuwo lino ni kumanununa yikalakala yamo?’ 10 Yitwahula nawa majina jo hanga tuhase kunulweza ni kunusonekena hakutwala kuli malunga waze anasongwela mulimo.

11 “Lino lie kumbululo atuhele ngwo: ‘Tuli tuvumbi ja Zambi wa mu malilu ni hashi, tunatungulula zuwo lize atungile ha miaka yinji kunyima, lize atungile ni kuhwisa kuli mwanangana munene wa mu Izalele. 12 Alioze, amu yisemi jetu avulumwine kuli Zambi wa mu malilu, iye yaakunjika ku moko ja Nabukanezore, Ka-Kaletea, Mwanangana wa mu Babilonia yoze wapuzwile zuwo lino, ni kutwala atu ku undungo mu Babilonia. 13 Mba ha mwaka utangu wa kuyula cha Siru Mwanangana wa mu Babilonia, Mwanangana Siru yahana shimbi hanga zuwo lia Zambi lipwe kutungulula. 14 Chikwo nawa, Mwanangana Siru yachiza mu tembele ya ku Babilonia yikwata ya oru ni ya prata ya mu zuwo lia Zambi, yize Nabukanezore achijile mu tembele ku Yerusaleme ni kuyitwala mu tembele ku Babilonia. Yikwata yacho yayihana kuli umwe lunga avuluka ngwo, Sheshabazare* yoze Siru atongwele hanga apwe nguvulu. 15 Siru yamba kuli iye ngwenyi: “Mbata yikwata yino, yako uyise mu tembele ku Yerusaleme. Zuwo lia Zambi lipwe kutungulula ha chihela haze liapwile chitangu.” 16 Kashika, Sheshabazare yeza, yasa fundamentu ya zuwo lia Zambi mu Yerusaleme; zuwo liacho aputukile kulu kulitunga, ndo haliapwila kanda lichihwa.’

17 “Haliapwila nyi muchipemena Mwanangana, hengwolenu mu mushete wa upite wa wanangana ku Babilonia hanga numone nyi mwanangana Siru kahanyine shimbi yakutungulula zuwo lia Zambi ku Yerusaleme, mba nututumine kumbululo hakutwala ku chikuma chino.”

6 Mwanangana Dariu yahana shimbi hanga ahengwole mu zuwo lia mikanda ya sango ja ku Babilonia, muze te akutulikila upite. 2 Ku zuwo lia mwanangana ku Akemeta mu mbonge ya Media, yawanamo chimwe chivungo haze hapwile ha kusoneka ngwo:

3 “Ha mwaka utangu wa Mwanangana Siru, Mwanangana Siru yahana shimbi hakutwala ku zuwo lia Zambi ku Yerusaleme ngwenyi: ‘Zuwo akalitungulule likapwe chihela cha kulambwila milambu, ni fundamentu ya zuwo liacho akayikolese. Zuwo mulikapwa ni mbandu* 60 a usuhwe ni 60 a utohwe, 4 milongo yitatu ya mawe anene-anene ni mulongo umuwika wa mapaya. Mulimo weswe makaufweta ni mbongo ja mu mushete wa mwanangana. 5 Chikwo nawa, yikwata yeswe ya oru ni ya prata ya mu zuwo lia Zambi yize Nabukanezore achijile mu tembele ku Yerusaleme ni kuyitwala ku Babilonia, kumakayihilwisa hanga akayise mu chihela chayo, mu tembele ku Yerusaleme, ni kuyitulika mu zuwo lia Zambi.’

6 “Kashika yena Tatenaia nguvulu wa chifuchi cha ku chitokelo sali lia Lwiji Ufrateze ni Shetare-Bozena ni akwa-milimo-ni-akwenu e mihato ja nguvulu a ku chifuchi cha ku chitokelo sali lia Lwiji Ufrateze, yino ye shimbi ngunanwehe ngwami kanda nulimika no. 7 Kanda nukwika mulimo wa zuwo lia Zambi, echenu nguvulu wa A-Yunda ni makulwana ja A-Yunda hanga atungulule zuwo lino lia Zambi ha chihela haze liapwile. 8 Chikwo nawa, ngunahane shimbi hakutwala ku yize nwatamba kulinga hanga makulwana ja A-Yunda ahase kutungulula zuwo lia Zambi: Mbongo jize mafweta kuli malunga wano, mujikatuka mu mushete wa upite wa mwanangana, che kwamba, ja lijimu lize liakukatuka ku chifuchi cha chitokelo sali lia Lwiji Ufrateze, hanga mulimo wa kutunga uhone kumana. 9 Mashimbu eswe, nwatamba kwaha yize mahona, matangwa eswe nwatamba kwaha kuji a ngombe,* kuji a panga ni ana mapanga hanga alambule kuli Zambi ya mwilu, ni tiliku, mungwa, vinyu ni maji, kulita ni yize asasendote waze ali ku Yerusaleme mamba, 10 hanga anunge ni kuhana milambu yize muyipemena Zambi wa mu malilu ni kulembela mwono wa mwanangana ni wa ana jenyi.* 11 Chikwo nawa, mweswawo mavulumuna shimbi yino, akachize mukambo ha zuwo lienyi akamuhateho, zuwo lienyi akalipwise mbozo* mumu lia kuvulumuna shimbi yino. 12 Mba Zambi yoze waselemo jina lienyi akanongese mwanangana mweswawo hanji atu waze malimika ni shimbi yino ni kuzanga kupuzula zuwo lia Zambi ku Yerusaleme. Yami Dariu, ngunahana shimbi yino. Shimbi yino katamba kuyikaula kawashi-washi.”

13 Kashika, Tetanaia, nguvulu wa ku chifuchi cha ku chitokelo, sali lia Lwiji Ufrateze, ni Shetare-Bozena ni akwa-milimo-ni-akwo, yalinga kawashi-washi yize Mwanangana Dariu aatumine kulinga. 14 Mba makulwana ja A-Yunda, waze awanyine utakamiso ha sango ja uprofeto wa Hagaia ni Zekaria, mujikulu wa Ido, yanunga ni kutunga. Mulimo wacho yiununga ni kusenya kulutwe. Ayo kahwishile mulimo wa kutunga kulita ni shimbi ya Zambi ya Izalele ni kulita ni shimbi ya Siru, ya Dariu ni Artasherke, Mwanangana wa Persia. 15 Ayo kahwishile mulimo wa kutunga zuwo ha tangwa liamuchitatu lia kakweji wa Adare,* ha mwaka wamuchisambano wa kuyula cha Mwanangana Dariu.

16 Kashika, A-Izalele, asasendote, A-Levi ni atu akwo waze akatukile mu undungo yawahilila ha kulinga chiwanyino cha kwazulula zuwo lia Zambi. 17 Ha kwazulula zuwo lia Zambi, ayo yalambula kuji a ngombe 100, kuji a mapanga 200, ana mapanga 400. Hakutwala ku mulambu wa shili ya A-Izalele, yalambula pembe 12, kulita ni kwalula cha minyachi ya A-Izalele. 18 Mba ayo yatongola asasendote kulita ni yizavu yo ni A-Levi kulita ni yizavu yo hanga alinge mulimo wa Zambi mu Yerusaleme, kulita ni chize chinasonewa mu mukanda wa Mose.

19 Waze akatukile mu undungo, yalinga chiwanyino cha Chizomboka ha tangwa 14 lia kakweji mutangu. 20 Asasendote ni A-Levi te halipemesa, eswe yalipemesa. Ayo yashiha yimuna a chitapo cha Chizomboka hali eswe waze akatukile mu undungo, hali asasendote ni akwo ni hali ayo ene. 21 Chocho, A-Izalele waze akatukile mu undungo, yalia chitapo cha Chizomboka hamuwika ni atu waze alichingile no, alihandunwine ku luchisa wa akwa-mavungu a mu yifuchi ya hakamwihi hanga awayile Yehova, Zambi ya Izalele. 22 Ayo yawahilila chinji ha kulinga Chiwanyino cha Mbolo jize kujishi Futunwiso ha matangwa shimbiali, mumu Yehova yaakwasa hanga awahilile. Chikwo nawa, yateulula mbunge ya mwanangana wa Asuria kuli ayo hanga akwase mulimo wa kutungulula zuwo lia Zambi wamwenemwene, Zambi ya Izalele.

7 Kulutwe lia yuma yino mu wanangana wa Artasherke, Mwanangana wa Persia, Ezera yahiluka. Iye kapwile mwana wa Seraia, mwana wa Azaria, mwana wa Hilekia, 2 mwana wa Shalume, mwana wa Zadoke, mwana wa Ahitube, 3 mwana wa Amaria, mwana wa Azaria, mwana wa Meraiote, 4 mwana wa Zerahia, mwana wa Uzi, mwana wa Mbuke, 5 mwana wa Abishua, mwana wa Finehase, mwana wa Eleazare, mwana wa Arone, sasendote wa lutwe. 6 Ezera kakatukile ku Babilonia. Iye kapwile longeshi ya shimbi yoze te unanyingika kanawa Shimbi ya Mose, yize Yehova Zambi ya Izalele ahanyine. Kwoko lia Yehova, Zambi yenyi, liapwile hali iye, kashika mwanangana amuhele yeswe yize echile.

7 Amwe A-Izalele, asasendote, A-Levi, njimba, akwa-kufunga mapito ni tuvumbi a mu tembele, yaya ku Yerusaleme ha mwaka wamuchishimbiali wa kuyula cha Mwanangana Artasherke. 8 Ezera kahetele mu Yerusaleme ha kakweji wamuchitano, ha mwaka wamuchishimbiali wa mwanangana. 9 Ha tangwa litangu lia kakweji mutangu, iye yakatuka ku Babilonia yaheta ku Yerusaleme ha tangwa litangu lia kakweji wamuchitano, mumu kwoko lia Zambi yenyi, liapwile hali iye. 10 Ezera kaluliekele mbunge yenyi hanga ahengwole Shimbi ja Yehova ni kujikaula, ni kulongesa yiyulo yamo ni upatwilo mu Izalele.

11 Uno we mukanda uze Mwanangana Artasherke ahanyine kuli Ezera, sasendote, longeshi wa shimbi, mukwa-yinyingi ya shimbi ja Yehova ni yiyulo yenyi kuli A-Izalele ngwo:

12 * “Artasherke, mwanangana wa mianangana, kuli Ezera sasendote ni longeshi wa shimbi ya Zambi wa mu malilu: Ngunakumeneka. 13 Nahana shimbi yize yinatayiza A-Izalele eswe waze ali mu wanangana wami, asasendote jo ni A-Levi hanga aye ni yena ku Yerusaleme, nyi maazanga. 14 Mumu yena kakutuma kuli mwanangana ni akwa-yiyulo jenyi shimbiali hanga utale nyi Shimbi ya Zambi ye, yize yili ku moko je kanayikaula mu Yunda ni mu Yerusaleme. 15 Chikwo nawa, watamba kumbata prata ni oru yize mwanangana ni akwa-yiyulo jenyi ahana ni mbunge yeswe kuli Zambi ya Izalele, yoze uli mu Yerusaleme, 16 hamwe ni prata ni oru yize mutambula* mu mbonge yeswe ya Babilonia, ni yawana yize atu ni asasendote makahana ni mbunge yeswe ku zuwo lia Zambi ye mu Yerusaleme. 17 Mbongo jacho je mukalanda najo ngombe, pembe ni mapanga ni milambu ya mbuto ni vinyu yize mukalambula ha chilumbilo ku zuwo lia Zambi ye, ku Yerusaleme.

18 “Prata ni oru yize muyisalaho, yena ni mandumbu je munuhasa kulinga nayo yize munuzanga, kulita ni upale wa Zambi yenu. 19 Yikwata yeswe yize makwaha yakulinga nayo milimo mu zuwo lia Zambi, watamba kuyihana kuli Zambi ye ku Yerusaleme. 20 Yuma yikwo yize muzanga kusa mu zuwo lia Zambi ye, mukayilanda ni mbongo ja mu mushete wa wanangana.

21 “Yami Mwanangana Artasherke, ngunahane shimbi kuli atu eswe akwa-kufunga upite a ku chifuchi cha chitokelo sali lia Lwiji Ufrateze hanga ahane kuli Ezera, sasendote, longeshi wa Shimbi ya Zambi wa mwilu, cheswacho chize meta. 22 Chipwe 100 wa talentu* ja prata, 100 wa njongo* ja tiliku, 100 wa mbate* ja vinyu, 100 wa mbate ja maji a olevwe ni mungwa weswawo meta. 23 Cheswacho chize Zambi wa mu malilu matuma hakutwala ku zuwo lia Zambi wa mu malilu, akachilinge ni zango hanga ufwatulo wenyi uchine kwiza ha chiyulo cha mwanangana ni kuli ana jenyi.* 24 Nyingikenu nawa ngwenu, kunwatambile kwita lijimu, milambu chipwe mwombo* kuli asasendote, A-Levi, njimba, kuli akwa-kufunga mapito, kuli tuvumbi a mu tembele* hanji kuli mutu mweswawo yoze malinga milimo ku zuwo lino lia Zambi.

25 “Kashika, yena Ezera, kulita ni mana waze Zambi ye akuhele,* tongola ngaji ni akwa-kuyula, chekwamba, waze ananyingika shimbi ja Zambi ye hanga ayule atu eswe waze ali mu chifuchi cha ku chitokelo sali lia Lwiji Ufrateze. Shimbi jacho, nwatamba kujilongesa kuli eswe waze kajinyingikine. 26 Mweswawo yoze malituna kwononokena Shimbi ya Zambi ye ni shimbi ya mwanangana, katamba kumusopesa kawashi-washi hanga amushihe hanji kumutuma ku undungo, kumufwetesa mbongo hanji kumusa mu zuwo lia ususu.”

27 Yehova, Zambi ya tulamba twetu afumane, yoze wasa mu mbunge ya mwanangana nyonga lia kululieka zuwo lia Yehova mu Yerusaleme! 28 Mumu lia utu wenyi wa zango hali yami, kangukwasa kupwa ni utayizo wa mwanangana, wa akwa-yiyulo jenyi ni akwa-lutwe a ndundo a mwanangana. Amu kwoko lia Yehova, Zambi yami, liapwile hali yami, yingupwa ni hamu,* yingukungulula akwa-lutwe* ja Izalele hanga aye ni yami.

8 Wano kali akwa-lutwe a minyachi ya atato ni waze apwile no aasonekene kulita ni usoko wo. Akatukile hamwe ni yami ku Babilonia ha mashimbu a kuyula cha Mwanangana Artasherke. 2 Kuli ana ja Finehase, kwapwile Ngeshome; kuli ana ja Itama, kwapwile Daniele; kuli ana ja Ndawichi, kwapwile Hatuse; 3 kuli ana ja Shekania, kuli ana ja Paroshe, kwapwile Zekaria, apwile hamwe ni malunga 150 waze asonekene; 4 kuli ana ja Pahata-Moape, kwapwile Elionai, mwana wa Zerahia ni malunga 200; 5 kuli ana ja Shekania, kwapwile Jahaziele ni malunga 300; 6 kuli ana ja Adine, kwapwile Ebede mwana wa Jonata, ni malunga 50; 7 kuli ana ja Elame, kwapwile Jesaia mwana wa Atalia, ni malunga 70; 8 kuli ana ja Shefatia, Zebadia mwana wa Mikele ni malunga 80; 9 kuli ana ja Joabe, kwapwile Obadia mwana wa Jehiele ni malunga 218; 10 kuli ana ja Bani, kwapwile Shelomite mwana wa Josefia ni malunga 160; 11 kuli ana ja Bebai, kwapwile Zekaria mwana wa Bebai ni malunga 28; 12 kuli ana ja Azegate, kwapwile Johanane mwana wa Hakatane ni malunga 110; 13 kuli ana ja Adonikame, majina ja waze ahilukile kasula kali wano: Elifelete, Jehiele, Shemaia ni malunga 60; 14 kuli ana ja Bikavaia, kwapwile Utai ni Zabude ni malunga 70.

15 Yingwakungulula hakamwihi ni lwiji yoze unapalumuka ku Ahava, yitutwamako matangwa atatu. Alioze, muze natalile hakachi ka atu ni asasendote, chawanyineho niumwe Ka-Levi. 16 Kashika, yingutuma kusanyika Elieza, Ariele, Shemaia, Elenatane, Jaribe, Elenatane, Natane, Zekaria ni Meshulame, ayo eswe te tusongo. Yingusanyika nawa Jaribe ni Elenatane, waze apwile alongeshi. 17 Chocho, yingwatuma kuli Ido, kasongo wa ku chihela chize avuluka ngwo, Kasifia. Yingwalweza ete kuli Ido ni kuli akwa-milimo-ni-akwo, e tuvumbi a mu tembele waze apwile ku Kasifia hanga atunehene tuvumbi waze makalakala mu zuwo lia Zambi yetu. 18 Amu kwoko lia Zambi yetu liapwile hali yetu, ayo yatunehena umwe lunga wa mana, mwana wa Mahile, mujikulu wa Levi mwana wa Izalele, avuluka ngwo, Sherebia hamwe ni ana jenyi ni akwa-milimo-ni-akwo, malunga 18; 19 Hashabia ni Jesaia wa kuli A-Merari, ni akwa-milimo-ni-akwo hamwe ni ana jo, malunga 20. 20 Kwapwile tuvumbi a mu tembele* 220, waze Ndawichi ni akwa-lutwe ahanyine hanga akwase A-Levi mu mulimo wo, eswe kahele milimo kulita ni majina jo.

21 Muze twahetele hakamwihi ni lwiji Ahava, yinguhana shimbi tulitwamine kulia ni kuliumba kuli Zambi yetu hanga atusongwele mu wenyi uze te mutuya ni ana jetu ni yikwata yetu yeswe. 22 Nevwile sonyi ja kwita maswalale kuli mwanangana ni akwa-kwendesa tuvwalu hanga atufunge kuli akwa-kole jetu mu jila, mumu twalwezele mwanangana ngwetu: “Kwoko lia Zambi yetu lili hali eswe waze akumufupa hanga aalingile yuma yipema, alioze tachi ni ufwatulo wenyi yakulimika ni waze akumwehuka.” 23 Kashika, yitulitwamina kulia, yitulemba kuli Zambi hakutwala ku chikuma chacho, mba iye yevwa kuliumba chetu.

24 Chocho, hakachi ka miata ja asasendote, yingusakulaho 12, Sherebia ni Hashabia ni akwa-milimo-ni-akwo kumi. 25 Yingwapezalila prata, oru ni yikwachilo, ye milambu yize mwanangana, akwa-yiyulo ni alemu ni A-Izalele eswe waze apwileko ahanyine ku zuwo lia Zambi yetu. 26 Yingupezala ni kwaha 650 a talentu* ja prata, yikwachilo ya prata 100 yize te yakupezala talentu 2, 100 wa talentu ja oru, 27 ni makumi aali a tumisenge twa oru tuze te twakufwika 1,000 ka ndarike* ni yikwachilo yaali ya unengu upema walejima, yilemu ngwe oru.

28 Yingwalweza ngwami: “Yenu nuli asandu kuli Yehova, ni yikwachilo neyo yili yisandu, prata ni oru yili mulambu kuli Yehova, Zambi ya tulamba twenu. 29 Fungenu kanawa yino yuma ndo muze munuyipezala mu yipatulo ya zuwo lia Yehova, kumeso ja miata ja asasendote ja A-Levi ni kumeso ja akwa-lutwe a minyachi ya atato A-Izalele, mu Yerusaleme.” 30 Chocho asasendote ni A-Levi yatambula prata, oru ni yikwachilo yize apezalile hanga ayitwale ku Yerusaleme mu zuwo lia Zambi yetu.

31 Kashika, ha tangwa 12 lia kakweji mutangu, yitukatuka ku lwiji Ahava, yituya ku Yerusaleme. Kwoko lia Zambi yetu liapwile hali yetu, iye katupulwile ku moko ja akwa-kole jetu ni kuli akwa-kutujikinyina mu jila. 32 Chocho yituheta ku Yerusaleme ni kutwamako matangwa atatu. 33 Mba ha tangwa liamuchiwana, yitupezala prata, oru ni yikwachilo mu zuwo lia Zambi ni kuyihana kuli sasendote Meremote, mwana wa Uriya. Iye kapwile ni Eleazare mwana wa Finehase, ni A-Levi Jozabade, mwana wa Yeshua ni Noadia mwana wa Binui. 34 Yuma yeswe kayalwile ni kuyipezala ni kusoneka unji wa yuma yize yapwileho. 35 Waze akatukile mu undungo kahanyine milambu yino ya kwocha kuli Zambi ya Izalele: Ngombe 12 hali A-Izalele eswe, makuji a mapanga 96, ana a mapanga 77 ni pembe 12 ngwe mulambu wa kufuka shili. Yino yeswe kayihanyine ngwe mulambu wa kwocha kuli Yehova.

36 Chocho, yituhana mukanda uze wapwile ni usongwelo wa mwanangana kuli akwa-kuyula ni kuli manguvulu a mu chifuchi cha ku chitokelo sali lia Lwiji Ufrateze, ayo yakwasa atu ha yeswe yize te anafupu ni kukwasa mulimo wa Zambi wamwenemwene.

9 Muze halinga yuma yino, akwa-lutwe yeza kuli yami ni kungulweza ngwo: “A-Izalele, asasendote ni A-Levi kalihandunwine ni akwa-mavungu waze atwama mu yifuchi ya hakamwihi ni yitanga yipi ya A-Kanana, A-Hete, A-Perize, A-Yepushe, A-Amone, A-Moape, A-Engitu ni ya A-Amore. 2 A-Izalele, asasendote ni A-Levi ni ana jo a malunga hanambata amwe a kuli ana a mapwo akwa-mavungu. Haliapwila munyachi uno usandu hiwalichinga ni atu a ku mavungu. Akwa-lutwe ni mihato ja nguvulu e avulumuna chinji kuhiana.”

3 Muze nachivwile, yingusuwa chikuto chami ni hina liami, yingusutula kambu jami ni wevu wami, yingutwama ni kunenganyana chinji. 4 Kashika, eswe waze te akuvumbika liji lia Zambi ya Izalele, yalikungulula hamwe ni yami mumu lia uhenge wa atu waze akatukile ku undungo. Yingutwama ni kunenganyana chinji ndo ha chingoloshi ha mashimbu a mulambu wa mbuto.

5 Ha chingoloshi, muze mashimbu a kuhana mulambu wa mbuto ahetele, yingukatuka ni sonyi ku meso, ha shimbu liacho, chikuto chami ni hina liami yeswe te yakusuwa. Yingusa makungunwa hashi ni kwolola moko kuli Yehova Zambi yami. 6 Yingwamba ngwami: “Zambi yami, ngunevu sonyi jinji, chahashile kuhetula meso jami kuli yenu mumu uhenge wetu hiunoko chinji, ni shili yetu hiyinahete mu malilu. 7 Chize ku mashimbu ja tulamba jetu ndo musono, mulonga wetu wakuliwezela chinji. Mumu lia milonga yetu, mianangana jetu ni asasendote jetu kakutuhana ku moko ja mianangana ja akwa-mavungu, kakutushiha ni katana, kakututwala ku undungo, kakututambula yuma, kakutuvwisa sonyi ngwe chize nunamono musono. 8 Alioze haliapwila, ha shimbu likehe, yenu Yehova Zambi yetu nwatusolwela keke ni kutayiza amwe masalila alilamwine ni kutwaha chihela chipema muma mwenu musandu, hanga meso jetu amone pangu, Zambi yetu, ni kutuhuzulula hakehe mu undungo wetu. 9 Mumu chipwe ngwe tuli tupinji, nihindu yenu Zambi yetu kunwatuhichikile mu undungo. Alioze, mumu lia utu wenu wa zango hali yetu, nwatukwasa hanga tupwe ni utayizo wa mianangana A-Persia hanga atutakamise ni kutukwasa kutunga zuwo lienu ni kutungulula mbonge ni yipanga ya mawe mu Yunda ni mu Yerusaleme.

10 “Haliapwila Zambi yetu, yika mutuhasa kwamba ha chikuma chino? Mumu hitwehuka shimbi jenu, 11 jize nwatuhele kupalikila muli tuvumbi jenu aprofeta ha kwamba ngwenu: ‘Chifuchi chize nunanjila chili chifuchi cha luchisa mumu lia luchisa wa atu waze atwama mu yihunda ya hakamwihi. Mumu lia yitanga yo yipi, hachizalisa cheswe ni luchisa wo. 12 Kashika, kanda nuhana ana jenu a mapwo kuli ana jo a malunga, chipwe kutayiza ana jo a mapwo hanga alimbate ni ana jenu a malunga. Kanda nufupa sambukila yo, chipwe upite wo. Nyi nwachilinga, munupwa ni tachi, munulia yuma yipema ya mu chifuchi, munuchitambula ni kuchihana kuli ana jenu ku miaka ya mutolo.’ 13 Chipwe ngwe yuma yinji yipi yalingiwile kuli yetu mumu lia yitanga yetu yipi ni uhenge wetu unene, yenu Zambi yetu, kuwatumwesene lamba kulita ni uhenge wetu, alioze yinutayiza hanga yetu, waze tuli hano tupwe ni mwono. 14 Shina mutwehuka cheka nawa shimbi jenu ni kulimbata ni atu waze akulinga yuma yino yipi? Shina kunuchi kwivwa uli ni kutukuwisa yetu eswe? 15 Yehova, Zambi ya Izalele, uli mukwa-ululi, mumu tuli ni mwono ngwe masalila ndo musono. Tuli kulutwe lienu ngwe yivulumunyi, mumu lia shili yino, kutuchi kuhasa kumana kumeso jenu.”

10 Ha ola yize Ezera te analembe ni kwambulula shili ni kulila muze te anafulamana kulutwe lia zuwo lia Zambi wamwenemwene, mbunga yinene ya Izalele, malunga, mapwo ni twanuke, yalikungulula kuli iye. Atu yalila chinji. 2 Hachino, Shekania mwana wa Jehiele umwe wa kuli ana ja Elame, yamba kuli Ezera ngwenyi: “Yetu hitwavulumuna kuli Zambi yetu ha kulimbata ni mapwo yilambala a mu yifuchi ya hakamwihi. Chipwe chocho, A-Izalele mahasa kwalumuka. 3 Haliapwila tulingenu usendo ni Zambi yetu hanga tuhume mapwo eswe yilambala ni ana jo kulita ni usongwelo wa Yehova ni wa waze akuvumbika shimbi ja Zambi yetu. Tulingenu yuma kulita ni Shimbi. 4 Katuka, mumu chiteli chino niche, yetu mutukukwasa. Takama uchilinge.”

5 Hazehene, Ezera yakatuka, yeta kuli miata ja asasendote, ja A-Levi ni kuli A-Izalele eswe hanga alishinge kulita ni yize ambile. Chocho ayo yalishinga. 6 Ezera yakatuka ku zuwo lia Zambi wamwenemwene, yaya mu chipatulo cha Jehohana mwana wa Eliashipe. Chipwe ngwe kayilemo, nihindu kakalile mbolo chipwe kunwa meya, mumu te kananenganyana ha mukunda wa shili ya atu waze akatukile ku undungo.

7 Chocho yatwa mutambi mu Yunda ni mu Yerusaleme hanga eswe waze akatukile ku undungo, alikungulule mu Yerusaleme. 8 Akwa-lutwe ni makulwana kahanyine shimbi yino ngwo, mweswawo yoze kasolokele ha matangwa atatu, mamutambula yikumba yenyi yeswe ni kumuhanga mu chikungulwila cha waze akatukile ku undungo. 9 Kashika, ha matangwa atatu, chekwamba, ha tangwa 20 lia kakweji wamuchilivwa, malunga eswe a mu Yunda ni A-Mbenjamine yalikungulula mu Yerusaleme. Atu eswe yatwama mu yiize ya zuwo lia Zambi wamwenemwene, ni kuchikima mumu lia chikuma chacho ni mumu lia vula munji.

10 Hazehene, Ezera, sasendote, yakatuka ni kwalweza ngwenyi: “Yenu nwavulumuna ha kulimbata ni mapwo yilambala, kashika, hinwokesa mulonga wa Izalele. 11 Haliapwila, ambululenu shili yenu kuli Yehova, Zambi ya tulamba jenu ni kulinga upale wenyi. Lihandununenu ni atu a mu yifuchi ya hakamwihi ni mapwo yilambala.” 12 Chikungulwila cheswe yichikumbulula ni liji mwilu ngwo: “Twatamba kulinga yize unatulweze. 13 Alioze kuli atu anji, chikwo nawa, tuli ha mashimbu a vula. Kashika, kutuchi kuhasa kumana haze, ni che chikuma chino kutuchi kuhasa kuchisopa ha tangwa limuwika hanji ha matangwa aali, mumu twahengesa chinji. 14 Kashika, tunechi hanga nweche akwa-lutwe jetu amanyineko chikungulwila cheswe. Chikwo nawa, waze eswe ali mu mambonge ambachile mapwo yilambala, akasoloke ha tangwa lize munutesa, hamuwika ni makulwana ni ngaji a mbonge ni mbonge, ndo muze ufwatulo wa Zambi yetu muupalika ha chikuma chino.”

15 Alioze, Jonata mwana wa Asahele ni Jazeya mwana wa Tikiva, yalituna chiyulo chacho. Chipwe chocho, A-Levi Meshulame ni Shabetai, yaachitayiza. 16 Chocho waze akatukile ku undungo, yalinga yize atesele, mba Ezera, sasendote ni akwa-lutwe a minyachi ya atato, waze eswe apwile akutongola ha majina, yalikungulula kwaukawo ha tangwa litangu lia kakweji wamuchikumi hanga ahengwole chikuma chacho. 17 Ha tangwa litangu lia kakweji mutangu, yahwisa kusopa milonga ya malunga eswe waze alimbachile ni mapwo yilambala. 18 Chocho yanyingika ngwo, amwe a kuli ana ja asasendote kalimbachile ni mapwo yilambala; a kuli ana ja Yeshua, mwana wa Jozadake ni akwa-milimo-ni-akwo, Maseia, Elieza, Jaripe ni Gedalia. 19 Alioze ayo yalakenya ngwo, mahuma mapwo jo, chikwo nawa, mahana mwana-panga hanga afuke shili yo.

20 Kuli ana ja Imere, kwapwile Hanani ni Zebadia. 21 Kuli ana ja Harimi, Maseia, Eliya, Shemaia, Jehiele ni Uzia. 22 Kuli ana ja Pashure, Elionai, Maseia, Ishemali, Netanele, Jozabade ni Eleasa. 23 Kuli A-Levi kwapwile, Jozabade, Shimei, Kelaia (mwe Kelita), Petahia, Yunda ni Elieza. 24 Kuli njimba, Eliashipe. Kuli akwa-kufunga mapito, Shalume, Teleme ni Uri.

25 Kuli A-Izalele, kuli ana ja Paroshe kwapwile wano, Ramia, Izia, Malekia, Mijamine, Eleazare, Malekia ni Benaia; 26 kuli ana ja Elame, Matania, Zekaria, Jehiele, Abadi, Jeremote ni Eliya; 27 kuli ana ja Zatu, Elionai, Eliashipe, Matania, Jeremote, Zabade ni Aziza; 28 kuli ana ja Bebaia, Jehohana, Hanania, Zabaia ni Atalai; 29 kuli ana ja Mbani, Meshulame, Maluke, Adaia, Yasupe, Sheale ni Jeremote; 30 kuli ana ja Pahata-Moape, Adana, Chilala, Benaia, Maseia, Matania, Mbezalele, Binui ni Manase; 31 kuli ana ja Harimi, Elieza, Ishia, Malekia, Shemaia, Shimeone, 32 Mbenjamine, Maluke ni Shemaria; 33 kuli ana ja Hashume, Matenaia, Matata, Zabade, Elifelete, Jeremaia, Manase ni Shimei; 34 kuli ana ja Mbani, Madaia, Amarame, Wela, 35 Benaia, Bedeia, Cheluhi, 36 Vania, Meremote, Eliashipe, 37 Matania, Matenaia ni Jasu; 38 kuli ana ja Binui, Shimei, 39 Shelemia, Natane, Adaia, 40 Makanedabaia, Shashaia, Sharaia, 41 Azarele, Shelemia, Shemaria, 42 Shalume, Amaria ni Yosefwe; 43 kuli ana ja Nebo, Jehiele, Matitia, Zabade, Zebina, Jadau, Joele ni Benaia. 44 Malunga wano eswe kambachile mapwo yilambala, mba ayo yahuma mapwo jacho hamwe ni ana.