NEHEMIA

1 Wano kali maliji a Nehemia* mwana wa Hakalia: Napwile ku zuwo lia mwanangana ku Shushane, ha kakweji wa Chisleve,* ha mwaka 20. 2 Ha mashimbu jacho, yikuheta Hanani, umwe wa kuli ana-kwetu ni malunga akwo a mu Yunda, mba yingwahula hakutwala kuli A-Yunda waze akatukile mu undungo ni hakutwala ku Yerusaleme. 3 Ayo yangukumbulula ngwo: “Atu waze akatukile mu undungo ali mu mbonge, haliapwila kanapalika mu yipikalo yinji ni sau. Yikalakala ya Yerusaleme yili ya kupuzula ni yikolo yamo hanayocho ni kahia.”

4 Muze nevwile maliji wano, yingutwama, yinguputuka kulila, yingulinyenga ha matangwa anji, yingulitwamina kulia, chikwo nawa, yingulemba kuli Zambi wa mu malilu 5 ni kwamba ngwami: “Yehova, Zambi wa mu malilu, Zambi munene kole ni woma, yoze wakufunga usendo wenyi ni kusolola utu wa zango kuli waze akukuzanga ni kuli waze akufunga shimbi je, 6 lisesa, ngunaliumbu hanga meso jenu alaule ni matwi jenu apanjike ku kulemba cha kavumbi kenu chize ngunalingi musono kumeso jenu. Ngunalembe kuli yenu mwalwa ni ufuku hakutwala kuli tuvumbi jenu A-Izalele, ngunanunyingikisa shili yize A-Izalele alinga kuli yenu. Yami ni akwa-zuwo lia tata, twavulumuna. 7 Kwamba pundu, twasolola uhulia ha kuhona kukaula shimbi, yiyulo ni upatwilo uze nwahanyine kuli kavumbi kenu Mose.

8 “Lisesa, iwulukenu kama maliji waze nwahanjikile kuli kavumbi kenu Mose ngwenu: ‘Nyi munuvulumuna, mungukanumwanga hakachi ka mavungu. 9 Alioze, nyi munuhiluka kuli yami, munukaula shimbi jami ni kujifunga, chipwe atu jenu waze haanamwanga ndo ku masongo a hashi, nihindu mungukaachizako ni kwaneha ku chihela kuze hingunatongola hanga nguseko jina liami.’ 10 Ayo kali tuvumbi je, atu je waze wapulwile ni ndundo je jinene ni kwoko lie lia ndundo. 11 Yehova, lisesa, ngunaliumbu hanga upanjike kulemba cha kavumbi ke yono ni kulemba cha tuvumbi je akwo waze akuvumbika jina lie. Lisesa, nguwahise kama ha tangwa lia musono, chikwo nawa, ngukwase kama hanga mwanangana anguvwile keke.”

Ha mashimbu jacho napwile mukwa-kuhana musenge kuli mwanangana.

2 Ha kakweji wa Nisane,* ha mwaka 20 wa kuyula cha mwanangana Artasherke, iye yazanga kunwa vinyu, yingumutwalilayo ngwe chizechene te nakulinga. Alioze, alize liapwile tangwa litangu lize nasolokele ni chinyengo kumeso jenyi. 2 Kashika, mwanangana yanguhula ngwenyi: “Yena kuwayijile mba mumu liaka unanenganyana chize? Chino muchihasa kupwa wika chinyengo cha ku mbunge.” Chocho yingwivwa woma unji.

3 Yingukumbulula mwanangana ngwami: “Vulie mwanangana!* Kuchi chichi kwivwa chinyengo se limbo liami kuze afunjile tulamba twami halipuzula ni ye yajilo yalio hayocha ni kahia?” 4 Mwanangana yanguhula ngwenyi: “Yika unazange kwita?” Hazehene yingulemba kuli Zambi wa mu malilu. 5 Chocho yingukumbulula mwanangana ngwami: “Nyi muchilita, nyi muchipemena mwanangana, ngutumenu ku Yunda mu mbonge yize anakafunjila tulamba jami hanga nguyitungulule.” 6 Mba mwanangana, yoze te unatwama ni mwazovu wenyi, yanguhula ngwenyi: “Matangwa angahi mulinga mu wenyi, chikwo nawa, tangwa lika mufuna?” Chocho mwanangana yatayiza kungutumako, mba yingumulweza mashimbu waze te mungulinga.

7 Yingulweza nawa mwanangana ngwami: “Nyi muchinupemena, ngwehenu mikanda yize mungukahana kuli manguvulu a mu sali lia Lwiji Ufrateze hanga akangweche ngupalike ni kuheta kanawa ku Yunda, 8 ni mukanda uze munguhana kuli Asafwe, kalayi ka Usaki wa Wanangana hanga akangwehe mitondo ya manguji, mikambo ya yajilo ya zuwo lia Zambi, ya yipanga ya mu mbonge ni ya zuwo lize mungukatwama.” Mba mwanangana yangwaha yize namwichile, mumu Zambi wapwile hamwe ni yami.

9 Chocho yinguheta mu sali lia Lwiji Ufrateze, mba yinguhana kuli manguvulu mikanda yize mwanangana anguhele. Mwanangana kanguhele nawa tupitau a maswalale ni akwa-kwendesa tuvwalu. 10 Muze Sambalate Ka-Horone ni Tobia kapitau Ka-Amone achivwile, yaapihilila chinji ha kunyingika ngwo, kweza umwe mutu hanga akwase A-Izalele.

11 Chocho yinguheta mu Yerusaleme, yingutwamamo matangwa atatu. 12 Mba ha ufuku yingulaula, yami ni malunga amwe, alioze chalwezele niumwe yize Zambi azangile hanga ngulinge mu Yerusaleme, chakayile ni yimuna eka, nayile wika ni chimbulu yoze te ngunendela. 13 Yingutuhuka ha ufuku ku Chikolo cha Chikulo, yingupalika ku Shima lia Lunoka Munene ni ku Chikolo cha Mulumba wa uto. Yinguhengwola yikalakala ya Yerusaleme yize te hiyapuzuka, ni yikolo yamo yize yawemene ni kahia. 14 Yinguhiana ndo ku Chikolo cha Fuji lia Meya ni ku Chitende cha Meya a Mwanangana, alioze te kushi jila yize chimbulu yoze te ngunendela mapalikila. 15 Kashika ha ufuku weswe, yingununga ni kukanduka chikulo ni kutala yipanga ya mbonge, mba yinguhiluka mu jila yize yene, yingunjila nawa mu mbonge ku Chikolo cha Chikulo.

16 Mihato a nguvulu kakanyingikine kuze nayile chipwe yize te ngunalingi, mumu te kanda nguchilweza chuma nichimwe kuli A-Yunda, chipwe kuli asasendote, alemu, mihato a nguvulu ni akwa-milimo akwo. 17 Mba yingwalweza ngwami: “Talenu kapinda munene yoze tuli nenyi. Yerusaleme hiyapuzuka ni yikolo yamo hanayocho ni kahia. Kashika tweyenu tutungulule yipanga ya Yerusaleme hanga tuhwise sau lino.” 18 Kusulaho, yingwalweza chize kwoko lipema lia Zambi yami liapwile hamwe ni yami ni yize mwanangana angulwezele. Kashika o yamba ngwo: “Tuyenu kawashi-washi hanga tuputuke mulimo wa kutungulula!” Hachino, yalitakamisa umwe ni mukwo hanga aputuke mulimo.

19 Alioze, muze Sambalate Ka-Horone, ni Tobia kapitau Ka-Amone, ni Ngesheme Ka-Arabia achivwile, yaputuka kutuhepwisa ni kutulelesa ha kwamba ngwo: “Yika yenu nunalingi? Nunalimika ni mwanangana nyi?” 20 Mba yingwakumbulula ngwami: “Zambi wa mwilu kumatuwahisa, yetu tuli tuvumbi jenyi, kashika mutuputuka mulimo wa kutungulula, alioze yenu kunushi chihinga, chipwe ulite, chipwe chiyulo nichimwe mu Yerusaleme.”

3 Eliashipe sasendote wa lutwe ni mandumbu jenyi asasendote ni akwo, yatungulula Chikolo cha Mapanga. Yachipwisa chisandu, yasako yajilo; yapwisa chipinji chacho chisandu ndo ku Kaposhi ka Hamea ni kuheta ku Kaposhi ka Hananele. 2 Malunga a mu Yeriku, yatungulula chipinji chize chasulileko, Zakure mwana wa Imiri neye yatungulula chipinji chikwo chize chasulileko.

3 Mba ana ja Hasena, yatungulula Chikolo cha Yishi; yasako manguji ni mikambo, yamika mapito jako, yikungo yako ni yikungo ya kuyika nayo yajilo. 4 Meremote, mwana wa Uriya, mwana wa Koze, yalulieka chipinji chize chasulileko, Meshulame mwana wa Mberekia, mwana wa Meshezabele, yalulieka chipinji chize chasulileko, Zadoke mwana wa Bana, yalulieka chipinji chize chasulileko. 5 A-Tekoa yatunga chipinji chize chasulileko, alioze malunga alemu a mu mbonge kakatayijile kulinga milimo yize aahele* kuli waze te anasongwela milimo.

6 Jehoiada, mwana wa Pasea ni Meshulame mwana wa Besodea, ayo yalulieka Chikolo cha Mbonge Yikulu; yasako manguji, mikambo, yajilo, yikungo ni yikungo ya kuyika nayo yajilo. 7 Melatia, Ka-Ngibeone ni Jadone Ka-Merono, malunga a ku Ngibeone ni a ku Mizepa a ku chiyulo cha nguvulu wa mu sali lia Lwiji Ufrateze, yalulieka chipinji chize chasulileko. 8 Uziele, mwana wa Halahaia umwe wa kuli akwa-kufula oru, yalulieka chipinji chize chasulileko, Hanania, umwe wa kuli akwa-kulinga maji a vumba lipema, yalulieka chipinji chize chasulileko. O yala mawe mu Yerusaleme ndo ku Chipanga Chinene cha Mawe. 9 Refaia mwana wa Hure mukwa-kuyula chihanda cha ha muchima cha chifuchi cha Yerusaleme, yalulieka chipinji chize chasulileko. 10 Jedaia mwana wa Harumafa yalulieka chipinji chize chasulileko chize chapwile kulutwe lia zuwo lienyi. Mba Hatuse mwana wa Hashabania yalulieka chipinji chize chasulileko.

11 Malekia mwana wa Harimi ni Hasube mwana wa Pahata-Moape, ayo yalulieka chipinji chize chasulileko, chikwo nawa yalulieka Kaposhi wa Lutengo. 12 Mba Shalume mwana wa Halohesha mukwa-lutwe wa chihanda cha ha muchima cha chifuchi cha Yerusaleme, yalulieka chipinji chize chasulileko, hamwe ni ana jenyi a mapwo.

13 Hanune ni akwa-Zanoa yalulieka Chikolo cha Chikulo, yatungulula mapito jako ni yikungo yako ni njalo jako. Chikwo nawa yalulieka 1,000 ka mbandu ja chipanga cha mawe ndo ku Chikolo cha Mulumba wa Uto. 14 Malekia mwana wa Rekabe, mukwa-lutwe wa chifuchi cha Mbete-Hakereme, yalulieka Chikolo cha Mulumba wa Uto; yachitungulula ni kusako yajilo, yikungo ni yikungo ya kuyika nayo yajilo.

15 Shalume mwana wa Kole-Hoze mukwa-lutwe wa chifuchi cha Mizepa, yalulieka Chikolo cha Fuji lia Meya; yachitungulula ni kusako yajilo, yikungo ni yikungo ya kuyika nayo yajilo. Iye yatungulula nawa chipanga cha mawe cha ku Chitende cha Shiloa hakamwihi ni Munda wa Mwanangana ndo ku Ndalo jize te jakupalumuka ku Mbonge ya Ndawichi.

16 Nehemia mwana wa Azubuku mukwa-lutwe wa chihanda cha ha muchima mu chifuchi cha Mbete-Zure, yalulieka chihanda chize chasulileko, yaputukila ku Mafuka a Mwanangana Ndawichi, yaya ku chitende ndo ku Zuwo lia Tujita.

17 A-Levi yalulieka chipinji chize chasulileko kupalikila mu usongwelo wa Rehume mwana wa Mbani. Mba Hashabia mukwa-lutwe wa chihanda cha ha muchima cha chifuchi cha Kela, yalulieka chihanda chize chasulileko ni kumanyinako mbonge yenyi. 18 Mandumbu jenyi yalulieka chihanda chize chasulileko kupalikila mu usongwelo wa Bavaia, mwana wa Henadade, mukwa-lutwe wa chihanda chikwo cha ha muchima cha chifuchi cha Kela.

19 Ezere mwana wa Yeshua, mukwa-lutwe wa Mizepa, yalulieka chihanda chize chasulileko, yaputukila kulutwe lia jila, yakukanduka ku Zuwo lia Yitwa ya Jita ndo ku mbango lia Chipanga.

20 Baruke mwana wa Zabaia, yakalakala chinji ni kululieka chihanda chize chasulileko, chize ku Mbango lia Chikalakala ndo ku unjililo wa zuwo lia Eliashipe sasendote wa lutwe.

21 Meremote mwana wa Uriya, mwana wa Koze, yalulieka chihanda chize chasulileko, chize ku unjililo ndo ku songo lia zuwo lia Eliashipe.

22 Asasendote, malunga a mu chifuchi cha Yordau, yalulieka chihanda chize chasulileko. 23 Mbenjamine ni Hasube, yalulieka chihanda chize chasulileko kulutwe lia zuwo lio. Azaria mwana wa Maseia mwana wa Anania, yalulieka chihanda chize chasulileko kulutwe lia zuwo lienyi. 24 Binui mwana wa Henadade, yalulieka chihanda chize chasulileko chize ku zuwo lia Azaria ndo ku mbango lia yipanga.

25 Palale mwana wa Uzai, yalulieka chihanda chize chasulileko hakamwihi ni Mbango lia Chikalakala chize chinatale kulutwe lia kaposhi yoze unatale kulutwe lia Zuwo lia Mwanangana mu yiize ya Tulayi. Pedaia mwana wa Paroshe yalulieka chihanda chize chasulileko.

26 Tuvumbi a mu tembele waze te atwama mu Ofele, yalulieka chihanda chize chasulileko hakamwihi ni Chikolo cha Meya ku chivumbuko ni kaposhi wa ku tunda.

27 A-Tekoa yalulieka chihanda chize chasulileko, chize ku kaposhi munene wa ku tunda ndo ku chipanga cha Ofele.

28 Asasendote yalulieka yuma helu lia Chikolo cha Tuvwalu, mutu ni mutu yakalakalila ku zuwo lienyi.

29 Zadoke mwana wa Imere, yalulieka chihanda chize chasulileko kulutwe lia zuwo lienyi.

Shemaia mwana wa Shekania mukwa-kufunga Chikolo cha ku Chivumbuko yalulieka chihanda chize chasulileko.

30 Hanania mwana wa Shelemia ni Hanune, mwana wamuchisambano wa Zalafe, yalulieka chihanda chize chasulileko.

Meshulame mwana wa Mberekia yalulieka chihanda chize chasulileko kulutwe lia zuwo lienyi.

31 Malekia umwe wa kuli akwa-kufula oru, yalulieka chihanda chize chasulileko, ndo ku zuwo lia tuvumbi a mu tembele* ni ku zuwo lia akwa-kulanjisa, lize liapwile hakamwihi ni chikolo cha kutalila* ndo ku chipatulo chize chapwile ku mbango helu lia chipanga.

32 Akwa-kufula oru ni akwa-kulanjisa, yalulieka chipatulo chize chapwile ku mbango helu lia chipanga ni Chikolo cha Mapanga.

4 Muze Sambalate evwile ngwenyi, tunatungulula yipanga, yevwa uli unji, yatenuka, chocho yaputuka kuhungumiona A-Yunda. 2 Iye yahanjika kulutwe lia mandumbu jenyi ni lia maswalale A-Samaria ngwenyi: “A-Yunda wano amokomoko yika analingi? Ayo kananyongo ngwe mahasa kulinga mulimo uno ukawo nyi? Shina makalambula yitapo? Shina mamanununa mulimo uno ha tangwa limuwika nyi? Nyi shina mahasa kuvumbula mawe ha milumba ya yiswaswa yize hiyinawema?”

3 Tobia Ka-Amone, yoze te unamana sali lienyi yamba ngwenyi: “Chipwe mukuza mahasa kupuzula chipanga cha mawe chize anatungu, nyi manyinaho.”

4 Zambi yetu, talenu kama chize anatulelesa, alumunenu kama yuma hanga luchoko wo ahiluke kuli ayo, akaakunjike kuli akwa-kole jo ni kwapwisa funge mu chifuchi cha yilambala. 5 Kanda ulengulula uhenge wo chipwe kujimuna shili yo, mumu o kalimika ni akwa-kutunga.

6 Chocho yitununga ni kutungulula yipanga. Yitujika yituwa yeswe ni kuchitungulula ndo hakachi ka manangamo jacho. E atu yanunga ni kulihana chinji mu mulimo wa kutungulula.

7 Muze Sambalate, Tobia, A-Arabia, A-Amone ni A-Ashedode evwile ngwo, mulimo wa kutungulula yipanga ya Yerusaleme unayi kulutwe, ni ye yituwa yamo te kanayifuka, yevwa uli unji. 8 Eswe yalitesa hanga ase jita ni Yerusaleme ni kuneha mbwanja. 9 Chocho yitulemba kuli Zambi ni kusa tufunga waze te matufunga mwalwa ni ufuku.

10 Alioze hakachi ka A-Yunda, amwe kapwile ni kwamba ngwo: “Akwa-kulinga milimo hahonga, ni ye yiswaswa yili yinji, kashika kutuchi keza kahasa kutungulula yipanga.”

11 Chikwo nawa, akwa-kole jetu te kanambe ngwo: “Shimbu kanda achichinyingika chipwe kutumona, tunjilenu mukachi ko, twashihenu ni kumanyisa mulimo wa kutungulula.”

12 Mashimbu eswe muze A-Yunda waze te atwama hakamwihi ni akwa-kole apwile ni kunjila mu Yerusaleme te kakutulweza ngwo: “Ayo matulukukila sali ni sali.”

13 Chocho yingusa tufunga ku yihanda ya chipanga yize te kanda yichipwa kutungulula. Yingwasa kulita ni usoko, yingwaha tutana, makunga ni mata akwasa. 14 Mba muze namwene ngwami woma anevu, kawashi-washi yinguya ni kulweza alemu, tuminyi a nguvulu ni atu akwo ngwami: “Kanda nwevwila woma. Iwulukenu ngwenu, Yehova, iye Zambi munene kole ni woma, asenu jita mumu lia mandumbu jenu, ana jenu a malunga ni a mapwo, mapwo jenu ni mumu lia usoko wenu.”

15 Muze akwa-kole jetu amwene ngwo hitwanyingika yize o te anazange kulinga, chikwo nawa ngwo, Zambi wamwenemwene hatulweza yuma yize atesele, chocho yetu eswe yituhiluka ku mulimo wa kutungulula yipanga. 16 Chize ha tangwa lize, malunga amwe yakalakala ku mulimo wa kutunga, alioze malunga akwo akwachile makunga, kepwe, mata ni mazalo a utale. Mba akwa-lutwe akwashile atu eswe A-Yunda 17 waze te anatungulula yipanga ya mawe. Akwa-kutunga kapwile ni kulinga mulimo ni kwoko limuwika, kwoko likwo kapwile ni kukwata nalio uta. 18 Mukwa-mulimo mweswe yatungika katana mu zalilo yenyi muze te anakalakala, mba mutu yoze wapwile ni kwimba chitavwi te kakupwa sali liami.

19 Chocho yingulweza alemu, tuminyi a nguvulu ni atu akwo ngwami: “Mulimo uli unene chinji, chikwo nawa hitwalimwanga sali ni sali lia chipanga, tuli kusuku umwe ni mukwo. 20 Muze munwivwa zungo lia chitavwi, zombokelenu kuze tuli yetu, mumu Zambi yetu kumakatwashila jita.”

21 Chocho, twanungine ni kukalakala, atu akwo anungine ni kukwata mata, chize ku kuvumbuka cha tangwa ndo ku kusoloka cha tutongonoshi. 22 Ha shimbu liacho yingulweza atu ngwami: “Malunga eswe, hamwe ni yikwashi jo mapombela mu Yerusaleme, ha ufuku o makalakala ngwe tufunga, alioze mwalwa, makalakala ku mulimo wa kutungulula yipanga.” 23 Kashika, yami, mandumbu jami, yikwashi jami ni tufunga waze apwile ni kungukaula te kutushi kuzula mazalo jetu. Yetu eswe twapwile ni kukwata uta ku kwoko lia utata.

5 Chocho, malunga hamwe ni mapwo jo yaputuka kulinyenyeta hakutwala kuli A-Yunda ni akwo. 2 Amwe yamba ngwo: “Yetu ni ana jetu a malunga ni a mapwo tuli anji, twatamba kupwa ni yize mutulia mba tununge ni mwono.” 3 Eka yamba ngwo: “Tunahana mindqa yetu ya kulia ni ya vinyu ni mazuwo jetu hanga atwehe kulia.” 4 Eka nawa yamba ngwo: “Twahanyine minda yetu ya kulia ni minda ya vinyu hanga tutambule mbongo ja kufweta najo lijimu kuli mwanangana. 5 Chikwo nawa, yetu tuli mandumbu, ana a mutu umuwika, ana jetu kali ngwe ana jo. Chipwe chocho, twakuhana ana jetu a malunga ni a mapwo ngwe tupinji, amwe a kuli ana jetu a mapwo hanapu lume tupinji. Kukushi nichimwe chize mutuhasa kulinga hanga tuchalumune, mumu minda yetu ya kulia ni ya vinyu hiyinapu ya atu akwo.”

6 Muze nevwile kulinyenyeta cho ni maliji wano, yingwivwa uli unji. 7 Chocho yingunyonga kanawa ha chikuma chacho, mba yinguputuka kwambila alemu ni tuminyi a nguvulu ngwami: “Yenu eswe nunechi mbwezo kuli mandumbu jenu.”

Chikwo nawa, yingukunga mbunga yinene mumu lia ayo. 8 Yingwamba kuli ayo ngwami: “Kulita ni uhashi wetu, yetu hitunakuula mandumbu jetu A-Yunda waze alanjishile kuli akwa-mavungu; haliapwila, shina ni yenu munulanjisa mandumbu jenu? Shina twatamba kwakuula cheka nawa nyi?” Muze hinahula chocho, o eswe yahola kuluu, kambile nichimwe. 9 Mba yingwalweza ngwami: “Yize nunalingi kuyalitele. Shina kunwatambile kuvwila Zambi woma hanga mavungu ni akwa-kole jetu achine kutusaula nyi? 10 Yami, mandumbu jami ni yikwashi jami twalevwalisa mbongo ni kulia. Lisesa, tulitwaminenu kwita mbwezo. 11 Lisesa, ngunanwichi hanga musono lume nuhilwise minda yo ya kulia ni ya vinyu, olevwe, mazuwo jo, chihanda chimuwika cha kulakaji cha mbongo, mbuto, vinyu yaha ni maji a olevwe waze nunakatambula kuli ayo ni mbwezo.”

12 O yangukumbulula ngwo: “Mutuhilwisa yuma yeswe, chikwo nawa kutuchi kwita nichimwe, mutulinga kulita ni yize hiwamba.” Chocho yingusanyika asasendote mba yingulweza malunga jacho hanga alishinge ngwo, kumamanununa chilakenyo cho. 13 Kashika, yingukukumuna mazalo jami ni kwamba ngwami: “Chizechene nawa, mwene Zambi akakukumune eswe waze kamanunwine chilakenyo cho. Aakukumune lume asale chizechene.” Mba chikungulwila cheswe yichamba ngwo: “Amene!* Chocho yachichimieka Yehova, e atu yamanununa yize alakenyene.

14 Chikwo nawa, chize ha tangwa lize angutongwele ngwe nguvulu mu chifuchi cha A-Yunda ha mwaka 22 ndo ha mwaka 32 wa mwanangana Artasherke, hanji ngwetu ha miaka 12, yami chipwe mandumbu jami kutwakalile kulia chize nguvulu ali ni ulite wa kutambula kuli atu. 15 Alioze, manguvulu waze aliangile te kakupinjisa atu, matangwa eswe te kakwita 40 a mbongo ja prata* hanga alande kulia ni vinyu. Chipwe yikwashi jo no te kakumwesa atu lamba. Alioze, yami chakalingile chocho, mumu lia kuvwila Zambi woma.

16 Chikwo nawa, nakwashile mulimo wa kutungulula chipanga, kutwakalanjile munda niumwe. Yikwashi jami eswe kalihanyine mu mulimo wa kutungulula. 17 Kwapwile A-Yunda 150 ni mihato a nguvulu waze te akulia ku mesa yami, kuwezako nawa akwa-mavungu waze apwile ni kukatuka ku mbonge jeka. 18 Matangwa eswe kapwile ni kungushihila ngombe umuwika, mapanga asambano apema chinji ni tusumbi.* Ha kupalika cha matangwa 10 twapwile ni kupwa ni vinyu munji wa mutapu weka ni weka. Chipwe chocho, chakechile kulia chize nguvulu ali ni ulite wa kulia, mumu atu te kanahongo chinji ni mulimo. 19 Zambi yami, ngwiwuluke kama mumu lia yuma yeswe yize nalingila atu wano.

6 Muze Sambalate, Tobia ni Ngesheme Ka-Arabia ni akwa-kole jetu akwo anyingikine ngwo, te hinatungulula chipanga, chikwo nawa ngwo te kwakapwile chituwa nichimwe, (chipwe ngwe te kanda nguchisa yajilo ku unjililo), 2 Sambalate ni Ngesheme kawashi-washi yangutumina lusango yono ngwo: “Tweya tukalitakane mu chimwe chihunda mu chikulo cha Ono.” Kwamba umwenemwene o te kanazange kungulinga upi. 3 Kashika yingwatumina mikeji hanga aalweze ngwo: “Ngunalingi mulimo unene chinji, kashika chichi kuhasa kuya. Mumu liaka mungwecha kulinga mulimo hanga nguye ni kulitakana ni yenu?” 4 Ayo yangutumina lusango wacho kawana keswe, ni yami yingwaha kumbululo lizeliene.

5 Mba Sambalate yangutumina chikwashi chenyi ni lusango yozemwene ha chisuho chamuchitano, iye kapwile ni umwe mukanda ku kwoko. 6 Ha mukanda wacho hapwile ha kusoneka ngwo: “Tunevu kuli akwa-mavungu ni Ngesheme neye kanachitayiza ngwo, yena ni A-Yunda nunazange kulimika ni mwanangana. Kashika nunatungulula chipanga, chikwo nawa, ayo kanambe ngwo, yena mukapwa mwanangana wo. 7 Chikwo nawa, hiunatongola aprofeta hanga akambulule mu Yerusaleme yeswe hakutwala kuli yena ngwo: ‘Mu Yunda muli umwe mwanangana!’ Yuma yino yeswe mutukayilweza mwanangana. Kashika, ngunakusanyika hanga tuhanjike hakutwala ku yikuma yino.”

8 Chocho, yingumutumina kumbululo lino ngwami: “Yuma yeswe yize wamba kuyalingiwile, yena mwe wayitomba.”* 9 Ayo eswe te kakweseka kutuvwisa woma ni kutwamba ngwo: “Ayo kumahonga mu mulimo au, kechi kuhasa kuuhwisa.” Kashika, Zambi yami, ngutakamise kama.

10 Mba yinguya ku zuwo lia Shemaia mwana wa Ndelaia, mwana wa Mehetapele, ha shimbu liacho te keshi kukatuka ku zuwo lienyi. Iye yangulweza ngwenyi: “Tuye tukaliwane mu zuwo lia Zambi wamwenemwene, muchima lia tembele, tukayike yikolo ya tembele mumu ayo makeza hanga akushihe. Makeza ufuku hanga akushihe.” 11 Alioze, yingumulweza ngwami: “Shina yami natamba lume kuchina? Shina lunga ngwe yami nyi nanjila mu tembele mungununga ni mwono? Ka, chichi kunjilamo!” 12 Mba yingunyingika ngwami, kumana hi Zambi ko wamutumine, alioze Tobia ni Sambalate e alitesele nenyi hanga angulweze maliji jacho. 13 Shemaia kamufwetele hanga anguvwise woma ni kunguvulumwisa kuli Zambi. Ha kulinga chino, ayo te mapwa ni chitela chakupihisa lufuma wami ni kungusaula.

14 Zambi yami, iwuluka kama Tobia ni Sambalate ni yitanga yo, ni profeta wa pwo Noadia, ni aprofeta akwo waze azangile kunguvwisa woma mashimbu eswe.

15 Mulimo wa kutunga yipanga wambachile matangwa 52, wahwile ha tangwa 25 lia kakweji wa Elule.*

16 Muze akwa-kole jetu achivwile ni akwa-mavungu waze apwile hakamwihi achimwene, ayo yevwa sonyi* jinji, yanyingika ngwo, mulimo wacho twahashile kuulinga ni ukwaso wa Zambi. 17 Ha matangwa aze, alemu ja mu Yunda kapwile ni kutuma mikanda yinji kuli Tobia, Tobia kapwile ni kwakumbulula. 18 Mu Yunda mwapwile atu anji waze alishingile kushishika kuli Tobia, mumu iye kambachile mwana wa Shekania, mwana wa Ara. Chikwo nawa, Jehohana mwana wa Tobia, kalimbachile ni mwana wa Meshulame, mwana wa Mberekia. 19 Atu te kakungulweza mashimbu eswe yuma yipema ya Tobia, chikwo nawa, te kakumulweza yuma yize nakuhanjika. Kashika Tobia apwile ni kungutumina mikanda mashimbu eswe hanga anguvwise woma.

7 Muze mulimo wa kutungulula yipanga wahwile, yingusa yikolo mu chihela chayo, mba yingusa akwa-kufunga mapito, akwa-kwimba ni A-Levi no yatambula milimo yo. 2 Mba yingutongola Hanani mwana-kwetu hanga apwe mukwa-kuyula Yerusaleme hamwe ni Hanania mwata wa maswalale wa Zuwo lia Wanangana, mumu Hanania kapwile mutu wa ujikijilo, yoze te wakuvwila Zambi woma, kuhiana atu akwo. 3 Kashika, yingwalweza ngwami: “Yikolo ya mu Yerusaleme katambile kuyazulula muze mwalwa kanda uchituhuka, ni akwa-kufunga yajilo katamba kuyiyika muze achili ha mulimo. Chikwo nawa, tongolenu tufunga mukachi ka atu waze atwama mu Yerusaleme, amwe makafunga yihela yeka ni yeka, akwo makapwa kulutwe lia mazuwo jo.” 4 Mbonge yapwile yinene chinji, alioze atu akehe apwilemo, chikwo nawa mazuwo te kanda achatungulula.

5 Hachino, Zambi yami yangusongwela hanga ngukungulule alemu, mihato a nguvulu ni atu hanga aasonekese kulita ni usoko wo. Yinguwana mukanda wa majina ja waze aliangile kuhiluka mu Yerusaleme haze hapwile ha kusoneka ngwo:

6 Wano kali atu a mu mbonge waze akatukile mu undungo, waze ambachile kuli Nabukanezore Mwanangana wa Babilonia. Ayo kahilukile ku Yerusaleme ni mu Yunda, mutu ni mutu mu mbonge yenyi. 7 Ayo kejile ni Zorobabele, Yeshua, Nehemia, Azaria, Ramia, Nahamani, Mordekai, Bilesane, Mizepare, Bikavaia, Nehume ni Bana.

Unji wa malunga A-Izalele kapwile wano: 8 Ana ja Paroshe kapwile 2,172; 9 ana ja Shefatia kapwile 372; 10 ana ja Ara kapwile 652; 11 ana ja Pahata-Moape, a kuli ana ja Yeshua ni Joabe, kapwile 2,818; 12 ana ja Elame kapwile 1,254; 13 ana ja Zatu kapwile 845; 14 ana ja Zakai kapwile 760; 15 ana ja Binui kapwile 648; 16 ana ja Bebai kapwile 628; 17 ana ja Azegate kapwile 2,322; 18 ana ja Adonikame kapwile 667; 19 ana ja Bikavaia kapwile 2,067; 20 ana ja Adine kapwile 655; 21 ana ja Atere, usoko wa Hezekia kapwile 98; 22 ana ja Hashume kapwile 328; 23 ana ja Bezaia kapwile 324; 24 ana ja Harifa kapwile 112; 25 ana ja Ngibeone kapwile 95; 26 malunga a ku Mbeteleme ni Netofa kapwile 188; 27 malunga a ku Anatote kapwile 128; 28 malunga a ku Mbete-Azmave kapwile 42; 29 malunga a ku Kiriate-Yerime ni Chefira ni Mberote kapwile 743; 30 malunga a ku Rama ni Ngeba kapwile 621; 31 malunga a ku Mikimashi kapwile 122; 32 malunga a ku Mbetele ni Ayi kapwile 123; 33 malunga a ku Nebo yikwo kapwile 52; 34 ana ja Elame mukwo kapwile 1,254; 35 ana ja Harimi kapwile 320; 36 ana ja Yeriku kapwile 345; 37 ana ja Lode, Hadide ni Ono kapwile 721; 38 ana ja Sena kapwile 3,930.

39 Asasendote kapwile wano: Ana ja Jedaia a ku munyachi wa Yeshua kapwile 973; 40 ana ja Imere kapwile 1,052; 41 ana ja Pashure kapwile 1,247; 42 ana ja Harimi kapwile 1,017.

43 A-Levi kapwile wano: Ana ja Yeshua ni Kamiele, a kuli ana ja Hodavia kapwile 74. 44 Njimba kapwile wano: Ana ja Asafwe kapwile 148. 45 Akwa-kufunga mapito kapwile wano: Ana ja Shalume, ni ana ja Atere, ni ana ja Talmone, ni ana ja Akube, ni ana ja Hatita, ni ana ja Shobai kapwile 138.

46 Tuvumbi a mu tembele* kapwile wano: Ana ja Ziha, ni ana ja Hasufa, ni ana ja Tabaote, 47 ni ana ja Kerose, ni ana ja Sia, ni ana ja Padone, 48 ni ana ja Lebana, ni ana ja Hagaba, ni ana ja Shalmai, 49 ni ana ja Hanane, ni ana ja Gidele, ni ana ja Gahare, 50 ni ana ja Reaia, ni ana ja Rezine, ni ana ja Nekoda, 51 ni ana ja Gazame, ni ana ja Uza, ni ana ja Pasea, 52 ni ana ja Besai, ni ana ja Meunime, ni ana ja Nefuseshime, 53 ni ana ja Bakabuke, ni ana ja Hakufa, ni ana ja Harure, 54 ni ana ja Bazelute, ni ana ja Mehida, ni ana ja Haresha, 55 ni ana ja Barkose, ni ana ja Sisera, ni ana ja Tema, 56 ni ana ja Nezia, ni ana ja Hatifa.

57 Ana ja tuvumbi a Solomone kapwile wano: Ana ja Sotai, ni ana ja Soferete, ni ana ja Perida, 58 ni ana ja Jala, ni ana ja Darekone, ni ana ja Gidele, 59 ni ana ja Shefatia, ni ana ja Hatile, ni ana ja Pokerete wa Zebaime, ni ana ja Amone. 60 Tuvumbi eswe a mu tembele* ni ana ja tuvumbi a Solomone kapwile 392.

61 Waze akatukile ku Tela-Mela, ni Tela-Haresha, ni Kerube, ni Adone, ni Imere kakahashile kusolola munyachi wa atato ni kuze akatukile nyi kapwile lume A-Izalele nyi ka, kapwile wano: 62 Ana ja Ndelaia, ni ana ja Tobia, ni ana ja Nekoda kapwile 642. 63 A kuli asasendote kapwile wano: Ana ja Habaia, ni ana ja Koze, ni ana ja Bazilai, yoze wambachile pwo wa kuli ana ja Ka-Ngiliate Bazilai, mba yahinga jina lia usoko wo. 64 Wano afupile majina jo mu mukanda wa yisemuko, alioze kaawanyinemo. Kashika aachijile ha mulimo wa usasendote.* 65 Mba nguvulu yaalweza ngwenyi, te katambile kulia yuma yisandu ndo muze mukusoloka umwe sasendote yoze te mahula Zambi kupalikila mu Urimi ni Tumimi.

66 Chikungulwila cheswe chapwile ni unji wa atu 42,360, 67 kuchizako tupinji a mapwo ni a malunga waze apwile 7,337; kwapwile nawa njimba a malunga ni a mapwo 245. 68 Tuvwalu jo kapwile 736, mula jo kapwile 245, 69 tumelu jo kapwile 435, ni yimbulu jo kapwile 6,720.

70 Amwe akwa-lutwe a ku munyachi wa atato yahana milambu hanga akwase mulimo. Nguvulu yahana 1,000 ka mbongo ja oru, 50 a mbashila ni 530 a mazalo ja sasendote. 71 Miata akwo a mu Izalele yahana 20,000 a drakma ja oru ni 2,200 a mina* ja prata hanga akwase mulimo. 72 Atu akwo yahana 20,000 a drakma ja oru, 2,000 a mina ja prata ni 67 a mazalo ja sasendote.

73 Chocho, asasendote, A-Levi, akwa-kufunga mapito, njimba, ni atu amwe, ni tuvumbi a mu tembele* ni A-Izalele akwo, yaya mu mambonge jo. Ha kukundama cha kakweji wamuchishimbiali, A-Izalele eswe, mutu ni mutu yatwama mu mbonge yenyi.

8 Atu eswe yatayiza kulikungulula mu lwaza kulutwe lia Chikolo cha Meya. Ayo yalweza Ezera longeshi ya shimbi hanga anehe mukanda wa Shimbi ya Mose uze Yehova ahanyine kuli A-Izalele. 2 Mba ha tangwa litangu lia kakweji wamuchishimbiali, Ezera sasendote yeza ni mukanda wa Shimbi kumeso ja chikungulwila, haze hapwile malunga, mapwo ni eswe waze ahashile kuwana ulumbunwiso. 3 Iye yautanga ni liji mwilu mu lwaza kulutwe lia Chikolo cha Meya, chize chimene ndo tangwa ha muchima kumeso ja malunga, mapwo ni eswe waze ahashile kuwana ulumbunwiso. E atu yapanjika kanawa kutanga cha mukanda wa Shimbi. 4 Ezera longeshi ya shimbi te kanamana ha chitamba cha mitondo chize atungile mumu lia tangwa liacho, sali lienyi lia utata, kwamanyine Matitia, Shema, Anaia, Uriya, Hilekia ni Maseia; mba sali lienyi lia umama kwamanyine Pedaia, Mishaele, Malekia, Hashume, Hashabadana, Zekaria ni Meshulame.

5 Ezera yazulula mukanda kumeso ja atu eswe, iye te kanamana ha chitamba. Muze azulwile mukanda, atu eswe yakatuka hanga amane. 6 Ezera yahalisa Yehova, Zambi wamwenemwene, Zambi munene, mba atu eswe yakumbulula ngwo: “Amene!* Amene! Chikwo nawa yazundula moko jo, yafulamana kumeso ja Yehova ni kumuwayila. 7 Mba Yeshua, Mbani, Sherebia, Yamine, Akube, Shabetai, Hodia, Maseia, Kelita, Azaria, Jozabade, Hanane ni Pelaia e A-Levi, yalumbununa Shimbi kuli atu waze te anamana. 8 Ayo yanunga ni kutanga mukanda wa Shimbi ja Zambi wamwenemwene ni liji mwilu ni kujilumbununa kanawa ni kukwasa atu hanga awane ulumbunwiso wa yize te anaatangila.

9 Nehemia yoze te wakuyula ha mashimbu jacho, ni sasendote Ezera longeshi ya Shimbi ni A-Levi waze te analongesa atu, yamba kuli atu eswe ngwo: “Tangwa lia musono lili lisandu kuli Yehova Zambi yenu, kanda nulinyenga, chipwe kulila.” Mumu atu eswe te kanalila ha kwivwa maliji a Shimbi. 10 Iye yamba kuli ayo ngwenyi: “Yeenu nulie kulia chipema ni kunwa yuma yayekemena, hanenu kulia kuli waze keshi nacho; mumu tangwa lino lili lisandu kuli Mwene wetu. Kanda nulinyenga, mumu uwahililo uze wakukatuka kuli Yehova we wakunwaha tachi.”* 11 Mba A-Levi yaholesa atu eswe ni kwalweza ngwo: “Kanda nulila, mumu tangwa lino lili lisandu. Kanda nunenganyana.” 12 Chocho atu eswe yaya hanga alie ni kunwa; yatumina atu akwo kulia, yawahilila chinji, mumu maliji waze aalwezele yaalumbunuka.

13 Ha tangwa liamuchiali, akwa-lutwe a mu minyachi ya atato hakachi ka atu eswe ni asasendote ni A-Levi, yalikungulula kuli Ezera longeshi ya shimbi hanga anyingike kanawa maliji a Shimbi. 14 Chocho, yawana mu mukanda wa Shimbi yize Yehova ahanyine kupalikila muli Mose, mwakusoneka ngwo A-Izalele te katamba kutwama mu yisakila ha mashimbu a chiwanyino cha kakweji wamuchishimbiali, 15 ni kwambujola mu mambonge jo eswe ni mu Yerusaleme ngwo: “Yeenu ku milundu nutete mitango ya olevwe ni ya olevwe wa mu yambu, ya miluta, ya mingaji ni ya mitondo yikwo hanga nutunge yisakila ngwe chize chinasonewa.”

16 Chocho e atu yaya, yaneha mitango hanga atunge yisakila, mutu ni mutu ha fulumba lia zuwo lienyi, mu yiize yenyi, mu yiize ya zuwo lia Zambi wamwenemwene, ha lwaza wa Chikolo cha Meya ni ha lwaza wa Chikolo cha Eframe. 17 Chikungulwila cheswe chize chakatukile mu undungo yichitunga yisakila ni kutwamamo. A-Izalele te kanda achilinga kama chiwanyino cha mutapu au chize ha matangwa ja Yoshua mwana wa Nune ndo ha tangwa liacho, kwapwile uwahililo unji. 18 Chize ha tangwa litangu lia chiwanyino ndo ha tangwa liakasula, te kakutanga Shimbi ya Zambi wamwenemwene. Ayo yalinga chiwanyino ha matangwa shimbiali, mba ha tangwa liamuchinake yalikungulula hamuwika, ngwe chize chasonewene mu Shimbi.

9 Ha tangwa 24 lia kakweji, A-Izalele yalikungulula hanga alitwamine kulia, yazala yikeleyi* ni kulihinjila uto. 2 Akwa-munyachi wa Izalele, yalihandununa ni yilambala eswe, yamana, yambulula shili yo ni tupalia a yisemi jo. 3 Ha maola atatu, yamana ha yihela yo, mba yatanga ni liji mwilu Shimbi ya Yehova, Zambi yo, yalinga nawa maola atatu ni kwambulula shili yo ni kufulamana kumeso ja Yehova, Zambi yo.

4 Yeshua, Mbani, Kamiele, Shebania, Buni, Sherebia, Mbani ni Chenani, yaanyina ha chitamba cha A-Levi, yaalemba ni liji mwilu kuli Yehova, Zambi yo. 5 Mba A-Levi, Yeshua, Kamiele, Mbani, Hashabania, Sherebia, Hodia, Shebania ni Petahia yaamba ngwo: “Katukenu nuhalise Yehova Zambi yenu ku miaka yeswe. Zambi yetu, ayo akahalise jina lie linene lize lili helu lia yiwape yeswe ni uhaliso weswe.

6 “Yenu wika nuli Yehova. Yenu nwatangile malilu, ewa malilu ni yeswe yize yilimo, hashi ni yeswe yize yiliho, tulunga-lwiji ni yeswe yize yilimo. Yenu nwakufunga mwono wa eswe, ni mbunga ya mwilu yakufulamana ni kunuwayila. 7 Yenu wika nuli Yehova, Zambi wamwenemwene, yoze wasakwile Apalama ni kumuchiza mu mbonge ya Ure ya A-Kaletea ni kumuluka jina lia Apalahama. 8 Nwamwene ngwenu iye te kashishika kuli yenu. Kashika nwalingile nenyi usendo wa kumwaha chifuchi cha A-Kanana, cha A-Hete, cha A-Amore, cha A-Perize, cha A-Yepushe ni cha A-Ngikashe, kuchihana kuli iye ni munyachi wenyi; chikwo nawa nwamanunwine chilakenyo chino, mumu yenu nuli mukwa-ululi.

9 “Nwamwene lamba lia tulamba twetu mu Engitu, chikwo nawa, nwevwile miteto yo muze apwile hakamwihi ni Kalunga-lwiji Muchila. 10 Chocho yinulinga yilayi ni yikomokeso hali Falau ni tuvumbi jenyi eswe, ni hali atu eswe a mu chifuchi chenyi, mumu nwanyingikine chize ayo akalishile mbunge ni kulimika ni atu jenu. Jina lienu liafumanyine ngwe chize linafumana musono. 11 Nwatetele kalunga-lwiji kumeso jo, mba ayo yazauka kalunga-lwiji hashi homu. Yinunyasa akwa-kole jo ha mashima ja meya ngwe chize akukonga liwe ha jinga lia meya. 12 Ha mwalwa yinwasongwela ni nguji lia lelwa, ha ufuku yinwasongwela ni nguji lia kahia, hanga nwatemwine mu jila yize chaatamba kwenda. 13 Yinuhulumuka ha Mulundu wa Sinai, yinuhanjika no kukatuka mu malilu, yinwaha upatwilo wa ululi, shimbi jamwenemwene, yiyulo ni shimbi jipema. 14 Yinwanyingikisa Sambata yenu yisandu, yinwaha shimbi, yiyulo ni shimbi jikwo kupalikila muli kavumbi kenu Mose. 15 Muze evwile zala, yinwaha mbolo ya mwilu, muze evwile pwila, yinutuhwisa meya ku liwe ni kwahawo, yinwalweza hanga anjile ni kutambula chifuchi chize nwalakenyene kwaha.

16 “Alioze, a shakulu jetu yalijikijila ene, yakalisa mbunge jo, kakapanjikile ku shimbi jenu. 17 Ayo kakazangile kunupanjika, yavulama yikomokeso yize nwalingile mukachi ko, yaakalisa mbunge ni kutongola umwe kasongo hanga ahiluke mu undungo ku Engitu. Alioze yenu nuli Zambi mukwa-kukonekena, mukwa-keke, mukwa-kulihumikiza wa too ni utu wa zango, chikwo nawa, nwakehukile. 18 Chipwe muze alingile ngombe* wa oru, ni kunusaula, ni kwamba ngwo: ‘Yono mwe Zambi yetu, yoze watuchijile ku Engitu,’ 19 chipwe chocho, yenu ha keke yenu yinene, kunwakehukile mu puya. Nguji lia lelwa lize te liakwasongwela ha mwalwa mu jila, kunwakalichijile, chipwe nguji lia kahia lize te liakwatemwina mu jila yize te atamba kwenda ha ufuku, kunwakalichijile. 20 Yinwaha spiritu yenu hanga yasongwele ni mana, kunwakaaminyine manaa jenu, yinwaha meya muze evwile pwila. 21 Ha miaka 40 yinwaha kulia mu puya. Ayo kakahonene chuma nichimwe. Mazalo jo kakasuwikile, chipwe molu jo kakajimbile.

22 “Yinwaha mianangana ni atu, yalitetela yifuchi hakachi ko, yakumba chifuchi cha Sahone, hanji ngwetu, chifuchi cha mwanangana Heshebone, ni chifuchi cha Oge mwanangana wa Mbashane. 23 Chikwo nawa, yinwokesa ana jo ngwe tutongonoshi a mwilu. Mba yinwatwala mu chifuchi chize nwalakenyene tulamba two, ngwo te manjila ni kutwamamo. 24 Hachino, ayo yanjila ni kutambula chifuchi, yinukumba A-Kanana kumeso jo, waze te atwama mu chifuchi chacho, yinukunjika kuli ayo mianangana ni atu a mu chifuchi chacho hanga alinge no cheswacho chize o te mazanga. 25 Ayo kakumbile mambonge a yipanga ya mawe ni yifuchi ya upite, katambwile mazuwo a too ni yuma yeswe yipema, waze apwile ni mashima a kutota ni minda ya vinyu, ya olevwe ni mitondo yikwo ya mihuko. Kashika ayo alile, akuchile, atohwele ni kuwahilila ni yuma yinji yipema.

26 “Alioze, ayo kapwile yihulia, kalimikine ni yenu ni kulengulula Shimbi* je. Kashihile aprofeta jenu waze te akwatoweza hanga ahiluke kuli yenu, ayo kalingile yuma yinji yipi. 27 Kashika, yinwakunjika kuli akwa-kole jo, waze apwile ni kwamwesa lamba linji. Hachino, yakololoka kuli yenu ha mashimbu a lamba, mba yenu mwilu yinwapanjika. Mumu lia keke yenu yinene, yinwatumina yilamwina hanga aalamwine ku moko ja akwa-kole jo.

28 “Alioze muze te nwakwalamwina, ayo te kakulinga cheka nawa yuma yipi kumeso jenu. Kashika te nwakwakunjika ku moko ja akwa-kole jo ni kwecha hanga aayule. Mba muze ayo te akufuna kuli yenu ni kwita ukwaso wenu, te nwakwapanjika chize mwilu ni kwapulwila ha yisuho yinji mumu lia keke yenu yinene. 29 Nwatowezele hanga ahiluke ku Shimbi jenu, alioze ayo yalijikijila ene, kakatayijile kupanjika shimbi jenu. Kakakawile shimbi jenu, jize atu atamba kukaula mba apwe ni mwono, kashika avulumwine. Ayo yaahamuka kunumba nyima, yakalisa mbunge, yalituna kunupanjika. 30 Nwasolwele uhomboloji kuli ayo ha miaka yinji, mba kupalikila mu spiritu yenu, yinwatumina aprofeta jenu hanga aatoweze, alioze ayo kakapanjikile. Kashika, yinwahana mu moko ja atu a yifuchi yeka. 31 Alioze ha keke yenu yinene, kunwanongesene chipwe kwehuka, mumu nuli Zambi ya utu ni keke.

32 “Haliapwila, Zambi yetu, Zambi munene, Zambi wa ndundo kole ni woma, mukwa-kufunga usendo ni utu ni kusolola utu wa zango, kanda nulengulula kama lamba lieswe lize liatuwana yetu, mianangana jetu, akwa-lutwe jetu, asasendote jetu, aprofeta jetu, tulamba twetu ni atu jenu eswe, chize ku matangwa ja mwanangana wa Asuria ndo musono. 33 Nwasolwele ululi ni ushishiko ha yuma yeswe yize yalingiwile kuli yetu, alioze yetu e twahengesele kuli yenu. 34 Hakutwala kuli mianangana jetu, akwa-lutwe, asasendote ni tulamba twetu, ayo kakononokene Shimbi jenu, chipwe kupanjika shimbi jenu ni yiyulo yize nwahele. 35 Chipwe muze apwile mu wanangana wo, ni kuwahilila ni upeme uze nwasolwele mu chifuchi chinene cha mavu apema chize nwahele, nihindu ayo kakanulingilile, chipwe kwecha yitanga yo yipi. 36 Kashika musono tuli ndungo, ewa ndungo mu chifuchi chize nwahanyine kuli tulamba twetu hanga akalie ku mihuko yamo ni kuwahilila ni yuma yipema. 37 Yuma yinji yize yakukatuka mu chifuchi chacho, yakuya kuli mianangana waze nwasele hanga atuyule mumu lia shili yetu. Ayo kakuyula hali yetu ni hali a shakulu jetu kulita ni chize anazange, kashika twamwene lamba linji.

38 “Kashika mumu lia yuma yino yeswe, twalinga usendo ni kuusoneka, usendo uze ajika ni chilayi cha akwa-lutwe jetu, A-Levi ni asasendote jetu.”

10 Majina ja waze asele chilayi ha usendo wacho kali wano:

9 A-Levi kapwile wano: Yeshua, mwana wa Azania, Binui wa kuli ana ja Henadade, Kamiele, 10 ni mandumbu jenyi, Shebania, Hodia, Kelita, Pelaia, Hanane, 11 Mika, Rehobo, Hashabia, 12 Zakure, Sherebia, Shebania, 13 Hodia, Mbani ni Beninu.

14 Akwa-lutwe ja atu kapwile wano: Paroshe, Pahata-Moape, Elame, Zatu, Mbani, 15 Buni, Azegate Bebai, 16 Adonija, Bikavaia, Adine, 17 Atere, Hezekia, Azure, 18 Hodia, Hashume, Bezaia, 19 Harifa, Anatote, Nebaia, 20 Magapiashe, Meshulame, Hezira, 21 Meshezabele, Zadoke, Jadua, 22 Pelatia, Hanane, Anaia, 23 Hoshia, Hanania, Hasube, 24 Halohesha, Pila, Shobeke, 25 Rehume, Hashabana, Maseia, 26 Ahia, Hanane, Ana, 27 Maluke, Harimi ni Bana.

28 Atu eswe, asasendote, A-Levi, akwa-kufunga mapito, njimba, tuvumbi a mu tembele* ni eswe waze alihandunwine ni akwa-yifuchi yasulangana hanga akaule Shimbi ja Zambi, hamwe ni mapwo jo ni ana jo a malunga ni a mapwo, eswe waze apwile ni chinyingi ni malinjekela, 29 ayo eswe yalichinga ni mandumbu jo ni malunga alemu, yalishinga ngwo te kumenda mu Shimbi ja Zambi wamwenemwene, jize ahanyine kupalikila muli Mose, kavumbi ka Zambi wamwenemwene. Chikwo nawa, te kumononokena shimbi jeswe ja Yehova Mwene wetu, ni upatwilo wenyi wa ululi ni yiyulo yenyi. 30 Kutuchi kuhana ana jetu a mapwo hanga alimbate ni yilambala, chipwe kwecha ana jetu a malunga hanga ambate ana jo a mapwo.

31 Nyi yilambala maneha yikwata yo ni kulia hanga atulanjiseyo ha tangwa lia Sambata, kutuchi kulanda chuma nichimwe ha tangwa lia Sambata chipwe ha matangwa akwo asandu. Chikwo nawa, ha mwaka wamuchishimbiali kutuchi kukunga mbuto, mutukonekena makongo ja akwetu.

32 Chikwo nawa, mutu ni mutu wa kuli yetu katesele kuhana ha mwaka ni mwaka chihanda chimuwika ha yihanda yitatu ya shekele mu mulimo wa zuwo lia Zambi yetu 33 hanga akwase ha yuma yino: Ha mbolo ja kutumbieka, ha mulambu wa wunga wa matangwa eswe, ha mulambu wa kulumba wa matangwa eswe, ha Masambata, ha kakweji mwaha, ha yiwanyino ya kufunjika, ha yuma yisandu ni ha mulambu wa shili hanga akonekene shili ya A-Izalele, ni ha milimo yeswe ya zuwo lia Zambi yetu.

34 Yitwita nawa usongwelo hakutwala ku kunyi jize asasendote, A-Levi ni atu te atamba kuneha ku zuwo lia Zambi miaka yeswe ha shimbu lize atesele, hanga ajoche ha chilumbilo cha Yehova Zambi yetu, ngwe chize Shimbi yinambe. 35 Ha miaka yeswe, mutupwa ni kuneha ku zuwo lia Yehova mihuko yitangu ya mu chifuchi chetu ni mihuko yitangu ya mitondo yeswe, 36 ni ana jetu atangu, ni tupula majimo a ngombe jetu ngwe chize chinasonewa mu Shimbi, ni tupula majimo a pembe jetu ni mapanga jetu. Yeswe ayi mutupwa ni kuyineha ku zuwo lia Zambi, kuli asasendote waze akukalakalila mu zuwo lia Zambi yetu. 37 Chikwo nawa, twatamba kutwala wunga wa mbolo wa ku mbuto jetu jitangu, milambu yetu, mihuko ya mitondo yeka ni yeka, vinyu yaha, maji ni kuyihana kuli asasendote hanga ayise mu chipatulo cha kutulikila yuma, mu zuwo lia Zambi, ni kuhana chihanda cha kumi cha mihuko ya mu minda yetu kuli A-Levi. Mumu A-Levi e apwile ni kutambula chihanda cha kumi cha yeswe yize twapwile ni kulima mu mambonge jetu.

38 Mba sasendote, mwana wa Arone, katamba kupwa hamwe ni A-Levi muze matambula chihanda cha kumi. Ha chihanda cha kumi, A-Levi katamba kulambula chihanda chimwe cha ku chihanda cha kumi ku zuwo lia Zambi mu chipatulo muze akutulikila yuma. 39 Mu yipatulo ya kutulikila yuma, mwe A-Izalele ni ana ja A-Levi atamba kutwala milambu ya mbuto, vinyu yaha ni maji, mumu mwe mwatwama yikwata yisandu. Asasendote, akwa-kufunga mapito ni njimba mwe akulingila milimo yo. Kutuchi kalengulula zuwo lia Zambi yetu.

11 Akwa-lutwe ja atu waze te atwama mu Yerusaleme ni atu akwo, yafupa usongwelo hanga hakachi ka malunga kumi asakuleho umuwika aye ni kutwama mu Yerusaleme, mbonge yisandu. Alioze akwo livwa hanga anunge ni kutwama mu mambonge akwo. 2 Chikwo nawa, atu yawahisa malunga eswe waze alihanyine ni mbunge yeswe hanga aye ni kutwama mu Yerusaleme.

3 Wano kali alemu a mu mbonge waze asalile mu Yerusaleme. (A-Izalele akwo, asasendote, A-Levi, tuvumbi a mu tembele* ni ana ja tuvumbi ja Solomone, yasala hanga atwame mu mambonge akwo a mu Yunda, mutu ni mutu mu chihela chenyi ni mu mbonge yenyi.

4 Chikwo nawa, amwe A-Yunda ni A-Mbenjamine te katwama mu Yerusaleme.) Hakachi ka atu a mu Yunda hapwile wano: Ataia mwana wa Uzia, mwana wa Zekaria, mwana wa Amaria, mwana wa Shefatia, mwana wa Mahalale wa kuli ana ja Pereze; 5 ni Maseia mwana wa Baruke, mwana wa Kole-Hoze, mwana wa Hazaia, mwana wa Adaia, mwana wa Joaribe, mwana wa Zekaria, mwana wa Ka-Shilone. 6 Ana ja Pereze a malunga waze asalile hanga atwame mu Yerusaleme kapwile 468; ayo eswe kapwile malunga a hamu.

7 Hakachi ka A-Mbenjamine hapwile nawa wano: Salu mwana wa Meshulame, mwana wa Joede, mwana wa Pedaia, mwana wa Kolaia, mwana wa Maseia, mwana wa Itiele, mwana wa Jesaia, 8 ni Gabaia ni Salaia, kapwile 928; 9 Joele mwana wa Zikiri mwe wapwile kalayi ko, Yunda mwana wa Hasenua mwe wapwile kalayi wamuchiali mu mbonge.

10 Hali asasendote hapwile wano: Jedaia mwana wa Joaribe ni Yakine, 11 ni Seraia mwana wa Hilekia, mwana wa Meshulame, mwana wa Zadoke, mwana wa Meraiote, mwana wa Ahitube, kasongo wa ku zuwo lia Zambi; 12 akwa-milimo ni akwo, waze apwile ni kulinga milimo ya ku zuwo, kapwile 822; kali wano: Adaia mwana wa Jerohame, mwana wa Pelalia, mwana wa Amazi, mwana wa Zekaria, mwana wa Pashure, mwana wa Malekia; 13 akwa-milimo ni akwo, e miata akwo, kapwile 242; kali wano: Amashai mwana wa Azarele, mwana wa Ahazai, mwana wa Meshilimote, mwana wa Imere; 14 akwa-milimo ni akwo, malunga a tachi ni hamu, kapwile 128; kalayi ko kapwile Zabadele mwana wa Hagedolime, lunga wa mu usoko ulemu.

15 Hali A-Levi hapwile wano: Shemaia mwana wa Hasube, mwana wa Azrikame, mwana wa Hashabia, mwana wa Buni; 16 Shabetai ni Jozabade, akwa-lutwe ja A-Levi e apwile ni kusongwela milimo haze lia zuwo lia Zambi; 17 Matania, kasongo wa chizavu cha akwa-kwimba, yoze te wakusongwela miaso ha mashimbu akulemba, mwana wa Mika, mwana wa Zapati, mwana wa Asafwe ni Bakubukia mutu wamuchiali hakachi ka akwa-milimo ni akwo, ni Abada mwana wa Shamua, mwana wa Ngalale, mwana wa Yedutune. 18 A-Levi eswe apwile mu mbonge yisandu kapwile 284.

19 Akwa-kufunga mapito kapwile wano: Akube, Talmone ni akwa-milimo ni akwo waze te akusa tulayi a mapito, ayo eswe kapwile 172.

20 A-Izalele akwo, asasendote ni A-Levi kasalile mu mambonge akwo a mu Yunda, mutu ni mutu mu chihela chenyi chize ahingile.* 21 Tuvumbi a mu tembele yatwama mu Ofele; Ziha ni Gispa e apwile ni kusongwela tuvumbi* a mu tembele.

22 Kalayi wa A-Levi mu Yerusaleme kapwile Uzi, mwana wa Mbani, mwana wa Hashabia, mwana wa Matania, mwana wa Mika, ana ja Asafwe waze apwile njimba; iye kapwile ni kusongwela mulimo wa mu zuwo lia Zambi wamwenemwene. 23 Mwanangana kahanyine shimbi yakwamba ngwo, njimba katamba kwakwasa ha yeswe yize mafupa tangwa ha tangwa. 24 Petahia mwana wa Meshezabele, mwana wa Zera, mwana wa Yunda, kapwile mukwa-kuhana yiyulo kuli mwanangana hakutwala ku yikuma yize yinatale kuli atu.

25 Hakutwala ku yihunda ni minda yamo, atu amwe a mu Yunda yaya ni kutwama mu Kiriate-Arpa ni mu yihunda yamo ya hakamwihi, mu Ndibone ni mu yihunda yamo ya hakamwihi, mu Jekabazele ni mu yihunda yamo ya hakamwihi, 26 mu Yeshua, mu Molada, mu Mbete-Pelete, 27 mu Haza-Shuale, mu Mbiashipa ni mu yihunda yamo ya hakamwihi, 28 mu Zikalage, mu Mekona ni mu yihunda yamo ya hakamwihi, 29 mu Ene-rimone, mu Zarea, mu Yaramuta, 30 mu Zanoa, mu Ndulame ni mu yihunda yamo ya hakamwihi, mu Lakishi ni mu minda yamo, mu Azeka ni mu yihunda yamo ya hakamwihi. Ayo yatwama mu Mbiashipa ndo ku Chikulo cha Hinome.

31 A-Mbenjamine yatwama ku Ngeba, ku Mikimashi, ku Aija, ku Mbetele ni mu yihunda yamo ya hakamwihi, 32 ku Anatote, ku Nobe, ku Anania, 33 ku Hazore, ku Rama, ku Ngitame, 34 ku Hadide, ku Zepoime, ku Nebalate, 35 ku Lode, ku Ono, mu chikulo cha akwa-utotombo.* 36 A-Levi amwe a mu Yunda yaatongola hanga aye ni kutwama mu njiza ya A-Mbenjamine.

12 Asasendote ni A-Levi waze ahilukile ni Zorobabele mwana wa Salatiele ni Yeshua kapwile wano: Seraia, Jeremia, Ezera, 2 Amaria, Maluke, Hatuse, 3 Shekania, Rehume, Meremote, 4 Ido, Ginetone, Abija, 5 Mijamine, Madia, Biliga, 6 Shemaia, Joaribe, Jedaia, 7 Salu, Amoke, Hilekia ni Jedaia. Wano kapwile akwa-lutwe ja asasendote ni akwa-milimo ni akwo ha matangwa ja Yeshua.

8 A-Levi kapwile wano: Yeshua, Binui, Kamiele, Sherebia, Yunda ni Matania, waze apwile ni kusongwela miaso ya usakwililo ni akwa-milimo ni akwo. 9 Bakubukia ni Uni e akwa-milimo ni akwo, kapwile ni kumana kulutwe lio hanga afunge tembele. 10 Yeshua yasema Joiakime, Joiakime yasema Eliashipe, Eliashipe yasema Joiada, 11 Joiada yasema Jonata, Jonata yasema Jadua.

12 Ha matangwa ja Joiakime, wano e apwile asasendote akwa-lutwe mu minyachi ya atato: Meraia kapwile ni kumanyinako usoko wa Seraia; Hanania kapwile ni kumanyinako usoko wa Jeremia; 13 Meshulame kapwile ni kumanyinako usoko wa Ezera, Jehohana kapwile ni kumanyinako usoko wa Amaria; 14 Jonata kapwile ni kumanyinako usoko wa Maluke, Yosefwe kapwile ni kumanyinako usoko wa Shebania; 15 Adana kapwile ni kumanyinako usoko wa Harimi, Helekaia kapwile ni kumanyinako usoko wa Meraiote; 16 Zekaria kapwile ni kumanyinako usoko wa Ido, Meshulame kapwile ni kumanyinako usoko wa Ginetone; 17 Zikiri kapwile ni kumanyinako usoko wa Abija, . . . ;* kapwile ni kumanyinako usoko wa Miniame, Pilitaia kapwile ni kumanyinako usoko wa Moadia; 18 Shamua kapwile ni kumanyinako usoko wa Biliga, Jehonatane kapwile ni kumanyinako usoko wa Shemaia; 19 Matenaia kapwile ni kumanyinako usoko wa Joaribe, Uzi kapwile ni kumanyinako usoko wa Jedaia; 20 Kalaia kapwile ni kumanyinako usoko wa Salaia, Epere kapwile ni kumanyinako usoko wa Amoke; 21 Hashabia kapwile ni kumanyinako usoko wa Hilekia, Netanele kapwile ni kumanyinako usoko wa Jedaia.

22 Majina ja akwa-lutwe ja A-Levi ni asasendote kaasonekene kulita ni minyachi ya atato ha matangwa a Eliashipe, Joiada, Johanane ni Jadua ndo ha mashimbu a kuyula cha Dariu Ka-Persia.

23 A-Levi waze apwile akwa-lutwe mu minyachi ya atato, majina jo kaasonekene mu mukanda wa sango ja ha mashimbu ja Johanane mwana wa Eliashipe. 24 Akwa-lutwe ja A-Levi kapwile Hashabia, Sherebia, Yeshua mwana wa Kamiele ni akwa-milimo ni akwo waze apwile tufunga. Ayo kapwile ni kumana kulutwe lio mu yizavu hanga ahalise ni kusakwila Zambi kulita ni usongwelo wa Ndawichi, mutu wa Zambi wamwenemwene. 25 Matania, Bakubukia, Obadia, Meshulame, Talmone ni Akube, ayo kapwile akwa-kufunga mapito, kapwile ni kufunga yipatulo ya kutulikila yuma yize yapwile hakamwihi ni yikolo. 26 Ayo kapwile ni kulinga milimo yo ha matangwa ja Joiakime mwana wa Yeshua, mwana wa Jozadake ni ha matangwa ja Nehemia mukwa-kuyula, ni ja sasendote Ezera longeshi wa shimbi.

27 Ha mashimbu aze azulwile yipanga ya Yerusaleme, ayo yafupa A-Levi eswe hanga aanehe mu Yerusaleme ha chiwanyino cha kwazulula yipanga hanga embe miaso ya kusakwilila, ni sembalu, ni yisaji ya kusa ni tulialia. 28 Mba ana ja njimba yalikungulula, ayo kakatukile mu njiza ya Yordau ni ku yihunda ya hakamwihi ni Yerusaleme ni ya ku Netofate, 29 ni ku Mbete-Ngilingali, ni ku minda ya Ngeba, ni Azmave, mumu njimba te hanatungu yihunda yo hakamwihi ni Yerusaleme. 30 Mba asasendote ni A-Levi yalipemesa, yapemesa nawa atu ni mapito ni chipanga.

31 Kashika, yingunyinyisa akwa-lutwe ja A-Yunda helu lia chipanga. Chikwo nawa, yingululieka yizavu yaali ya akwa-kwimba miaso ya usakwililo ni yizavu yaali ya atu hanga aakaule. Chizavu chimuwika yichiya sali lia utata, helu lia chipanga ku Chikolo cha Mulumba wa Uto. 32 Hoshaia ni amwe akwa-lutwe A-Yunda yakaula, 33 hamwe ni Azaria, Ezera, Meshulame, 34 Yunda, Mbenjamine, Shemaia ni Jeremia. 35 Ayo kapwile ni amwe ana ja asasendote waze apwile ni yitavwi, majina jo kali wano: Zekaria mwana wa Jonata, mwana wa Shemaia, mwana wa Matania, mwana wa Mikaia, mwana wa Zakure, mwana wa Asafwe, 36 ni akwa-milimo-ni-akwo Shemaia, Azarele, Milalaia, Gilalaia, Maia, Netanele, Yunda ni Hanani. Ayo kapwile ni kwimba ni yisaji ya Ndawichi, mutu wa Zambi wamwenemwene, Ezera, longeshi wa shimbi mwe wapwile kulutwe lio. 37 Ku Chikolo cha Shima lia Meya, yakanduka ha ukandukilo wa mbonge ya mwanangana Ndawichi, yahiana Zuwo lia mwanangana Ndawichi, yaya ndo ku Chikolo cha Meya ku chivumbuko cha mbonge.

38 Chizavu chamuchiali cha njimba yichipalikila sali likwo, yami ni atu akwo yitwakaula hanyima helu lia chipanga, yituhiana Kaposhi ka Lutengo ni kuya ndo ku Chipanga Chinene, 39 yitukatuka kwenako, yituhiana Chikolo cha Eframe ni Chikolo Chikulu, ni Chikolo cha Yishi ni ku Kaposhi ka Hananele ni Kaposhi ka Hamea ni ku Chikolo cha Mapanga, yitusulila ku Chikolo cha Tulayi.

40 Kusulaho, yizavu yaali ya njimba, akwa-kwimba miaso ya kusakwilila, yamana ku zuwo lia Zambi wamwenemwene. Yami ni mihato akwo, 41 ni asasendote Eliakimi, Maseia, Miniame, Mikaia, Elionai, Zekaria ni Hanania, ayo eswe kapwile ni yitavwi, 42 hapwile nawa Maseia, Shemaia, Eleazare, Uzi, Jehohana, Malekia, Elame ni Ezere. Njimba eswe embile ni liji mwilu ni usongwelo wa Jezraia.

43 Ha tangwa liacho, yalambula yitapo yinji mumu Zambi wawahishile. Mapwo ni twanuke no yawahilila, chocho milolo ya Yerusaleme yahetele kusuku.

44 Ha tangwa liacho, yasakula malunga hanga asongwele yipatulo ya kutulikila milambu ni mbuto yitangu ni yihanda ya kumi. Mu yipatulo yacho mwe apwile ni kusa yuma yize yapwile ni kukatuka mu minda, kulita ni Shimbi hanga ayihane kuli asasendote ni A-Levi, mumu mu Yunda mwapwile uwahililo unji hamukunda wa asasendote ni A-Levi waze te akulinga milimo yo. 45 O yaputuka kulinga milimo ya Zambi yo ni milimo ya kupemesa. Njimba ni akwa-kufunga mapito yalinga chizechene kulita ni shimbi ya Ndawichi ni ya mwanenyi Solomone. 46 Ha miaka yinji, chize ha matangwa ja Ndawichi ni Asafwe, kwapwile tusongo waze te akusongwela njimba ni miaso ya uhaliso ni kusakwilila nayo Zambi. 47 Ha matangwa ja Zorobabele ni Nehemia, A-Izalele eswe te kakuhana kulia kuli njimba ni kuli akwa-kufunga mapito kulita ni yize te akufupa tangwa ni tangwa. Chikwo nawa, te kakuhandununa kulia cha A-Levi, mba A-Levi no mahandununa kulia cha munyachi wa Arone.

13 Ha tangwa liacho, mukanda wa Mose yautanga kulutwe lia mbunga. Ha mukanda wacho te hanasonewa ngwo, A-Amone ni A-Moape kechi keza kanjila mu chikungulwila cha Zambi wamwenemwene, 2 mumu kakayile ni kupatwiza A-Izalele ni mbolo* ni meya; shimbu achilinge, yafweta Mbalau hanga aashinge. Alioze Zambi yetu yalumuna shingo liacho, chocho yilipwa chiwape. 3 Muze evwile maliji a Shimbi, ayo yahandununa yilambala eswe hakachi ka A-Izalele.

4 Muze yuma yino te kanda yichilingiwa, sasendote yoze te wakusongwela yuma mu yipatulo yakutulikila yuma mu zuwo lia Zambi yetu, kapwile Eliashipe, usoko wa Tobia. 5 Iye yahana kuli Tobia chihela chinene, chize te akutulikila milambu ya wunga, libano, yikwachilo, yihanda ya kumi ya mbuto, vinyu yaha ni maji, yize kulita ni shimbi te atamba kuhana kuli A-Levi, njimba, akwa-kufunga mapito ni milambu yikwo ya asasendote.

6 Ha mashimbu jacho, yami te chishi mu Yerusaleme, mumu nahilukile kuli mwanangana ha mwaka makumi atatu ni wamuchiali wa Artasherke, mwanangana wa ku Babilonia. Hakupalika cha amwe mashimbu yingwita kuli mwanangana hanga nguye ku Yerusaleme. 7 Muze nahetele ku Yerusaleme, yingumona upi uze Eliashipe alingile. Iye kayukishile Tobia ha kumwaha chimwe chipatulo mu yiize ya zuwo lia Zambi wamwenemwene. 8 Yuma yize namwene yanguvwishile uli unji, kashika yingumbila yikashi yeswe ya Tobia yize yapwile mu chipatulo chacho. 9 Mba yingutuma kupemesa yipatulo ni kusamo cheka yikwata ya mu zuwo lia Zambi wamwenemwene, ni milambu ya wunga ni libano.

10 Yingunyingika nawa ngwami, A-Levi te keshi kwaha nawa yihanda yo, kashika A-Levi ni njimba waze te akulinga milimo yisandu yaya kwo, mutu ni mutu ku munda wenyi. 11 Kashika, yinguputuka kupajila mihato ja akwa-kuyula ni kwahula ngwami: “Mumu liaka nunalelesa zuwo lia Zambi wamwenemwene?” Chocho yingukunga A-Levi, yingwasa cheka nawa ha yihela yo. 12 A-Yunda eswe yaneha chihanda cha kumi cha mbuto, vinyu yaha ni maji mu yipatulo yakutulikila yuma. 13 Mba yingutongola sasendote Shelemia, Zadoke, longeshi wa shimbi, Pedaia, Ka-Levi hanga apwe tusongo a mu yipatulo yakutuliekela yuma, ngwe chikwashi cho, yingutongola Hanane mwana wa Zakure, mwana wa Matania mumu kapwile lunga wa kujikijila. Ayo kapwile ni chiteli cha kutetela kulia kuli mandumbu jo.

14 Ngwiwuluke kama Zambi yami, ha milimo yize hingunakulingila, kanda ujimuna yitanga ya utu wa zango yize hingunasolola mu zuwo lie ni hali waze akulinga milimo yamo.

15 Ha matangwa jacho, mu Yunda yingumona atu amwe kanakame uva, kanakunga mbuto ni kuyimbachila ha yimbulu ha tangwa lia Sambata. Kapwile ni kuneha vinyu, uva, mikuyu ni yuma yeka ni yeka mu Yerusaleme ha tangwa lia Sambata. Chocho yingwakanjisa hanga ahone kulanjisa yuma yacho ha tangwa lia Sambata. 16 A-Teru waze apwile mu mbonge, kapwile ni kuneha yishi ni yuma yeka ni yeka hanga ayilanjise ha Sambata kuli A-Yunda waze apwile mu Yerusaleme. 17 Kashika, yingutenukina alemu a mu Yunda ni kwahula ngwami: “Mumu liaka nunalingi chuma cha mutapu au ni kujilula tangwa lia Sambata? 18 Ngwami yino ye tulamba jenu alingile, chocho Zambi yetu yaneha lamba hali yetu eswe ni ha mbonge yino? Haliapwila nunokesa nawa ufwatulo wenyi hali A-Izalele ha kujilula Sambata.”

19 Hachino, yingutuma hanga yikolo ya Yerusaleme yipwe kuyika muze kwilu kanda kuchitoka, muze Sambata kanda yichiheta. Chocho, yingutuma hanga ahone kuyazulula ndo muze Sambata muyipalika, yingusa nawa amwe a kuli yikwashi jami ku yikolo hanga ahone kunjisa yikwata yeswayo ha tangwa lia Sambata. 20 Kashika, akwa-kulanjisa yuma yeka ni yeka yapomba haze lia Yerusaleme kamuwika hanji kaali. 21 Chocho, yingwatoweza ni kwahula ngwami: “Mumu liaka nunapombo hakamwihi ni chipanga? Nyi nwalinga nawa chuma chino, ngwiza ni kunuchiza kutachi.” Chize muze kakahilukile nawa ha tangwa lia Sambata.

22 Yingulweza A-Levi hanga alipemese mashimbu eswe, eze ni kufunga mapito hanga tangwa lia Sambata lipwe lisandu. Zambi yami, ngwiwuluke kama ha chikuma chino, nguvwile kama keke mumu lia utu wa zango lie.

23 Ha matangwa jacho, yingumona nawa A-Yunda waze alimbachile ni mapwo A-Ashedode, A-Amone ni A-Moape. 24 Amwe a kuli ana jo te kakuhanjika wika limi lia A-Ashedode ni malimi akwo a yilambala, alioze niumwe wa kuli ayo te wakuhanjika limi lia A-Yunda wakuhi. 25 Chocho yingwapajila, yingwashinga, yingulamba amwe a kuli ayo ni kusutula kambu jo, yingwashinjila hanga alishinge mu jina lia Zambi, yingwamba ngwami: “Kunwatambile kuhana ana jenu a mapwo hanga alimbate ni ana jo, chipwe kutayiza ana jo a mapwo hanga alimbate ni ana jenu a malunga hanji ni yenu ene. 26 Ngwami Solomone Mwanangana wa Izalele kavulumwine mumu lia mapwo? Hakachi ka mavungu eswe kuhakapwile mwanangana ngwe iye, iye te kakumuzanga chinji kuli Zambi yenyi, kashika Zambi amusele ngwe mwanangana hakachi ka A-Izalele eswe. Alioze, chipwe iye kavulumwine mumu lia mapwo yilambala. 27 Kuchi nwalinga chuma chipi chize ni kuvulumuna kuli Zambi ha kulimbata ni mapwo yilambala?”

28 Umwe wa kuli ana a malunga ja Joiada mwana wa Eliashipe sasendote wa lutwe, yambata mwana wa Sambalate Ka-Horone, kashika yingumuhuma kumeso jami.

29 Iwuluka kama atu wano Zambi yami, mumu hapihisa usasendote ni usendo uze walingile ni asasendote ni A-Levi.

30 Hachino, yingwapemesa ku luchisa mweswe wa yilambala, yinguhana milimo kuli asasendote ni A-Levi, mutu ni mutu ni mulimo wenyi. 31 Yingusa shimbi hakutwala ku kunyi jize atamba kuneha ha shimbu lialita ni mbuto jitangu jize atamba kuneha.

Zambi yami ngwiwuluke kama.