Maliji Atangu

AUNO uli mukanda wa yishima yamwenemwene. Yishima yacho kanakayichiza mu mukanda unene wa hano hashi, Mbimbiliya. Yishima yino yinalumbununa chize muze Zambi aputukile kutanga yuma yeswe mu malilu ni hashi, ndo ha matangwa jetu. Nawa yinatulweze yize Zambi analakenya kulinga kulutwe lia matangwa.

Mukanda uno muukwaha umwe ulumbunwiso wa chize Mbimbiliya yapwa. Unalumbununa hakutwala kuli atu a mu Mbimbiliya ni yuma yize ayo anakalinga. Nawa unasolola kutalatala chipema cha mwono wa mutolo, mu paraisu hano hashi, yize Zambi analakenya kuli atu.

Mukanda uno uli ni 116 ya yishima. Yili ya kukunga mu yihanda nake. Lifwo lia uputukilo wa yihanda yeswe, linalumbununa ni maliji akehe yize yili mu yihanda yacho. Yishima kanayilumbununa nikulita ni mashimbu waze yuma yacho yapwile. Yino muyikukwasa kunyingika mashimbu waze yuma yacho yapwile mu chishima, nikulita ni yuma yikwo.

Yishima yacho kanayilumbununa mu maliji ashi. Anji a kuli yenwe twanuke, munuhasa kuyitanga ukawenu. Yenwe yisemi, mununyingika ngwo ana-kemba noo mawahilila chinji ha kwatangila yishima yino ni kuyifunyina matangwa eswe. Nawa yenwe mununyingika ngwo mu mukanda uno muli yuma yinji yipema, ya akweze ni makulwana.

Ku songo lia yishima yeswe kunasoloka tupitulu ni versu a mu Mbimbiliya. Tunechi kuli yena hanga utange tupitulu ni versu mu Mbimbiliya, haze anakachiza yishima yacho. Muze yena mumanyisa kulilongesa chimwe chishima, nawa hengula yihula ya chishima chacho yize yili kulutwe lia Chishima 116 hanga uhane kumbululo.