Yesu Kanalongesa ha Umwe Mulundu

TALA Yesu kanatwama aha. Iye kanalongesa atu eswe awa, ha umwe mulundu mu Ngalileya. Waze anatwama hakamwihi ni Yesu kali tumbaji twenyi. Iye yasakula 12 mukachi ko hanga apwe apostolo. Apostolo kali tumbaji alemu a Yesu. Yena unanyingika majina jo?

Majina jo wano, Semone Petulu ni mwanakwo Andeleu. Yikusuloho Tiangu ni mwanakwo Yoano. Postolo mukwo neye jina lienyi te Tiangu, mukwo te jina lienyi nawa Semone. Aali te kakwete jina lia Yundase. Umwe te Yundase Ka-Keriote, nawa Yundase mukwo te kakumuvuluka ngwo Tateu. Kwapwile nawa Fwilipe ni Natanele (nawa te kakumuvuluka ngwo Mbatolomeu), nawa Mateu ni Tomase.

Muze Yesu afunyine ku Samaria, iye yaputuka kwambujola chitangu ngwo: ‘Wanangana wa mu malilu hiwaheta hakamwihi.’ Yena unanyingika wanangana wacho yika? Uli umwe unguvulu wamwenemwene wa Zambi. Yesu mwe mwanangana wamo. Iye kanayula mu malilu nawa makaneha sambukila hano hashi. Wanangana wa Zambi muukapwisa hashi heswe paraisu yipema.

Hano Yesu te kanalongesa atu hakutwala ku wanangana wacho. Kashika iye yamba ngwenyi; ‘Chino che chanutamba kulemba. Tata Yetu uli mu malilu, jina lienu lifumane. Wanangana wenu wize. Upale wenu ulingiwe hashi chizechene ngwe unalingiwa mu malilu.’ Atu anji kakuvuluka kulemba chino ngwo ‘Kulemba cha Mwene.’ Atu akwo kakuchivuluka ngwo kulemba cha ‘Tata Yetu.’ Yena muhasa kutongola kulemba chacho cheswe?

Yesu yalongesa nawa kuli atu chize ayo chatamba kulifunga umwe ni mukwo. Iye yamba ngwenyi: ‘Yuma yeswe yenwe nunazange hanga atu alinge hali yenwe lingenu chizechene hali ayo.’ Shina yena wakuzanga muze akwenu anakufunga kanawa nyi? Kashika Yesu anakamba ngwo, yetwe chatutamba kufunga akwetu kanawa. Chichi kapwa chikomokeso mu paraisu hano hashi, muze atu eswe makachilinga?