Chize ha kusemuka cha Yesu ndo ha Kufwa Chenyi

Zambi yatuma mungelo Gabriele kuli umwe mwana-pwo mupema jina lienyi Maria. Iye yalweza Maria ngwo makasema umwe mwana yoze makayula ngwe mwanangana ha miaka yeswe. Mwana wacho, mwe Yesu, kanakasemukina mu tanga, mwenamo tufunga a mapanga ayile ni kumutala. Kulutwe lia matangwa, umwe katongonoshi yasongwela amwe malunga a ku chivumbuko ndo kuli mwana wacho. Yetwe mutunyingika iya yoze unakaasolwela katongonoshi wacho, nawa chize Yesu anakamulamwina ku ufwe.

Hi kusuloho, yetwe mutumona Yesu, muze te iye uchili ni miaka 12, kanahanjika ni alongeshi mu tembele. Ha kupalika cha miaka kumi ni nake Yesu yamupapachisa, hohene iye yaputuka kwambujola ni kulongesa hakutwala ku wanangana, mulimo uze Zambi anakamutuma hanga alinge hano hashi. Yesu yasakula 12 a malunga yavuluka ngwo apostolo, hanga amukwase mu mulimo wacho.

Yesu nawa kanakalinga yikomokeso yinji. Iye yalisa tununu twa atu ni amwe yishi ni jimwe mbolo. Iye yauka mieji, nawa yahindwisa afwu. Hi kusongo, mba mutulilongesa hakutwala ku yuma yinji yize yinakapwa kuli Yesu kusongo lia matangwa a mwono wenyi, ni chize iye anakafwa. Yesu kanakambujola sango jipema ha miaka yitatu ni chipinji, kashika CHIHANDA 6 chinakalinga 34 a miaka.