ESTERE

1 Ha matangwa ja Ahashueru* yoze te wakuyula mambonge 127, kukatuka ku India ndo ku Etiopia,* 2 ha mashimbu waze te atwama ha ngunja ya wanangana wenyi ku Shushane, 3 ha mwaka wamuchitatu wa kuyula chenyi, yalinga chiteleka, yakungulula akwa-lutwe ni tuvumbi jenyi eswe. Miata a maswalale a mu yifuchi ya A-Persia ni A-Media no he apwile hamwe ni alemu ni akwa-lutwe a mu mambonge. 4 Mba ha matangwa 180, iye wasolwele upite, uhenya ni ulemu wa mu wanangana wenyi. 5 Muze matangwa jacho ahwile, mwanangana yalinga chiteleka chinene mu yiize ya zuwo lia wanangana ku Shushane. Ha chiteleka chacho hapwile atu eswe, pichi ni yiswale. 6 Mu yiize mwapwile yikalakala ya mahina a wanda utoma ni walauluka, yakukasa ni mihipu ya linyu yipema. Mwapwile nawa mihipu ya wanda uchiuluka yakukasa ku ngo ja prata, ni ku manguji a marmore. Hashi hapwile mawe atoma ni alaa a marmore, yitwamo yapwile ya oru ni prata.

7 Vinyu te kakuyisa mu misenge ya oru, musenge ni musenge te walisa ni ukwo, mwanangana katumine kusa vinyu yinji kulita ni upite wenyi. 8 Niumwe te wakushinjila mukwo kunwa hanji kwecha kunwa wakuhi; yino ye shimbi yapwile ha chiteleka chacho. Mumu mwanangana kalwezele tuvumbi a ku zuwo lienyi hanga mutu ni mutu alinge kulita ni chize mazanga.

9 Mwazovu Vashti, neye yalingila mapwo chiteleka ku zuwo lia Mwanangana Ahashueru.

10 Ha tangwa liamuchishimbiali, muze mwanangana Ahashueru te anawahilila mumu lia vinyu, yatuma Mehumane, Bizeta, Harabona, Bigeta, Abagata, Zetare ni Karaka, tuvumbi shimbiali waze te akumukalakalila 11 hanga anehe Mwazovu Vashti kumeso ja mwanangana kanazala chipangula cha wanangana, asolole upeme wenyi kuli atu eswe ni kuli akwa-lutwe, mumu iye te chileza. 12 Alioze Mwazovu Vashti yalituna kulinga yize mwanangana amwichile. Hachino, mwanangana yatenuka chinji.

13 Chocho, mwanangana yahula akwa-mana waze te ananyingika kanawa shimbi,* mumu mwanangana kapwile ni chako cha kuhula kuli akwa-mana yikuma hakutwala ku shimbi ni upatwilo. 14 Amwe a kuli akwa-mana jacho kapwile, Karshena, Shetare, Adamata, Tashi, Mere, Marsena ni Memukane. Akwa-lutwe wano shimbiali A-Persia ni A-Media, kapwile ni kumana kumeso ja mwanangana, chikwo nawa, kapwile ni yihela yilemu mu wanangana. 15 Chocho mwanangana yaahula ngwenyi: “Kulita ni shimbi, yika atamba kulinga ni Mwazovu Vashti mumu lia kulituna kwononokena shimbi ya Mwanangana?”

16 Mba Memukane yakumbulula mwanangana ni akwa-lutwe jenyi ngwenyi: “Mwazovu Vashti kalelesele wika mwanangana, alioze kalelesa nawa akwa-lutwe eswe ni atu eswe a mu mambonge ja Mwanangana Ahashueru. 17 Mumu mapwo eswe makevwa yize Mwazovu alinga ni kulelesa malunga jo ni kwamba ngwo: ‘Mwanangana Ahashueru katumine kuneha Mwazovu Vashti kumeso jenyi, alioze iye yalituna kwiza.’ 18 Ha tangwa liacho, muze miazovu a mu Persia ni Media mevwa yize Mwazovu alinga, no makalinga chizechene kuli malunga jo, akwa-lutwe a mwanangana. Chocho, chino muchikaneha sau ni ufwatulo unji. 19 Nyi chinapemena kuli yenu mwanangana, hanenu shimbi ya wanangana mu jina lienu hanga ajisoneke mu shimbi ja A-Persia ni A-Media jize keshi kwalumuna ngwo, Vashti kechi kasoloka nawa kumeso ja Mwanangana Ahashueru. Mwanangana ahane chihela chenyi cha mwazovu kuli umwe pwo wamuhiana. 20 Mba muze shimbi ja mwanangana majinyingika mu wanangana wenu weswe, mapwo eswe makalemesa malunga jo, yiswale ni pichi.”

21 Chikuma chino yichipemena mwanangana ni akwa-lutwe, chocho mwanangana yalinga yize Memukane ambile. 22 Kashika, mwanangana yatuma mikanda mu mambonge eswe a mu wanangana kulita ni sona ja mbonge ni mbonge ni limi lia mutu ni mutu ngwo, lunga mweswe akayule mu zuwo lienyi mwene ni kuhanjika mu limi lia vungu lienyi.

2 Kulutwe lia yuma yino yeswe, muze ufwatulo wa Mwanangana te hiwapalika, iye yewuluka yize mwazovu Vashti alingile, ni chiyulo chize akwachile hakutwala kuli iye. 2 Mba akwa-kuyula amwe a mwanangana yamba ngwo: “Akafupile mwanangana ana-mapwo yileza waze kanda achilimona ni malunga.* 3 Mwanangana atongole malunga mu mambonge eswe a mu wanangana wenu, hanga akanehe ana-mapwo eswe yileza waze kanda achilimona ni malunga, ku zuwo lia wanangana ku Shushane, ayo makatwama ku zuwo lia mapwo. Akaahane mu moko ja Hegai, kavumbi* ka mwanangana yoze wakufunga mapwo ni kwaha yuma ya kulipemesa nayo. 4 Mba pwo yoze mapemena mwanangana kumakapwa mwazovu mu chihela cha Vashti.” Chocho, chiyulo chino yichivwisa mwanangana kuwaha, mba iye yalinga chocho.

5 Ku zuwo lia wanangana ku Shushane, kwapwile umwe Ka-Yunda yoze te avuluka ngwo Mordekai, mwana wa Njaire, mwana wa Shimei, mwana wa Kishi, Ka-Mbenjamine. 6 Iye kamukwachile ku Yerusaleme hamwe ni funge waze ambachile ni Jekonia* Mwanangana wa Yunda, yoze atwalile ngwe funge kuli Nabukanezore, Mwanangana wa Babilonia. 7 Mordekai mwe walelele Hadasa, hanji ngwetu Estere, mwana wa natu yenyi, mumu iye te mwana-shiwa. Kapwile umwe mwana-pwo chileza, mupema chinji, mba Mordekai yamutambula ni kumulela ngwe mwanenyi muze tato ni naye afwile. 8 Muze atu evwile shimbi ya mwanangana, ana-mapwo anji yaaneha ku zuwo lia wanangana ku Shushane, ni kwahana mu moko ja Hegai, Estere neye kamutwalile ku zuwo lia mwanangana ni kumuhichika mu moko ja Hegai, yoze te wakufunga mapwo.

9 Mwe mwana-pwo yapemena chinji Hegai ni kuwana vumbi kumeso jenyi. Kashika, Hegai kawashi-washi yamwaha yuma ya kulipemesa nayo, kulia chipema chinji ni kumwaha ana-mapwo shimbiali a ku zuwo lia mwanangana hanga amukalakalile. Chikwo nawa, iye yasa Estere hamwe ni ana-mapwo waze te akumukalakalila, mu chipatulo chipema cha mu zuwo lia mapwo. 10 Alioze, Estere kakahanjikile nichimwe chuma hakutwala kuli atu jenyi ni asoko jenyi, mumu Mordekai kamutowezele hanga achine kulweza yuma yacho kuli mutu niumwe. 11 Matangwa eswe, Mordekai te kakupalika kulutwe lia yiize ya zuwo lia mapwo hanga anyingike chize Estere ali ni yize yinalingiwa kuli iye.

12 Kulita ni shimbi, ana-mapwo eswe kapwile ni kulipemesa ha tukweji kumi ni aali shimbu te kanda achilisolola kuli Mwanangana Ahashueru, ayo kapwile ni kulinga chino hanga alipemese: Ha tukweji asambano te kakulipemesa ni maji a Mira, ha tukweji asambano ni maji a vumba lipema hamwe ni maji akwo a kulipemesa no. 13 Muze mashimbu a kulilulieka mahwa mba mwana-pwo manjila hanga alisolole kuli mwanangana, iye te kakutambula yeswayo yize meta hanga aye nayo ku zuwo lia mwanangana. 14 Iye te kakunjila mu zuwo lia mwanangana chingoloshi ni kutuhukamo chimene. Mba maya ku zuwo liamuchiali lia mapwo kuze te mamufungila kuli Shashagaji, kavumbi* ka mwanangana yoze wapwile ni kufunga mapwo akwo* a mwanangana. Mwana-pwo wacho te kechi kuhiluka nawa kuli mwanangana, shina wika nyi mwanangana mamuzanga ni kutuma kumusanyika ha jina.

15 Muze shimbu lienyi lia kulisolola kuli mwanangana liahetele, Estere mwana wa Abihele, natu ya Mordekai, yoze wamulelele ngwe mwanenyi, kakechile nichimwe, shina wika yize amuhele kuli Hegai kavumbi ka mwanangana, yoze te wakufunga mapwo. (Estere kapwile ni kumuchichimieka chinji kuli eswe waze te akumumona.) 16 Chocho, Estere yamutwala kuli Mwanangana Ahashueru, ku zuwo lia wanangana ha kakweji wamuchikumi, hanji ngwetu, ha kakweji wa Tebete ha mwaka wamuchishimbiali wa kuyula chenyi. 17 Mwanangana yazanga chinji Estere kuhiana ana-mapwo akwo, yamutayiza, yamujika chipangula cha wanangana ni kumupwisa mwazovu hanga asalakane Vashti. 18 Henaho, mwanangana yalingila Estere chiteleka chinene hanga amulemese, yasanyika akwa-lutwe ni tuvumbi jenyi eswe, yahana nawa utuswilo* mu mambonge ni yawana kulita ni upite wa mwanangana.

19 Muze ana mapwo aanehene ha chisuho chamuchiali, Mordekai te kanatwama ku chikolo cha Mwanangana. 20 Estere kakambile nichimwe chuma hakutwala kuli asoko jenyi ni atu jenyi ngwe chize Mordekai amulwezele. Estere yanunga ni kwononokena usongwelo wa Mordekai, ngwe chizechene te akulinga muze apwile ku zuwo lienyi.

21 Ha matangwa jacho, muze Mordekai te anatwama ku chikolo cha zuwo lia mwanangana, tuvumbi aali a mwanangana Bigatani ni Tereshe, waze te akufunga pito yevwa uli unji, mba yafupa kushiha mwanangana Ahashueru. 22 Muze Mordekai anyingikine yize malunga jacho te anambe kulinga, kawashi-washi yalweza chikuma chacho kuli mwazovu Estere. Estere neye yachilweza kuli mwanangana mu jina lia Mordekai. 23 Chikuma chacho yachihengwola, mba yamona ngwo kuma chili chamwenemwene. Mba malunga jacho aali yaahata ha mutondo, chocho lusango wacho yamusoneka mu mukanda wa sango ja mianangana.

3 Kulutwe lia yino yuma, Mwanangana Ahashueru yalemesa Hamane mwana wa Hamedata, Ka-Agage, yamunangamisa helu lia alemu eswe waze apwileko. 2 Tuvumbi eswe a mwanangana waze apwile ku chikolo cha zuwo lia mwanangana te kakuhetama ni kuwayila Hamane, kulita ni shimbi ya mwanangana. Alioze, Mordekai te kakulituna kuhetama ni kumuwayila. 3 Tuvumbi waze apwile ku chikolo cha zuwo lia mwanangana yahula Mordekai ngwo: “Mumu liaka yena kushi kwononokena shimbi ya mwanangana?” 4 Ayo te kakumuhula chihula chacho matangwa eswe, alioze iye te keshi kwapala. Chocho ayo yalweza Hamane hanga amone nyi ndako ya Mordekai yili yipema nyi ka. Mumu Mordekai te kakwalweza ngwenyi, kali Ka-Yunda.

5 Mba muze Hamane amwene ngwenyi, Mordekai kanalitunu kuhetama ni kumuwayila, yevwa uli unji. 6 Alioze, iye kakazangile kushiha wika Mordekai, mumu te hamulweza kulu hakutwala ku vungu lia Mordekai. Kashika, Hamane yafupa kukuwisa A-Yunda eswe waze apwile mu wanangana wa Ahashueru.

7 Ha mwaka 12 wa kuyula cha Ahashueru, ha kakweji mutangu, chekwamba, Nisane,* atele Puru (chekwamba, kuta Chela) kumeso ja Hamane hanga atese tangwa ni kakweji,* mba chela chaholokele ha kakweji 12, hanji ngwetu, wa Adare.* 8 Kashika, Hamane yalweza mwanangana Ahashueru ngwenyi: “Kuli amwe atu waze analimwanga mukachi ka mambonge eswe a mu wanangana wenu, shimbi jo jinalise ni shimbi ja atu akwo; chikwo nawa, keshi kukaula shimbi ja mwanangana. Kashika, nwatamba kulinga yimwe ha chikuma chino. 9 Nyi muchipemena kuli yenu mwanangana, hanenu shimbi ya kwakuwisa. Yami mungufweta 10,000 talentu* ja prata kuli maswalale hanga akajise mu mushete wa mbongo ja Wanangana.”*

10 Hachino, mwanangana yachiza kazeya ku munwe wenyi, yamuhana kuli Hamane mwana wa Hamedata, Ka-Agage, mukwa-kole wa A-Yunda. 11 Chocho mwanangana yalweza Hamane ngwenyi: “Prata ni atu, yeswe yili mu moko je, linga cheswacho chize muchikupemena.” 12 Mba ha tangwa 13 lia kakweji mutangu, yasanyika akwa-kusonekena mwanangana, ayo yasoneka yeswe yize Hamane azangile kutuma kuli akwa-kuyula ja mwanangana, kuli manguvulu a mu mambonge ni kuli akwa-lutwe a mu mambonge eswe, kulita ni kusoneka cha vungu ni vungu ni malimi jo. Mikanda yacho kayisonekene mu jina lia mwanangana Ahashueru ni kuyijika ni kazeya ka mwanangana.

13 Mikanda yacho yayituma mu mambonge eswe waze mwanangana te akuyula, kupalikila muli tunganda. Ha mikanda yacho hapwile shimbi yakwamba ngwo, akanongese, akakuwise ni kushiha A-Yunda eswe, akweze, tushinakaji, mapwo ni twanuke ha tangwa limuwika, ha tangwa 13 ha kakweji 12, chekwamba, kakweji wa Adare, ni kutambula yikumba yo. 14 Shimbi yacho te katamba kuyambulula mu mambonge eswe ni kuli atu eswe hanga te alilulieke hakutwala ku tangwa liacho. 15 Kulita ni shimbi ya mwanangana, tunganda yaya kawashi-washi ni kwambujola shimbi yacho ku zuwo lia wanangana ku Shushane. Chocho mwanangana ni Hamane yatwama hanga alie ni kunwa. Alioze mbonge ya Shushane te yili mu chizungo-zungo.

4 Muze Mordekai anyingikine yize te yinalingiwa, yasuwa mazalo jenyi, yazala chikeleyi, yalihinjila uto. Chocho yaputuka kwendangana mu mbonge ni kukololoka. 2 Iye yaya ndo kulutwe lia chikolo cha mwanangana, alioze kanjilile, mumu niumwe te watamba kunjila mu zuwo lia mwanangana kanazala chikeleyi wakuhi. 3 Mu mambonge eswe muze mwahetele shimbi ya mwanangana, A-Yunda waze apwilemo yaputuka kulinyenga, yalila mbimbi ni kulitwamina kulia. Anji a kuli ayo yaputuka kupomba ha yikeleyi ni kulihinjila uto. 4 Muze tuvumbi a mwazovu Estere a malunga ni a mapwo amulwezele yize te yinalingiwa kuli Mordekai, iye yaputuka kulihulumba chinji, kashika yatumina Mordekai mazalo hanga azule chikeleyi, alioze iye katayijile. 5 Muze Estere achivwile, yatuma Hataka, kavumbi yoze mwanangana asele hanga amulingile, aye kuli Mordekai amuhule mumu liaka analingi yuma yacho ni yize yinalingiwako.

6 Kashika, Hataka yaya ni kuhanjika ni Mordekai, yoze te unatwama mu yiize ku chikolo cha zuwo lia mwanangana. 7 Mordekai yamulweza yuma yeswe yize te yinalingiwa kuli iye, ni mbongo jize Hamane alakenyene kusa mu mushete wa upite wa mwanangana hanga anongese A-Yunda. 8 Yamwaha nawa mukanda wa shimbi yize mwanangana ahanyine mu mbonge ya Shushane hanga anongese A-Yunda. Mukanda wacho te katamba kuuhana kuli Estere ni kumulweza aye kuli mwanangana, aliumbe kuli iye hanga evwile atu jenyi keke.

9 Hataka yahiluka, yalweza Estere yuma yeswe yize Mordekai ambile. 10 Estere yatuma cheka Hataka hanga akumbulule Mordekai ngwenyi: 11 “Tuvumbi eswe a mwanangana ni atu a mu mambonge kananyingika ngwo, mutu mweswawo, lunga hanji pwo manjila mu yiize ya mwanangana chakuhona kumusanyika, mamushiha. Mutu wacho manunga wika ni mwono nyi mwanangana mamwolwela lukanda wa oru. Alioze yami, hinalinga matangwa 30 chakuhona kungusanyika kuli mwanangana.”

12 Muze Mordekai evwile yize Estere ambile, 13 iye yakumbulula Estere ngwenyi: “Kanda unyonga ngwe mununga ni mwono hakachi ka A-Yunda, mumu watwama mu zuwo lia mwanangana. 14 Tala, nyi wahola ha tangwa lino, ulamwino wa A-Yunda muwijila kweka, alioze yena ni vungu lia atatenu kumunufwa. Iya unanyingika, hanji kakutongwele upwe mwazovu wa mwanangana hanga ukwase ha mashimbu wano?”

15 Chocho Estere yakumbulula Mordekai ngwenyi: 16 “Yeenu nukunge A-Yunda eswe waze ali mu Shushane, litwaminenu kulia mumu lia yami. Kanda nulia chipwe kunwa chuma nichimwe ha matangwa atatu, ni yami kuno ni tuvumbi twami a mapwo che mutulinga. Munguya kuli mwanangana chipwe ngwe kuchalitele ni shimbi, chipwe mangushiha kushi mulonga.” 17 Chocho Mordekai yaya, yalinga yuma yeswe yize Estere amulwezele.

5 Ha tangwa liamuchitatu, Estere yazala mazalo a wanangana yaya mu yiize ya zuwo lia mwanangana hanga ashimbwile mwanangana, mwanangana te kali ku zuwo lia wanangana, kanatwama ha ngunja yenyi, kanatale ku chikolo. 2 Muze mwanangana amwene Mwazovu Estere kanamana mu yiize, yawahilila chinji ha kumumona. Chocho mwanangana yazoza lukanda wa oru yoze apwile nenyi ku kwoko. Estere yakundama yakwata ku songo lia lukanda.

3 Mwanangana yamuhula ngwenyi: “Kuchi chapwa Mwazovu Estere? Yika unazange kwita? Chipwe chihanda cha wanangana wami mungukwaha!” 4 Estere yakumbulula ngwenyi: “Nyi muchipemena yenu mwanangana, tweyenu musono yenu ni Hamane ha chiteleka chize nanululiekela.” 5 Chocho mwanangana yatuma ngwenyi: “Lwezenu Hamane eze kuno kawashi-washi hanga tuye ku chiteleka cha Estere.” Hachino, mwanangana ni Hamane yaya ku chiteleka chize Estere aluliekele.

6 Mba muze te ananu vinyu, mwanangana yahula Mwazovu Estere ngwenyi: “Yika unazange kwita? Eta, mungukwaha. Ngulweze yize unazange, chipwe chihanda cha wanangana wami, mungukwaha!” 7 Estere yakumbulula ngwenyi: “Yino ye ngunechi kuli mwanangana, 8 nyi muchilita ni kupemena kuli yenu mwanangana kungwaha yize ngunechi, yenu mwanangana hamwe ni Hamane tweyenu ha chiteleka chize mungukanululiekela hamene, mba ngukakumbulule chihula cha mwanangana.”

9 Ha tangwa liacho, Hamane yakatukako ni uwahililo unji. Alioze, muze amwene Mordekai kulutwe lia chikolo cha zuwo lia mwanangana kasolo kukatuka ni kufulamana, Hamane yevwila Mordekai uli unji. 10 Alioze, Hamane yalihumikiza, yaya ku zuwo lienyi, mba yasanyika masepa jenyi ni mukwo-pwo Zereshe. 11 Hamane yalinangamisa chinji mumu lia upite, ana jenyi ni chize mwanangana amusele helu lia alemu eswe a mwanangana.

12 Hamane yamba nawa ngwenyi: “Mwazovu Estere kasanyikanga wika yami ni mwanangana hanga tupwe ha chiteleka chize atululiekelanga. Kangusanyika nawa hanga ngukapwe hamuwika ni mwanangana ha chiteleka chikwo hamene. 13 Chipwe chocho, ngunevu uli unji ha kumona Mordekai Ka-Yunda, kanatwama kulutwe lia chikolo cha zuwo lia mwanangana.” 14 Chocho mukwo-pwo Zereshe ni masepa jenyi yamulweza ngwo: “Tuma kululieka mutondo wa mbandu* 50. Hamene chimene lweza mwanangana ngwo Mordekai katamba kumusukika ha mutondo. Nyi walinga chino, mukawahilila chinji ha chiteleka chize mukapwa ni mwanangana.” Hamane yazanga chinji chiyulo chacho, mba yatuma kululieka mutondo.

6 Ha ufuku wacho mwanangana kakahashile kupomba. Chocho yatuma hanga amunehene mukanda wa sango ja wanangana wa ha mashimbu jacho ni kwita hanga amutangilewo. 2 Ha kutanga mukanda wacho yamonaho ngwo, Mordekai kambulwile Bigatani ni Tereshe, tuvumbi aali a mwanangana, akwa-kufunga chikolo, waze azangile kushiha Mwanangana Ahashueru. 3 Mba mwanangana yahula ngwenyi: “Shina Mordekai kamulemesene ni kumuchichimieka ha yize alingile?” Tuvumbi ja mwanangana yakumbulula ngwo: “Ka, kakamuchichimiekene chipwe kumulemesa.”

4 Mwanangana yahula ngwenyi: “Iya uli mu yiize?” Mu yiize mwapwile Hamane yoze wejile ni kwita kuli mwanangana hanga asukike Mordekai ha mutondo uze anakamululiekela. 5 Tuvumbi a mwanangana yakumbulula ngwo: “Hamane mwe uli mu yiize.” Mba mwanangana yamba ngwenyi: “Mulwezenu hanga anjile.”

6 Muze Hamane anjilile, mwanangana yamuhula ngwenyi: “Yika atamba kulinga kuli lunga yoze mwanangana anazange kulemesa?” Hamane yanyonga ngwenyi: “Kota mwanangana yami anazange kulemesa.” 7 Chocho, Hamane yakumbulula mwanangana ngwenyi: “Lunga yoze mwanangana anazange kulemesa, 8 akamunehene mazalo a wanangana aze mwanangana akuzala, ni kavwalu yoze mwanangana akwendela, uli ni chipangula cha wanangana ha mutwe. 9 Mazalo ni kavwalu akayihane kuli umwe mukwa-lutwe mulemu wahiana wa mwanangana, akajike mutu yoze mazalo jacho, amunyinyise ha kavwalu ni kumwendesa mu jila yinene ya mbonge. Mukwa-lutwe yoze unamwendesa akakololoke ngwenyi: ‘Talenu chize mwanangana akulinga kuli mutu yoze anafupu kulemesa!’” 10 Hazehene mwanangana yamba kuli Hamane ngwenyi: “Yako kawashi ukande mazalo ni kavwalu, ukalinge kuli Mordekai Ka-Yunda yoze unatwama ku chikolo cha mwanangana yuma yeswe yize hiwamba. Kanda uvulama kulinga chuma nichimwe.”

11 Chocho Hamane yanda mazalo, yaajika Mordekai, yamunyinyisa ha kavwalu ni kumwendesa mu jila yinene ya mu mbonge ni kukololoka kulutwe lienyi ngwenyi: “Talenu chize mwanangana akulinga kuli mutu yoze anazange kulemesa!” 12 Mba kulutwe, Mordekai yahiluka ku chikolo cha mwanangana, alioze Hamane yaya kawashi-washi ku zuwo lienyi, yafuka ku mutwe mumu lia chinyengo ni sonyi jize te anevu. 13 Hamane yalweza mukwo-pwo Zereshe ni masepa jenyi eswe yuma yize yalingiwa kuli iye, mba akwa-mana jenyi ni mukwo-pwo Zereshe yamulweza ngwo: “Nyi Mordekai yoze waputuka kukulimbula kali lume wa ku munyachi wa A-Yunda, kuuchi kuhasa kumukumba. Mulimbuka kumeso jenyi.”

14 Muze te machihanjika, tuvumbi ja mwanangana yaheta, hazehene yaya ni Hamane ku chiteleka chize mwazovu Estere aluliekele.

7 Mwanangana ni Hamane yaya ku chiteleka cha Mwazovu Estere. 2 Ha tangwa liamuchiali lia chiteleka muze te ananu vinyu, mwanangana yahula cheka nawa Estere ngwenyi: “Yika unazange kwita? Eta, mungukwaha. Ngulweze yize unazange, chipwe chihanda cha wanangana wami mungukwaha!” 3 Mwazovu Estere yakumbulula ngwenyi: “Nyi muchilita ni kupemena kuli yenu mwanangana, ngunechi nulamwine mwono wami ni mwono wa atu jami. 4 Mumu yami ni atu jami, katulanjisa hanga atukuwise, atushihe ni kutunongesa. Nyi te katulanjisa hanga tupwe ndungo, kachi chambile chuma nichimwe. Alioze upi uno kuwatambile kulingiwa, mumu nyi walingiwa, muuneha kapinda kuli mwanangana.”

5 Mwanangana Ahashueru yahula Mwazovu Estere ngwenyi: “Iya walinga chuma chino? Lunga wacho kulihi ali?” 6 Estere yakumbulula ngwenyi: “Mukwa-kole wacho Hamane, lunga au mupi unalimika ni yetu.”

Hachino, Hamane yevwa woma unji mumu lia mwanangana ni mwazovu. 7 Mwanangana yevwa uli unji, chocho yakatuka ha chiteleka, yaya ni kwendangana mu munda wa ku zuwo lia wanangana. Alioze, Hamane yakatuka yaliumba kuli Mwazovu Estere hanga alamwine mwono wenyi mumu kamwene ngwenyi, mwanangana te matuma kumushiha. 8 Muze mwanangana ahilukile ku chiteleka, yawana Hamane hakundama ku chitwamo cha Estere, mwanangana yatenuka ngwenyi: “Chikwo nawa, iye kanazange kupomba ni pwo liami ku tachi mu zuwo liami!” Muze mwanangana ahwishile kuhanjika, yaafuka Hamane ku meso. 9 Harabona, umwe wa kuli tuvumbi ja mwanangana yamba ngwenyi: “Hamane hanalulieka mutondo hanga asukikeho Mordekai, lunga yoze unakalamwina mwono wa mwanangana. Mutondo wacho uli hakamwihi ni zuwo lia Hamane, uli ni usuhwe wa 50 a mbandu.”* 10 Chocho Hamane yamusukika ha mutondo uze anakaluliekela Mordekai. Mba ufwatulo wa mwanangana yiuhwa.

8 Ha tangwa liacho, Mwanangana Ahashueru yahana yuma yeswe ya Hamane mukwa-kole wa A-Yunda kuli Mwazovu Estere. Mordekai yeza kuli mwanangana mumu Estere te hamulweza ngwenyi, kali usoko wenyi. 2 Mba mwanangana yachiza kazeya yoze atambwile kuli Hamane yamuhana kuli Mordekai. Estere yahana zuwo lize liapwile lia Hamane kuli Mordekai hanga alifunge.

3 Estere yaya ni kuhanjika cheka ni mwanangana. Yaliumba ku yiliato yenyi ni kulila, yamwita hanga achize shimbi yize Hamane Ka-Agage asele ya kulimika ni A-Yunda. 4 Mwanangana yazoza lukanda wa oru kuli Estere, chocho Estere yakatuka, yamana kumeso ja mwanangana. 5 Estere yamba ngwenyi: “Nyi muchilita ni kupemena kuli yenu mwanangana, nyi munuchizanga, muchilita ni upale wenu, tumenu kwalumuna mikanda yize Hamane mwana wa Hamedata Ka-Agage, atumine kusoneka hanga akuwise A-Yunda ali mu mambonge eswe a mwanangana. 6 Mumu chichi kulivwa kanawa ha kumona upi uze muulingiwa kuli atu jami, chikwo nawa, chichi kuwahilila ha kumona atu jami kanaashiha.”

7 Chocho Mwanangana Ahashueru, yalweza Mwazovu Estere ni Ka-Yunda Mordekai ngwenyi: “Hinahana kuli mwazovu Estere zuwo lia Hamane, chipwe mwe Hamane hinamusukika ha mutondo mumu lia kuzanga kushiha A-Yunda. 8 Sonekenu haliapwila shimbi mu jina lia mwanangana hanga nukalile A-Yunda kulita ni chize nunazange, shimbi yacho munuyijika ni chilayi cha kazeya wa mwanangana, mumu shimbi ya kujika ni chilayi cha kazeya wa mwanangana kechi kuhasa kuyalumuna.”

9 Kashika, ha tangwa 23 lia kakweji wamuchitatu, chekwamba, ha kakweji wa Sivane,* yasanyika akwa-kusoneka a mwanangana, chocho yasoneka yuma yeswe yize Mordekai azangile kusonekena A-Yunda, akwa-kuyula, manguvulu ni akwa-lutwe a mu mambonge eswe chize ku India ndo ku Etiopia, mambonge 127. Ye mikanda yayisoneka kulita ni sona, ni limi lia mbonge ni mbonge, ni A-Yunda no yaasonekena kulita ni sona ni limi lio.

10 Mordekai yasoneka mikanda mu jina lia Mwanangana Ahashueru, yayijika ni chilayi cha kazeya wa mwanangana, yatuma mikanda yacho mu moko ja mikeji a mwanangana waze te akwenda ha tuvwalu waze te akuzomboka chinji. 11 Ha mikanda yacho, mwanangana yahana utayizo kuli A-Yunda a mu mambonge eswe hanga alikungulule ni kulikalila, ayo te mahasa kunongesa hanji kushiha atu waze te malimika no, chikwo nawa, te mahasa kushiha mapwo jo, ana jo ni kumbata yikumba yo. 12 Chino te chatamba kulingiwa ha tangwa limuwika mu mambonge eswe a Mwanangana Ahashueru, ha tangwa 13 lia kakweji 12, chekwamba, ha kakweji wa Adare.* 13 Shimbi yacho te katamba kuyambulula mu mambonge eswe. Atu eswe te katamba kuyinyingika hanga A-Yunda alilulieke ha tangwa liacho mba ahase kulikalila kuli akwa-kole jo. 14 Kulita ni shimbi ya mwanangana, mikeji a mwanangana yaya kawashi-washi ha tuvwalu ni ye shimbi yayambulula ku zuwo lia mwanangana ku Shushane.

15 Mba Mordekai yakatuka kumeso ja mwanangana kanazala mazalo a wanangana alauluka ni atoma ni chipangula chinene cha oru ku mutwe ni kazaku wa linyu yipema. Chocho, Akwa-Shushane yaputuka kutwa ngunda ni kuwahilila. 16 Kuli A-Yunda, chino yichineha sambukila,* uwahililo ni ulemu. 17 Mu mambonge eswe ni mu mayihunda muze mwahetele shimbi ya mwanangana, A-Yunda yawahilila chinji ni kulinga yiteleka. Atu anji a ku mavungu eka no yaputuka kuliamba ngwo kali A-Yunda, mumu lia kwivwa woma wa A-Yunda.

9 Ha tangwa 13 ha kakweji 12, chekwamba, ha kakweji wa Adare,* muze te anambe kumanununa shimbi ya mwanangana, ha tangwa lize akwa-kole azangile kunongesa A-Yunda, yuma yiyalumuka: A-Yunda e anongesene akwa-kole jo. 2 A-Yunda yalikungulula mu mambonge eswe a Mwanangana Ahashueru hanga alimike ni akwa-kole jo. Niumwe yoze wahashile kwakumba wakuhi, mumu eswe te kanevu woma wa A-Yunda. 3 Akwa-lutwe eswe a mu mambonge, akwa-kuyula, manguvulu ni waze te akufunga mingoso ya mwanangana, yakwasa A-Yunda, mumu lia woma wa Mordekai. 4 Mordekai yapwa mulemu ku zuwo lia mwanangana, lufuma wenyi yalimwanga mu mambonge eswe, mumu ulemu wenyi te unaliwezela.

5 A-Yunda kashihile akwa-kole jo eswe ni katana, ayo kalingile yeswe yize azangile kuli akwa-kole jo. 6 Ku zuwo lia wanangana ku Shushane, A-Yunda kashihile malunga 500. 7 Yashiha nawa Parshandata, Dalfone, Asapata, 8 Porata, Adalia, Aridata, 9 Parmasa, Arisai, Aridai ni Vaizata, 10 ana kumi ja Hamane mwana wa Hamedata, mukwa-kole wa A-Yunda. Alioze muze aashihile, A-Yunda kakanjile yikumba yo.

11 Ha tangwa lizeliene, yalweza mwanangana unji wa atu waze ashihile ku zuwo lia wanangana ku Shushane.

12 Mba mwanangana yalweza Mwazovu Estere ngwenyi: “Nyi ku zuwo lia wanangana ku Shushane A-Yunda kashiha atu 500 ni ana kumi ja Hamane, mba yika mutwamba hakutwala ku mambonge akwo a mu wanangana? Shina kuli nawa chuma chikwo chize unazange kwita? Eta, mungukwaha.” 13 Estere yakumbulula ngwenyi: “Nyi muchilita kuli yenu mwanangana, A-Yunda waze ali mu Shushane atambule utayizo hanga hamene alinge kulita ni shimbi yize nwahana musono, ni ana kumi ja Hamane aasukike ha mutondo.” 14 Chocho, mwanangana yalinga kulita ni yize Estere echile. Shimbi yayambulula mu Shushane ni ana kumi ja Hamane yaasukika ha mutondo.

15 A-Yunda waze apwile mu Shushane yalikungulula cheka nawa, ha tangwa 14 lia kakweji wa Adare, yashiha malunga 300 mu Shushane, alioze, ayo kakanjile yikumba yo.

16 A-Yunda akwo, waze te atwama mu mambonge akwo a mu wanangana, no yalikungulula hanga alamwine mwono wo. Ayo yakumba akwa-kole jo ni kushiha atu 75,000, alioze, ayo kakanjile yikumba yo. 17 Chino chalingiwile ha tangwa 13 lia kakweji wa Adare, mba ha tangwa 14 ayo yahwima, yapwisa tangwa liacho tangwa lia chiteleka ni uwahililo.

18 Alioze A-Yunda waze apwile mu Shushane, o yalikungulula ha tangwa 13 ni tangwa 14 lia kakweji wa Adare, ha tangwa 15 o yahwima, yapwisa tangwa liacho, tangwa lia chiteleka ni uwahililo. 19 Kashika A-Yunda waze te atwama mu yihunda yikehe-yikehe haze lia mbonge apwishile tangwa 14 lia kakweji wa Adare, tangwa lia uwahililo ni chiteleka, mashimbu waze te akulitumina kulia umwe ni mukwo.

20 Mordekai yasoneka yuma yino yeswe, yatuma mikanda kuli A-Yunda eswe waze te atwama mu mambonge a mu wanangana wa Ahashueru waze apwile hakamwihi ni kusuku. 21 Iye yaalweza hanga miaka yeswe apwe ni kulinga chiwanyino ha tangwa 14 ni ha tangwa 15 lia kakweji wa Adare, 22 mumu ha matangwa ni ha kakweji wacho he A-Yunda akumbile akwa-kole jo, yinyengo yo yapwile uwahililo, masoji jo apwile masoji a uwahililo. Ayo te katamba kwiwuluka matangwa jacho ha kulinga yiteleka ni uwahililo, kulitumina kulia umwe ni mukwo ni kuhana yawana kuli yiswale.

23 A-Yunda yatayiza kulinga chiwanyino chize aputukile ni yeswe yize Mordekai aasonekenene, 24 mumu Hamane mwana wa Hamedata Ka-Agage, mukwa-kole wa A-Yunda eswe, wazangile kukuwisa A-Yunda eswe ha kuta Puru, chekwamba, kuta chela hanga evwise woma ni kwanongesa. 25 Alioze, muze Estere ayile kuli mwanangana, mwanangana yahana shimbi ngwenyi: “Upi uze Hamane azangile kulinga kuli A-Yunda, uhiluke kuli iye mwene.” Chocho Hamane ni ana jenyi yaasukika ha mutondo. 26 Kashika asanyikine matangwa jacho ngwo, Purime, jina lize linakatuka ku liji Puru* mumu lia yuma yeswe yize asonekene ha mukanda, yize amwene ni yize yalingiwile. 27 A-Yunda yalilakenya ene ni munyachi wo ni eswe waze alichingile no hanga alinge chiwanyino cha matangwa aali ni kukaula yeswe yize asonekene hakutwala kuli ayo ha shimbu lize atesele miaka yeswe. 28 Matangwa jacho te katamba kwafunga ni kwewuluka mu yisemuko yeswe, mu usoko weswe, mu mambonge eswe ni mu yihunda yeswe. A-Yunda ni munyachi wo te katambile kulitwamina kulinga chiwanyino cha Purime.

29 Mba kulutwe lia matangwa, yasoneka mukanda wamuchiali hakutwala ku matangwa a Purime. Mwazovu Estere, mwana wa Abihele ni Mordekai Ka-Yunda, yatayiza mukanda wacho. 30 Iye yatuma mikanda kuli A-Yunda eswe waze apwile mu mambonge 127 a mu wanangana wa Ahashueru, ha mikanda yacho hapwile maliji a sambukila ni umwenemwene. 31 Maliji jacho kakolwezele A-Yunda hanga ewuluke chiwanyino cha Purime ha shimbu lize atesele ngwe chize Mordekai, Ka-Yunda ni Mwazovu Estere atumine kulinga, ni chize ayo ene ni munyachi wo alakenyene kulitwamina kulia ni kuliumba. 32 Maliji a Estere yashindakenya hakutwala ku chiwanyino cha Purime, chocho yasoneka sango jacho mu mukanda.

10 Mwanangana Ahashueru yahana milimo yikalu kuli atu a mu yifuchi ni a mu matungu a kalunga-lwiji.

2 Hakutwala ku yitanga yenyi yeswe ya tachi ni ya ndundo, ni chize alemesene Mordekai, hanayisoneka mu mukanda wa sango ja mianangana ja A-Media ni A-Persia. 3 Mordekai Ka-Yunda, wapwile mutu wamuchiali mu wanangana, Mwanangana Ahashueru mwe te wamuhiana wika. Kapwile mulemu hakachi ka A-Yunda, chikwo nawa, te kakumuvumbika chinji. Iye te kakukalakala hanga ayukise atu jenyi ni minyachi yo.